1. ¿Mbaʼérepa Jesús ojerure vaʼekue Jehovápe oñangareko hag̃ua idisipulokuérare?

PE ÚLTIMO pyhare Jesús ohasa vaʼekue yvypóraicha, haʼe opensa vaʼekue entéro umi provléma idisipulokuéra ombohováitavare. Haʼe ohayhu rupi iñamigokuérape, ojerure Itúape ‘oñangareko hag̃ua hesekuéra oĩgui Satanás’ (Juan 17:14, 15). Jesús oikuaa vaʼekue haʼe oho rire yvágape, Satanás pe Diablo osegitaha oataka umi oservisévape Jehovápe. Upéicha rupi Jehová puévlo oikotevẽta ojeprotehe chupekuéra.

2. ¿Mbaʼérepa ikatu ñaime segúro Jehová ombohovaitaha ñane ñemboʼe?

² Jehová ohayhúgui Itaʼýra Jesúspe, ombohovái vaʼekue chupe iñemboʼe. Ha ñañehaʼãmbaitéramo ñaneñeʼẽrendu Jehovápe, haʼe ñanderayhúta avei, ha ombohováita ñane ñemboʼe jajerure jave chupe ñanepytyvõ ha ñandeprotehe hag̃ua. Jehová ningo peteĩ Túa ojepyʼapýva ifamíliare, ha haʼe osegíta mborayhúpe oñangareko umi itaʼýra ha itajyrakuérare. Haʼe ojapóta upéva héra rehehápe, térã ani hag̃ua oñemongyʼa ni oñeñeʼẽ vai hese.

3. ¿Mbaʼérepa koʼág̃arupi ñaikotevẽ Jehová ñandeprotehe?

³ Koʼág̃a mas ke núnka ñaikotevẽ Jehová ñandeprotehe. Satanáspe ojeitýma yvágagui “ha haʼe ipochyeterei hína” (Apoc. 12:12). Haʼe okonvense umi ñandepersegívape opensa hag̃ua péicha ojapóvo “oserviha Ñandejárape” (Juan 16:2). Oĩ avei umi ndojeroviáiva Ñandejárare ha ñandepersegíva ñanediferénte rupi umi hénte oĩvagui ko múndope. Tahaʼe haʼéva pe omomýiva chupekuéra ñandepersegi hag̃ua, ñande ndajakyhyjéi. ¿Mbaʼérepa? Pórke Ñandejára Ñeʼẽ heʼi voi: “Ñande Ruvicha siémpre okumpli iñeʼẽ, ha haʼe omombaretéta pende jerovia ha pendeprotehéta Satanásgui” (2 Tes. 3:3). ¿Mbaʼéichapa Jehová ñandeprotehe? Jahechamína mokõi mbaʼe.

4. Heʼiháicha Efesios 6:13-17, ¿mbaʼépa Jehová omeʼẽ ñandéve ñandeprotehe hag̃ua?

⁴ Jehová omeʼẽ ñandéve peteĩ armadúra ikatúva ñandeprotehe Satanás ñandeataka jave (elee Efesios 6:13-17). Ko armadúra oúva Ñandejáragui ningo imbarete ha oikoite. Péro ikatu hag̃uáicha ñandeprotehe jareko vaʼerã ñandejehe káda párte, ha ani jaipeʼa ñandejehegui. Koʼág̃a jahechamíta káda párte orekóva pe armadúra.

5. ¿Mbaʼépa orrepresenta pe sínto, ha mbaʼérepa ñamoĩ vaʼerã ñande kuʼáre?

⁵ Peteĩ síntoicha ñamoĩ ñande kuʼáre pe añetegua. Upe sínto orrepresenta hína pe añetegua oĩva la Bíbliape. ¿Mbaʼérepa ñamoĩ vaʼerã ñande kuʼáre? Pórke ñandeprotehéta ani hag̃ua ñanembotavy Satanás, “pe japu ruvicha” (Juan 8:44). Haʼe hetaiterei áñoma oiko ijapu ha “ombotavy ko múndo kompletoitépe” (Apoc. 12:9). ¿Péro mbaʼéichapa ñamoĩ ñande kuʼáre peteĩ síntoicha pe añetegua? Jajapo upéva ñaaprendévo pe añetegua Jehovágui, ‘jahejávo pe espíritu sánto ñandegia, jasegi umi enseñánsa verdadéra’ jaadora jave chupe, ha ñaneonrrádo jave opa mbaʼépe (Juan 4:24; Efes. 4:25; Heb. 13:18).

6. ¿Mbaʼépa orrepresenta pe armadúra omoʼãva ñande pytiʼa hustísiape, ha mbaʼérepa ñamoĩ vaʼerã ñandejehe?

⁶ Pe armadúra omoʼãva ñande pytiʼa hustísiape orrepresenta Jehová mandamientokuéra ihústova. ¿Mbaʼérepa ñamoĩ vaʼerã ñandejehe upéva? Pe armadúra oproteheháicha pe soldádo korasõ, Jehová mandamientokuéra oprotehéta ñande pyʼapy, upéicharõ umi mbaʼe vai ojejapóva ko múndope ndoperhudikamoʼãi ñane korasõ (Prov. 4:23). Jehová ohaʼarõ voi jahayhu ha jaservi chupe ñande pyʼaite guive (Mat. 22:36, 37). Upévare Satanás oñehaʼã ñanembopyʼamokõi ñandegusta hag̃ua umi mbaʼe oĩva ko múndope ha ombojeguarúva Jehovápe (Sant. 4:4; 1 Juan 2:15, 16). Ha nañandereitýiramo ko ñuhãme, haʼe oipurúta pe persekusión oñehaʼã hag̃ua ojapoka ñandéve peteĩ mbaʼe ndogustáiva Jehovápe.

7. ¿Mbaʼéichapa ñamoĩ ñandejehe pe armadúra omoʼãva ñande pytiʼa hustísiape?

⁷ Jareko hag̃ua ñandejehe pe armadúra omoʼãva ñande pytiʼa hustísiape, jaasepta vaʼerã Jehová mandamientokuéra ohechaukáva mbaʼépa iporã ha mbaʼépa ivai, ha jaiko umi mandamientokuéra heʼiháicha (Sal. 97:10). Ikatu oĩ opensáva Jehová ojopyetereimaha ñanendive imandamientokuéra rupive. Péro ñande ndajasegivéiramo umi konsého oĩva la Bíbliape, jajoguáta peteĩ soldádo oipeʼávape ko iñarmadúra oĩ jave gerrahápe openságui ipohyietereimaha. ¡Ajépa ivyroitéta ojapóramo upéva! Péro ñande jahayhúramo Jehovápe, ndajahechamoʼãi imandamientokuéra ‘peteĩ kárgaicha’, síno jahechakuaáta ikatuha ñandesalva (1 Juan 5:3, nóta).

8. ¿Mbaʼépa heʼise ñamoĩha ñande pýre pe sandália japredika hag̃ua?

⁸ Pablo ñanemokyreʼỹ avei ñamoĩ hag̃ua ñande pýre pe sandália ñaime hag̃ua preparádo japredika hag̃ua umi notísia porã oñeʼẽva pyʼaguapýre. Upéva heʼise siémpre ñaime vaʼerãha preparádo ñamombeʼu hag̃ua umi notísia porã oñeʼẽva pe Rréinore. Ñañeʼẽ jave ótrope la Biblia heʼívare, ñamombarete hína ñande jerovia. Ñanemokyreʼỹeterei ningo jahechávo mbaʼéichapa Jehová puévlo oĩva ko yvy tuichakuére oheka oportunida opredika hag̃ua. Por ehémplo, opredika hikuái itravahohápe, eskuélape, ogahárupi, negosioháre, oho jave oñemu, ovisita jave ipariénte ndahaʼéivape Testígo, oñemongeta jave ikonosidokuérandi ha ndaikatúi jave jepe osẽ hógagui peteĩ tiémpore. Jajúramo jakyhyjeterei ha ndajapredikavéi, jajoguáta peteĩ soldádo oipeʼávape isandália gerrahápe, sapyʼaitérõ g̃uarã ipy rasypátama ha ikatu oñelastima. Upéicha rupi ijetuʼuetereíta chupe oñedefende hag̃ua ojeataka jave, ha  ndaikatumoʼãvéima ojapo ikomandánte heʼíva chupe.

9. ¿Mbaʼérepa jaguereko vaʼerã pe eskúdo guasu?

⁹ Ñañakarama vaʼerã ñande jeroviáre peteĩ eskúdo guasúicha, upéva heʼise jajeroviaha Jehováre ha entéro umi ipromesakuéra oñekumplitaha. Upe jerovia ningo ñanepytyvõ ‘ñambogue hag̃ua kompletoite umi flécha hendýva opoíva Satanás’. ¿Mbaʼérepa jareko vaʼerã ko eskúdo guasu? Pórke ñandeprotehéta ani hag̃ua ñanembotavy umi apóstata omboʼéva, ha ani hag̃ua ñañedesanima oĩ jave oñembohorýva ñanderehe ha oapoʼíva umi mbaʼe jagueroviáva. Ñande jajúramo ndajajeroviavéi, ndajarekomoʼãi fuérsa ñaneñeʼẽrendu hag̃ua Jehovápe oĩ jave ñandejopýva ñamboyke hag̃ua imandamientokuéra. Péro jarrechasa jave umi mbaʼe ndogustáiva Jehovápe ñande travahohápe térã eskuélape, ñande jerovia ñandeprotehe hína peteĩ eskúdoicha (1 Ped. 3:15). Jarrechasa jave peteĩ traváho ñagana porãvetahápe péro nopermitimoʼãiva ñandéve jaservi porã Jehovápe, ñande jerovia ñandeprotehe hína peteĩ eskúdoicha (Heb. 13:5, 6). Ha jasegi jave jaservi Jehovápe oĩramo jepe oñemoĩva ñanderehe, ñande jerovia ñandeprotehe hína peteĩ eskúdoicha (1 Tes. 2:2).

10. ¿Mbaʼépa pe kásko de salvasión, ha mbaʼérepa ñamoĩ vaʼerã ñane akãre?

¹⁰ Pe kásko de salvasión haʼe pe esperánsa  omeʼẽva ñandéve Jehová. Upéva hína pe esperánsa haʼe ovendesitaha enterove ojapóvape ivolunta, ha omanóramo jepe hikuái haʼe omoingove jeytaha chupekuéra (1 Tes. 5:8; 1 Tim. 4:10; Tito 1:1, 2). Pe kásko oproteheháicha peteĩ soldádo akã, pe esperánsa de salvasión oprotehe umi mbaʼe ñapensáva. ¿Mbaʼéichapa? Pe esperánsa ñanepytyvõ ñapensa meme hag̃ua Ñandejára promesakuérare, ha ani hag̃ua ñandedesahusia umi provléma. ¿Mbaʼéichapa ñamoĩ ñane akãre ko kásko? Jajapo upéva jasegívo ñapensa Ñandejára opensaháicha. Por ehémplo, ñande nañamoĩri ñane esperánsa umi rrikésa ikatúvare oñehundi, síno Ñandejárare (Sal. 26:2; 104:34; 1 Tim. 6:17).

11. ¿Mbaʼépa hína pe espáda omeʼẽva pe espíritu sánto, ha mbaʼérepa tekotevẽ jaipuru?

¹¹ Pe espáda omeʼẽva pe espíritu sánto haʼe hína Ñandejára Ñeʼẽ la Biblia. Pe espáda oreko podér ohundiete hag̃ua opaichagua japu, ha ñaneguenohẽ hag̃ua umi enseñánsa fálsa poguýgui, ha avei umi vísio poguýgui (2 Cor. 10:4, 5; 2 Tim. 3:16, 17; Heb. 4:12). Ñande ningo ñaaprende jaipurukuaa hag̃ua upe espáda jastudiávo ñaneañoháme, ha avei umi entrenamiénto omeʼẽva rupive ñandéve Ñandejára organisasión (2 Tim. 2:15). Upéicharõ, Jehová omeʼẽ ñandéve pe armadúra ñandeprotehe hag̃ua, péro omeʼẽ avei ñandéve ótra kósa ipoderosoitereíva. ¿Mbaʼépa hína upéva?

12. ¿Mbaʼépa avei ñaikotevẽ, ha mbaʼérepa?

¹² Peteĩ soldádo ikatupyrýva oikuaa ndaikatumoʼãiha ogana haʼeño peteĩ ehérsito tuichávape. Haʼe oikotevẽ umi ótro soldádore ogana hag̃ua. Upéicha avei ñande ndaikatumoʼãi ñagana ñaneañónte Satanáspe ha umi isegidorkuérape. Ñande ningo ñaikotevẽ ñane ermáno ha ermanakuérare. Upévare Jehová omeʼẽ ñandéve ‘enterove ermanokuéra oĩva ko múndope’, ha haʼekuéra katuete ñanepytyvõta (1 Ped. 2:17).

13. Heʼiháicha Hebreos 10:24, 25, ¿mbaʼéichapa ñanepytyvõ umi ñane rreunionkuéra?

¹³ Ñande ningo jarresivi avei pe ajúda ñaikotevẽva jahávo umi rreuniónpe (elee Hebreos 10:24, 25). Sapyʼánte enterove ñañedesanimánte voi, upéva oiko jave ñanderehe umi rreunión ikatu ñanemombarete. Tuichaiterei ningo ñanemokyreʼỹ umi komentário ojapóva ñane ermanokuéra ipyʼaite guive. Umi diskúrso bíblico ha umi demostrasión ojapóva hikuái ñanemombarete jasegi hag̃ua jaservi Jehovápe. Ha ñañeñandu porãiterei ñañemongetávo hendivekuéra rreunión mboyve ha opa rire (1 Tes. 5:14). Avei ñane rreunionkuéra omeʼẽ ñandéve la oportunida ñaipytyvõ hag̃ua ótrope, ha upéva ñanembovyʼa (Hech. 20:35; Rom. 1:11, 12). Umi ñane rreunión ñanepytyvõ avei ótro hendáicha. Ñanepytyvõ voi oiko hag̃ua ñandehegui peteĩ soldádo ikatupyrýva japredika ha ñaporomboʼe porãve hag̃ua. Por ehémplo, ñaaprende jaipurukuaa hag̃ua umi puvlikasión oĩva ñande kit de enseñánzape. Upévare jajeprepara porãkena umi rreunionrã, jajapysaka ha ñañatende porãkena ñaime jave upépe. Ha opa rire katu, jajapo umi mbaʼe ñaaprende vaʼekue. Upéicha jajapóramo, oikóta ñandehegui “Cristo Jesús soldádo teete” (2 Tim. 2:3).

14. ¿Mávapa avei ñanepytyvõ hína?

¹⁴ Ñande jareko avei ñanepytyvõ hag̃ua millones umi ánhel ipoderosoitéva. Ñapensamínte mbaʼépa peteĩ ánhel añónte ikatu ojapo (Is. 37:36). Ha koʼág̃a ñapensami mbaʼépa ikatúne ojapo peteĩ ehérsito kompletoite de ánhel ipoderosoitereíva. Ndaipóri ni peteĩ kuimbaʼe ni demónio ikatúva ogana Jehová ehérsito ipoderosoitévape. Jaikuaa ningo Jehová ipoderosoitereiha, upévare haʼe oĩramo ñanendive ndaiporimoʼãi ehérsito ipuʼaka  vaʼerã ñanderehe (Juec. 6:16). ¡Upéva ningo siertoite! Ñanemanduʼákena koʼã mbaʼére peteĩ ñane kompañéro de traváho, de eskuéla, térã peteĩ ñane pariénte ndahaʼéiva Testígo heʼi térã ojapo jave peteĩ mbaʼe ñanemoñeñandu vaíva. Ñanemanduʼákena nañaimeiha ñaneaño ko gérrape. Ñande jasegi hína pe gía omeʼẽva Jehová ha haʼe katuete ñanepytyvõta.

15. Heʼiháicha Isaías 54:15, 17, ¿mbaʼérepa avave ndaikatúi ojoko Ñandejára puévlope anive hag̃ua opredika?

¹⁵ Ko múndo oĩva Satanás poguýpe ndaijaʼéi ñanderehe heta mbaʼére. Ñande ningo ndajaikeiete voi polítikape ha ndajahái gerrahápe. Jaikuaauka Ñandejára réra, japredika pe Irréino añoite oguerutaha pyʼaguapy ha ñakumpli umi imandamientokuéra ihústova. Ñande jaikuaauka la héntepe pe ogovernáva ko múndo haʼeha pe japu ruvicha ha asesíno (Juan 8:44). Ha ñamombeʼu Satanás múndo koʼẽrõitéma oñehunditaha. Upéicharõ jepe, Satanás ha umi isegidorkuéra núnka ndojokomoʼãi pe predikasión. Upéva rangue, ñande jasegíta ñamombaʼeguasu Jehovápe, ha jaipurúta voi opa mbaʼe jarekóva jajapo hag̃ua upéva. Satanás ipoderosoitereíramo jepe, koʼag̃aite peve ndaikatúi ñandejoko anive hag̃ua ñamog̃uahẽ umi notísia porã ko múndo tuichakuére. Koʼã mbaʼe ningo ikatu jahupyty Jehová ñandeprotehe rupínte (elee Isaías 54:15, 17).

16. ¿Mbaʼéichapa Jehová osalváta ipuévlope pe jehasa asy guasu aja?

¹⁶ ¿Mbaʼépa ñaneraʼarõ hína amo gotyove? Pe jehasa asy guasu aja, Jehová ojapóta mokõi mbaʼe ijojahaʼỹva ñandesalva hag̃ua. Primero, haʼe osalváta isiervokuéra ifiélvape ág̃a ohundika vove umi governantekuérape Babilonia Guasu, orrepresentáva kompletoite umi rrelihión fálsape (Apoc. 17:16-18; 18:2, 4). Segundo, haʼe osalváta ipuévlope ág̃a ohundi vove Armagedónpe pe párte hembýva Satanás múndogui (Apoc. 7:9, 10; 16:14, 16).

17. ¿Mbaʼéichapa ñanevenefisia jasegíramo ñañemoag̃ui Jehováre?

¹⁷ Ñande jasegíramo ñañemoag̃ui Jehováre, Satanás ndaikatumoʼãi ojapo ñanderehe mbaʼeve ndorekomoʼãiva solusión. Jaʼe porãsérõ g̃uarã, Satanás hína pe oñehundietétava (Rom. 16:20). Upévare ñamoĩkena ñandejehe pe armadúra kompletoite, ha ani jaipeʼa ñandejehegui. Aníkena ñañehaʼã ñañorairõ ñaneaño Satanás ha imúndo kóntrape. Ñaipytyvõkena ñane ermáno ha ermanakuérape, ha jasegi pe gía omeʼẽva Jehová. Jajapóramo upéicha, ikatu ñaime segúro ñande Ru yvagapegua ñanderayhuetéva ñanemombarete ha ñandeprotehetaha (Is. 41:10).