¿Mbaʼérepa pe kuimbaʼe oñehenóiva “Fuláno” heʼi ikatuha osẽ ‘operde’ omendáramo Rut rehe? (Rut 4:1, 6)

¿Mbaʼépa oikóta kuri ymave peteĩ kuimbaʼe omendáva oúramo omano ifamiliaʼỹre? ¿Mbaʼépa oikóta ijyvýgui ha umi mbaʼe haʼe oguerekóvagui? ¿Opytátapa tesaráipe la héra pára siémpre? Moisés léi okontesta vaʼekue koʼã pregúnta.

¿Mbaʼépa oiko rakaʼe peteĩ kuimbaʼe oúramo omano, térã imboriahu rupi ovendepa ijyvy? Peteĩ iñermáno o ipariénte serkáno ikatu vaʼekue ojogua ha orrekupera jey pe yvy. Upéicha pe yvy opyta jeýta ihentekuérape g̃uarã (Lev. 25:23-28; Núm. 27:8-11).

¿Mbaʼépa ojejapo vaʼekue ani hag̃ua pe kuimbaʼe omano vaʼekue réra opyta rei? Pe omano vaʼekue ermáno ikatu kuri omenda pe viúdare ikatu hag̃uáicha ifamília. Ifamiliarépe opytáta pe karai erénsia ha héra ndopytareimoʼãi. Ojejapóramo péicha ikatúta oñeñangareko avei pe viúdare (Deut. 25:5-7; Mat. 22:23-28). Ko kostúmbre ojesegi vaʼekue Rut kásope.

Jahechamína Noemí káso. Noemí ningo omenda vaʼekue peteĩ kuimbaʼe héravare Elimélec. Upéi iména ha umi mokõi imembykuimbaʼe ou omano. Upéicha rupi Noemí ndorekói vaʼekue mávapa oñangarekóta hese (Rut 1:1-5). Tiémpo rire Noemí oho jey Judápe inuéra Rut ndive. Upépe haʼe heʼi Rútpe ojerure hag̃ua Boázpe ojogua hag̃ua pe ijyvy térã haʼe hag̃ua irrekompradór. Boaz ningo Elimélec pariénte serkáno (Rut 2:1, 19, 20; 3:1-4). Péro Boaz oñemeʼẽ enkuénta oĩha ótro pariénte serkanovéva chugui la Biblia ohenóiva “Fuláno”. Upévare Fuláno raẽ odesidi vaʼerã kuri ojoguátapa pe yvy (Rut 3:9, 12, 13).

Primerorã, Fulánope ogusta la idéa ha oĩ voi dispuésto oipytyvõvo (Rut 4:1-4). Haʼe oikuaa porã kuri ogastataha pláta upearã, péro avei oñemeʼẽ enkuénta Noemí ijedaitereimaha imemby hag̃ua. Upéicha rupi opytapaitéta kuri Fulánope Elimélec yvykue ha upéva ou porãitereíta kuri chupe.

Péro upéi Fuláno opilla omenda vaʼerãha Rut rehe, upémarõ okambia la odesidi vaʼekue. Haʼe heʼi: “Ndaikatumoʼãi ajogua, pórke ikatu hína aperde” (Rut 4:5, 6). ¿Mbaʼérepa haʼe okambia pe odesidi vaʼekue?

Fuláno térã ótro ipariénte serkáno omendáramo Rut rehe ha upe rire haʼe ou imemby, upe ifamiliarépe opytáta Elimélec yvykue. ¿Mbaʼéichapa oikórõ upéva Fuláno ikatúta kuri osẽ operde? La Biblia nomombeʼúi, péro jahecháta mbaʼérepa oiméne haʼe heʼi raʼe upéva.

• Primero, Fuláno ikatu oime opensa ogasta reitaha ipláta ojoguávo Elimélec yvykue, pórke upe rire pe yvy ndahaʼemoʼãi imbaʼerã, síno opytáta Rut membýpe.

• Segundo, haʼe oñangareko ha omantene vaʼerã Noemí ha Rútpe.

• Tercero, Rut oúramo hetave imemby Fulánogui, umi ótro Fuláno família ypykue okomparti vaʼerã iñerénsia Rut membykuérandi.

• Cuarto, oimérõ Fuláno naifamíliai rakaʼe, Rut memby orekóta kuri pe derécho opytávo Elimélec ha Fuláno yvýre. Péicha Fuláno yvy opytáta peteĩ mitã oguerahávape Elimélec réra ha ndahaʼéi imbaʼe. Haʼe okyhyje kuri operdérõ g̃uarã iñerénsia oipytyvõ rupi Noemípe, upévare opreferínte Boaz, haʼéva pe ótro pariénte serkáno, ojagarra upe rresponsavilida. Ha upéva la Boaz ojapo vaʼekue ikatu hag̃uáicha pe kuimbaʼe omano vaʼekue ‘yvy osegi opyta ifamiliarépe g̃uarã’ (Rut 4:10).

Ikatu jaʼe Fuláno opensave hague ijehénte ha ojepyʼapyeterei pono operde iñerénsia ni héra. Haʼe ojapóramo jepe ikatúva guive opyta hag̃ua la héra, amo ipahápe avavéma ndoikuaavéi mbaʼéichapa legálmente héra vaʼekue. Avei operde pe priviléhio porãite oguereko vaʼekue Boaz: Ifamiliarégui ou vaʼekue pe Mesías, Jesucristo. Ñambyasyete ningo, péro Fuláno noipytyvõséi rupi umi oikotevẽvape ha opensave rupi ijehénte ou operde peteĩ oportunida iporãitereíva (Mat. 1:5; Luc. 3:23, 32).