1. ¿Mbaʼérepa iporã jajeprepara oiko mboyve peteĩ desástre?

 OIKO jave peteĩ desástre peteĩ persóna oĩva preparáda ombohovái hag̃ua upéva, orekove posivilida ojesalva hag̃ua ha avei oipytyvõ hag̃ua ótrope. Peteĩ organisasión oĩva Európape oipytyvõva la héntepe heʼi: “Tuicha ñanepytyvõta jajeprepara porãramo”.

2. ¿Mbaʼérepa jajeprepara vaʼerã pe jehasa asy guasúpe g̃uarã? (Mateo 24:44).

² Pe “jehasa asy guasu” oúta derrepentete (Mat. 24:21). Umi desástre oikóva jepi ou avavete opillaʼỹre, péro ñande jaikuaáma outaha pe jehasa asy guasu. Ojapóma 2.000 áñorupi Jesús heʼi hague idisipulokuérape tekotevẽha oĩ preparádo upe díape g̃uarã (elee Mateo 24:44). Jasegíramo ikonsého, ifasilvéta ñandéve jajesalva hag̃ua ha ñaipytyvõ hag̃ua ótrope (Luc. 21:36).

3. ¿Mbaʼérepa tekotevẽ ñaneaguánte, japoroporiahuvereko ha japorohayhu ñaĩ hag̃ua preparádo pe jehasa asy guasúpe g̃uarã?

³ Oĩ mbohapy mbaʼe ñanepytyvõtava ñaĩ hag̃ua preparádo ou vove pe jehasa asy guasu. Ñapensamíntena: ¿Mbaʼépa jajapóta ojejeruréramo ñandéve japredika hag̃ua peteĩ mensáhe ipohýiva ha la hénte oñemoĩmba ñanderehe? (Apoc. 16:21). Upe moméntope ñaneaguánte vaʼerã ikatu hag̃uáicha ñaneñeʼẽrendu Jehovápe ha ñakonfia haʼe ñandeprotehetaha. ¿Ha mbaʼépa jajapóta ñane ermanokuéra operdepa léntoramo la orekóva térã opytáramo mbaʼeveʼỹre? (Hab. 3:17, 18). Upépe tekotevẽta jaiporiahuvereko chupekuéra ikatu hag̃uáicha ñaipytyvõse umi ermánope. ¿Ha mbaʼépa oikóta ñandeataka vove pe grúpo de nasión? ¿Mbaʼéichapa ñarreaksionáta tekotevẽramo jaha ñakañy ñane ermanokuérandi ha jaiko hendivekuéra peteĩ lugár michĩvape un tiémpore? (Ezeq. 38:10-12). Tekotevẽta jahayhu ñane ermanokuérape jagueropuʼaka hag̃ua upe situasión ijetuʼuetéva.

4. ¿Mbaʼéichapa la Biblia ohechauka jasegi vaʼerãha ñaneaguánte, japoroporiahuvereko ha japorohayhu?

 ⁴ La Biblia ñanemokyreʼỹ jasegi hag̃ua ñaneaguánte, japoroporiahuvereko ha japorohayhu. Lucas 21:19-pe heʼi: “Peẽ peaguantáramo pe fin peve, pesalváta pende rekove”. Colosenses 3:12 heʼi: ‘Pehechaukákena peiporiahuverekoha pende rapichápe’. Ha 1 Tesalonicenses 4:9, 10 heʼi: ‘Ñandejára penemboʼéma voi pejoayhu vaʼerãha. Péro koʼág̃a rojerure jey jey peẽme pesegi hag̃ua pejoayhuve’. La heʼíva koʼã téxtope ojeʼe vaʼekue umi kristiáno ypykuépe. Haʼekuéra ohechaukáma voi kuri iñaguánte, oporoporiahuvereko ha oporohayhuha, péro osegi vaʼerã kuri ohechauka koʼã kualida. Ha ñande jajapo vaʼerã avei upéicha. Jahechamína mbaʼéichapa umi kristiáno ohechauka vaʼekue koʼã kualida ha mbaʼéichapa ikatu jasegi iñehemplokuéra ñaĩ hag̃ua preparádo pe jehasa asy guasúpe g̃uarã.

5. ¿Mbaʼépa oipytyvõ vaʼekue umi kristiáno síglo primérope guarépe oaguanta hag̃ua?

⁵ Umi kristiáno síglo primeropegua tekotevẽ vaʼekue iñaguánte (Heb. 10:36). Haʼekuéra oreko vaʼekue umi provléma orekónteva voi umi hénte upe tiempopegua. Upéva ári opersegi vaʼekue chupekuéra umi autorida Romapegua, umi líder rrelihióso judío ha ihentekuéra jepe oñemoĩ hesekuéra (Mat. 10:21). Avei pe kongregasiónpe oĩ vaʼekue umi apóstata oñehaʼãva odividipa umi ermanokuérape (Hech. 20:29, 30). Péro haʼekuéra osegi vaʼekue oaguanta (Apoc. 2:3). ¿Mbaʼépa oipytyvõ chupekuéra? Haʼekuéra ojepyʼamongeta vaʼekue umi Ñandejára siervokuéra ehémplore, umíva apytépe Job rehe (Sant. 5:10, 11). Avei oñemboʼe meme vaʼekue Jehovápe ha opensa umi mbaʼe porã ohupytýtavare osegíramo oaguanta (Hech. 4:29-31; 5:41).

6. ¿Mbaʼépa ikatu ñaaprende Merita ojapo vaʼekuégui?

⁶ Ñande avei ikatu ñaneaguánte. Upearã jajepyʼamongeta vaʼerã Ñandejára siervokuéra ehémplore jatopáva la Bíbliape ha avei ñane puvlikasionkuérape. Peteĩ ermána Albaniagua hérava Merita omombeʼu ihentekuéra oñemoĩ mbarete hague hese. Haʼe heʼi: “Opokoiterei cherehe astudiárõ guare Job ehémplo. Haʼe ohasa vaʼekue heta situasión ijetuʼúva ha ndoikuaái máva káusarepa osufri. Upéicharõ jepe Job heʼi: ‘Amano meve asegíta cheñeʼẽrendu’ (Job 27:5). Apensávo la Job ohasa vaʼekuére ahechakuaa ndahaʼeiha mbaʼevete asy la che ahasáva, ha hiʼarive che aikuaa mávapa la ñanembosufríva hína”.

7. ¿Mbaʼépa jajepokuaáma vaʼerã jajapo ndajahasáiramo jepe hína peteĩ situasión ijetuʼúva?

⁷ Jajepokuaáramo ñañemboʼe meme Jehovápe ñande pyʼaite guive ñaneaguantevéta avei (Filip. 4:6; 1 Tes. 5:17). Ikatu koʼag̃aite ndajahasái hína peteĩ situasión ijetuʼuetereíva. Péro ñapensamína, ¿ñañemboʼépa Jehovápe nañandegustái jave álgo, ndajaikuaáirõ mbaʼépa jajapóta térã jajedesahusia jave? Koʼág̃ama voi ñañemboʼe meméramo Jehovápe umi provléma jarekóvare káda día, ifasilvétama ñandéve ñañemboʼe chupe ou vove umi provléma tuichavéva. Ha ndajadudamoʼãi Jehová oikuaaha mbaʼéichapa ha arakaʼetépa ñanepytyvõta (Sal. 27:1, 3).

8. ¿Mbaʼéichapa Mira ehémplo ohechauka ñaneaguánteramo koʼág̃a ñanepytyvõtaha ñaaguanta hag̃ua amo gotyove? (Santiago 1:2-4). (Ehecha pe taʼanga).

⁸ Koʼág̃ama voi ñaneaguánterõ ikatúta jagueropuʼaka ou vove pe jehasa asy guasu (Rom. 5:3). ¿Mbaʼérepa ikatu jaʼe upéva? Heta ermáno ohechakuaa oaguanta jave peteĩ situasión ijetuʼúva, upéi iñaguantevemaha ombohovái hag̃ua ótro provléma. Haʼekuéra ohecha mbaʼéichapa Jehová oipytyvõma chupekuéra ha upévare ojeroviave hese. Ha okonfia  rupi hese osegi oaguanta umi pruéva oúva upe rire (elee Santiago 1:2-4). Péicha oiko vaʼekue peteĩ prekursóra Albaniagua héravare Mira. Haʼe omombeʼu sapyʼánte opensaha voi ndaiporiha ótro haʼéicha iprovléma hetáva. Upéicha jave haʼe ojepyʼamongeta mbaʼéichapa Jehová hetáma oipytyvõ chupe umi 20 áño ohasa vaʼekuépe. Ha heʼi ijupe: “Esegíkena ndefiél, ani refalla Jehovápe. Haʼe ningo hetáma nepytyvõ elucha ha ehasa hag̃ua umi pruéva”. Ñande avei ikatu ñapensa mbaʼéichapa Jehová ñanepytyvõma ñaaguanta hag̃ua. Ñaimekuaa segúro Jehová ohechaha káda pruéva jahasáva ha ñanevendesitaha ñaneaguánte haguére (Mat. 5:10-12). Upéi oñepyrũ vove pe jehasa asy guasu jaikuaátama mbaʼéichapa ñaaguanta vaʼerã ha jajedesidíta voi jasegitaha jajapo upéva.

9. ¿Mbaʼéichapa umi kristiáno oikóva Antioquía de Síriape ohechauka oporoporiahuverekoha?

⁹ Jahechamína la oiko vaʼekue umi kristiáno Judeaguáre ohasárõ guare peteĩ ñembyahýi guasu. Umi kristiáno oĩva Antioquía de Síriape oikuaárõ guare upéva, oiporiahuvereko chupekuéra. Péro ndahaʼéi upévante, síno ojapo avei ikatúva guive oipytyvõ hag̃ua umi Judeaguápe. Umi Antioquiagua “odesidi káda uno oguerahakataha la ikatumíva oipytyvõ hag̃ua umi ermáno oikóvape Judéape” (Hech. 11:27-30). Umi ermáno ohasáva pe ñembyahýi guasu oikóramo jepe mombyry, upéva ndojokói umi Antioquiaguápe oipytyvõ hag̃ua iñermanokuérape (1 Juan 3:17, 18).

10. Oiko jave peteĩ desástre, ¿mbaʼéichapa ikatu jahechauka jaiporiahuverekoha ñane ermanokuérape? (Ehecha pe taʼanga).

¹⁰ Ñande avei ikatu jahechauka jaiporiahuverekoha ñane ermanokuérape. ¿Mbaʼéicha javépa? Jaikuaa jave ohasaha hikuái peteĩ desástre térã ótra situasión ijetuʼúva. Ñande pyaʼe voi jakuʼe: Ikatu jaʼe umi ansiánope ñaimeha ñaipytyvõ hag̃uáicha tekotevẽhápe, ñameʼẽ ñane kontrivusión térã ñañemboʼe umi ohasa asývare hína (Prov. 17:17). b Por ehémplo 2020-pe ko múndo tuichakuére, oñeforma mas de 950 Komite de Sokórro oñepytyvõ hag̃ua umi ohasa asývape pe pandémia de COVID-19 káusare. ¡Ajépa jaagradesete umi ermáno ombaʼapóvape pe Komite de Sokórrope! Haʼekuéra oiporiahuvereko iñermanokuérape, upévare ogueraha chupekuéra umi mbaʼe oikotevẽva, oipytyvõ chupekuéra osegi hag̃ua oservi Jehovápe ha ifáltarõ omyatyrõ térã omopuʼã jey hogakuéra ha umi Salón del Reino (ekompara 2 Corintios 8:1-4 heʼívare).

11. ¿Mbaʼéichapa ñamombaʼeguasu Jehovápe jaiporiahuvereko jave ñane ermanokuérape?

¹¹ Ñaipytyvõ jave ñane ermanokuérape peteĩ desástre rire, katuete oĩ umi hénte ohecharamóva upéva. Por ehémplo áño 2019-pe, pe urakán Dorian ohundi vaʼekue peteĩ Salón oĩva las Bahámaspe. Umi ermáno ombaʼapo aja omyatyrõ hag̃ua upe Salón, oporandu peteĩ kontratísta ndahaʼéivape Testígo mboýrepa ojapóta peteĩ traváho oikotevẽva hikuái. Pe kontratísta heʼi: “Che aipytyvõse pene organisasiónpe. Che amoĩta peẽme umi erramiénta, umi personál ha la materiál. Opokoiterei ningo cherehe ahechávo mbaʼéichapa pejepyʼapy pene amigokuérare”. Ko múndo tuichakuére hetaiterei hénte ndoikuaái Jehovápe, péro ndohasareíri chuguikuéra la ñande Testígo jajapóva. Ajépa javyʼaite jaikuaávo jaiporiahuvereko rupi ñane ermanokuérape, ikatuha ñaipytyvõ ótrope oikuaa hag̃ua avei  Ñandejárape, ‘ohechaukáva ñandeporiahuverekoitereiha’ (Efes. 2:4).

12. Japoroporiahuverekóramo koʼág̃a, ¿mbaʼéichapa upéva ñanepytyvõta pe jehasa asy guasúpe g̃uarã? (Apocalipsis 13:16, 17).

¹² Ou vove pe jehasa asy guasu, ¿mbaʼérepa iñimportánteta jahechauka japoroporiahuverekoha? La Biblia heʼi umi ndoapojáiva umi goviérnope heta ohasa asytaha koʼág̃ama voi ha avei pe jehasa asy guasu aja (elee Apocalipsis 13:16, 17). Ikatu hína ifálta ñaipytyvõ ñane ermanokuérape ohupyty hag̃ua umi mbaʼe oikotevẽva. Ñande jaipota Jesús ou vove oporohusga hag̃ua ñandetopa ñaipytyvõha ñane ermanokuérape, ha teʼi ñandéve péicha: “Peju ha perresivi umi vendisión oguerúva Ñandejára Rréino” (Mat. 25:34-40).

13. Heʼiháicha Romanos 15:7, ¿mbaʼépa ojapo vaʼekue umi kristiáno ypykue ojoayhuve hag̃ua?

¹³ Síglo primérope enterovéva ohechakuaa vaʼekue umi kristiáno ojoayhu añeteha. ¿Péro ifásilpa rakaʼe chupekuéra ojoayhu péicha? Ñapensamíntena pe kongregasión oĩ vaʼekuére Rómape. Umi kristiáno upepegua ningo idiferentete vaʼekue ojuehegui. Oĩ vaʼekue judío okakuaáva Moisés léi poguýpe. Ótro katu ndahaʼéi vaʼekue judío ha ikultúra idiferentete vaʼekue. Oiméne oĩ vaʼekue umi haʼéva esklávo, umi orekóva liverta, ha umíva apytépe umi orekóva esklávo ipoguýpe. ¿Mbaʼéichapa koʼã kristiáno idiferentetéramo jepe ojuehegui ikatúta raʼe ojoayhuve? Apóstol Pablo omokyreʼỹ vaʼekue chupekuéra ‘ojorresivi porã’ hag̃ua (elee Romanos 15:7). ¿Mbaʼépa heʼise raʼe upérõ Pablo? Pe palávra ojetradusíva “pejorresivi porãkena”, heʼise ñanembaʼeporãha peteĩ persónandi, por ehémplo ñamog̃uahẽ chupe ñande rógape térã ñañemoamígo hese. Pablo heʼi vaʼekue Filemónpe ‘torýpe orresivi hag̃ua’ Onésimope, pe ijesklávo okañy vaʼekue (Filem. 17). Priscila ha Áquila orresivi porã vaʼekue Apólospe, haʼe saʼive ontende vaʼekue chuguikuéra la Jesús omboʼéva. Upévare haʼekuéra ‘ogueraha chupe hendivekuéra’ (Hech. 18:26). Umi kristiáno ypykue opensa rangue mbaʼépepa idiferénte hikuái, oñehaʼãmbaite ikatu hag̃uáicha ojorresivi porã ha oiko porã oñondive.

14. ¿Mbaʼéichapa Ana ha iména ohechauka ohayhuha ermanokuérape?

¹⁴ Ñande avei ikatu jahechauka jahayhuha ñane ermanokuérape ñañamigávo hesekuéra ha jahasávo tiémpo hendivekuéra. Upéva omomýita chupekuéra ñanderayhu hag̃ua avei (2 Cor. 6:11-13). Jahechamína la oiko vaʼekue Ana ha iménare. Chupekuéra ningo oñemondo vaʼekue África Occidentálpe oservi hag̃ua de misionéro. Péro kavalete ovárõ guare upe paíspe oñepyrũ pe pandémia de COVID-19, ha upévare ndaikatuvéi kuri oñembyaty umi ermanokuérandi. ¿Mbaʼépa ojapo raʼe ko matrimónio ohechauka hag̃ua ohayhuha umi ermánope? Ojapo hikuái videollamáda heʼi hag̃ua umi ermánope oikuaaseveha chupekuéra. Upéva opokoiterei umi família oĩvare pe kongregasiónpe, ha haʼekuéra avei oñepyrũ pyʼỹinte ohenói térã oenvia mensáhe Ana ha iménape. ¿Mbaʼérepa ko matrimónio oñehaʼã raʼe oñemoag̃ui umi ermánore? Ana heʼi: “Ymaite guive ningo, iporã ha ivai jave, umi ermáno ha ermanakuéra ohechauka che famíliape ha chéve mbaʼeichaitépa orerayhu. Upéva ndojeʼóiva che korasõgui ha chemomýi che voi ahechaukase hag̃ua aporohayhuha”.

15. ¿Mbaʼépa ñanemboʼe Vanessa ehémplo? (Ehecha pe taʼanga).

¹⁵ La majoría umi kongregasiónpe oĩ umi ermáno idiferénteva ojuehegui. ¿Mbaʼépa ñanepytyvõta jahayhu hag̃ua enterovévape?  Upearã ñañekonsentra vaʼerã umi kualida porã orekóvare hikuái. Peteĩ ermána Nueva Zelandagua hérava Vanessa omombeʼu ijetuʼu hague chupe ojogueraha porã hag̃ua algúno ermánondi kongregasiónpe. Péro oñemomombyry rangue chuguikuéra, haʼe ohasave tiémpo hendivekuéra. Péicha Vanessa ohechakuaa mbaʼérepa Jehová ohayhu umi ermánope. Haʼe heʼi: “Che ménagui oiko rire superintendénte de sirkuíto rohasa heta tiémpo umi ermanokuérandi ha káda uno oreko la ilája. Péro koʼág̃a ifasilvéma chéve ajeheʼa ótrore. Chegustaiterei voi Jehová organisasiónpe oĩ haguére opaichagua persóna. Ha ojekuaa Jehovápe ogustaitereiha avei, upévare oheja oadora chupe umi persóna idiferéntevape ojuehegui”. Upéicharõ, ¿mbaʼéichapa ikatu jahechauka japorohayhuha? Jahecháramo umi ermánope Jehová ohechaháicha chupekuéra (2 Cor. 8:24).

16. ¿Mbaʼérepa iñimportantetereíta jajoayhu pe jehasa asy guasu aja? (Ehecha pe taʼanga).

¹⁶ Pe jehasa asy guasu aja iñimportantetereíta jajoayhu. Oñepyrũ vove pe jehasa asy guasu, ¿mbaʼéichapa Jehová ñandeprotehéta? Ñapensamína la Jehová heʼi vaʼekuére ipuévlope ojeatakátarõ guare Babilóniape: “Néike che puévlo, tapeho peike pende kotýpe, pemboty porã pene rokẽ. Pekañy sapyʼaite ohasa peve pe ára pochy” (Is. 26:20). Provávlemente pe jehasa asy guasu aja tekotevẽta avei ñande jasegi ko instruksión. Oime vaʼerã pe palávra ‘koty’ heʼise hína umi kongregasión. Pe jehasa asy guasu aja ñaiméramo unído ñane ermanokuérandi, Jehová ñandeprotehéta haʼe opromete haguéicha. Upévare ndahaʼéi sólamente ñañoaguantánte vaʼerã, síno jajoayhu vaʼerã koʼág̃ama voi. Ñande rekove odepende upévare.

17. ¿Mbaʼépa ikatúta jajapo pe jehasa asy guasu aja koʼág̃ama voi jajepreparáramo?

¹⁷ “Jehová ára guasu” ou vove ojehasa asyetereíta ko múndo tuichakuére (Sof. 1:14, 15). Jehová siervokuéra ohasáta avei umi situasión ijetuʼúva. Péro ñande koʼág̃ama voi jajepreparáramo ikatúta ñaime trankílo ha ñaipytyvõta ótrope. Jasegíta ñaaguanta oimeraẽ provléma oñepresentáva. Ñane ermanokuéra ohasa asy vove jaiporiahuverekóta chupekuéra ha jajapóta opa ikatúva oreko hag̃ua hikuái la oikotevẽva. Ha jahayhu rupi chupekuéra jasegíta ñaime unído hendivekuéra. Jehová ningo ñanevendesíta opermitívo ñandéve jaikove pára siémpre peteĩ múndo pyahúpe ndaiporimoʼãihápe desástre ni sufrimiénto (Is. 65:17).