1, 2. ¿Mbaʼérepa ndovaléi reñedesanima oiméramo eñandu nereimeitiha preparádo rejevautisa hag̃ua? (Ehecha pe taʼanga oĩva ko rrevísta apére).

 OIMÉRAMO nde rejevautisase, upéva peteĩ mbaʼe iporãitereíva ikatúva rejapo. ¿Reimémapa preparádo rejapo hag̃ua upéva koʼág̃a? Oimérõ repensa ikatutamaha rejevautisa, ha umi ansiáno opensa avei upéicha, ani reduda rejapo hag̃ua upéva ikatu vovéntema. Rejevautisáramo neraʼarõ hetaiterei mbaʼe porã Jehová servísiope.

² Péro, ¿ojeʼémapa ndéve tekotevẽha rehaʼarõve rejevautisa hag̃ua, térã nde voi eñandu nereimeiha preparádo? Oiméramo upéicha, ani reñedesanima. Nde ikatu hína resegi reprogresa rejevautisa peve, nemitã térã ndeedáramo jepe.

3. ¿Mbaʼépa oporandu vaʼekue Felípepe pe ofisiál etíope, ha mbaʼépa ikatu ñañeporandu upévare? (Hechos 8:36, 38).

³ (Elee Hechos 8:36, 38). Peteĩ ofisiál etíope omanda guasúva oporandu vaʼekue Felípepe: “¿Mbaʼéiko chejoko ajevautisa hag̃ua?”. Pe kuimbaʼe etíope ningo ojevautisase péro, ¿oĩpa añete preparádo ojapo hag̃ua upéva?

4. ¿Mbaʼéichapa pe ofisiál etíope ohechauka vaʼekue oaprendeseveha?

⁴ Pe ofisiál etíope oho vaʼekue “Jerusalénpe oadora hag̃ua Ñandejárape” (Hech. 8:27). Amalisia haʼe oike vaʼekue umi judío rrelihiónpe, ha upépe haʼe katuete oaprende raʼe Jehovágui umi Escrituras Hebreas rupive, péro haʼe oaprendeseve. Felipe otopárõ guare pe ofisiál rehe, haʼe olee hína kuri proféta Isaías oskrivi vaʼekue (Hech. 8:28). Umi mbaʼe proféta Isaías oskrivi vaʼekue ningo oguereko vaʼekue heta enseñánsa hypyʼũva. Pe ofisiál omanda guasúva ndopytaséi vaʼekue umi mbaʼe oikuaámavarente, síno haʼe osegise vaʼekue oaprende.

5. ¿Mbaʼépa ojapo pe ofisiál etíope oaprende rire heta mbaʼe?

 ⁵ Pe ofisiál Etiopiagua ningo “peteĩ kuimbaʼe orekóva autorida ha oservíva Candácepe, haʼéva umi etíope rréina. Ha ikárgope oĩ vaʼekue kompletoite pe rréina tesóro” (Hech. 8:27). Upéicharõ ikatu jaʼe ko kuimbaʼe oreko hague tuicha rresponsavilida ha oime vaʼerã heta hembiapo raʼe. Upéicharõ jepe, haʼe oñemotiémpo oadora hag̃ua Jehovápe. Haʼe ndahaʼéi oaprendénte vaʼekue la verda, síno ojapo umi mbaʼe oaprende vaʼekue. Upéicha rupi oviaha vaʼekue Etiopía guive Jerusalén peve oadora hag̃ua Jehovápe pe témplope. Ojapo hag̃ua upe viáhe oime vaʼerã ogueraha chupe heta tiémpo ha avei heta ogasta. Péro haʼe ni michĩmi nombyasýi umíva pórke oadorase Jehovápe.

6, 7. ¿Mbaʼépa ojapo pe etíope osegi hag̃ua ohayhu Jehovápe?

⁶ Pe ofisiál etíope oaprende vaʼekue Felípegui heta enseñánsa iñimportantetereíva, umíva apytépe mávapa pe Mesías (Hech. 8:34, 35). Ko kuimbaʼe oiméne ovyʼaiterei oikuaárõ guare umi mbaʼe Jesús ojapo vaʼekue hesehápe. ¿Mbaʼépa ojapo vaʼekue haʼe oikuaa rire entéro koʼã mbaʼe? Pe ofisiál etíope ikatu vaʼekue osegínte umi judiokuéra rrelihiónpe, péro ohayhueterei rupi Jehovápe ha Jesúspe haʼe ojedesidi okambia ha ojevautisa oiko hag̃ua chugui Jesús segidór. Felipe ohecha vaʼekue ko kuimbaʼére oĩmaha preparádo ojevautisa hag̃ua, upémarõ ovautisa chupe.

⁷ Resegíramo pe etíope ehémplo, nde ikatúta avei reime preparádo rejevautisa hag̃ua, ha ikatúta ere: “¿Mbaʼéiko chejoko ajevautisa hag̃ua?”. Jahechamína umi mbaʼe haʼe ojapo vaʼekue ojevautisa hag̃ua: Osegi oaprende, ojapo umi mbaʼe oaprende vaʼekue, ha ohayhuve Jehovápe.

8. Heʼiháicha Juan 17:3, ¿mbaʼépa tekotevẽ resegi rejapo?

⁸ (Elee Juan 17:3, nóta). ¿Nepytyvõpa raʼe ko téxto heʼíva rejedesidi hag̃ua restudia la Biblia? Ñande apytépe hetápe oipytyvõ vaʼekue. Péro, ¿ñanemokyreʼỹpa ko téxto jasegi hag̃ua ñaaprende Jehovágui? Si, pórke ñande siémpre tekotevẽta jasegi ñaaprende pe ‘Ñandejára teete ha peteĩetévagui’ (Ecl. 3:11). Ñande ningo jasegíta ñaaprende Jehovágui pára siémpre, ha amáske ñaaprende chugui ñañemoag̃uivéta hese (Sal. 73:28).

9. ¿Mbaʼépa jajapo vaʼerã jaikuaa rire umi enseñánsa primeroite ñaaprende vaʼekue?

⁹ Ñañepyrũ jave ñaaprende Jehovágui ningo primeroite ñaaprende umi enseñánsa ndahaʼéiva la hypyʼũetereíva. Pablo oskrivírõ guare ikárta umi hebréope, ohenói vaʼekue  koʼãvape “umi mbaʼe primeroite ñaaprendéva”. Haʼe heʼívo upéicha ndoapoʼíri koʼãichagua enseñánsa, upéva rangue haʼe okompara umíva pe kamby oalimentávare peteĩ mitãraʼýpe (Heb. 5:12; 6:1). Péro Pablo avei omokyreʼỹ kristianokuérape ani hag̃ua opytánte umi mbaʼe primeroite oaprende vaʼekuérente, síno osegi hag̃ua oaprende umi enseñánsa hypyʼũvéva. ¿Ndépa avei resegise reaprende umi enseñánsa hypyʼũvéva oĩva la Bíbliape? ¿Ha reimépa avei dispuésto reaprendevévo Jehovágui ha ipropósitogui ha péicha reprogresave rehóvo?

10. ¿Mbaʼérepa algúnope g̃uarã ijetuʼueterei ostudia hag̃ua?

¹⁰ Heta oĩ ñande apytépe oforsaitereíva chupe la estúdio. ¿Ha mbaʼeteko nde kásope? Rehórõ guare eskuélape, ¿reaprendépa raʼe relee ha restudia porã hag̃ua? ¿Igústopa raʼe ndéve restudia reipurúvo umi lívro ha reaprende chuguikuéra? ¿Térãpa reñemeʼẽ enkuénta umíva ndahaʼeiete hague nderehegua? Oiméramo upéicha, ani ejepyʼapy. Hetáre avei oiko upéva, péro Jehová ikatu nepytyvõ. Haʼe ningo perfékto ha pe mboʼehára ikatupyryvéva oexistíva.

11. ¿Mbaʼéichapa Jehová ohechauka haʼeha peteĩ “Mboʼehára Ijojahaʼỹva”?

¹¹ Jehová ningo heʼi ijehe haʼeha pe “Mboʼehára Ijojahaʼỹva” (Is. 30:20, 21). Haʼe ningo ipasiénsia, ivuéno, ontende umi mbaʼe ohasáva iñalumnokuéra ha ohecha iporãvante hesekuéra (Sal.130:3). Jehová ningo núnka nohaʼarõi ñandehegui jajapo umi mbaʼe ndaikatumoʼãiva jajapo. Haʼe omeʼẽ ñandéve peteĩ rregálo iporãitereíva haʼéva ñane apytuʼũ (Sal. 139:14). Jehová ñandeapo ñaaprendese hag̃ua heta mbaʼe. Ñande Apohare oipota jasegi ñaaprende pára siémpre ha jadisfruta jajapóvo upéva. Upéicharõ jajapo porãitereíta ‘ñañehaʼãmbaitéramo jaheka meme’ umi añetegua oĩva Ñandejára Ñeʼẽme (1 Ped. 2:2). ¿Mbaʼépa ikatu nepytyvõ? Upearã emoĩkuaa umi méta ikatúva rehupyty. Avei iporãta rejapóramo peteĩ prográma ha reanota mbaʼe órapa releéta ha restudiáta la Biblia, ha upéi eñehaʼãmbaite ekumpli upéva (Jos. 1:8). Katuete Jehová ajúda rupive ikatúta redisfruta restudiávo, ha amás día reaprendevéta chugui.

12. ¿Mbaʼérepa jastudia vaʼerã Jesús ehémplo?

¹² Iporãta ejepyʼamongeta meméramo Jesús ojapo vaʼekuére oúrõ guare ko yvy ape ári ha mbaʼéichapa opredika vaʼekue. Añetehápe tekotevẽterei ningo jasegi Jesús ehémplo ikatu hag̃uáicha jaservi Jehovápe ko tiémpo ijetuʼuetévape (1 Ped. 2:21). Jesús omombeʼu porã vaʼekue mbaʼe mbaʼe ijetuʼúvapa ohasáta umi isegidorkuéra (Luc. 14:27, 28). Péro oĩ vaʼekue segúro haʼekuéra ikatutaha ombohovái porã umíva, haʼe ojapo haguéicha (Juan 16:33). Estudia porãkena umi mbaʼe Jesús ohasa vaʼekue ha eñemoĩ la méta esegitaha iñehémplo káda día.

13. ¿Mbaʼépa esegi vaʼerã ejerure Jehovápe, ha mbaʼérepa?

¹³ Ñande ningo ndahaʼéi jastudiáva jaikuaánte hag̃ua heta mbaʼe, síno ikatu hag̃uáicha jahayhuve Jehovápe ha jajeroviave hese (1 Cor. 8:1-3). Amedída ke reaprendeve Jehovágui, esegíkena ejerure avei chupe omombarete hag̃ua nde jerovia, ha haʼe katuete okontestáta ne orasión (Luc. 17:5). Reikuaa porãramo Jehovápe ha ejeroviáramo hese, upéva nemomýita rejapove hag̃ua iservísiope (Sant. 2:26).

14. ¿Mbaʼéichapa apóstol Pedro ohechauka vaʼekue iñimportanteha jajapo umi mbaʼe ñaaprendéva? (Ehecha avei pe taʼanga).

¹⁴ Pedro heʼi vaʼekue Cristo segidorkuéra osegi  vaʼerãha ojapo umi mbaʼe oaprendéva. Upérõ haʼe imanduʼa kuri Noé ehémplore oñemombeʼúva la Bíbliape. Jehová heʼi vaʼekue Noépe oguerutaha peteĩ dilúvio ohundi hag̃ua umi hénte aña upe tiempopegua. Noé oikuaáma Jehová oguerutaha peteĩ dilúvio, péro ndahaʼéi oikuaa haguérente upéva haʼe ha ifamília ojesalvátamava. Pedro oñeʼẽrõ guare koʼã mbaʼére ojerreferi hína pe tiémpo ou mboyve pe dilúvio ‘oñehaʼarõ aja ojejapopa pe árka’ (1 Ped. 3:20). Noé ha ifamília ojapóvo pe árka ojekuaa hesekuéra ojapo hague la oaprende vaʼekue Jehovágui (Heb. 11:7). Pedro okompara voi kuri Noé ojapo vaʼekue pe vautísmore. Haʼe heʼi: “Upe oiko vaʼekue orrepresenta pe vautísmo ha upéva pendesalva hína avei koʼág̃a” (1 Ped. 3:21). Noé ha ifamília ojesakrifika haguéicha ojapo hag̃ua pe árka, oime vaʼerã nde avei rejapóma heta kámbio reime hag̃ua preparádo rejevautisa hag̃ua. Péro, ¿mbaʼe mbaʼépa tekotevẽ rejapo koʼág̃ama voi rejevautisa hag̃ua?

15. ¿Mbaʼépa heʼise ñañarrepentiha ñande pyʼaite guive?

¹⁵ Primeroite voi tekotevẽ ñañarrepenti ñande pyʼaite guive umi mbaʼe vai jajapo vaʼekuére (Hech. 2:37, 38). Ñañarrepentíramo ñande pyʼaite guive, jajapóta umi kámbio tekotevẽhápe. Upévare iporãta ñañeporandúramo: “¿Amboykepaitémapa umi mbaʼe Jehovápe ndogustáiva, por ehémplo pe tekokyʼa, jepita, jurutieʼỹ, ñeʼẽ arhél ha ñeʼẽ kyʼa?” (1 Cor. 6:9, 10; 2 Cor. 7:1; Efes. 4:29). Oimérõ nderehejáiti koʼã mbaʼe, iporãitereíta ningo reñehaʼãramo rejapo upéva. Upearã ikatu reñemongeta pe nembostudiávandi la Biblia térã rejerure ajúda peteĩ ansiáno ne kongregasionpeguápe. Ha oiméramo nemitã gueteri, ejerurekuaa ajúda nde tuakuérape. Haʼekuéra ikatu hína nepytyvõ ehejaite hag̃ua oimeraẽ mbaʼe ikatúva ndejoko rejevautisa hag̃ua.

16. ¿Mbaʼe mbaʼépa ikatu jajapo jasegi hag̃ua ñamombarete ñande jerovia?

¹⁶ Avei iporãitereíta rejapo meméramo umi mbaʼe omombaretétava nde jerovia. Umíva apytépe eho rreunionhápe ha ekomenta (Heb. 10:24, 25). Ha ikatúma vove resẽ repredika, iporãitereíta rejapo meméramo upéva. Amáske repredika, redisfrutavéta rejapóvo upéva (2 Tim. 4:5). Oiméramo nde haʼe peteĩ mitãrusu térã mitãkuña, iporãta  reñeporandúramo: “¿Oiko vaʼerãpa che tuakuéra che rapykuéri asẽ hag̃ua apredika, térãpa chejeheguiete ajapo upéva?”. Oiméramo nde rejapo hína koʼã mbaʼe ndejeheguieténte, ehechauka hína ejerovia, ehayhu ha eagradeseha Jehovápe. Koʼã mbaʼe haʼe voi peteĩ rregálo Jehovápe g̃uarã jajapóramo ñande pyʼaite guive (2 Ped. 3:11; Heb. 13:15). Opa mbaʼe ñameʼẽva Jehovápe avave ñandeovligaʼỹre ogustaiterei chupe (ekompara 2 Corintios 9:7 heʼívare). Ñande ningo ñameʼẽse Jehovápe pe iporãvéva, upévare ñañehaʼãmbaite jajapo umi mbaʼe ogustáva chupe.

17, 18. ¿Mbaʼe kualidápa nepytyvõta rejevautisa hag̃ua, ha mbaʼére? (Proverbios 3:3-6).

¹⁷ Amáske rejeprepara rehóvo rejevautisa hag̃ua, rembohováita heta pruéva. Por ehémplo, ikatu oĩ oñembohorýva ha oñemoĩva nderehe (2 Tim. 3:12). Avei ikatu hína nde reñehaʼãmbaite reheja hag̃ua peteĩ mbaʼe ndogustaietéva Jehovápe, péro sapyʼánte rejapo jey upéva. Avei ikatu repensa hetaiterei gueteri ofaltaha ndéve rejevautisa hag̃ua. Upéicha rupi reñandu nanepohãveimaha ha rejedesespera. ¿Péro mbaʼépa ikatu nepytyvõ rembohovái porã hag̃ua koʼã mbaʼe? Pe mborayhu reñandúva Jehováre.

¹⁸ Pe mborayhu reñandúva Jehováre haʼe pe kualida iporãvéva erekóva (elee Proverbios 3:3-6). Rehayhúramo Jehovápe nde pyʼaite guive, rembohovái porãta umi provléma. La Biblia heʼi voi Jehová ohechaukaha mborayhu ifiélva isiervokuérare. Ko mborayhu ningo ifiél ha núnka ndopái (Sal. 100:5). Ndéve ningo Jehová ndeapo vaʼekue ijoguaháramo (Gén. 1:26). Upéicharõ, ¿mbaʼéichapa nde ikatu rehechauka peichagua mborayhu?

19. ¿Mbaʼépa ejapokuaa rehechauka hag̃ua reagradeseha Jehovápe? (Gálatas 2:20).

¹⁹ Ehechaukákena ndeagradesidoha (1 Tes. 5:18). Iporãta káda día eñeporandúramo: “¿Mbaʼéichapa koestedía Jehová ohechauka chéve cherayhuha?”. Ha upe rire eagradese Jehovápe káda uno umi mbaʼe ojapo vaʼekuére nderehehápe. Ehechakuaákena opa mbaʼe Jehová ojapóva guive nderehehápe ojapoha nderayhu rupi ha haʼeha ndéve g̃uarãite voi, ohechakuaa haguéicha avei apóstol Pablo (elee Gálatas 2:20). Upe rire eñeporandumi: “¿Chépa ahechauka avei ahayhuha Jehovápe haʼe cherayhuháicha?”. Pe mborayhu  reñandúva Jehováre nepytyvõta remboykete hag̃ua umi tentasión, embohovái porã hag̃ua umi situasión ijetuʼúva, ha resegi hag̃ua readora chupe. Ha péicha káda día rehechaukáta rehayhuha Jehovápe.

20. ¿Mbaʼépa heʼise ñañemeʼẽ Jehovápe, ha mbaʼeichaite pevépa iñimportánte upéva?

²⁰ Pe mborayhu reñandúva Jehováre kon el tiémpo nemomýita eñemeʼẽ hag̃ua chupe peteĩ orasión rupive. Nemanduʼákena eñemeʼẽramo Jehovápe rehupytytaha peteĩ mbaʼe iporãitereíva: Nde Jehová mbaʼétama pára siémpre. Pe kompromíso rejapóva Jehovándi reñemeʼẽvo chupe ningo pára tóda la vída. Natekotevẽi rembopyahu jey kon el tiémpo. Añetehápe ningo kóva ko kompromíso iserioiterei. Péro epensamíntena, jaikove pukukue ningo jadesidínte vaʼerã voi heta mbaʼe, péro kóva ko desisión haʼe la iporãvéva ikatúva jajapo (Sal. 50:14). Satanás katuete omokangyséta pe mborayhu reñandúva Jehováre anivéma hag̃ua rejerovia hese, péro aníkena eheja haʼe ojapo upéva (Job 27:5). Pe mborayhu reñandúva Jehováre ningo nepytyvõta rekumpli hag̃ua pe promésa rejapóva chupe ha avei nemoag̃uivéta hese.

21. ¿Mbaʼérepa ikatu jaʼe jajevautisa vove oñepyrũ ramoha hína pe servísio ñameʼẽva Jehovápe?

²¹ Eñemeʼẽ rire Jehovápe, upéi eñeʼẽ vaʼerã umi ansianokuérandi ikatu hag̃uáicha rejapo pe ótra kósa ejapo vaʼerã: Ejevautisa. Péro ndahaʼéi ejevautisa vove upépe ja opátamava umi mbaʼe rejapótava Jehovápe g̃uarã. Síno upépe oñepyrũ ramo hína pe servísio remeʼẽtava Jehovápe opa ára g̃uarã. Upévare koʼág̃ama voi resegi vaʼerã rehayhuve Jehovápe káda día. Ha upearã nepytyvõta remoĩramo umi méta ikatu hag̃uáicha rehupyty upéva. Péicha rejapóramo, katuete rekumplíta pe méta iporãitéva remoĩva, haʼéva pe vautísmo. Og̃uahẽ vove pe día ejevautisa hag̃ua añetehápe iporãitereíta, péro pépe oñepyrũ ramo hína. ¡Tosegíkena okakuaa pe mborayhu reñandúva Jehová ha Jesús rehe opa ára g̃uarã!