1. ¿Mbaʼépa ñanediferensia umi animálgui?

JEHOVÁ omeʼẽ yvyporakuérape peteĩ mbaʼe iporãitereíva. Upéva hína ñane konsiénsia. Péva haʼe peteĩ mbaʼe ñanediferensiáva umi animálgui. Adán ha Eva oreko vaʼekue konsiénsia. ¿Mbaʼéichapa jaikuaa upéva? Odesovedese rire Ñandejárape, haʼekuéra okañy chugui pórke ikonsiénsia ostorva chupekuéra.

2. ¿Mbaʼérepa ñane konsiénsia ojogua peteĩ vrúhulape? (Ehecha pe taʼanga oĩva iñepyrũme).

² Ñane konsiénsia ningo haʼe peteĩ mbaʼe oĩva ñande pyʼapýpe ha heʼíva ñandéve mbaʼépa iporã ha mbaʼépa ivai. Avei ñandegia umi mbaʼe jajapótavape. Peteĩ persóna nohekomboʼeporãiva ikonsiénsia ikatu ñakompara peteĩ várko oñembyaívare ivrúhula. * Pe yvytu atã ha pe mar pochy ogueraháta chupe oimeha gotyo. Péro pe vrúhula ombaʼapo porãramo, pe kapitán ikatúta ogia porã pe várko. Péicha  avei, ñahekomboʼe porãramo ñane konsiénsia, ñandegia porãta.

3. ¿Mbaʼépa ikatu oiko nañahekomboʼeporãirõ ñane konsiénsia?

³ Ñane konsiénsia noñehekomboʼeporãirõ, nañandeavisái jaha vai jave (1 Tim. 4:1, 2). Péro ndahaʼéi voi upévante, ikatu avei ñanembotavy ha ñapensa “oĩ porãha pe oĩ vaíva” (Is. 5:20). Jesús heʼi vaʼekue isegidorkuérape: “Og̃uahẽta voi pe ára opavave pendejukáva oimoʼãtaha upéicha oserviha Ñandejárape” (Juan 16:2). Upéicha opensa kuri umi ojuka vaʼekue Estébanpe (Hech. 6:8, 12; 7:54-60). Koʼã tiémpo ohasávape heta tapicha irrelihiósova ojapo umi mbaʼe ivaietereíva, por ehémplo oporojuka Ñandejára rérape. Péro la ojapóva hikuái añetehápe oĩ Ñandejára Léi kóntrape (Éx. 20:13). Jahechaháicha, ikonsiensiakuéra ndogiaporãi koʼãichagua persónape.

4. ¿Mbaʼéichapa ikatu jaikuaa ñahekomboʼe porãpa hína ñane konsiénsia?

⁴ ¿Mbaʼéichapa jaikuaáta oimépa ñane konsiénsia ombaʼapo porã hína? Umi Léi ha prinsípio oĩva la Bíbliape “ideprovécho ñaporomboʼe, ñañemoñeʼẽ, japorokorrehi, ha ñaporohekomboʼe hag̃ua hekoitépe” (2 Tim. 3:16). Upévare jastudia meme vaʼerã la Biblia, jajepyʼamongeta porã hese ha jajapo la upépe heʼíva. Péicha mbeguekatúpe ñapensáta jahávo Jehová opensaháicha, ha ñane konsiénsia ñandegia porãta. Jahechamína mbaʼéichapa Jehová Léi ha umi prinsípio bíblico ikatu ñanepytyvõ ñahekomboʼe hag̃ua ñane konsiénsia.

5, 6. ¿Mbaʼéichapa ñanepytyvõ Ñandejára Léi?

⁵ Jaipotáramo Ñandejára Léi ñanepytyvõ, ndahaʼéi jalee ha jaikuaánte vaʼerã umíva, síno tekotevẽ jahayhu ha jarrespeta umi Léi. La Biblia heʼi: “Ndapechaʼéi vaʼerã umi mbaʼe ivaívare ha pehayhu vaʼerã pe iporãva” (Amós 5:15). ¿Mbaʼéichapa ikatu jajapo upéva? Tekotevẽ jahecha opa mbaʼe Jehová ohechaháicha. Ñapensamína ko situasiónre. Ñamoĩ chupe rehoha doktórpe ha heʼi ndéve tekotevẽha ekaru porã, ejapo ehersísio ha ekambia heta mbaʼe rejepokuaáva rejapo. Nde resegi la ikonsého ha rehechakuaa reñeñandu porãveha. ¿Mbaʼépa repensáta pe doktór rehe ha umi konsého omeʼẽvare ndéve?

⁶ Péicha avei, ñande Apohare omeʼẽ ñandéve Léi ñandeprotehéva umi mbaʼe vai ikatúvagui ñanderupyty japeka haguére. Avei umi Léi ñanepytyvõ osẽ porãve hag̃ua ñandéve opa mbaʼe. Por ehémplo, la Biblia ñanemboʼe ndovaleiha ñandejapu, ñamonda, ñanderekovai, ñaneviolénto ni ñañentremete pe espiritísmore (elee Proverbios 6:16-19; Apoc. 21:8). Jahecha jave oho porãveha ñandéve ñaneñeʼẽrendu haguére Jehovápe, jahayhuve chupe ha ñamombaʼeve umi Léi omeʼẽva.

7. ¿Mbaʼéichapa ñanepytyvõ umi rreláto oĩva la Bíbliape?

⁷ Ndajajapóiramo Ñandejára Léi heʼíva katuete oho vaíta ñandéve. Péro natekotevẽi ningo jahasa asy raẽ ñaaprende hag̃ua mbaʼépa iporã ha mbaʼépa ivai. Ikatu ñaaprende umi mbaʼe vai ojapo vaʼekuégui Ñandejára siervokuéra yma guare. Umi rreláto ningo jatopa la Bíbliape. Proverbios 1:5 heʼi: “Pe persóna iñarandúva ohendu koʼã konsého ha oaprendeseve”. Umi konsého ningo ou Ñandejáragui, upévare ndaipóri ótro konsého iporãvéva umívagui. Por ehémplo, epensamína mbaʼeichaitépa osufri kuri David naiñeʼẽrendúi haguére Jehovápe oñeno rupi Bat-sébandi (2 Sam. 12:7-14). Jalee jave ko experiénsia, iporã ñañeporandu: “¿Mbaʼéichapa David ikatúta  kuri ojehekýi koʼã provlémagui? ¿Mbaʼépa che ajapóta ajecháramo koʼãichagua situasiónpe? ¿Ajerétapa cherekovai David ojapo haguéicha, térãpa adiparáta upe situasióngui José ojapo haguéicha?” (Gén. 39:11-15). Jajepyʼamongeta porã vaʼerã mbaʼe konsekuénsiapa ogueru pe pekádo, péicha ñaiméta desidído jajapo hag̃ua la Biblia heʼíva: “Ndapechaʼéi vaʼerã umi mbaʼe ivaívare”.

8, 9. a) ¿Maʼerãpa ideprovécho ñane konsiénsia? b) ¿Mbaʼéichapa umi prinsípio bíblico ohekomboʼe ñane konsiénsia?

⁸ Ñande ningo katuete ñamboyke umi mbaʼe ombojeguarúva Ñandejárape. Péro, ¿mbaʼépa jajapóta jajecháramo peteĩ situasión ndaiporihápe peteĩ Léi bíblica? ¿Mbaʼéichapa jaikuaáta mbaʼépa Ñandejára oipota jajapo? Oime rire jaheja la Biblia ohekomboʼe ñane konsiénsia, katuete jadesidi porãta.

⁹ Jehová ñanderayhu rupi omeʼẽ ñandéve heta prinsípio bíblico ogia hag̃ua ñane konsiénsia. Haʼe heʼi: “Che hína nde Jára Jehová. Umi mbaʼe che romboʼéva ningo nde deprovechorã, che rogia reho hag̃ua tape porãre” (Is. 48:17, 18). Jajepyʼamongeta jave umi prinsípio oĩvare la Bíbliape ha jaheja opoko ñane korasõre, ikatúta ñahekomboʼe ha jakorrehi ñane konsiénsia. Upéva ñanepytyvõta jadesidi porã hag̃ua.

10. ¿Mbaʼéichapa ñanepytyvõ umi prinsípio bíblico, ha mbaʼéichapa Jesús oipuru umi prinsípio omboʼérõ guare?

¹⁰ Umi prinsípio ningo ñanepytyvõ ñapensa ha jadesidi porã hag̃ua. Ñantendéramo umi prinsípio bíblico jaikuaáta mbaʼéichapa Jehová opensa ha mbaʼérepa omeʼẽ ñandéve umi Léi. Jesús oipuru vaʼekue umi prinsípio omboʼe hag̃ua idisipulokuérape katuete orekotaha konsekuénsia umi mbaʼe opensáva ha ojapóva. Por ehémplo, omboʼe kuri jasegíramo ñandepochy ikatuha jaju ñaneviolénto, ha jasegíramo jareko deséo vai ñaporomoakãratĩtaha (Mat. 5:21, 22, 27, 28). Jahejáramo umi prinsípio bíblico ñandegia, ñahekomboʼe porãvéta ñane konsiénsia ha umi mbaʼe jadesidíva ombotuicháta Jehovápe (1 Cor. 10:31).

11. ¿Mbaʼéichapa ikatu idiferénte ñane konsiénsia umi ótro konsiénsiagui?

¹¹ Kristianokuéra oñehaʼã ohekomboʼe ikonsiénsia la Biblia rupive, péro upéva ndeʼiséi opensaha peteĩchapa. Ñamoĩmína kómo ehémplo pe vevída jeʼu. La Biblia ndeʼíri ivaiha jaʼu vevída, péro heʼi ndovaleiha jaʼu rasa térã jakaʼu (Prov. 20:1; 1 Tim. 3:8). Jadesidíta jave jaʼu vevída, ¿heʼisépa upéva ndajaʼurasáinte vaʼerãha? Nahániri. Ñane konsiénsia opermitíramo jepe jaʼu vevída, ñañatende vaʼerã avei mbaʼépa opensa umi ótro.

12. ¿Mbaʼéichapa Romanos 14:21 ñanepytyvõ jarrespeta hag̃ua ñande rapichakuéra konsiénsia?

¹² Pablo ohechauka vaʼekue tekotevẽha jarrespeta ñande rapichakuéra konsiénsia oskrivírõ guare: “Iporãve ndajaʼúi soʼo ni víno, ni ndajajapói mbaʼeve omoñepysangátava ñane ermánope” (Rom. 14:21). Ndaivaíriramo jepe jaʼu vevída, ñaĩ vaʼerã dispuésto jajesakrifikávo ótro rehehápe ani hag̃ua ñambotropesa avavépe. Por ehémplo, ikatu oĩ ermáno omokõiterei vaʼekue oiko mboyve chugui Testígo ha upéi odesidi ndoʼuveimaha ni michĩmi. Ñande ndajajaposéi mbaʼeve omoakãrakútava upe ermánope hoʼa jey hag̃ua la ivisiokuépe (1 Cor. 6:9, 10). Oimérõ ñainvita pe ermánope ñande rógape, ¿jajopýtapa chupe hoʼu hag̃ua vevída heʼímarõ jepe ñandéve ndoʼuseiha? Ndovaléi ningo jajapo upéva.

13. ¿Mbaʼépa ojapo Timoteo ikatu hag̃uáicha umi ótro ohendu pe marandu porã?

 ¹³ Timoteo imitãrusúrõ guare oĩ vaʼekue dispuésto oñesirkunsidávo hasýtaramo jepe chupe upéva. Haʼe opredika vaʼerã umi judíope, ha oikuaa pe sirkunsisión iñimportanteha chupekuéra g̃uarã. Pablo ojapo haguéicha, Timoteo nomoñeñanduvaiséi avavépe (Hech. 16:3; 1 Cor. 9:19-23). ¿Ndépa reĩ avei dispuésto rejapóvo sakrifísio ótro rehehápe?

14, 15. a) ¿Mbaʼéichapa oikóta ñandehegui kristiáno ijerovia mbaretéva? b) ¿Mbaʼéichapa oporotrata umi kristiáno ijerovia mbaretéva?

¹⁴ Enterove jaservíva Ñandejárape “ndajapytái vaʼerã umi mbaʼe ñaaprende vaʼekuépe ñepyrũrã Crístogui, síno jasegi vaʼerã tenonde gotyo jakakuaapa peve” (Heb. 6:1). Oimérõ heta tiémpoma oiko hague ñandehegui Testígo, ndeʼiséi jajerovia mbaretetamaha. Tekotevẽ jasegi jaikuaave Ñandejárape ha ñaaprendeve chugui. Jalee vaʼerã la Biblia káda día (Sal. 1:1-3). Péicha ñantende porãvéta umi Léi ha prinsípio Jehová omeʼẽva.

¹⁵ ¿Mbaʼeichagua Léipa la iñimportantevéva kristianokuérape g̃uarã? Pe Léi oñeʼẽva mborayhúre. Jesús heʼi vaʼekue idisipulokuérape: “Péicha pejoayhúramo, enterove ohechakuaáta peẽ haʼeha che disípulo” (Juan 13:35). Pe mborayhúpe oñehenói “pe Léi ijojahaʼỹva”. Avei pe oporohayhúva “okumpli hína pe Léi” (Sant. 2:8; Rom. 13:10). Ñande jaikuaa porã pe mborayhu iñimportantetereiha, “Ñandejára haʼe rupi mborayhu” (1 Juan 4:8). Jehovápe g̃uarã pe mborayhu ndahaʼéi peteĩ sentimiénto reínte. Haʼe ohechauka oporohayhuha umi mbaʼe ojapóva rupive. Juan oskrivi vaʼekue: “Péicha ojehechauka Ñandejára mborayhu ñande kásope: Ñandejára ombou Itaʼýra peteĩete ko múndope, ikatu hag̃uáicha haʼe rupive jahupyty pe jeikove” (1 Juan 4:9). Jahechauka jave jahayhuha Jehovápe, Jesúspe, ñane ermanokuérape ha umi héntepe, jahechauka avei jajerovia mbareteha (Mat. 22:37-39).

16. ¿Mbaʼérepa ñamombaʼeve jahávo umi prinsípio bíblico amáske jajerovia mbareteve?

 ¹⁶ Amedída ke japrogresa jahávo oiko hag̃ua ñandehegui kristiáno ijerovia mbaretéva, ñamombaʼevéta avei umi prinsípio bíblico. Umi Léi ningo heʼi porã ñandéve mbaʼépa jajapo vaʼerã peteĩ situasiónpe, péro umi prinsípio bíblico ideprovécho hetaiterei situasiónpe g̃uarã. Por ehémplo, umi mitã nontendéi ipeligrosoha ñanejúnta vai, upévare ituakuéra omoĩmante vaʼerã rrégla oprotehe hag̃ua chupekuéra (1 Cor. 15:33). Amáske umi mitã iñakãguapyve ha ojerovia mbareteve ohóvo, ojepokuaa avei ojepyʼamongeta umi prinsípio bíblicore. Umíva ningo oipytyvõta chupekuéra oiporavo porã hag̃ua iñamigorã (elee 1 Corintios 13:11; 14:20). Jajepyʼamongetáramo umi prinsípio bíblicore, ñane konsiénsia ombaʼapo porãvéta. Avei hesakãvéta ñandéve mbaʼépa Ñandejára oipota jajapo káda situasiónpe.

17. ¿Mbaʼérepa ikatu jaʼe jarekopaiteha la ñaikotevẽva guive jadesidi porã hag̃ua?

¹⁷ Ñande ningo jareko opa mbaʼe ñaikotevẽva jadesidi hag̃ua Jehová oipotaháicha. La Bíbliape jatopa heta Léi ha prinsípio oipytyvõva kristianokuérape ikatu hag̃uáicha “ikatupyry opa mbaʼerã, ha orekopaite hag̃ua oikotevẽva guive ojapo hag̃ua iporãva” (2 Tim. 3:16, 17). Umi prinsípio bíblico ñanepytyvõ ñantende hag̃ua mbaʼéichapa Jehová opensa. Péro jajeporeka vaʼerã umívare (Efes. 5:17). ¿Mbaʼépa ikatu ñanepytyvõ? Upearã jareko Gía oipurúva testígo de Jehová otopa hag̃ua informasión, Watchtower Library, VIVLIOTÉKA OĨVA INTERNÉTPE Watchtower, ha pe aplikasión JW Library. Koʼã erramiénta ningo ideprovechoiterei jajapo hag̃ua ñande estúdio personál ha ñande estúdio de família.

18. ¿Mbaʼe vendisiónpa jahupytýta jasegíramo umi Léi ha prinsípio oĩva la Bíbliape?

¹⁸ Jasegíramo umi Léi ha prinsípio bíblico, oho porãvéta ñandéve. Salmo 119:97-100 heʼi: “Ahayhu ha amombaʼeterei nde Léi. Ajepyʼamongeta hese tódo el día. Nde Léi siémpre chegia tape porãre, upévare chearanduve che enemigokuéragui. Che ajepyʼamongeta umi mbaʼe erévare, upévare antende hetave mbaʼe entéro che mboʼeharakuéragui. Aiko lájare ojehecha aikuaaha hetave mbaʼe umi ijedávagui, che asegi rupi ne instruksión”. Ñande avei ñamboykéramo tiémpo jajepyʼamongeta hag̃ua Ñandejára Léi ha umi prinsípio bíblicore, ñanearandu ha ñaneentendidovéta. Ha jaipurúramo umíva ñahekomboʼe hag̃ua ñane konsiénsia katu, oikóta ñandehegui kristiáno “okakuaapámava ha ohupytýva Crístope entéro mbaʼépe” (Efes. 4:13).