PE SEGUNDA gérra mundiál aja, che túa umíva osẽ vaʼekue Estóniagui ha oho Alemániape, ha upépe che anase. Upéi rova Canadápe, primeroite roiko ag̃ui peteĩ siuda héravagui Ottawa. La ore róga ningo michĩ ha upe lugárpe oĩ vaʼekue heta ryguasu, upéicha rupi roreko vaʼekue ryguasu rupiʼa rorambosa hag̃ua oremboriahúramo jepe.

Peteĩ díape umi testígo de Jehová olee che sýpe Apocalipsis 21:3, 4, ha upéva opokoitereígui hese oñepyrũ hasẽ. Che túa ha che sy ostudia la Biblia, pyaʼeterei oprogresa ha oĩma hikuái ojevautisa hag̃uáicha.

Che tuakuéra noñeʼẽporãiramo jepe ingléspe, lomímonte ikyreʼỹ oservi hag̃ua Jehovápe. Papa oreguerahámi predikasiónpe haimete káda sábado chéve ha che ermána menór, Sýlviape, oimérõ jepe ombaʼapo raʼe tódo el pyhare. Haʼe ombaʼapo vaʼekue peteĩ fávrika oñemboykuhápe níkel, opytáva Sudbury, Ontáriope. Káda semána rostudia vaʼekue pe Ñemañaha en família. Mama ha papa chemboʼe vaʼekue ahayhu hag̃ua Jehovápe, ha upéva chemomýi ajevautisa hag̃ua 1956-pe arekópe 10 áño. Apensa jave mbaʼeichaitépa haʼekuéra ohayhu vaʼekue Jehovápe, chekyreʼỹve asegi hag̃ua aservi Jehovápe.

Atermina rire che koléhio saʼive añekonsentra Jehová servísiore. Apensa oikóramo chehegui prekursór nakumplimoʼãiha pe suéño arekóva aviahávo aviónpe ha aikuaa ko múndo. Atopa che travahorã peteĩ estasión de rrádiope amoĩhápe umi dísko de músika. Ko traváho chegustaiterei vaʼekue, péro aju ambaʼapo káda kaʼaruete, upévare afalta meme rreunionhápe ha ajeheʼa vaʼekue umi ndohayhúivare Jehovápe. Péro upéi umi mbaʼe aaprende vaʼekue la Bíbliagui chemomýi akambia hag̃ua.

Upéi ava Oshawa, Ontáriope. Upépe aikuaa Ray Nórmanpe, iñermána Léslipe ha ótro prekursorkuérape. Haʼekuéra cherresivi porã ha ahechávo mbaʼeichaitépa ovyʼa hikuái añepyrũ apensa mbaʼépa ajapóta che rekovégui. Haʼekuéra chemokyreʼỹ ajapo hag̃ua che prekursorádo ha añepyrũ septiembre de 1966-pe. Upe tiémpope avyʼaiterei péro oikóta kuri derrepentete peteĩ mbaʼe okambiaitétava che rekove.

Aĩ aja gueteri koléhiope, akompleta kuri che solisitu aha hag̃ua Betel de Canadápe oĩva Toróntope. Upéi añepyrũ ajapo che prekursorádo rregulár  ha añeinvita aservi hag̃ua Betélpe 4 áñore. Chéve chegusta vaʼekue Lesli ha upévare akyhyje aaseptáramo ko invitasión ndahechavéirõ g̃uarã chupe. Añemboʼe heta rire aasepta pe invitasión, péro ambyasyeterei ajedespedi haguére Lésligui.

Ambaʼapo vaʼekue lavanderíape Betélpe ha upe rire kómo sekretário. Upe aja Lésligui oiko prekursóra espesiál Gatineau, Quebécpe. Pyʼỹinte apensa vaʼekue hese ha añeporandu adesidi porãpa raʼe. Upéi oiko peteĩ mbaʼe chesorprende ha chembovyʼáva. Ray, Lesli ermánope oñeinvita Betélpe ha oiko chugui che kompañéro de avitasión. Upéva rupive ikatu añeʼẽ jey Lesli ndive. Romenda el 27 de febrero de 1971, pe día opahápe che asignasión de 4 áño.

Lesli ha che roñeasigna roservi hag̃ua peteĩ kongregasión francéspe, Quebécpe. Arekópe 28 áño añeinvita aservi hag̃ua de superintendénte de sirkuíto. Upévango chesorprende, pórke chemitãiti ha apensa saʼi chexperiensiaha. Péro chemokyreʼỹeterei la heʼíva Jeremías 1:7, 8. Péro oĩ kuri álgo orepreokupáva, Lesli oñaksidenta vaʼekue unas kuánta vése áutope, ha upévare ijetuʼu chupe oke hag̃ua. Upéicha rupi ropensa ndaikatumoʼãiha rokumpli porã ore asignasión pe sirkuítope. Péro Lesli heʼi: “Jehová ñaneinvitárõ jajapo hag̃ua álgo, ¿mbaʼére nañatanteái jepe?”. Roasepta la asignasión ha roservi vyʼápe 17 áñore pe sirkuítope.

Aservírõ guare de superintendénte heta cherembiapo ha nachetiempoguasúi Léslipe g̃uarã. Upérõ guare aaprende vaʼerã gueteri álgo. Peteĩ lunes pyharevete ipu pe tímbre, aavri pe okẽ ha ndaipóri avave, atopánte peteĩ kanásto ha pype oĩ mantél, frúta, kesu, pan, peteĩ votélla de víno, váso ha peteĩ nóta heʼíva: “Eho ejepasea ne rembirekóndi”. Upe día ningo iporãiterei ha kuarahy porã voi, péro haʼe Léslipe ndaikatumoʼãiha aha pórke areko heta diskúrso aprepara vaʼerã. Haʼe ontende upéva péro ombyasy avei. Ahávo aguapy che eskritóriope che konsiénsia chemolesta, apensa la heʼívare Efesios 5:25, 28-pe. Upe téxto rupive Jehová chepytyvõ apensa hag̃ua che rembireko oñandúvare. Añemboʼe rire, haʼe Léslipe roho hag̃ua ha haʼe ovyʼaiterei. Amaneha rog̃uahẽ meve peteĩ lugár iporãitereívape, opytáva rrío oríllape, upépe roipyso ore mantél ha rohasa oñondive peteĩ día ijojahaʼỹva. Hiʼarive hemby jey kuri chéve tiémpo aprepara hag̃ua umi diskúrso.

Heta rovyʼa rovisitávo umi kongregasión oĩva Columbia Británica guive Terranova peve. Péicha aviahaháre aiko ha oñekumpli la che suéño. Chemanduʼa apensa hague pe eskuéla de Galaad rehe péro ndaserviséi kuri ótro paíspe. Apensa kuri ndavalemoʼãiha misionerorã, ha akyhyje avei añemondórõ g̃uarã peteĩ país oĩháme heta mbaʼasy ha gérra Áfricape. Legálmente avyʼaiterei kuri Canadápe.

Áño 1992-pe ikatúma ojeadora Jehovápe lívremente unos kuánto país oĩ vaʼekuépe Unión Soviéticape. Upérõ oñeporandu oréve ndorohoséipa roservi de misionéro Estóniape. Norohaʼarõiete kuri pe invitasión, upévare heta roñemboʼe Jehovápe. Ha upéi roʼe jey: “Jehová ñaneinvitárõ jajapo hag̃ua álgo, ¿mbaʼére nañatanteái jepe?”. Upe rire roasepta pe asignasión ha chemanduʼa avyʼa hague ndahaʼéi haguére Áfricape la rohótava.

Ensegidamínte voi roñepyrũ roaprende estonio. Ha unos kuánto mése roĩ haguépe upe paíspe, roñeinvita roservi hag̃ua de superintendénte de sirkuíto. Otoka oréve rovisita 46 kongregasión ha grúpo Letonia, Estonia, Lituania ha Kaliningrado Rúsiape. Upévare tekotevẽ kuri roaprendeʼimi koʼã idióma: Letón, lituano ha ruso. Upéva ijetuʼueterei kuri oréve, péro umi ermáno oreguerohory roñehaʼã haguére ha heta orepytyvõ. Áño 1999-pe ojeavri peteĩ sukursál Estóniape, ha añenombra miémbro del Komite koʼã ermánondi: Toomas Edur, Lembit Reile ha Tommi Kauko.

Roju roikuaa heta ermáno ojegueraha vaʼekuépe Sibériape. Haʼekuéra heta ohasa asy kuri kárselpe, mombyry ihentekuéragui. Upéicharõ jepe noñamargái hikuái ha siémpre ovyʼa ha ikyreʼỹ predikasiónpe. Upéva oremboʼe ore avei ikatuha rosegi rovyʼa ha roaguanta oimehaichagua situasión.

Heta áñore rombaʼapo jejopy ore servísiope, ha noroñembolívrei ropytuʼu porã hag̃ua. Upémarõ Lesli ou ikaneʼõ rasa. Upe tiémpope ndoropillái kuri haʼe ikaneʼõitereiha oikóvo oreko rupi raʼe peteĩ mbaʼasy hérava fibromialgia. Roñepyrũ ropensa porã nokonveníripa oréve roho jeýnte Canadápe. Ha kavalete roñeinvita roho hag̃ua Páttersonpe pe Eskuéla umi oĩvape pe Komite de Sukursálpe ha hembirekópe g̃uarã, péro apensa ndaikatumoʼãiha roho. Heta roñemboʼe rire, roasepta pe invitasión ha Jehová ovendesi ore desisión, pórke roĩ aja ko eskuélape oñemeʼẽ Léslipe pe tratamiénto oikotevẽva ha upéicha rupi roho jey rokontinua ore servísio.

Roĩ jey riréma Estóniape, áño 2008-pe, peteĩ pyharépe añehenói por teléfono pe sentrál mundiálgui. Upérõ oñeporandu chéve noroñanimáipa roho roservi Congo, Áfricape. Añesorprendete kuri, pórke al día sigienterã oipotáma hikuái rokontesta. Upe pyhare namombeʼúi mbaʼeve Léslipe ikatu hag̃uáicha oke, péro che tódo el pyhare añemboʼe ha amombeʼu Jehovápe mbaʼérepa la akyhyje aha hag̃ua Áfricape.

Al día sigiénte roñemongeta Lesli ndive ha roʼe: “Jehová ñaneinvita jaha hag̃ua Áfricape, ¿mbaʼéicha piko jaʼéta ndaikatumoʼãiha jaha ha nañandegustamoʼãiha nañatanteáiramo?”. Péicha 16 áño roservi haguépe Estóniape roho Kinshasa, República Democrática del Cóngope. Pe sukursál oreko kuri peteĩ hardín iporãitereíva ha trankiloite reĩ upépe. Primeroite voi Lesli omoĩ ore kotýpe peteĩ tarhéta rorekóva rosẽ ypy guive Canadágui.  Pe tarhétare heʼi: “Ndepotýkena nemoĩhápente hikuái”. Upe rire rohechakuaa rovyʼataha upépe, pórke rojúma roikuaa umi ermánope, romoñepyrũ kúrso bíblico, ha rohecha umi mbaʼe porã rohupytýtava roservívo de misionéro. Kon el tiémpo roñeasigna rovisita hag̃ua umi sukursál ha roreko la priviléhio rohóvo 13 paíspe oĩva Áfricape. Rojapokuévo koʼã visíta rohecha umi lugár neporãva ha roikuaa avei heta ermáno diferénte lugarpegua. Upe tiémpope g̃uarã ja ndakyhyjevéima aĩ haguére Áfricape, ha roagradese Jehovápe oremondo haguére upépe.

Cóngope umi ermáno oreinvita roʼu hag̃ua diferénte kláse tembiʼu, por ehémplo roʼu hag̃ua vichoʼi jepe. Núnka napensáiva roʼukuaataha umíva, péro rohechávo ogustaitereiha umi ermánope, rotantea ha oregustaiterei avei.

Avei roviaha éste gotyo upe paíspe romokyreʼỹ hag̃ua umi ermánope ha rogueraha hag̃ua provísta chupekuéra. Umi sónape oĩ umi grúpo gerrilléro oatakáva umi puévlope ha olastimáva umi kuñáme ha mitãme. La majoría umi ermáno imboriahu, péro roñesorprende rohechávo mbaʼeichaitépa ojerovia hikuái pe rresurreksiónre, ohayhu Jehovápe ha iñeʼẽrendu iñorganisasiónpe. Pe ehémplo porã omoĩva hikuái oremopensa mbaʼérepa ore roservi Jehovápe ha omombarete ore jerovia hese. Unos kuánto umi ermáno operde kuri hóga ha iplantasión. Upéva chemomanduʼa ikatuha japerde pyaʼeterei ñande kosakuéra, ha upévare la iñimportantevéva hína ñane amista Jehovándi. Koʼã ermáno ohasáramo jepe heta mbaʼe ijetuʼúva ndoikói ojeplagea. Upéva oremokyreʼỹ rombohovái hag̃ua pyʼaguasúpe umi mbaʼe ijetuʼúva oñepresentáva oréve ha ore mbaʼasykuéra.

Rohaʼarõʼỹetére jey rorresivi ótra asignasión. Ojejerure oréve roho hag̃ua roservi pe sukursál de Hong Kóngpe. Núnka noropensáiva rohotaha roiko Ásiape, péro ko vuéltape ni ndorodudái roho hag̃ua pórke Jehová hetáma orepytyvõ umi ótra asignasiónpe. Upévare, áño 2013-pe oreresay ore rováre rojedespedi ore amigokuéragui ha roheja umi lugár porãite oĩva Áfricape roikuaaʼỹre mbaʼépa la oreraʼarõva.

 Hong Kong peteĩ siuda oikohápe hetaiterei hénte oúva opáguio ládo. Upévare rovárõ guare upépe tuichaiterei la kámbio oréve g̃uarã. Avei roaprende vaʼerã chino cantonés ha upéva ijetuʼu oréve. Péro umi ermáno orerresivi porã ha oregustaiterei la tembiʼu upepegua. Betélpe heta hetave ohóvo la traváho, péro hepyeterei upérupi umi terréno. Upévare pe Kuérpo Governánte ohechauka iñaranduha odesidívo oguerovataha pe sukursál ha ovendetaha la majoría umi propieda. Upe riremínte áño 2015-pe rova Corea del Súrpe ha upépe roservi koʼág̃a peve. Koʼápe ijetuʼu jey oréve la idióma ha heta gueteri ofalta oréve roñeʼẽ porã hag̃ua, péro rovyʼaiterei pórke umi ermáno heʼi oréve romehoraha rohóvo.

Ndahaʼéi ningo la ifasilpáva ñakonsegi hag̃ua ñane amígo pyahurã, péro roaprendéma pyaʼeve ikatuha jaikuaa umi ermánope ñande voi ñainvitávo chupekuéra ñande rógape. Rohechakuaa umi ermáno amo ipahápe ojojoguapaha ha Jehová ñandeapo porãiterei hague ikatu hag̃uáicha jahayhu hetavépe ñane korasõ mbytete guive (2 Cor. 6:11).

Roaprendéma roasepta vaʼerãha entéro héntepe Jehová ojapoháicha. Avei rohecha tekotevẽha jaheka umi pruéva ohechaukáva Jehová ñanderayhuha ha ñandegiaha. Sapyʼánte roñedesanima mimi vaʼekue ha roduda la orerayhúpa hína umi ermáno, péro péicha jave rolee jey umi kárta ha tarhéta omeʼẽ vaʼekue oréve ore amigokuéra oremokyreʼỹ hag̃ua. Rohechakuaa Jehová okontesta hague ore ñemboʼe ha omeʼẽ hague oréve la fuérsa roikotevẽva.

Koʼã áño ohasa vaʼekuépe, Lesli ha che roaprendéma orerembiapo hetáramo jepe iñimportanteha romboyke la rojapóva rohasa hag̃ua tiémpo oñondive. Rohechakuaa avei tekotevẽha japuka ñandejehe ñaaprende jave peteĩ idióma pyahu. Rojepokuaa avei káda pyhare oremanduʼa peteĩ mbaʼe oregusta vaʼekuére ha roagradese Jehovápe upévare.

Núnka napensáiva ikatúta hague aservi de misionéro térã aikóta hague ótro paíspe. Péro ahechakuaa Jehová ñanepytyvõ rupi ikatuha jajapo opa mbaʼe ha upéva chembovyʼaiterei. Apensa proféta Jeremías opensa haguéicha heʼírõ guare: “Jehová, nde ningo chembotavy” (Jer. 20:7). Jehová hetáma oresorprende ha omeʼẽ oréve umi vendisión norohaʼarõietéva, chéko che suéño vaʼekue aviaha aviónpe ha upéva entéro okumplíma chéve Jehová. Chemitãme napensái vaʼekue aviahataha hetaiterei lugárpe la ajapóma haguéicha, por ehémplo rojapóma umi visíta de sukursál 5 kontinéntepe. Aagradese che pyʼaite guive Léslipe, pórke entéro umi che asignasiónpe haʼe cheapoja ha ipositíva.

Siémpre roñehaʼã oremanduʼa rojapoha entéro mbaʼe rohayhúgui Jehovápe. Umi vendisión jarresivíva koʼág̃a ohechauka mbaʼeichaitépa javyʼáta ág̃a jaiko vove pára siémpre, pórke upépe Jehová ‘oavríta ipo ha omeʼẽta entérope opa mbaʼe oipotáva’ (Sal. 145:16).