Umi 6 kuimbaʼe orekóva ipópe árma oporohundi hag̃ua, orrepresenta umi ehérsito yvagapeguápe oñenkarga vaʼekue ohundi hag̃ua Jerusalén. Avei orrepresenta umi ohundítava ko múndo aña oĩva Satanás poguýpe, og̃uahẽ vove Armagedón. Jahechaháicha, kóva haʼe hína peteĩ entendimiénto pyahu ñandéve g̃uarã. Péro, ¿mbaʼérepa tekotevẽ kuri ñakambia ñantende lája?

Áño 607 mboyve a.C., Jehová ohechauka vaʼekue Ezequiélpe mbaʼépa oikóta Jerusalénpe oñehundi mboyve upe siuda. Pe visiónpe haʼe ohecha upépe ojejapoha heta mbaʼe ivaietereíva. Upéi ohecha ouha 6 kuimbaʼe, “ha káda uno oreko ipópe peteĩ árma oporohundi hag̃ua”. Avei oĩ hendivekuéra peteĩ kuimbaʼe “oñemondéva ao de línope”, ha orekóva “peteĩ tínta ryru” (Ezeq. 8:6-12; 9:2, 3, TNM). Ha oĩ heʼíva pe kuimbaʼe orekóvape pe tínta ryru: “Ehasa pe siudáre, Jerusalénrupi, ha emarka isyvápe umi kuimbaʼe ojepyʼapy ha ipyahẽvape umi mbaʼe vaiete ojejapóvare pe siudápe”. Upéi ojeʼe avei umi 6 kuimbaʼe orekóvape umi “árma oporohundi hag̃ua”, tojuka entéro umi ndorekóivape pe márka isyváre (Ezeq. 9:4-7, TNM). ¿Mbaʼépa ñaaprende ko visióngui, ha mávapa pe kuimbaʼe orekóva pe tínta ryru?

Ezequiel ohecha vaʼekue pe visión áño 612-pe a.C. Ñepyrũrã, upe visión oñekumpli 5 áño haguépe, Jehová opermitírõ guare umi ehérsito Babiloniagua ou ohundi Jerusalén. Péicha Jehová ojevale umi vavilóniore okastiga hag̃ua pe puévlo naiñeʼẽrendúivape (Jer. 25:9, 15-18). Péro, ¿mbaʼépa oiko umi hudío iñeʼẽrendúvagui ha orrechasáva umi mbaʼe vaiete ojejapóva pe siudápe? Jehová osalva chupekuéra.

Pe visiónpe, Ezequiel ndopartisipái kuri omarka hag̃ua umi héntepe, ni ohundi hag̃ua umi hembiapo vaívape. Umi ánhel la oñenkarga vaʼekue ohundi hag̃ua Jerusalén. Upéicharõ, ko profesía rupive jareko oportunida jaikuaa hag̃ua mbaʼépa oiko kuri yvágape. Upérõ Jehová la heʼi vaʼekue umi ánhelpe toñenkarga ohundi hag̃ua umi hembiapo vaívape, ha osalva hag̃ua umi iñeʼẽrendúvape. *

Ko profesía oñekumplíta avei amo gotyove. Anteve ningo jaʼe vaʼekue pe kuimbaʼe orekóva “peteĩ tínta ryru”, orrepresentaha umi unhído oikóvape gueteri ko yvy ape ári. Avei ñapensa vaʼekue umi persóna ohendu ha oaseptáva pe marandu porã orresiviha pe márka. Péro ramónte ojehechakuaa tekotevẽha oñekambia oñentende lája ko profesía. ¿Mbaʼérepa? Oiméne ñanemanduʼa Mateo 25:31-33 ohechaukaha mávapa la ohusgáva umi héntepe pe gran trivulasión aja. Pe téxto omyesakã Jesús haʼeha pe Hués oseparátava umi héntepe, ha umi haʼe okonsideráva ovecha, ojesalváta, péro umi okonsideráva kavara katu oñehundíta.

Upéicharõ, ¿mbaʼépa ikatu ñaaprende pe visión ohecha vaʼekuégui Ezequiel? Oĩ 5 mbaʼe iñimportánteva:

1. Jerusalén oñehundi mboyve, proféta Ezequiel, Jeremías ha Isaías oavisa vaʼekue umi héntepe mbaʼépa oikóta upe siudáre. Koʼág̃arupi, Jehová ojevale peteĩ grúpore oĩháme unos kuánto kristiáno unhído, omboʼe hag̃ua ipuévlope ha oavisa umi héntepe mbaʼépa tekotevẽ ojapo oñepyrũ mboyve pe jehasa asy guasu. Añetehápe ningo entéro Jehová siervokuéra, térã umi “ótro tembiguaikuéra”, ombaʼapo meme ko tembiapópe (Mat. 24:45-47).

2. Jahecha haguéicha, ndahaʼéi vaʼekue Ezequiel la omarkáva umi héntepe ojesalva hag̃ua. Péicha avei, ñande jaservíva koʼág̃a Jehovápe, japredikánte umi héntepe pe marandu porã ha ñamombeʼu  chupekuéra mbaʼépa oikóta amo gotyove. Umi ánhel ñanepytyvõ ikatu hag̃uáicha ojepredika opárupi ko yvy ape ári (Apoc. 14:6).

3. Ezequiel tiémpope, umi hénte ojesalva vaʼekue ndorekói kuri peteĩ márka rreál isyváre. Péicha avei ñane tiémpope, umi hénte ojesalvátava ndorekomoʼãi mbaʼeveichagua márka isyváre. ¿Mbaʼépa ojapo vaʼerã koʼág̃a umi persóna ojesalvaséva pe gran trivulasiónpe? Tekotevẽ ohendu pe marandu porã, osegi Jesús ehémplo, ojededika Jehovápe, ha oapoja umi unhídope opredikávo pe marandu porã (Mat. 25:35-40). Upéi, umi ojapóva koʼã mbaʼe, oñemarkáta térã ojeelehíta pe gran trivulasión aja ikatu hag̃uáicha ojesalva.

4. Pe kuimbaʼe orekóva pe tínta ryru orrepresenta Jesúspe. Haʼe omarkáta pe aty guasúpe pe gran trivulasión aja, odesidi vove haʼekuéra haʼeha ovecha. Upéi pe aty guasu orekótama oportunida oiko hag̃ua pára siémpre ko yvy ape ári (Mat. 25:34, 46). *

5. Pe visiónpe ningo umi seis kuimbaʼe oreko kuri ipópe peteĩ árma ikatu hag̃uáicha oporohundi. Péicha avei umi ánhel yvagapegua omoirũta Jesúspe, haʼéva hína Ilíder, ohundiete hag̃ua entéro goviérnope ha oipeʼaite hag̃ua opa mbaʼe vai (Ezeq. 9:2, 6, 7; Apoc. 19:11-21).

¿Mbaʼépa ñaaprende ko visióngui? Ñanepytyvõ ñaime hag̃ua segúro Jehová nohundimoʼãiha umi ivuénovape ohundi vove umi iñañávape (2 Ped. 2:9; 3:9). Avei ñanemomanduʼa iñimportantetereiha japredika ko tiémpope, pórke entéro umi hénte oikuaa vaʼerã mbaʼépa tekotevẽ ojapo og̃uahẽ mboyve pe fin (Mat. 24:14).