1. ¿Mbaʼérepa ikatu jaʼe Jehová ñanderayhuha káda únope?

JEHOVÁ ningo ñandegueru vaʼekue káda únope ha ñanemoag̃ui ijehe (Juan 6:44). Epensamína mbaʼépa upéva heʼise. Jehová ojesareko porã hína kuri umi millones de persóna oĩvare ko múndo tuichakuére, ha ohecha nde erekoha peteĩ mbaʼe ivaliosoitereíva chupe g̃uarã: Haʼe ohechakuaa nesinseroha ha ikatuha rehayhu chupe (1 Crón. 28:9). Jehová ningo ndekuaa, nentende ha nderayhueterei. ¡Ajépa ñanemokyreʼỹete jaikuaávo upéva!

2. ¿Mbaʼe ehémplopa Jesús omoĩ vaʼekue ohechauka hag̃ua Jehová ñanderayhuha káda únope?

² Jehová ningo nderayhueterei ha ohayhueterei avei enterove ñane ermanokuérape. Jahechakuaa hag̃ua upéva, Jesús okompara vaʼekue Jehovápe peteĩ pastór oñangarekóvare ijovechakuérare. Oiméramo ko pastór oreko 100 ovecha ha okañy chugui peteĩ, ¿mbaʼépa ojapóta? Haʼe oheja “umi 99 pe montáñape ha oñepyrũ oheka upe okañy vaʼekuépe”. Ha ág̃a otopa vove hese, ndaipochymoʼãi okañy haguére chugui. Upéva rangue haʼe ovyʼaitereíta. ¿Mbaʼépa ñanemboʼe ko ehémplo? Jehová hakateʼỹha káda uno umi ijovecha mimíre. Jesús heʼi vaʼekue: “Che Ru oĩva yvágape ndoipotái oñehundi ni peteĩ koʼã che disípulo iñumíldeva mitãicha” (Mat. 18:12-14).

3. ¿Mbaʼépa jahecháta ko artíkulope?

³ Ñande ningo katuete ndajajaposéi ni ndajaʼeséi mbaʼeve odesanimátava ñane ermanokuérape. ¿Mbaʼépa ikatu jajapo ani hag̃ua ñamoñepysanga ótrope? ¿Ha mbaʼépa ikatu jajapo oiméramo ótro ñanembopochy térã ñanemoñeñandu vai raʼe? Koʼã porandu oñembohováita ko artíkulope. Péro ñepyrũrã jahecha raẽta mávapa hína umi “disípulo iñumíldeva mitãicha” oñeñeʼẽha Mateo kapítulo 18-pe.

4. ¿Mávapa hína umi “disípulo iñumíldeva mitãicha”?

⁴ Koʼã “disípulo iñumíldeva mitãicha” haʼe hína enterove Jesús disipulokuéra, tahaʼe imitãva térã ijedáva. Haʼekuéra ‘ojogua mitãme’ pórke oheja Jesús ohekomboʼe chupekuéra (Mat. 18:3). Ijapytepekuéra oĩ umi persóna diferénte paisgua ha orekóva diferénte kultúra, ha káda uno oreko la ilája ha la ikarákter. Upéicharõ jepe enterove ojerovia Crístore, ha haʼe ohayhueterei chupekuéra (Mat. 18:6; Juan 1:12).

5. ¿Mbaʼéichapa Jehová oñeñandu peteĩ persóna omoñepysanga térã omoñeñandu vai jave peteĩ isiérvope?

⁵ Jehovápe g̃uarã ningo ivaliosoiterei enterove koʼã “disípulo iñumíldeva mitãicha”. Ñantende hag̃ua mbaʼépa Jehová oñandu hesekuéra, ñapensami mbaʼéichapa ñande jahecha umi mitãme. Ñande ñamombaʼeterei ha japrotehese chupekuéra, naiñarandúi ha ndoikuaái rupi heta mbaʼe umi kakuaáicha. Ñande ningo ndajahechaséi peteĩ persóna olastima jave ótrope, péro koʼýte ñandepochy térã ñarrenega voi peteĩ persóna olastimáramo peteĩ mitã inoséntepe. Jehová ningo upeichaite avei ñandeprotehese, haʼe ipochy térã orrenega voi oĩramo peteĩ omoñepysangáva térã omoñeñandu vaíva peteĩ isiérvope (Is. 63:9; Mar. 9:42).

6. Heʼiháicha 1 Corintios 1:26-29, ¿mbaʼéichapa ohecha Jesús disipulokuérape umi hénte ko mundopegua?

⁶ ¿Mbaʼérepa avei ikatu jaʼe Jesús disipulokuéra ojoguaha umi ‘mitãme’? Ñapensamína: ¿Mbaʼeichagua persónapa iñimportánte ko múndope g̃uarã? Umi irríkova, ifamósova ha umi omanda guasúva. Péro la majoría umi Jesús disipulokuéra ndahaʼéi upeichagua persóna. Upévare umi hénte ko mundopegua opensa hesekuéra naiñimportanteiha, ha ndahaʼeiha mbaʼevete (elee 1 Corintios 1:26-29). Péro Jehová ndohechái chupekuéra upéicha.

7. ¿Mbaʼéichapa Jehová oipota jahecha ñane ermáno ha ermanakuérape?

⁷ Jehová ningo ohayhu enterove isiervokuérape, tahaʼe jepe raʼe umi oservímava chupe heta áñore térã ramoite guivénte. Enterove ñane ermáno ha ermanakuéra iñimportánte Jehovápe g̃uarã, upéicharõ ñandéve g̃uarã iñimportánte vaʼerã avei hikuái. Ñande jahayhuse “enterove ermanokuéra oĩvape ko múndope”, ndahaʼéi unos kuántopente (1 Ped. 2:17). Ñande ñaime vaʼerã jajapo hag̃uáicha ikatúva guive japrotehe hag̃ua chupekuéra ha ñañangareko hag̃ua hesekuéra. Ñande jaikuaáramo ñamoñeñandu vai térã ñaofende hague peteĩ ermánope, ndovaléi ñapensa upéva vyroreiha, haʼe ipirepererĩetereiha ha oaprende vaʼerãha ombohasa reínte la ojejapóva hese. ¿Mbaʼéicha rupípa peteĩ ermáno ipochy jepi? Ikatu oime imitãme heta ohasa asy raʼe, ha upéicha rupi ndojeroviaguasúi ijehe térã opensa ndovaleiha mbaʼeverã. Ótro katu oñepyrũ ramónte oservi Jehovápe, ha ndoikuaái gueteri mbaʼépa ojapóta oĩ jave ofalláva hendive. Tahaʼe haʼéva la oiko vaʼekue, ñande ñañehaʼãmbaite vaʼerã jajogueraha porã jey ñane ermanokuérandi. Avei oiméramo peteĩ persóna ipirepererĩ ha ipochypa rei, upéicharõ pe persóna orrekonose vaʼerã upéva haʼeha peteĩ defékto ha okambia vaʼerãha. Haʼe ojapo vaʼerã upéva ovyʼa hag̃ua ha ojogueraha porã hag̃ua ermanokuérandi.

8. ¿Mbaʼe pensamiéntopa oafektáma raʼe Jesús disipulokuérape?

⁸ ¿Mbaʼérepa Jesús oñeʼẽ vaʼekue koʼã ‘disípulo iñumíldevare mitãicha’? Pórke idisipulokuéra oporandu kuri chupe: “¿Mávapa hína pe iñimportantevéva pe Rréino yvagapeguápe?” (Mat. 18:1). Upe tiémpope, heta judío oipota vaʼekue umi hénte opensa haʼekuéra iñimportantetereiha. Peteĩ expérto heʼi: “Chupekuéra g̃uarã la iñimportanteve vaʼekue ifamóso ha umi hénte oguerohory, orrespeta ha ombotuicha chupekuéra”.

9. ¿Mbaʼépa ojapo vaʼerã kuri Jesús disipulokuéra?

⁹ Jesús oikuaa vaʼekue heta judío opensaha iñimportanteveha ótrogui, ha idisipulokuéra  oñehaʼãmbaite vaʼerãha ohapoʼo upéva ikorasõguikuéra ha okambia opensa lája. Haʼe heʼi chupekuéra: “Pe opensáva iñimportanteveha pende apytépe, oiko vaʼerã pe imitãvévaramo, ha pe oporogiáva, oiko vaʼerã peteĩ sirviénteramo” (Luc. 22:26). Ikatu hag̃uáicha jaiko “pe imitãvévaramo” tekotevẽ ‘ñapensa umi ótro tuichaveha ñandehegui’ (Filip. 2:3). Amáske ñañehaʼãve ñapensa upéicha, hasyvéta hína ñamoñepysanga hag̃ua ótrope.

10. ¿Mbaʼe konsého Pablo omeʼẽ vaʼekuépa jasegi vaʼerã?

¹⁰ Enterove ermáno ha ermanakuéra ningo ivaleve térã tuichave ñandehegui peteĩva térã hetave mbaʼépe. Ndahasýi hína ñapensa hag̃ua upéicha jajesarekóramo umi kualida porã orekóvare hikuái. Iñimportánte jasegi pe konsého omeʼẽ vaʼekue apóstol Pablo umi kristiáno Corintoguápe: “¿Mbaʼe piko nde ereko mbaʼe ajeve repensa neimportanteveha ótrogui? ¿Ndahaʼéi piko Ñandejára la omeʼẽva ndéve entéro mbaʼe erekóva? Upéicharõ, ¿mbaʼére piko rejekreeterei rekonsegirõguáicha ndejehegui reínte umi mbaʼe?” (1 Cor. 4:7). Upévare ñañatende vaʼerã ani hag̃ua jaiko jaipota umi ótro ñandeguerohoryeterei térã jaiko ñañemoimportanteseve ñande rapichakuéragui. Por ehémplo, umi ermáno ojapokuaáva diskúrso térã umi ermána ivaletereíva omoñepyrũ hag̃ua estúdio bíblico, siémpre ombotuicha vaʼerã Jehovápe umi mbaʼe ikatúvare ojapo hikuái.

11. ¿Mbaʼépa ñanemboʼe Jesús pe ehémplo oñeʼẽvare pe rréi ha ijesklávore?

¹¹ Jesús oavisa rire idisipulokuérape ani hag̃ua omoñepysanga ótrope, omoĩ peteĩ ehémplo oñeʼẽva peteĩ rréi ha ijesklávore. Pe esklávo ningo odeve pe rréipe hetaiterei pláta ha núnka ndaikatumoʼãi kuri opagapa, péro pe rréi operdona chupe upe odevéva. Upe rire ko kuimbaʼe noperdonaséi kuri ótro esklávo odevévape chupe, hiʼarive saʼietereive upe haʼe odeve vaʼekuégui. Upéi pe rréi omoingeka kárselpe ko esklávope ndoiporiahuverekoséi haguére hapichápe. ¿Mbaʼépa ñanemboʼe upéva? Jesús heʼi vaʼekue: “Péicha avei ojapóta penderehe che Ru oĩva yvágape napeperdonáiramo pende pyʼaite guive pene ermánope” (Mat. 18:21-35).

12. ¿Mbaʼéichapa japerhudika ótrope nañaperdonaséiramo ñane ermánope?

¹² Umi mbaʼe ojapóva pe esklávo ningo operhudika chupe voi ha avei ótrope. Primero, haʼe ipyʼahatã ha ndoiporiahuverekói pe ótro esklávope, upévare “omoingeka chupe kárselpe opagapa peve la odevéva”. Segundo, haʼe operhudika avei umi ótro esklávope. Jesús heʼi: “Umi ótro esklávo ohecha pe oikóva ha ombyasyeterei”. Upéicha avei, umi mbaʼe jajapóva ikatu operhudika ótrope. ¿Mbaʼépa ikatu oiko peteĩ ermáno ñandetrata vaíramo ha ñande nañaperdonaséi chupe? Primero, ñalastima hína pe ermánope, pórke nañaperdonaséi chupe. Avei ikatu ñañembotavy chugui ha ndajahechaukavéi jahayhuha chupe. Segundo, umi ermáno kongregasionpegua ohechávo ndajajoguerahaporãveimaha ótro ermánondi, ndovyʼamoʼãi ha oñeñandu vaíta hikuái.

13. ¿Mbaʼépa reaprende peteĩ prekursóra ohasa vaʼekuégui?

¹³ Ñaperdona jave ñane ermáno ha ermanakuérape, ñande voi ñañeñandu porã ha ñamoñeñandu porã ótrope. Upéva oiko vaʼekue peteĩ prekursóra héravare Crystal. * Chupe ningo omoñeñandu vaieterei vaʼekue peteĩ ermána ikongregasionpegua. Crystal heʼi: “Haʼe ningo iñeʼẽ arhél chéve ha umi mbaʼe heʼíva sapyʼánte chekutu rasy peteĩ kyséicha. Ha asẽ jave predikasiónpe, ndaipotái voi cheasigna hikuái apredika hag̃ua hendive. Upéicha rupi aju vaʼekue ndavyʼavéi ha nachekyreʼỹvéi predikasiónpe”. Crystal opensa vaʼekue ndaipochyreiriha pe ermánandi, péro haʼe odesidi ndopytamoʼãiha ipyʼaro ha ndoikomoʼãiha oñemoaichejáranga. Upéva rangue, haʼe iñumílde ha osegi umi konsého bíblico jatopáva pe artíkulo héravape “Perdonemos de corazón”, osẽ vaʼekue  La Atalaya 15 de octubre de 1999-pe. Crystal operdona pe ermánape, ha heʼi: “Koʼág̃a ahechakuaa enterove ñañehaʼãmbaiteha hína ñamonde peteĩ aóicha pe kondúkta pyahu, ha Jehová ñaneperdonaha hetaiterei vése káda día. Añandu ojei hague che árigui peteĩ kárga ipohyietereíva, ha koʼág̃a avyʼa jeýma”.

14. a) Asegún Mateo 18:21, 22, ¿mbaʼe provlémapa amalisia oreko vaʼekue apóstol Pedro, ha mbaʼépa reaprende Jesús heʼi vaʼekuégui? b) ¿Mbaʼépa ikatu ñanepytyvõ jajecháramo avei upe situasiónpe?

¹⁴ Ñande jaikuaa ñaperdona vaʼerãha ñane ermanokuérape, pórke upéva la oĩ porãva. Péro ikatu hína ijetuʼu ñandéve jajapo hag̃ua upéva. Amalisia apóstol Pedro oñeñandu vaʼekue avei upéicha sapyʼánte (elee Mateo 18:21, 22). ¿Mbaʼépa ikatu ñanepytyvõ? Primero, ñapensa mboy vésemapa Jehová ñaneperdona (Mat. 18:32, 33). Ñande ningo nañamereséi haʼe ñaneperdona, péro lomímonte ojapo upéva heta vése (Sal. 103:8-10). “Ñande jareko avei pe ovligasión jajoayhúvo”. Upévare ndaikatúi jaiporavo ñaperdonátapa térãpa nahániri. Upéva ñande jadeve voi ñane ermáno ha ermanakuérape (1 Juan 4:11). Segundo, ñapensa umi mbaʼe porã ojehupytývare ñaperdona jave. Ikatu ñaipytyvõ pe persóna ofalla vaʼekuépe ñanendive, ñaipytyvõ oĩ hag̃ua unida kongregasiónpe, japrotehe ñane amista Jehovándi, ha jaipeʼa ñande árigui peteĩ kárga ipohyietereíva ñandepyʼaguapy jey hag̃ua (2 Cor. 2:7; Col. 3:14). Ha tercero, ñañemboʼe Jehovápe. Haʼe hína pe ojeruréva ñandéve ñaporoperdona hag̃ua. Ani jaheja Satanás ombyai pe pyʼaguapy oĩva ñane ermáno ha ermanakuéra apytépe (Efes. 4:26, 27). Tekotevẽterei ningo Jehová ñanepytyvõ ani hag̃ua jaʼa Satanás ñuhãme.

15. Ohechaukaháicha Colosenses 3:13, ¿mbaʼépa ikatu jajapo peteĩ ermáno térã ermána ñanelastimáramo?

¹⁵ ¿Péro mbaʼépa ikatu jajapo peteĩ ermáno ñanelastimáramo? Ñañehaʼãmbaitékena jaiko jey hag̃ua pyʼaguapýpe hendive. Ñamombeʼu Jehovápe mbaʼéichapa ñañeñandu. Jajerure avei chupe tañanepytyvõ jahecha hag̃ua ñane ermánope  haʼe ohechaháicha chupe. Por ehémplo, jahechakuaa hag̃ua umi kualida porãite haʼe orekóva ha Jehová oguerohorýva hese (Luc. 6:28). Ha oiméramo ndaikatúi ñambohasa rei upe ojapo vaʼekue ñanderehe, jahecha vaʼerã mbaʼéichapa iporãvéta ñañemongeta hendive. Siémpre iporãve ñapensa ñane ermáno imbaʼeporãha, ha ndahaʼéi hague ñanelastimaséva (Mat. 5:23, 24; 1 Cor. 13:7). Ñañeʼẽ jave hendive, ani ñapensa ñanelastima hague a propósito. ¿Péro mbaʼépa jajapóta pe ermáno ndoikoporãséi jeýramo ñanendive? La Biblia heʼi: “Pesegíkena peñoaguanta”. Upéicharõ, jasegíkena ñanepasiénsia ñane ermánore (elee Colosenses 3:13). Ha iñimportantevéva, ani japyta ñandepyʼaro, pórke upéva ikatu ombyai ñane amista Jehovándi. Aníkena núnka jaheja mbaʼeve ñanemoñepysanga, upéicha jahechaukáta jahayhuveha Jehovápe oimeraẽ mbaʼégui (Sal. 119:165).

16. ¿Mbaʼe rresponsavilidápa jareko enterove?

¹⁶ Ñandéve g̃uarã ningo peteĩ priviléhio jaservi oñondivepa Jehovápe ‘peteĩ ovecha atýicha’, oĩva “peteĩ pastór” poguýpe (Juan 10:16). Pe lívro Pe organisasión ojapóva Jehová volunta, páhina 165-pe heʼi: “Oikóvo ñandehegui testígo de Jehová vautisádo, ñande jaike ko família tuichaitévape. Upévare enterove jareko pe rresponsavilida ñaipytyvõvo siémpre ojeiko hag̃ua peteĩ ñeʼẽme”. Upéicharõ, “ñañehaʼãmbaite vaʼerã jahecha ñane ermanokuérape Jehová ohechaháicha chupekuéra”. Jehovápe g̃uarã enterove jajogua “mitãme”, ha haʼe ñanderayhueterei. Ñande upeichaite avei jahecha vaʼerã ñane ermanokuérape. Jehová ohecha ha omombaʼe entéro mbaʼe jajapóva ñaipytyvõ ha jakuida hag̃ua hesekuéra (Mat. 10:42).

17. ¿Mbaʼépa ñande jajedesidíma jajapotaha?

¹⁷ Ñande ningo jahayhueterei ñane ermáno ha ermanakuérape. Upévare jajedesidíma nañalastimamoʼãiha ni “ndajajapomoʼãiha mbaʼeve ikatúva omoñepysanga ñane ermánope ni mbaʼeve omokangýva ijerovia” (Rom. 14:13, nóta). Ñandéve g̃uarã ningo ñane ermáno ha ermanakuéra tuichave ñandehegui, ha ñaperdonase chupekuéra ñande pyʼaite guive. Aníkena jaheja ñanemoñepysanga umi ótro ojapóva. Upéva rangue, “jasegíkena jajapo entéro mbaʼe ikatúva oipytyvõ oĩ hag̃ua pyʼaguapy ha omombaretétava ñane ermanokuérape” (Rom. 14:19).