¿Jahejápa hína ñanemoldea pe Alfaréro Ikatupyryvéva?
“Ku ñaiʼũ oĩháicha pe [alfaréro] pópe, péicha avei peẽ Israel rogaygua peime che pópe.” (JER. 18:6, ÑÑB)
PURAHÉI: 60, 22
1, 2. a) ¿Mbaʼérepa Ñandejára heʼi Daniel rehe haʼeha peteĩ “kuimbaʼe ojeguerohorýva”? b) ¿Mbaʼépa ñanepytyvõta ñaneñeʼẽrendu hag̃ua Daniel ojapo haguéicha?
UMI hudío ojeguerahárõ guare Babilóniape, ohecha hikuái pe siudápe oĩha hetaiterei imáhen, ha umi hénte upepegua oadoraha umi demóniope. Upéicharõ jepe, oĩ heta hudío osegíva iñeʼẽrendu Jehovápe, umíva apytépe Daniel ha mbohapy iñamígo. Haʼekuéra ndohejái umi mbaʼe vai ojejapóva Babilóniape omoldea chupekuéra (Dan. 1:6, 8, 12; 3:16-18). Daniel ha umi iñamígo orrekonose Jehová haʼeha Ijalfaréro ha osegi oadora chupe añoite. Daniel oikóramo jepe heta áñore Babilóniape umi hénte aña apytépe, peteĩ Ñandejára ánhel heʼi vaʼekue hese haʼeha peteĩ “kuimbaʼe ojeguerohorýva” (Dan. 10:11, 19, TNM).
2 Ymave, umi alfaréro omoĩmi vaʼekue avei pe ñaiʼũ peteĩ móldepe ikatu hag̃uáicha oforma peteĩ mbaʼyru. Ñane tiémpope avei umi oadoráva Jehovápe orrekonose haʼe orekoha derécho ñanegoverna hag̃ua, ha orekoha autorida omoldea hag̃ua umi tetãnguérape (elee Jeremías 18:6). Ñandejára avei oreko derécho ñanemoldea hag̃ua káda únope. Upéicharõ jepe, Jehová nañandeovligái ñakambia hag̃ua, síno oipota ñandete jadesidi jahejátapa haʼe ñanemoldea. Ko artíkulope jahecháta mbaʼépa jajapo vaʼerã ikatu hag̃uáicha Jehová siémpre ñanemoldea. Avei ñarrespondéta koʼã porandu: 1) ¿Mbaʼe mbaʼépa ñamboyke vaʼerã Jehová ñanemoldea porã hag̃ua? 2) ¿Mbaʼeichagua kualidápa ñaikotevẽ ikatu hag̃uáicha Jehová ñanemoldea? Ha, 3) ¿mbaʼéichapa tuakuéra ohechauka oñemoĩha Jehová poguýpe omoldeávo ifamíliape?
MBAʼÉPA ÑAMBOYKE VAʼERÃ JEHOVÁ ÑANEMOLDEA PORÃ HAG̃UA
3. ¿Mbaʼépa ñamboyke vaʼerã ikatu hag̃uáicha siémpre Jehová ñanemoldea? Emoĩ peteĩ ehémplo.
3 La Biblia heʼi: “Heta mbaʼére ningo reñatende vaʼerã, péro pe iñimportantevéva hína reñatende ne korasõre, pórke nde rekove odepende ne korasõre” (Prov. 4:23, TNM). Upéicharõ, ikatu hag̃uáicha Jehová ñanemoldea ha jaasepta ikonsého, ñañangareko vaʼerã ñane korasõre. Upévare jajekuida vaʼerã ani hag̃ua jaju ñañembotuicha, ikangy ñande jerovia térã jajapo umi mbaʼe Jehovápe ombojeguarúva. Nañañatendéiramo, koʼã mbaʼe ikatu ñandegueraha vai, ha upevakuére ñanedesovediénte ha ñañemoĩ Jehová kóntrape (Dan. 5:1, 20; Heb. 3:13, 18, 19). Upéva oiko vaʼekue peteĩ rréi Judaguáre hérava Uzías (elee 2 Crónicas 26:3-5, 16-21). Ñepyrũrã Uzías “iñeʼẽrendu Jehovápe” ha oiko iñamígoramo. Upévare Jehová voi omeʼẽ chupe tuicha autorida. Péro upéi Uzías “oñepyrũ oñemombaʼeguasu”, ha oho pe témplope ohapy hag̃uáicha insiénso. Hiʼarive umi saserdóte añoite ikatu kuri ojapo upe tembiapo. Péro haʼekuéra heʼírõ guare Uzíaspe ndovaleiha ohapy pe insiénso, Uzías ipochyeterei. Upepete Jehová okastiga chupe, ha opyta ilépra omano meve (Prov. 16:18).
4, 5. ¿Mbaʼépa ikatu oiko ñañemombaʼeguasúramo? Emoĩ peteĩ ehémplo.
4 Ñañemombaʼeguasúramo, ikatu jaju ‘ñapensa ñandevaleveha’ ótrogui ha jarrechasa umi konsého oĩva la Bíbliape (Rom. 12:3; Prov. 29:1). Upéva oiko vaʼekue peteĩ ansiáno héravare Jim. Haʼe noĩri de akuérdo umi ótro ansiáno ikongregasionguándi peteĩ mbaʼépe. Jim omombeʼu: “Che haʼe chupekuéra naikonsideradoiha hikuái, ha asẽ ahapa hese pe rreunión de ansiánogui”. Seis mése rire, Jim ova ótra kongregasiónpe, péro upépe noñenombrái chupe ansiáno. Haʼe heʼi: “Apyta ningo yvýre. Che aime kuri segúro arekoha la rrasón. Ha upeakuére añemomombyry Jehovágui ha iñorganisasióngui”. Jim 10 áñore ndopredikavéi ni ndohovéi rreunionhápe. Haʼe heʼi avei: “Cheorgullosoiterei vaʼekue ha akulpa Jehovápe oiko haguére cherehe koʼã mbaʼe. Umi ermáno ningo áñore chevisita, péro che ndaaseptái pe ajúda”.
5 ¿Mbaʼépa ñaaprende Jim rehe oiko vaʼekuégui? Jaikóramo ñañemombaʼeguasu, ikatu hína ñamoĩ exkúsa jajapo jave peteĩ mbaʼe noĩporãiva. Ha upéva oikóramo, jajoguáta umi ñaiʼũ hatãmbávape ndaikatúiva oñemoldea (Jer. 17:9). Jim omombeʼu: “Ndaikatúi aipeʼa che akãgui pe oiko vaʼekue. Chéve g̃uarã haʼekuérante voi la kulpávle”. Upéicharõ, oiméramo peteĩ ermáno ñaneofende raʼe, térã ñambyasyeterei japerde haguére peteĩ priviléhio, ¿mbaʼéichapa ñarreaksiona? ¿Jahechaukápa ñandeorgullosoha, térãpa ñañehaʼãmbaite ñañemoĩ porã jey pe ermánondi ha jasegi ñaneñeʼẽrendu Jehovápe? (Elee Salmo 119:165 ha Colosenses 3:13.)
6. ¿Mbaʼépa ikatu oiko jajapóramo peteĩ mbaʼe Jehovápe ombojeguarúva?
6 Jaikóramo jajapo peteĩ mbaʼe Jehovápe ombojeguarúva, ha ñamoʼã la jajapóva, ikatu hína nañapenavéi Jehová konsehokuérare. Upéva oikóramo jasegíta japeka. Peteĩ ermáno omombeʼu ojapo hague oikóvo peteĩ mbaʼe vai, ha kon el tiémpo nomolestaguasuvéima chupe la ikonsiénsia (Ecl. 8:11). Ótro ermáno ojepokuaáva kuri ohecha pornografía katu heʼi: “Añemeʼẽʼỹre enkuénta añepyrũ akritika umi ansiánope”. Umi mbaʼe vai ojapóva ko ermáno, operhudikáma iñamista Jehovándi. Péro ojepillárõ guare, umi ansiáno pyaʼe voi oipytyvõ chupe, ha haʼe oasepta pe ajúda. Añetehápe ningo entéronte ñaneimperfékto ha jajavy. Ikatu ningo sapyʼánte ñañepyrũ jataky ñande rapichakuérare, térã ñamoĩ exkúsa ñanerembiapo vai jave. Oikóramo ñanderehe upéva, iporãve hína jajerure Jehovápe tañanepytyvõ ha tañaneperdona, ñamboyke rangue umi konsého haʼe omeʼẽva.
7, 8. a) ¿Mbaʼéichapa umi isrraelíta ehémplo ohechauka ikatuha jaha vai ofaltáramo ñandéve fe? b) ¿Mbaʼépa ñaaprende umi isrraelítagui?
7 Umi isrraelíta osẽrõ guare Egíptogui, ohecha umi milágro ndetuichapa jepéva Jehová ojapóva hesehapekuéra. Upéicharõ jepe, oike potaitérõ guare pe Tiérra Prometídape, haʼekuéra ndoaseptái Jehová konsého. ¿Mbaʼérepa? Pórke ndojeroviái hikuái Jehováre ipyʼaite guive. Upéva rangue, haʼekuéra okyhyje ha oñepyrũ oñeʼẽ vai Moisésre. Heʼi voi katu hikuái ohose jeyha Egíptope, ojereko haguépe chupekuéra kómo esklávo. Jehovápe hasyeterei koʼã mbaʼe, upévare heʼi: “¿Arakaʼe peve piko ndacherrespetamoʼãi ko puévlo?” (Núm. 14:1-4, 11, TNM; Sal. 78:40, 41). Umi isrraelíta omano pe desiértope, pórke ndoaseptái Jehová konsého ha ndojeroviái hese.
8 ¿Mbaʼépa ñaaprende umi isrraelítagui? Koʼág̃a pe múndo pyahu hiʼag̃uimbaitéma, ha jahasa hína heta hetave mbaʼe ijetuʼúva tekotevẽhápe jahechauka jajeroviaha Jehováre ñande pyʼaite guive. Por ehémplo, ¿mbaʼépa ñapensa pe promésa oĩvare Mateo 6:33-pe? Enterovéva ningo iporã jajepyʼamongeta ha ñañeporandu koʼã mbaʼe: “¿Ahechaukápa umi mbaʼe ajaposéva ha adesidívare ajeroviaha Jesús heʼi vaʼekuére? ¿Amboykénepa rreunión térã predikasión aganave hag̃ua pláta? ¿Mbaʼépa ajapóta che travahohápe ojejeruréramo chéve ambaʼapove hag̃ua, térã oĩramo chejopyetereíva ajapo hag̃ua ivaíva? ¿Ahejátapa ko múndo chemoldea ha cheguenohẽ Jehová rapégui?”.
9. a) ¿Mbaʼérepa siémpre tekotevẽ jahecha mbaʼéichapa oĩ ñande fe? b) ¿Mbaʼéichapa jajapo vaʼerã upéva?
9 Ñapensamína ótro ehémplore. Ñamoĩ chupe peteĩ ermáno ndosegiseiha umi konsého bíblico oñeʼẽva umi júnta vaíre, umi vyʼarãre, térã umi oñemosẽvare kongregasióngui. Ñañeporandumína: “¿Ndoikói mbaʼépa hína koʼã mbaʼe cherehe?”. Ñañemeʼẽramo enkuénta ñañepyrũha ñanedesovediénte, ensegída jajepyʼamongeta vaʼerã jaikuaa hag̃ua mbaʼéichapa oĩ ñande fe. La Biblia omeʼẽ ñandéve ko konsého: “Pesegíkena pejesareko pendejehe pehecha hag̃ua peñakarama hatãpa pende jeroviáre. Pehechauka memékena mbaʼeichagua persónapa peẽ” (2 Cor. 13:5). Añetehápe, pyʼỹinte jahecha vaʼerã mbaʼéichapa ñaĩ Jehová renondépe, ha upearã jaipuru vaʼerã la Biblia.
JAHEJÁKENA ÑANDEJÁRA TAÑANEMOLDEA
10. ¿Mbaʼépa ñanepytyvõ ikatu hag̃uáicha Jehová ñanemoldea porã?
10 Jehová ñanepytyvõ ikatu hag̃uáicha jajogua umi ñaiʼũ huʼũ porãvape ha ifásilva oñemoldea hag̃ua. Upearã ojevale la Biblia, pe kongregasión ha pe predikasiónre. Jaikuaaháicha, umi alfaréro oipuru y omohuʼũ hag̃ua pe ñaiʼũ. Péicha avei jaleéramo la Biblia káda día ha jajepyʼamongeta hese, Jehová ikatúta ñanemoldea porãve. Jehová omanda vaʼekue umi rréi de Israélpe okopia hag̃ua pe Léi ha olee hag̃ua káda día (Deut. 17:18, 19). Umi apóstol ohechakuaa vaʼekue avei tekotevẽha olee ha ojepyʼamongeta Ñandejára Ñeʼẽre ikatu hag̃uáicha opredika. Haʼekuéra oskrivírõ guare umi Escrituras Griegas, heta vése osita pe Escrituras Hebréasgui, térã omensiona umi mbaʼe oĩva upépe. Ha opredika jave, omokyreʼỹ hikuái umi héntepe olee hag̃ua Ñandejára Ñeʼẽ (Hech. 17:11). Koʼág̃a avei, ñande jahechakuaa iñimportantetereiha jalee la Biblia káda día ha jajepyʼamongeta umi mbaʼe jaleévare (1 Tim. 4:15). Upéva ñanepytyvõta ikatu hag̃uáicha ñaneumílde ha jaheja Jehová ñanemoldea.
¿Ndépa reaprovechapaite hína opa mbaʼe Jehová omeʼẽva ndéve nemoldea hag̃ua? (Ehecha párrafo 10 al 13))
11, 12. ¿Mbaʼéichapa Jehová ojevale pe kongregasiónre omoldea hag̃ua káda únope? Emoĩ peteĩ ehémplo.
11 Ñandejára ñandekuaa porã káda únope,
ha oipuru pe kongregasión ñanemoldea hag̃ua. Ñanemanduʼami jeýna Jim rehe, pe ermáno ñañeʼẽma hague. Peteĩ ansiáno ohechauka oñeinteresaha hese, ha upéva omokambia chupe. Jim omombeʼu: “Haʼe núnka ndeʼíri chéve che káusare la aimeha upéicha. Upéva rangue, siémpre chemokyreʼỹ ha heʼi chepytyvõseha”. Tres mése haguépe ko ansiáno oinvita Jímpe oho hag̃ua rreunionhápe. Jim heʼi: “Umi ermáno cherresivi porãiterei, ha upéva chepytyvõ akambia hag̃ua apensa lája. Che rembireko katu siémpre oservi porã Jehovápe. Haʼe ha umi ermáno kongregasiongua chemokyreʼỹ añemoag̃ui jey hag̃ua Ñandejárare. Avei chemokyreʼỹeterei mokõi artíkulo osẽ vaʼekue La Atalaya del 15 de noviembre de 1992-pe. Koʼã artíkulo héra: “Jehová no tiene la culpa”, ha “Sirva a Jehová lealmente”.12 Tiémpo rire, Jim oservi jey kómo ansiáno. Upe guive oipytyvõ ha omombarete heta ermáno ohasávape peichagua situasiónre. Jim heʼi: “Che apensa kuri Jehová haʼeha che amígo, péro ndaupeichaiete raʼe. Koʼág̃a añemeʼẽ enkuénta cheorgullosoiterei hague, ha upéva káusare añekonsentraiterei che rapichakuéra deféktore, ha ndahechakuaavéima mbaʼépa la iñimportantevéva” (1 Cor. 10:12).
13. a) ¿Maʼerãpa avei ñanepytyvõ pe predikasión? b) ¿Mávapepa ovenefisia ñane predikasión?
13 Pe predikasión avei ikatu ñanepytyvõ Jehová ñanemoldea hag̃ua. ¿Mbaʼérepa jaʼe upéva? Pórke japredika jave pe marandu porã, jahechauka vaʼerã ñaneumildeha ha jarekoha umi kualida oúva pe espíritu sántogui (Gál. 5:22, 23). Ñapensamíntena mbaʼéichapa pe predikasión ñanepytyvõma jahechauka porãve hag̃ua algúna kualida. Jasegívo Jesús ehémplo, umi hénte ñanerenduseve ha ikatu voi ñandetrata porã japredika jave chupekuéra. Jahechamína peteĩ ehémplo. Austráliape, mokõi Testígo og̃uahẽ opredika peteĩ kuñakaraípe, péro haʼe ipochyeterei ha otrata vai chupekuéra. Upéicharõ jepe, umi Testígo ohendu porãnte chupe. Tiémpo rire, pe kuñakarai ombyasyeterei otrata haguére péicha umi ermánope, ha oskrivi pe sukursálpe: “Ajediskulpase ningo umi mokõi persóna og̃uahẽ vaʼekuéndi ógape. Haʼekuéra ipasiénsia ha cherrespeta, péro che katu cheorgullosaiterei ha amaltrata chupekuéra. Chevyraiterei ningo pórke mokõi persóna oñeʼẽva Ñandejára Ñeʼẽre ou cherendápe, ha che arrechasa chupekuéra”. Ko ehémplo ohechauka iñimportantetereiha ñaneamávle japredika jave. Jahechaháicha, pe predikasión ovenefisia umi japredikávape ha avei ñanevenefisia ñandéve, pórke ñanepytyvõ ñamehora hag̃ua.
TUAKUÉRA, PEÑEMOĨKENA JEHOVÁ POGUÝPE PEMOLDEÁVO PENE FAMÍLIAPE
14. ¿Mbaʼépa ojapo vaʼerã tuakuéra oipotáramo ifamília osẽ porã chupekuéra?
14 La majoría umi mitã ningo iñumílde ha oaprendese voi heta mbaʼe ipyahúva (Mat. 18:1-4). Upévare tuakuéra oipytyvõ vaʼerã ifamília michĩvape oaprende ha omombaʼe hag̃ua pe añetegua (2 Tim. 3:14, 15). Péro upearã tekotevẽ haʼekuéra voi ohayhu pe añetegua ipyʼaite guive, ha okumpli la Biblia heʼíva. Ojapóramo hikuái upéicha, umi mitãme ifasilvéta ohayhu ha iñeʼẽrendu hag̃ua Jehovápe. Avei haʼekuéra ohechakuaáta orresiviha pe disiplína, Jehová ha ituakuéra ohayhu rupi chupekuéra.
15, 16. ¿Mbaʼépa ojapo vaʼerã tuakuéra ohechauka hag̃ua ojeroviaha Jehováre peteĩ ifamília oñemosẽramo kongregasióngui?
15 Heta sy ha túa ohekomboʼe porã ifamíliape la Biblia heʼiháicha. Upéicharõ jepe, oĩ umi okakuaa rire oñemomombyrýva Jehovágui térã oñemosẽva voi kongregasióngui. Upéva ningo oheja vaieterei umi família kristiánape. Peteĩ ermána oikóva Sudáfricape omombeʼu: “Che ermánope oñemosẽrõ guare kongregasióngui, haʼete voi oréve ku omanóva. Rombyasyeterei ningo”. Péro, ¿mbaʼépa ojapo ko ermána ha ituakuéra? Okumpli hikuái la Biblia heʼíva (elee 1 Corintios 5:11, 13). Ko ermána tuakuéra heʼi: “Ore rojedesidi rojapotaha la Biblia heʼíva. Roikuaa porã katuete rosẽ porãvetaha rojapóramo opa mbaʼe Jehová oipotaháicha. Avei rontende pe oñemosẽva kongregasióngui orresivinteha peteĩ disiplína oúva Jehovágui, pórke haʼe ñanderayhu ha ñandekorrehi tekotevẽ jave. Upévare roñeʼẽ pe ore família oñemosẽ vaʼekuéndi, sólamente oĩramo peteĩ mbaʼe tekotevẽva ojerresolve en família”.
16 Péro, ¿mbaʼéichapa oñeñandu pe mitãkariaʼy oñemosẽ vaʼekue? Tiémpo rire haʼe omombeʼu: “Che aikuaa porã che família ndachedespresiái hague. Haʼekuéra ningo iñeʼẽrendúnte kuri Jehovápe ha iñorganisasiónpe”. Upéi heʼi: “Avei ahechakuaa Jehovápe añoite ikatuha ajerure chepytyvõ ha cheperdona hag̃ua. Upépe ae añandu mbaʼeichaitépa aikotevẽ hese”. Ko mitãkariaʼy ovolve jey kongregasiónpe ha ifamília ovyʼaiterei. Jahechaháicha, jarekóramo enkuénta Jehovápe opa mbaʼépe, katuete ñasẽ porãta (Prov. 3:5, 6; 28:26).
17. a) ¿Mbaʼérepa siémpre ñaneñeʼẽrendu vaʼerã Jehovápe? b) ¿Mbaʼéichapa upéva ñanevenefisia?
17 Isaías oprofetisa vaʼekue umi hudío oĩva kuri Babilóniape oñarrepentitaha ha heʼitaha: “Jehová, nde ningo ore Ru. Ore katu ñaiʼũ, ha nde ore Apohare; ha entéro ore nde po rembiapokue”. Upéi heʼi avei hikuái: “Anína nemanduʼa opa árare ore rembiapo vaíre. Péina, emaʼẽmína orerehe, ore ningo nde puévlo hína” (Is. 64:8, 9, TNM). Jasegíramo ñaneumílde ha ñaneñeʼẽrendu Jehovápe, haʼe ñandeguerohorýta, Daniélpe oguerohory haguéicha. Jehová siémpre ñanemoldeáta la Biblia, ijespíritu ha iñorganisasión rupive, ikatu hag̃uáicha amo gotyove oiko ñandehegui ‘Ñandejára raʼy’ perfékto (Rom. 8:21).