1. Heʼiháicha 1 Pedro 3:8, ¿mbaʼérepa ñañeñandu porã umi ojepyʼapývandi ñanderehe?

AJÉPA javyʼa ñaime jave umi persóna oñeinteresávandi ñanderehe. Haʼekuéra ningo oñehaʼã oñemoĩ ñande lugárpe ikatu hag̃uáicha ontende la ñapensáva ha ñañandúva. Péicha oikuaa la ñaikotevẽva ha ñanepytyvõ, sapyʼánte jajerure mboyve voi chupekuéra. Añetehápe ñamombaʼeterei peichagua persónape, pórke ohechauka ‘ohasa asyha ñanendive’ * (elee 1 Pedro 3:8).

2. ¿Mbaʼérepa ikatu hína ijetuʼu ñañemoĩ hag̃ua ñande rapichakuéra lugárpe?

² Ñande haʼéva kristiáno ningo ñañehaʼãmbaite ñañemoĩ ñande rapicha lugárpe, térã jahechauka jahasa asyha hendivekuéra. Péro sapyʼánte ijetuʼu jajapo hag̃ua upéva. ¿Mbaʼérepa? Pórke ñaneimperfékto (Rom. 3:23). Upévare sapyʼánte ñapensase ñandejehénte. Ikatu umi mbaʼe jahasa vaʼekue yma térã jakakuaa lája ñanemomýi ñapensa hag̃ua upéicha. Avei umi hénte opensa lája ikatu ñandeafekta. Por ehémplo koʼã ára pahápe la majoría noñeinteresái hapicháre, síno ‘ijehénte ojepyʼapy’ (2 Tim. 3:1, 2). ¿Mbaʼépa ikatu ñanepytyvõ ñañeinteresave hag̃ua ñande rapichakuérare?

3. a) ¿Mbaʼépa ñanepytyvõta ñantende porãve hag̃ua ñande rapichakuérape? b) ¿Mbaʼépa jahecháta ko artíkulope?

³ Ñañehaʼãramo jasegi Jehová ha Itaʼýra ehémplo ikatúta ñantende porãve ñande rapichakuérape. La Biblia heʼi Ñandejára haʼeha mborayhu, upéicha rupi omoĩ pe ehémplo iporãvéva (1 Juan 4:8). Jesús osegi porãiterei Itúa ehémplo (Juan 14:9).  Oĩ aja ko yvy ape ári ohechauka oiporiahuverekoha yvyporakuérape. Ko artíkulope ñepyrũrã jahecháta mbaʼéichapa Jehová ha Jesús ohechauka ojepyʼapyha ótrore. Upéi jahecháta avei mbaʼéichapa ñande ikatu jasegi iñehemplokuéra.

4. ¿Mbaʼéichapa Isaías 63:7-9 ohechauka Jehová oñeinteresaha la ohasávare isiervokuéra?

⁴ La Biblia omboʼe Jehová oñeinteresaha isiervokuérare. Por ehémplo, ñapensamína mbaʼéichapa haʼe oñeñandu vaʼekue umi israelita ohasa asýrõ guare. Ñandejára Ñeʼẽ heʼi: “Haʼekuéra ohasa asýrõ guare, haʼete voi haʼe la osufríva” (elee Isaías 63:7-9). Tiémpo rire, proféta Zacarías rupive Jehová heʼi oñemaltrata jave ipuévlope haʼeteha chupe voi oñemaltratáva. Haʼe heʼi isiervokuérape: “Oimeraẽ opokóva penderehe opoko hína che resaʼỹire” (Zac. 2:8). ¡Ajépa ohechauka porãite ko ehémplo Jehová oñeinteresaha ipuévlore!

5. Emombeʼu peteĩ ehémplo ohechaukáva mbaʼéichapa Jehová oipytyvõ isiervokuérape ohasa asy jave.

⁵ Jehová ndahaʼéi ojepyʼapýnteva isiervokuéra ohasa asy jave, síno ojapo voi tekotevẽva guive oipytyvõ hag̃ua chupekuéra. Por ehémplo, umi israelita oĩ tiémpope esklávoramo Egíptope, heta osufri kuri. Jehová ontende la isufrimiénto ha upéva omomýi chupe ojapo hag̃ua álgo. Jehová heʼi Moiséspe: “Ahechapaite hína mbaʼeichaite pevépa ohasa asy che puévlo [...]. Ha ahendu avei mbaʼeichaitépa hasẽ ha ojerure asy chéve aipytyvõ hag̃ua chupekuéra [...]. Che ahechapaite hína mbaʼéichapa ohasa asy hikuái. Chete aguenohẽta chupekuéra umi egipcio poguýgui” (Éx. 3:7, 8). Jehová oiporiahuvereko isiervokuérape, upévare osalva chupekuéra umi egípciogui. Heta tiémpo upe rire haʼekuéra oĩma kuri pe Tiérra Prometídape, ha upépe oataka chupekuéra iñenemigokuéra. ¿Mbaʼépa ojapo Jehová? “Ombyasyeterei chupekuéra ohendúgui mbaʼeichaitépa ipyahẽ hikuái, oĩ rupi ojopy ha otrata vaietereíva chupekuéra”. Jehová ontende rupi la ohasáva hikuái, omondo umi huéspe osalva hag̃ua ipuévlope iñenemigokuéragui (Juec. 2:16, 18).

6. Emombeʼu peteĩ istória ohechaukáva Jehová orekoha enkuénta mbaʼéichapa oñeñandu peteĩ persóna ojavýva.

⁶ Jehová ningo ontende mbaʼéichapa oñeñandu  isiervokuéra, noĩporãiramo jepe la opensáva hikuái. Jahechamína mbaʼépa oiko vaʼekue Jonás rehe. Ñandejára omondo kuri chupe Nínivepe heʼi hag̃ua umi héntepe oñehunditaha. Péro umi ninivita ou oñarrepenti ha Jehová operdona chupekuéra. Jonás “orrenegaiterei voi” pórke noñekumplíri la haʼe heʼi vaʼekue. Upéicharõ jepe Jehová ipasiénsia hese ha oipytyvõ chupe okambia hag̃ua opensa lája (Jon. 3:10–4:11). Tiémpo rire Jonás ontende la oiko vaʼekue, ha hiʼarive Ñandejára heʼi chupe oskrivi hag̃ua umi mbaʼe ohasáva ikatu hag̃uáicha ideprovécho ñandéve (Rom. 15:4). *

7. ¿Mbaʼépa jahechakuaa Jehová otrata lájare isiervokuérape?

⁷ Jehová otrata lája ipuévlope ohechauka ontende porãha isiervokuérape. Haʼe ontende porã mbaʼéichapa ñañeñandu káda uno jahasa asy jave. Jehová ‘oikuaa porã yvypóra korasõ’ (2 Crón. 6:30). Haʼe ontende umi mbaʼe ñanekevrantáva, mbaʼeichaitépa ñañeñandu ha moõite pevépa ikatu ñaaguanta. La Biblia heʼi: “Haʼe ndohejamoʼãi pehasa mbaʼeve ndaikatumoʼãiva pegueropuʼaka” (1 Cor. 10:13). ¡Ajépa javyʼaite jaikuaávo upéva!

8-10. ¿Mbaʼe mbaʼépa oipytyvõne raʼe Jesúspe oñeinteresa hag̃ua umi héntere?

⁸ Jesús oĩrõ guare ko yvy ape ári, ojepyʼapy vaʼekue ipyʼaite guive umi héntere. ¿Mbaʼépa omomýi chupe oñeñandu hag̃ua upéicha? Por lo méno mbohapy mbaʼe. Primero, jahecháma haguéicha Jesús osegi porãiterei Itúa yvagapegua ehémplo. Jehová ojapoháicha, Jesús ohayhu avei yvyporakuérape. Jehová okreárõ guare opa mbaʼe, Jesús oipytyvõ kuri Itúape ha upéva ombovyʼaiterei chupe. Péro haʼe ou “ohayhueterei yvyporakuérape” (Prov. 8:31). Upéva omomýi chupe oñeinteresa hag̃ua umi hénte oñeñandu lájare.

⁹ Segundo, Jehová ojapoháicha, Jesús oikuaa avei mbaʼépa oĩ ñande pyʼapýpe. Haʼe oikuaa kuri mbaʼéichapa oñeñandu umi hénte ha mbaʼépa omomýi chupekuéra ojapo hag̃ua peteĩ mbaʼe (Mat. 9:4; Juan 13:10, 11). Jesús ohechakuaa vaʼekue umi persóna oñekevranta ha oñeñandu jave yvýre, ha oñemoĩ ilugarpekuéra. Upéva omomýi chupe okonsola hag̃ua chupekuéra (Is. 61:1, 2; Luc. 4:17-21).

¹⁰ Tercero, Jesús ohasa vaʼekue avei umi situasión ijetuʼúva ohasáva umi hénte. Amalisia Jesús okakuaa vaʼekue peteĩ família imboriahúvape. Haʼe ombaʼapo kuri ituanga Joséndi, péicha oaprende mbaʼépa heʼise ñambaʼapo pohýi (Mat. 13:55; Mar. 6:3). Posívlemente José omano kuri Jesús omoñepyrũ mboyvemi ipredikasión. Upévare Jesús oikuaáne raʼe avei mbaʼépa heʼise japerde peteĩ jahayhúvape. Avei hogapýpe oĩ kuri ndoroviáiva la haʼe ogueroviáva (Juan 7:5). Koʼã mbaʼe oipytyvõne raʼe Jesúspe ontende hag̃ua umi mbaʼe ijetuʼúva ohasáva umi hénte.

11. ¿Mbaʼépa ohechauka porãiterei Jesús oñeinteresaha umi héntere? Emyesakã. (Ehecha pe taʼanga oĩva ko rrevísta apére).

¹¹ Jesús ojapo vaʼekue avei milágro, ha péva koʼýte ohechauka porã kuri oñeinteresaha umi héntere. Péro haʼe ndahaʼéi ojapóva umi milágro ojapo vaʼerãgui reínte, síno “oiporiahuvereko” umi ohasa asývape (Mat. 20:29-34; Mar. 1:40-42). Ñapensamíntena mbaʼéichapa oñeñandúne raʼe oguerahárõ guare apárte peteĩ kuimbaʼe nohendúivape omonguera hag̃ua chupe. Avei omoingove jeýrõ guare peteĩ viúda membýpe (Mar. 7:32-35; Luc. 7:12-15). Jesús oñemoĩ vaʼekue umi persóna lugárpe ha upévare oipytyvõse chupekuéra.

12. ¿Mbaʼéichapa Juan 11:32-35 ohechauka Jesús oñemoĩ hague Marta ha María lugárpe?

 ¹² Jesús oñemoĩ vaʼekue avei Marta ha María lugárpe. Por ehémplo, ohechárõ guare mbaʼeichaitépa oñembyasy hikuái iñermáno Lázaro omano haguére, “Jesús hasẽ” avei (elee Juan 11:32-35). Péro haʼe nahasẽi ndaikatumoʼãvéima rupi ohasa tiémpo peteĩ iñamigoiténdi, amo ipahápe ningo oikuaa porã omoingove jeytaha Lázarope. Jesús hasẽ pórke oñemoĩ iñamigakuéra lugárpe ha ontende mbaʼéichapa oñeñandu hikuái.

13. ¿Mbaʼérepa ñanemokyreʼỹ jaikuaávo Jesús ontende porã hague umi hénte ohasáva?

¹³ Ñande ndahaʼéi perfékto Jesús haʼe haguéicha, upéicharõ jepe heta mbaʼe ikatu ñaaprende chugui pórke haʼe ohechauka vaʼekue ontendeha umi hénte ohasáva. Jahayhu ningo Jesúspe jaikuaa rupi mbaʼéichapa oporotrata vaʼekue (1 Ped. 1:8). Javyʼa jaikuaa haguére ogovernaha hína Ñandejára Rréino ha koʼẽrõitéma oipeʼataha opa mbaʼe ñanembosufríva. Hiʼarive haʼe yvypóra vaʼekue, upévare ndaipóri ótro ikatu vaʼerã oipytyvõ porãve yvyporakuérape ojerrekupera jey hag̃ua umi mbaʼe vai Satanás goviérno ojapo vaʼekuégui. Ajépa javyʼaite jareko haguére peteĩ Rréi ikatúva “ñandeporiahuvereko ñanekangy jave” (Heb. 2:17, 18; 4:15, 16).

14. Heʼiháicha Efesios 5:1, 2, ¿mbaʼépa ñanekyreʼỹ vaʼerã jajapo hag̃ua?

¹⁴ Jajepyʼamongetávo pe ehémplo omoĩvare ñandéve Jehová ha Jesús, ñanekyreʼỹve ikatu hag̃uáicha ñañemoĩ ñande rapichakuéra lugárpe (elee Efesios 5:1, 2). Ñande ningo ndajaikuaái mbaʼépa umi ótro opensa ha oñandu, Jehová ha Jesús oikuaaháicha. Upéicharõ jepe, ikatu hína ñañehaʼã ñantende mbaʼéichapa oñeñandu ñande rapichakuéra ha mbaʼépa oikotevẽ hikuái (2 Cor. 11:29). Ko múndope ningo umi hénte opensa ijehénte, péro ñande ñañehaʼã jajapo Pablo heʼi vaʼekue: “Aníkena pejapo peẽmente ou porãva, síno pejepyʼapy vaʼerã avei pende rapicháre” (Filip. 2:4).

15. ¿Mávapa koʼýte tekotevẽ ontende hapichakuérape?

¹⁵ Umi ansiáno kongregasiongua koʼýte oñemoĩ vaʼerã umi ótro lugárpe. Haʼekuéra oikuaa tekotevẽha okuida porã umi ovecha ojehejávare ikargopekuéra (Heb. 13:17). Upévare oñehaʼã vaʼerã ontende hikuái umi ermánope, oipytyvõ hag̃ua chupekuéra. ¿Mbaʼéichapa umi ansiáno ikatu oñemoĩ iñermanokuéra lugárpe?

16. ¿Mbaʼépa ojapo umi ansiáno oñemoĩva umi ótro lugárpe, ha mbaʼérepa iñimportánte upéva?

¹⁶ Umi ansiáno oñemoĩva umi ótro lugárpe ohasave tiémpo iñermanokuérandi. Haʼekuéra ombaʼeporandu jave umi ermánope, ipasiénsia ojapysaka porã hag̃ua hesekuéra. Upéva ningo iñimportanteterei, koʼýte oĩramo ermáno omombeʼuséva chupekuéra la oñandúva péro ndoikuaái mbaʼéichapa heʼíta (Prov. 20:5). Umi ansiáno oñemotiémpo jave ermanokuérape g̃uarã, upe rire ojeroviave hikuái ojuehe, ojoayhuve ha imbareteve pe amista orekóva (Hech. 20:37).

17. ¿Mbaʼépa pyʼỹinte umi ermáno omombaʼeve ansianokuéragui? Emoĩ peteĩ ehémplo.

¹⁷ Ermanokuéra omombaʼeterei umi ansiáno ohechauka jave oñeinteresaha ótrore. Heta oĩ voi heʼíva upéva haʼeha la omombaʼevéva chuguikuéra. ¿Mbaʼérepa? Adelaide heʼi: “Ifasilve ñañeʼẽ hendivekuéra pórke jaikuaa porã katuete ñanentendetaha hikuái”. Haʼe heʼi avei: “Orreaksiona lájare hikuái ñañeʼẽ jave hendivekuéra, jahechakuaa oñemoĩha ñande lugárpe”. Peteĩ ermáno imanduʼa avei peteĩ mbaʼe oiko vaʼekuére, ha heʼi: “Amombeʼu aja peteĩ ansiánope che provléma, oñepyrũ hesay  pororopa. Núnka ndacheresaraimoʼãi upévagui” (Rom. 12:15).

18. ¿Mbaʼéichapa ikatu jahechauka ñañeinteresaha ñande rapichakuérare?

¹⁸ Jaikuaaháicha, ndahaʼéi ningo ansianokuérante la oñemoĩ vaʼerã hapichakuéra lugárpe. Enterovéva jajapo vaʼerã upéva. Por ehémplo, iporã ñañehaʼã ñantende la ohasáva ñane hentekuéra ha ñane ermanokuéra kongregasiongua. Ñañeinteresa vaʼerã avei mitãrusukuérare, umi hasykatúvare, ijedávare térã umi omano vaʼekuére chugui peteĩ ohayhúva. Ñaporandu umi ermánope mbaʼéichapa oñeñandu, ha jajapysaka porã hesekuéra. Ñañehaʼãmbaite ikatu hag̃uáicha ohechakuaa hikuái ñantendeha la ohasáva, ha jajeofrese ñaipytyvõ hag̃ua la ikatúvape. Péicha jajapóramo, jahechaukáta japorohayhu añeteha (1 Juan 3:18).

19. ¿Mbaʼérepa ñañatende porã vaʼerã ñaipytyvõta jave ñande rapichápe?

¹⁹ Ñañatende vaʼerã avei ñaipytyvõta jave ñande rapichakuérape. ¿Mbaʼérepa? Pórke naentéroi ñarreaksiona peteĩchapa jahasa jave peteĩ situasión ijetuʼúva. Oĩ naiprovlemaietéva voi oñeʼẽ hag̃ua, péro oĩ noñeʼẽséiva la iprovlémare. Upévare ñaporopytyvõ jave, ani ñaporandu umi mbaʼe oinkomodátava ñande rapichápe (1 Tes. 4:11). Sapyʼánte ikatu oĩ omombeʼúva ñandéve mbaʼéichapa oñeñandu, péro ñande nañaiméi de akuérdo la opensa lájare. Péicha jave ani ñanderesarái omombeʼunteha hína ñandéve mbaʼéichapa haʼe oñeñandu. Iporã jasegi ko konsého oĩva la Bíbliape: “Opavave tekotevẽ ipyaʼe ohendukuaa hag̃ua ha imbegue oñeʼẽ [...] hag̃ua” (Mat. 7:1; Sant. 1:19).

20. ¿Mbaʼépa jahecháta pe ótro artíkulope?

²⁰ Ndahaʼéi ningo kongregasiónpe añónte la ñañehaʼã vaʼerã ñañemoĩ ñande rapichakuéra lugárpe. Jajapo vaʼerã avei upéva ñamboʼe jave la Biblia ñande rapichakuérape. ¿Mbaʼéichapa ikatu jahechauka ñañeinteresaha ótrore japredika ha ñamboʼe jave umi héntepe? Pe artíkulo oúvape ñañeʼẽta upévare.