1. ¿Mbaʼérepa sapyʼánte oñeñandu haʼeño Jehová siervokuéra?

ÑANDE ningo sapyʼánte ñañeñandúnte voi jepi ñaneaño. Oĩ umi ensegída ojehasa jeýmava chugui upéva, péro ótro katu osegi oñeñandu upéicha heta tiémpore. Ikatu hína ñañeñandu ñaneaño ñaiméramo jepe heta hénte apytépe. Por ehémplo, algúnope ijetuʼu otopa hag̃ua iñamigorã peteĩ kongregasión pyahúpe. Oĩ umi ojepokuaa vaʼekue ojapo heta mbaʼe ifamíliandi, péro upéi oĩvo mombyry chuguikuéra oñeñandu haʼeño. Oĩ avei umi omanóva chugui peteĩ ohayhúva ha ohechagaʼueterei ohasa tiémpo hendive. Ha oĩ katu umi ramoiténte oñepyrũ vaʼekue oservi Jehovápe, ha oñeñandúva haʼeño ihénte ha umi iñamigokuéra ndoadoráiva Jehovápe orrechasa ha opersegi haguére chupe.

2. ¿Mbaʼe porandúpa ñambohováita?

² Jehová ningo oikuaa ha ontende entéro mbaʼe jahasáva. Ñañeñandu jave ñaneaño, haʼe oikuaa upéva ha ñanepytyvõse. ¿Mbaʼéichapa Jehová ñanepytyvõ? ¿Mbaʼépa ñande voi ikatu jajapo ñañeñandúramo ñaneaño? ¿Ha mbaʼéichapa ikatu ñaipytyvõ umi ermanokuéra oñeñandúvape haʼeño? Ñambohovaimína koʼã porandu.

3. ¿Mbaʼéichapa Jehová ohechauka vaʼekue ojepyʼapyha Elíasre?

³ Jehová ningo oipota enterove isiervokuéra ovyʼa. Haʼe oĩ voi káda uno ykére, ha oikuaa ñañeñandu vai ha ñañedesanima jave (Sal. 145:18, 19). Ñapensamína mbaʼeichaitépa Jehová ojepyʼapy vaʼekue proféta Elías oñandúvare, ha mbaʼéichapa oipytyvõ chupe. Ko kuimbaʼe ojeroviaitéva Jehováre oiko vaʼekue peteĩ  tiémpo ijetuʼuetereívape Israélpe. Umi hénte omanda guasúva Israélpe ha ndohayhúiva Jehovápe opersegi vaʼekue umi oservívape Ñandejárape, ha koʼýte ojukase vaʼekue hikuái Elíaspe (1 Rey. 19:1, 2). Avei Elías opensa vaʼekue haʼentemaha la proféta oservíva Jehovápe, ha upéva oiméne koʼýte odesanima rakaʼe chupe (1 Rey. 19:10). Ñandejára pyaʼe porã ohecha mbaʼéichapa oipytyvõta Elíaspe. Upearã ombou peteĩ ánhel oasegura hag̃ua iprofétape noĩriha haʼeño. Pe ánhel heʼi Elíaspe oĩha gueteri heta israelita oservíva Jehovápe fiélmente (1 Rey. 19:5, 18).

4. ¿Mbaʼéichapa Marcos 10:29, 30 ohechauka mbaʼeichaitépa Jehová ojepyʼapy umi omboyke vaʼekuére chupekuéra ifamília térã iñamigokuéra?

⁴ Jehová ningo oikuaa ñande apytépe oĩha umi ojapo vaʼerã heta sakrifísio odesidi hag̃ua oservi chupe. Umíva apytépe oĩ umi omboykéva chupe ihénte ha iñamigokuéra ndoservíriva Jehovápe. Peteĩ jey Pedro oiméne ojepyʼapy raʼe ha oporandu Jesúspe: “Ore ningo roheja entéro mbaʼe roguerekóva ha romoirũ. ¿Mbaʼépa rorresivíta upéicharõ?” (Mat. 19:27). Jesús mborayhúpe ombohovái upéva idisipulokuérape, heʼírõ guare pe kongregasión haʼetaha peteĩ família chupekuéra g̃uarã (elee Marcos 10:29, 30). Ha Jehová, pe omoakãva ko família, opromete oipytyvõtaha umi oservisévape chupe (Sal. 9:10). Jahechamína mbaʼe mbaʼépa ikatu jajapo Jehová ñanepytyvõ hag̃ua ñañeñandu jave ñaneaño.

5. ¿Mbaʼérepa iporã ñapensa mbaʼéichapa Jehová ñanepytyvõ hína?

⁵ Epensa mbaʼéichapa Jehová nepytyvõ hína (Sal. 55:22). Upéva nepytyvõta rehechakuaa hag̃ua nereimeiha neaño. Peteĩ ermána hérava Carol * haʼe añomínte la Testígo hógape, ha haʼe heʼi: “Chemanduʼávo mbaʼéichapa Jehová oĩ vaʼekue che ykére ahasárõ guare umi situasión ijetuʼúva, upéva chepytyvõ añandu hag̃ua naimeiha cheaño, ha oasegura chéve Jehová siémpre oĩtaha che ykére aikotevẽ jave”.

6. ¿Mbaʼéichapa 1 Pedro 5:9, 10 ikatu omokyreʼỹ umi oñeñandúvape haʼeño?

⁶ Epensa mbaʼéichapa Jehová oipytyvõ hína umi ermáno ha ermána oñeñandúvape avei haʼeño (elee 1 Pedro 5:9, 10). Hiroshi,  peteĩ ermáno heta áñorema haʼe añoiténteva la Testígo ifamíliape, heʼi: “Ndahasyiete ningo jahechakuaa hag̃ua kongregasiónpe enterovénte orekoha provléma. Jaikuaa ningo káda uno jajapoha jaikóvo opa ikatúva jaservi hag̃ua Jehovápe, ha upéva oremokyreʼỹeterei oréve, ndororekóivape ore família oservíva Jehovápe”.

7. ¿Mbaʼéichapa ndéve nepytyvõ pe ñemboʼe?

⁷ Ejepokuaa eñemboʼe, elee la Biblia ha eho rreunionhápe. Iñimportanteterei ningo eñemboʼe Jehovápe, ha emombeʼupaite chupe mbaʼéichapa eñeñandu (1 Ped. 5:7). Jahechamína mbaʼépa heʼi peteĩ ermána imitãva hérava Massiel. Haʼe odesidírõ guare oservitaha Jehovápe oñeñandu vaʼekue haʼeño, pórke ndaipóri ótro ifamíliape oservíva Jehovápe. Massiel omombeʼu: “Che ningo añemboʼe Jehovápe che pyʼaite guive, ha upéva tuichaiterei chepytyvõ vaʼekue anivéma hag̃ua añeñandu cheaño. Che ahecha Jehovápe che Tuaichaite ha añemboʼe chupe káda día, heta vése voi káda día, ha amombeʼupaite chupe mbaʼéichapa añeñandu”.

8. ¿Mbaʼéichapa ndéve nepytyvõ releéramo la Biblia ha rejepyʼamongeta hese?

⁸ Iporãta ningo avei rejepokuaáramo relee la Biblia, ha ejepyʼamongeta umi rreláto ohechaukávare mbaʼeichaitépa Jehová nderayhu. Bianca, peteĩ ermána oaguanta vaʼerã ifamiliakuéra ijarhél jave chupe, heʼi: “Tuichaiterei ningo chepytyvõ alee ha ajepyʼamongeta jave umi rreláto oĩvare la Bíbliape, oñemombeʼuhápe mbaʼéichapa Jehová siervokuéra ohasa vaʼekue avei koʼãichagua situasión”. Oĩ avei ermáno oñehaʼãva oikuaa de memória umi téxto omoñeñandu porãva chupekuéra, por ehémplo Salmo 27:10 ha Isaías 41:10. Ótro katu ojeprepara hag̃ua rreunionrã ohendu umi gravasión orekóva umi puvlikasión ojestudiátava, térã oipuru umi áudio de la Biblia olee jave haʼeñoháme, ha upéva oipytyvõ chupekuéra ani hag̃ua oñeñandu haʼeño.

9. ¿Mbaʼéichapa ndéve nepytyvõ umi rreunión?

⁹ Eñehaʼãmbaitékena ani rejavy ni peteĩ rreunión. Umi mbaʼe ojehecháva rreunionhápe nemokyreʼỹetereíta, ha avei reikuaavéta umi ermáno ha ermanakuérape (Heb. 10:24, 25). Massiel, pe ermána ajeʼi ñañeʼẽ hague heʼi: “Cheotĩetereíramo jepe, ajedesidi vaʼekue ndafaltamoʼãiha ni peteĩ rreuniónpe ha katuete akomentataha una ves jepe. Upéva chepytyvõ añandu hag̃ua arekoha peteĩ lugár kongregasiónpe”.

10. ¿Mbaʼérepa iñimportánte ñañamiga umi ermanokuérare?

¹⁰ Eheka ne amigorã kongregasiónpe. Eñehaʼã eñamiga umi ermáno ha ermanakuéra haʼévare ehémplo porã ndéve g̃uarã, ndahaʼéiramo jepe ndeavegua térã orekóramo jepe ótra kultúra.  La Biblia ñanemomanduʼa voi: “Umi ijedavéva ningo iñarandu” (Job 12:12). Péro umi ijedáva ikatúnte avei oaprende heta mbaʼe umi imitãvagui. Por ehémplo, David imitãiteve vaʼekue Jonatángui, péro haʼekuéra lomímonte oñoamigoite (1 Sam. 18:1). David ha Jonatán oñopytyvõ vaʼekue oservi hag̃ua Jehovápe heta situasión ijetuʼúvape (1 Sam. 23:16-18). Irina, peteĩ ermána haʼe añoiténteva la Testígo ifamíliape heʼi: “Ñane ermáno ha ermanakuéra kongregasionpegua añetehápe haʼe hína ñande túa, ñande sy ha ñane ermanokuéra teéicha. Jehová ikatu ojevale hesekuéra ñanepytyvõ hag̃ua ñaikotevẽ jave”.

11. ¿Mbaʼépa ikatu jajapo ñakonsegi hag̃ua ñane amigorã?

¹¹ Oiméramo neotĩ, ikatu hína ijetuʼuve ndéve retopa hag̃ua ne amigorã. Peteĩ ermána hérava Ratna ningo hiʼotĩeterei, ha oñepyrũ vaʼekue oservi Jehovápe oĩramo jepe oñemoĩva hese. Haʼe heʼi: “Arrekonose vaʼerã kuri aikotevẽha chepytyvõ umi ermáno ha ermanakuéra kongregasionpegua”. Ikatu voi ijetuʼu ndéve emombeʼu hag̃ua ótrope mbaʼéichapa eñeñandu, péro ejapóramo upéva, pe persónagui ikatu oiko ne amigoite. Ne amigokuéra ningo nepytyvõse ha nemokyreʼỹse, péro haʼekuéra oikotevẽ nde remombeʼu chupekuéra mbaʼéichapa ikatu ojapo upéva.

12. ¿Mbaʼéichapa pe predikasión ikatu nepytyvõ?

¹² Katuete ningo retopáta ne amigorã repredikáramo umi ermáno ha ermanakuérandi. Carol, pe ermána ajeʼi ñañeʼẽ hague heʼi: “Che ningo atopáma heta che amigarã ahasa rupi tiémpo ermanakuérandi predikasiónpe, ha ajapóvo hetave mbaʼe Jehová servísiope. Jehová hetáma chepytyvõ umi áño ohasa vaʼekuépe koʼã che amigakuéra rupive”. Siémpre ningo ou porãitereíta ndéve reñamigáramo umi ermáno ha ermanakuéra ijerovia mbaretévare. Jehová ojevale hesekuéra nemokyreʼỹ hag̃ua reñedesanima jave, por ehémplo reñeñandu jave neaño (Prov. 17:17).

13. ¿Mbaʼe rresponsavilidápa jareko enterove ñaiméva kongregasiónpe?

¹³ Enterove ningo jareko la rresponsavilida oĩ hag̃ua pyʼaguapy kongregasiónpe ha jahechauka hag̃ua jajoayhuha, péicha avave noñandumoʼãi oñemboykeha chupe (Juan 13:35). ¡Tuichaiterei ningo ikatu omokyreʼỹ ótrope umi mbaʼe jaʼe ha jajapóva! Peteĩ ermána heʼi: “Añepyrũrõ guare aservi Jehovápe, pe kongregasióngui oiko che família. Umi ermáno nachepytyvõirire, ndaikatumoʼãi kuri oiko chehegui testígo de Jehová”. ¿Mbaʼéichapa ikatu ñaipytyvõ umi ermáno orekóvape ihentekuéra ndahaʼéiva Testígo oñandu hag̃ua orekoha peteĩ lugár kongregasiónpe?

14. ¿Mbaʼépa ikatu rejapo reñamiga hag̃ua umi ipyahúvare kongregasiónpe?

¹⁴ Ñañehaʼã ñañamiga umi ipyahúvare kongregasiónpe. Ñepyrũrã ikatu torýpe jarresivi umi ipyahúvape kongregasiónpe (Rom. 15:7). Péro ndahaʼéi jasaluda porãsénteva chupekuéra. Ñande jaipota oiko chuguikuéra ñane amigoite. Upévare ñaneamávle vaʼerã ha jahechauka añetehápe jajepyʼapyha hesekuéra. Ñaporanduʼỹre peteĩ mbaʼe omoñeñandu vaítava chupekuéra, ñañehaʼã ñantende umi mbaʼe ohasáva hikuái. Algúnope ikatu hína ijetuʼu omombeʼu hag̃ua mbaʼéichapa oñeñandu, upévare aníkena jajopy chupekuéra oñeʼẽ hag̃ua umi mbaʼére. Upéva rangue, mborayhúpe ñaporandu umi mbaʼe ndohejavaimoʼãiva chupekuéra, ha trankílo porã jajapysaka umi mbaʼe heʼívare hikuái. Por ehémplo, ikatu ñaporandu chupekuéra mbaʼéichapa oikuaa raʼe Jehovápe.

15. ¿Mbaʼéichapa umi ermáno ijerovia mbaretéva ikatu oipytyvõ ótrope kongregasiónpe?

¹⁵ Enterove ermáno jerovia imbareteve  jahechaukáramo jajepyʼapyha ojuehe kongregasiónpe, koʼýte oiko upéva ansianokuéra térã ótro ermáno ijerovia mbaretéva ojapóramo upéicha. Melíssape ningo isy oipytyvõ vaʼekue oikuaa hag̃ua Jehovápe imichĩete guive, ha haʼe heʼi: “Aagradeseterei ningo umi ermáno chepytyvõ vaʼekuépe peteĩ túaicha umi áño ohasa vaʼekuépe. Haʼekuéra ojepyʼapy cherehe ha oñemotiémpo chéve g̃uarã. Aikotevẽ jave añeʼẽ peteĩ mbaʼére, che aikuaa haʼekuéra oĩtaha upépe cherendu hag̃ua”. Peteĩ mitãrusu hérava Mauricio oñandu vaʼekue ojeheja rei hague chupe iñinstruktórgui oikórõ guare inaktívo, ha haʼe omombeʼu: “Umi ansiáno ohechauka vaʼekue ojepyʼapyha cherehe ha upéva tuichaiterei chepytyvõ. Haʼekuéra pyʼỹinte oñeʼẽ chendive, chemoirũ predikasiónpe, omombeʼu chéve umi mbaʼe porã oaprendéva ijestúdio personálpe, ha siémpre ojapo voi álgo rojediverti hag̃ua”. Melissa ha Mauricio oservi hína koʼág̃a Jehovápe de tiémpo kompléto.

16, 17. ¿Mbaʼe mbaʼépa avei ikatu jajapo ñaipytyvõ hag̃ua ótrope?

¹⁶ Jajapo álgo ñaipytyvõ hag̃ua chupekuéra (Gál. 6:10). Leo, peteĩ misionéro oservíva ótro paíspe mombyry ifamiliakuéragui, heʼi: “Sapyʼánte ningo ifáltante ojejapo ñanderehehápe peteĩ mbaʼe iporãva ñaikotevẽve jave. Chemanduʼa peteĩ díape areko hague peteĩ aksidénte de áuto. Upéi hasypeve ag̃uahẽ ógape ha chereja vaieterei pe aksidénte. Péro upéi peteĩ matrimónio cheinvita hógape rokaruʼimi hag̃ua. Che nachemanduʼái mbaʼépa roʼu kuri, péro si chemanduʼa haʼekuéra mborayhúpe ojapysaka hague cherehe, ha upéi tuicha añeñandu porãve”.

¹⁷ Enterove ningo javyʼa jareko jave umi rreunión tuicháva, por ehémplo umi asambléa. Péicha jave ikatu jahasa tiémpo ermanokuérandi ha ñañemongeta hendivekuéra umi mbaʼe ñaaprendévare upe asambléape. Péro Carol, pe ermána ajeʼi ñañeʼẽ hague heʼi: “Che añeñandu jepi cheañoite umi asambleahápe”. ¿Mbaʼérepa? Haʼe heʼi: “Oĩramo jepe hetaiterei ermáno ha ermána che jerére, ijetuʼueterei chéve ahecha mbaʼéichapa haʼekuéra oĩ ifamíliandi ha oguapy joa hikuái oñondive. Upéicha jave ningo koʼýte añeñandu cheaño”. Ótrope g̃uarã katu ijetuʼueterei oho jey asambleahápe primera ves omano rire chugui iména térã hembireko. ¿Ñandépa jaikuaa peteĩ persóna ohasáva hína koʼãichagua situasión? ¿Ndaikatuichénepa  ñainvita chupe pe asambléa oúvape oĩ hag̃ua ñane famíliandi?

18. Ñaporoinvitáta jave, ¿mbaʼéichapa ikatu jajapo pe heʼíva 2 Corintios 6:11-13?

¹⁸ Jahasa tiémpo oñondive. Ñañehaʼã jahasa tiémpo diferénte ermáno ha ermánandi, koʼýte umi oñeñandúvandi haʼeño. Ñande ningo ‘jaavrise ñane korasõ’ jahayhuve hag̃ua koʼã ermánope (elee 2 Corintios 6:11-13, nóta). Melissa, pe ermána ajeʼi ñañeʼẽ hague, heʼi: “Ore ningo siémpre rovyʼaiterei umi ermáno ha ermanakuéra orekonvida jave hógape rohasa hag̃ua tiémpo hendivekuéra, térã oreinvita jave roviaha hag̃ua oñondivepa ifamíliandi”. ¿Oĩpa peteĩ ermáno térã ermána ñane kongregasiónpe ikatúvape ñainvita ñande rógape, térã jahasa hag̃ua tiémpo oñondive?

19. ¿Mbaʼéicha javépa koʼýte iñimportánte jahasa tiémpo ñane ermanokuérandi?

¹⁹ Oĩ ningo umi fécha umi ermanokuéra koʼýte oagradesetahápe jahasáramo tiémpo hendivekuéra. Por ehémplo, ikatu ijetuʼu chupekuéra ihentekuéra omboarete jave umi fiésta patriótika, térã umi fiésta oúva rrelihión fálsagui. Oĩ avei umi ndovyʼaietereíva og̃uahẽ jave pe fécha omano hague peteĩ persóna haʼe ohayhúva. Ñande jajeofreséramo jahasa hag̃ua tiémpo umi ombohováivandi koʼãichagua situasión ijetuʼúva, jahechauka hína ‘ñande pyʼaite guive ñañangarekoha hesekuéra’ (Filip. 2:20).

20. ¿Mbaʼéichapa umi mbaʼe Jesús heʼi vaʼekue Mateo 12:48-50-pe ñanepytyvõ ñañeñandu jave ñaneaño?

²⁰ Heta mbaʼére ningo peteĩ kristiáno sapyʼánte ikatu oñeñandu haʼeño. Upéicharõ jepe, siémpre ñanemanduʼa vaʼerã Jehová ontende porãitereiha mbaʼéichapa ñañeñandu. Haʼe pyʼỹinte ojevale ñane ermanokuérare ñanepytyvõ hag̃ua ñaikotevẽ jave (elee Mateo 12:48-50). Ha jahechauka hag̃ua jaagradeseha Jehovápe pe kongregasiónre, ñande jajapo opa ikatúva ñaipytyvõ hag̃ua ñane ermáno ha ermanakuérape. Tahaʼe haʼéva umi mbaʼe sapyʼánte ñañandúva, ñande núnka nañaimemoʼãi ñaneaño pórke Jehová siémpre oĩta ñande ykére.