1. ¿Mbaʼépa la ohecharamovéva heta vése umi hénte oho jave primera ves ñane rreunionhápe? (Ehecha avei pe taʼanga).

 EÑEIMAHINAMÍNA peteĩ matrimónio ohoha primera ves rreuniónpe peteĩ Salón del Réinope. Mokõivévape oimpresionaiterei ohechávo mbaʼéichapa enterovéva orresivi porã chupekuéra ha umi ermáno ojotrataha mborayhúpe. Oho jeývo hikuái hógape, hembireko heʼi iménape: “Umi testígo de Jehová ningo idiferentete umi ótra persónagui, añetehápe avyʼa ha añeñandu porãiterei hendivekuéra”.

2. ¿Mbaʼérepa oĩ algúno oúva ndoservivéi Jehovápe?

² Entéronte ohechakuaa pe mborayhu oĩva Ñandejára puévlope, péro añetehápe umi testígo de Jehová ndahaʼéi perfékto (1 Juan 1:8). Upévare amáske jaikuaa porãve umi oĩvape kongregasiónpe, ikatu hína heta vése jahecha avei umi defékto oguerekóva (Rom. 3:23). Ñambyasýramo jepe oĩ heta ohejáva umi ótro fálla omoñepysanga chupekuéra ha upévare ou ndoservivéi Jehovápe.

3. ¿Mbaʼéichapa ikatu jaikuaa mávapa umi kristiáno tee? (Juan 13:34, 35).

³ Ñamañami jeýna pe téxto omopyendávare ko artíkulo (elee Juan 13:34, 35). ¿Mbaʼéichapa ikatu japilla mávapa hína umi kristiáno verdadéro? Ojoayhu rupi hikuái, ndahaʼéi iperfékto haguére. Emañamína pe Jesús heʼi vaʼekuére. Haʼe ndeʼíri kuri: ‘Peẽ peikuaáta peẽ haʼeha che disípulo’, upéva rangue haʼe heʼi kuri: “Entéro umi hénte oikuaáta peẽ haʼeha che  disípulo”. Upéicha Jesús ohechauka umi isegidorkuéra ha avei entéro umi ótro hénte ohechakuaataha mávapa umi kristiáno tee oĩ rupi pe mborayhu ijapytepekuéra.

4. ¿Mbaʼépa ikatu oñeporandu algúna persóna?

⁴ Umi hénte ndahaʼéiva testígo de Jehová ikatu oñeporandu: “¿Mbaʼérepa ikatu jaʼe pe mborayhu ohechaukaha mávapa umi kristiáno verdadéro? ¿Mbaʼéichapa Jesús ohechauka vaʼekue ohayhuha ijapostolkuérape? ¿Mbaʼéichapa ikatu jasegi Jesús ehémplo koʼág̃arupi?”. Iporãitereíta entéro Testígo vautisádo jahecháramo avei mbaʼéichapa oñekontesta koʼã porandu. Upéva ñanepytyvõta jahechaukave hag̃ua upe mborayhu, espesiálmente oĩ jave ojavýva (Efes. 5:2).

5. Emyesakã la Jesús heʼi vaʼekue Juan 15:12, 13-pe.

⁵ Jesús ohechauka porã vaʼekue entéro umi isegidorkuéra ojoayhu añetetaha (elee Juan 15:12, 13). Jesús heʼi voi: “Pejoayhu vaʼerã che pohayhu haguéicha”. ¿Mbaʼépa haʼe heʼise raʼe upérõ? Jesús oexplika peteĩ kristiáno ohayhúgui iñermánope omotenondetaha chupe ha oĩta voi dispuésto omanóvo hesehápe tekotevẽramo. b

6. ¿Mbaʼéichapa Ñandejára Ñeʼẽ ohechauka pe mborayhu iñimportanteha?

⁶ Ñandejára Ñeʼẽ heta hendápe ñanemboʼe pe mborayhu iñimportantetereiha. Ha heta persónape ogustaiterei umi téxto oñeʼẽva pe mborayhúre. Por ehémplo: “Ñandejára ningo mborayhu” (1 Juan 4:8). “Rehayhu vaʼerã nde rapichápe nde voi rejehayhuháicha” (Mat. 22:39). “Pe oporohayhúva siémpre oĩ operdona hag̃uáicha hapichápe” (1 Ped. 4:8). “Pe mborayhu núnka ndofallái” (1 Cor. 13:8). Koʼã téxto ha hetaiteve ohechauka porãiterei iñimportanteha japorohayhu, upéva hína peteĩ kualida iporãitereíva.

7. ¿Mbaʼérepa Satanás ndaikatúi omboʼe umi héntepe ojoayhu ha oĩ hag̃ua unído?

 ⁷ Heta persóna ningo opensa: “Entéro rrelihión ningo heʼi omboʼeha la verda, péro káda uno idiferénte umi mbaʼe ogueroviáva. ¿Mbaʼéicha piko upéicharõ ikatu apilla mávapa pe rrelihión verdadéra?”. Satanás omoĩ heta rrelihión fálsa okonfundipa hag̃ua umi héntepe ha haʼekuéra ndopillavéima mávapa pe rrelihión verdadéra. Péro haʼe núnka ndaikatumoʼãi okonsegi hetaiterei hénte ko yvy tuichakuére ojoayhu añete ha oikóva en unida. Jehová añoite ikatu ojapo upéva pórke pe mborayhu añete ou chugui. Umi orekóva ijespíritu ha ivendisión añoite ikatu ojoayhu añete (1 Juan 4:7). Upévare ndajahecharamói la Jesús heʼírõ guare umi kristiáno verdadérope ojekuaataha ojoayhu rupi.

8, 9. ¿Mbaʼéichapa opoko heta persónare ohechávo umi testígo de Jehová ojoayhuha?

⁸ Jesús heʼi haguéicha, heta persóna ohechakuaa mávapa umi kristiáno tee ojoayhu rupi hikuái. Por ehémplo, peteĩ ermáno hérava Ian imanduʼa pe primera ves ohórõ guare peteĩ asambléape ojejapóva ag̃ui hógagui peteĩ estádiope. Ian ohóma voi kuri upe estádiope péro ohecha hag̃ua peteĩ partído. Haʼe heʼi: “Pe diferénsia ningo tuichaiterei, pórke umi Testígo ningo ijedukádo, oñemonde porã, ha la ifamiliakuéra katu ojeporta porã”. Avei heʼive: “Ojekuaa hesekuéra ovyʼa ha oikoha pyʼaguapýpe, ha chéngo péicha la aikose vaʼekue. Che nachemanduʼái umi diskúrsore, péro núnka ndacheresaráiriva mbaʼéichapa umi Testigokuéra ikondúkta porã”. c Ñande Testígo ñane kondúkta porã pórke jajoayhu. Jahayhúgui ñane ermanokuérape ñaneamávle hendivekuéra ha jarrespetaiterei chupekuéra.

⁹ Peteĩ ermáno hérava John oñeñandu vaʼekue avei upeichaite ohórõ guare primera ves rreunionhápe. Haʼe heʼi: “Cheimpresiona mbaʼeichaitépa entéro umi oĩva upépe iñamavleterei, haʼete voi la perfékto mbaʼéva hikuái. Ojekuaa haʼekuéra ojoayhu añeteha ha upéva chekonvense atopa hague pe rrelihión verdadéra”. d Koʼãichagua experiénsia ohechauka umi testígo de Jehová haʼeha kristiáno tee.

10. ¿Mbaʼéicha javépa espesiálmente tekotevẽ jahechauka jahayhuha ñane ermanokuérape? (Ehecha avei pe nóta).

¹⁰ Jaʼe haguéicha iñepyrũme, ñane ermanokuéra ningo ndahaʼéi perfékto. Upévare heta vése heʼíta térã ojapóta álgo ñaneofendéva (Sant. 3:2). e Péicha jave jarekóta hína la oportunida jahechauka hag̃ua jahayhuha ñane ermanokuérape umi mbaʼe jaʼéva ha jajapóva rupive. ¿Mbaʼéichapa ikatu jasegi Jesús ehémplo koʼãichagua situasiónpe? (Juan 13:15).

11. ¿Mbaʼépa ohechauka raʼe Santiago ha Juan peteĩ vuéltape? (Ehecha avei pe taʼanga).

¹¹ Jesús nohaʼarõi vaʼekue umi isegidorkuéra iperfékto. Upéva rangue haʼe mborayhúpe oipytyvõ chupekuéra okambia hag̃ua ha péicha ombovyʼa hag̃ua hikuái Jehovápe. Peteĩ jey, Santiago ha Juan ojerure isýpe heʼi hag̃ua Jesúspe omeʼẽ hag̃ua chupekuéra peteĩ posisión iñimportánteva Irréinope  (Mat. 20:20, 21). Péicha Santiago ha Juan ohechauka kuri ijorgullóso ha iñimportanteseveha umi ótrogui.

12. ¿Santiago ha Juan añóntepa la ijaktitu vai vaʼekue upérõ? Emyesakã.

¹² Ndahaʼéi kuri Santiago ha Juan añónte la ijaktitu vai vaʼekue upérõ. Jahechamína mbaʼéichapa orreaksiona umi ótro apóstol. La Biblia heʼi: “Umi ótro 10 disípulo ohendúvo la oikóva, ipochy umi mokõi ndive” (Mat. 20:24). Ikatu voi ñañeimahina ojodiskuti hague oñondive, ha umi ótro apóstol heʼi hague Santiago ha Juánpe: “¿Mbaʼéiko pejekree pejerure hag̃ua peteĩ puésto iñimportantevéva pe Rréinope? Ndahaʼéi ningo peẽ añónte la pembaʼapo jejopy vaʼekue Jesúsndi. Oréngo romeresénte avei peteĩ puésto iñimportánteva pe Rréinope”. Tahaʼe haʼeháicha, umi disípulo ohechauka hesarái hague siémpre tekotevẽha ojoayhu ha ojotrata porã.

13. ¿Mbaʼépa Jesús ojapo raʼe ijapostolkuéra ofallárõ guare? (Mateo 20:25-28).

¹³ ¿Mbaʼépa ojapo raʼe Jesús upérõ guare? Haʼe ndaipochýi kuri hendivekuéra, haʼe ndeʼíri ohekataha ótro apóstol iñumildevéva ha ojoayhuvéva. Upéva rangue, Jesús mborayhúpe oñeʼẽ hendivekuéra pórke oikuaa haʼekuéra ojaposeha avei iporãva (elee Mateo 20:25-28). Jesús osegi kuri otrata chupekuéra mborayhúpe, jepe haʼekuéra pyʼỹinte ojodiskutími pórke entéronte iñimportantese (Mar. 9:34; Luc. 22:24).

14. ¿Mbaʼeichagua kultúrapepa okakuaa vaʼekue Jesús apostolkuéra?

 ¹⁴ Jesús katuete oiméne ogueraháne avei raʼe enkuénta pe kultúra umi ijapostolkuéra okakuaa hague (Juan 2:24, 25). Haʼekuéra okakuaa vaʼekue umi mboʼehára leipegua ha fariseokuéra omboʼehápe peteĩ persóna iñimportánte hag̃ua oguereko vaʼerãha peteĩ puésto ijyvatéva (Mat. 23:6, ekompara pe vidéo héravare Asientos del frente en la sinagoga, oĩva pe nóta de estúdio Mateo 23:6-pe g̃uarã, Traducción del Nuevo Mundo, españólpe). Umi líder rrelihióso katu opensa vaʼekue voi iñimportanteveha umi ótrogui (Luc. 18:9-12). f Jesús ontende porãiterei vaʼekue koʼãichagua pensamiénto ikatuha oafekta ijapostolkuéra opensáva ijehe ha hapichakuérare (Prov. 19:11). Jesús nopensái vaʼekue voi la ijapostolkuéra núnka ndojavymoʼãiha, ha ojavýrõ hikuái katu, haʼe ipasiénsia hesekuéra. Haʼe oikuaa porã kuri umi ijapostolkuéra ojaposeha iporãva, upévare omboʼe chupekuéra iñumílde ha ohayhu vaʼerãha hapichakuérape oikose rangue oñemoimportánte.

15. ¿Mbaʼépa ikatu ñaaprende la oiko vaʼekuére Santiago, Juan ha umi ótro apóstolre?

¹⁵ Heta mbaʼe ningo ikatu ñaaprende la oiko vaʼekuére Santiago ha Juan rehe. Haʼekuéra ningo ojavy kuri ojerurérõ guare peteĩ puésto iñimportánteva pe Rréinope. Péro avei umi ótro apostolkuéra ojavy oheja rupi pe oikóva ombyai pe unida orekóva hikuái. Jesús katu siémpre iñamávle ha otrata vaʼekue mborayhúpe umi 12 ijapóstolpe. ¿Mbaʼépa ikatu ñande ñaaprende? Jaiko rangue ñañesentra ñane ermanokuéra fállare, la iñimportánteva hína ñañatende mbaʼéichapa ñande ñarreaksiona haʼekuéra ojavy jave. Upévare, oiméramo ñandepochy hína peteĩ ñane ermánondi iporã ñañeporandumi: “¿Mbaʼérepa la chembopochyete pe ojapo vaʼekue? ¿Ohechaukápa hína chéve ko situasión tekotevẽha amehorave álgope? ¿Noiméipa pe ermáno ohasa hína peteĩ provlémare? ¿Ikatúpa ahechauka chupe ahayhuha ha ambohasa reínte umi mbaʼe ojapo vaʼekue apensáramo jepe arekoha la rrasón?”. Amáske jatrata mborayhúpe ñane ermanokuérape jahechauka hína ñande haʼeha kristiáno tee.

16. ¿Mbaʼépa ikatu ñaaprendeve Jesús ehémplogui?

¹⁶ Jesús ehémplo ñanemboʼe avei iporãha ñañehaʼã ñantende ñane ermanokuérape (Prov. 20:5). Añetehápe ningo ñande ndaikatúi jaikuaa pe oĩva peteĩ persóna korasõme, Jesús ojapo haguéicha. Upévare tekotevẽterei jareko enkuénta ñane ermanokuéra iñimperfektoha ha upévare ñanepasiénsia vaʼerãha hesekuéra ojavy jave (Efes. 4:1, 2; 1 Ped. 3:8). Ifasilvéta jajapo hag̃ua upéva ñañehaʼãramo jaikuaa porãve chupekuéra. Jahechamína upearã peteĩ ehémplo.

17. ¿Mbaʼépa oiko peteĩ superintendénte de sirkuíto oñehaʼã rupi oikuaa porãve peteĩ ermánope?

¹⁷ Peteĩ superintendénte de sirkuíto oservíva África orientálpe imanduʼa oikuaa hague peteĩ ermáno haʼetévaicha la naiñamávleiva. ¿Mbaʼépa ojapo pe superintendénte? Haʼe heʼi: “Aevita rangue pe ermánope, adesidi aikuaa porãve chupe”. Pe superintendénte ojapo rupi upéva ohechakuaa pe ikriánsa oafekta hague pe ermánope. Pe superintendénte  de sirkuíto heʼive: “Ahechakuaa rire mbaʼeichaitépa haʼe oñehaʼãmbaite ojapo umi kámbio tekotevẽva ojogueraha porã hag̃ua ótrondi amombaʼeterei chupe. Upe rire ropyta oñoamigoite”. Añetehápe, ñañehaʼãramo ñantende ñane ermáno ha ermanakuérape ifasilvéta ñandéve jahechauka jahayhuha chupekuéra.

18. ¿Mbaʼépa iñimportánte ñañeporandu oiméramo peteĩ ñane ermáno ñaneofende? (Proverbios 26:20).

¹⁸ Sapyʼánte ñañandu ñañeʼẽmante vaʼerãha pe ermáno ñaneofende vaʼekuéndi. Péro jajapo mboyve upéva iporãta ñañeporandumi: “¿Chépa antende porã la oiko vaʼekue?” (Prov. 18:13). “¿Noiméipa pe ermáno ndopilláinte raʼe la ojapo vaʼekue?” (Ecl. 7:20). “¿Chépa sapyʼánte naofendéi avei péicha ótrope?” (Ecl. 7:21, 22). “Ha añeʼẽramo pe ermánondi, ¿serápa la ndaikomoʼãi ambotuichave rei hína la provléma?” (elee Proverbios 26:20). Jajepyʼamongetáramo koʼã porandúre, ikatu hína jahechakuaa iporãvetaha ñambohasa reínte la oiko vaʼekue ha péicha jahechauka japorohayhuha.

19. ¿Mbaʼépa rejedesidíma rejapotaha?

¹⁹ Umi testígo de Jehová ningo ohechauka hína haʼeha kristiáno tee ojoayhu rupi. ¿Ha mbaʼépa ikatu jajapo káda uno? Jahechaukáramo jahayhuha ñane ermanokuérape iñimperféktoramo jepe ojekuaáta avei ñande haʼeha Jesús segidór. Jajapóramo upéicha, ñaipytyvõta umi persónape ohechakuaa hag̃ua mávapa pe rrelihión verdadéra. Upéva ikatu omomýi chupekuéra oadorase hag̃ua avei Jehovápe, pórke chugui ou pe mborayhu. Upévare jajedesidíkena jasegitaha jahayhu ñane ermanokuérape, ha péicha tojekuaa ñanderehe haʼeha kristiáno tee.