1. ¿Mbaʼe ijetuʼúvapa ombohovái umi ermáno síglo primérope?

ÉNTRE áño 62 ha 64 apóstol Pedro oskrivi vaʼekue umi oikóvape “arrivéñoicha ha isarambíva Ponto, Galacia, Capadocia, Asia, ha Bitíniarupi” (1 Ped. 1:1). Koʼã ermáno ha ermána ou kuri diferénte lugárgui. Haʼekuéra ningo ohasa heta mbaʼe ijetuʼuetereíva “ojoguáva tatápe”, pórke ojepersegi chupekuéra ha oikotevẽterei hikuái omokyreʼỹ ha ogia vaʼerã chupekuéra. Umi ermáno oiko vaʼekue avei peteĩ tiémpo ipeligrósovape. Pedro heʼi: “Hiʼag̃uimbaitéma pe ára opa mbaʼe oñemohuʼã hag̃ua”. Upérõ ndofaltavéima kuri ni 10 áño oñehundi hag̃ua Jerusalén. ¿Mbaʼépa oipytyvõta umi kristiáno oparupiguápe umi tiémpo ijetuʼuetévape? (1 Ped. 4:4, 7, 12).

2, 3. ¿Mbaʼérepa Pedro omokyreʼỹ vaʼekue ermanokuérape ojorresivi porã hag̃ua? (Ehecha pe taʼanga oĩva iñepyrũme).

² Pedro omokyreʼỹ kuri umi ermánope ojorresivi porã hag̃ua (1 Ped. 4:9). Pe palávra griega ojetradusíva “pejorresivi porã” heʼise avei “penembaʼeporã umi extráñondi térã extranhérondi”. Péro Pedro ojerure umi ermánope haʼekuéra voi ojorresivi porã hag̃ua ndahaʼéi umi extráñopente. ¿Mbaʼéichapa oipytyvõta chupekuéra osegíramo upe konsého?

 ³ Ko konsého oipytyvõta kuri chupekuéra iñunidove hag̃ua. ¿Mbaʼépa jaʼekuaa ñande kásope? ¿Mbaʼéichapa ñañeñandu peteĩ ermáno ñaneinvitáramo hógape? Katuete ningo jahasa porã upe moméntope. Ñainvita jave ótrope, jajokuaa porãve ha ñañemoag̃uive ojuehe. Umi kristiáno Pedro tiémpope guare tekotevẽterei kuri oñemoag̃uive ojuehe, pórke ijetuʼuvéta kuri ohóvo umi provléma ohasáva hikuái. Ñande jaikóva “umi ára pahápe” tekotevẽ avei ñañemoag̃uive ojuehe (2 Tim. 3:1).

4. ¿Mbaʼépa ñahesaʼỹijóta ko artíkulope?

⁴ ¿Mbaʼe oportunidápa oĩ jahechauka hag̃ua jajorresivi porãha? ¿Mbaʼépa ikatu ñandejoko japororresivi porã hag̃ua? ¿Mbaʼépa jajapo vaʼerã ótro ñaneinvita jave?

5. ¿Mbaʼéichapa ikatu jahechauka japororresivi porãha rreunionhápe?

⁵ Rreunionhápe. Jehová ha iñorganisasión ñaneinvita jaha hag̃ua rreunionhápe. Ha ñande jaipota entéro ohóva rreunionhápe oñeñandu porã, koʼýte umi ipyahúva (Rom. 15:7). Umi oho ramóva rreuniónpe ningo haʼe avei Jehová invitádo. Upévare ñañehaʼãmbaite oñeñandu porã hag̃ua hikuái, tahaʼe haʼéva la ipínta térã oñemonde lája (Sant. 2:1-4). Jahechakuaáramo peteĩ persóna oho ramóva oĩha haʼeño, ikatu ñainvita chupe oguapy hag̃ua ñanendive. Haʼe oagradesetereíta ñaipytyvõramo chupe ontende hag̃ua la ojejapóva rreunionhápe, ha otopa hag̃ua umi téxto ojeleéva. Péicha jasegíta ko konsého oĩva la Bíbliape: “Siémprekena perresivi porã pende rapichakuérape” (Rom. 12:13).

6. ¿Mávape raẽvetépa iporãta ñainvita ñande rógape?

⁶ Ñaporoinvita jave jaʼu hag̃ua álgo. La Biblia omombeʼu yma umi hénte ohechauka hague iñamavleha oinvitávo hapichápe hógape hoʼu hag̃ua álgo oñondive. Péicha ohechauka hikuái oñamigaseha hese ha oikoseha pyʼaguapýpe hendive (Gén. 18:1-8; Juec. 13:15; Luc. 24:28-30). Ñande kásope, ¿mávape raẽvetépa iporãta ñainvita? Umi ermáno ñane kongregasionguápe. Ko múndo aña amás día ivaive ohóvo ha katuete ñaikotevẽta ojuehe. Upévare ñañehaʼã vaʼerã jajogueraha porã ñane ermanokuérandi ha jahechauka chupekuéra haʼeha ñaneamígo tee. Áño 2011-pe, Kuérpo Governánte okambia pe óra ojestudiaha Ñemañaha Betel de Estados Unídospe. Yma ojejapo vaʼekue 6:45 de la tárde, ha koʼág̃a 6:15. ¿Mbaʼérepa oñekambia upéva? Oñeanunsiárõ guare upe kámbio ojeʼe kuri ifasilvetaha umi betelítape oñoinvita hag̃ua. Péicha ikatúta ohasa porã hikuái oñondive pórke voive opa pe rreunión. Heta hendárupi ótro sukursálpe ojejapo avei upéva. Koʼã mbaʼe oipytyvõ umi betelítape iñunidove hag̃ua.

7, 8. ¿Mbaʼéichapa ikatu jahechauka japororresivi porãha peteĩ diskursánte ñandevisita jave kongregasiónpe?

⁷ Heta vése ñandevisita ojapo hag̃ua diskúrso umi ermáno ótra kongregasiongua, superintendénte de sirkuíto ha avei umi rrepresentánte de Betel. ¿Ikatúpa péicha jave ñainvita umi ermánope hoʼu hag̃ua álgo ñanendive? (elee 3 Juan 5-8). ¿Mbaʼérepa ndajajapói upéva ñandevisita jey vove hikuái?

⁸ Peteĩ ermána Estados Unidosgua heʼi: “Yma guivéma che ménandi rojepokuaa roinvita ore rógape umi diskursánte ha hembirekópe orevisita jave kongregasiónpe”. Ko ermána ohechakuaa siémpre ohasa porãitereiha, ha umi ermáno oipytyvõha chupekuéra ojerovia mbareteve hag̃ua. Haʼe heʼi: “Arakaʼeve norombyasýiva rojapo haguére upéva”.

9, 10. a) ¿Máva mávapa oikotevẽ jepi alohamiénto? b) ¿Ikatúpa umi ermáno hóga michĩva opororresivi avei? Emoĩ peteĩ ehémplo.

⁹ Ñameʼẽ jave alohamiénto ermanokuérape. La Biblia heʼi yma umi hénte ojepokuaámi hague oreko mbohupa (Job 31:32; Filem. 22). Koʼág̃arupi ñande ikatu avei jajapo péicha. Umi superintendénte de sirkuíto oikotevẽ jepi peteĩ lugár opyta hag̃ua ovisita jave umi kongregasión. Umi ermáno oñeinvitáva  umi eskuéla teokrátikape ha umi ombaʼapóva oñemopuʼã hag̃ua Salón oikotevẽ jepi avei alohamiénto. Heta oĩ opytáva ogaʼỹre peteĩ torménta vai rire, haʼekuéra oikotevẽterei avei peteĩ lugár oiko hag̃ua oñemyatyrõmba peve hogakuéra. Nañapensái vaʼerã umi hóga tuichávante ikatuha oipytyvõ péicha jave. Koʼã ermáno heta vésema oofrese ojepyta hag̃ua hógape. Péro, ¿ikatúpa nde avei rejapo upéva michĩramo jepe la nde róga?

¹⁰ Peteĩ ermáno Corea del Surgua omombeʼu umi ermáno oñeinvitáva umi eskuéla teokrátikape opyta jepi hague hógape. Haʼe heʼi: “Ñepyrũrã ningo adudaʼi kuri ajapo hag̃ua upéva pórke amenda ramoite ha michĩ la ore róga. Péro rovyʼaiterei ikatu haguére opyta orendive umi ermáno. Péicha rohechakuaa mbaʼéichapa ovyʼa umi matrimónio oservi haguére Jehovápe ha oñehaʼã rupi oñondive ohupyty hag̃ua hetave mbaʼe iservísiope”.

11. ¿Mbaʼérepa jarresivi porã vaʼerã umi ermáno ova ramóvape ñane kongregasiónpe?

¹¹ Umi ermáno ova jave ñane kongregasiónpe. Ikatu ningo umi ermáno ótro lugargua ova ñane kongregasiónpe. Heta vése oĩ ojapóva upéva ombaʼapove hag̃ua Jehová servísiope umi lugár oĩvehápe nesesida. Oĩ katu oservíva de prekursór ha oñeasignáva ñane kongregasiónpe. Añetehápe ningo tuicha la kámbio chupekuéra g̃uarã. Haʼekuéra oñehaʼã vaʼerã ojepokuaa peteĩ lugár rehe, peteĩ kongregasión pyahúre ha sapyʼánte ojepokuaa vaʼerã avei peteĩ idióma ha kultúrare. ¿Ikatúne piko ñainvita chupekuéra hoʼu hag̃ua álgo térã oho hag̃ua ojepasea ñanendive? Koʼã mbaʼe ningo ikatu oipytyvõ umi ermánope oñemoag̃uive hag̃ua ñanderehe ha ojepokuaa pyaʼeve hag̃ua.

12. ¿Mbaʼépa ohechauka natekotevẽiha japrepara hetaiterei mbaʼe ñaporoinvita hag̃ua?

¹² Natekotevẽi ningo japrepara hetaiterei mbaʼe ñaporoinvita hag̃ua ñande rógape (elee Lucas 10:41, 42). Peteĩ ermáno omombeʼu mbaʼépa ohasa kuri haʼe ha hembireko oñepyrũrõ guare oservi kómo misionéro. Haʼe heʼi: “Upérõ orepyahu gueteri, ndaoreexperiensiaguasúi ha rohechagaʼu pe lugár roheja vaʼekue. Peteĩ kaʼarupytũme che rembireko ndovyʼaieterei hína kuri, ha ajapóva guivénte noipytyvõi chupe oñeñandu porãve hag̃ua. Upéi, amo la 7 imédiarupi rohendu la ombotáva ore rokẽ. Peteĩ estudiánte ogueru oréve mbohapy naránha. Haʼe ningo péicha ohechaukase oréve ovyʼaha roju haguére roservi upépe. Roinvita chupe oike hag̃ua ha romeʼẽ chupe ymi, roprepara avei te ha chokoláte. Upérõ neʼĩra gueteri roaprende pe idióma suajili ha pe estudiánte nontendéi avei inglés”. Pe ermáno heʼi upe visíta oipytyvõ hague chupekuéra oñepyrũ hag̃ua oñeamigave umi ermánore ha ovyʼave hag̃ua.

13. ¿Mbaʼépa ikatu jahupyty jajepokuaáramo japororresivi porã?

¹³ ¿Ijetuʼúpa ndéve reporoinvita hag̃ua nde rógape? Oimérõ upéicha ikatu hína rejavy pe oportunida rehasa porã hag̃ua ermanokuérandi, ha remoñepyrũ hag̃ua peteĩ amista ikatúva odura opa árare. Jajepokuaáramo ñaporoinvita térã japororresivi porã, tuichaiterei ñanepytyvõ avei ani hag̃ua ñañeñandu ñaneaño. Péro, ¿mbaʼérepa ikatu algúno noñanimái oporoinvita? Jahechamína upéva.

14. ¿Mbaʼépa ikatu jajapo jahecháramo saʼiha ñanetiémpo térã ñanekaneʼõmaha ñaporoinvita hag̃ua?

¹⁴ Saʼi ñanetiémpo térã ñanekaneʼõma. Jehová siervokuéra ningo hembiapo heta ha oreko heta rresponsavilida. Upévare oĩ opensáva naitiempoiha ha ja ikaneʼõmaha oporoinvita hag̃ua hógape. ¿Mbaʼépa ikatu jajapo ñaĩméramo upe situasiónpe? Tekotevẽ ñaorganisa porãve umi mbaʼe jajapóva ikatu hag̃uáicha ñaporoinvita ha jaha hag̃ua avei ñane ermanokuéra rógape. Upéva ningo iñimportanteterei pórke la Biblia heʼi nañanderesaráiri vaʼerãha japororresivi porã hag̃ua (Heb.  13:2). Ñamboyke jave tiémpo jahasa hag̃ua ñane ermanokuérandi jajapo hína peteĩ mbaʼe iporãitereíva. Péro ikatu hag̃uáicha japororresivi porã, tekotevẽ jaipuru menove tiémpo umi mbaʼe naiñimportanteguasúivape.

15. ¿Mbaʼérepa ikatu algúno opensa ndaikatumoʼãiha oporoinvita?

¹⁵ Ñatĩ térã nañañeanimái. ¿Noiméipa hína ñaporoinvitase jepi, péro upéi jaju ñapensa ndaikatumoʼãiha jajapo upéva? Por ehémplo, ikatu ñaneotĩ ha ñapensa ñane invitadokuéra ndovyʼamoʼãiha. Ikatu avei ñanemboriahu ha jajepyʼapy ndaikatumoʼãi rupi jaofrese ñande visítape umi ótro ermáno oofreséva. Péicha jave iporã ñanemanduʼa natekotevẽiha ñande róga iporãiterei japororresivi hag̃ua. Ñaneamávlerõ ha ñande róga iñordenádo ha ipotĩramo, ñane invitadokuéra ovyʼaitereíta avei ñanendive.

16, 17. ¿Mbaʼérepa natekotevẽi jajepyʼapy ñaneinvitádota jave?

¹⁶ Sapyʼánte oiméne rejepyʼapy ereko jave invitádo, péro péva péichante voi. Peteĩ ansiáno Gran Bretañagua heʼi: “Ikatu ningo jajepyʼapy jarekóta jave invitádo. Añetehápe entéro mbaʼe jajapótavape Jehová servísiope ñañeñandu voínte péicha. Péro upéi jahupyty hetave vendisión ha ñañeñandu porãiterei. Sapyʼánte che ainvita ermanokuérape roʼu hag̃ua kafe ha roguapy roñemongeta. Upéicha ajapo rupi, heta vésema ahasa porãiterei hendivekuéra”. Aníkena ñanderesarái iñimportantetereiha jahechauka ñañeinteresaha ñane invitadokuérare (Filip. 2:4). Entéro ermáno ningo omombeʼuse umi mbaʼe ohasáva. Ha ñainvita jave chupekuéra, jareko oportunida ñahendu hag̃ua umi mbaʼe ohasa vaʼekue. Ótro ansiáno heʼi: “Ainvita rupi ermanokuérape che rógape, antende porãve chupekuéra ha ikatu avei aikuaa heta mbaʼe chuguikuéra, por ehémplo mbaʼéichapa oikuaa kuri pe añetegua”. Jahechaukáramo ñañeinteresaha ñane invitadokuérare, katuete jahasa porãitereíta oñondive.

¹⁷ Peteĩ prekursóra ningo pyʼỹinte oaloha vaʼekue hógape umi ermáno oúvape umi eskuéla teokrátikape. Haʼe heʼi: “Ñepyrũrã ajepyʼapy kuri pórke che róga isensillomínte, ha areko umi muévle usádo ojerregala vaʼekuénte chéve. Péro chemokyreʼỹeterei peteĩ instruktór rembireko heʼíva chéve. Haʼe heʼi oservírõ guare iménandi sirkuítope omombaʼeterei hague umi semána ohasáva umi ermáno ijespirituálvandi. Heʼi avei heta vése imboriahuha umi oaloháva chupekuéra, péro haʼekuéraicha avei umi ermáno omotenonde Jehová servísio. Upéva chemomanduʼa mama heʼími vaʼekuére oréve oremichĩme: ‘Iporãve jaʼu verduramínte enterove ojohayhuhápe’” (Prov. 15:17). Upéicharõ natekotevẽi jajepyʼapy, la iñimportantevéva hína jahechauka japorohayhuha.

18, 19. ¿Mbaʼérepa jaʼekuaa japororresivi porãramo jajogueraha porãvetaha ñane ermanokuérandi?

¹⁸ Ndokaeporãi ñandéve peteĩ ermáno: ¿Oĩ piko ñane kongregasiónpe la ndokaeporãiva ñandéve? Nañañehaʼãiramo jajapo álgo ñakambia hag̃ua la ñapensáva hese, jasegíta ndajachaʼéi ñande rapicháre. Ikatu ningo nañainvitaséi ñande rógape peteĩ ermáno nañandegustáigui ilája. Avei oĩ la ñanemoñeñandu vai vaʼekue ymave, ha ijetuʼu ñandéve ñanderesarái hag̃ua upévagui.

¹⁹ La Biblia heʼi japororresivi porãramo ikatuha jajogueraha porãve ñane rapichándi, umi ñane enemígondi jepe (elee Proverbios 25:21, 22). Oĩramo peteĩ mbaʼe nandegustáiva ne ermánore, iporãta reinvitáramo chupe nde rógape. Upéva ikatu hína nepytyvõ rekambia hag̃ua la repensáva hese ha rejogueraha porãve hag̃ua hendive. Ikatu voi reñepyrũ rehechakuaa umi kualida porã Jehová ohecha vaʼekue hese oguerúrõ guare chupe iñorganisasiónpe (Juan 6:44). Ñainvitávo umi ermánope jahayhúgui chupekuéra, koʼýte nohaʼarõiramo ñandehegui jajapo upéva, ikatu hína ñañemoag̃uive hesekuéra. ¿Mbaʼépa ikatu jajapo pe mborayhu ñanemomýi hag̃ua?  Pe konsého oĩva Filipenses 2:3-pe ñanepytyvõkuaa. Upépe heʼi: “Peñemomirĩ guei ha pepensa umi ótro tuichaveha pendehegui”. Ñapensa vaʼerã mbaʼépepa ivaleve ñandehegui umi ermáno. Ikatu jahechakuaa ojeroviaveha, oaguantáma hague hetave mbaʼe ha umícha. Jahechakuaáramo umi kualida porã orekóva hikuái jahayhuvéta umi ermánope ha ifasilvéta ñandéve jarresivi porã hag̃ua chupekuéra.

20. ¿Mbaʼépa jajapo vaʼerã jaaseptáramo peteĩ invitasión, ha mbaʼérepa?

²⁰ David oporandu vaʼekue Jehovápe: “¿Mbaʼeichagua persónapa nde rerresivíta opyta hag̃ua nde rógape?” (Sal. 15:1). Upe rire David omombeʼu mbaʼeichagua persónapepa Jehová oinvita. Por ehémplo peteĩ pártepe ohechauka ñakumpli vaʼerãha la jaʼéva. Upépe heʼi: “Nopyrũi iñeʼẽre operhudikátaramo jepe chupe upéva” (Sal. 15:4). Upévare, jaaseptáramo peteĩ invitasión ñañehaʼãmbaite vaʼerã jaha. Ani vyroreírente upéi jaʼe jey ñande rapichápe ndaikatumoʼãiha jaha. Umi ermáno ñaneinvitáva ningo katuetei ojeprepara porã ñanderresivi hag̃ua, ha ndajaháiramo ojeprepara reietéta hikuái (Mat. 5:37). Sapyʼánte ningo oĩ umi oaseptáva peteĩ invitasión, péro upéi orresivíramo ótra invitasión ogustavéva chupe, okanselántema pe primérogui. ¿Péichapa jahechaukáta hína jahayhu ha jarrespetaha ñande rapichápe? Nahániri. Ñande ningo jaasepta vaʼerã umi invitasión ha jaagradese ñande pyʼaite guive oimeraẽ mbaʼe umi ermáno ojapóva ñanderehehápe (Luc. 10:7). Oimérõ ñakanselámante vaʼerã peteĩ invitasión, ñanembaʼerechakuaa vaʼerã ha pyaʼemi jaavisa pe persóna ñaneinvita vaʼekuépe.

21. ¿Mbaʼérepa iñimportánte jarrespeta umi kostúmbre ojeguerekóva pe lugár jaikohápe?

²¹ Iñimportánte ningo jarrespeta umi kostúmbre ojeguerekóva pe lugár jaikohápe. Oĩ lugár umi hénte ojepokuaaha orresivi porã umi visítape nohaʼarõiramo jepe, ha ótro lugár rupi katu ojeavisa raẽ vaʼerã ojeho mboyve. Oĩ párte umi ogajára oofresehápe umi mbaʼe iporãvéva iñinvitádope, ótro hendápe katu enterovévapente ojetrata peteĩchapa. Heta hendárupi umi invitádo ogueraha jepi katuete algúna kósa okolavora hag̃ua pe hiʼupyrã. Oĩ katu párte umi oporoinvitáva ndoipotaihápe pe invitádo oraha mbaʼeve. Oĩ umi tetã ojepokuaahápe umi persóna oñeinvitáva orrechasa una o dos vése pe invitasión ha upéi ae oasepta. Péro heta hendápe ndopytaporãi ndojeaseptáiramo ensegída pe invitasión. Tahaʼe haʼéva la kostúmbre pe lugár jaikohápe, siémpre ñañehaʼã vaʼerã ovyʼa hag̃ua umi ermáno ñaneinvita haguére.

22. ¿Mbaʼérepa iñimportanteterei jajorresivi porã?

²² Pedro heʼi vaʼekue: “Hiʼag̃uimbaitéma entéro mbaʼe oñemohuʼã hag̃ua” (1 Ped. 4:7). Koʼág̃a og̃uahẽmbotaitéma pe jehasa asy guasu arakaʼeve ndoikóiva gueteri. Amáske ko múndo aña ivaive ohóvo, tekotevẽvéntema jajoayhu ha jasegi pe konsého omeʼẽ vaʼekue Pedro: “Pejorresivi porãkena pende pyʼaite guive” (1 Ped. 4:9). Jahechaháicha, iñimportanteterei japororresivi porã, ha tekotevẽterei jajapo upéva koʼág̃a ha opa árare.