AKAKUAA vaʼekue siuda de Grázpe opytáva Áustriape. Arekórõ guare 6 áño chemondo hikuái peteĩ koléhio rrelihiósope. Péro upépe chesorprende mbaʼeichaitépa hekovai umi paʼi ha mónha. Upévare che sy chenohẽ jey upégui 1 áño mboyve.

Upe rire aike astudia peteĩ koléhio ojepytahápe voi ojeke. Peteĩ pyhare, che túa ou cheraha peteĩ lugár isegurohápe, pórke Graz oñevombardea hína kuri. Upérõ roho peteĩ siuda héravape Schladming. Rog̃uahẽvo upe siudápe oñembokapu peteĩ puénte rohasamírente voi. Ótra vuéltape, ohasa umi avión che ha che avuéla roĩ aja hardínpe, ha oñepyrũ oreraʼã hikuái orejapi hag̃uáicha. Opávo ohóvo pe gérra, ropyta ndorojeroviavéi pe goviérnore ni pe iglésiare.

Áño 1950-pe, peteĩ testígo de Jehová oñepyrũ opredika che sýpe. Che ahendúmi vaʼerã oñemongeta jave hikuái ha roho jepi mamándi irreunionkuérape. Mama ohechakuaa umi Testígo omboʼeha pe añetegua, upévare ojevautisa 1952-pe.

Upe tiémpope, apensa vaʼekue pe kongregasión rohoha jepi haʼeha peteĩ lugár ijatyhápe umi kuñakarai ijedávante. Péro upéi rovisita peteĩ kongregasión oĩháme heta imitãva. ¡Ndahaʼéimbo raʼe peteĩ lugár ijatyhápe umi ijedávante! Roho jey rire Grázpe, añepyrũ aha meme rreunionhápe ha añemeʼẽ enkuénta umi mbaʼe aaprendéva haʼeha pe añetegua. Ahechakuaa avei Jehová arakaʼeve ndofallaiha isiervokuérape. Sapyʼánte ikatu ñapensa ñambohovái vaʼerãha ñaneaño heta mbaʼe ijetuʼuetereíva, péro Jehová siémpre oĩta ñande ykére (Sal. 3:5, 6).

Che ningo amombeʼusetereíma kuri entérope umi mbaʼe aaprendéva. Upémarõ añepyrũ apredika che ermanokuérape. Umi 4 che ermána majór ndoikovéima kuri ógape ha ombaʼapo hikuái de maéstra. Péro che lomímonte  aha hendapekuéra umi puévlo oikohápe, ha amokyreʼỹ chupekuéra ostudia hag̃ua la Biblia. Kon el tiémpo, enterovete che ermanokuéragui oiko avei Testígo.

Haimete 2 semána añepyrũ rire apredika ogahárupi, atopa peteĩ kuñakarai oñatende porãva cherehe orekóva 30 áñorupi. Upéi roñepyrũma voi rostudia la Biblia. Tiémpo rire haʼe ojevautisa, ha upéi ojapo avei upéva iména ha mokõi imembykuimbaʼe. Ko estúdio bíblico chepytyvõ kuri ajeroviave hag̃ua. ¿Mbaʼérepa? Pórke chendive ningo avave ndostudiái vaʼekue la Biblia, ha ajeprepara porã vaʼerã aha mboyve ambostudia pe kuñakaraípe. Upéicha, che raẽ astudia vaʼerã kuri, ha upéi amboʼe hag̃ua che estudiántepe. Añetehápe apyta amombaʼeve pe añetegua. Abril de 1954-pe ajevautisa ahechauka hag̃ua añemeʼẽma hague Jehovápe.

Áño 1955-pe aha umi asambléa internasionál ojejapo vaʼekuépe Alemania, Francia ha Inglatérrape. Aĩ aja Lóndrespe aikuaa Albert Schróederpe. Ko ermáno haʼe vaʼekue instruktór Eskuéla de Galaádpe, ha upéi oservi kuri kómo miémbro del Kuérpo Governánte. Rovisitárõ guare pe Museo Británico, ermáno Schroeder ohechauka oréve unos kuánto kuatiañeʼẽ yma guare ojeskrivi haguépe a mano la Biblia. Umívape oĩ umi létra hebrea ojeskriviha Ñandejára réra, ha haʼe oexplika mbaʼeichaitépa iñimportánte umi dokuménto. Upéva opokoiterei cherehe ha omombareteve che jerovia. Upe rire koʼytevéntema añehaʼã amombeʼu umi mbaʼe porãite oĩva la Bíbliape.

Añepyrũ che prekursorádo el 1 de enero de 1956. Ohasa rire 4 mése, añeinvita aservi hag̃ua kómo prekursóra espesiál Áustriape. Upérõ ndaipóri vaʼekue Testígo pe lugár añeasigna haguépe, hérava Mistelbach. Péro ambohovái avei ótra situasión. Che kompañéra de prekursorádo idiferenteterei vaʼekue chehegui. Che areko haimete 19 áño ha haʼe katu 25. Che akakuaa vaʼekue siudaháre ha che irũ katu oiko vaʼekue kampañaháre. Che ajepokuaa ake tárde peve, haʼe katu voi opuʼã. Che kompañéra voi oke, péro che aiko upérupi tárde peve ha upéi ae aha añeno. Upéicharõ jepe roñehaʼã rojapo la Biblia heʼíva ha rojogueraha porãve, upévare rovyʼa oñondive ore servísiope.

Péro añetehápe rombohovái vaʼekue heta mbaʼe ijetuʼuvéva. Por ehémplo ikatu voi haʼe rojepersegi hague, péro Jehová arakaʼeve ndaorerejareíri (2 Cor. 4:7-9). Peteĩ jey ropredika hína kuri peteĩ puevloʼípe, ha peichaháguinte umi hénte opoi hymba jaguakuéragui oresuʼu hag̃ua. Sapyʼaitérõ g̃uarã oremongoráma umi jagua tuichaicháva, oñarõ ha okororõ orerehe, ha oĩma voi oresuʼu hag̃uáicha. Upémarõ, roñakãrama ojopóre ha añemboʼe: “Jehová, ág̃a ou vove ore ári koʼã jagua pyaʼemínte taorejuka ikatúrõ”. Péro umi jagua oñembojapotaitévo orerehe, de rrepénte opytaite, oñepyrũ huguái rory ha ohopa hese hikuái. Rohechakuaa Jehová oñangareko hague orerehe. Upe rire ropredika pe puévlope ha rohasa porãiterei pórke umi hénte orerendu porã. Ore rokalkula ohecharamóne hague hikuái umi jagua ndojapoiha orerehe mbaʼeve, térã ikatu avei omombaʼe hikuái lomímonte rosegi haguére ropredika tuichaiterei roñemondýiramo jepe. Kon el tiémpo unos kuánto umi héntegui oiko vaʼekue Testígo.

Rohasa vaʼekue avei ótra situasión ijetuʼúva. Peteĩ vuéltape, pe karai oalkiláva oréve hóga  og̃uahẽ tuichaite kaʼúre, ha oreamenasa vaipa orejukataha roiko haguére romolesta vesinokuérape. Hembireko oñehaʼã otrankilisa chupe péro nokonsegíri mbaʼeve. Ore katu rohendupaite la oikóva ore koty guive oĩva segundo pisohápe. Upémarõ romoĩ peteĩ sílla rotranka hag̃ua ore rokẽ ha roñepyrũ rombyatypa ore kosakuéra. Roavrívo pe okẽ rohecha pe karai ojupíma hague yvate ha orekoha ipópe peteĩ fero kyse. Upémarõ roguejy fóndoguio ládo, rokrusa pe hardín orekosakuéra reheve, ha roʼe voi núnka mas ndorojuveimaha.

Roho peteĩ otélpe rohecha hag̃ua ikatúpa ropyta upépe. Ipahápe ropyta haimete 1 áño, ha upéva ou porãiterei oréve ropredika hag̃ua. ¿Mbaʼérepa? Pe otél ningo opyta sentroitépe ha unos kuánto ore estudiánte ohose voi pe roikohápe ostudia hag̃ua. Sapyʼaitérõ g̃uarã roñepyrũ rojapo pe estúdio de lívro ha pe Ñemañaha ñehesaʼỹijo ore kotýpe. Roñembyaty jepi 15 persónarupi.

Ropyta kuri Místelbachpe mas de 1 áño. Upéi añeasigna aha hag̃ua Féldbachpe, suréste gotyo Grázpe. Upépe che kompañéra pyahúma, péro ndaipóri avei upérupi ni peteĩ kongregasión. Roiko peteĩ ógape ojejapóva tronkokuégui, ha roime peteĩ kotyʼi oĩvape segundo pisohápe. Pe yvytu roʼysã oikepa umi trónko paʼũrupi, ha roipuru diário óha romboty hag̃ua umi paʼũ. Avei, ronohẽ vaʼerã pósogui y roipuru hag̃ua. Péro nambyasýi umi sakrifísio rojapo vaʼekue. Unos kuánto mése upe rire oñeformáma peteĩ grúpo. Kon el tiémpo 30 persónarupi oñopariénte meméva ostudia la Biblia orendive, ha oiko chuguikuéra Testígo.

Jehová ningo ndohejái arakaʼeve umi omotenondévape Irréino. Koʼã mbaʼe ahasa vaʼekue chepytyvõ amombaʼeve hag̃ua upéva. Peteĩ yvypóra ndaikatúiramo jepe ñanepytyvõ, Jehová siémpre oĩta ñanepytyvõ hag̃uáicha (Sal. 121:1-3).

Áño 1958-pe oñeorganisa peteĩ asambléa internasionál Nueva Yórkpe. Umíva ojejapo kuri pe Estádio de los Yankees ha avei Polo Gróundspe. Che amyenyhẽ che solisitu aha hag̃ua, ha pe sukursál de Austria katu oporandu chéve ndahaséipa Eskuéla de Galaádpe, pe kláse 32-pe. ¿Mbaʼéicha piko arrechasáta upe priviléhio tuichaitéva? Upepete voi aaseptáma.

Pe Eskuéla aja aguapy Martin Poetzinger ykére. Ko ermáno ohasa vaʼekue hetaiterei mbaʼe umi kámpo de konsentrasión názipe.  Tiémpo rire haʼe oservi kuri Kuérpo Governántepe. Ermáno Poetzinger ha che ningo roñeʼẽ alemán, upévare pe kláse aja heʼími vaʼerã chéve mbeguemi: “Erika, ¿mbaʼéiko péa heʼise alemánpe?”.

Pe kúrso mbytérupi, Nathan Knorr oanunsia la ore asignasión. Chéve ojeʼe ahataha Paraguáype. Upérõ ningo chemitãiterei gueteri, ha aikotevẽ che túa permísore aike hag̃ua upe tetãme. Pe permíso reheve ag̃uahẽ Paraguáype marzo de 1959-pe. Añeasigna pe kása misionál oĩvape Asunciónpe, ha arekóta avei peteĩ kompañéra pyahu.

Ndohasapukúi aikuaa hag̃ua Walter Bríghtpe, peteĩ misionéro oho vaʼekue avei Eskuéla de Galaádpe, pe kláse 30-pe. Upéi romenda ha péicha roñomoirũ rombohovái hag̃ua oñondive entéro mbaʼe. Káda ke rohasa umi situasión ijetuʼúva rolee Jehová promésa oĩva Isaías 41:10-pe. Upépe heʼi: “Ani rekyhyje pórke che aĩ nde ykére. Che ningo nde Jára, upévare ani rejepyʼapy. Che romombaretéta ha roipytyvõta”. Ko promésa ohechauka oréve roñehaʼãmbaitéramo orefiél Jehovápe ha romotenonde Irréino, haʼe arakaʼeve ndofallamoʼãiha oréve.

Upe rire roñeasigna roho hag̃ua peteĩ sónape hiʼag̃uíva Brasil frontéragui. Upépe pe paʼi omboliga umi mitãrusúpe opoi hag̃ua ita pe kása misionál rehe, chakeko oikotevẽ voi kuri oñemyatyrõ. Walter oñepyrũ ostudia la Biblia upepegua komisáriondi, ha haʼe omoĩ polisía una semánare ag̃ui ore rógagui. Péicha umi ndaijaʼéiva orerehe naoremolestavéi. Upe riremínte rojeguerova peteĩ óga iporãvévape opytáva pe frontéra rire, Brasílpe. Upe kámbio ou porã oréve, pórke péicha rojapo umi rreunión Paraguay ha Brasílpe. Roheja mboyve upe lugár, oĩma vaʼekue mokõi kongregasión michĩva.

Umi doktór heʼi vaʼekue chéve ndaikatumoʼãiha chememby. Upévare chesorprendete voi 1962-pe aikuaárõ guare cheryeguasu hague. Roho roiko ag̃ui Walter hentekuéragui oĩva siuda de Hóllywoodpe opytáva Florídape (Estados Unidos). Peteĩ tiémpore ndaikatúi kuri rojapo ore prekursorádo, pórke heta ore rresponsavilida ogapýpe. Upéicharõ jepe, rosegi romotenonde Ñandejára Rréino (Mat. 6:33).

Noviembre de 1962-pe rog̃uahẽ Florídape. Upépe ningo umi hénte irrasísta vaʼekue, ha roñesorprende rohechárõ guare umi ermáno ipire morotĩva oñerreuniha apárte umi ipire hũvagui, ha ndopredikaiha avei hikuái oñondive. Péro Jehová ningo nomboykéi avavépe ipire kolór diferénte haguére. Upévare, tiémpo riremi umi ermáno ohejáma upe kostúmbre vai. Rohechakuaa Jehová oñenkarga hague upévare, pórke koʼág̃a upe sónape oĩ heta kongregasión.

Ambyasyeterei ningo Walter omanórõ guare 2015-pe kánser serevrálgui. Péro avyʼa ikatu haguére areko peteĩ kompañéro chepytyvõiterei vaʼekue 55 áñore. Haʼe ohayhu vaʼekue Jehovápe ha oipytyvõ hetaiterei ermánope. Hiʼãitereíma chéve ahecha jey chupe orresusita vove, upépe ningo haʼe hesãitama (Hech. 24:15).

Aagradeseterei ikatu haguére aservi de tiémpo kompléto mas de 40 áño. Heta ningo avyʼa ha hetaiterei mbaʼe porã ahupyty. Por ehémplo, Walter ndive roipytyvõ 136 persónape ojevautisa hag̃ua. Añetehápe rohasa avei heta mbaʼe ijetuʼúva, péro arakaʼeve ni noropensáiva rohejávo Jehovápe pórke haʼe ndaorerejái avei. Upéva rangue roñemoag̃uive hese, ha ndorodudái haʼe siémpre orepytyvõtaha itiempoitépe ha iporãveháicha. Añetehápe Jehová núnka ndofallái orendive (2 Tim. 4:16, 17).

Ahechagaʼueterei ningo Wálterpe, péro pe prekursorádo chepytyvõ agueropuʼaka hag̃ua che mbaʼembyasy. Ojapo porãiterei cherehe amboʼe jave pe añetegua che rapichápe, koʼýte añeʼẽ jave chupekuéra pe rresurreksiónre. Jehová siémpre oĩ che ykére, ha ndaikatúi voi ni amombeʼupa mbaʼeichaite pevépa oñangareko cherehe. Ñandejára okumpli chendive la ipromésa pórke chemombarete ha chepytyvõ. Ipo deréchape oñakarama cherehe ha chegueraha tape porãre (Is. 41:10).