¿MBAʼÉICHAPA ikatu reĩ segúro Jehová añetehápe oñeinteresaha nderehe? La Biblia heʼi: “Pemoĩ ipópe opaite mbaʼe pendepyʼapýva, haʼe ojepyʼapýgui penderehe” (1 Ped. 5:7). ¿Mbaʼépa ohechauka porã Jehová oñeinteresaha nderehe?

Ñande ningo jaipota ñane amigokuéra ñandetrata porã ha ipojera ñanendive. Ha Jehová peichagua persóna hína, pórke haʼe otrata porã yvyporakuérape káda día. Por ehémplo, haʼe “oheja osẽ kuarahy iñaña ha hekoporãvape g̃uarã; ha omongy hekojoja ha hekojojaʼỹvape g̃uarã” (Mat. 5:45). Añetehápe, oky ha osẽ rupi pe kuarahy, jarresivi heta mbaʼe porã ko yvy ape ári. Ñandejára omeʼẽ entérope hiʼupy ha péicha ombopyʼarory yvyporakuérape (Hech. 14:17). Jehová oñenkarga ikatu hag̃uáicha ko yvy oprodusi heta hiʼupy. ¡Ajépa jadisfrutaite jaʼu jave umi tembiʼu hetereíva!

Upéicharõ, ¿mbaʼérepa oĩ heta persóna iñembyahýiva? Pórke yvyporakuéra goviérnope g̃uarã iñimportanteve okonsegi autorida ha pláta, oipytyvõ rangue umi héntepe oiko porãve hag̃ua. Péro Jehová koʼẽrõite ohundipaitéta umi hénte itaryrýivape. Haʼe oipeʼáta entéro yvypóra goviérno ha omoĩta hekovia Igoviérno yvagapegua oĩva Itaʼýra poguýpe. Upe tiémpope avave naiñembyahyimoʼãvéima. Péro upe mboyve, Ñandejára osegíta omeʼẽ isiervokuérape opa mbaʼe oikotevẽva (Sal. 37:25). ¡Ajépa upéva ohechauka porãiterei Jehová oñeinteresaha nderehe!

Umi oñoamigoitéva ningo ohasase tiémpo oñondive. Ikatu voi órare oñemongeta hikuái peteĩ téma ogustávare chupekuéra. Avei, peteĩ amígo ikalidáva ojapysaka porã pe ótrore omombeʼu jave iprovléma ha umi mbaʼe oipyʼapýva chupe. Ha Jehová upeichaite avei. Haʼe ñanerenduseterei voi ñañemboʼe jave chupe. Upévare la Biblia ñanemokyreʼỹ: “Peñemboʼe memékena” ha “peñemboʼe jey jeýkena” (Rom. 12:12; 1 Tes. 5:17).

¿Mboy tiémporepa Jehová oĩ dispuésto ohendúvo ñane ñemboʼe? La Biblia ñanepytyvõ jaikuaa hag̃ua upéva. Por ehémplo, Jesús oiporavo mboyve ijapostolkuerarã, “oñemboʼe Ñandejárape peteĩ pyhare pukukue” (Luc. 6:12). Katuete oime vaʼerã Jesús omombeʼu Itúape umi kualida ha defékto orekóva káda uno umi disípulo, ha ojeruréne raʼe chupe ajúda ikatu hag̃uáicha oelehi porã ijapostolkuerarã. Upe koʼẽme, Jesús oĩma segúro oiporavo porã hague. La Biblia heʼi voi Ñandejára ‘ohenduha umi hénte ñemboʼe’ (Sal. 65:2, TNM). Péicha jahecha Jehová ohenduseha voi ñañemboʼe jave chupe ñande pyʼaite guive. Tahaʼe haʼéva pe tiémpo jaipurúva ñañemboʼe hag̃ua, haʼe siémpre oĩ dispuésto ñanerendúvo.

Heta vése umi oñoamigoitévape jepe ijetuʼu oñoperdona hag̃ua. Upéicha rupi, sapyʼánte umi haʼe vaʼekue amígo heta áñore, ou oñemomombyry ojuehegui. Péro Jehová oporoperdonakuaa. La Biblia omokyreʼỹ entéro umi isinsérovape ojerure hag̃ua chupe perdón, pórke haʼe “operdonakuaa” (Is. 55:6, 7, Ñande Ruete Ñeʼẽ Bíblia [ÑÑB]). ¿Mbaʼépa omomýi Jehovápe ñaneperdonaite hag̃ua?

Haʼe ojapo upéva pórke ñanderayhueterei. Upévare omeʼẽ Itaʼýra omano hag̃ua ñanderehehápe, ikatu hag̃uáicha jajei pekádo poguýgui ha anivéma hag̃ua jasufrieterei (Juan 3:16). Péro ndahaʼéi upévante la jahupytýva Jesús sakrifísio rupive. Ñandejára ikatu avei operdona entéro umi haʼe ohayhúvape. Apóstol  Juan heʼi vaʼekue: “Ñandejára ijeroviaha ha ihústo, upévare [ñakonfesáramo] ñande pekádo haʼe ñaneperdonáta” (1 Juan 1:9). Jehová ñaneperdona rupínte ikatu jasegi jaiko iñamígoramo. ¡Ajépa javyʼaite jaikuaávo upéva!

Peteĩ amígo verdadéro ningo nepytyvõ reikotevẽ jave. Ha Jehová ojapo avei upéva. La Biblia heʼi Jehová siervokuérare: “Oñepysãngáramo jepe ndoʼavaimoʼãi, pórke Jehová oñakarama hese ipógui omopuʼã jey hag̃ua chupe” (Sal. 37:24, TNM). Jehová oipytyvõ isiervokuérape heta hendáicha. Jahechamína mbaʼépa oiko vaʼekue peteĩ mitãkuña oikóvare Santa Crúzpe (St. Croix), oĩva ísla del Caríbepe.

Haʼe ningo heta ohasa asy vaʼekue ijeskuélape, pórke ikompañerokuéra oinsisti chupe omombaʼeguasu hag̃ua pe vandéra. Upémarõ ko mitãkuña ojerure Jehovápe toipytyvõmi chupe, ha ojedesidi ombohovaitaha upe provléma. Ojejerurérõ guare chupe oexpone hag̃ua peteĩ téma, haʼe oaprovecha oexplika hag̃ua mbaʼérepa nomombaʼeguasúi pe vandéra. Upérõ oipuru pe lívro hérava “Che lívro omombeʼúva istória oĩva Ñandejára Ñeʼẽme”. Pe mitãkuña oipuru pe istória oñeʼẽva Sadrac, Mesac ha Abednégore, ha oexplika mbaʼéichapa ko rreláto oipytyvõ chupe odesidi porã hag̃ua. Haʼe heʼi: “Jehová oñangareko koʼã mbohapy evréore pórke oñenega hikuái oadora pe imáhen”. Upéi oikuaveʼẽ pe lívro ikompañerokuérape, ha 11 voi oasepta. Haʼe ovyʼaiterei pórke ohechakuaa Jehová omombarete ha omoarandu hague chupe odefende hag̃ua ikreénsia ko situasión ijetuʼúvape.

Sapyʼánte haʼetéramo ndéve Jehová noñeinteresaiha nderehe, ejepyʼamongetamína heʼívare Salmo 34:17-19; 55:22, ha 145:18, 19. Ejerure avei umi ermáno iñexperiensiavévape tomombeʼu ndéve mbaʼéichapa Jehová oñangareko raʼe hesekuéra. Ha reikotevẽ jave ajúda, eñemboʼe Ñandejárape ha ejerure chupe tanepytyvõmi. Katuete pyaʼe rehechakuaáta haʼe oñeinteresaha nderehe.