Papa haʼe vaʼekue peteĩ pastór pe Iglésia Unida de Canadápe. Upévare káda domingo che ermána ha chéve oregueraha peteĩ kúrso bíblico ojejapóvape pe iglésiape, ha upe rire, las 11 de la mañána romoirũ chupe tupaópe. Ha kaʼarukue katu roho vaʼekue che sýndi Salón del Réinope. Ore rohechakuaa vaʼekue mbaʼeichaitépa idiferénte umi mokõi rrelihión.

Che sy opredika vaʼekue iñamigokuéra Bob ha Marion Hútchesonpe ha upe rire oiko vaʼekue avei chuguikuéra Testígo. Bob ha Marion chegueraha vaʼekue hendivekuéra ha umi tres ifamíliandi peteĩ asambléa internasionál ojejapo vaʼekuépe Nueva Yórkpe áño 1958-pe hérava “Voluntad divina”. Apensávo upévare añemeʼẽ enkuénta oiméne ijetuʼu hague chupekuéra chegueraha hendivekuéra. Péro núnka ndacheresaraimoʼãi upe asambléagui.

Chemitãrusúpe roiko vaʼekue peteĩ gránhape ojeguerekohápe heta animál, ha upéva chegustaiterei voi. Upévare astudiase vaʼekue oiko hag̃ua chehegui veterinário. Che sy omombeʼu upéva peteĩ ansiáno ore kongregasionguápe. Upéi pe ansiáno chemomanduʼa jaikomaha “umi ára pahápe” ha aháramo universidápe heta áñore ikatuha hína añemomombyry Jehovágui (2 Tim. 3:1). Upévare adesidi ndahamoʼãiha universidápe.

Upérõ che aikuaase gueteri mbaʼépa ajapóta atermina rire che koléhio. Asẽramo jepe apredika  fin de semanakue, ndahaʼéi vaʼekue la chegustapáva ha napensái vaʼekue oikóvo chehegui prekursór. Che túa ha che tio ndahaʼéiva Testígo oipota vaʼekue ambaʼapo peteĩ emprésa de segúro tuichávape. Che tio omanda guasu vaʼekue upe emprésape ha upévare aha ambaʼapo upépe.

Toróntope, ambaʼapoiterei ha ajeheʼa meme rupi umi ndahaʼéivare Testígo ndaikatúi vaʼekue aservi porã Jehovápe. Upérõ guare che aiko vaʼekue che avuélondi, péro upéi omano rire tekotevẽ kuri aheka ótro lugár aiko hag̃ua.

Bob ha Marion haʼe vaʼekue che túa ha che syramoguáicha, haʼekuéra ningo chegueraha vaʼekue pe asambléape 1958-pe. Haʼekuéra cheinvita aiko hag̃ua hógape ha chepytyvõ amombarete hag̃ua che jerovia Jehováre. Áño 1960-pe ajevautisa John ndive, haʼéva peteĩva ifamiliakuéra. John oñepyrũ vaʼekue ojapo iprekursorádo rregulár, upéva chemomýi apredikave hag̃ua. Umi ermáno kongregasionpegua ohechakuaa aprogresaha ahávo ha upéi añenombra siérvo pe Eskuéla del Ministério Teokrátikope. a

Amenda Randi Bérgere 1966-pe, haʼe ningo peteĩ prekursóra ikyreʼỹva ha oserviséva umi lugár oñekotevẽhápe. Ore superintendénte oñeinteresa orerehe ha oremokyreʼỹ roho hag̃ua roservi peteĩ kongregasión oĩvape Orillia Ontáriope. Upévare pyaʼe porã rojeprepara ha rova upépe.

Rog̃uahẽre Orílliape añepyrũ ajapo che prekursorádo rregulár. Randi ikyreʼỹeterei rupi ajúma che avei chekyreʼỹ. Ajapo rupi che prekursorádo aikuaa mbaʼépa heʼise javyʼa ñamboʼévo la héntepe la Biblia ha jahecha ontendeha pe añetegua. Peteĩ vendisión ningo oréve roipytyvõ peteĩ matrimónio oĩvape Orílliape ojapo hag̃ua kámbio hekovépe ha oiko chuguikuéra Ñandejára siérvo.

Roĩ aja Toróntope roikuaa Arnold MácNamarape, peteĩ ermáno orekóva rresponsavilida Betélpe.  Haʼe oporandu oréve ndoroserviséipa de prekursór espesiál. Upepete voi haʼe chupe: “Kláro ke si, ndahaʼéima guive Quebécpe”. Umi canadiense oñeʼẽva ingléspe opensa vai umi canadiense oñeʼẽvare francéspe ha oikóva Quebécpe, ha che añepyrũma avei apensa péicha. Upe tiémpope upe lugárpe oiko kuri heta manifestasión pe goviérno kóntrape, pórke umi hénte oipota kuri Quebec oñeindependisa Canadágui.

Arnold heʼi chéve: “Koʼág̃a ningo Quebécpe añoite hína oñemondo umi prekursór espesiál”. Upémarõ upepete aasepta aha hag̃ua Quebécpe. Che aikuaa voi kuri Randi ohose hague upépe oservi. Upe rire ahechakuaa péva la iporãvéva rodesidi vaʼekue rojapo.

Roho rire peteĩ kúrso de francéspe 5 semána aja, Randi, che ha peteĩ matrimónio roho Rimóuskipe, opytáva 540 kilómetro Montreálgui. Péro aaprende vaʼerã gueteri heta mbaʼe ha péva ojepilla porãiterei kuri aleérõ guare peteĩ anúnsio kongregasiónpe. Che haʼe kuri pe ótra asambléape outaha “heta ñandu guasu”, haʼe rangue outaha “heta austriaco”, pórke upe idiómape umi palávra ojojogua.

Rimóuskipe roĩ éntre 4, oremoirũ avei 4 ermána soltéra ikyreʼỹetereíva ha avei peteĩ matrimónio ijapellídova Huberdeau ha mokõi ifamíliava. Pe família Huberdeau oalkila peteĩ óga guasu 7 ikotýva ha rombohéra pe “óga morotĩ”, pórke pe henonde ha umi ipilarkuéra morotĩ vaʼekue. Entéro umi prekursór roikóva upépe roipytyvõ ojepaga hag̃ua la alkilér ha roĩ jepi éntre 12 ha 14 persóna. Randi ha che haʼe rupi prekursór espesiál ropredika vaʼekue pyhareve, kaʼaru ha pyhare. Upévare rovyʼaiterei vaʼekue roreko haguére ore irũrã ore aktividápe roʼýramo jepe.

La roikóva upe ógape oñoamigoite vaʼekue, haʼete voi peteĩ família. Rojatapy jepi ha roguapy vaʼekue ijerére térã rokosina oñondivepa. Sabadokue ropurahéi ha rojeroky vaʼerã oñondivepa pórke peteĩva umi ermáno músiko vaʼekue.

Hetaiterei hénte oikuaase vaʼekue la Bíbliagui Rimóuskipe. Upévare umi 5 áño ropredika aja upépe rovyʼaiterei rohechávo mbaʼéichapa umi estudiánte oprogresa ha ojevautisa. Avei rohecha mbaʼéichapa pe kongregasión okakuaa ha ojehupyty 35 puvlikadór.

Quebécpe roñembokatupyryve roporomboʼe hag̃ua. Rohecha mbaʼéichapa Jehová orepytyvõ ropredika hag̃ua ha avei mbaʼéichapa omeʼẽ oréve umi mbaʼe roikotevẽva. Avei roikuaa porãve umi persóna oñeʼẽvape francéspe ha roñepyrũ rohayhu iñidióma ha ikostúmbre. Upéva orepytyvõ vaʼekue romombaʼeve hag̃ua umi persóna orekóvape ótra kultúra (2 Cor. 6:13).

Rohaʼarõʼỹve jave pe sukursál ojerure oréve rova hag̃ua Tracádiepe, oĩva éste gotyo Nueva Brúnswickpe. Kóva ijetuʼu vaʼekue oréve pórke upérõ guare rofirma ramo peteĩ kontráto roalkila hag̃ua peteĩ departaménto, ha che katu afirma peteĩ kontráto amboʼe hag̃ua peteĩ eskuélape unos kuánto día a la semána. Upérõ guare unos kuánto ore estudiánte de la Bíbliagui oikóma puvlikadór ha romopuʼã hína kuri peteĩ Salón del Reino. Koʼã mbaʼére ijetuʼu vaʼekue rodesidi hag̃ua la rojapótava.

Heta ningo roñemboʼe upe fin de semána ko kámbiore. Upéi roho Tracádiepe ha rohecha idiferenteteha Rimóuskigui, péro Jehová oipota rupi roho upépe rodesidi rova. Rojerovia ningo Jehováre ha rohecha mbaʼéichapa haʼe orepytyvõ rombohovái hag̃ua káda situasión (Mal. 3:10). Randi ningo ijerovia mbarete, isakrifikáda ha ovyʼakuaa,  upévare ndahaʼéi vaʼekue oréve la ijetuʼuetereíva rova hag̃ua.

Ore kongregasión pyahúpe oĩ vaʼekue peteĩ ansiánonte hérava Robert Ross. Haʼe ha hembireko hérava Linda oservi vaʼekue upépe de prekursór. Ha onase rire ifamília haʼekuéra odesidi opyta upe kongregasiónpe. Haʼekuéra oremokyreʼỹeterei orerresivi porã haguére, idesidído ha iguápo haguére predikasiónpe.

Roservi rire 2 áñore kómo prekursór Tracádiepe oiko jey peteĩ mbaʼe norohaʼarõiete vaʼekue: Roñeinvita roservi hag̃ua kómo superintendénte viahánte. Roservi sirkuíto ingléspe 7 áñore ha upéi rova pe sirkuíto francés oĩvape Quebécpe. Pe superintendénte de distríto Quebecpegua, Léonce Crépeault, cheguerohory jepi umi diskúrso ajapo vaʼekuére, péro upe rire oporandu vaʼerã chéve: “¿Mbaʼéichapa umi nde diskúrso ikatu ideprovechove umi ermánope?”. b Péva chepytyvõiterei vaʼekue añekonsentra hag̃ua mbaʼéichapa aporomboʼe hína ikatu hag̃uáicha isensíllo ha ifásil oñentende.

Peteĩva umi asignasión amombaʼevéva haʼe pe areko vaʼekue pe asambléa internasionál héravape “Fe victoriosa” ojejapo vaʼekue 1978-pe Montreálpe. Upérõ guare ambaʼapo kuri pe Departaménto de Aliméntospe, ha ojekalkula kuri oĩtaha 80 mil persóna. Kavalete upe jave oñekambia oñembaʼapo lája upe Departaméntope ha opa mbaʼe ipyahupaite oréve g̃uarã, por ehémplo ipyahu umi mákina, umi tembiʼukuéra ha ojeprepara lája. Roguereko kuri 20 rremólke tuichaicháva oñemantenehápe umi tembiʼu, péro sapyʼánte umíva ndoikoporãi kuri. Ha hiʼarive ndaikatúi kuri roike pe estádiope roprepara hag̃ua un día ánte pe asamblearã, pórke upe díape ojepuru kuri pe estádio ojejapo hag̃ua peteĩ evénto deportívo. Upévare pyhare las 12 rupi ae roike, roñepyrũ rombaʼapo ha de madrugáda romyendy umi órno ikatu hag̃uáicha koʼẽ mboyve ropreparapáma pe rambosag̃ua. Upérõ orekaneʼõiterei, péro heta mbaʼe aaprende umi che kompañerokuéragui ahechávo mbaʼéichapa haʼekuéra ombaʼapo pohýi, iñakãguapy ha ovyʼakuaa. Upe guive ropyta oñoamigoite. Avyʼaiterei ningo ikatu haguére ambaʼapo ko asambléa iñimportantetévape ojejapo vaʼekue Quebécpe, pe siuda yma ojepersegi haguépe umi ermanokuérape éntre 1940 ha 1950.

 Heta mbaʼéma aaprende umi ótro ermáno oservi vaʼekuégui de superintendénte umi asambléa tuichávape ojejapóva Montreálpe. Peteĩ vuéltape, ermáno David Splane, koʼág̃a oĩva pe Kuérpo Governántepe, oservi kuri de superintendénte peteĩ asambléape. Ótra asambléape oñemeʼẽ chéve upe rresponsavilida ha ermáno David heta chepytyvõ.

Aservi rire de superintendénte 36 áñore, 2011-pe añeinvita aservi hag̃ua de instruktór pe Eskuéla Ansianokuérape g̃uarãme. Dos áñopente roke 75 diferénte tupápe, péro ovale kuri la péna umi sakrifísio. Opávo pe eskuéla káda semána, umi ansianokuéra ovyʼaiterei voi, pórke ohechakuaa mbaʼéichapa pe Kuérpo Governánte oipota omombarete hikuái iñamista Jehovándi.

Upéi añepyrũ amboʼe pe Eskuéla de Evanhelisadórpe. Ahecha jepi mbaʼéichapa umi estudiánte ojedesespera primerorã orekógui hetaiterei mbaʼe ojapo vaʼerã. Haʼekuéra ningo oguapy vaʼerã pe klásepe 7 órarupi káda día, oreko itaréa ojapo vaʼerã 3 órarupi káda pyhare, ha otoka jepi chupekuéra 4 térã 5 asignasión káda semána. Pe ótro instruktór ha che roexplika jepi umi estudiántepe ndaikatumoʼãiha okumpli hikuái umi asignasión Jehová noipytyvõiramo chupekuéra. Núnka ndacheresaraimoʼãi mbaʼéichapa umi estudiánte oñesorprende jepi ohechávo mbaʼéichapa okonfia rupi Jehováre okumpli umi asignasión ni noñeimahinái vaʼekue ikatutaha.

Mama ningo oñeinteresa vaʼekue ótrore, upéicha rupi iñestudiantekuéra oprogresa ha haʼe oipytyvõ avei papápe oasepta hag̃ua ohóvo ore rrelihión. Upéicha rupi, 3 día che sy omano rire, papa oresorprende og̃uahẽvo ohóvo Salónpe ohendu hag̃ua peteĩ diskúrso púvliko. Ha upe guive 26 áñore ndofaltáiva rreunionhápe. Che túa núnka ndojevautisái, péro umi ansianokuéra omombeʼu chéve haʼe raẽvete la og̃uahẽva Salónpe rreunionrã.

Che sy oheja peteĩ ehémplo iporãitereíva chéve ha che ermanakuérape. Umi mbohapy che ermána oservi porã Jehovápe imenakuérandi: Mokõi oĩ Betélpe, peteĩva Portugálpe ha ótra katu Haitípe.

Koʼág̃a Randi ha che roservi de prekursór espesiál Hamilton Ontáriope. Yma roserviha tiémpope pe sirkuítope rovyʼaiterei vaʼekue ikatu jave romoirũ umi ermanokuérape ojapo hag̃ua umi irrevisitakuéra ha umi kúrso bíblico. Péro koʼág̃a rovyʼavéntema rorekóvo ore estudiánte de la Biblia ha rohechávo mbaʼéichapa ohayhu ohóvo hikuái Jehovápe. Avei roikuaave umi ermanokuéra oĩvape ore kongregasión pyahúpe ha oremokyreʼỹ rohechávo mbaʼéichapa Jehová siémpre oĩ ijykerekuéra tahaʼe iporãva térã ivaíva la oikóva hesekuéra.

Ropensávo umi mbaʼe rohasa vaʼekuére rovyʼaiterei oĩ haguére oñeinteresáva orerehe. Upévare ore avei roñehaʼã rojepyʼapy káda ermánore ha roanima chupekuéra oñemeʼẽmbaite hag̃ua Jehová servísiope (2 Cor. 7:6, 7). Por ehémplo oĩ peteĩ ermáno orekóva hembireko, itaʼýra ha itajýra ojapóva iprekursorádo rregulár. Peteĩ vuéltape che aporandu pe ermánope haʼépa noñanimái avei ojapo iprekursorádo. Ha pe ermáno heʼi chéve haʼe okuidaha mbohapy prekursór rehe. Upémarõ aporandu chupe: “¿Ha ndéiko nderekalkulái Jehová ikatuha oñangareko porãve hesekuéra?”. Ha amokyreʼỹ chupe oñepyrũ hag̃ua avei iprekursorádo, ha 6 mése haguépe oservíma avei de prekursór rregulár.

Randi ha che rosegíta romombeʼu pe “henerasión oúvape” umi “mbaʼe porã” Jehová ojapóva, ha hiʼãite oréve haʼekuéra odisfruta oservívo chupe, ore rodisfrutáma haguéicha (Sal. 71:17, 18).