1. ¿Mbaʼépa ikatu jaʼe umi mitãrusukuérare?

MITÃRUSUKUÉRA, peẽ ningo ikatu pendedeprovechoiterei kongregasiónpe. Heta pende apytépe oĩ imbaretéva ha ikyreʼỹetereíva (Prov. 20:29). Peẽ ningo pejapo hína heta mbaʼe peipytyvõ hag̃ua ermanokuérape. Oiméne hiʼãitereíma peẽme peñenombra siérvo ministeriál. Péro ikatu peñandu umi ótro opensaha penderehe penemitãiterei térã napeimeiha gueteri preparádo oñemeʼẽ hag̃ua peẽme peteĩ asignasión iñimportánteva. Péro penemitãramo jepe, oĩ heta mbaʼe koʼág̃ama voi ikatúva pejapo pe kongregasión okonfia hag̃ua penderehe ha penderrespeta hag̃ua.

2. ¿Mbaʼépa jahecháta ko artíkulope?

² Ko artíkulope ñaanalisáta rréi David ehémplo, ha jahecháta avei mbykymi mbaʼe mbaʼépa ohasa vaʼekue mokõi rréi de Judá: Asá ha Jehosafat. Jahechaʼimíta umi provléma ombohovái vaʼekue koʼã mbohapy kuimbaʼe, mbaʼépa ojapo vaʼekue hikuái osolusiona hag̃ua, ha mbaʼépa umi mitãrusu ikatu oaprende iñehemplokuéragui.

3. ¿Mbaʼéichapa umi imitãva ikatu oipytyvõ umi ermanokuéra ijedávape?

³ David imitãrõ guare, oaprende vaʼekue umi mbaʼe ideprovéchotava ótrope. Ojekuaa vaʼekue hese orekoha peteĩ amista imbaretéva Jehovándi, ha oñehaʼãmbaite vaʼekue oiko hag̃ua chugui peteĩ músiko ivaléva, ha oipuru upe avilida orekóva  oipytyvõ hag̃ua Saúlpe, pe rréi Ñandejára oiporavo vaʼekue (1 Sam. 16:16, 23). Peẽ mitãrusukuéra, ¿oĩpa peteĩ mbaʼe pejapokuaáva ikatúva peipuru peipytyvõ hag̃ua umi ermanokuérape? Por ehémplo, umi ijedáva ningo omombaʼetereíta peẽ imitãva peipytyvõramo chupekuéra oipurukuaa hag̃ua iselulár, itávlet térã ótro aparáto elektróniko ojapo hag̃ua ijestúdio personál, térã oipuru hag̃ua rreunionhápe. Peẽ ningo pendevale hína koʼã mbaʼépe, ha upévare ikatu peipytyvõ umi ijedávape.

4. ¿Mbaʼe kualida iporãvapa oñehaʼã vaʼerã oreko umi mitãrusukuéra osegívo David ehémplo? (Ehecha pe taʼanga oĩva ko rrevísta apére).

⁴ David ningo káda día ohechauka vaʼekue irresponsavleha ha ikatuha oñekonfia hese. Por ehémplo, haʼe imitãrõ guare ombaʼapo jejopy vaʼekue oñangareko hag̃ua itúa ovechakuérare. Upéva upe traváho ipeligróso vaʼekue. Upe rire David omombeʼu vaʼekue rréi Saúlpe: “Che ruvicha, che ningo añangareko che túa ovechakuérare, ha peteĩ díape ou peteĩ león ha ogueraha peteĩ ovecha, ótra vuéltape katu ou peteĩ óso ha ogueraha avei peteĩ ovecha. Péro che amuña umi animálpe ha asalva umi ovechápe” (1 Sam. 17:34, 35). David oikuaa ojeheja hague ikárgope oñangareko hag̃ua umi ovecháre, ha upévare pyʼaguasúpe oñorairõ vaʼekue odefende hag̃ua chupekuéra. Peẽ imitãva ningo ikatu pesegi David ehémplo pekumpli porãvo oimeraẽ asignasión oñemeʼẽva peẽme.

5. Ohechaukaháicha Salmo 25:14, ¿mbaʼépa hína pe iñimportantevéva mitãrusukuéra oñehaʼã vaʼerã ojapo?

⁵ David imitãramo jepe, oreko vaʼekue peteĩ amista iporãva ha imbaretéva Jehovándi. Upe amista iñimportanteve vaʼekue pe pyʼaguasu, térã pe avilida haʼe orekóvagui ombopu hag̃ua árpa. Davídpe g̃uarã Jehová ndahaʼéi vaʼekue Ijárante, síno haʼe vaʼekue avei iñamigoite (elee Salmo 25:14). Mitãrusukuéra: Pe iñimportantevéva hína peiko Jehová amigoitéramo. Pejapóramo upéicha ikatu hína oñemeʼẽ peẽme hetave rresponsavilida kongregasiónpe.

6. ¿Mbaʼépa oĩ vaʼekue opensáva David rehe?

⁶ David ningo ombohovái vaʼekue avei ko situasión ijetuʼúva: Oĩ vaʼekue hénte opensáva haʼe imitãitereiha gueteri térã iñirresponsavleha. Por ehémplo, David ojeofresérõ guare oñorairõ hag̃ua Goliat ndive, rréi Saúl ojokose chupe heʼívo: “Ndéngo nemitãiterei” (1 Sam. 17:31-33). Ha upe mboyvemi David  ermáno heʼi hese iñirresponsavleha (1 Sam. 17:26-30). Péro Jehová nopensái vaʼekue David rehe imitãiterei térã iñirresponsavleha. Haʼe ningo oikuaa porã vaʼekue Davídpe. Ha David ojerovia rupi iñamígo Jehováre, ikatu vaʼekue ojuka Goliátpe (1 Sam. 17:45, 48-51).

7. ¿Mbaʼépa ikatu peaprende David ohasa vaʼekuégui?

⁷ ¿Mbaʼépa ikatu peaprende David ohasa vaʼekuégui? Tekotevẽha penepasiénsia. Ikatu ningo heta tiémpo rire ae umi pendekuaáva penemitãite guive orrekonose pekakuaáma hague. Péro ikatu peime segúro Jehová ndojesarekoiha pene píntare, síno ohecha umi kualida porã perekóva. Haʼe pendekuaa porã ha oikuaa avei mbaʼépa ikatu pejapo (1 Sam. 16:7). ¿Mbaʼépa avei ikatu peaprende Davídgui? Pemombarete vaʼerãha pene amista Jehovándi. David ojapo vaʼekue upéva ojesarekóvo umi mbaʼe Jehová okrea vaʼekuére. Haʼe ojepyʼamongeta vaʼekue umívare ohechakuaa hag̃ua mbaʼépa umíva omboʼe chupe Ijapoharégui (Sal. 8:3, 4; 139:14; Rom. 1:20). David ehémplogui ikatu avei peaprende pejerure vaʼerãha Jehovápe pe fuérsa peikotevẽva. Por ehémplo, ¿oĩpa umi pene kompañerokuéra de koléhio oñembohorýva penderehe peẽ haʼe haguére testígo de Jehová? Oiméramo upéicha, peñemboʼe vaʼerã Jehovápe ha pejerure chupe tapenepytyvõ pembohovái hag̃ua ko provléma. Avei, pesegi vaʼerã umi konsého porã petopáva la Bíbliape, ñane puvlikasionkuérape ha umi vidéope. Pehecha jave mbaʼéichapa Jehová penepytyvõ pembohovái hag̃ua peteĩ provléma, pejeroviavéta hese. Ha umi ótro hénte ohechávo pejeroviaha Jehováre, haʼekuéra okonfiáta penderehe.

8, 9. a) ¿Mbaʼépa oipytyvõ vaʼekue Davídpe ipasiénsia hag̃ua ohaʼarõvo oiko chugui rréi? b) ¿Mbaʼépa umi mitãrusu ikatu oaprende David ehémplogui?

⁸ Jahechamína mbaʼe provlémapa ombohovái vaʼekue avei David. Ojeporavo rire chupe oiko hag̃ua chugui rréi, David ohaʼarõ vaʼerã kuri heta áño oñepyrũ hag̃ua ogoverna Judápe (1 Sam. 16:13; 2 Sam. 2:3, 4). ¿Mbaʼépa oipytyvõ raʼe chupe ipasiénsia hag̃ua upe aja? David oiko rangue opensaiterei umi mbaʼe ikatúvare odesanima chupe, oipuru itiémpo ojapo hag̃ua umi mbaʼe ikatúva ojapo. Por ehémplo, haʼe oikórõ guare okañy umi filisteo territóriope, oipuru itiémpo oñorairõ hag̃ua Israel enemigokuéra kóntrape. Péicha ojapóvo, David oprotehe pe frontéra orekóva pe trívu de Judá (1 Sam. 27:1-12).

⁹ Mitãrusukuéra, ¿mbaʼépa ikatu peaprende David ehémplogui? Peaprovechákena káda oportunida perekóva peservi hag̃ua Jehovápe ha pene ermanokuérape. Jahechamína mbaʼépa oiko vaʼekue peteĩ ermáno héravare Ricardo. * Haʼe imitãite guive oservise vaʼekue de prekursór rregulár, péro umi ansiáno heʼi chupe noĩriha gueteri preparádo. Péro Ricardo oñedesanima térã ipochy rangue, oipuruve itiémpo predikasiónpe. Haʼe heʼi: “Apensávo upe ahasa vaʼekuére, ahechakuaa ou porã hague chéve upéva pórke chepytyvõ ajapo hag̃ua umi kámbio tekotevẽva aprogresa hag̃ua. Aha jey katuete avisita umi hénte cherendu porã vaʼekuépe predikasiónpe, ajeprepara káda rrevisitarã, ha amoñepyrũ voi pe che primer estúdio bíblico. Amáske apredika, menovéma chenervióso ha añeñandúma segurove”. Koʼág̃a Ricárdogui oikóma peteĩ prekursór rregulár ikatupyrýva ha oservi avei de siérvo ministeriál.

10. ¿Mbaʼépa ojapo vaʼekue David odesidi mboyve peteĩ mbaʼe iñimportánteva?

¹⁰ Jahechavéna avei ótra kósa ohasa vaʼekue David. Okañýrõ guare oikóvo Saúlgui, haʼe ha iñirũnguéra oheja ifamiliakuérape hógape ha  oho oñorairõ. Péro upe aja, iñenemigokuéra ou oataka hogakuéra ha oguerahapaite umi ifamíliape. David ikatu vaʼekue opensa: “Chéngo peteĩ gerréro vale ha chénte ikatu akalkula mbaʼéichapa agueru jeýta che familiakuérape”. Péro upéva rangue, ojerure Jehovápe oipytyvõ hag̃ua chupe. Peteĩ saserdóte hérava Abiatar oipytyvõ Davídpe oporandu hag̃ua Jehovápe: “¿Apersegi vaʼerã piko umi ou vaʼekuépe omondapa?”. Jehová heʼi Davídpe oho hag̃ua, ha haʼe oipytyvõtaha chupe orreskata hag̃ua ihentekuérape (1 Sam. 30:7-10). ¿Mbaʼépa ikatu peaprende upe oiko vaʼekuégui?

11. ¿Mbaʼépa ikatu pejapo pedesidi mboyve peteĩ mbaʼe?

¹¹ Pejerurékena ótrope konsého pedesidi mboyve peteĩ mbaʼe. Peñemongetákena pende tuakuérandi. Ha ikatu avei perresivi konsého iporãva umi ansiáno ikatupyrývagui. Jehová ningo okonfia koʼã kuimbaʼe onombra vaʼekuére, ha peẽ ikatu avei pejapo upéva. Jehová ohecha voi koʼã kuimbaʼépe “rregáloramo” kongregasiónpe g̃uarã (Efes. 4:8). Peẽ ningo ikatúta pedesidi porã heta mbaʼe pejeroviáramo haʼekuéraicha, ha pehendúramo umi konsého porã omeʼẽva hikuái. Jahechamína koʼág̃a mbaʼépa ikatu ñaaprende rréi Aságui.

12. ¿Mbaʼe kualidápa oreko vaʼekue rréi Asá oñepyrũrõ guare ogoverna?

¹² Rréi Asá ningo imitãrõ guare iñumílde ha ipyʼaguasu vaʼekue. Por ehémplo, itúa Abías omano rire, Aságui oiko rréi ha oñepyrũ ohundipaite umi dios fálso raʼanga oĩva pe paíspe. “Avei heʼi entéro umi oikóvape Judápe oservi hag̃ua Jehovápe, ituakuéra ypykue Járape, ha okumpli hag̃ua umi iléi ha imandamientokuéra” (2 Crón. 14:1-7). Ha Zérah pe etíope oikérõ guare Judá territóriope un millón soldádo reheve, Asá ohechauka vaʼekue iñaranduha ojerurérõ guare ajúda Jehovápe, heʼívo: “Jehová, ndéve ningo ndahaʼéi mbaʼeve reipytyvõ hag̃ua umi ikangývape térã umi imbaretévape. Jehová ore Jára, orepytyvõmína, ore ningo rojerovia nderehe”. Koʼã mbaʼe porãite Asá heʼi vaʼekue, ohechauka haʼe ipyʼaite guive ojerovia hague Jehová ikatuha osalva chupe ha ipuévlope. Asá ojerovia Itúa yvagapeguáre, ha “Jehová ogana umi etíopepe” (2 Crón. 14:8-12).

13. ¿Mbaʼépa upéi ojehu Asápe, ha mbaʼérepa?

¹³ Katuete Asá okyhyjetereíne raʼe, oúrõ guare oñorairõ hag̃ua hendive peteĩ ehérsito tuichaitereíva orekóva un millón soldádo.  Péro Asá ojerovia rupi Jehováre ikatu vaʼekue ogana chupekuéra. Péro ñambyasýramo jepe, Asá orekórõ guare peteĩ provléma michĩvéva, haʼe ndojeroviái Jehováre. Rréi Baasá de Israel oamenasárõ guare chupe, haʼe ojerure ajúda rréi de Síriape, ha upéicha rupi sarambi oiko hese. Proféta Hananí rupive, Jehová heʼi Asápe: “Rréi de Siria ehérsito jepe reguerekomoʼã kuri nde pópe, péro rejerovia rupi rréi de Síriare, ha nderejeroviái nde Jára Jehováre, koʼág̃a upéva jepe ohóma ndehegui”. Ha upe guive rréi Asá ndopytuʼuvéi umi gérragui (2 Crón. 16:7, 9; 1 Rey. 15:32). ¿Mbaʼépa ñanemboʼe upéva?

14. a) ¿Mbaʼéichapa ikatu pehechauka pejeroviaha Jehováre? b) Ohechaukaháicha 1 Timoteo 4:12, ¿mbaʼépa pehupytýta pekonfiáramo Jehováre?

¹⁴ Pesegi vaʼerã peneumílde ha siémpre pejerovia Jehováre. Pejevautisárõ guare ningo pehechauka kuri pejeroviaitereiha Jehováre ha pekonfiaha hese. Ha Jehová ovyʼaiterei kuri penderresivívo ifamíliape. ¿Mbaʼépa koʼág̃a tekotevẽ pejapo? Pesegi vaʼerã pejerovia Jehováre. Ikatu oime ifásil peẽme pejerovia Jehováre pedesidíta jave umi mbaʼe ikatúva okambia pende rekove. ¿Péro mbaʼépa pejapóta ótra situasiónpe? Iñimportanteterei pekonfia Jehováre pedesidíta jave entéro mbaʼe, tahaʼe umi mbaʼe tuicháva térã michĩva jepe. Por ehémplo, umi diversión, traváho térã mbaʼépa pehupytyse pende rekovépe. Ani pejerovia umi mbaʼe peẽ pepensávare oĩ porãha, upéva rangue, peheka la Bíbliape umi konsého penepytyvõtava pedesidi porã hag̃ua, ha upéi pejapo upépe heʼiháicha (Prov. 3:5, 6). Péicha pejapóramo, pembovyʼáta Jehovápe, ha penderrespetáta umi ermanokuéra oĩva kongregasiónpe (elee 1 Timoteo 4:12).

15. Ohechaukaháicha 2 Crónicas 18:1-3; 19:2, ¿mbaʼe mbaʼépepa rréi Jehosafat ojavy vaʼekue?

¹⁵ Jaikuaa ningo peẽ mitãrusukuéra peneimperfektoha avei enterove persónaicha, ha sapyʼánte pejavy mimítante voi. Péro upéva napendejokói vaʼerã pejapo hag̃ua ikatúva entéro Jehová servísiope. Pepensamína rréi Jehosafat ehémplore. Haʼe oreko vaʼekue heta kualida iporãva, ha oñepyrũ guive ogoverna ‘oservi vaʼekue ituakuéra ypykue Járape ha okumpli imandamientokuéra’. Haʼe omondo avei umi prínsipe Judá siudakuérape omboʼe hag̃ua chupekuéra Jehovágui (2 Crón. 17:4, 7). Haʼe ningo isinséro vaʼekue, péro sapyʼánte odesidi vai avei. Por ehémplo,  peteĩ vuéltape odesidi vai rupi Jehová omondo peteĩ irrepresentántepe okorrehi hag̃ua chupe (elee 2 Crónicas 18:1-3; 19:2). ¿Mbaʼépa ikatu peaprende ko rrelátogui?

16. ¿Mbaʼépa ikatu peaprende Rajeev ohasa vaʼekuégui?

¹⁶ Peasepta ha pesegíkena umi konsého oñemeʼẽva peẽme. Heta mitãrusúre oikoháicha, oiméne ijetuʼu avei peẽme pemotenonde hag̃ua Jehová servísio pende rekovépe. Péro aníkena peñedesanima. Jahechamína mbaʼépa oiko vaʼekue peteĩ ermáno héravare Rajeev. Haʼe heʼi: “Chemitãrusúrõ guare, sapyʼánte ndaikuaái vaʼekue mbaʼépa ajapóta che rekovégui. Heta mitãrusúre oikoháicha, chéve cheinteresave vaʼekue umi depórte ha aikosénte voi ajediverti aha rangue rreunionhápe térã predikasiónpe”. ¿Mbaʼépa oipytyvõ vaʼekue ko ermánope? Peteĩ ansiáno mborayhúpe omeʼẽ chupe unos kuánto konsého. Rajeev omombeʼu: “Haʼe chepytyvõ apensa porã hag̃ua pe konsého oĩvare 1 Timoteo 4:8-pe”. Rajeev iñumílde, oasepta pe konsého oñemeʼẽva chupe, ha oñemoĩ opensa mbaʼépa omotenonde hína hekovépe. Haʼe heʼi: “Adesidi ajapotaha heta mbaʼe Jehová servísiope ha amotenondetaha umi mbaʼe che rekovépe”. ¿Mbaʼépa ohupyty upe haguére? Rajeev heʼi: “Unos kuánto áño arresivi rire upe konsého, oikóma chehegui siérvo ministeriál”.

17. ¿Mbaʼépa opensa umi ermanokuéra umi mitãrusu oservívare Jehovápe?

¹⁷ Umi ermanokuéra ningo ovaloraiterei peẽ imitãva peservi haguére Jehovápe “peteĩ ñeʼẽme” hendivekuéra (Sof. 3:9). Haʼekuéra ovyʼaiterei ohecha jave mbaʼéichapa peẽ penekyreʼỹ, penderory ha vyʼápe pejapoha umi traváho oñemeʼẽ vaʼekue peẽme, ha pendeguerohoryeterei voi (1 Juan 2:14).

18. Heʼiháicha Proverbios 27:11, ¿mbaʼépa Jehová oñandu umi mitãrusu oservívare chupe?

¹⁸ Mitãrusukuéra, aníkena núnka penderesarái Jehová penderayhuha ha okonfiaha penderehe. Haʼe oprofetisa vaʼekue koʼã ára pahápe oĩtaha hetaiterei mitãrusu ojoguáva peteĩ ehérsitope, ha kyreʼỹme oútava ojeofrese (Sal. 110:1-3). Jehová oikuaa porã peẽ pehayhuha chupe, ha pejaposeha ikatúva entéro iservísiope. Upévare, penepasiénsiakena ótrore ha penepasiénsia avei pendejehe. Pejavy jave, peaseptákena umi konsého ha pe disiplína oñemeʼẽva peẽme, ha pehechakuaa umíva ouha Jehovágui (Heb. 12:6). Pembaʼapo jejopýkena pekumpli porã hag̃ua oimeraẽ asignasión oñemeʼẽva peẽme. Ha iñimportanteveha, opa mbaʼe pejapóvape, pembovyʼákena pende Túa yvagapeguápe (elee Proverbios 27:11).