1, 2. Ohechaukaháicha Deuteronomio 10:20, ¿mbaʼépa jajapo vaʼerã oiko hag̃ua ñandehegui Jehová amígo?

 OÑEPORANDÚRÕ ñandéve mbaʼépa ñanepytyvõta jajogueraha porã hag̃ua peteĩ ñane amigoiténdi, ¿mbaʼépa jaʼéne? Ikatu oime ñapensa tekotevẽha jajoayhu ha ñañopytyvõ, péro provávlemente ndajaʼemoʼãi tekotevẽha jakyhyje ojuehegui. Péro ohechaukaháicha pe téxto ko artíkulope g̃uarã, ikatu hag̃uáicha Jehová ñandeguerohory ha imbarete hag̃ua ñane amista hendive tekotevẽ jakyhyje chugui (elee Deuteronomio 10:20).

² Ikatu oime aréma jaservi hague Jehovápe térã ramoite guivénte, péro tahaʼe haʼeháicha enterovénte jakyhyje vaʼerã Jehovágui hendaitépe. ¿Péro mbaʼépa heʼise jakyhyje Jehovágui? ¿Mbaʼépa ñanepytyvõta jakyhyje hag̃ua chugui hendaitépe? ¿Ha mbaʼe ehémplopa oheja ñandéve pe majordómo Abdías, pe saserdóte Jehoiadá ha rréi Jehoás?

3. Emombeʼu mbaʼépa ñanemongyhyje jepi ha mbaʼéichapa upéva ikatu ñandeprotehe.

³ Entéronte jakyhyje jahechakuaávo álgo ikatuha ñandeperhudika. Ha legálmente ndaivaíri jakyhyje péicha, pórke upéva ñanepytyvõkuaa jadesidi porã hag̃ua. Por ehémplo jakyhyjégui jaʼáramo g̃uarã peteĩ sánhape, ndajahái pe orillaitépe. Avei jakyhyjégui oikóramo g̃uarã álgo ivaíva ñanderehe ndajaikói jajapeligra rei. Ha jakyhyjégui peteĩ ñane amígo oñeñandu vaíramo g̃uarã ñande káusare, ñañatende umi mbaʼe jaʼéva ha jajapóvare.

4. ¿Mbaʼépa oipota Satanás?

⁴ Satanás oipota jaryrýi jakyhyje Jehovágui. Hiʼãiterei chupe jarovia la heʼi vaʼekue Elifaz Jóbpe: Jehová ipochyhárente voi oikoha, ñandekastigasenteha ha núnka noñekontentamoʼãiha la jajapóvare chupe g̃uarã (Job 4:18, 19). Satanás oipota jakyhyjeterei anivéma hag̃ua jajapo mbaʼeve Jehová servísiope, péro ndahaʼéi ningo péicha la jakyhyje vaʼerã Jehovágui, síno jarrespeta vaʼerã  chupe ha jakyhyje jajapórõ g̃uarã álgo ivaíva ombyaítava ñane amista hendive.

5. ¿Mbaʼépa heʼise jakyhyje Jehovágui?

⁵ Pe persóna okyhyjéva Jehovágui orrespeta Ñandejárape, ohayhu chupe ha ndojaposéi mbaʼeve ikatúva ombyai iñamista hendive. Jesús ningo orrespeta vaʼekue Ñandejárape ha péicha omoĩ ñandéve pe ehémplo iporãvéva (Heb. 5:7). Haʼe ndahaʼéi oryryipáva okyhyje Jehovágui, síno ohayhu chupe ipyʼaite guive ha ojapose umi mbaʼe haʼe omandáva (Is. 11:2, 3; Juan 14:21, 31). Jesús ojapo haguéicha, ñande avei jarrespeta ha ñamombaʼe Jehovápe ñande pyʼaite guive pórke haʼe oporohayhu, iñarandu, ihústo ha ipoderóso. Jaikuaa haʼe ñanderayhuetereiha ha oipotaha jasegi igía ha jajapo haʼe omboʼéva. Nañapenáiramo Jehováre haʼe ombyasyeterei, péro ñaneñeʼẽrendúramo chupe haʼe ovyʼaiterei (Sal. 78:41; Prov. 27:11).

6. ¿Mbaʼépa ikatu ñanepytyvõ jarrespeta hag̃ua Ñandejárape? (Salmo 34:11).

⁶ Ñande ningo ndahaʼéi ñanasérema voi jarrespetáva Ñandejárape, síno ñañehaʼã vaʼerã (elee Salmo 34:11). ¿Mbaʼépa ñanepytyvõta upearã? Ñamañávo Ñandejára rembiapokuére jahechakuaáta haʼe ipoderóso, iñarandu ha ñanderayhuetereiha, ha upéva ñanepytyvõta jarrespeta ha jahayhuve hag̃ua chupe (Rom. 1:20). Peteĩ ermána hérava Adriana b heʼi voi: “Amañávo Jehová kreasiónre chejurujái apytávo ha ahechakuaa mbaʼeichaitépa haʼe iñarandu. Upéva chekonvense haʼe oikuaaha mbaʼépa la iporãvéva chéve g̃uarã”. Heta ojepyʼamongeta rire ko mbaʼére Adriana heʼi: “Jehová ningo la omeʼẽva chéve la vída, ha ni mbaʼevéicharõ ndajaposéi mbaʼeve ikatúva chemomombyry chugui”. Ha nde, ¿ikatúpa reñemotiémpo ko semánape rejepyʼamongeta hag̃ua Jehová kreasiónre? Upéva nepytyvõta rehayhuve ha rerrespetave hag̃ua chupe (Sal. 111:2, 3).

7. ¿Mbaʼéichapa ñañemboʼéramo ñanepytyvõta jarrespeta hag̃ua Jehovápe ñande pyʼaite guive?

⁷ Jajepokuaáramo ñañemboʼe meme jarrespetavéta ñande pyʼaite guive Jehovápe. Pyʼỹi ñañemboʼéramo jaikuaa porãvéta chupe. Jahechakuaáta mbaʼeichaitépa haʼe ipoderóso jajerurévo chupe fuérsa ñaaguanta hag̃ua peteĩ pruéva. Jaagradesévo chupe Jesús sakrifísiore ñanemanduʼa mbaʼeichaitépa haʼe ñanderayhu. Ha ñañemboʼévo jajerure hag̃ua Ñandejárape igía, upéi jahechakuaáta haʼe iñaranduetereiha. Jajepokuaárõ ñañemboʼe ñanepytyvõta jarrespetave hag̃ua Jehovápe ha jajedesidíta ndajajapomoʼãiha mbaʼeve ikatúva ombyai ñane amista hendive.

8. ¿Mbaʼépa ñanepytyvõta jasegi hag̃ua jarrespeta Jehovápe?

⁸ Jasegi hag̃ua jarrespeta Jehovápe jastudia meme vaʼerã la Biblia ha ñañehaʼã jahecha mbaʼépa ikatu ñaaprende umi ehémplo iporã ha umi ivaívagui. Koʼág̃a ñañepyrũmína jahecha pe ehémplo porã oheja vaʼekue ñandéve mokõi Jehová siérvo yma guare. Umíva hína Abdías, pe oñenkarga vaʼekue rréi Acab palásiore, ha pe saserdóte Jehoiadá. Upéi ñaanalisáta la oiko vaʼekue rréi Jehoás de Judáre. Haʼe oñepyrũ porã vaʼekue, péro upéi oñemomombyry Jehovágui.

9. Abdías orrespeta vaʼekue Jehovápe, ¿mbaʼéichapa upéva oipytyvõ rakaʼe chupe? (1 Reyes 18:3, 12).

⁹ La Biblia oñepyrũvo oñeʼẽ Abdías c rehe heʼi hese ‘orrespeta ha okyhyjeterei hague Jehovágui’ (elee 1 Reyes 18:3, 12). ¿Mbaʼéichapa  oipytyvõ rakaʼe upéva Abdíaspe? Orrespeta rupi Jehovápe haʼe iñonrrádo ha haʼe vaʼekue peteĩ persóna de konfiánsa. Upéicha rupi pe rréi onombra chupe oñenkarga hag̃ua pe palásiore (ekompara Nehemías 7:2 heʼívare). Avei Abdías orrespeta rupi Jehovápe ipyʼaguasueterei. ¿Ifáltapa kuri upéva upe tiémpope? Si, pórke Abdías oiko vaʼekue pe rréi Acab iñañaitéva ogovernaha tiémpope. La Biblia heʼi voi ko rréi ojapo hague “hetave mbaʼe ivaíva Jehová renondépe enterove umi ótro oĩ vaʼekuégui haʼe mboyve” (1 Rey. 16:30). Hiʼarive Acab omenda vaʼekue Jezabel rehe, ko rréina oadora vaʼekue Baálpe ha ndaijaʼeiete Jehováre. Upévare oñehaʼã vaʼekue anivéma hag̃ua avave oadora Jehovápe umi 10 trívu de Israélpe. Ha ivaiveha Jezabel ojukauka vaʼekue heta Ñandejára profétape (1 Rey. 18:4). Péicha jahecha Abdías oservi hague Jehovápe peteĩ tiémpo ipeligrosoitereívape.

10. ¿Mbaʼéichapa Abdías ohechauka vaʼekue ipyʼaguasuetereiha?

¹⁰ ¿Mbaʼérepa ikatu jaʼe Abdías ipyʼaguasueterei hague? Jezabel oñepyrũrõ guare opersegi umi profétape ojukauka hag̃ua chupekuéra, Abdías ‘omokañy 100 Jehová profétape, omokañy 50 peteĩ kuévape ha 50 ótro kuévape, ha osegi omeʼẽ chupekuéra pan ha y’ (1 Rey. 18:13, 14). Ñapensamíntena mbaʼépa ojapo vaʼerãmoʼã Jezabel opillárire Abdíaspe. Katuete ojukáta kuri chupe. Ha Abdías peteĩ persóna ñandeichaguánte avei, upévare oiméne okyhyje raʼe ha nomanoséi. Péro Abdías ohayhueterei Jehovápe ha isiervokuérape, upévare oĩ vaʼekue omano hag̃uáicha jepe hesehapekuéra.

11. ¿Mbaʼéichapa Jehová siervokuéra koʼag̃agua osegi Abdías ehémplo? (Ehecha pe taʼanga).

¹¹ Koʼág̃arupi oĩ heta oservíva Jehovápe oikóva umi país ojeproivihápe ojeadora Jehovápe. Abdías ojapo haguéicha, koʼã ermáno osegi orrespeta umi governántepe péro omeʼẽ Ñandejárape la okorrespondéva chupe ha ndohejái mbaʼeve ojoko chupekuéra oadora hag̃ua Jehovápe añoite (Mat. 22:21). Koʼã ermáno ohechauka orrespetaha Ñandejárape iñeʼẽrendúvo chupe umi governantekuérape rangue (Hech. 5:29). Upévare osegi opredika ha oñembyaty hikuái kañyháme (Mat. 10:16, 28). Avei oñenkarga entéro umi ermanokuéra osegi hag̃ua orresivi la oikotevẽva omombarete hag̃ua ijerovia. Jahechamína Henri ehémplo. Haʼe oiko Áfricape peteĩ país ojeproivi haguépe  ñandehegui ñane rembiapo peteĩ tiémpore. Upérõ guare Henri ojeofrese vaʼekue omog̃uahẽ hag̃ua ermanokuérape umi puvlikasión bíblica. Haʼe heʼi: “Legálmente che cheotĩeterei, upévare aĩ segúro arrespetaiterei haguére Jehovápe la chepyʼaguasu hague”. ¿Ikatúta piko ñande avei ñandepyʼaguasu péicha? Ikatúta la ñañehaʼãrõ jarrespeta Jehovápe ñande pyʼaite guive.

12. ¿Mbaʼéichapa pe saserdóte Jehoiadá ha hembireko ohechauka ifiél hague Jehovápe?

¹² Pe saserdóte Jehoiadá orrespeta vaʼekue Ñandejárape ipyʼaite guive, upévare ifiél vaʼekue chupe ha oipytyvõ avei ótrope oadora hag̃ua Jehovápe. Jahechamína mbaʼéichapa ojapo vaʼekue upéva Jehoiadá. Jezabel membykuña hérava Atalía ojupi vaʼekue ogoverna Judápe nokorrespondéiramo jepe chupe. Entéro umi hénte okyhyjepa vaʼekue Atalíagui pórke haʼe iñañaiterei. Omandaseterei rupi ojukapase vaʼekue pe rréi familiarépe haʼéva inietokuéra, pórke upéicharõ haʼe añoite opytáta ogoverna hag̃ua (2 Crón. 22:10, 11). Péro Jehoiadá rembireko hérava Jehosabeat osalva Jehoáspe, haʼéva peteĩva pe rréi familiare. Jehosabeat ha iména oreko kuri kañyháme upe mitãme ha oñangareko hese. Péicha oipytyvõ hikuái ani hag̃ua oñehundipa David familiare, ha oĩ hag̃ua peteĩ ikatútava upéi ojupi de rréi. Jehoiadá ohechauka ifielha Jehovápe ha ndopytái oryrýi osusũ okyhyjégui Atalíagui (Prov. 29:25).

13. Jehoás orekórõ guare 7 áño, ¿mbaʼéichapa Jehoiadá ohechauka jey vaʼekue ifielha Jehovápe?

¹³ Jehoás orekórõ guare 7 áño, Jehoiadá ohechauka jey vaʼekue ifielha Jehovápe. Upérõ guare okalkula porã la ojapótava, ha osẽ porãrõ chupe la iplán Jehoásgui oikóta rréi. Jehoás ningo David familiare ha upévare okorresponde chupe ogoverna. Péro nosẽirõ Jehoiadápe la okalkula haguéicha, katuete ojejukáta kuri chupe. ¿Mbaʼépa oiko upéi? Jehová vendisión rupive osẽ porãmbaite la ojekalkula vaʼekue. Entéro umi levita ha umi omoakãva ituakuéra ypykue familiarépe oapoja Jehoiadápe, ha haʼe onombra rréi Jehoáspe ha omanda ojejuka hag̃ua Atalíape (2 Crón. 23:1-5, 11, 12, 15; 24:1). “Upe rire Jehoiadá ojapo peteĩ kompromíso Jehovándi, pe rréi ha pe puévlo ndive haʼekuéra osegitaha Jehová puévloramo” (2 Rey. 11:17). Avei Jehoiadá “omoĩ guárdia umi okẽme opyta hag̃ua oñatende umi okẽ oĩvape Jehová rógape, ani hag̃ua oike upépe ni peteĩ ikyʼáva” (2 Crón. 23:19).

14. ¿Mbaʼéichapa oñemombaʼe vaʼekue Jehoiadápe haʼe voi omombaʼe haguére Jehovápe?

¹⁴ Ymaitereíma Jehová heʼi hague: “Amombaʼéta umi chemombaʼévape”. Ha upeichaite ojapo vaʼekue Jehoiadá kásope (1 Sam. 2:30). Por ehémplo oñenkarga vaʼekue ojeskrivi hag̃ua Iñeʼẽ la Bíbliape umi mbaʼe porã ojapo vaʼekue pe saserdóte Jehoiadá ikatu hag̃uáicha ñande ñaaprende chugui (Rom. 15:4). Ha Jehoiadá omanórõ guare ojejapo álgo espesiál oñemombaʼe hag̃ua chupe. Oñeñotỹ Jehoiadápe “oñeñotỹháme umi rréi, pórke haʼe ojapo vaʼekue heta mbaʼe iporãva Israélpe, Ñandejára tee rehehápe ha Ñandejára róga rehehápe” (2 Crón. 24:15, 16).

15. ¿Mbaʼépa ikatu ñaaprende Jehoiadá istóriagui? (Ehecha pe taʼanga).

¹⁵ Jehoiadá istória ñanepytyvõ ikatu hag̃uáicha jarrespetave Ñandejárape. Umi ansiáno ikatu osegi Jehoiadá ehémplo ohechávo siémpre mbaʼéichapa ikatu oprotehe pe kongregasiónpe (Hech. 20:28). Umi ermáno ijedáva ikatu oaprende osegíramo orrespeta Ñandejárape ha ifiél chupe, haʼe nomboykemoʼãiha chupekuéra síno ojevaletaha hesekuéra okumpli hag̃ua ivolunta. Umi imitãva ikatu ojesareko  Jehová otrata lájare Jehoiadápe ha oñehaʼã avei péicha omombaʼe umi ermáno ijedávape, koʼýte umi heta áñorema oservíva Jehovápe (Prov. 16:31). Ha amo ipahápe enterovéva ikatu jasegi pe ehémplo porã oheja vaʼekue umi levita ha umi omoakãva ituakuéra ypykue familiarépe. Haʼekuéra oapoja vaʼekue Jehoiadápe, ñande avei ikatu jajapo upéicha ‘ñaneñeʼẽrendúvo umi ñandegiávape’ (Heb. 13:17).

16. ¿Mbaʼéichapa rréi Jehoás ohechauka odepende hague ótrore ojapo hag̃ua iporãva?

¹⁶ Jehoás imitãrõ guare “ojapo meme vaʼekue iporãva Jehová renondépe” pórke Jehoiadá oipytyvõ chupe (2 Rey. 12:2). Péro Jehoiadá omano rire, Jehoás oñepyrũ opena la heʼívare umi prínsipe de Judá omboyke vaʼekue Jehovápe. Upéicha rupi Jehoás ha pe puévlo “oñepyrũ oservi umi póste sagrádo ha umi dios raʼangápe” (2 Crón. 24:4, 17, 18). Jehová ombyasyetereíramo jepe la oikóva, ‘haʼe osegi omondo hendapekuéra umi profétape, ogueru jey hag̃ua chupekuéra Jehovápe, péro haʼekuéra nohenduséi’. Umi hénte nopenái vaʼekue ni Jehoiadá raʼy Zacaríasre, haʼéva proféta, saserdóte ha pe rréi Jehoás prímo. Upéi katu oiko álgo ivaietereíva, Jehoás ojukauka Zacaríaspe, ha ni noimportái chupe la Zacarías família osalva hague chupe. ¡Ajépa imalagradesidoite rakaʼe Jehoás! (2 Crón. 22:11; 24:19-22).

17. ¿Mbaʼépa oiko upéi Jehoásgui?

¹⁷ Jehoás ou ndokyhyjevéi Ñandejáragui, upévare haʼe osẽ vaieterei kuri. Jehová heʼi vaʼekue voi: “Umi chedespresiávape katu che adespresiáta” (1 Sam. 2:30). Kon el tiémpo peteĩ ehérsito sirio ou Jehoás kóntrape, ha  ko ehérsito “orekóramo jepe saʼieterei soldádo” ogana Jehoás ehérsitope tuichaitereíramo jepe, upevakuére Jehoás “opyta kuri hasyete”. Umi sirio oho jey rire, Jehoás siervokueraite voi ojuka chupe, pórke haʼe ojuka vaʼekue Zacaríaspe. Jehoás iñañaiterei haguére “noñeñotỹi chupe umi rréi sepultúrape” (2 Crón. 24:23-25). d

18. Heʼiháicha Jeremías 17:7, 8, ¿mbaʼépa jajapo vaʼerã ani hag̃ua jajogua Jehoáspe?

¹⁸ ¿Mbaʼépa ikatu jajapo ñaaprende hag̃ua la oiko vaʼekuégui Jehoás rehe? Haʼe ojogua kuri peteĩ yvyramáta ndahapopypukúivape oikotevẽva peteĩ estáka ani hag̃ua ou hoʼa. Jaʼe porãsérõ g̃uarã pe estáka kuri Jehoiadá, ha haʼe omanórõ guare Jehoás oñepyrũ ohendu umi oheja vaʼekuépe Jehovápe, ha amo ipahápe naiñeʼẽrenduvéima Ñandejárape. Péicha ñaaprende ñaneñeʼẽrendu hag̃ua Jehovápe ndaikatuiha ñadepende ñane hentekuéra térã ermanokuérarente. Ani hag̃ua jaheja Jehovápe tekotevẽ jahayhuve ha jarrespetave chupe, ha upearã jastudia, jajepyʼamongeta ha ñañemboʼe meme vaʼerã (elee Jeremías 17:7, 8; Col. 2:6, 7).

19. ¿Mbaʼépa ojerure Jehová ñandehegui?

¹⁹ Jehová ndojeruréi ñandehegui mbaʼeve ndaikatumoʼãiva jajapo. La haʼe oipotáva ñande ñakumpli oñemombeʼu porã Eclesiastés 12:13-pe. Upépe heʼi: “Rerrespeta vaʼerã Ñandejárape ha ejapo imandamiénto heʼíva. Péva hína pe ovligasión entéro persóna orekóva”. Jarrespetáramo Jehovápe ñande pyʼaite guive ikatúta jagueropuʼaka entéro situasión ijetuʼúva oñepresentáva ñandéve, ha jasegíta ñandefiél Jehovápe ojapo haguéicha Abdías ha Jehoiadá. Upéicha ndaiporimoʼãi mbaʼeve ikatútava ombyai ñane amista Ñandejárandi.