1. ¿Mbaʼépa heʼi la Biblia pe disiplínare?

¿MBAʼÉREHEPA repensa rehendu jave pe palávra “disiplína” térã korreksión? Hetápe omopensa pe kastígore, péro pe palávra disiplína heʼise hetave mbaʼe. La Biblia heʼi pe disiplína iporãha, ha sapyʼánte omensiona ko palávra oñeʼẽ jave konosimiénto, arandu, mborayhu ha ñande rekovére avei (Prov. 1:2-7; 4:11-13). Ñandejára ñandekorrehi jave ohechauka ñanderayhuha ha oipotaha jaiko opa árare (Heb. 12:6). Sapyʼánte Ñandejára ñandekorrehi jave omoĩ avei peteĩ kastígo, péro ndojapói upéva oipotágui jasufri téra ñandeperhudikaségui. Pe palávra “disiplína” ningo primeroite voi heʼise peteĩ persóna oporomboʼeha, ojapoháicha tuakuéra omboʼe jave ifamília ohayhuetévape.

2, 3. ¿Mbaʼérepa jaʼekuaa ñaporodisiplina jave ikatuha japorokastiga ha ñaporomboʼe? (Ehecha pe taʼanga oĩva iñepyrũme).

² Epensamína ko ehémplore. Peteĩ mitãʼi hérava Juancito ohuga hína pelóta hógape, pe kotýpe. Isy heʼi chupe: “Juancito, eikuaa porã ndovaleiha rehuga pelóta kotýpe, cháke ikatu reity ha rejoka álgo”. Péro haʼe nopenái isýre ha osegi ohuga. Peichaháguinte oho chugui ipelóta peteĩ harrónre ha oity ojoka. ¿Mbaʼéichapa isy okorrehíta chupe? Haʼe oipota imemby oaprende peteĩ leksión, péro tekotevẽta avei okastiga Juancítope. Katuete oexplikáta chupe mbaʼérepa ivai  la ojapo vaʼekue, ha péicha omboʼéta Juancítope. Haʼe ningo oipota imemby ontende iporãveha iñeʼẽrendúrõ chupe ha itúape. Oipota avei ohechakuaa tekotevẽguinte omoĩha chupe umi rrégla, ha haʼe ikatuha okumpli umíva. Ikatu hag̃uáicha Juancito imanduʼa siémpre ko mbaʼére, isy odesidi okastiga chupe oipeʼávo chugui ipelóta unos kuánto díare. Juancítope ndogustái upe kastígo, péro katuete imanduʼáta iñeʼẽrendu vaʼerãha, pórke peichaʼỹrõ ou vaíta chupe.

³ Enterove kristiáno ningo ñaime Ñandejára família apytépe (1 Tim. 3:15). Upévare jarrespeta ñande Ru Jehovápe jahechakuaágui orekoha autorida heʼi hag̃ua ñandéve mbaʼépa oĩ porã ha mbaʼépa oĩ vai, ha avei ñandekorrehi hag̃ua jajavy jave. Jajapóramo algúna kósa upéi hoʼa vaíva ñandéve, Jehová mborayhúpe ñandekorrehi ha upéva ñanepytyvõ ani hag̃ua ñanderesarái iñimportanteha ñaneñeʼẽrendu (Gál. 6:7). Ñandejára ningo ñanderayhueterei ha ndoipotái jasufri (1 Ped. 5:6, 7).

4. a) ¿Mbaʼéichapa Jehová oipota jaipuru la Biblia? b) ¿Mbaʼépa jahecháta ko artíkulope?

⁴ Japorokorrehíramo la Biblia rupive ikatúta ñaipytyvõ ñane família ha ñane estudiántepe oiko hag̃ua chuguikuéra Jesús disípulo. Ñande ningo jaipuru la Biblia ñamboʼe hag̃ua ñane estudiántepe pe añetegua ha ontende hag̃ua hikuái entéro mbaʼe omanda vaʼekue Jesús (2 Tim. 3:16; Mat. 28:19, 20). Péicha Jehová oipota ñande ñahekomboʼe umi persónape ikatu hag̃uáicha haʼekuéra avei oipytyvõ hapichápe oiko hag̃ua chuguikuéra Jesús segidór (elee Tito 2:11-14). Koʼág̃a jahecháta mbohapy mbaʼe iñimportánteva: 1) ¿Mbaʼéichapa Ñandejára ohechauka ñanderayhuha ñandekorrehi jave? 2) ¿Mbaʼépa ikatu ñaaprende umi persóna Ñandejára okorrehi vaʼekuégui? Ha 3) ¿mbaʼéichapa ikatu jasegi Jehová ha Jesús ehémplo japorokorrehi jave?

5. ¿Mbaʼérepa ikatu jaʼe Jehová ñandekorrehiha ñanderayhu rupi?

⁵ Jehová ningo ñanderayhueterei, upévare ñandekorrehi ha ñanerekomboʼe. Haʼe oipota ñaime porã hendive ha jaiko opa árare (1 Juan 4:16). Ñandejára ningo arakaʼeve nañanemonáiva yvýre ni ndoipotái ñañeñandu ndajavaleiha mbaʼeverã (Prov. 12:18). Upéva rangue, Jehová omañave umi mbaʼe porã jajapóvare ha orrespeta la jadesidíva. ¿Jahechakuaápa Jehová ñanderayhuha ñandekorrehi jave la Biblia, umi puvlikasión, ñande tuakuéra térã umi ansiáno rupive? Umi ansiáno ikatu hína ohechakuaa jahaha “tape vaíre” ñande voi japilla mboyve. Péicha jave, haʼekuéra ñandekorrehírõ mborayhu ha pyʼaguapýpe, osegi hína Jehová ehémplo (Gál. 6:1).

6. Japerdéramo jepe ñande priviléhio, ¿mbaʼérepa ikatu jaʼe Jehová ñanderayhúguinte ñandekorrehiha?

⁶ Sapyʼánte pe disiplína ndeʼiséi oñemeʼẽnteha ñandéve peteĩ konsého. Peteĩ ermáno oúramo opeka vai, ikatu operde algún priviléhio orekóva kongregasiónpe. Péro upe korreksión ohechauka hína Ñandejára ohayhuha chupe. Por ehémplo, ikatu hína oipytyvõ chupe ohechakuaa hag̃ua iñimportantetereiha ostudiave la Biblia, ojepyʼamongeta ha oñemboʼe. Ojapóramo koʼã mbaʼe oñemoag̃uivéta Jehováre (Sal. 19:7). Kon el tiémpo ikatu jey orrekupera umi priviléhio operde vaʼekue. Jehová ohechauka avei ñanderayhuha oĩ jave oñemosẽva kongregasióngui. ¿Mbaʼérepa jaʼe upéva? Pórke péicha oñangareko hína kongregasiónre ani hag̃ua pe mal ehémplo ombyai avavépe (1 Cor. 5:6, 7, 11). Avei pe disiplína ikatu oipytyvõ pe oñemosẽ vaʼekuépe oñemeʼẽ hag̃ua enkuénta ivaietereiha la ojapo vaʼekue, ha upéva ikatu avei omomýi chupe oñarrepenti hag̃ua. Añetehápe  Ñandejára siémpre oporokorrehi hendaitépe (Hech. 3:19).

7. ¿Mávapa raʼe Sebná, ha mbaʼépa oñepyrũ vaʼekue opensa?

⁷ Jahechaháicha, pe disiplína iñimportanteterei. Ñantende porã hag̃ua upéva, ñañeʼẽmi mokõi kuimbaʼe Jehová okorrehi vaʼekuére. Peteĩva héra Sebná, haʼéva peteĩ israelita oiko vaʼekue rréi Ezequías tiémpope. Pe ótro katu héra Graham, peteĩ kristiáno ñane tiempopegua. Sebná amalisia oñatende kuri rréi Ezequías rógare, ha omanda guasu vaʼekue (Is. 22:15). Péro Sebná ou oñemombaʼeguasu ha oipota umi ótro opensa haʼe iñimportantetereiha. Sebná ningo ojapoka peteĩ sepultúra hepyetereíva ijupe g̃uarã, ha oreko vaʼekue umi “kárro de gérra porã porã” (Is. 22:16-18).

8. ¿Mbaʼépa Jehová ojapo vaʼekue okorrehi hag̃ua Sebnápe, ha mbaʼéichapa upéva oipytyvõ chupe?

⁸ Sebná ningo oipota vaʼekue umi hénte ombotuicha chupe, upévare Ñandejára oipeʼa chugui ipuésto ha omeʼẽ Eliaquímpe (Is. 22:19-21). Upéva oiko kuri pe rréi de Asiria hérava Senaquerib oplaneárõ guare ou Jerusalén kóntrape. Tiémpo riremi, Senaquerib omondo unos kuánto mburuvicha guasu peteĩ ehérsito tuicháva reheve ikatu hag̃uáicha omongyhyje umi judíope, ha oipotágui rréi Ezequías oñerrendi (2 Rey. 18:17-25). Upérõ Ezequías omondo Eliaquímpe oñeʼẽ hag̃ua hendivekuéra, ha omoirũ kuri chupe mokõi kuimbaʼe. Peteĩva haʼe kuri Sebná, oservíva de sekretário upérõ guare. Upéva heʼise posívlemente Sebná ndopytái hague ipyʼaro ojekorrehírõ guare chupe, síno oaprende iñumílde vaʼerãha. Upéicha rupi haʼe oĩ kuri dispuésto oservívo peteĩ puésto michĩvévape. ¿Mbaʼépa ikatu ñaaprende Sebnágui? Jahechamína mbohapy mbaʼe.

9-11. a) ¿Mbaʼépa ikatu ñaaprende pe oiko vaʼekuére Sebná rehe? b) ¿Mbaʼépa nde repensa Jehová otrata lájare Sebnápe?

⁹ Primero, Sebná ningo operde kuri ipuésto. Upéva ñanemboʼe peteĩ persóna oñemombaʼeguasúva tuicha oñemotĩtaha (Prov. 16:18). Ikatu ningo ndepriviléhio heta kongregasiónpe, ha oĩ opensáva neimportanteha. Oiméramo upéicha, ¿esegítapa eñehaʼã neumílde hag̃ua? ¿Embotuichátapa Jehovápe umi mbaʼe rehupytývare, térã ndekatupyry haguére? (1 Cor. 4:7). Apóstol Pablo heʼi vaʼekue: “Ajerure peẽme anive hag̃ua pepensa pendevaletereiha, pehechauka guei peneakãguapyha” (Rom. 12:3).

¹⁰ Segundo, Jehová oakonseha porã vaʼekue Sebnápe, ha upéva ohechauka ojeroviaha ko kuimbaʼe ikatúne hag̃ua okambia (Prov. 3:11, 12). Entéro umi ermáno operde vaʼekue ipriviléhio ikatu oaprende peteĩ mbaʼe iñimportánteva ko situasióngui: Jajekorrehi jave jasegi vaʼerã jaservi Jehovápe  ñande pyʼaite guive, ha ani ñandepochy ni jajepicha. Ñande jahechakuaa vaʼerã Jehová ñanderayhuha ñandekorrehi jave. Ani ñanderesarái ñande Ru ñanevendesitaha ñañehaʼãramo siémpre ñaneumílde (elee 1 Pedro 5:6, 7). Jahejáramo Jehová ñandekorrehi mborayhúpe, ñaneumildevéta ha ñañemoĩta ipópe ñanemoldea hag̃ua peteĩ ñaiʼũ huʼũ asývaicha.

¹¹ Tercero, umi orekóva autorida oñemoñeʼẽ ha oporokorrehi hag̃ua ikatu oaprende peteĩ mbaʼe iñimportantetereíva Jehová otrata lájagui Sebnápe. Umíva apytépe oĩ umi túa ha ansianokuéra kongregasiongua. Jehová oporokorrehi lájare jahechakuaa ndaijaʼeiha pe pekádore, péro avei osegiha ohayhu umi persóna opeka vaʼekuépe. Haʼe omañave umi mbaʼe porã ojapóvare umi persóna. Upévare, oimérõ tekotevẽ hína reporokorrehi, ¿rejapótapa Jehová ojapoháicha? (Jud. 22, 23).

12-14. a) ¿Mbaʼépa ojapo heta persóna oñedisiplina jave? b) ¿Mbaʼéichapa la Biblia oipytyvõ peteĩ ermánope okambia hag̃ua, ha mbaʼépa ohupyty upe haguére?

¹² Ñambyasýramo jepe oĩ persóna oñeñandu vaietereíva Jehová okorrehi jave chupe, ha upévare oñemomombyry chugui ha kongregasióngui (Heb. 3:12, 13). ¿Ikatúpa ñaipytyvõ umi ojechávape koichagua situasiónpe? Ñambohovái hag̃ua ko porandu jahechamíta Graham ehémplo. Chupe ningo oñemosẽ vaʼekue kongregasióngui, upéi ovolve jey, ha tiémpo rire ndopredikavéi ni ndohovéi rreunionhápe. Peteĩ ansiáno oñehaʼã oñeamiga hese, ha tiémpo rire Graham ojerure chupe ostudia hag̃ua hendive la Biblia.

¹³ Pe ansiáno heʼi: “Graham ningo ijorgullóso vaʼekue, ha upéva la iprovléma. Haʼe otakyeterei umi ansiáno otrata vaʼekuére ikáso ojexpulsárõ guare. Upémarõ rostudia unas kuánta vése mbaʼépa heʼi la Biblia pe ijorgullósovare ha mbaʼépepa katuete opa umichagua. Ñandejára Ñeʼẽ oipytyvõ Gráhampe oñepyrũ hag̃ua ohecha la idefékto, ha añetehápe ndogustaiete chupe la ohecháva. Péro amo ipahápe iporãiterei la ohupytýva. Graham orrekonose pe orgúllo haʼete hague peteĩ víga nopermitíriva chupe ohecha idefékto, ha avei haʼe ohechaitereiha ótro fálla. Graham ohechakuaa upéva haʼe hague la iprovléma tuichavéva. Upe guive pyaʼe omehora. Oñepyrũ jey oho rreunionhápe, ostudia porãve la Biblia ha oñemboʼe káda día. Avei omoakã porãve hogapy, ha hembireko ha itajyrakuéra ovyʼaiterei upe haguére” (Luc. 6:41, 42; Sant. 1:23-25).

¹⁴ Pe ansiáno omombeʼu avei: “Peteĩ díape Graham heʼi chéve peteĩ mbaʼe opokoitereíva cherehe. Haʼe heʼi: ‘Heta tiémpoma aikuaa hague pe añetegua, ha hiʼarive che haʼe vaʼekue prekursór. Péro koʼág̃a ae ikatu haʼe ahayhuha Jehovápe che pyʼaite guive’. Tiémpo riremi ojejerure Gráhampe oservi hag̃ua de mikrofonísta Salónpe, ha omombaʼeterei upe priviléhio. Iñehémplo chemboʼe peteĩ persóna oñemomirĩ jave Jehová renondépe ha oasepta pe disiplína, ohupytyha heta mbaʼe porã”.

15. ¿Mbaʼépa jajapo vaʼerã ikatu hag̃uáicha umi ótro oasepta jakorrehi jave chupekuéra?

¹⁵ Ikatu hag̃uáicha oiko ñandehegui peteĩ mboʼehára ikatupyrýva, oiko raẽ vaʼerã ñandehegui estudiánte katupyry (1 Tim. 4:15, 16). Péicha avei, Jehová ndepurúramo rekorrehi hag̃ua ótra persónape, neumílde vaʼerã ha eheja vaʼerã haʼe tandegia. Umi ótro ohecháramo neumildeha, nderrespetavéta ha ifasilvéta chupekuéra oasepta hag̃ua pe konsého. Jahechamína Jesús ehémplo.

16. ¿Mbaʼe mbaʼépa ikatu ñaaprende Jesús oporomboʼe ha oporokorrehi lájagui?

¹⁶ Jesús iñeʼẽrendu Itúape opa mbaʼépe, pe ijetuʼuvérõ guare jepe (Mat. 26:39).  Haʼe siémpre heʼi vaʼekue entéro umi mbaʼe oikuaáva ha omboʼéva ouha Ñandejáragui (Juan 5:19, 30). Jesús iñumílde ha iñeʼẽrendu Jehovápe, ha upéva oipytyvõ chupe oiko hag̃ua chugui peteĩ mboʼehára imbaʼerechakuaa ha ivuénova. Upévare umi hénte ipyʼaporãva oĩse vaʼekue ijykére (elee Mateo 11:29). Umi mbaʼe Jesús heʼíva siémpre omokyreʼỹ vaʼekue umi ikangy ha oñedesanimávape (Mat. 12:20). Jesús ikatu kuri oñedespasensia ijapostolkuérare ojodiskutírõ guare hikuái ohecha hag̃ua mávapa la iñimportantevéva ijapytepekuéra. Péro haʼe mborayhu ha pyʼaguapýpe porãnte okorrehi vaʼekue chupekuéra (Mar. 9:33-37; Luc. 22:24-27).

17. ¿Mbaʼépa oipytyvõta umi ansiánope oñangareko porã hag̃ua kongregasiónre?

¹⁷ Umi ansiáno oporokorrehi jave la Biblia rupive, osegi vaʼerã avei Jesús ehémplo. Péicha haʼekuéra ohechaukáta oipotaha Ñandejára ha Itaʼýra ogia chupekuéra. Apóstol Pedro heʼi vaʼekue: “Peñangarekóke peteĩ ovecharerekuáicha Ñandejára ovechakuérare oĩva pende poguýpe, ani pejapo upéva oĩgui pendeovligáva, ni pokarẽme pejaprovechase rupi hesekuéra; síno pejapo vaʼerã vyʼápe ha kyreʼỹme. Haʼekuéra Ñandejára mbaʼe hína, upévare ndovaléi pemanda guasu hesekuéra. Peẽ ningo ehémplo vaʼerã pe ovecha atýpe g̃uarã” (1 Ped. 5:2-4) Umi ansiáno vyʼápe oñemoĩva Ñandejára ha Jesús poguýpe, oñevenefisia haʼekuéra voi ha avei oservi porãve ermanokuérape (Is. 32:1, 2, 17, 18).

18. a) ¿Mbaʼépa Jehová oipota ojapo tuakuéra? b) ¿Mbaʼéichapa Ñandejára oipytyvõ tuakuérape okumpli porã hag̃ua irresponsavilida?

¹⁸ ¿Mbaʼépa ikatu ojapo tuakuéra okorrehi ha ohekomboʼe porã hag̃ua ifamíliape? Jehová heʼi umi omoakãvape hogapy: “Ani pejahéi pende raʼykuérare pembopochy hag̃uáicha chupekuéra, síno pesegi vaʼerã pemongakuaa ha pekorrehi pene famíliape Jehová oipotaháicha.” (Efes. 6:4). ¿Mbaʼérepa ikatu jaʼe iñimportanteha tuakuéra okorrehi ifamíliape? Proverbios 19:18 ombohovái upéva heʼívo: “Ekorrehi ne famíliape ikatúreheve, ani nde káusare oñehundi”. Jehová omeʼẽ tuakuérape pe rresponsavilida okorrehi hag̃ua ifamíliape, péro ojecháta avei hendive ndojapóiramo upéva (1 Sam. 3:12-14). Péro tuakuéra oñemboʼe meméramo chupe ha ohechaukáramo ojeroviaha Iñeʼẽ ha ijespíritu sántore, Jehová oipytyvõ ha omoarandúta chupekuéra (elee Santiago 1:5).

19, 20. a) ¿Mbaʼépa ikatu jahupyty jahejáramo Ñandejára ñandekorrehi? b) ¿Mbaʼe mbaʼépa jahecháta pe artíkulo oúvape?

¹⁹ Jahejáramo Ñandejára ñandekorrehi ha jasegíramo Jehová ha Jesús ehémplo japorokorrehi jave, jahupytýta hetaiterei mbaʼe porã. Péicha jaikóta pyʼaguapýpe ñande rogapýpe ha avei kongregasiónpe. Avei entéro jahechakuaáta umi ótro ñanderayhu ha ñanemombaʼeha, ha opavavénte javyʼáta. Koʼã mbaʼe ningo ohechauka mbaʼeichaitépa jaikóta pyʼaguapýpe ha javyʼáta amo gotyove (Sal. 72:7). Jehová ñandekorrehi pórke upéicha ñandeprepara jaiko hag̃ua oñondive pyʼaguapýpe opa árare peteĩ famíliaicha, ha haʼe osegíta oñangareko ñanderehe peteĩ túaicha (elee Isaías 11:9). Ñanemanduʼáramo koʼã mbaʼére, jahechakuaáta Ñandejára ñanderayhuetereíguinte ñandekorrehiha.

²⁰ Pe artíkulo oúvape jahecháta hetave mbaʼe jareko vaʼerã enkuénta japorokorrehi jave ogapýpe ha avei kongregasiónpe. Ñaaprendéta avei mbaʼéichapa ñande voi ikatu jajekorrehi, ha mbaʼéichapa ikatu jajehekýi peteĩ mbaʼe hasyve jeýva oimehaichagua disiplínagui.