1, 2. ¿Mbaʼéichapa ñane situasión ojogua umi mbaʼe Lot ohasa vaʼekuépe?

 JAHECHÁVO mbaʼeichaitépa koʼág̃arupi la hénte hekovai ñañeñandu Lot oñeñandu haguéicha. Haʼe oikuaa vaʼekue ñande Ru yvagapeguápe ndogustaieteha ojejapo mbaʼe vai, upévare “oñekevrantaiterei vaʼekue umi hénte aña notĩri haguére hembiapo vai hag̃ua” (2 Ped. 2:7, 8). Lot ohayhu ha orrespeta rupi Jehovápe ndaijaʼéi vaʼekue umi mbaʼe vai ojapóvare umi hénte itiempopegua. Ñande kásope upéicha avei. Ñande jerére oiko hetaiterei hénte nomombaʼéiva térã ndorrespetaietéva voi Jehová léi. Upéicharõ jepe ñande ikatu ñanderekopotĩ ñañehaʼãramo jahayhu Jehovápe ha jarrespeta chupe (Prov. 14:2).

² Jehová ningo ñanepytyvõ jajapo hag̃ua upéva pe lívro de Proverbios rupive. Enterove tahaʼe kuña, kuimbaʼe, imitãva térã ijedáva ikatu oñevenefisia umi konsého oĩvagui upépe.

3. Heʼiháicha Proverbios 17:3, ¿mbaʼérepa tekotevẽ ñañatende la oĩvare ñane korasõme? (Ehecha pe taʼanga).

³ Ñande ningo ñañatende la oĩvare ñane korasõme pórke Jehová omaña hína mbaʼépa oĩ ñande pyʼapýpe. ¿Mbaʼépa heʼise upéva? Jehová ningo ohecha mombyryve la héntegui ha oikuaa porã opa mbaʼe jarekóva ñande pyʼapýpe (elee Proverbios 17:3). Jehová ñanderayhúta jasegíramo ñapensa umi konsého haʼe omeʼẽvare ha ñanepytyvõtava jaikove hag̃ua pára siémpre. Péicha jajapóramo núnka nañapermitimoʼãi ñandegueraha vai umi hénte rekovai ni ndajagueroviamoʼãi umi japu omosarambíva Satanás ha ko múndo aña (Juan 4:14; 1 Juan 5:18, 19). Jahayhu ha jarrespetavéta Jehovápe amáske ñañemoag̃ui hese, upéicha rupi ndajajaposemoʼãi voi mbaʼeve omoñeñandu vaítava ñande Ru yvagapeguápe ha ni noñantohamoʼãi ñandéve jajapo álgo ivaíva chupe g̃uarã. Oñepresentáramo ñandéve peteĩ tentasión ñapensátama voi: “Ñandejára ningo cherayhueterei  ha ojapóma hetaiterei mbaʼe cherehehápe, ¿mbaʼéicha piko upéicharõ ajaposéta álgo ivaíva ikóntrape?” (1 Juan 4:9, 10).

4. ¿Mbaʼépa ojapo raʼe peteĩ ermána orrespeta rupi Jehovápe?

⁴ Marta, b peteĩ ermána oikóva Croáciape omombeʼu oñepresenta hague chupe peteĩ tentasión hekovai hag̃ua. Haʼe heʼi: “Ijetuʼu kuri chéve apensa porã hag̃ua ha ani hag̃ua ajapo peteĩ mbaʼe ivaíva, péro arrespeta rupi Jehovápe ndahái pe tape vaíre ha upéva cheprotehe”. ¿Mbaʼépa ojapo raʼe Marta? Haʼe heʼi opensa hague mbaʼe konsekuénsiapa orekóta odesidi vaíramo ha ñande avei ikatu jajapo upéicha oñepresenta jave ñandéve peteĩ tentasión. ¿Mbaʼépa la ivaivéva ikatúva oiko ñanderehe? Jadesidi vaírõ ningo Jehová ombyasyetereíta ha ndaikatumoʼãi jaadora chupe pára siémpre (Gén. 6:5, 6).

5. ¿Mbaʼépa ikatu ñaaprende Leo experiénsiagui?

⁵ Ñande jarrespetáramo Jehovápe ñañatendéta ani hag̃ua ñanejúnta vai. Jahechamína koʼág̃a Leo experiénsia, peteĩ ermáno oikóva Cóngope. Haʼe 4 áño ojevautisa haguépe oñepyrũ ijúnta vai. Leo opensa vaʼekue ndaivairiha upéva haʼe ndojapóima guive peteĩ mbaʼe vai. Péro ensegidamínte umi iñamigokuéra lája ováma hese ha oñepyrũma hoʼu rasa vevída ha hekovai. ¿Ha mbaʼépa oiko upéi? Leo opensa umi mbaʼe omboʼe vaʼekuére chupe ituakuéra haʼéva Testígo, ha imanduʼa mbaʼeichaitépa ovyʼa vaʼekue oservírõ guare Jehovápe. Upéi haʼe oñepyrũ jey ojapo umi mbaʼe iporãva ha umi ansianokuéra oipytyvõ rupi chupe oñemoĩ porã jey Jehovándi. Koʼág̃a g̃uarã vyʼápe oservi de ansiáno ha prekursór espesiál.

6. ¿Mbaʼe rehepa ñañeʼẽta koʼág̃a?

⁶ Ñaanalisáta koʼág̃a Proverbios kapítulo 9. Upépe oñeñeʼẽ mokõi kuña rehe. Peteĩva  orrepresenta pe “arandu” ha pe ótrare katu ojeʼe haʼeha peteĩ “kuña naiñarandúiva”. c Amedída ke ñaanalisa ko artíkulo jareko vaʼerã enkuénta Satanás múndo itavyeteha rrelasión sexuál ha pornografíare (Efes. 4:19). Upévare iñimportanteterei jasegi jarrespeta Jehovápe ha ñañemomombyry ivaívagui (Prov. 16:6). Enterovépe ideprovéchota ñaanalisa ko kapítulo, tahaʼe kuña térã kuimbaʼépe. Ko kapítulope koʼã mokõi kuña rehe ojeʼe ohenoiha umi ‘ndoikuaáivape mbaʼeve’ térã ‘ivýrovape’. Haʼete oinvitáva chupekuéra oike hag̃ua hógape ha hoʼu umi tembiʼu ojeprepara vaʼekue (Prov. 9:1, 5, 6, 13, 16, 17). Péro idiferentete la oikóva umi oasepta vaʼekuére káda kuña invitasión. ¿Mbaʼérepa jaʼe upéva? Jahechamína.

7. Heʼiháicha Proverbios 9:13-18, ¿mbaʼépa oiko umi ohóvare pe “kuña naiñarandúiva” rógape? (Ehecha pe taʼanga).

⁷ Jahechamína koʼág̃a la heʼíva oporoinvita hag̃ua pe “kuña naiñarandúiva” (elee Proverbios 9:13-18). Pe “kuña naiñarandúiva” notĩri voi oinvita hag̃ua hógape oimeraẽ ndoikuaáivape mbaʼeve hoʼu hag̃ua umi tembiʼu ojeprepara vaʼekue. ¿Ha mbaʼépa oiko umi oaseptávare iñinvitasión? ‘Ohóva guive pe kuña rógape omano’. Oiméne ñanemanduʼa lívro de Provérbiospe oñeñeʼẽma hague voi peichagua kuñáre. Por ehémplo kapítulo 2-pe oñeñeʼẽ pe ‘kuña iñañávare’ ha pe ‘kuña hekovaívare’. Ha ojeʼe voi la ohóva hógape haʼete derechoite ohóva omano hag̃ua (Prov. 2:11-19). Avei Proverbios 5:3-10-pe oñeñeʼẽ ótro ‘kuña iñañávare’ osegíva pe tape ‘ogueraháva chupe ñemanóme’.

8. ¿Mbaʼépa tekotevẽta jadesidi?

⁸ Umi ohendúva pe ‘kuña naiñarandúivape’ odesidi vaʼerã oaseptátapa térã nahániri la iñinvitasión. Ñande avei ikatu ñambohovái peteĩ situasión peichagua. ¿Mbaʼéicha javépa? Por ehémplo oñepresenta jave ñandéve peteĩ oportunida ñanderekovai hag̃ua térã osẽ ñandéve peteĩ taʼanga tieʼỹ. ¿Mbaʼépa jadesidíta péicha jave?

9, 10. ¿Mbaʼérepa ndovaléi ñanderekovai?

⁹ Ndahaʼéi vyroreíre la ñamboykete vaʼerã pe tekovai. Proverbios omombeʼu pe “kuña naiñarandúiva” heʼiha: “Pe y ahéno ningo heve ha heʼẽ asy voi”. ¿Mbaʼépa hína “pe y ahéno”? Ótra pártepe la Biblia okompara “pe y porãite” pe rrelasión sexuál orekóvare ména ha tembireko oñondive (Prov. 5:15-18). Peteĩ kuimbaʼe ha kuña omendáva añoite ikatu oreko oñondive rrelasión sexuál. Péro la Biblia heʼi jave “pe y ahéno” idiferentete hína. Koʼápe provávlemente  oñeñeʼẽ tekovaíre, térã umi rrelasión sexuál Ñandejára léi oproivívare. Umi hénte hekovaíva oñehaʼã jepi omokañy la ojapóva. Haʼete voi peteĩ mondaha ogueraháva mbaʼe ahéno. Pe “y ahéno” haʼetévaicha voi heʼẽ asýva umi opensávape g̃uarã ndojepillamoʼãiha chupekuéra, péro oñembotavy ijupe voi pórke Jehová ohecha opa mbaʼe. Añetehápe ivaieterei hína japyta vai Jehovándi, ndaipóri voi ótra kósa ikatúva ñaneamargave upévagui. Ha ndahaʼeiete hína he ni heʼẽ asýva la jahasátava (1 Cor. 6:9, 10). Péro hetave mbaʼe voi ikatu hína ojehu ñandéve.

¹⁰ Umi hekovaíva ikatu opyta otĩ, oñandu ndovaleiha mbaʼeverã, ombyai ifamília ha oĩ umi hyeguasu reíva. Péicha jahechakuaa ñanearandutaha ha mombyry ñaganataha jarrechasáramo pe “kuña naiñarandúiva” invitasión. Jaʼéma haguéicha umi hekovaíva ombyai iñamista Jehovándi, péro ikatu avei ojagarra chupekuéra mbaʼasy hekovai haguére ha upéi omano upéva káusare (Prov. 7:23, 26). Proverbios 9:18 opakuévo heʼi: “Umi iñinvitádo ningo oho opyta pe Sepultúrape”. ¿Mbaʼérepa upéicharõ hetaite oĩ oaseptáva pe kuña invitasión opa vaietétarõ? (Prov. 9:13-18).

11. ¿Mbaʼérepa ivaiete jahecha pornografía?

¹¹ Peteĩ mbaʼe ojagarrapáva opárupi ha tekotevẽva ñamboykete haʼe hína pe pornografía. Oĩ umi opensáva ndojapomoʼãiha hesekuéra mbaʼeve ohecháramo pornografía, péro ndahaʼeiete katu upéicha. Pe pornografía ombyaiete umi héntepe. Umi ohecháva ikatu ou noñemombaʼevéi ijupe voi ni ndorrespetavéi ótrope, ha ijetuʼueterei oheja hag̃ua ko vísio. Umi taʼanga tieʼỹ ndojeíri voi péicha péichante ñane akãgui ha ijetuʼueterei ñanderesarái hag̃ua chugui. Avei pe pornografía noipytyvõi umi héntepe omboykete hag̃ua umi deséo vai, síno omoakãrakuve rei katu chupekuéra (Col. 3:5; Sant. 1:14, 15). Amo ipahápe umi ohecháva pornografía upéi ou jepi hekovai.

12. ¿Mbaʼéichapa ikatu jahechauka ñamboyketeha opaichagua taʼanga ikatúva ñanemoakãraku?

¹² ¿Mbaʼépa jajapo vaʼerã derrepentete ojapareséramo ñandéve peteĩ taʼanga tieʼỹ selulár, távletpe térã ótro aparáto elektrónikope? Ni mbaʼevéicharõ ndajapytái vaʼerã ñamaña hese. Ifasilvéta ñandéve jajapo hag̃ua upéva ñanemanduʼáramo mbaʼeichaitépa ivalióso ñandéve g̃uarã ñane amista Jehovándi. Péro jareko vaʼerã enkuénta oĩha umi taʼanga ndahaʼéiva katuete pornografía péro ikatúva ñanemoakãraku ñanderekovai hag̃ua. ¿Tekotevẽpa ñamboyke avei koʼãva? Si, pórke ñande ndajaipotái ni oñantoha ñandéve ñanderekovai (Mat. 5:28, 29). Peteĩ ansiáno hérava David, oikóva Tailándiape heʼi: “Che apensa jepi péicha: ‘Ko taʼanga ndahaʼéiramo jepe pornografiaite, ¿ogustátapa Jehovápe che apytáramo amaña hína hese?’. Apensa haguére péicha ifasilve chéve adesidi porã hag̃ua”.

13. ¿Mbaʼépa ñanepytyvõta jadesidi porã hag̃ua?

¹³ Ñañehaʼãramo siémpre jarrespeta Jehovápe ndajajaposemoʼãi mbaʼeve ndogustáiva chupe ha upéva ñanepytyvõta jadesidi porã hag̃ua. La Biblia heʼi voi: “Nearandu hag̃ua, primeroite rerrespeta vaʼerã Jehovápe” (Prov. 9:10). Upéva ojehechauka porã oñepyrũvo Proverbios kapítulo 9. Upépe oñeñeʼẽ pe ‘arandu añeteguávare’ haʼeramoguáicha peteĩ kuña.

14. ¿Mbaʼe ótra invitasiónrepa oñeñeʼẽ Proverbios 9:1-6-pe?

¹⁴ (Elee Proverbios 9:1-6). Koʼápe jatopa peteĩ invitasión oúva Jehovágui. Haʼe hína ñande Apohare ha chugui voi ou pe “arandu añeteguáva” (Prov. 2:6; Rom. 16:27). Ko kásope oñeñeʼẽ peteĩ óga tuichávare orekóva 7 kolúmna. Ko ehémplo ohechauka Jehová imbaʼeporãha ha vyʼápe orresiviha entéro umi osegisévape ikonsého iñarandu hag̃ua.

15. ¿Mbaʼe invitasiónpa Ñandejára oipota jaasepta?

 ¹⁵ Pe ehémplo oñeʼẽva pe kuña orrepresentávare pe “arandu” ohechauka Jehová imbaʼeporã ha omeʼẽha ñandéve heta mbaʼe. Ko rreláto omombeʼu ko kuña ojapo hague peteĩ karu guasu, peteĩ víno espesiál ha oprepara hague pe mesa (Prov. 9:2). Avei umi versíkulo 4 ha 5 heʼi: “Pe arandu heʼika umi ivýrovape: ‘Peju koʼápe peʼu pe tembiʼu ojeprepara vaʼekue’”. ¿Mbaʼérepa jaasepta vaʼerã ko kuña iñarandúva invitasión? Pórke Jehová oprotehese ifamiliakuérape ha oipota iñarandu. Haʼe ndoipotái ñaaprende mbaʼeve ñande kostíllare ni jajapo umi mbaʼe ñandeperhudikátava ha ñambyasýtava upéi. Upévare “Ñandejára oñongatu voi pe arandu omeʼẽ hag̃ua umi oñehaʼãvape ojapo iporãva” (Prov. 2:7). Jarrespetáramo Jehovápe, jajaposéta chupe ogustáva, jasegíta ikonsého ha upéva ñanembovyʼáta (Sant. 1:25).

16. Alan orrespeta Jehovápe, ¿mbaʼéichapa upéva oipytyvõ chupe odesidi porã hag̃ua ha mbaʼépa ohupyty upévare?

¹⁶ Jahechamína mbaʼéichapa odesidi porã vaʼekue Alan orrespeta rupi Jehovápe ipyʼaite guive. Alan ningo peteĩ ansiáno ombaʼapóva de profesór peteĩ eskuélape. Haʼe heʼi: “Heta oĩ che kompañerokuéra de traváho opensáva umi pelíkula pornográfika ikatuha ojepuru oñemboʼe hag̃ua umi alúmnope oñeñeʼẽ jave rrelasión sexuál rehe”. Péro Alan oikuaa ndasiertoiha upéva. Haʼe heʼi: “Ahayhu ha arrespeta rupi Jehovápe derechoite voi haʼe ndahechamoʼãiha umi pelíkula ha aexplika mbaʼérepa umi ótro profesórpe”. Péicha haʼe osegi pe konsého oúva pe ‘arandu añeteguávagui’ heʼíva: “Eguata pe tape nepytyvõtavare neentendído hag̃ua” (Prov. 9:6). Unos kuánto profesór ohecharamoiterei Alan odesidíva ha upévare koʼág̃a ostudia hikuái la Biblia ha oho rreunionhápe.

17, 18. ¿Mbaʼe vendisiónpa ohupytýma umi oasepta vaʼekue pe “arandu” invitasión, ha mbaʼépa ohaʼarõ chupekuéra? (Ehecha pe taʼanga).

¹⁷ Jehová omoĩ pe ehémplo oñeʼẽva umi mokõi kuñáre ohechauka hag̃ua ñandéve mbaʼépa jajapo vaʼerã javyʼa hag̃ua. Umi oaseptáva pe “kuña naiñarandúiva” invitasión oimoʼã ovyʼataha oikóramo hekovai. Péro ndohechakuaái hikuái mbaʼeichaitépa ikatu operhudika chupekuéra amo gotyove umi mbaʼe ojapóva koʼág̃a. Amo ipahápe, haʼekuéra ohóta “opyta pe Sepultúrape” (Prov. 9:13, 17, 18).

¹⁸ Idiferentete la ohaʼarõva umi oaseptávape pe “arandu añeteguáva” invitasión. Haʼekuéra ovyʼa pórke oreko entéro mbaʼe oikotevẽva osegi hag̃ua oñemoag̃ui Jehováre (Is. 65:13). Proféta Isaías rupive Jehová heʼi ñandéve: “Pehendu porãkena la haʼéva ha peʼu umi tembiʼu iporãva. Peʼúrõ umi tembiʼu héva, pehecháta mbaʼeichaitépa pevyʼa” (Is. 55:1, 2).  Peichaite hína, ñande ñaaprende jahayhu hag̃ua umi mbaʼe Jehová ohayhúva ha ndajachaʼéi hag̃ua umi mbaʼe Jehová ndochaʼéivare (Sal. 97:10). Avei javyʼa pórke ikatu ñainvita ótrope oikuaa hag̃ua pe ‘arandu añetegua’. Ñande jajogua umi sirviénta oñemensionávape Provérbiospe. Haʼekuéra oho “oñemoĩ umi lugár ijyvatevehárupi pe siudápe” ha heʼi: “Oimeraẽ ndoikuaáiva mbaʼeve, tou koʼápe”. Ñande ha entéro umi oaseptáva pe invitasión ñasẽ porãta koʼág̃a, ha amo gotyove avei pórke ikatúta jaiko pára siémpre jasegíramo ‘jaguata pe tape ñanepytyvõtavare ñaneentendído hag̃ua’ (Prov. 9:3, 4, 6).

19. Heʼiháicha Eclesiastés 12:13, 14, ¿mbaʼépa jajedesidi vaʼerã jajapo? (Ehecha avei pe rrekuádro “ ¿Mbaʼépa jahupyty jarrespeta rupi Jehovápe?”).

¹⁹ (Elee Eclesiastés 12:13, 14). Ñande ningo jaiko koʼã ára paha ijetuʼuetévape, péro jasegise jarrespeta Jehovápe ñande pyʼaite guive. Upéva ñandeprotehéta ha ñanepytyvõta ñanderekopotĩ hag̃ua ha jasegi hag̃ua Jehová ykére. Ñande pyʼaite guive jahayhu ha jarrespetágui Jehovápe jasegíta ñainvita opa ikatúvape oaprende hag̃ua pe ‘arandu añetegua’.