1. ¿Mbaʼépa reaprende raʼe reñepyrũrõ guare restudia la Biblia?

 ¿NEMANDUʼÁPA umi mbaʼe reaprende vaʼekuére reñepyrũrõ guare restudia la Biblia? Ikatu oime reñesorprende raʼe reikuaávo Ñandejára orekoha la héra. Avei oiméne reñetrankilisa reaprendévo Ñandejára ndokastigaiha avavépe peteĩ infiérnope. Katuete revyʼaiterei avei rehendúrõ guare ikatuha rehecha jey umi ne hénte omano vaʼekuépe ha reiko hendivekuéra ko yvy ape ári peteĩ paraísope.

2. Reikuaa guive la Biblia omboʼéva, ¿mbaʼépepa reprogresáma raʼe? (Efesios 5:1, 2).

² Amedída ke restudia kuri la Biblia rehayhuve avei Ñandejárape. Ha rehayhu rupi chupe reñepyrũ rejapo umi mbaʼe reaprendéva, rejegia la Biblia heʼívare ha redesidi porãve. Avei repensa Ñandejára oipotaháicha ha rejapo umi mbaʼe iporãva ikatu hag̃uáicha haʼe ndeguerohory. Peteĩ mitã okopiaháicha itúape, nde avei reñepyrũ resegi nde Ru yvagapegua ehémplo (elee Efesios 5:1, 2).

3. ¿Mbaʼépa iporãta ñañeporandúramo ñandejupe?

³ Iporãta enterovéva ñañeporandúramo: “¿Ahayhuvépa Jehovápe koʼág̃a añepyrũrõ guarégui aservi chupe? Ajevautisa guive, ¿añehaʼãpa ajoguave Jehovápe espesiálmente ahechaukávo ahayhuha che ermanokuérape?”. Ndovaléi ningo ñañeñandu vai oimérõ jahechakuaa ndajahayhuveimaha Ñandejárape ni ñande rapichápe yma guaréicha. Upéva oiko vaʼekue umi kristiáno síglo primérope guarére, péro Jesús nopensái vaʼekue hesekuéra naipohãveimaha ha ñanderehe avei nopensái upéicha (Apoc. 2:4, 7). Jesús oikuaa porã ñande ikatuha japorohayhu jey ñañepyrũrõ guaréicha jastudia la Biblia.

4. ¿Mbaʼépa jahecháta ko artíkulope?

⁴ Ko artíkulope jahecháta mbaʼéichapa ñande ikatu jasegi jahayhuve Jehovápe ha ñande rapichakuérape. Upéi ñañeʼẽta  umi mbaʼe porã jahupytývare ñañehaʼãvo japorohayhuve.

5, 6. ¿Mbaʼe ijetuʼúvapa ohasa vaʼekue Pablo, péro mbaʼépa oipytyvõ chupe osegi hag̃ua oservi Jehovápe?

⁵ Apóstol Pablo ovyʼa vaʼekue oservívo Jehovápe, péro ombohovái vaʼekue avei heta mbaʼe ijetuʼúva. Por ehémplo oviaha vaʼerã kuri mombyrymbyry ha upe tiémpope ndahaʼéi vaʼekue la ifasilpáva ojeviaha. Haʼe ningo pyʼỹi ‘ojapeligra vaʼekue rríope’ ha avei “mondaha káusare”, sapyʼánte katu iñenemigokuéra oinupã vaʼekue chupe (2 Cor. 11:23-27). Ha umi ermáno ndahaʼéi vaʼekue siémpre oagradeséva Páblope la ojapóvare hesehapekuéra (2 Cor. 10:10; Filip. 4:15).

⁶ ¿Mbaʼépa oipytyvõ rakaʼe apóstol Páblope osegi hag̃ua oservi Jehovápe? Haʼe oĩ vaʼekue segúro Jehová ohayhuha chupe. Pablo ohechakuaa vaʼekue mbaʼeichagua Dióspa Jehová, Iñeʼẽ ha umi mbaʼe ohasa vaʼekue rupive (Rom. 8:38, 39; Efes. 2:4, 5). Ha haʼe avei ou ohayhueterei Jehovápe, upévare ‘osegi vaʼekue oservi umi ermánope’ (Heb. 6:10).

7. ¿Mbaʼépa ñanepytyvõta jahayhuve hag̃ua Jehovápe?

⁷ Jastudia porãramo la Biblia jajúta jahayhuve Jehovápe. Jalee aja jahecha vaʼerã mbaʼépa káda párte ñanemboʼe Jehovágui. Ikatu voi ñañeporandu: “¿Mbaʼéichapa ko téxto ohechauka chéve Jehová cherayhuha? ¿Mbaʼéichapa ko aleéva chepytyvõ ahayhuve hag̃ua Jehovápe?”.

8. ¿Mbaʼéichapa ñañemboʼérõ ñanepytyvõta jahayhuve hag̃ua Jehovápe?

⁸ ¿Mbaʼe ótra kósapa ikatu jajapo jahayhuve hag̃ua Jehovápe? Ikatu ñañemboʼe Ñandejárape káda día ha ñamombeʼupaite chupe la ñañandúva (Sal. 25:4, 5). Jehová ningo katuete okontestáta umi ñane ñemboʼe (1 Juan 3:21, 22). Peteĩ ermána hérava Karen, b oikóva Ásiape heʼi: “Che añepyrũma kuri ahayhu Jehovápe aikuaa rupi chupe, péro upéi ahechávo mbaʼéichapa okontesta umi che ñemboʼe ahayhuvéntema Jehovápe. Upéva chemomýi ajapo hag̃ua umi mbaʼe ogustáva chupe”.

9. ¿Mbaʼéichapa Timoteo ohechauka vaʼekue oporohayhuha?

⁹ Unos kuánto áño oiko rire chugui kristiáno, Pablo ou oikuaa Timotéope haʼéva peteĩ mitãkariaʼy ivuenoitereíva. Timoteo ohayhu vaʼekue Jehovápe ha iñermanokuérape. Tiémpo rire Pablo oñeʼẽ vaʼekue Timotéore umi filipénsespe ha heʼi voi hese: ‘Ndarekói avave haʼéicha ijaktitu porãva, Timoteo ipyʼaite guive oñangarekóta penderehe’ (Filip. 2:20). Pablo nomensionái vaʼekue Timoteo ivaletereiha oorganisa hag̃ua entéro mbaʼe térã ojapo hag̃ua diskúrso, síno ohecharamo mbaʼeichaitépa Timoteo ohayhu iñermanokuérape. Katuete umi kongregasión ovyʼa vaʼekue Timoteo ovisitáta jave chupekuéra (1 Cor. 4:17).

10. ¿Mbaʼéichapa Ana ha iména ohechauka ohayhuha umi ermánope?

¹⁰ Ñande jaheka jepi mbaʼépepa ikatu ñaipytyvõ ñane ermanokuérape (Heb. 13:16). Jahechamína Ana ojapo vaʼekue, pe ermána ñañeʼẽ vaʼekuére pe ótro artíkulope. Peteĩ torménta vai rire Ana ha iména ovisita peteĩ famíliape. Upépe ohechakuaa hikuái umi ermáno róga técho oñehundi hague ha upévare ijaokuéra ikyʼapaite chuguikuéra. Ana heʼi: “Rogueraha ijaokuéra, rojohéi, roplancha ha rodovla porã asy rogueraha jey hag̃ua chupekuéra. Oréve g̃uarã ningo sonseraite  kuri la rojapóva, péro rojapo rupi upéva ropyta oñoamigoite upe famíliandi”. Ana ha iména ohayhu rupi umi ermanokuérape ohecha mbaʼépa oikotevẽ hikuái oipytyvõ hag̃ua chupekuéra (1 Juan 3:17, 18).

11. a) ¿Mbaʼéichapa oñeñandu jepi umi ermáno jahechauka jave jahayhuha chupekuéra? b) Ohechaukaháicha Proverbios 19:17, ¿mbaʼépa Jehová ojapóta ñande ñaipytyvõramo ñane ermánope?

¹¹ Ñanembaʼeporã ha jahechauka jave japorohayhuha, ñande rapichakuéra ohechakuaa ñañehaʼãha hína jasegi Jehová ehémplo. Núnka ndajaikuaapamoʼãi mbaʼeichaite pevépa oapresia umi ermanokuéra la jajapóva hesehapekuéra. Karen, pe ermána ñamensionáma vaʼekue, imanduʼa mbaʼeichaitépa oipytyvõ chupe umi ermanokuéra. Haʼe omombeʼu: “Che aagradeseterei umi ermána chegueraha vaʼekuépe predikasiónpe. Haʼekuéra ou vaʼekue chereka che rogaitépe voi, upéi cheinvita roʼu hag̃ua álgo ha upéi chegueru jey hikuái ógape. Koʼág̃a apensávo ahechakuaa mbaʼeichaitépa ojesakrifika hikuái cherehehápe ha ojapo upéva cherayhúgui”. Ñarrekonose vaʼerã ndahaʼeiha enterovéva ikatútava ojapo álgo oagradese hag̃ua ñandéve la jajapóvare. Karen heʼi voi: “Chéngo apagapase voi umi ermánape la umi mbaʼe porã ojapo vaʼekuére cherehehápe, péro ni ndaikuaái moõpa oiko hikuái, Jehová katu si, upévare añemboʼe chupe oipytyvõ hag̃ua káda ermánape che vése”. Siertoite la heʼíva Karen, Jehová ohechapaite umi mbaʼe michĩvéva jepe jajapóva ótro rehehápe. Ha chupe g̃uarã haʼete voi opytáva odeve ñandéve pe jajapóvare (elee Proverbios 19:17).

12. ¿Mbaʼéichapa umi ermáno ikatu ohechauka kongregasiónpe oporohayhuha? (Ehecha umi taʼanga).

¹² Oiméramo nde peteĩ ermáno, ¿mbaʼéichapa kongregasiónpe ikatu rehechauka reporohayhuha? Upearã ikatu reipytyvõ ermanokuérape.  Peteĩ ermáno imitãva hérava Jordan oporandu kuri peteĩ ansiánope mbaʼéichapa ikatu oipytyvõve kongregasiónpe. Pe ansiáno ofelisita raẽ chupe oprogresáma haguére ha upéi heʼi chupe la ikatúva ojapove. Por ehémplo oanima Jórdanpe og̃uahẽ voive hag̃ua Salónpe, oporosaluda ha okomenta hag̃ua. Avei heʼi chupe opredika meme hag̃ua igrúpondi ha ohecha mbaʼépa oikotevẽ umi ermanokuéra. Jordan osegi pe ansiáno konsého ha oaprende heta mbaʼe pyahu, péro ndahaʼéi upévante, ohayhuve voi katu umi ermanokuérape. Haʼe ohechakuaa peteĩ ermáno oñenombrárõ siérvo ministeriál ndahaʼéi oñepyrũ ramótava oipytyvõ ótrope, síno ojapóma voi oikóvo upéva ha osegítante hína oporopytyvõ (1 Tim. 3:8-10, 13).

13. ¿Mbaʼépa oipytyvõ raʼe peteĩ ermánope oservi jey hag̃ua de ansiáno?

¹³ Oiméramo nde reservi raʼe anteve de siérvo ministeriál térã ansiáno ikatu reĩ segúro Jehová siémpre imanduʼaha la rejapo vaʼekuére rehayhúgui chupe (1 Cor. 15:58). Avei ojesareko umi mbaʼe resegívare rejapo rehayhu rupi chupe. Jahechamína la oiko vaʼekue peteĩ ermáno héravare Cristian. Haʼe ningo ansiáno vaʼekue, péro upéi operde ipriviléhio ha oñedesanima upévare. Cristian heʼi: “Adesidi kuri ajapotaha ikatúva guive Jehová servísiope, ndahaʼevéiramo jepe ansiáno”. Kon el tiémpo oñenombra jey chupe ha haʼe heʼi: “Primerorã akyhyje kuri aservi jey hag̃ua de ansiáno. Péro upéi apensa Jehová ñandeporiahuverekoha ha oimérõ haʼe opermiti hína areko jey upe priviléhio, aaseptáta ahayhu rupi chupe ha che ermanokuérape”.

14. ¿Mbaʼépa ñaaprende Elena ehémplogui?

¹⁴ Jehová siervokuéra ohechauka avei ohayhuha umi ndahaʼéivape Testígo (Mat. 22:37-39). Por ehémplo peteĩ ermána hérava  Elena oikóva Geórgiape heʼi: “Ñepyrũrã apredika vaʼekue sólamente ahayhúgui Jehovápe, péro ahayhuvévo chupe ahayhuve avei la héntepe. Upévare añehaʼã apensa mbaʼe provlémapa oreko hikuái ha mbaʼe rehepa oñemongetaséta. Amáske apensa péicha aipytyvõseve voi chupekuéra” (Rom. 10:13-15).

15, 16. Ojehechaukaháicha pe taʼangápe, ¿mbaʼe iporãvapa ojehupyty peteĩ matrimónio ohechauka haguére oporohayhuha?

¹⁵ Jahechauka jave jahayhuha ñane ermanokuérape, ndahaʼéi haʼekuérante la oñevenefisiáva. Por ehémplo pe pandémia COVID-19 aja, peteĩ ermáno hérava Pablo ha hembireko oipytyvõ umi ermána ijedávape oipurukuaa hag̃ua iselulár, itávlet térã ikomputadóra opredika hag̃ua. Peteĩva umi ermána ijedávape ijetuʼueterei kuri opredika hag̃ua oipurúvo umi aparáto elektróniko, péro amo ipahápe ivalepaitéma. Upéi ko ermána oinvita ihentekuérape Konmemorasionrã ojejapótava por videokonferénsia, ha 60 voi oñekonekta ohendu hag̃ua pe diskúrso. Pablo ha hembireko ojapóva tuichaiterei ideprovécho pe ermána ha ihentekuérape. Pe ermána ijedáva upéi oskrivi peteĩ kárta Páblope ha heʼi chupe: “Che ningo aagradeseterei ndéve ha ne rembirekópe la pejapóvare ore oreedáva rehehápe. Núnka ndacheresaraimoʼãi la sakrifísio pejapóvagui orerehehápe ha avei mbaʼeichaitépa Jehová ojepyʼapy orerehe”.

 ¹⁶ Ko experiénsia omboʼe Páblope peteĩ mbaʼe iñimportantetereíva. Ikatu hína ñandevale heta mbaʼépe péro amo ipahápe la iñimportantevéva hína japorohayhu. Haʼe heʼi: “Che aservi vaʼekue de superintendénte de sirkuíto ha ahechakuaa umi ermáno ikatuha hesarái nde diskúrsogui, péro núnka ndahesaraimoʼãi umi mbaʼe rejapo vaʼekuégui hesehapekuéra”.

17. Jahechauka jave japorohayhuha, ¿mávapa avei la oñevenefisiáva?

¹⁷ Jahechauka jave japorohayhuha ñande voi ñañevenefisia ñaimoʼãʼỹháicha. Peteĩ ermáno hérava Jonathan oikóva Nueva Zelándape omombeʼu upeichaha. Peteĩ sábado kaʼaru, hakuve jave haʼe ohecha peteĩ prekursór opredikaha oikóvo haʼeño. Upémarõ Jonathan odesidi omoirũtaha jepi pe prekursórpe sábado kaʼarukue. Upe moméntope haʼe ni noñeimahinái mbaʼeichaitépa osẽ porãta haʼe voi péicha imbaʼeporã haguére pe prekursórndi. Haʼe heʼi: “Upe tiémpope ndahaʼéi vaʼekue la chegustapáva la predikasión, péro upéi ahecha mbaʼéichapa pe prekursór oporomboʼekuaa ha oho porãitereiha chupe predikasiónpe, ha oñepyrũ igústo avei chéve. Péicha akonsegi che sosiorã chepytyvõva ikatu hag̃uáicha aprogresa, avyʼa predikasiónpe ha añemoag̃uive Jehováre”.

18. ¿Mbaʼépa Jehová oipota jajapo?

¹⁸ Jehová oipota jahayhuve chupe ha avei ñande rapichakuérape. Jahecháma haguéicha ikatu jahayhuve Jehovápe jaleévo la Biblia, jajepyʼamongetávo hese ha kontinuadoite ñañemboʼévo chupe. Ñane ermanokuérape avei ikatu jahayhuve ñaipytyvõvo chupekuéra umi mbaʼe oikotevẽvape. Japorohayhuvévo ñañemoag̃uivéta Jehováre ha avei ñane ermáno ha ermanakuérare, ha koʼã amista oduráta tóda la vída.