1, 2. ¿Mbaʼérepa ikatu jaʼe peteĩ kristiáno ha peteĩ edifísio ijyvatéva ojojoguaha? (1 Corintios 15:58).

 ÁÑO 1978-pe oñemopuʼã peteĩ edifísio ijyvatetereíva Tokio, Japónpe. Umi hénte oñeporandu ko edifísiopa oaguantáta umi terremóto pyʼỹi oikóva pe siudápe. ¿Mbaʼéichapa ojapo raʼe umi inheniéro ko edifísio ani hag̃ua hoʼa? Haʼekuéra omopuʼã mbarete porã ko edifísio, péro avei ikatu hag̃uáicha ojahustaʼimi oiko jave umi terremóto. Ñande kristianokuéra jajogua avei upe edifísiope. ¿Mbaʼérepa jaʼe upéva?

² Entéro kristiáno tekotevẽ jajepytaso mbarete, péro ndovaléi avei ñañemohatã ñande jaʼévapente síno jajahustaʼimi jepi. ‘Ndajahejái mbaʼeve ñanemomýi ñande jeroviágui’ ha jajedesidi siémpre ñaneñeʼẽrendutaha Jehová léipe (elee 1 Corintios 15:58). Ñande ningo ‘ñanekyreʼỹ ñaneñeʼẽrendu hag̃ua’ ha ndajajapói mbaʼeve oapeligrátava ñane amista Jehovándi. Péro avei ‘nañañemohatãi ñande jaʼévapente’, síno jajahustaʼimi ikatu jave ha tekotevẽrõ (Sant. 3:17). Peteĩ kristiáno oñehaʼãva ijekilivrádo ndoikói ijestriktoiterei ni noimportairõguáicha chupe mbaʼeve. Ko artíkulope jahecháta mbaʼéicha javépa ndajahejái vaʼerã mbaʼeve ñanemomýi ñande jeroviágui. Avei jahecháta 5 mbaʼe Satanás ojapóva ijetuʼu hag̃ua ñandéve jajepytaso mbarete ha mbaʼéichapa ikatu ñañemoĩ hese.

3. ¿Mbaʼe léi Jehová omeʼẽvapa jatopa Hechos 15:28, 29-pe?

³ Jehová añoite ningo oreko pe derécho omeʼẽvo ñandéve umi léi, ha umíva siémpre ifásil oñentende hag̃ua (Is. 33:22). Por ehémplo síglo primérope pe kuérpo governánte  heʼi vaʼekue mbohapy mbaʼe tekotevẽhápe ojepytaso mbarete umi kristiáno: 1) Orrechasávo umi dios raʼanga ha oadorávo Jehovápe añoiténte, 2) orrespetávo pe léi heʼíva sagradoha pe tuguy, ha 3) ndoikóivo hekovai okumpli hag̃ua la Biblia heʼíva (elee Hechos 15:28, 29). ¿Mbaʼéichapa kristianokuéra koʼag̃agua ikatu ñaneñeʼẽrendu Jehovápe koʼã mbohapy mbaʼépe?

4. ¿Mbaʼéichapa jahechauka jaadoraha Jehovápe añoiténte? (Apocalipsis 4:11).

⁴ Ñande jarrechasa umi dios guaʼúpe ha jaadora Jehovápe añoiténte. Haʼe omanda vaʼekue umi israelítape oadora hag̃ua chupe añoiténte (Deut. 5:6-10). Ha pe Diablo omoñuhãsérõ guare Jesúspe, haʼe derechoite heʼi chupe Jehovápe añoiténte jaadora vaʼerãha (Mat. 4:8-10). Upéicha rupi ñande ndajaadorái umi taʼanga ha nañamombaʼeguasúi peteĩ yvypórape. Por ehémplo nañamombaʼéi haʼeramoguáicha peteĩ dios umi líder rrelihiósope, umi polítikope, térã umi hugadór ha músiko ifamósovape. Ñande ñañemoĩ Jehová ládo ha jaadora chupe añoiténte, pórke ‘haʼe ojapo vaʼekue entéro mbaʼe’ (elee Apocalipsis 4:11).

5. ¿Mbaʼérepa ñakumpli Jehová léi oñeʼẽva pe tuguýre?

⁵ Jarrespeta pe léi heʼíva sagradoha ñande rekove ha pe tuguy. ¿Mbaʼérepa? Pórke Jehová heʼi pe tuguy orrepresentaha ñande rekove haʼéva peteĩ rregálo iporãitereíva oúva chugui (Lev. 17:14). Pe primera ves Jehová heʼírõ guare yvyporakuérape ikatuha hoʼu umi animál roʼokue, omanda chupekuéra ani hag̃ua hoʼu huguykue reheve (Gén. 9:4). Haʼe omanda jey vaʼekue upéva omeʼẽrõ guare Moiséspe pe léi Israélpe g̃uarã (Lev. 17:10). Síglo primérope katu Jehová odirihi pe kuérpo governántepe heʼi hag̃ua entéro kristiáno osegi vaʼerãha ‘omboykete pe tuguy’ (Hech. 15:28, 29). Ha koʼág̃a peve ñande jajepytaso mbarete ñakumpli hag̃ua ko léi jadesidíta jave mbaʼe tratamiéntopa jasegíta. b

6. ¿Mbaʼépa jajapo jasegi hag̃ua ñanderekopotĩ Jehová léi heʼiháicha?

⁶ Ndajaikói ñanderekovai pórke ñakumplise la Biblia heʼíva (Heb. 13:4). Apóstol Pablo ñaneakonseha vaʼekue ‘jajuka hag̃ua umi mbaʼe vai oĩva ñande pype’. Upéva heʼise jaipeʼaite vaʼerãha ñandejehegui opaichagua deséo vai. Ñande ni mbaʼevéicharõ ndajahechái ni ndajajapói mbaʼeve ikatúva ñandereity tekovaípe (Col. 3:5; Job 31:1). Oñepresenta jave ñandéve peteĩ mbaʼe vai ñandestiráva, upepete voi ñamboyke, nañapensavéi hese ni ndajajapói mbaʼeve ikatúva ombyai ñane amista Jehovándi.

7. ¿Mbaʼépa jajedesidi vaʼerã jajapo ha mbaʼérepa?

⁷ Jehová oipota ‘ñaneñeʼẽrendu chupe ñande pyʼaite guive’ (Rom. 6:17). Umi mbaʼe Jehová omandáva siémpre iporã ñandéve g̃uarã ha ndaikatúi ñakambia umi ileikuéra (Is. 48:17, 18; 1 Cor. 6:9, 10). Ñande japrokurapaite Jehová ñandeguerohory hag̃ua ha jaʼe voi pe salmísta heʼi haguéicha: “Che adesidíma che pyʼaite guive siémpre ajapotaha umi mbaʼe remandáva. Cheñeʼẽrendúta aikove aja pukukue” (Sal. 119:112). Péro Satanás oñehaʼãmbaite ani hag̃ua ñakumpli la jadesidi vaʼekue. ¿Mbaʼe mbaʼépa haʼe ojapo upearã?

8. ¿Mbaʼéichapa Satanás oipuru hína pe persekusión ñanemokangy hag̃ua?

⁸ Persekusión. Pe Diablo ñandeataka ha ñandejopy ani hag̃ua ñaneñeʼẽrendu Jehovápe jadesidíma haguéicha. Haʼe ohundise ñane amista Ñandejárandi, ‘haʼete voi peteĩ león  oñehaʼãva omokõ oimeraẽvape’ (1 Ped. 5:8). Umi kristiáno síglo primérope guare ojedesidi vaʼekue ojepytaso mbaretetaha Jehová ykére, upévare oñeamenasa, oñembyepoti ha ojejuka vaʼekue chupekuéra (Hech. 5:27, 28, 40; 7:54-60). Koʼág̃a peve Satanás opersegi Jehová siervokuérape. Por ehémplo umi oñemoĩva Jehováre omaltrataiterei ñane ermanokuérape Rusia ha umi ótro paíspe, ha oataka chupekuéra de algúna fórma.

9. Emombeʼu peteĩ ehémplo ohechaukáva tekotevẽha ñañatende porã ani hag̃ua jaʼa umi ñuhãme.

⁹ Umi ñuhã. Satanás ndahaʼéi ñandepersegínteva derechoite síno ‘ñanemoñuhãse’ avei (Efes. 6:11). Ñapensamína la oiko vaʼekue peteĩ ermáno héravare Robert. Haʼe oñeinterna kuri ojopera hag̃ua ha oavisa umi doktórpe ni mbaʼevéicharõ ndoipotaiha oñemoĩ chupe tuguy. Pe siruháno heʼi chupe orrespetataha la idesisión. Péro pe pyhare ojopera mboyve, ihentekuéra ohopa rire hógape pe anestesiólogo oho Robert rendápe. Haʼe heʼi chupe provávlemente ndoipurumoʼãiha hikuái pe tuguy péro orekotanteha upépe peichahágui ifáltarõ g̃uarã. Pe doktór oiméne oimoʼã raʼe Robert okambiáta hague la odesidíva ifamiliakuéra ohopa rire. Péro Robert ojepytaso mbarete ha toiko la oikóva ndoipotái oñemoĩ chupe tuguy.

10. ¿Mbaʼérepa ipeligróso opensa lája umi hénte ndorrespetáiva Jehovápe? (1 Corintios 3:19, 20).

¹⁰ Opensa lája umi hénte ndorrespetáiva Jehovápe. Ñande ñapensáramo umi hénte ko mundopegua opensaháicha, ikatu hína jaju nañapenavéi Jehováre ni ileikuérare (elee 1 Corintios 3:19, 20). “Ko mundopegua arandu” omomýi la héntepe omboyke hag̃ua Ñandejárape. Yma unos kuánto kristiáno oĩva Pérgamo ha Tiatírape oñepyrũ vaʼekue ojogua umi hénte oikóvape ijerére, hekovai ha oadoráva taʼangápe. Jesús oñemoñeʼẽ mbarete vaʼekue mokõive kongregasiónpe opermiti rupi oĩ tekovai ijapytepekuéra (Apoc. 2:14, 20). Koʼág̃arupi avei umi hénte oĩva ñande jerére oipota jaasepta umi mbaʼe oĩ vaíva. Ñane hentekuéra ha umi ñane konosído ikatu heʼi ñandéve ñandeexaheradomaha ha natekotevẽiha ñakumpli umi Jehová léi. Por ehémplo haʼekuéra opensa ndaivairiha jaiko ñane akãre ha ñanderekovai ha heʼi la Biblia ndovaleveimaha ko tiémpope g̃uarã.

11. ¿Mbaʼépa ndovaléi jajapo?

¹¹ Sapyʼánte ikatu ñapensa umi instruksión Jehová omeʼẽva ñandéve nahesakãporãiha. Upévare ikatu voi ‘ndajajesegiséi Ñandejára Ñeʼẽ heʼívarente’ (1 Cor. 4:6). Umi líder rrelihióso Jesús tiémpope guare ojapo vaʼekue péicha. Haʼekuéra okrea umi léi pyahu ha omoĩve Ñandejára léi ndive, ha upéicha rupi ijetuʼueterei umi héntepe okumplipa hag̃ua (Mat. 23:4). Péro umi instruksión Jehová omeʼẽva ñandéve Iñeʼẽ ha iñorganisasión rupive hesakã porãiterei, ha ñande natekotevẽi ñambojoʼave mbaʼeve umívape (Prov. 3:5-7). Upéicha rupi ñande jajesegi Ñandejára Ñeʼẽ heʼívarente ha ndajaikói jakrea léi ñane ermanokuérape umi mbaʼe káda uno ikatúvare odesidi.

12. ¿Mbaʼéichapa Satanás oipuru umi ‘vyrorei oporombotavy hag̃ua’?

¹² Vyrorei ñanembotavy hag̃ua. Satanás oipuru umi ‘vyrorei’ ojeʼéva ha ‘umi mbaʼe oñepensáva ko múndope’ ikatu hag̃uáicha ombotavy ha odividipa la héntepe (Col. 2:8). Síglo primérope, Satanás ombotavy hag̃ua la héntepe ojevale vaʼekue umi omboʼévare ojesegi vaʼerãha Moisés léi, umi kreénsia orekóvare la hénte, ha umi enseñánsa omboʼévare umi judío noĩriva Ñandejára Ñeʼẽme. Koʼã mbaʼe ningo japu vaʼekue, ha umi hénte okreéva ndojesarekovéima Jehováre, pe omeʼẽva arandu añetegua. Koʼág̃arupi Satanás ojevale Internet ha  umi rred sosiál rehe omosarambi hag̃ua informasión ha notísia japu umi polítiko oipotáva ojeguerovia. Peichagua informasión oñemosarambi kuri pe pandémia de COVID-19 aja. c Umi oguerovia vaʼekue umi informasión japu ojepyʼapyeterei, péro ñande testígo de Jehová ndajaikói ñañekevrantaháre pórke jasegi umi gía oúva ñane organisasióngui (Mat. 24:45).

13. ¿Mbaʼérepa ñañatende vaʼerã ani hag̃ua jajedistrae?

¹³ Umi mbaʼe ñandedistraéva. Tekotevẽterei ningo jajesareko ‘umi mbaʼe iñimportantevévare’ (Filip. 1:9, 10). Jahejáramo heta mbaʼe ñandedistrae japerdéta heta tiémpo, ikatu jaiko ñanekaneʼõháre ha ndajajapovéi umi mbaʼe iñimportánteva. Oĩ ningo umi mbaʼe jajapóva jepi voi, por ehémplo jakaru, jaʼu vevída, jajediverti ha ñambaʼapo, péro ikatu hína jaheja koʼã mbaʼe ñandedistrae oúramo iñimportantetereíma ñandéve g̃uarã (Luc. 21:34, 35). Avei káda día ñahendu ha jalee umi informasión oñeʼẽva umi manifestasión ha polítikare. Jajasegura vaʼerã ani hag̃ua koʼã mbaʼe ñandedistrae, pórke osino jaladeasétama peteĩvape ñane pensamiénto ha ñane korasõme. Entéro koʼã mbaʼe jahecha vaʼekue, Satanás oipuru ñanemokangységui anivéma hag̃ua jajepytaso mbarete. Jahechami koʼág̃a mbaʼéichapa ikatu ñandepuʼaka Satanás ojapóvare ha jasegi jajepytaso mbarete Jehová ykére.

14. ¿Mbaʼépa hína peteĩ mbaʼe ñanepytyvõtava jasegi hag̃ua jajepytaso Jehová ykére?

¹⁴ Ñapensa mbaʼérepa ñañemeʼẽ raʼe Jehovápe ha jajevautisa. Ñande jadesidi jajapo koʼã mbaʼe ñañemoĩségui Jehová ykére. Ñapensamíntena mbaʼépa ñanekonvense vaʼekue jatopa hague la rrelihión verdadéra. Ñande jaju kuri jaikuaa porã Jehovápe, jahayhu ha jarrespeta chupe haʼégui ñande Ru yvagapegua. Ñañepyrũ jajerovia hese ha upéva ñanemomýi ñañarrepenti hag̃ua. Upéicha rupi ndajajapovéima umi mbaʼe ndogustáiva Jehovápe ha jaiko haʼe oipotaháicha. Katuete ningo javyʼaiterei kuri jaikuaávo Ñandejára ñaneperdona hague (Sal. 32:1, 2). Ñañepyrũ jaha umi  rreunionhápe ha ñamombeʼu ñande rapichakuérape umi mbaʼe porãite ñaaprende vaʼekue. Ñañemeʼẽ rire Jehovápe ha jajevautisa jaguatáma jaikóvo pe tape oporoguerahávare jeikove opaveʼỹvape, ha jajedesidíma jasegitaha jaguata ko tapére (Mat. 7:13, 14).

15. ¿Mbaʼérepa ideprovécho ñandéve jastudia ha jajepyʼamongeta?

¹⁵ Jastudia Ñandejára Ñeʼẽ ha jajepyʼamongeta hese. Peteĩ yvyramáta imbarete hag̃ua hapo pypuku vaʼerã, upéicha avei ñande jajerovia mbaretéramo Jehováre ikatúta jajepytaso mbarete peteĩ yvyramáta hapo pypukúvaicha. A medída ke pe yvyramáta okakuaa ha imbarete, ipypukuve la hapo. Péicha avei ñande jastudia ha jajepyʼamongeta jave, ñande jerovia imbaretevéta ha ñañekonvensevéta Ñandejára heʼíva iporãveha (Col. 2:6, 7). Jajepyʼamongeta mbaʼéichapa Jehová omboʼe, ogia ha oprotehe vaʼekue isiervokuéra yma guarépe. Por ehémplo, Ezequiel oñatende porã vaʼekue mbaʼéichapa peteĩ ánhel omedi porã pe témplo haʼe ohecha vaʼekue peteĩ visiónpe. Ko visión omombarete vaʼekue Ezequiélpe ha ñanepytyvõ ñandéve jaadora hag̃ua Jehovápe haʼe oipotahaichaite (Ezeq. 40:1-4; 43:10-12). d Ñandéve avei ideprovéchota ñañemotiémporamo jastudia ha jajepyʼamongeta hag̃ua umi mbaʼe hypyʼũvévare oĩva Ñandejára Ñeʼẽme.

16. ¿Mbaʼéichapa oipytyvõ vaʼekue peteĩ ermánope ohayhu rupi Jehovápe ikorasõ mbytete guive? (Salmo 112:7).

¹⁶ Jahayhu Jehovápe ñane korasõ mbytete guive. Rréi David opurahéi vaʼekue: “Che korasõ mbytete guive ajerovia nderehe Ñandejára ha upéva nokambiamoʼãi”. Péicha haʼe ohechauka vaʼekue siémpre ohayhutaha Jehovápe (Sal. 57:7). Ñande avei ikatu jahayhu Jehovápe ha jajerovia hese ñande pyʼaite guive ha upéva nokambiamoʼãi (elee Salmo 112:7). Jahechami jeýna Robert ehémplo, ko ermánore ñañeʼẽma kuri ótro párrafope. Ojeʼe kuri chupe isiruhía aja orekotaha hikuái la tuguy peichahágui tekotevẽramo g̃uarã. Péro Robert upepete heʼi oiméramo okalkulánte jepe hikuái omoĩtaha chupe tuguy, haʼe osẽtaha oho pe ospitálgui. Tiémpo rire haʼe heʼi: “Che ni michĩmi ndadudái vaʼekue mbaʼépa la ajapótava  ha ndajepyʼapýi vaʼekue la ikatúvare oiko upe rire”.

17. ¿Mbaʼépa ñanemboʼe Robert experiénsia? (Ehecha pe taʼanga).

¹⁷ Robert ojepytaso mbarete vaʼekue Jehová ykére, pórke odesidíma kuri upéva heta tiémpo oho mboyve pe ospitálpe. ¿Mbaʼépa oipytyvõ raʼe chupe upearã? Primero, haʼe ombovyʼase vaʼekue Jehovápe. Segundo, haʼe ostudia porã vaʼekue la Biblia ha umi puvlikasión oexplikáva ñande rekove ha pe tuguy sagradoha. Tercero, haʼe oĩ vaʼekue segúro Jehová ovendesitaha chupe ojapo haguére iléi heʼíva. Ñande avei ikatu jajerovia ñane korasõ mbytete guive tahaʼe haʼéva la oikóva.

18. ¿Mbaʼéichapa Barac ehémplo ñanepytyvõ jajerovia hag̃ua Jehováre? (Ehecha pe taʼanga oĩva ko rrevísta apére).

¹⁸ Jajerovia Jehováre. Jahechami mbaʼéichapa Barac osẽ porã vaʼekue ojerovia rupi Jehová heʼívare. Upe tiémpope umi israelita noĩri vaʼekue preparádo oñorairõ hag̃ua, ni ndorekói vaʼekue hikuái eskúdo ni lánsa. Péro Jehová heʼika Barácpe oho hag̃ua oñorairõ Sísara kóntrape omoakãva Canaán ehérsito, hiʼarive tuichaiterei vaʼekue la ijehérsito (Juec. 5:8). Upéi pe profetísa Débora heʼi Barácpe oho hag̃ua pe yvy iplanohápe oñorairõ hag̃ua Sísara kóntrape, orekóva 900 kárro de gérra. Ñapensamíntena, pe yvy iplanohápe pyaʼetereivéntema ohóta umi kárro de gérra ha ijetuʼuvétantema kuri umi israelítape oñorairõ hag̃ua ikontrapekuéra. Upéi umi soldadokuéra oguejývo ohóvo sérro Tabórgui Jehová ombou ama guasu ha Sísara karrokuéra opaʼãmba pe tujúpe, péicha Jehová omogana Barácpe (Juec. 4:1-7, 10, 13-16). Upéicha avei Jehová ñanepytyvõta ñasẽ porã hag̃ua jajeroviáramo hese ha pe gía omeʼẽvare iñorganisasión rupive (Deut. 31:6).

19. ¿Mbaʼérepa ñande jasegise jajepytaso Jehová ykére?

¹⁹ Jaikove aja ko múndo añáme, jasegíta jagerrea jajepytaso hag̃ua Jehová ykére (1 Tim. 6:11, 12; 2 Ped. 3:17). Jajedesidíkena ndajahejamoʼãiha ñandereity pe persekusión, umi ñuhã, umi hénte ndorrespetáiva Jehovápe, umi mbaʼe ikatúva ñanembotavy ha umi mbaʼe ikatúva ñandedistrae (Efes. 4:14). Jajepytaso mbaretékena ha siémpre jahayhu Jehovápe ha ñaneñeʼẽrendu chupe. Péro jaikuaa avei sapyʼánte tekotevẽha jajahustaʼimi ha ani ñañemohatã ñande jaʼévapente. Pe sigiénte artíkulope jahecháta mbaʼéichapa Jehová ha Jesús omoĩ ñandéve ehémplo porã upévape.