1. ¿Mbaʼéichapa ikatu ñanearandu, ha mbaʼéichapa ñanepytyvõ upéva?

PE ARANDU ningo ou Jehovágui ha haʼe nahakateʼỹi hese. Santiago 1:5 heʼi: “Oĩramo pende apytépe oikotevẽva arandu, ojerure meme vaʼerã Ñandejárape ha oñemeʼẽta chupe. Ñandejára ningo omeʼẽ pojerápe opavavépe ha ndaipochymoʼãi upe ojerurévandi”. Jaaseptáramo Jehová ñandekorrehi jave, ñanearandu hína. Upéva ñandeprotehéta ani hag̃ua jajapo ivaíva ha ñanepytyvõta pono ñañemomombyry Jehovágui (Prov. 2:10-12). Avei ñanepytyvõta jahupyty hag̃ua pe jeikove opaveʼỹva (Jud. 21).

2. ¿Mbaʼépa ñanepytyvõta ñamombaʼe hag̃ua pe disiplína oúva Ñandejáragui?

² Sapyʼánte ijetuʼu jaasepta hag̃ua pe disiplína, térã jahechakuaa hag̃ua ideprovechoha. ¿Mbaʼérepa oiko jepi upéva? Pórke ñaneimperfékto térã ñandeafekta jakakuaa lája. Péro jahecháramo mbaʼéichapa ou porã ñandéve Ñandejára ñandekorrehi jave, ñantendéta haʼe ojapoha upéva ñanderayhúgui. Proverbios 3:11, 12 heʼi: “Che raʼy, easeptáke pe disiplína oúva Jehovágui”. Upéi heʼi avei: “Jehová okorrehi umi ohayhúvape”. Aníkena jaduda, Jehová oipota iporãvante ñandéve g̃uarã (elee Hebreos 12:5-11). Ñandejára ningo ñandekuaa porã, upéicha rupi ñandekorrehi hendaitépe ha ñaikotevẽhaichaite.  Ko artíkulope ñañeʼẽta pe disiplínare ha jahecháta 4 mbaʼe: 1) mbaʼéichapa ikatu jajekorrehi ñandejupe voi, 2) mbaʼéichapa tuakuéra okorrehi vaʼerã ifamíliape, 3) pe disiplína oĩva kongregasiónpe, ha 4) peteĩ mbaʼe hasyve jeýva pe disiplínagui.

3. ¿Mbaʼéichapa tuakuéra ikatu oipytyvõ ifamíliape ojekorrehikuaa hag̃ua ijupe voi? Emoĩ peteĩ ehémplo.

³ Jajekorrehíramo ñandejupe voi ikatúta ñadomina ñane pensamiénto ha ñañekomporta lája. Péro upéva ningo nañagueronaséi, síno ñaaprende vaʼerã jahávo. Por ehémplo, peteĩ mitã oaprende jave oiko hag̃ua visikléta ári, ñepyrũrã itúa térã isy ojoko chupe ani hag̃ua hoʼa. Upéi, ohechakuaávo oikokuaamiemaha, opoi ohóvo chugui mbeguekatu ha péicha ojapo hikuái pe mitã oikokuaa porã peve. Upéicha avei, tuakuéra omongakuaa ha okorrehi jave “ifamíliape Jehová oipotaháicha”, oipytyvõ hína chupekuéra iñarandu ha ojekorrehikuaa hag̃ua ijupe voi (Efes. 6:4).

4, 5. a) ¿Mbaʼérepa peteĩ kristiáno oñemondéva pe teko pyahúgui ojekorrehikuaa vaʼerã ijupe voi? b) ¿Mbaʼérepa nañañentregái vaʼerã jajavy haguére?

⁴ Péicha avei oiko peteĩ persóna oúva oikuaa Jehovápe okakuaapa riréma. Ikatu jaʼe haʼekuéra oñekontrolakuaa mimimaha, upéicharõ jepe naiñakãguapýiti espirituálmente. Péro oñepyrũvo omonde “pe teko pyahu” ha oñehaʼãvo osegi Cristo ehémplo, oiko ohóvo chuguikuéra kristiáno iñakãguapýva (Efes. 4:23, 24). Jajekorrehikuaáramo ñandejupe voi, ñanepytyvõta “ñamboyke hag̃ua opa mbaʼe oñemoĩva Ñandejára rembipotáre ha ani hag̃ua jaipota umi mbaʼe ko mundopegua. Péicha ñaneakãguapýta, jaikóta hekópe ha ñamombaʼeguasúta Ñandejárape jaikóramo jepe ko múndope” (Tito 2:12).

⁵ Enterovéva ningo ñaneimperfékto (Ecl. 7:20). Péro jajavy haguére ndeʼiséi katuete tekotevẽha jajekorrehive ñandejupe, térã ndajajapoieteha voi upéva. Proverbios 24:16 heʼi: “Pe ihústova ikatu hoʼa siete vése, péro opuʼã jeýta”. ¿Mbaʼépa ñanepytyvõta “ñapuʼã jey hag̃ua”? Ndahaʼemoʼãi ñanembaretégui la ñapuʼã jeýtava, síno Ñandejára espíritu rupive (elee Filipenses 4:13). Ñandejára espíritu sántogui ningo ou hína pe autodomínio térã jejokokuaa, ha jajekorrehi jave ñandejupe voi jahechauka avei jajejokokuaaha.

6. ¿Mbaʼépa ñanepytyvõta kyreʼỹme jastudia hag̃ua Ñandejára Ñeʼẽ? (Ehecha pe taʼanga oĩva iñepyrũme).

⁶ Ñañemboʼe, jastudia la Biblia ha jajepyʼamongetárõ ñanepytyvõta ikatu hag̃uáicha jajekorrehi ñandejupe voi. Péro, ¿mbaʼépa ikatu jajapo ijetuʼúramo ñandéve jastudia hag̃ua, térã ndajastudiaséirõ voi? Ani jajepyʼapy, jaheja vaʼerã Jehová tañanepytyvõ, péicha ñanekyreʼỹvéta “jaheka meme” hag̃ua umi mbaʼe oĩva Iñeʼẽme (1 Ped. 2:2). Jajerure chupe ikatu hag̃uáicha ñañeorganisa porã jastudia hag̃ua la Biblia, ha ñakumpli hag̃ua pe prográma jajapóva. Ñepyrũrã ikatu jastudia unos kuánto minútonte, péicha mbeguekatúpe ifasilvéta ha igustovéta ñandéve pe estúdio. Ha amo ipahápe jadisfrutátama ñamboyke haguére tiémpo jajepyʼamongeta hag̃ua Jehováre (1 Tim. 4:15).

7. ¿Mbaʼérepa jaʼekuaa jajekorrehírõ ñandejupe voi ñanepytyvõha jahupyty hag̃ua heta mbaʼe Jehová servísiope?

⁷ Jajekorrehíramo ñandejupe voi ikatúta avei jahupyty heta mbaʼe Jehová servísiope. Por ehémplo, peteĩ túa ohechakuaa naikyreʼỹvéi hague Jehová servísiope, upémarõ oñehaʼã ikatu hag̃uáicha oiko chugui prekursór rregulár. ¿Mbaʼéichapa oipytyvõ chupe oñehaʼã haguére ojekorrehi ijupe voi? Haʼe olee unos kuánto artíkulo osẽva ñane puvlikasionkuérape ha oñeʼẽva pe prekursorádore, ha upéi oñemboʼe koʼã mbaʼére. Umi mbaʼe haʼe ojapo vaʼekue oipytyvõ chupe oñemoag̃uive hag̃ua Jehováre. Avei ojapo iprekursorádo auxiliár káda ke ija chupe. Ko ermáno  ndohejái mbaʼeve ojoko chupe, upéva rangue oñehaʼã ohupyty la iméta. Tiémpo rire oiko chugui prekursór rregulár.

8-10. ¿Mbaʼépa oipytyvõta tuakuérape omongakuaa hag̃ua ifamíliape Jehová oipotaháicha? Emoĩ peteĩ ehémplo.

⁸ Tuakuéra oreko pe rresponsavilida omongakuaa ha okorrehívo ifamília Jehová oipotaháicha. (Efes. 6:4). Péro ijetuʼu jajapo hag̃ua upéva ñane tiémpope (2 Tim. 3:1-5). Umi mitã onasére ndoikuaái mbaʼépa oĩ porã ni mbaʼépa oĩ vai, ha la ikonsiénsia katu noñehekomboʼéi gueteri. Upévare tekotevẽ oaprende ojekorrehikuaa hag̃ua ijupe voi (Rom. 2:14, 15). Peteĩ expérto en téma bíblico heʼi pe palávra griega ojetradusíva “disiplína” ikatuha avei osignifika “mitã oñehekomboʼéva ohóvo”. Upéva heʼise oñehekomboʼeha pe mitãme ikatu hag̃uáicha okakuaapa rire oiko chugui peteĩ persóna rresponsávle.

⁹ Tuakuéra mborayhúpe okorrehi jave ifamíliape, umi mitã oñeñandu porãve pórke ohechakuaa oñeñangarekoha hesekuéra. Haʼekuéra oaprende ndaikatuiha ojapo entéro mbaʼe ojaposéva, pórke hembiapo vaírõ ojecháta la hembiapokuére. Iñimportanteterei ningo tuakuéra osegi Jehová konsého omongakuaávo ifamília. Heta konsého ningo oñemeʼẽ ko múndope oñemongakuaa hag̃ua umi mitãme, ha upéva odepende moõpa umi hénte oiko. Hiʼarive umi mbaʼe ojeʼéva okambia jey jepi upe rire. Péro tuakuéra ojeroviáva Jehováre natekotevẽi otantea ohóvo mbaʼéichapa omongakuaáta ifamília, avei ndojeroviamoʼãi ijehe ni umi hénte opensávare.

¹⁰ Ñande ikatu avei ñaaprende Noé ehémplogui. Jehová heʼírõ guare chupe ojapo hag̃ua pe árka, haʼe ndoikuaái kuri mbaʼéichapa ojapóta. Haʼe ojerovia vaʼerã kuri Jehováre, ha la Biblia heʼi Noé ojapo hague Ñandejára “heʼi hagueichaite chupe” (Gén. 6:22). ¿Mbaʼépa ojehupyty upe haguére? Pe árka rupive ojesalva Noé ha ifamiliakuéra. Noé haʼe vaʼekue avei peteĩ túa ikatupyrýva, pórke ojerovia Ñandejára arandúre. Haʼe omboʼe porã ifamiliakuérape ha omoĩ chupekuéra ehémplo porã. Hiʼarive ijetuʼu hendive, pórke pe ama guasu mboyve umi hénte iñañaiterei vaʼekue (Gén. 6:5).

11. ¿Mbaʼérepa tuakuéra oñehaʼãmbaite vaʼerã ohekomboʼe hag̃ua ifamília?

¹¹ Oiméramo nde peteĩ túa, ¿mbaʼéichapa ikatu rejapo “ojeʼe hagueichaite” ndéve? Ehendu vaʼerã Jehovápe. Eheja tanepytyvõ remongakuaa hag̃ua ne família. Esegi umi konsého haʼe omeʼẽva Iñeʼẽ ha iñorganisasión rupive. Ne família okakuaa rire, katuete oagradeséta ndéve upe haguére. Peteĩ ermáno oskrivi: “Che aagradeseterei che tuakuérape oñehaʼã rupi hikuái chemongakuaa porã. Haʼekuéra ojapo ikatúva guive umi mbaʼe chemboʼéva opoko hag̃ua cherehe”. Ko ermáno heʼi ituakuéra oipytyvõ hague chupe oñemoag̃ui hag̃ua Jehováre. Sapyʼánte tuakuéra  oñehaʼãmbaitéramo jepe omboʼe porã ifamíliape, lomímo jeýnte ikatu oheja hikuái Jehovápe. Péro tuakuéra ojapóramo la ikatúva guive ohekomboʼe hag̃ua umi mitãme, ikonsiénsia potĩta opytávo ha ndoperdemoʼãi la esperánsa ifamília ikatúne hag̃ua oñemoag̃ui jey Jehováre.

12, 13. a) ¿Mbaʼéichapa tuakuéra ohechauka iñeʼẽrenduha Jehovápe oúramo ifamília oñemosẽ kongregasióngui? b) ¿Mbaʼépa ohupyty peteĩ família umi tuakuéra iñeʼẽrendu rupi?

¹² Tuakuérape ningo ijetuʼueterei jepi ojapo hag̃ua Jehová heʼíva ifamília oúramo oñemosẽ kongregasióngui. Peteĩ ermána heʼi la oiko vaʼekue hese imembykuña oñemosẽrõ guare kongregasióngui ha oho hógagui. Haʼe heʼi: “Aheka umi puvlikasiónpe peteĩ mbaʼe oservi vaʼerã chéve de exkúsa ahasa hag̃ua tiémpo che memby ha che niétandi”. Péro iména mborayhúpe oipytyvõ chupe ohechakuaa hag̃ua haʼekuéra noĩveimaha rresponsávle ifamíliare, ha iñimportantetereiha ojapo hikuái Jehová heʼíva.

¹³ Tiémpo rire ifamília ovolve jey kongregasiónpe. Isy heʼi: “Koʼág̃a che memby haimete káda día cherenói térã ombou chéve mensáhe. Haʼe orerrespetaiterei oikuaágui orefiél hague Ñandejárape. Añetehápe rojogueraha porãiterei koʼág̃a”. Oiméramo ne família oñemosẽ kuri kongregasióngui, ¿ejeroviátapa Jehováre “nde pyʼaite guive”, térãpa rejeroviáta “umi mbaʼe nde repensávare oĩ porãha”? (Prov. 3:5, 6). Aníkena nderesarái Jehová ñandekorrehiha ñanderayhúgui ha iñarandu rupi. Haʼe omeʼẽ vaʼekue Itaʼýra yvyporakuéra rehehápe, upéva heʼise oñeinteresaha avei ne famíliare. Ñandejára oipota enterovéva ohupyty pe jeikove opaveʼỹva (elee 2 Pedro 3:9). Upéicharõ, pesegíkena peẽ tuakuéra pejerovia Jehová pendegia ha pendekorrehi lájare, sapyʼánte ijetuʼúramo jepe peneñeʼẽrendu hag̃ua. Iporã ningo enterovéva jaasepta pe disiplína oúva Ñandejáragui ha ani ñañemoĩ hese.

14. ¿Mbaʼéichapa Jehová ñandegia pe “tembiguái” rupive?

¹⁴ Jehová opromete kuri oñangareko, oprotehe ha omboʼetaha isiervokuérape. Haʼe ojapo upéva heta hendáicha. Por ehémplo, ojevale Itaʼýrare oñangareko hag̃ua kongregasiónre, ha Jesús ojevale pe “tembiguáire” omeʼẽ hag̃ua hiʼupy hiʼoraitépe ñanepytyvõva jasegi hag̃ua ñandefiél (Luc. 12:42). Pe “tembiguái” ñanerekomboʼe ha avei ñandekorrehi. Ikatu ningo umi mbaʼe rehendúva peteĩ diskúrsope térã releéva algún artíkulo ñande rrevístape nepytyvõma rekambia hag̃ua repensa lája, térã reñekomporta lája. Katuete ningo revyʼáne oimérire remehora raʼe, pórke péicha reheja kuri Jehová ndekorrehi (Prov. 2:1-5).

15, 16. a) ¿Mbaʼéichapa ikatu ñanepytyvõ porãve umi ansiáno? b) ¿Mbaʼépa ikatu jajapo ani hag̃ua ijetuʼueterei umi ansiánope omeʼẽ hag̃ua ñandéve konsého?

¹⁵ Cristo ojevale avei ansianokuérare oñangareko hag̃ua kongregasiónre. La Biblia heʼi omeʼẽha koʼã “kuimbaʼekuéra rregáloramo” (Efes. 4:8, 11-13). ¿Mbaʼéichapa ikatu ñanepytyvõ porãve umi ansiáno? Jajerovia vaʼerã Ñandejárare haʼekuéraicha ha jasegi pe ehémplo porã omoĩva ñandéve. Avei jasegi vaʼerã umi konsého omeʼẽva ñandéve hikuái la Biblia rupive (elee Hebreos 13:7, 17). Umi ansiáno ningo ñanderayhu ha oipota ñaĩ porã Jehová renondépe. Ohechakuaáramo jafaltaha rreunionhápe térã nañanekyreʼỹveiha, pyaʼe porã ñanepytyvõta. Mborayhúpe ñanerendúta, ñanemombaretéta ha omeʼẽta ñandéve umi konsého iporãva oĩva la Bíbliape. ¿Ndépa rehechakuaa haʼekuéra nepytyvõ jave Jehová ohechaukaha nderayhuha?

¹⁶ Ani reimoʼã ifasilha ansianokuérape oñemoñeʼẽ hag̃ua ndéve. Epensamína Natán kásore. Haʼe tekotevẽ kuri oñeʼẽ rréi Davídpe pórke omoʼã peteĩ pekádo ivaietereíva.  Katuete ningo ijetuʼúne raʼe chupe ojapo hag̃ua upéva (2 Sam. 12:1-14). Apóstol Pablo ohasa vaʼekue avei peichagua situasión. Pedro oguerohoryve vaʼekue umi kristiáno haʼévape judío, ha omboyke umi ndahaʼéivape judío. Upévare Pablo tekotevẽ kuri ipyʼaguasu okorrehi hag̃ua Pédrope, hiʼarive Pedro oĩ kuri umi 12 apóstol apytépe (Gál. 2:11-14). ¿Mbaʼépa ikatu rejapo ani hag̃ua ijetuʼueterei umi ansiánope omeʼẽ hag̃ua ndéve konsého? Eñehaʼã neumílde, ehendu ha eagradese chupekuéra. Avei entende vaʼerã Ñandejára ohechaukaha nderayhuha umi ansiáno rupive. Rejapóramo koʼã mbaʼe, katuete reñevenefisiáta ha umi ansiáno vyʼápe ojapóta hembiapo.

17. ¿Mbaʼéichapa umi ansiáno oipytyvõ kuri peteĩ ermánape?

¹⁷ Peteĩ ermána heʼi umi mbaʼe ohasa vaʼekue ymave ojapo vaieterei hague hese, ha upéva káusare ijetuʼu chupe ohayhu hag̃ua Jehovápe, ha ou kuri oñedeprimi upe haguére. Haʼe omombeʼu: “Che aikuaa kuri añeʼẽ vaʼerãha ansianokuérandi. Haʼekuéra ndachejaʼói ni ndachetratavaíri, síno chemokyreʼỹ ha chemombarete. Káda rreunión rire, peteĩva jepe ijapyteguikuéra oporandu chéve mbaʼetekópa aĩ, jepe hembiapo heta hikuái. Umi mbaʼe ahasa vaʼekue káusare apensa kuri namereseiha Ñandejára cherayhu. Péro Jehová ipasiénsia ha ojevale pe kongregasión ha umi ansiánore oikuaauka hag̃ua chéve cherayhuha. Siémpre añemboʼe animínte hag̃ua opermiti aheja chupe”.

18, 19. ¿Mbaʼépa ijetuʼuve jey pe disiplínagui? Emoĩ peteĩ ehémplo.

¹⁸ Pe disiplína ningo ijetuʼu hína, péro ijetuʼuve jey ndajaaseptáiramo pe disiplína oúva Ñandejáragui (Heb. 12:11). Caín ha rréi Sedequías omoĩ vaʼekue ehémplo vai, ha umíva ikatu ideprovécho ñandéve ani hag̃ua ñanerembiapo vai haʼekuéraicha. Ñandejára ohechárõ guare Caín ndochaʼeiha iñermánore ha ojukaseha chupe, heʼi kuri Caínpe: “¿Mbaʼéreiko la ndepochyete ha nderovapuku reikóvo? ¿Che piko ndoroguerohorymoʼãi mbaʼe reñehaʼãrõ rejapo pe iporãva? Péro rejaposéramo ivaíva, pe pekádo neraʼarõma hína nde raperãme peteĩ animál ñarõicha, ¿ha ikatúta piko ndepuʼaka hese?” (Gén. 4:6, 7). Caín nopenái pe konsého Jehová omeʼẽvare chupe, ojuka iñermánope ha upéva káusare osufri omano meve (Gén. 4:11, 12). Caín oaseptárire Jehová disiplína ndohasaʼasýi vaʼerãmoʼã.

¹⁹ Sedequías ningo haʼe vaʼekue peteĩ rréi iñaña ha ipyʼajúva. Haʼe ogoverna tiémpope, ivai vaʼekue la situasión Jerusalénpe. Proféta Jeremías oavisa jey jey kuri Sedequíaspe tekotevẽha okambia. Péro pe rréi orrechasa Jehová disiplína, ha upévare hetaiterei ou osufri (Jer. 52:8-11). Jahechaháicha, Jehová ndoipotái reiete jahasa asy (elee Isaías 48:17, 18).

20. ¿Mbaʼépa koʼẽrõite oikóta umi oaseptávare Ñandejára disiplína ha umi ndoaseptáivare?

²⁰ Koʼág̃arupi ningo heta hénte oñembohory pe disiplína Ñandejára omeʼẽvare ha nopenái voi hese. Péro koʼẽrõitéma enterove omboykéva Ñandejára disiplína ohasáta heta mbaʼe ivaietereíva (Prov. 1:24-31). Ñande katu ñañehaʼã vaʼerã ñanearandu ha ñahendu Ñandejárape ñandekorrehi jave. Proverbios 4:13 heʼi mbaʼépa iporãta jajapo: “Easeptákena rejekorrehi jave, aníkena rerrechasa upéva. Remombaʼe vaʼerã umi konsého pórke umíva nepytyvõta reikove hag̃ua”.