ENTEROVE ñande jaguerovia Jehová odirihiha hína ipuévlope ha omeʼẽha chupekuéra entéro mbaʼe oikotevẽva osegi hag̃ua oĩ porã hendive koʼã “ára pahápe” (2 Tim. 3:1). Péro káda uno jaikuaa ñaneñeʼẽrendu vaʼerãha Jehovápe. Ikatu ñambojoja ñane situasión pe ohasa vaʼekuére umi israelita oĩrõ guare pe desiértope. Haʼekuéra iñeʼẽrendu vaʼerã kuri ohendu jave umi trompéta pu.

Jehová heʼi vaʼekue Moiséspe ojapo hag̃ua mokõi trompéta de pláta oñemoldea pyréva martíllope oavisa hag̃ua “pe puévlope oñembyatýta jave, ha avei ikatu hag̃uáicha ojeprepara hikuái okontinua hag̃ua iviáhe” (Núm. 10:2). Umi saserdóte ombopu vaʼerã kuri umi trompéta de diferénte fórma pe puévlo oikuaa hag̃ua mbaʼépa ojapo vaʼerã (Núm. 10:3-8). Koʼág̃arupi, de diferénte fórma avei ojeʼe Ñandejára puévlope mbaʼépa ojapo vaʼerã. Ko artíkulope jahecháta mbohapy fórma jarresiviha umi instruksión, ha ñakomparáta umíva umi trompéta pu ymave oĩ vaʼekuére Israélpe. Koʼág̃arupi Ñandejára puévlope oñeinvita oreko hag̃ua umi rreunión guasu, umi ansianokuérape oñemeʼẽ entrenamiénto, ha oñembopyahu mbaʼéichapa ojedirihi umi kongregasión.

Jehová oipota jave “pe puévlo kompletoite oñembyaty” pe tavernákulo entrádape éste gotyo, umi saserdóte ombopu vaʼerã umi mokõi trompéta (Núm. 10:3). Entéro umi trívu, oakampáva hína pe tavernákulo jerére en 4 grúpo, ohendu vaʼekue pe trompéta pu idiferénteva. Umi trívu oĩva ag̃ui pe tavernákulo entrádagui ikatu vaʼekue og̃uahẽ pyaʼe upépe, péro umi oĩva mombyryve oiméne oñehaʼãve rakaʼe ha oikotevẽve tiémpo og̃uahẽ hag̃ua. Tahaʼe haʼeháicha, Jehová oipota vaʼekue enterove oñembyaty ha ohendu umi instruksión haʼe omeʼẽtava.

Koʼág̃arupi ñande nañañembyatyvéima peteĩ tavernákulope, péro si ñañeinvita jaha hag̃ua umi asambleahápe ojapóva Ñandejára puévlo. Umívape oike umi aty guasu 3 diagua ha umi ótro rreunión espesiál oñemeʼẽhápe heta informasión ha instruksión iñimportánteva. Ko múndo tuichakuére, Ñandejára puévlo orresivi la mísma informasión. Upéicha rupi umi oaseptáva ko invitasión ha oho koʼã atýpe oĩ peteĩ grúpo tuicháva ha ovyʼávape. Oĩ umi oviaha vaʼerã mombyryve ótrogui. Upéicharõ jepe, umi ohóva koʼã atýpe ohechakuaa noñehaʼãreíri hague.

¿Mbaʼéichapa ikatu oñevenefisia umi grúpo oĩva mombyryeterei umi lugár ojejapohágui koʼã aty? Pe teknolohía rupive, heta oĩ ijapyteguikuéra orresivíva avei la mísma informasión ha oñeñandúva oĩramoguáicha pe rreunión guasuetépe. Por ehémplo, pe rrepresentánte de la sentrál mundiál ovisitárõ guare Benín, pe sukursál otransmiti pe rreunión peteĩ puevloʼi héravape Arlit oĩva Nígerpe. Ko puévlo minéro ningo opyta pe desiérto del Sahárape. Upépe oñembyaty vaʼekue en totál 21 persóna, umíva apytépe ermáno, ermána ha umi oñeinvita vaʼekue. Ha oĩramo jepe hikuái mombyryeterei pe rreunión guasúgui, haʼekuéra oñeñandu oĩramoguáicha umi 44.131 oñembyaty vaʼekue apytépe. Peteĩ ermáno oskrivi: “Roagradese joʼa joʼa ningo peẽme petransmiti haguére  oréve ko rreunión. Upéva ohechauka porã oréve mbaʼeichaitépa peẽ orerayhu”.

Pe saserdóte israelita ombopúramo peteĩ trompétante, “upéicharõ umi kuimbaʼe omoakãva umi israelítape añónte” oñembyaty vaʼerã pe tavernákulo renondépe. “Koʼã kuimbaʼe hína umi omoakãva mílespe” (Núm. 10:4). Upépe Moisés omeʼẽta kuri chupekuéra informasión ha entrenamiénto, upéva oipytyvõta chupekuéra okumpli porã hag̃ua umi rresponsavilida orekóva hikuái itrívupe. Nde reimérire koʼã kuimbaʼe apytépe, ¿nderejapoichénepa raʼe opa ikatúva reime hag̃ua avei upépe ha reñevenefisia umívagui?

Koʼág̃arupi, umi ansianokuéra oĩva kongregasiónpe ndahaʼéi hína umi kuimbaʼe oporomoakãva, ha ndoikói avei omanda guasu Ñandejára ovechakuéra oñangarekóvare hína hikuái (1 Ped. 5:1-3). Péro añetehápe ojapo hikuái opa ikatúva oñatende porã hag̃ua ermanokuérare. Upévare haʼekuéra pyaʼe voi oasepta oñeinvita jave oñemeʼẽve hag̃ua chupekuéra entrenamiénto. Por ehémplo, oho hag̃ua pe Eskuéla del Ministério del Rréinope. Koʼãichahápe umi ansiáno oaprende mbaʼéichapa ikatu ojapo porãve hembiapokuéra kongregasionpegua. Koʼã entrenamiénto rupive, umi ansiáno ha avei entéro umi oĩva kongregasiónpe ikatu oñemoag̃uive Jehováre. Oiméramo jepe nde nderehói koʼãichagua eskuélape, katuete reñevenefisia avei pórke umi ohóva upéi oipuru umi mbaʼe oaprende vaʼekue oipytyvõ hag̃ua kongregasiónpe.

Sapyʼánte avei umi saserdóte ombopu umi trompéta hatã ha upéi mbegue, ha upéva oanunsia Jehová oipotaha ova pe kampaménto kompletoite (Núm. 10:5, 6). Umi israelita kampaménto ova jave, ojekuaa porã mbaʼeichaitépa oñeorganisa porã hikuái, péro upearã heta ombaʼapo vaʼerã hikuái. Ha sapyʼánte oĩne raʼe umi israelita ndovaséiva ótro hendápe. ¿Mbaʼérepa?

Ikatu oime algúnope g̃uarã pyʼỹietereíma ojeva ha derrepentete. La Biblia heʼi: “Opytáramo pe arai pe tavernákulo ári, upe aja entéro umi israelita opyta ikampaméntope ha ndohói upégui”. Péro avése “pe arai opyta sapyʼamínte, kaʼaruete guive pyhareve pevénte”, ha sapyʼánte katu opyta upépe “2 día, un mes térã hetave tiémpo” (Núm. 9:21, 22). ¿Ha mboy vése piko oguerova rakaʼe hikuái ikampaménto? Números kapítulo 33 omombeʼu amo 40 lugár rupi umi israelita oho hague omoĩ ikampaménto.

Sapyʼánte umi israelita omoĩ ikampaménto peteĩ lugár isómbra porãháme. Ha katuete igustoitereíne raʼe chupekuéra opyta umichagua lugárpe oĩ rupi hikuái peteĩ ‘desiérto tuicha ha oporomongyhyjévape’ (Deut. 1:19). Upéicha rupi, ikatu oĩ umi opensáva ováramo hikuái ohotaha peteĩ lugár ivaivehápe.

Pe kampaménto oñepyrũ jave ova, oĩ umi trívu tekotevẽva ipasiénsia ha ohaʼarõ itúrno ova hag̃ua. Enterove ningo ohendu pe trompéta ipu hatãvo ha upéi mbeguévo, péro ndaikatúi vaʼekue osẽ hikuái ojojapa. Upéicha oñembopu jave pe trompéta, osẽ vaʼerã oho umi trívu orekóva ikampaménto éste gotyo. Umíva hína Judá, Isacar ha Zabulón (Núm. 2:3-7; 10:5, 6). Ha osẽ rire hikuái, umi saserdóte ombopu jey vaʼerã hatã ha upéi mbegue pe trompéta, ha upéva ohechauka osẽma vaʼerãha umi mbohapy trívu orekóva ikampaménto sur gotyo. Umi saserdóte osegi vaʼerã ojapo upéva osẽmba peve pe kampaménto kompletoite.

Ñane tiémpope sapyʼánte ikatu avei ijetuʼu ñandéve jaasepta hag̃ua algún kámbio ojejapóva Jehová organisasiónpe, térã ikatu ñapensa hetaiterei mbaʼéma oñekambia hague. Ikatu oime ñandegusta raʼe yma ojejapo lája heta mbaʼe, ha ndajaipotái kuri oñekambia umíva. Ikatu oime nañanepasiénsiai raʼe jajepokuaa hag̃ua pe kámbio pyahúre, ha ñaikotevẽ tiémpo upearã. Upéicharõ jepe, ñañehaʼãramo jaasepta umi kámbio jahechakuaáta upéva iporã hague ñandéve g̃uarã, ha Jehová ñandeguerohoryha.

Moisés tiémpope, Jehová odirihi vaʼekue hetaiterei kuimbaʼe, kuña ha mitãme pe desiértore. Haʼe noñangarekói ha ndogiáirire chupekuéra, omanomba vaʼerãmoʼã upérupi. Koʼág̃arupi Jehová avei ñandegia koʼã ára paha ipeligrosoitévape, haʼe ñanepytyvõ ñañemoag̃ui hag̃ua hese ha jasegi hag̃ua jajerovia mbarete. Upévare enterove jajapose ikatúva guive ñaneñeʼẽrendu hag̃ua umi israelita ifiélva ojapo haguéicha ohendúvo umi trompéta pu.