1, 2. a) ¿Mbaʼépa oiko jepi oĩ jave ojevautisáva? b) ¿Mbaʼépa jahecháta ko artíkulope?

 ¿NDÉPA rehechámava peteĩ grúpo oĩmava hína ojevautisa hag̃uáicha? Nde rehendu oĩha hikuái konvensído umi rrespuésta omeʼẽvare oñeporandúvo chupekuéra umi mokõi pregúnta ojevautisa mboyve. Nde rehecha mbaʼéichapa umi ihénte ha iñamigokuéra ovyʼaiterei hesevekuéra. Ha umi ojevautisáva osẽvo pe ýgui rehendu ojepopetepa hikuái ha rehecha hesekuéra mbaʼeichaitépa ovyʼa joa. Káda semána ningo míles oĩ ojedesidíva omeʼẽtaha hekove Jehovápe, ha ojevautisa kómo testígo de Jehová.

² Oiméramo nde rejevautisase hína, upéicharõ nde haʼe peteĩ persóna ijojahaʼỹva ko múndo añáme pórke nde ‘rehechakuaa reikotevẽha eñemoag̃ui Jehováre’ (Sal. 14:1, 2). Ko artíkulo ningo ojejapo kuri ndéve g̃uarã, tahaʼe jepe raʼe nemitã térã ndeedáma. Péro umi ojevautisáma vaʼekuépe oipytyvõta avei ojedesidi hag̃ua ipyʼaite guive oservitaha Jehovápe pára siémpre. Jaikuaa ningo jarekoha hetaiterei rrasón jaservi hag̃ua Ñandejárape. Péro koʼág̃a jahechamíta mbohapy umíva apytégui.

3. ¿Mbaʼérepa Jehová siervokuéra ohayhu pe añetegua, ha umi mbaʼe oĩ porãva? (Salmo 119:128, 163).

³ Jehová ningo omanda vaʼekue isiervokuérape: “Pehayhúkena umi mbaʼe siertoguáva” (Zac. 8:19). Jesús omokyreʼỹ vaʼekue isegidorkuérape oipota hag̃ua oĩ hustísia (Mat. 5:6). Upéva ningo heʼise ñande tekotevẽha jareko pe deséo ñande pyʼaite guive voi jajapóvo pe oĩ porãva, ihústova ha ipotĩva Ñandejára renondépe. ¿Ndépa rehayhu pe añetegua ha umi mbaʼe oĩ porãva? Katuete ningo upéicha hína. Ndéve nandegustaiete voi pe japu ha entéro mbaʼe oĩ vaíva ha oĩva hendapeʼỹ (elee Salmo 119:128, 163). Pe japu ningo ou Satanásgui, pe ogovernáva ko múndo (Juan 8:44; 12:31). Ha Satanáspe hiʼãiterei voi omongyʼa  Jehová réra. Upévare Satanás oñeʼẽ vai Ñandejárare ha omosarambi umi japu oheja vai hag̃ua chupe, ojapo upéva yma opuʼã ypy guive ikóntrape Edénpe. Haʼe opresenta voi Jehovápe haʼeramoguáicha peteĩ governánte opensáva ijehénte, naiñonrrádoiva, hakateʼỹva heta mbaʼe porãre ha heʼi nomeʼẽseiha voi yvyporakuérape umíva (Gén. 3:1, 4, 5). Umi japu Satanás heʼíva káusare heta hénte opensa vaíma Jehováre. Umi hénte odesidi jave ndohayhumoʼãiha pe añetegua, Satanás ojapoka chupekuéra opaichagua inhustísia ha mbaʼe vai (Rom. 1:25-31).

4. ¿Mbaʼéichapa Jehová ohechaukáma chugui ‘ouha pe añetegua’? (Ehecha avei pe taʼanga).

⁴ Jehovágui voi ningo “ou pe añetegua”, ha haʼe imbaʼeporãitereígui omboʼe la verda umi ohayhúvape chupe (Sal. 31:5). Ha péicha ojapóvo, haʼe oipytyvõ umívape anivéma hag̃ua ombotavy chupekuéra Satanás. Jehová omboʼe avei isiervokuérape iñonrrádo ha ihústo hag̃ua, péva oipytyvõ avei chupekuéra ojerrespeta hag̃ua ijupe voi ha ipyʼaguapy hag̃ua (Prov. 13:5, 6). ¿Haʼépa nepytyvõmava péicha restudia ypy guive la Biblia? Nde ningo reaprendéma ndaiporiha ótra kósa iporãvéva la Jehová oipotávagui jajapo (Sal. 77:13). Upévare voi nde rejapose la Ñandejára heʼíva oĩ porãha (Mat. 6:33). Nde ningo redefendese pe añetegua ha rejapose álgo anivéma hag̃ua oñeñeʼẽ vai Ñandejára Jehováre. ¿Mbaʼéichapa nde ikatu rejapo upéva?

5. ¿Mbaʼéichapa ikatu redefende pe añetegua ha umi mbaʼe oĩ porãva?

⁵ Umi mbaʼe nde redesidíva nde rekovépe ningo ohechaukáta nde ereha hína: “Che arrechasa umi japu Satanás heʼíva ha adefende pe añetegua. Aipota Jehovápe che governanterã ha ajapose umi mbaʼe haʼe heʼíva oĩ porãha”. ¿Mbaʼéichapa nde ikatu rejapo upéva? Upearã eñemboʼe vaʼerã Jehovápe ha ere chupe eñekomprometeha reservi hag̃ua chupe para siémpre ha upéi ejevautisa. Péicha jahechakuaa tuichaiterei mbaʼeha jahayhu pe añetegua ha umi mbaʼe oĩ porãva, pórke ñanemomýita jajedesidi hag̃ua jajevautisa.

6. Heʼiháicha Salmo 45:4, ¿mbaʼérepa rehayhu vaʼerã Jesucrístope?

⁶ ¿Mbaʼérepa nde rehayhu Jesucrístope? Salmo 45:4 (elee) ohechauka porã ñandéve mbaʼérepa jahayhu vaʼerã chupe. Jesús ningo ohayhu pe añetegua, iñumílde ha ihústo. Ha nde rehayhúramo pe añetegua ha umi  mbaʼe oĩ porãva, katuete rehayhúta avei Jesucrístope. Ñapensamíntena mbaʼeichaitépa haʼe pyʼaguasúpe odefende vaʼekue pe añetegua ha umi mbaʼe oĩ porãva (Juan 18:37). Péro, ¿mbaʼéichapa Jesús ñanemokyreʼỹ ñaneumílde hag̃ua?

7. ¿Mbaʼéichapa ndéve nemokyreʼỹ Jesús iñumílde haguére?

⁷ Jesús ningo iñehémplo rupive ñanemokyreʼỹ ñaneumílde hag̃ua. Por ehémplo haʼe siémpre oipota ñamombaʼeguasu Itúape, ndahaʼéi chupe (Mar. 10:17, 18; Juan 5:19). ¿Mbaʼéichapa nde reñeñandu reikuaávo haʼe iñumildetereiha? ¿Nanemokyreʼỹipa upéva ehayhu hag̃ua Ñandejára Raʼýpe ha esegi hag̃ua iñehémplo? Katuete ningo upéicha hína. ¿Péro mbaʼérepa Jesús iñumílde? Pórke Itúa voi iñumílde, ha haʼe ohayhu rupi Itúape osegi iñehémplo (Sal. 18:35; Heb. 1:3). Ajépa upéva nemoag̃uive Jesúsre, pórke ndaipóri voi haʼéicha ótro ohechaukáva umi kualida Jehová orekóva.

8. ¿Mbaʼérepa jaipotaite Jesúspe ñande rreirã?

⁸ Ñande ningo jaipotaiterei voi Jesúspe ñande rreirã, pórke haʼe hína pe mehór governánte oĩva. Jehová voi ontrena vaʼekue Itaʼýrape ha onombra chupe ogoverna hag̃ua (Is. 50:4, 5). Ñapensamíntena avei mbaʼeichaitépa ñanderayhúgui Jesús ojesakrifika vaʼekue (Juan 13:1). Ha Jesús haʼe rupi ne governánte haʼe omerese avei nde pyʼaite guive rehayhu chupe. Haʼe heʼi vaʼekue umi añetehápe ohayhúva chupe haʼeha voi iñamígo, ha ohechaukaha hína ohayhuha chupe okumplívo umi mbaʼe haʼe omanda vaʼekue (Juan 14:15; 15:14, 15). ¡Ajépa tuichaite mbaʼe jaiko Jehová Raʼy amígoramo!

9. ¿Mbaʼépepa ojojogua Jesús vautísmo ha umi kristianokuéra vautísmo?

⁹ Jesús omanda vaʼekue isegidorkuérape ojevautisa hag̃ua (Mat. 28:19, 20). Haʼe voi omoĩ vaʼekue la ehémplo ojevautisávo. Heta mbaʼépe ningo Jesús vautísmo idiferénte vaʼekue umi isegidorkuéra vautísmogui, péro oĩ avei umi mbaʼe ojojoguahápe (ehecha pe rrekuádro “ Mbaʼe mbaʼépepa idiferénte Jesús vautísmo umi isegidór vautísmogui”). Por ehémplo, Jesús ojevautisárõ guare oñepresenta vaʼekue Itúa renondépe ojapo hag̃ua ivolunta (Heb. 10:7). Upéicha avei, isegidorkuéra ojevautisávo ohechauka enterove renondépe haʼekuéra omeʼẽmaha hekove Ñandejára Jehovápe. Upe guive la iñimportantevéva chupekuéra g̃uarã haʼe hína ojapo Ñandejára volunta, ha ndahaʼéi la haʼekuéra oipotáva. Péicha haʼekuéra osegi hína Jesús ehémplo.

10. ¿Mbaʼérepa nde rehayhu Jesúspe, ha mbaʼépa rejapo vaʼerã rehayhu rupi chupe?

¹⁰ Nde ningo reguerovia Jesús haʼeha Jehová raʼy peteĩetéva ha haʼeha pe rréi Ñandejára onombra vaʼekue ñanegoverna hag̃ua. Avei reikuaa Jesús iñumildeha ha osegi porãha Itúa ehémplo. Ha reaprendéma haʼe omongaru hague hetaitereípe, okonsola umi oñedesanimávape ha omonguera umi hasývape jepe (Mat. 14:14-21). Nde rehecháma avei mbaʼéichapa haʼe odirihi pe kongregasiónpe ko tiémpope (Mat. 23:10). Nde ningo reikuaa Jesús haʼe rupi rréi Ñandejára Rréinope ojapotaha hetaiterei mbaʼe ijojahaʼỹva ñanderehehápe. ¿Mbaʼéichapa nde ikatu rehechauka rehayhuha chupe? Upearã resegi vaʼerã iñehémplo (Juan 14:21). Primerorã, eñemeʼẽ vaʼerã Jehovápe ha ejevautisa.

11. ¿Mbaʼérepa prinsipálmente jajevautisa?

¹¹ ¿Mbaʼérepa prinsipálmente jajevautisa? Jesús okontesta vaʼekue upéva oñeʼẽrõ guare pe Ñandejára mandamiénto iñimportantevévare. Haʼe heʼi vaʼekue: “Rehayhu vaʼerã Jehová nde Járape nde pyʼaite guive, nde rekove kompletoite reheve, entéro ne pensamiénto reheve, ha ne mbaretekue omeʼẽmíva reheve” (Mar. 12:30). ¿Ndépa péicha rehayhu Ñandejárape?

12. ¿Mbaʼérepa nde rehayhu Jehovápe? (Ehecha avei umi taʼanga).

 ¹² Hetaiterei mbaʼére ningo ikatu jahayhu Jehovápe. Por ehémplo, nde reaprende Ñandejára ‘omeʼẽha la vída enterovépe’ ha haʼe omeʼẽha “entéro mbaʼe porã ha rregálo iporãva” (Sal. 36:9; Sant. 1:17). Entéro mbaʼe porã nde reguerekóva ningo ou hína Jehovágui, pe Ñandejára ñanderayhuetéva ha ipojeraitévagui.

13. ¿Mbaʼérepa pe rreskáte haʼe peteĩ rregálo ijojahaʼỹva?

¹³ Jehová ningo oheja omano Itaʼýra ñandesalva hag̃ua, péva haʼe peteĩ rregálo ijojahaʼỹva haʼe omeʼẽ vaʼekue ñandéve. ¿Mbaʼérepa ikatu jaʼe upéva? Ñapensamíntena mbaʼéichapa ojoayhu Jehová ha Itaʼýra. Jesús heʼi vaʼekue voi: “Pe Túa cherayhu” ha ‘che ahayhu pe Túape’ (Juan 10:17; 14:31). Haʼekuéra ningo ojoayhuvéntema ohasa rupi oñondive tiémpo umi miles de millones de áño aja (Prov. 8:22, 23, 30). Ñapensamíntena mbaʼeichaitépa oiméne hasy asy rakaʼe Jehovápe opermitírõ guare Itaʼýra osufri ha omano. Péro Jehová ningo ohayhueterei yvyporakuérape, umíva apytépe ndéve avei, upévare haʼe ontrega vaʼekue Itaʼýra ohayhuetéva peteĩ sakrifísioramo, ikatu hag̃uáicha nde ha umi ótra persóna oikove pára siémpre (Juan 3:16; Gál. 2:20). Kóva haʼe hína pe rrasón tuichavéva ñanemomýiva jahayhu hag̃ua Ñandejárape.

14. ¿Mbaʼépa hína pe mbaʼe iporãvéva ikatúva redesidi nde rekovépe?

¹⁴ Nde ningo amás día rehayhuve Jehovápe pórke reikuaa porãve chupe. Katuete ningo nde reñemoag̃uiseve hese koʼág̃a ha avei pára  siémpre voi. Ha nde ningo ikatu hína rejapo upéva. Haʼe mborayhúpe nemokyreʼỹ embovyʼa hag̃ua pe ikorasõ (Prov. 23:15, 16). Ha upéva nde ikatu rejapo ndahaʼéi umi mbaʼe eréva rupivénte síno umi mbaʼe rejapóva rupive avei. Upévare reikóramo Jehová oipotaháicha, rehechaukáta nde añetehápe rehayhuha chupe (1 Juan 5:3). Ha upéva hína pe mbaʼe iporãvéva ikatúva redesidi nde rekovépe.

15. ¿Mbaʼéichapa nde ikatu rehechauka rehayhuha Jehovápe?

¹⁵ ¿Mbaʼéichapa nde ikatu rehechauka rehayhuha Jehovápe? Primerorã, ejapo vaʼerã peteĩ orasión espesiál ere hag̃ua pe úniko Dios verdadérope emeʼẽha chupe nde rekove (Sal. 40:8). Upéi, ejevautisa vaʼerã umi hénte renondépe ikatu hag̃uáicha ojekuaa nde reñemeʼẽma hague Ñandejárape. Jahecháma haguéicha ko artíkulope, javyʼaiterei ningo jajevautisa jave, ha upéva haʼe peteĩ día iñimportantetereíva ñande rekovépe. Upe día guive nde ndereikovéima remeʼẽ hag̃ua gústo ndejupe, síno reikove Jehovápe g̃uarã (Rom. 14:8; 1 Ped. 4:1, 2). Upéva haʼetévaicha peteĩ desisión iñimportantetereíva, ha añetehápe upéicha hína. Péro upéva omeʼẽta ndéve la oportunida ereko hag̃ua peteĩ vída ijojahaʼỹva. Jahechamína mbaʼérepa.

16. Heʼiháicha Salmo 41:12, ¿mbaʼe vendisiónpa Jehová omeʼẽta umi oipurúvape hekove oservi hag̃ua chupe?

¹⁶ Ndaipóri voi ningo ótra persóna Jehováicha ipojeráva. Tahaʼe haʼéva la ñande ñameʼẽva chupe, haʼe siémpre hetave jey omyengoviáta ñandéve (Mar. 10:29, 30). Ko múndo aña oñehundi potaitémavape jepe, haʼe omeʼẽta ñandéve heta mbaʼe ijojahaʼỹva, iporãitereíva ha ñanembovyʼátava. Ha péva koʼág̃a ñepyrũrãnte hína. Nde ningo rejevautisa ramónte hína ha ipuku gueteri la tape, pórke nde ikatu voi reservi pára siémpre nde Túa rehayhuetévape. Amás día pe mborayhu peñandúva ojuehe nde ha Jehová imbaretevéta. Ha Jehováicha, reikove pukúta para siémpre (elee Salmo 41:12).

17. ¿Mbaʼépa hína peteĩ mbaʼe Jehová ndorekóiva, ha nde ikatúva rerregala chupe?

¹⁷ Nde redesidívo emeʼẽ nde rekove Jehovápe ha rejevautisa, ereko la priviléhio emeʼẽvo nde Túape peteĩ mbaʼe ivaliosoitereíva. Haʼe ningo  omeʼẽ vaʼekue ndéve entéro mbaʼe porã ha redisfruta umívagui. Ha nde ikatu rerregala peteĩ mbaʼe ndoguerekóiva ko yvy ha yvága Járape: Reservi chupe fiélmente toiko la oikóva (Job 1:8; 41:11; Prov. 27:11). Ndaipóri voi ótra kósa iporãvéva ikatúva rejapo nde rekovépe. Ha la iñimportantevéva katu nde rehayhu rupi Jehovápe rejevautisase.

18. ¿Mbaʼe mbaʼépa ikatu reñeporandu?

¹⁸ ¿Ndépa rejevautisáta? Ndémante ikatu rerresponde upéva. Ikatu hína nepytyvõ reñeporandúramo: “¿Che piko ikatúma ajevautisa?” (Hech. 8:36). Nemanduʼákena umi mbohapy mbaʼe ñaanalisa vaʼekuére eikuaa hag̃ua mbaʼérepa rejevautisa vaʼerã. Primero, rehayhúgui pe añetegua ha umi mbaʼe oĩ porãva. Eñeporandu vaʼerã: “¿Hiʼãitereípa chéve og̃uahẽ pe día enterovete oĩva guive ko múndope heʼitahápe la verda ha ojapo la oĩ porãva?”. Segundo, rehayhu vaʼerã Jesucrístope. Ikatu eñeporandu: “¿Aipotápa Ñandejára Raʼy oiko che governánteramo ha asegisépa iñehémplo?”. Ha pe tercero ha iñimportantevéva, rehayhu vaʼerã Jehovápe. Eñeporandúkena: “¿Aservise piko Jehovápe ha péicha ambovyʼa pe ikorasõ?”. Oiméramo rekontesta “si” koʼã pregúntape, ¿mbaʼérepa upéicharõ nderejevautisái? ¿Mbaʼépa ndejoko hína? (Hech. 16:33).

19. ¿Mbaʼérepa nderedudái vaʼerã rejevautisa hag̃ua? Emoĩmi peteĩ ehémplo (Juan 4:34).

¹⁹ Oiméramo nde nderejedesidíri gueteri rejevautisátapa térãpa nahániri, ejepyʼamongetamína ko ehémplo Jesús omoĩ vaʼekuére (elee Juan 4:34). Jesús okompara vaʼekue pe tembiʼúre la Itúa volunta. ¿Mbaʼérepa? Pórke la tembiʼu ningo ojapo porã ñanderehe. Jesús oikuaa vaʼekue entéro mbaʼe Jehová ojeruréva ñandéve jajapo hag̃ua, ojapo porãha ñanderehe. Jehová ningo ndojeruréi ñandéve jajapo hag̃ua umi mbaʼe ñandeperhudikátava. Ha Ñandejára volunta hína la nde rejevautisa (Hech. 2:38). Upévare eimekuaa segúro rekumplíramo ko mandamiénto ha rejevautisa, ojapo porãitereitaha nderehe. Epensamína, ojeservíramo ndéve la tembiʼu hevéva ko múndope, ¿ajépa upepete voi rejagarráta? Ha upéicha avei nderedudái vaʼerã rejevautisa hag̃ua.

20. ¿Mbaʼépa jahecháta pe artíkulo oúvape?

²⁰ ¿Mbaʼérepa oĩ odudáva ojevautisa hag̃ua? Oiméne opensa noirĩha gueteri preparádo upearã. Ha añetehápe pe mbaʼe iñimportantevéva redesidi vaʼerã nde rekovépe haʼe hína reñemeʼẽ Jehovápe ha rejevautisa. Upévare epensa porãkena, eaprovecha porã pe tiémpo ha eñehaʼãmbaite eime hag̃ua preparádo. Péro oiméramo nde rejevautisase, ¿mbaʼépa nepytyvõta reime hag̃ua preparádo rejapo hag̃ua upéva? Pe artíkulo oúvape ñaanalisáta upéva.