1. ¿Mbaʼérepa ñahendu vaʼerã pe avíso Jesús omeʼẽ vaʼekue?

JESÚS oñeʼẽrõ guare umi ára paháre heʼi vaʼekue: “Peñatendéke ani hag̃ua arakaʼeve peñekevranta [...] pejepyʼapyetereígui pene remikotevẽre”, upéva heʼise jajepyʼapyetereiha mbaʼéichapa ñañemantenéta térã umi mbaʼe ñaikotevẽvare káda día (Luc. 21:34). ¿Mbaʼérepa ñahendu vaʼerã ko avíso? Pórke koʼág̃arupi jareko avei umi provléma entéro persóna orekóva.

2. ¿Mbaʼeichagua provlémapa ombohovái ñane ermanokuéra?

² Sapyʼánte ningo ojoʼapa ñandehegui la provléma. Jahechamína mokõi ehémplo. Peteĩ ermáno hérava Juan * oreko peteĩ mbaʼasy hérava esclerosis múltiple. Hembireko katu oheja chupe 19 áño omenda haguépe hikuái, ha upéicha rupi haʼe opyta vaʼekue yvýre, ha ndahaʼéi upévante, umi mokõi itajýra ou oheja Jehovápe. Ha peteĩ ermáno hérava Roberto ha hembireko Linda ombohovái ótra situasión ijetuʼúva. Mokõivéva ou opyta travahoʼỹre ha upéi operde hogakuéra pórke ndaikatuvéima opaga hese. Ha ivaiveha, peteĩ doktór heʼi Líndape orekoha peteĩ provléma ikorasõme ikatúva ojuka chupe ha orekoha avei artrítis ivaietereíva.

3. ¿Mbaʼépa oikuaauka ñandéve Jehovágui Filipenses 4:6, 7?

³ Jehová ningo ñande Apohare ha ñande Túa ñanderayhuetéva, upévare ikatu jaʼe haʼe katuete ontendeha mbaʼéichapa ñañeñandu ñañekevrantaiterei jave, ha ñanepytyvõse ñambohovái hag̃ua umi situasión ijetuʼúva (elee Filipenses 4:6, 7). La Bíbliape jatopa hetaiterei ehémplo ohechaukáva mbaʼeichagua provlémapa ombohovái vaʼekue Jehová siervokuéra. Avei omombeʼu ñandéve mbaʼéichapa Jehová oipytyvõ chupekuéra ombohovái hag̃ua umi  situasión oipyʼapyetéva chupekuéra. Jahechamína unos kuánto ehémplo.

4. ¿Mbaʼe mbaʼépa ombohovái vaʼekue Elías, ha mbaʼépa haʼe ohechakuaa Jehová ojapoha?

⁴ Elías oservi vaʼekue Jehovápe peteĩ tiémpo ijetuʼuetereívape ha tekotevẽ kuri ombohovái heta situasión ivaíva. Upe tiémpope, Israélpe ogoverna vaʼekue peteĩ rréi naiñeʼẽrendúiva Jehovápe hérava Acab. Hembireko hérava Jezabel katu iñañaiterei vaʼekue ha oadora Baálpe. Mokõivéva omokyreʼỹ vaʼekue umi héntepe Israel tuichakuére oadora hag̃ua avei Baálpe, ha ojuka hetaiterei Jehová profetakuérape. Elías katu ojesalva vaʼekue chugui, ha ojerovia rupi Jehováre nomanói oúrõ guare peteĩ ñembyahýi guasu (1 Rey. 17:2-4, 14-16). Elías ohechauka vaʼekue ojeroviaha Jehováre ombohováirõ guare umi oadorávape Baálpe ha umi iprofetakuérape. Elías ningo omokyreʼỹ vaʼekue umi israelítape oservi hag̃ua Jehovápe (1 Rey. 18:21-24, 36-38). Umi tiémpo ijetuʼuetéva ohasa vaʼekuépe, Elías ohechakuaa mbaʼéichapa Jehová oprotehe ha oipytyvõ chupe heta hendáicha.

5, 6. a) Heʼiháicha 1 Reyes 19:1-4, ¿mbaʼéichapa oñeñandu vaʼekue Elías? b) ¿Mbaʼéichapa Jehová ohechauka Elíaspe ohayhuha chupe?

⁵ (Elee 1 Reyes 19:1-4). Péro Elías okyhyjeterei vaʼekue rréina Jezabel oamenasárõ guare ojukataha chupe, ha upévare haʼe okañy ha osẽ oho Beer-Sébape. Upérõ haʼe oñedesanimaiterei kuri “ha ojerure omano hag̃ua”. ¿Mbaʼérepa oñeñandu kuri upéicha? Elías ningo iñimperfékto ha “haʼe vaʼekue peteĩ yvypóra ñandeichaguánte avei” (Sant. 5:17). Ikatu oime Elías oñekevrantaiterei raʼe ha ikaneʼõitereíma. Oiméne opensa raʼe  ndaideprovéchoi hague mbaʼeverã entéro mbaʼe ojapo vaʼekue oipytyvõ hag̃ua umi héntepe oadora jey hag̃ua Jehovápe, ha mbaʼevete nokambiái hague Israélpe. Avei oimoʼãne raʼe haʼe añoiténtema oserviha Jehovápe (1 Rey. 18:3, 4, 13; 19:10, 14). Ikatu ningo ñanesorprende hína mbaʼéichapa oñeñandu vaʼekue ko proféta ifiélva. Péro Jehová ontende porãiterei vaʼekue chupe.

⁶ Elías omombeʼúrõ guare mbaʼéichapa oñeñandu, Jehová ndojaʼói chupe. Upéva rangue, oipytyvõ chupe imbarete jey hag̃ua (1 Rey. 19:5-7). Upéi mborayhúpe okorrehi Elías opensa lája ohechaukávo chupe mbaʼeichaitépa haʼe ipoderóso. Avei omombeʼu chupe oĩha gueteri Israélpe 7.000 persóna ndoadoráiva Baálpe (1 Rey. 19:11-18). Jehová ojapo opa koʼã mbaʼe ohechauka hag̃ua Elíaspe mbaʼeichaitépa ohayhu chupe.

7. ¿Mbaʼérepa ñanemokyreʼỹ jahechávo mbaʼéichapa Jehová oipytyvõ vaʼekue Elíaspe?

⁷ ¿Ndépa rehasa hína peteĩ situasión nekevrantaitereíva? Oiméramo upéicha, katuete nemokyreʼỹetereíta reikuaávo Jehová ontende hague mbaʼéichapa Elías oñeñandu. Upéva ningo ohechauka porã haʼe katuete ontendeha avei umi mbaʼe ñandéve ñandepyʼapýva. Jehová oikuaa mbaʼépa ikatu térã ndaikatúi jajapo, ha oikuaa avei umi mbaʼe ñapensáva ha ñañandúva (Sal. 103:14; 139:3, 4). Ñande ñakonfiárõ Jehováre ojapo haguéicha Elías, haʼe katuete ñanepytyvõta ñambohovái hag̃ua oimeraẽ situasión ikatúva ñandepyʼapy (Sal. 55:22).

8. ¿Mbaʼéichapa Jehová nepytyvõta ani hag̃ua reñekevrantaiterei?

⁸ Oiméramo peteĩ situasión nekevrantaiterei, upéva ikatu nedesanima ha repensa voi arakaʼeve nokambiamoʼãiha ne situasión. Upéva oikóramo nderehe, nemanduʼákena Jehová katuete nepytyvõtaha ani hag̃ua reñekevrantaiterei. ¿Mbaʼéichapa ojapóta upéva? Jehová oipota emombeʼu chupe umi mbaʼe reñandúva ha ndepyʼapýva, ha haʼe ombohováita ndéve ne ñemboʼe (Sal. 5:3; 1 Ped. 5:7). Upévare eñemboʼe meme vaʼerã Jehovápe ha emombeʼu chupe umi provléma erekóva. Haʼe noñeʼẽmoʼãi nendive ojapo haguéicha Elías ndive, péro oñeʼẽta ndéve la Biblia ha iñorganisasión rupive. La Bíbliape retopáta heta párte nekonsolátava ha omeʼẽtava ndéve esperánsa. Avei kongregasiónpe umi ermáno ha ermána ikatu tuicha nemokyreʼỹ (Rom. 15:4; Heb. 10:24, 25).

9. ¿Mbaʼéichapa ikatu ñanepytyvõ peteĩ amígo de konfiánsa?

⁹ Jehová heʼi vaʼekue Elíaspe omeʼẽ hag̃ua Eliséope algúna rresponsavilida haʼe orekóva. Upéicha Jehová omeʼẽ Elíaspe peteĩ iñamigorã ikatútava oipytyvõ chupe haʼe oñedesanima jave. Upéicha avei, ñande ñamombeʼúramo peteĩ ñane amígo de konfiánsape mbaʼéichapa ñañeñandu, haʼe ikatu ñanepytyvõ ñañekevranta térã ñañedesanima jave (2 Rey. 2:2; Prov. 17:17). ¿Péro mbaʼépa ikatu jajapo ndajaguerekóiramo peteĩ amígo ñamombeʼu hag̃ua umi mbaʼe ñañandúva? Ñañemboʼe vaʼerã Jehovápe ha jajerure chupe tañanepytyvõ jatopa hag̃ua peteĩ ermáno térã ermána ijerovia mbaretéva, ikatútava ñanemokyreʼỹ ha ñanemombarete.

10. a) ¿Mbaʼe esperánsapa omeʼẽ ñandéve Elías rembiasakue? b) ¿Mbaʼéichapa ikatu ñanepytyvõ pe promésa jatopáva Isaías 40:28, 29-pe?

¹⁰ Jehová oipytyvõ vaʼekue Elíaspe ani hag̃ua oñekevrantaiterei ha osegi hag̃ua oservi chupe ipyʼaite guive heta áñore. Elías rembiasakue omeʼẽ ñandéve esperánsa. Ñande ningo sapyʼánte jajepyʼapyeterei ha upévare jaju ñanekaneʼõ ha ñañedesanima. Péro jajeroviáramo Jehováre, haʼe ñanemombaretéta ikatu hag̃uáicha jasegi jaservi chupe (elee Isaías 40:28, 29).

11-13. ¿Mbaʼéichapa ombohasa asy vaʼekue mbohapy Jehová siervokuérape umi mbaʼe okevrantáva chupekuéra?

¹¹ La Biblia omombeʼu oĩ hague heta Jehová siérvo oñeñandu vai ha oñekevranta vaʼekue. Por  ehémplo, Ana oñeñandu vaieterei vaʼekue ndaikatúi haguére imemby ha oñembohory vai haguére hese Peniná, haʼéva avei Elcaná rembireko (1 Sam. 1:2, 6). Ana oñeñandu vaieterei rupi ou vaʼekue oñamargaite, ha upévare hasẽ ha ni ndokarusevéi (1 Sam. 1:7, 10).

¹² Rréi David avei sapyʼánte oñeñandu vaieterei vaʼekue. Epensamíntena umi mbaʼe ijetuʼúva haʼe ohasa vaʼekuére. Por ehémplo, haʼe pyʼỹinte oñeñandu vaʼekue kulpávle umi mbaʼe vai ojapo vaʼekuére (Sal. 40:12). Itaʼýra ohayhuetéva Absalón opuʼã vaʼekue hese, ha upevakuére ojejuka Absalónpe (2 Sam. 15:13, 14; 18:33). Avei peteĩ iñamigoite ou otraisiona vai chupe (2 Sam. 16:23–17:2; Sal. 55:12-14). Heta umi salmo David oskrivi vaʼekue ohechauka mbaʼeichaitépa haʼe oñedesanima, péro ohechauka avei haʼe ojeroviaiterei hague Jehováre (Sal. 38:5-10; 94:17-19).

¹³ Tiémpo rire, peteĩ salmísta oñepyrũ oenvidia mbaʼéichapa oiko umi iñañáva. Ko salmísta amalisia haʼe vaʼekue pe levita Asaf familiare ha oservi vaʼekue “Ñandejára rógape, pe lugár sagrádope”. Ko salmísta oñeñandu vaietereígui, ou vaʼekue oñedesanimaiterei ha ndovyʼavéi. Haʼe oñepyrũ jepe opensa ndovaleiha mbaʼeverã umi vendisión jarresivíva jaservi haguére Jehovápe (Sal. 73:2-5, 7, 12-14, 16, 17, 21).

14, 15. ¿Mbaʼépa ñanemboʼe koʼã mbohapy Jehová siérvo?

¹⁴ Koʼã mbohapy Jehová siérvo ojerovia vaʼekue Jehová oipytyvõtaha chupekuéra. Haʼekuéra oñemboʼe Jehovápe ikorasõite guive ha omombeʼupaite umi mbaʼe oipyʼapýva chupekuéra. Haʼekuéra ningo ndokyhyjéi vaʼekue omombeʼu hag̃ua Jehovápe mbaʼérepa oñeñandu vaiete hikuái. Avei haʼekuéra osegi oho pe lugár ojeadorahápe Jehovápe (1 Sam. 1:9, 10; Sal. 55:22; 73:17; 122:1).

¹⁵ Jehová ningo mborayhúpe ombohovái vaʼekue chupekuéra iñemboʼe. Por ehémplo, Ana oñemboʼe rire opyta vaʼekue trankíla (1 Sam.  1:18). David katu oskrivi: “Heta ningo osufri pe ivuénova, péro entéro umi situasión vaígui Jehová oguenohẽ chupe” (Sal. 34:19). Ha pe salmísta upéi oñandu Jehová oñakaramaha hese ‘ipo deréchagui’, ha mborayhúpe ogiaha chupe umi ikonsého rupive. Haʼe opurahéi vaʼekue: “Che katu añemoag̃ui Ñandejárare, ha ndaipóri mbaʼeve iporãvéva upévagui. Che añemoag̃ui Jehováre cheprotehe hag̃ua, haʼe hína Ñandejára ogovernáva opa mbaʼe” (Sal. 73:23, 24, 28). ¿Mbaʼépa ñanemboʼe iñehemplokuéra? Sapyʼánte ñande avei ikatu jahasa umi situasión ijetuʼúva, ha upévare ñañekevrantaiterei. Péro ikatu hína jagueropuʼaka umichagua situasión jajepyʼamongetáramo mbaʼéichapa Jehová oipytyvõ vaʼekue isiervokuérape, ñañemboʼévo chupe jajeroviágui hese ha ñaneñeʼẽrendúvo chupe (Sal. 143:1, 4-8).

16, 17. a) ¿Mbaʼérepa ndovaléi ñañemohaʼeño ni ñañemomombyry Jehovágui ni umi ermanokuéragui? b) ¿Mbaʼéichapa ikatu ñanembarete ha ñanekyreʼỹ jey?

¹⁶ Umi mbohapy ehémplo ñanemboʼe peteĩ mbaʼe iñimportánteva: Ndovaléi ñañemohaʼeño ni ñañemomombyry Jehovágui ni umi ermanokuéragui (Prov. 18:1). Nancy oñeñandu vaieterei vaʼekue iména ohejárõ guare chupe. Haʼe omombeʼu: “Heta vése chekoʼẽ ndahechaséi avavépe ni nañeʼẽséi avavéndi. Péro amáske añemohaʼeño koʼýte añeñandu vaive”. Upémarõ, Nancy oñehaʼã  oipytyvõ umi ombohováivape avei peteĩ situasión ijetuʼúva, ha upépe oñepyrũma oñeñandu porãve. Haʼe heʼi: “Omombeʼu jave chéve che rapichakuéra iprovléma añehaʼã añemoĩ ilugarpekuéra, upéicha rupi menove añekonsentra chejehe ni umi provléma arekóvare”.

¹⁷ Ñande ningo ikatu ñanembarete ha ñanekyreʼỹ jey jaháramo rreunionhápe. Ñaime jave upépe, ñameʼẽ hína Jehovápe hetave oportunida oiko hag̃ua chugui pe ‘ñanepytyvõva ha ñanekonsoláva’ (Sal. 86:17). Upépe haʼe ñanemombarete ijespíritu sánto rupive, Iñeʼẽ ha umi ermanokuéra rupive. Umi rreunión omeʼẽ avei ñandéve oportunida “káda uno ñañomokyreʼỹ” hag̃ua (Rom. 1:11, 12). Peteĩ ermána hérava Sofía omombeʼu: “Jehová ha umi ermanokuéra chepytyvõ asegi hag̃ua aaguanta. Umi rreunión ningo iñimportanteterei kuri chéve g̃uarã. Ahechakuaa arekóramo hetave mbaʼe ajapo vaʼerã predikasiónpe ha kongregasiónpe, upéva chepytyvõha ani hag̃ua añekevrantaiterei umi mbaʼe ahasávare”.

18. ¿Mbaʼéichapa Jehová ñanepytyvõta ñañedesanima jave?

¹⁸ Ñañeñandu vai ha ñañedesanima jave, ñanemanduʼa vaʼerã Jehová oprometeha oipeʼataha pára siémpre umi mbaʼe ñandepyʼapýva. Péro opromete avei koʼág̃ama voi ñanemombaretetaha ñambohovái hag̃ua umi mbaʼe ñanekevrantáva. Haʼe ningo katuete ñanepytyvõta jareko hag̃ua pe deséo ha pe fuérsa ikatu hag̃uáicha ñandepuʼaka ñane provlemakuérare (Filip. 2:13).

19. ¿Mbaʼépa Romanos 8:37-39 ogarantisa ñandéve?

¹⁹ (Elee Romanos 8:37-39). Apóstol Pablo ogarantisa ndaiporimoʼãiha mbaʼeve ikatu vaʼerã “ñandepeʼa Ñandejára mborayhúgui”. ¿Mbaʼéichapa ikatu ñaipytyvõ umi ermáno ha ermána oñehaʼãvape hína ogueropuʼaka umi mbaʼe okevranta asýva chupekuéra? Pe ótro artíkulope jahecháta mbaʼéichapa ikatu jasegi Jehová ehémplo jaiporiahuvereko ha ñaipytyvõvo ñane ermanokuérape ojepyʼapyeterei jave.