ARTÍKULO OJESTUDIÁVA 32
Jasegi Jehová ehémplo ha ani ñañemohatã ñande jaʼévapente
“Enterove toikuaa napeñemohatãiha peẽ pejévapente” (FILIP. 4:5).
PURAHÉI 89 Jehová ovendesi ojapóvape ivolunta
¿MBAʼE REHEPA ÑAÑEʼẼTA? a
¿Mbaʼeichagua yvyramátapa nde? (Ehecha párrafo 1)
1. ¿Mbaʼe sentídopepa peteĩ kristiáno ojogua vaʼerã peteĩ yvyramátape? (Ehecha pe taʼanga).
OĨ PETEĨ fráse heʼíva: “Pe yvyramáta ikatúva okacha ndoʼamoʼãi yvytu atã jave”. Ko fráse ohechauka mbaʼéicha rupípa heta yvyramáta ndoʼái oipeju hatãiterei jave pe yvytu, pórke ojadapta ha okachánte pe yvytu atã jave. Peteĩ kristiánope g̃uarã iñimportánte avei ojahustaʼimi ha ojadapta. ¿Mbaʼéicha javépa? Por ehémplo okambia jave isituasión ha oúrõ ombohovái álgo ijetuʼúva, avei oĩramo opensa ha odesidi diferénteva chugui.
2. ¿Mbaʼe kualidápa ñanepytyvõta okambia jave ñane situasión, ha mbaʼépa jahecháta ko artíkulope?
2 Ñande Jehová siérvo ningo ndajaikói ñañemohatã ñande jaʼévapente, síno jajadapta, ñaneumílde ha ñanembaʼerechakuaa. Ko artíkulope jahecháta mbaʼéichapa koʼã kualida porãite oipytyvõma heta ermánope okambiárõ guare isituasión. Avei jahecháta mbaʼéichapa koʼã kualida ñanepytyvõ ñandéve, péro primero ñaanalisami pe ehémplo porãite omeʼẽva ñandéve Jehová ha Jesús.
JEHOVÁ HA JESÚS EHÉMPLO PORÃITE
3. ¿Mbaʼérepa jaʼekuaa Jehová noñemohatãiha haʼe heʼívapente?
3 La Biblia heʼi Jehová haʼeha “pe Ita Guasu”, pórke haʼe nokambiái ha ojepytaso mbarete. Péro upéva ndeʼiséi haʼe oñemohatãha haʼe heʼívapente (Deut. 32:4). Okambiávo ohóvo la situasión ko múndope, Jehová osegi ojahusta ha péicha ojasegura oñekumplitaha ivolunta. Haʼe ningo ñandekrea vaʼekue ijoguaháramo, upévare ñande avei ikatu jajahusta ha jajadapta okambia jave ñane situasión. La Biblia rupive Ñandejára omeʼẽ ñandéve heta konsého jadesidi porã hag̃ua tahaʼe haʼéva la jahasáva. Iñehémplo ha umi ikonsého rupive, Jehová ohechauka ñandéve haʼe haʼéramo jepe “pe Ita Guasu” noñemohatãiha haʼe heʼívapente.
4. Emombeʼu peteĩ ehémplo ojehechahápe Jehová noñemohatãiha haʼe heʼívapente (Levítico 5:7, 11).
4 Jehová ojapóva guive ningo perfékto ha ohechauka noñemohatãiha haʼe heʼívapente. Ñandejára ndoikói iñexihénte yvyporakuérandi. Jahechamína mbaʼéichapa otrata vaʼekue umi israelítape. Jehová ndojeruréi vaʼekue el mísmo sakrifísio umi imboriahúva ha umi iplátavagui. Oĩ vaʼekue umi káso haʼe opermitihápe umi isiervokuérape omeʼẽ isakrifísio asegún omeʼẽháicha iposivilida (elee Levítico 5:7, 11).
5. Emombeʼu mbaʼéichapa Jehová ohechauka vaʼekue iñumildeha ha oiporiahuverekoha la héntepe.
5 Jehová iñumílde ha oiporiahuvereko enterovépe, upéicha rupi noñemohatãi haʼe heʼívapente. Por ehémplo jahechakuaa mbaʼeichaitépa iñumílde odesidírõ guare ohunditaha umi hénte aña oĩvape Sodómape. Umi ánhel rupive Jehová omanda vaʼekue Lótpe oho hag̃ua okañy umi montañaháre, péro Lot okyhyje oho hag̃ua. Upévare ojerure asy Jehovápe opermiti hag̃ua chupe ha ifamíliape oho Zóarpe, peteĩ puevloʼi Jehová odesidímava ohunditaha avei. Jehová ikatu kuri heʼi Lótpe ojapo hag̃ua la heʼi hagueichaite chupe, péro upéva rangue haʼe omeʼẽ Lótpe la ojerure vaʼekue ha nohundíri Zóarpe (Gén. 19:18-22). Heta tiémpo rire Jehová oiporiahuvereko pe siuda héravape Nínive. Upérõ guare haʼe omondo iproféta Jonáspe oavisa hag̃ua umi hénte aña upepeguápe oñehunditaha isiuda ha haʼekuéra avei. Péro umi ninivita oñarrepenti ha Jehová ombyasy chupekuéra, upévare odesidi nohundimoʼãinte hague upe siuda (Jon. 3:1, 10; 4:10, 11).
6. Emombeʼu mbaʼéichapa Jesús osegi vaʼekue Jehová ehémplo.
6 Jesús osegi Itúa ehémplo ha tekotevẽ jave ojahustaʼimi ha noñemohatãi haʼe heʼívapente. Péva ojekuaa vaʼekue hese okumplírõ guare iñasignasión ko yvy ape ári. Jesúspe ‘oñembou vaʼekue oipytyvõ hag̃ua umi Israelguápente, ojoguáva umi ovecha okañývape’. Péro peteĩ jey peteĩ kuñakarai ndahaʼéiva israelita ojerure asy chupe omonguera hag̃ua ‘imembykuña osufrietereívape pórke oñendemonia’. Jesús oiporiahuvereko upe kuñáme, upévare ojapo la ojeruréva chupe ha omonguera imembykuñáme (Mat. 15:21-28). Jahechamína ótro ehémplo. Oñepyrũmíre iñasignasión, Jesús heʼi vaʼekue: ‘Peteĩ persóna onegáramo chekuaaha, che avei anegáta aikuaaha chupe’ (Mat. 10:33). Ñanemanduʼa Pedro onega hague chupe 3 vése voi, péro Jesús nonegái chupe upe rire. Upérõ Jesús oreko kuri enkuénta Pedro siémpre iñeʼẽrendu hague ha ombyasyeterei hague la ojapóva. Upéicha rupi oikove jey rire, Jesús ojaparese chupe ha oasegura Pédrope operdona ha ohayhuha gueteri chupe (Luc. 24:33, 34).
7. Heʼiháicha Filipenses 4:5, ¿mbaʼéichapa jaipota la hénte ñandekuaa?
7 Jahecháma haguéicha Jehová ha Jesús tekotevẽ jave ojahustaʼimi ha noñemohatãi haʼekuéra heʼívapente. Jehová oipota avei ñande jasegi iñehemplokuéra (elee Filipenses 4:5). Upévare iporãta ñañeporandúramo: “¿Opensápa la hénte nañemohatãiha che haʼévapente ha antendeha enterovéva situasión? ¿Térãpa heʼi voi hikuái chembareteha che haʼévape, chekaprichosoha ha cheexihenteha? ¿Aikópa ainsisti ótrope ojapo hag̃ua álgo che apensaháicha ojejapo vaʼerãha? ¿Térãpa ahendu che rapichakuéra heʼíva ha ameʼẽ chupekuéra la gústo ikatu jave?”. Amáske nañañemotahãi ñande jaʼévapente, jahechauka jasegiha Jehová ha Jesús ehémplo. Oĩ hína mokõi káso tekotevẽhápe jasegi iñehemplokuéra: Okambia jave ñane situasión ha ñande rapichakuéra odesidi ha opensa jave diferénte ñandehegui. Jahechamína koʼã mokõi situasión.
OKAMBIA JAVE ÑANE SITUASIÓN
8. ¿Mbaʼépa ikatu ñanepytyvõ okambia jave ñane situasión? (Ehecha pe nóta).
8 Okambia jave ñane situasión tekotevẽ jajahustaʼimi ha ani ñañemohatã ñande ñapensávapente. Koʼãichagua situasiónpe ikatu oñepresenta ñandéve umi mbaʼe núnka nañaimoʼãi vaʼekue jahasataha. Por ehémplo derrepentete ikatu jaju ñanderasy, jareko provléma ekonómiko térã ñande paíspe oñepyrũ heta provléma polítiko. Entéro koʼã mbaʼe ikatu okambiaite ñande rekove (Ecl. 9:11; 1 Cor. 7:31). Ikatu ijetuʼu avei ñandéve oñekambiáramo ñane asignasión Jehová servísiope. Tahaʼe haʼéva la jahasáva ikatu ñasẽ porã jajapóramo koʼã mbaʼe: 1) Jaasepta la kámbio, 2) ñapensa umi mbaʼe ikatútavare jajapo ha ani la yma guarére, 3) ñañekonsentra umi mbaʼe porã jarekóvare, 4) jajapo iporãva ñande rapichakuéra rehehápe. b Jahechamína mbaʼéichapa koʼã mbaʼe oipytyvõma heta ermánope.
9. ¿Mbaʼéichapa peteĩ matrimónio ombohovái raʼe peteĩ situasión ijetuʼúva oñepresentáva derrepentete?
9 Jaasepta la kámbio. Emanuel ha Francisca oñeasigna de misionéro ótro paíspe. Haʼekuéra oho upépe ha oñepyrũ oaprende la idióma ha oikuaa ohóvo umi ermánope ikongregasión pyahúpe. Péro upeichaháguinte oñepyrũ pe pandémia COVID-19 ha upévare ndaikatuvéi ojeheʼa kuri ótrore. Upéi derrepentete ou omano Francisca sy, ha haʼe ohoseterei kuri oĩ hag̃ua ihentekuérandi péro ndaikatúi oviaha pe pandémia káusare. ¿Mbaʼépa oipytyvõ raʼe ko ermánape oaguanta hag̃ua pe situasión ijetuʼuetéva? Primeroite voi haʼekuéra oñemboʼe ha ojerure Jehovápe omoarandu hag̃ua chupekuéra ani hag̃ua oñekevrantaiterei la koʼẽrõ g̃uarãre. Jehová okontesta chupekuéra itiempoitépe iñorganisasión rupive. Por ehémplo tuichaiterei ikyreʼỹ jey hikuái ohendúvo peteĩ entrevísta peteĩ ermáno heʼihápe: “Pyaʼe jaaseptáramo ñane situasión okambia hague, pyaʼe javyʼa jey ha ñañepyrũ jaaprovecha porã pe oportunida jarekóva jaservi hag̃ua Jehovápe ha ñaipytyvõ ótrope okambiáramo jepe ñane situasión”. c Segundo, haʼekuéra oñehaʼã opredika porãve por teléfono ha omoñepyrũ voi peteĩ kúrso bíblico. Tercero, ko matrimónio oasepta umi ermanokuéra ajúda ha oagradeseterei péicha ojehechauka haguére ojehayhuha chupekuéra. Por ehémplo peteĩ ermána imbaʼeporãitereíva orahaka chupekuéra káda día peteĩ mensáhe téxto bíblico reheve ha ojapo upéva por un áño. Ñande kásope avei jaaseptáramo la kámbio ha ñane situasión pyahu, javyʼa jeýta la ikatúvare jajapo.
10. ¿Mbaʼéichapa peteĩ ermána ojadapta oñepresentárõ guare chupe peteĩ kámbio tuicháva?
10 Ñapensa umi mbaʼe ikatúvare jajapo ha ñañekonsentra umi mbaʼe porã jarekóvare. Cristina, peteĩ ermána Rumaniagua oĩva Japónpe oñedesanima kuri pe kongregasión inglés haʼe oĩ haguépe oñembotýrõ guare. Péro ko ermána ndopytái opensa la oiko vaʼekuére, síno ova peteĩ kongregasión japonéspe ha oñehaʼãmbaite opredika upe idiómape. Upéi Cristina ojerure peteĩ ikompañerakue de traváhope oipytyvõ hag̃ua chupe oñeʼẽ porãve hag̃ua japonéspe. Pe kuñakarai oasepta oipuru la Biblia ha pe folléto ¡Jaikóta vyʼápe pára siémpre! omboʼe hag̃ua Cristínape japonés. Kon el tiémpo Cristina oñeʼẽ porãvéma upe idióma, péro ndahaʼéi upévante, pe kuñakarai oikuaaseve avei kuri la Biblia omboʼéva. Péicha jahecha ndajapytáirõ ñapensa la yma guarére ha ñandepositívoramo, umi kámbio ou vaʼekue ñahaʼarõʼỹetére ikatu avei ogueru umi vendisión nañahaʼarõietéva.
11. ¿Mbaʼépa ojapo peteĩ matrimónio ohasa vaʼekue provléma ekonómiko?
11 Jajapo iporãva ñande rapichakuéra rehehápe. Peteĩ país ojeproivihápe Testigokuéragui oadora Jehovápe, peteĩ matrimónio ou ohasa heta situasión ijetuʼúva pórke pe país voi oñepyrũ oreko heta provléma ekonómiko. ¿Mbaʼépa ojapo upémarõ upe matrimónio? Primero, oñehaʼã oiko sensillomie. Segundo, ndopytái opensa iprovlémarente, síno odesidi opredikavetaha hikuái oipytyvõ hag̃ua hapichakuérape (Hech. 20:35). Pe ermáno heʼi: “Ropredikave rupi saʼive oretiémpo ropensa hag̃ua ore situasión ijetuʼuetévare ha oretiempove rojapo hag̃ua Jehová oipotáva”. Ñande avei ñanemanduʼa vaʼerã okambia jave ñane situasión, iñimportanteha jasegi ñaipytyvõ ótrope espesiálmente predikasión rupive.
12. ¿Mbaʼéichapa apóstol Pablo ehémplo ikatu ñanepytyvõ predikasiónpe?
12 Predikasiónpe avei tekotevẽ jajahustaʼimi jepi. Ñande japredika opaichagua héntepe, orekóva diferénte kultúra ha kreénsia. Apóstol Pablo ojadapta vaʼekue opredika hag̃ua ha ñande ikatu jasegi iñehémplo. Jesús omondo kuri chupe oipytyvõ hag̃ua “umi ndahaʼéivape judío” (Rom. 11:13). Upéicha rupi apóstol Pablo opredika vaʼekue umi judío, griego, ijestúdio porãva, kampesíno mimi, governánte ha rreikuérape. Koʼã hénte idiferenteterei ojuehegui, péro Pablo ‘ojapo entéro mbaʼe oipytyvõ hag̃ua opaichagua persónape’ (1 Cor. 9:19-23). Omboʼétarõ guare, Pablo oreko vaʼekue enkuénta moõguipa ou umi hénte ha mbaʼépa ikreénsia, upéicha rupi haʼe ikatu vaʼekue ojadapta káda persónare og̃uahẽ hag̃ua ikorasõme. Ñande avei jahupytýta heta mbaʼe porã predikasiónpe jajadaptáramo umi héntere ha ñapensáramo mbaʼéichapa ikatu ñaipytyvõ káda únope.
JARRESPETA ÓTRO OPENSÁVA HA ODESIDÍVA
Ndajaikóiramo ñañemombarete, jarrespetáta umi ótro opensáva ha odesidíva (Ehecha párrafo 13)
13. Heʼiháicha 1 Corintios 8:9, ¿mbaʼépa ndajajapomoʼãi jarrespetáramo ótro odesidíva?
13 Ndajaikóiramo ñañemohatã ñande jaʼévapente jarrespetáta ótro opensáva ha odesidíva. Por ehémplo oĩ ermána oipurúva makilláhe, ha ótra katu nahániri, oĩ avei ermáno odesidíva ndoʼumoʼãiha vevída, péro oĩ avei odesidíva hoʼutaha. Avei káda uno ikatu odesidi mbaʼéichapa okuidáta isalúre, pórke entéronte ñaneresãise. Ñañatende vaʼerã ani ñañemombarete ha ñapensa la ñande jadesidívante iporãha. ¿Mbaʼérepa upéva ipeligróso? Pórke ikatu ñainsisti ótro avei odesidi hag̃ua ojapo la ñande jajapóva, ha amo ipahápe ñaofende chupe ha ñande káusare oĩma división kongregasiónpe. ¡Nahiʼãiete ningo ñandéve oiko upéva! (Elee 1 Corintios 8:9; 10:23, 24). Jahechamína mokõi ehémplo ohechaukáva mbaʼéichapa Jehová konsehokuéra ikatu ñanepytyvõ ñandeekilivrádo hag̃ua ha osegi hag̃ua oĩ pyʼaguapy kongregasiónpe.
Ndajaikóiramo ñañemombarete, jarrespetáta umi ótro opensáva ha odesidíva (Ehecha párrafo 14)
14. ¿Mbaʼe konsého oĩva la Bíbliapepa ikatu ñanepytyvõ jadesidíta jave mbaʼéichapa ñañemondéta ha jajearregláta?
14 Ñañemonde ha jajearregla lája. Jehová ndeʼíri ñandéve mbaʼeichaitépa ñañemonde vaʼerã, péro si omeʼẽ konsého jareko hag̃ua enkuénta. Ñañemonde lájare jahechauka vaʼerã ñamombaʼeguasuha Ñandejárape, ‘japororrespetaha ha ñaneakãguapyha’. Ndajaikoséi ñañemonde oñemañamba hag̃uáicha voi ñanderehe (1 Tim. 2:9, 10; 1 Ped. 3:3). Umi konsého oĩva la Bíbliape oipytyvõkuaa avei umi ansiánope ani hag̃ua oiko omoĩ rrégla heʼíva mbaʼéichapa oñemonde ha oreko vaʼerã iñakãrangue umi ermáno ha ermána. Por ehémplo peteĩ kongregasiónpe, unos kuánto ermáno imitãva oñepyrũ okopia umi mitãrusu oĩvape ijerére ha iñakãrangue mbykýramo jepe hikuái, ichara pórke upéva la modaite kuri. Upévare umi ansianokuéra oipytyvõse chupekuéra. ¿Mbaʼéichapa ojapóta upéva omoĩʼỹre hikuái rrégla? Pe superintendénte de sirkuíto oakonseha umi ansiánope heʼínte hag̃ua umi ermánope péicha: “Ñamoĩ chupe erekoha platafórmape peteĩ asignasión, ha umi nerendúva oñatendeve la ne píntare oñatende rangue la erévare. Upéva heʼise erekoha algún provléma rejearregla ha reñemonde lájape”. Jahechaháicha natekotevẽi kuri umi ansiáno omoĩ chupekuéra peteĩ rrégla, síno pe konsého rupivéntema umi ermáno imitãva ohechakuaa mbaʼépepa okambia vaʼerã. d
Ndajaikóiramo ñañemombarete, jarrespetáta umi ótro opensáva ha odesidíva (Ehecha párrafo 15)
15. ¿Mbaʼe heʼíva la Bíbliapa jareko enkuénta jadesidíta jave mbaʼéichapa jakuidáta ñande salúre? (Romanos 14:5).
15 Jakuida lája ñande salúre. Káda kristiáno odesidi vaʼerã mbaʼépa ojapóta okuida hag̃ua isalúre (Gál. 6:5). Jadesidíta jave mbaʼe tratamiéntopa jasegíta jareko vaʼerã enkuénta Ñandejára léi heʼiha ndajaipurúi vaʼerãha tuguy ni espiritísmo (Hech. 15:20; Gál. 5:19, 20). Péro ótra kosarã káda únoma ikatu odesidi mbaʼe tratamiéntopa osegíta. Oĩ ermáno odesidíva oho umi doktór rendápe ha hoʼu umi pohã haʼekuéra orresetáva, péro oĩ ótro osegisénteva umi tratamiénto naturál. Ikatu oime ñande ñaĩ konvensído peteĩ tratamiénto iporãha térã ivaiha, upéicharamo jepe jarrespeta vaʼerã ñane ermáno odesidíva ojapo okuida hag̃ua isalúre. Ha siémpre ñanemanduʼa vaʼerã koʼã mbaʼére: 1) Ñandejára Rréino añoiténte oipeʼapaitéta umi mbaʼasy (Is. 33:24). 2) Káda uno oĩ vaʼerã segúro oĩ porãha pe odesidíva (elee Romanos 14:5). 3) Ani jahusga avavépe ni jajapo álgo ikatúva oofende ótrope (Rom. 14:13). 4) Kristianokuéra japorohayhu ha jaikuaa pe unida oĩva kongregasiónpe iñimportanteveha la ñande ñapensávagui (Rom. 14:15, 19, 20). Ñanemanduʼa meméramo koʼã mbaʼére, jasegíta jajogueraha porã ñane ermanokuérandi ha ñaipytyvõta oĩ hag̃ua pyʼaguapy kongregasiónpe.
Ndajaikóiramo ñañemombarete, jarrespetáta umi ótro opensáva ha odesidíva (Ehecha párrafo 16)
16. ¿Mbaʼéichapa peteĩ ansiáno ikatu ohechauka noñemohatãiha haʼe heʼívapente? (Ehecha umi taʼanga).
16 Umi ansiáno ohechauka noñemohatãiha haʼekuéra heʼívapente, ha péicha omoĩ peteĩ ehémplo iporãva enterovépe (1 Tim. 3:2, 3). Por ehémplo peteĩ ansiáno ndoikomoʼãi ohaʼarõ ojejapo siémpre haʼe heʼíva ijedave haguérente umi ótro ansiánogui. Upéva rangue orrekonose Ñandejára espíritu ikatuha omomýi oimeraẽ ansiánope heʼi hag̃ua álgo oipytyvõtava ojedesidi porã hag̃ua. La majoría umi ansiáno peteĩ kongregasionpegua odesidíramo álgo ndohóiva la Biblia kóntrape, pe ansiáno noñemohatãiva haʼe heʼívapente, vyʼápe oapojáta la ojedesidíva oiméramo jepe ogusta raʼe chupe ótra kósa.
UMI VENDISIÓN JARRESIVÍTAVA JAJAHUSTAʼIMÍRAMO
17. ¿Mbaʼe iporãvapa jahupyty ndajaikóiramo ñañemohatã ñande jaʼévapente?
17 Heta mbaʼe porã ningo jahupyty ndajaikóiramo ñañemohatã ñande jaʼévapente. Por ehémplo jajogueraha porã ermanokuérandi, oĩ pyʼaguapy kongregasiónpe, javyʼa ñaĩ jave diferénte persónandi tahaʼe haʼéva ikultúra ha jadisfruta ikatu haguére jaadora Jehovápe oñondivepa peteĩ famíliaicha. Ha iñimportanteveha ñandepyʼarory voi jaikuaávo jasegiha hína ñande Ru yvagapegua ehémplo.
PURAHÉI 90 ¡Ñañehaʼãkena ñañomokyreʼỹ!
a Jehová ha Jesús noñemohatãi haʼekuéra heʼívapente ha naiprovlémai ojahustaʼimi hag̃ua tekotevẽ jave. Haʼekuéra oipota ñande jasegi iñehemplokuéra. Péicha pyaʼeve jajadaptáta okambia jave ñane situasión, por ehémplo jajúramo ñanderasy térã jareko provléma ekonómiko. Avei nañañemohatãirõ ñande jaʼévape ñaipytyvõta osegi hag̃ua oĩ pyʼaguapy ha unida kongregasiónpe.
b Ehecha pe artíkulo “Cómo adaptarse a los cambios”, osẽ vaʼekue ¡Despertad! número 4 de 2016-pe.
c Ehecha pe vidéo Entrevísta ojejapóva ermáno Dimitri Mijáilovpe, jatopáva pe artíkulo héravape “Jehová ojapo pe persekusióngui peteĩ oportunida ojekuaa hag̃ua chupe”, osẽ vaʼekue pe Prográma rreuniónpe g̃uarã marzo ha abril de 2021-pe.
d Reikuaave hag̃ua mbaʼéichapa ñañemondéta ha jajearregláta, ehecha pe lívro ¡Jaikóta vyʼápe pára siémpre!, leksión 52.