La Biblia nomombeʼúi derechoite mbaʼérepa. Péro si omensiona unos kuánto detálle ohechaukáva mbaʼérepa provávlemente odesidi hikuái upéva.

Peteĩ ánhel heʼírõ guare Maríape hyeguasutaha, María ha José oiko hína kuri peteĩ siuda héravape Nazaret, opytáva Galiléape (Luc. 1:26-31; 2:4). Tiémpo rire, José ha María oĩ kuri Egíptope, ha osẽrõ guare upégui oho jey vaʼekue hikuái Nazarétpe. Upépe Jesús okakuaa vaʼekue, ha oiko chugui Nazareno (Mat. 2:19-23). Upévare ou ñandéve ñane akãme pe siuda Nazaret ñañeʼẽvo Jesús, José ha Maríare.

María ningo oreko vaʼekue peteĩ ipariénte hérava Elisabet oikóva Judápe. Elisabet haʼe vaʼekue pe saserdóte Zacarías rembireko ha Juan el Bautista sy (Luc. 1:5, 9, 13, 36). María ningo oho vaʼekue ovisita Elisabétpe ha opyta upépe tres mésere. Upe rire María oho jey Nazarétpe (Luc. 1:39, 40, 56). Upévare jaʼekuaa María oikuaáma hague voi Judá território.

Tiémpo rire José oviaha vaʼekue Belénpe, pórke umi rrománo oguenohẽ peteĩ léi heʼíva ‘enterovéva oñeanota vaʼerãha’ ivállepe. Belénpe oñehenói vaʼekue avei ‘David válle’ ha ojeprofetisa upépe onasetaha pe Mesías (Luc. 2:3, 4; 1 Sam. 17:15; 20:6; Miq. 5:2). Jesús onase rire, José oiméne opensa vaʼekue ikuentavetaha opytánte hikuái oiko Belénpe, ani hag̃ua María oviaha puku imembyraʼy reheve. Belén ningo opyta vaʼekue 9 kilómetronte Jerusaléngui, upévare ifasilvéta kuri chupekuéra ogueraha hag̃ua pe témplope pe mitãme ha ojapo hag̃ua peteĩ sakrifísio pe léi heʼiháicha (Lev. 12:2, 6-8; Luc. 2:22-24).

Peteĩ ánhel heʼi vaʼekue Maríape oikotaha rréi imembýgui “David haʼe haguéicha avei”. Oiméne José ha María oraha upéva enkuénta ha opensáne raʼe hikuái iñimportanteha Jesús onase David vállepe (Luc. 1:32, 33; 2:11, 17). Upévare oime vaʼerã odesidi raʼe hikuái opyta Belénpe ohaʼarõ aja Ñandejára heʼi chupekuéra mbaʼépa ojapóta upe rire.

Ndajaikuaái mboy tiémpomapa oiko hikuái Belénpe umi adivíno ohórõ guare ovisita Jesúspe. Péro si jaikuaa upe tiémpope g̃uarã haʼekuéra oikóma hague peteĩ ógape ha Jesús ndahaʼevéima hague mitãraʼy (Mat. 2:11). Upévare jaʼekuaa ndohojeýi hague hikuái ensegída Nazarétpe, síno opyta hague oiko Belénpe peteĩ tiémpore.

Rréi Herodes omanda vaʼekue ojejukapa hag̃ua “umi mitãkuimbaʼe orekóvape guive 2 áño térã saʼive” (Mat. 2:16). Peteĩ ánhel oavisa vaʼekue Josépe ko rréi ojaposéva. Upévare José ha María ogueraha Jesúspe Egíptope, okañy hag̃ua hikuái upépe Herodes omano peve. Upe rire José ogueraha ifamíliape Nazarétpe, ¿péro mbaʼérepa ndohojeýi hikuái Belénpe? Pórke upe tiémpope ogoverna Judéape Arquelao, peteĩ Herodes raʼy iñañaitéva. Avei peteĩ ánhel oavisa Josépe ipeligrosotaha oho. Upémarõ haʼe odesidínte oho jey Nazarétpe ifamília reheve. Upépe José ikatúta omongakuaa trankílo porã Jesúspe oservi hag̃ua Jehovápe (Mat. 2:19-22; 13:55; Luc. 2:39, 52).

Posívlemente José omano vaʼekue Jesús omano mboyve ha ojeelehi mboyve umi ohótavape yvágape. Upéicharõ Josépe oñemoingove jeýta hína ko yvy ape ári. Heta orekóta la oportunida ojotopávo hendive ha upépe haʼe voi ikatúta omombeʼu porã mbaʼérepa haʼe ha María opytánte Belénpe Jesús onase rire.