1. ¿Mbaʼeichagua provlémapa ombohovái Jehová siervokuéra?

¿NDÉPA rehasa asy hína peteĩ provléma káusare? Ikatu oime kongregasiónpe peteĩ ermáno ojapo raʼe nderehe peteĩ mbaʼe nemoñeñandu vaíva (Sant. 3:2). Ikatu ne kompañéro de traváho, de eskuéla térã kolehiopegua oñembohory nderehe reservi haguére Jehovápe (1 Ped. 4:3, 4). Térã umi nde rogaygua oñehaʼãmbaite hína ndejoko anivéma hag̃ua reho rreunionhápe, térã reñeʼẽ ótrope umi mbaʼe regueroviávare (Mat. 10:35, 36). Oiméramo upe rehasáva ijetuʼueterei, ikatu voi repensa iporãvetaha ndereservivéi Jehovápe. Péro ikatu reime segúro tahaʼe haʼéva umi provléma rehasáva, Jehová nemoarandutaha redesidi porã hag̃ua, ha nemombaretetaha reaguanta hag̃ua.

2. Heʼiháicha Romanos 15:4, ¿mbaʼéichapa ikatu ñanepytyvõ jaleéramo la Biblia?

² Jehová ojasegura ojeskrivi hag̃ua la Bíbliape umi ehémplo ohechaukáva mbaʼéichapa umi yvypóra imperfékto ikatu vaʼekue oaguanta umi provléma. ¿Mbaʼérepa ojapo upéva? Ikatu hag̃uáicha ñaaprende chuguikuéra. Jehová ojevale vaʼekue apóstol Páblore oskrivi hag̃ua pe jatopáva Romanos 15:4-pe (elee). Jalee jave umi rreláto, umíva ñanemokyreʼỹ ha omeʼẽta ñandéve esperánsa. Péro upearã ndahaʼéi jaleénte vaʼerã la Biblia, síno jaheja vaʼerã Ñandejára Ñeʼẽ okambia umi mbaʼe ñapensáva ha ñañandúva. Por ehémplo, ¿mbaʼépa ikatu jajapo ñaikotevẽramo peteĩ konsého jagueropuʼaka hag̃ua peteĩ provléma? Jajapokuaa koʼã 4 mbaʼe: 1) Ñañemboʼe, 2) ñañeimahina umi mbaʼe oiko vaʼekue, 3) jajepyʼamongeta ha 4) ñamoĩ en práktika. Jahechamína mbaʼéichapa ikatu jajapo káda uno koʼã mbaʼe. * Upéi jaipurúta koʼã mbaʼe  jastudia hag̃ua rréi David ha apóstol Pablo ohasa vaʼekue, ha ñaaprende hag̃ua iñehemplokuéragui.

3. ¿Mbaʼépa jajapo vaʼerã jalee mboyve la Biblia, ha mbaʼérepa?

³ 1) Ñañemboʼe. Jalee mboyve la Biblia, jajerure Jehovápe tañanepytyvõ jahecha hag̃ua mbaʼéichapa ikatu ñanevenefisia umi mbaʼe jaleéva. Por ehémplo, jaikuaaséramo mbaʼépa jajapóta jareko jave peteĩ provléma, jajerurekuaa Jehovápe tañanepytyvõ jatopa hag̃ua la Bíbliape umi konsého ñanepytyvõtava jadesidi porã hag̃ua (Filip. 4:6, 7; Sant. 1:5).

4. ¿Mbaʼépa ikatu jajapo ideprovechove hag̃ua ñandéve umi rreláto oĩva la Bíbliape?

⁴ 2) Ñañeimahina umi mbaʼe oiko vaʼekue. Jehová ñandeapo vaʼekue ikatu hag̃uáicha jaipuru ñane imahinasión. Upévare jalee jave peteĩ rreláto oĩva la Bíbliape, ñañehaʼã ñapensa ñaimeha upe lugárpe, ha ñande voi haʼeha upe persóna oñeñeʼẽha. Ñañehaʼã jahecha umi mbaʼe haʼe ohecha vaʼekue, ha ñañandu umi mbaʼe haʼe oñandu vaʼekue. Péicha ideprovechovéta ñandéve umi rreláto jaleéva.

5. ¿Mbaʼépa heʼise jajepyʼamongeta ha mbaʼéichapa ikatu jajapo upéva?

⁵ 3) Jajepyʼamongeta. Jajepyʼamongeta heʼise ñapensa porãha upe jaleévare ha mbaʼéichapa pe informasión ideprovécho ñandéve. Upéva ñanepytyvõ ñakonekta hag̃ua pe ñaaprendéva hína umi mbaʼe jaikuaámavandi voi, péicha ñantende porãve hag̃ua peteĩ rreláto. Jaleéramo la Biblia ha ndajajepyʼamongetái hese, haʼete ñamoĩva mesa ári peteĩ kuatia ha umi lápi de kolór, péro ndajadivuhái mbaʼeve. Péro jajepyʼamongetáramo, haʼete jajagarráva pe kuatia ha umi lápi de kolór, ha jajapo peteĩ divúho iporãitereíva ha ñapintapa voi. Jajepyʼamongeta hag̃ua ikatu ñañeporandu: “¿Mbaʼépa ojapo upe persóna osolusiona hag̃ua iprovléma? ¿Mbaʼéichapa Jehová oipytyvõ chupe? ¿Mbaʼéichapa ikatu aipuru umi mbaʼe aaprendéva agueropuʼaka hag̃ua umi provléma arekóva?”.

6. ¿Mbaʼérepa ñamoĩ vaʼerã en práktika umi mbaʼe ñaaprendéva?

⁶ 4) Ñamoĩ en práktika. Jesús heʼi vaʼekue ndajajapóiramo umi mbaʼe ñaaprendéva, jajoguataha peteĩ kuimbaʼe ojogapo vaʼekuépe yvykuʼi ári. Haʼe heta ombaʼapo upearã, péro reiete oñehaʼã hese. ¿Mbaʼérepa? Pórke upéi ou peteĩ torménta ivaietereíva, ha pe y ojupívo ojagarrapa la hóga. Upéicha rupi pe óga hoʼa ha oñehundiete (Mat. 7:24-27). Péicha avei ñande ñañemboʼéramo, ñañeimahina umi mbaʼe oiko vaʼekue ha jajepyʼamongetáramo, péro ndajajapói umi mbaʼe ñaaprendéva, amo ipahápe japerde reíta hína ñane tiémpo. Ág̃a ñambohovái vove umi provléma térã jajepersegi, ñande jerovia naimbaretemoʼãi ikatu hag̃uáicha ñaaguanta umíva. Péro jastudia ha ñamoĩ jave en práktika umi mbaʼe ñaaprendéva, jadesidi porãve, ñandepyʼaguapyve ha ñandejerovia mbareteve (Is. 48:17, 18). Jaipurumína umi 4 mbaʼe ñaanalisa vaʼekue, jahecha hag̃ua mbaʼépa ikatu ñaaprende peteĩ mbaʼe ohasa vaʼekuégui rréi David.

7. ¿Mbaʼe rreláto oĩva la Bíbliapepa jahecháta koʼág̃a?

⁷ ¿Oĩpa peteĩ ñane amígo térã ñande rogaygua ñanetraisionáma vaʼekue? Oiméramo upéicha, ikatu ñanepytyvõ jastudiáramo umi mbaʼe ojapo vaʼekue rréi David otraisionárõ guare chupe itaʼýra Absalón, ha oñehaʼã oipeʼa chugui igoviérno (2 Sam. 15:5-14, 31; 18:6-14).

8. ¿Mbaʼépa ikatu jajapo Jehová ñanepytyvõ hag̃ua?

⁸ 1) Ñañemboʼe. Jalee mboyve upe rreláto, jaʼe Jehovápe mbaʼéichapa ñañeñandu oĩ haguére ñanetraisionáva. Ñanesinséro vaʼerã ñañemboʼe jave Jehovápe ha jaʼepaite chupe umi mbaʼe ñapensa ha ñañandúva (Sal. 6:6-9). Upéi jajerure chupe tañanepytyvõ jatopa hag̃ua umi konsého ohechaukátava ñandéve mbaʼépa jajapo vaʼerã ñambohovái hag̃ua upe situasión ijetuʼuetéva.

9. ¿Mbaʼe mbaʼépa oiko vaʼekue David ha Absalón kásope?

 ⁹ 2) Ñañeimahina umi mbaʼe oiko vaʼekue. Ñapensa umi mbaʼe oñemombeʼúvare ko rrelátope, ha jakalkula mbaʼeichaitépa oiméne rréi David oñeñandu vai raʼe. David raʼy Absalón heta áñorema oñehaʼã umi hénte ohayhu hag̃ua chupe (2 Sam. 15:7). Ha Absalón ohechakuaárõ guare okonsegíma hague upéva, omondo umi espía Israel tuichakuére omboliga hag̃ua umi héntepe oasepta hag̃ua chupe igovernánteramo. Haʼe okonvense Ahitofélpe jepe opuʼã hag̃ua itúare, hiʼarive Ahitofel haʼe vaʼekue David amigoite ha ikonsehéro. Absalón heʼi ijehe haʼemaha rréi, ha upéi oñehaʼã ojagarra ha ojuka Davídpe. Hiʼarive upérõ oiméne David hasykatuete vaʼekue (Sal. 41:1-9). Upéi og̃uahẽ David apysápe mbaʼépa ojapo oikóvo hína Absalón, upémarõ osẽ oho Jerusaléngui. Tiémpo riremi Absalón ehérsito oñorairõ David ehérsito kóntrape. Pe ehérsito opuʼã vaʼekue David rehe operde ha ojejuka Absalónpe.

10. ¿Mbaʼépa ikatu kuri ojapo rréi David?

¹⁰ Ñañeimahinamína avei mbaʼeichaitépa oiméne David oñeñandu raʼe oikórõ guare hese entéro koʼã mbaʼe. Haʼe ohayhu vaʼekue Absalónpe ha okonfia Ahitofel rehe. Péro mokõivéva otraisiona vai chupe. Haʼekuéra ningo oheja Davídpe yvýre ha oñehaʼã voi ojuka chupe. Haʼe ikatu vaʼekue opyta nokonfiavéi iñamigokuérare ha osospecha omoirũ hague avei Absalónpe. Haʼe ikatu kuri opensa ijehénte ha haʼeñónte osẽ oho hetãgui. Térã ikatu kuri ou oñedesanimaiterei ha oñentrega. Péro David ndojapói ni peteĩva koʼã mbaʼe. Upéva rangue haʼe oaguanta upe situasión ijetuʼuetéva. ¿Mbaʼérepa ikatu vaʼekue ojapo upéva?

11. ¿Mbaʼépa ojapo vaʼekue David ohasárõ guare pe situasión ijetuʼuetéva?

¹¹ 3) Jajepyʼamongeta. ¿Mbaʼe mbaʼépa ikatu ñaaprende ko rrelátogui? Jaikuaa hag̃ua upéva ikatu ñambohovái ko porandu: “¿Mbaʼépa ojapo David osolusiona hag̃ua iprovléma?”. David ndojedesesperái ha ndodesidíri mbaʼeve apúrope. Haʼe ndahaʼéi ku okyhyjetereíva ha ndoikuaáiva mbaʼépa ojapóta. Upéva rangue, haʼe oñemboʼe Jehovápe oipytyvõmi hag̃ua chupe, ha ojerure avei ajúda iñamigokuérape. Avei pyaʼe ojapo umi mbaʼe odesidi vaʼekue. David oñembyasyetereíramo jepe, ndopytái vaʼekue oñamarga ha odeskonfiapa ótrore. Haʼe osegi ojerovia Jehováre ha okonfia iñamigokuérare.

12. ¿Mbaʼépa ojapo Jehová oipytyvõ hag̃ua Davídpe?

¹² ¿Mbaʼéichapa Jehová oipytyvõ Davídpe? Ñainvestigáramo jahecháta Jehová omombarete hague Davídpe oaguanta hag̃ua ko situasión ijetuʼuetéva (Sal. 3:1-8; introduksión). Jehová ovendesi umi mbaʼe David odesidi vaʼekue ojapo, ha oapoja iñamigokuéra ifiélvape oñorairõrõ guare hikuái oprotehe hag̃ua pe rréipe.

13. ¿Mbaʼéichapa ikatu jasegi David ehémplo, oiméramo peteĩ persóna ojapo raʼe peteĩ mbaʼe ñanemoñeñandu vaietereíva? (Mateo 18:15-17).

¹³ 4) Ñamoĩ en práktika. Ikatu ñañeporandu: “¿Mbaʼéichapa ikatu asegi David ehémplo?”. Pyaʼe jajapo vaʼerã la oñekotevẽva oñesolusiona hag̃ua pe provléma jarekóva. Asegún pe situasión jahasáva, ikatu jasegi pe konsého Jesús omeʼẽ vaʼekue Mateo kapítulo 18-pe (elee Mateo 18:15-17). Péro ñandepochy jave ani jajapura jadesidi hag̃ua peteĩ mbaʼe. Ñañemboʼe vaʼerã Jehovápe ha jajerure chupe tañanembopyʼaguapy ha tañanemoarandu ñambohovái hag̃ua upe provléma. Aníkena jaju nañakonfiavéi ñane ermanokuérare, síno jaasepta pe ajúda omeʼẽséva ñandéve hikuái (Prov. 17:17). Ha iñimportantevéva, jasegi pe konsého Jehová omeʼẽva ñandéve Iñeʼẽ rupive (Prov. 3:5, 6).

14. ¿Mbaʼe situasiónpepa ikatu ñanemokyreʼỹ pe heʼíva 2 Timoteo 1:12-16 ha 4:6-11, 17-22?

¹⁴ ¿Ñanemoprovlémapa ñane família jaservi haguére Jehovápe? ¿Térã jaikópa peteĩ país  ojeproivihápe ñane rembiapo, tahaʼe en párte térã kompletoite voi? Oiméramo upéicha, ñanemokyreʼỹetereíta jaleéramo 2 Timoteo 1:12-16 ha 4:6-11, 17-22. * Pablo oskrivi vaʼekue koʼã versíkulo oĩ aja kárselpe.

15. ¿Mbaʼépa ikatu jajerure Jehovápe?

¹⁵ 1) Ñañemboʼe. Jalee mboyve koʼã versíkulo ñamombeʼu Jehovápe mbaʼépa hína la ñane provléma, ha mbaʼéichapa ñanemoñeñandu upéva. Ñanesinséro vaʼerã hendive, ha jaʼepaite chupe la ñapensa ha ñañandúva. Upéi jajerure Jehovápe tañanepytyvõ ikatu hag̃uáicha jaleekuévo umi mbaʼe Pablo ohasa vaʼekue, jatopa umi konsého ñanepytyvõtava jaikuaa hag̃ua mbaʼépa jajapóta ñambohovái hag̃ua ñane provléma.

16. ¿Mbaʼe mbaʼépa ohasa vaʼekue Pablo?

¹⁶ 2) Ñañeimahina umi mbaʼe oiko vaʼekue. Ñañeimahinamína ñande ñaimeha Pablo situasiónpe. Haʼe oĩ kárselpe Rómape ha oñeenkadena chupe. Páblope ningo ojegueraháma vaʼekue kárselpe anteve, péro koʼág̃a haʼe oĩ segúro ojejukatamaha chupe. Unos kuánto umi omoirũ vaʼekue Páblope oheja rei chupe, ha haʼe oñandu voi nomeʼẽveimaha (2 Tim. 1:15).

17. ¿Mbaʼépa ikatu kuri ojapo Pablo?

¹⁷ Pablo ikatu kuri opensaiterei umi mbaʼe oiko vaʼekuére yma, ha okalkula odesidírire ótra kósa ndojapresamoʼãi hague chupe. Haʼe ikatu kuri opyta ipyʼaro umi kuimbaʼe oĩvare Asia distrítope, umi oheja rei vaʼekue chupe, ha nokonfiavéi umi ótro iñamigokuérare. Péro Pablo ndojapói ni peteĩva koʼã mbaʼe. Haʼe osegi vaʼekue okonfia iñamigokuérare ha ojerovia Jehová ovendesitaha chupe.

18. ¿Mbaʼépa Pablo ojapo vaʼekue upe situasión ijetuʼuetévape?

¹⁸ 3) Jajepyʼamongeta. Ikatu ñambohovái ko porandu: “¿Mbaʼépa ojapo Pablo osolusiona hag̃ua iprovléma?”. Oikuaáramo jepe saʼíma ofaltaha ojejuka hag̃ua chupe, haʼe ndahesaráiri iñimportanteveha omombaʼeguasu Jehovápe. Pablo osegi vaʼekue opensa mbaʼéichapa ikatu omokyreʼỹ ótrope, ha osegi ojerovia Jehováre oñemboʼe pyʼỹivo chupe (2 Tim. 1:3). Oiko rangue opensaiterei umi oheja rei vaʼekuére chupe, Pablo oagradeseterei umi iñamígo oipytyvõ haguére chupe mborayhúpe heta hendáicha. Avei Pablo osegi vaʼekue ostudia Ñandejára Ñeʼẽ (2 Tim. 3:16, 17; 4:13). Ha la iñimportantevéva, haʼe ojerovia vaʼekue ipyʼaite guive Jehová ha Jesús ohayhuha chupe. Haʼekuéra ningo núnka ndohejareíriva Páblope, ha haʼe okonfia vaʼekue oñevendesitaha chupe oservi haguére fiélmente.

19. ¿Mbaʼéichapa Jehová oipytyvõ vaʼekue Páblope?

¹⁹ Jehová oavisa vaʼekue Páblope ojepersegitaha chupe haʼe haguére kristiáno (Hech. 21:11-13). ¿Péro mbaʼéichapa Jehová oipytyvõ vaʼekue Páblope? Haʼe ombohovái iñemboʼe ha omombarete chupe (2 Tim. 4:17). Jehová oasegura Páblope omeʼẽtaha chupe pe prémio haʼe hetaite ombaʼapo jejopy vaʼekue ohupyty hag̃ua. Avei Jehová ojevale Pablo amigokuéra ifiélvare oipytyvõ hag̃ua chupe heta hendáicha.

20. Jarekóvo enkuénta Romanos 8:38, 39 heʼíva, ¿mbaʼérepa Pablo ogueropuʼaka vaʼekue umi provléma, ha mbaʼéichapa ikatu jasegi iñehémplo?

²⁰ 4) Ñamoĩ en práktika. Ikatu ñambohovái ko porandu: “¿Mbaʼéichapa ikatu asegi Pablo ehémplo?”. Oiko haguéicha Páblore jaikuaa voi jajepersegitaha jaservi haguére Jehovápe (Mar. 10:29, 30). Jasegi hag̃ua ñandefiél Jehovápe ñane provléma jave, tekotevẽ ñañemboʼe kontinuadoite ha jajepokuaa jastudia la Biblia. Ha siémpre ñanemanduʼa vaʼerã iñimportanteveha opa mbaʼégui ñamombaʼeguasu Jehovápe. Ikatu ñaime segúro Jehová núnka nañanderejamoʼãiha, ha umi hénte ndaikatumoʼãiha ojapo mbaʼeve ikatu vaʼerã ojoko Jehovápe ñanderayhu hag̃ua (elee Romanos 8:38, 39; Heb. 13:5, 6).

21. ¿Mbaʼépa oipytyvõ vaʼekue Aya ha Héctorpe ogueropuʼaka hag̃ua umi mbaʼe ijetuʼúva chupekuéra g̃uarã?

²¹ Umi ehémplo oĩva la Bíbliape ikatu ñanemombarete ñaaguanta hag̃ua oimehaichagua situasión. Por ehémplo, peteĩ prekursóra hérava Aya oikóva Japónpe, heʼi Jonás istória oipytyvõ hague chupe ponove okyhyje opredika hag̃ua karríto reheve, térã kállere. Hector katu peteĩ mitãrusu oikóva Indonésiape. Ituakuéra ningo ndoservíri Jehovápe, ha haʼe heʼi Rut ehémplo oipytyvõha chupe oikuaaseve hag̃ua Jehovápe ha oservi hag̃ua chupe.

22. ¿Mbaʼépa ñanepytyvõta ideprovechove hag̃ua ñandéve umi vidéo, lektúra dramatisáda, térã umi artíkulo hérava “Jasegi umi ojeroviáva ehémplo”?

²² ¿Moõpa ikatu jatopa hetave informasión umi ehémplo oĩvagui la Bíbliape ha ñanemombaretétava? Oĩ umi vidéo, umi lektúra bíblica dramatisáda, ha umi artíkulo oĩva ñande sítiope hérava “Jasegi umi ojeroviáva ehémplo”. Koʼã mbaʼe ningo ñanepytyvõ ñañeimahina porãve hag̃ua umi mbaʼe oñemombeʼúva la Bíbliape. * Upévare jahecha, ñahendu, térã jalee mboyve koʼã rreláto oñeinvestiga porãite vaʼekue, ñañemboʼékena Jehovápe tañanepytyvõ jatopa hag̃ua umi mbaʼe ikatúva ñamoĩ en práktika. Ñapensa ñande voi haʼeha pe persóna oñeñeʼẽha pe rrelátope. Jajepyʼamongeta umi mbaʼe ojapo vaʼekuére koʼã Jehová siervokuéra ifiélva, ha mbaʼéichapa haʼe oipytyvõ chupekuéra ombohovái hag̃ua iprovlemakuéra. Upéi ñamoĩ en práktika umi mbaʼe ñaaprendéva pe situasión jahasávape hína. Jaagradesékena Jehovápe siémpre ñanepytyvõ haguére, ha jahechauka jaagradeseha chupe jahekávo oportunida ñamokyreʼỹ ha jaapoja hag̃ua ótrope.

23. ¿Mbaʼépa Jehová opromete ojapotaha ñanderehehápe Isaías 41:10, 13-pe?

²³ Ijetuʼu ningo jaiko ko múndo oĩvape Satanás poguýpe, ha sapyʼánte ndajaikuaái voi mbaʼépa jajapóta (2 Tim. 3:1). Péro natekotevẽi ningo jakyhyje ni jajepyʼapy. Jehová oikuaa umi mbaʼe ijetuʼúva jahasáva hína, ha jaʼa sapyʼáramo haʼe opromete oñakarama hatãtaha ñanderehe ipo derécha imbaretetévape (elee Isaías 41:10, 13). Ñande ñaime segúro Jehová ñanepytyvõtaha, ha la Biblia ñanemombaretetaha ñaaguanta hag̃ua oimehaichagua provléma.