1, 2. a) ¿Mbaʼérehepa Jesús oñemongeta vaʼekue idisipulokuérandi omano mboyvemi? (Ehecha pe taʼanga oĩva iñepyrũme). b) ¿Mbaʼéicha rupípa iñimportánte ñanemanduʼa mbaʼérepa japredika? c) ¿Mbaʼépa jahecháta ko artíkulope?

PE PYHARE omano mboyvemi, Jesús are oñemongeta ijapostolkuérandi. Haʼe oasegura chupekuéra ohayhuetereiha káda únope. Avei omoĩ pe ehémplo oñeʼẽva pe parrál mátare, jahecha haguéicha pe artíkulo ohasa vaʼekuépe. Péicha Jesús omokyreʼỹ idisipulokuérape akóinte hembiapo porã hag̃ua, térã osegi hag̃ua oprodusi Jehová servísiope. Upearã oaguanta vaʼerã hikuái ha osegi opredika pe mensáhe oñeʼẽva Ñandejára Rréinore (Juan 15:8).

² Péro Jesús ndahaʼéi heʼínteva idisipulokuérape mbaʼépa ojapo vaʼerã, síno oexplika avei chupekuéra mbaʼérepa. Haʼe heʼi umi disípulope mbaʼérepa osegi vaʼerã opredika. Ñande avei ñapensa vaʼerã mbaʼérepa tekotevẽterei jasegi japredika, upéva ñanepytyvõta ikatu hag̃uáicha ñaaguanta ha ñamosarambi pe marandu porã “entéro tetãrupi” (Mat. 24:13, 14). Ko artíkulope jahecháta 4 mbaʼe omensionáva la Biblia ha ñanemokyreʼỹva japredika hag̃ua. Avei ñahesaʼỹijóta 4 rregálo Jehová omeʼẽva  ñandéve ikatu hag̃uáicha jasegi japrodusi iservísiope.

3. a) Ohechaukaháicha Juan 15:8, ¿mbaʼépa hína la iñimportantevéva ñanemomýiva japredika hag̃ua? b) ¿Mbaʼépa orrepresenta umi parrál, ha mbaʼérepa oĩ porã pe komparasión?

³ Primero, ñande japredika pórke ñambotuichase Jehovápe ha ñasantifikase héra, ha péva hína pe mbaʼe iñimportantevéva ñanemomýiva japredika hag̃ua (elee Juan 15:1, 8). Jesús omoĩrõ guare pe ehémplo oñeʼẽva pe parrál mátare, okompara Jehovápe peteĩ agrikultór oñotỹvare parrál. Jesús heʼi haʼe voi haʼeha pe parrál, ha isegidorkuéra haʼeha umi parrál rakã (Juan 15:5). Ko ehémplope, umi parrál orrepresenta umi mbaʼe kristianokuéra oprodusíva pe Rréino rehehápe, térã pe predikasión ojapóva hikuái. Jesús heʼi vaʼekue ijapostolkuérape: “Akóinte penerembiapo porãramo [...] pembotuicha hína che Túape”. Pe parrál máta hiʼa porã jave, oñeñeʼẽ porã pe agrikultór rehe. Péicha avei, ñañehaʼãramo japredika hekoitépe umi marandu porã oñeʼẽva Ñandejára Rréinore, ñambotuicha hína Jehovápe (Mat. 25:20-23).

4. a) ¿Mbaʼéichapa ikatu ñasantifika Ñandejára réra? b) ¿Mbaʼéichapa reñeñandu ereko rupi pe priviléhio resantifikávo Ñandejára réra?

⁴ ¿Mbaʼéichapa ikatu ñaipytyvõ pe predikasión rupive oñesantifika hag̃ua Ñandejára réra? Añetehápe ningo upe téra isagrádoma voi, ha ndaikatúi jajapo mbaʼeve isagradove hag̃ua. Jehová heʼi vaʼekue proféta Isaías rupive: “Che ningo Jehová, umi ehérsito yvagapegua Ruvicha, peẽ penemanduʼa vaʼerã che añoiteha la chepotĩva opa mbaʼépe” (Is. 8:13). Ñande ñasantifika térã ñamopotĩ hína Jehová réra ñamombaʼeve jave héra oimeraẽ ótro téragui. Avei jajapo upéva ñaipytyvõ jave ñande rapichápe ontende hag̃ua héra isagradoha (Mat. 6:9). Por ehémplo, ñamboʼe jave umi héntepe Jehová imbaʼeporãitereiha ha oipotaha yvyporakuéra oiko peteĩ paraísope, ñaipytyvõ chupekuéra ohechakuaa hag̃ua japuha umi mbaʼe vai Satanás heʼi vaʼekue Jehováre (Gén. 3:1-5). Avei ñasantifika Jehová réra ñamombeʼu jave umi héntepe haʼe añoite omereseha oñemombaʼe, oñembotuicha ha orresivi pe podér (Apoc. 4:11). Peteĩ ermáno hérava Rune oservímava de prekursór 16 áñore heʼi: “Aagradeseterei ko univérso Apoharépe omeʼẽ haguére chéve pe oportunida aiko hag̃ua Itestígoramo. Añetehápe upéva chemokyreʼỹ asegi hag̃ua apredika”.

5. a) ¿Mbaʼéicha rupípa japredika vaʼerã heʼiháicha Juan 15:9, 10? b) ¿Mbaʼéichapa Jesús oipytyvõ idisipulokuérape ontende hag̃ua tekotevẽha oaguanta?

⁵ (Elee Juan 15:9, 10). Segundo, ñande japredika jahayhúgui Jehovápe ha Jesúspe (Mar. 12:30; Juan 14:15). Jesús heʼi vaʼekue idisipulokuérape: “Peikókena che mborayhúpe”. ¿Mbaʼérepa Jesús heʼi chupekuéra upéva? Pórke haʼe oikuaa isegidorkuéra tekotevẽha oaguanta heta mbaʼe ijetuʼúva ohechauka hag̃ua haʼeha kristiáno verdadéro. Jaleéramo Juan 15:4-10 jahecháta Jesús heta vése heʼi hague “pepyta chendive”, ohechauka hag̃ua tekotevẽha ñaaguanta.

6. ¿Mbaʼéichapa jahechaukáta siémpre jaikoseha Cristo mborayhúpe?

⁶ ¿Mbaʼéichapa ikatu jahechauka jaikoseha siémpre Cristo mborayhúpe ha jaipotaha ñandeguerohory? Jahechaukáta upéva ñaneñeʼẽrendu jave chupe. Jesús núnka ndojeruréi ñandéve jajapo hag̃ua peteĩ mbaʼe haʼe voi ndojapóiva. Haʼe heʼi: “Che ajapóvo pe Túa mandamiénto, aiko imborayhúpe”. Péicha jahecha Jesús siémpre omoĩha la ehémplo (Juan 13:15).

7. ¿Mbaʼérepa jaʼekuaa jahechaukaséramo jahayhuha Jesúspe tekotevẽha ñaneñeʼẽrendu chupe?

 ⁷ Jesús heʼi vaʼekue jahechaukaséramo jahayhuha chupe tekotevẽha ñaneñeʼẽrendu. Haʼe heʼi: “Pe oguerovia ha ojapóva che mandamiénto, upéva cherayhu hína” (Juan 14:21). Umi mbaʼe Jesús omandáva ou Itúagui. Upévare japredika jave Jesús omanda haguéicha, jahechauka avei jahayhuha Jehovápe (Mat. 17:5; Juan 8:28). Jahechaukáramo jahayhuha Jehovápe ha Jesúspe, haʼekuéra avei ñanderayhúta.

8, 9. a) ¿Mbaʼépa ñanemomýi avei japredika hag̃ua? b) ¿Mbaʼéichapa Ezequiel 3:18, 19 ha 18:23 ñanemokyreʼỹ jasegi hag̃ua japredika?

⁸ Tercero, ñande japredika jaavisaségui umi héntepe Jehová ára guasu og̃uahẽmbotaitemaha. La Biblia heʼi Noé haʼe hague “peteĩ kuimbaʼe opredikáva” (elee 2 Pedro 2:5). Pe dilúvio mboyve, Noé oavisa avei umi héntepe Ñandejára ohunditaha umi iñañávape. Jesús heʼi vaʼekue: “Upe tiémpope, pe ama guasu mboyve umi hénte okaru ha omboyʼu; kuimbaʼe ha kuñanguéra omendajoa, Noé oike peve pe árkape. Haʼekuéra nopenái mbaʼevére ha upéi ou pe ama guasu ha ohundipaite chupekuéra. Péichata avei ág̃a Yvypóra Raʼy oĩ vove” (Mat. 24:38, 39). Umi hénte nopenáiramo jepe Noére, haʼe osegi ifiél ha opredika pe mensáhe Jehová onkarga vaʼekue chupe.

⁹ Koʼág̃arupi, ñande avei japredika ikatu hag̃uáicha umi persóna oaprende mbaʼépa Ñandejára ojapóta yvyporakuéra rehehápe. Jehová oipotaháicha, ñande avei jaipotaiterei umi hénte ohendu pe mensáhe oñeʼẽva Ñandejára Rréinore ha “osegi oikove” (Ezeq. 18:23). Japredika jave ogahárupi ha oimeraẽ lugárpe, jaavisa hína ikatúva guivépe Ñandejára Rréino outaha ohundi hag̃ua ko múndo aña (Ezeq. 3:18, 19; Dan. 2:44; Apoc. 14:6, 7).

10. a) ¿Mbaʼérepa jasegi japredika ohechaukaháicha Mateo 22:39? b) ¿Mbaʼéichapa Pablo ha Silas oipytyvõ peteĩ guárdia kárselpe?

¹⁰ Cuarto, jasegi avei japredika jahayhúgui umi héntepe (Mat. 22:39). Ñande jaikuaa umi hénte ikatuha okambia opensa lája oúramo okambia isituasión. Ñapensamína mbaʼépa oiko vaʼekue Pablo ha Sílasre oĩrõ guare siuda de Filípospe. Umi iñenemígo omoinge chupekuéra kárselpe, péro pyharepytérupi de rrepentete oiko peteĩ yvyryrýi, pe kársel simiénto okuʼepaite ha umi okẽ ojavripa. Pe guárdia kársel oimoʼã umi préso okañymba hague, upévare ojesuisidamoʼã. Péro Pablo osapukái chupe: “Ani rejapo ndejehe mbaʼeve ivaíva”. Pe guárdia oporandu: “¿Mbaʼe piko ajapo vaʼerã ajesalva hag̃ua?”. Pablo ha Silas heʼi chupe: “Ejerovia ore Ruvicha Jesús rehe, ha rejesalváta” (Hech. 16:25-34).

11, 12. a) ¿Mbaʼéichapa pe guárdia kársel ehémplo ikatu ñanepytyvõ predikasiónpe? b) ¿Mbaʼérepa jasegise japredika?

¹¹ ¿Mbaʼéichapa pe guárdia kársel ehémplo ikatu ñanepytyvõ predikasiónpe? Jahecha haguéicha, pe guárdia kársel okambia ha ojerure ajúda oiko rire pe  terremóto. Péicha avei, umi nohenduséi vaʼekue ñande predikasión ikatu ou okambia ha ojerure ñandéve ajúda ohasa rire peteĩ mbaʼe ijetuʼuetereíva. Por ehémplo, oĩ operdéva itraváho térã ojedivorsiáva. Ótro katu oñeñandu yvýre orekógui peteĩ mbaʼasy igravetereíva térã omanógui chugui peteĩ ohayhúva. Ohasa rire koʼã situasión, oĩ upépe ae oikuaaséva maʼerãpa jaikove. Ikatu voi oñeporandu avei: “¿Mbaʼe piko ajapo vaʼerã ajesalva hag̃ua?”. Japredika jave koʼãichagua tapichápe, ikatu hína ohenduse pe mensáhe de esperánsa jaraháva chupekuéra.

¹² Jasegíramo japredika fiélmente, ikatúta ñakonsola umi héntepe oĩ vove dispuésto hikuái oasepta hag̃ua ñane mensáhe (Is. 61:1). Charlotte, oĩmava pe tiémpo komplétope 38 áñore heʼi: “Koʼág̃arupi heta persóna ndorekói esperánsa. Upévare oikotevẽ ohendu hikuái ñane mensáhe”. Ótra ermána hérava Ejvor, ojapómava iprekursorádo 34 áñore omombeʼu: “Koʼã tiémpope hetaitereivéntema oĩ oñedeprimíva térã oñembyasýva. Che aipytyvõseterei koʼãichagua persónape, upévare apredika chupekuéra”. Jahechaháicha, jahayhúramo umi héntepe jasegíta japredika.

13, 14. a) ¿Mbaʼépa pe rregálo oñemensionáva Juan 15:11-pe? b) ¿Mbaʼépa jajapo vaʼerã javyʼa hag̃ua Jesús ovyʼaháicha? c) ¿Mbaʼérepa javyʼáramo ifasilvéta ñandéve jasegi hag̃ua japredika?

¹³ Pe pyhare Jesús omano mboyve, omensiona idisipulokuérape unos kuánto rregálo oipytyvõtava chupekuéra osegi hag̃ua oprodusi iservísiope. ¿Mbaʼe mbaʼépa umi rregálo, ha mbaʼéichapa ikatu ñanepytyvõ koʼág̃arupi?

¹⁴ Vyʼa. ¿Haʼépa peteĩ kárga ñandéve g̃uarã pe predikasión? Ni mbaʼevéicharõ. Jesús omoĩ rire pe ehémplo oñeʼẽva pe parrál mátare, heʼi japredikáramo javyʼataha haʼe ovyʼaháicha (elee Juan 15:11). ¿Mbaʼérepa? Jahecha haguéicha pe ehémplope, Jesús heʼi ijehe haʼeha pe parrál máta ha idisipulokuéra katu pe parrál rakã. Umi parrál rakã oĩramo pe parrál mátare añoite ikatúta orresivi pe y ha ambue mbaʼe oikotevẽva. Ñande avei javyʼaséramo Jesús ovyʼaháicha, tekotevẽ jaiko peteĩ ñeʼẽme hendive ha jasegi iñehémplo. Jajapóramo koʼã mbaʼe, javyʼáta jajapo rupi Ñandejára rembipota (Juan 4:34; 17:13; 1 Ped. 2:21). Peteĩ ermána hérava Hanne oservíva de prekursóra mas de 40 áñoma heʼi: “Siémpre añeñandu porã asẽ rire apredika. Upéva chemokyreʼỹ asegi hag̃ua aservi Jehovápe”. Jahechaháicha, javyʼáramo jasegíta japredika la majoría umi hénte nañanerenduséiramo jepe (Mat. 5:10-12).

15. a) ¿Mbaʼépa pe rregálo oñemensionáva Juan 14:27-pe? b) ¿Mbaʼéichapa pe pyʼaguapy ñanepytyvõ jasegi hag̃ua japrodusi Jehová servísiope?

¹⁵ Pyʼaguapy (elee Juan 14:27). Pe pyhare Jesús omano mboyve heʼi vaʼekue ijapostolkuérape: “Ameʼẽ peẽme che pyʼaguapy”. ¿Mbaʼéichapa Jesús pyʼaguapy ikatu ñanepytyvõ jasegi hag̃ua japredika? Jasegi jave japredika ikatúta ñandepyʼaguapy jaikuaágui péicha ñambovyʼaha Jehovápe ha Jesúspe (Sal. 149:4; Rom. 5:3, 4; Col. 3:15). Peteĩ ermáno hérava Ulf oĩmava pe tiémpo komplétope 45 áñore heʼi: “Chekaneʼõiterei apredika rire. Péro ajapo rupi ko tembiapo avyʼaiterei ha isentído la che rekove”. Añetehápe, jaagradeseterei Jehovápe ikatúgui ñañandu pe pyʼaguapy arakaʼeve ndopamoʼãiva.

16. a) ¿Mbaʼe rregálorepa oñeʼẽ Juan 15:15? b) ¿Mbaʼépa ojapo vaʼerã umi apóstol osegi hag̃ua oiko Jesús amígoramo?

¹⁶ Pe amista jarekóva Jesús ndive. Jesús heʼi vaʼekue oipotaha ijapostolkuéra  ovyʼa haʼe ovyʼaháicha. Upe rire oexplika chupekuéra mbaʼérepa iñimportánte ohechauka oporohayhuha ipyʼaite guive (Juan 15:11-13). Upéi Jesús heʼi: “Peẽ hína che amígo”. ¡Ajépa tuichaite mbaʼe jaikórõ Jesús amígoramo! Upéva ningo peteĩ rregálo iporãitereíva. Péro, ¿mbaʼépa ojapo vaʼerã ijapostolkuéra ikatu hag̃uáicha osegi oreko Jesúspe iñamígoramo? Jesús heʼi chupekuéra: “Akóinte penerembiapo porã” (elee Juan 15:14-16). Upéva heʼise osegi vaʼerãha oprodusi iservísiope térã opredika. Dos áñorupi Jesús heʼi mboyve upéva, omanda vaʼekue idisipulokuérape: “Pehokuévo, pepredika pehóvo ha peje: ‘Pe Rréino yvagapegua hiʼag̃uimbaitéma’” (Mat. 10:7). Upévare, pe pyhare Jesús omano mboyve omokyreʼỹ vaʼekue idisipulokuérape oaguanta ha osegi hag̃ua opredika (Mat. 24:13; Mar. 3:14). Jesús oikuaa porã ijetuʼutaha chupekuéra upéva, péro oñehaʼãramo osegíta oiko hikuái iñamígoramo. Oĩ avei ótro rregálo oipytyvõtava chupekuéra upearã.

17, 18. a) ¿Mbaʼépa pe rregálo oñemensionáva Juan 15:16-pe? b) ¿Mbaʼéichapa pe rregálo oipytyvõ Jesús disipulokuérape? c) ¿Mbaʼe rregálopa ñanepytyvõ koʼág̃arupi?

¹⁷ Oñerresponde ñane ñemboʼe. Jesús heʼi vaʼekue: “Oimeraẽ mbaʼe pejeruréva che rérape pe Túape, haʼe katuete omeʼẽta peẽme” (Juan 15:16). Ko promésa katuete omombareténe raʼe ijapostolkuérape. * Péro haʼekuéra nontendeporãi hiʼag̃uimaha pe tiémpo Jesús omano hag̃ua. Upéicharõ jepe, upéva ndeʼiséi ojeheja reitaha chupekuéra. Jehová katuete orrespondéta iñemboʼe ha oipytyvõta umi apóstolpe opredika hag̃ua. Ha upeichaite oiko kuri. Jesús omano riremi, umi apóstol ojerure asy Jehovápe ombopyʼaguasu hag̃ua chupekuéra, ha haʼe ombohovái iñemboʼe (Hech. 4:29, 31).

¹⁸ Koʼág̃arupi avei, jasegi hag̃ua jaiko Jesús amígoramo tekotevẽ ñaaguanta ha jasegi japredika. Jehová katuete ombohováita ñane ñemboʼe ijetuʼúramo ñandéve japredika (Filip. 4:13). Javyʼaiterei Jehová ñanerendu haguére ha ikatúgui jaiko Jesús amígoramo. Añetehápe koʼã rregálo ñanemombarete jasegi hag̃ua japrodusi Jehová servísiope (Sant. 1:17).

19. a) ¿Mbaʼérepa jasegi vaʼerã japredika? b) ¿Mbaʼépa ñanepytyvõta jasegi hag̃ua japredika oñemanda haguéicha ñandéve?

¹⁹ Ko artíkulope jahecha mbaʼérepa jasegi vaʼerã japredika: 1) ñambotuicha hag̃ua Jehovápe ha ñasantifika hag̃ua héra, 2) jahechauka hag̃ua jahayhuha Jehovápe ha Jesúspe, 3) jaavisa hag̃ua umi héntepe, ha 4) jahayhúgui ñande rapichápe. Avei jahecha 4 rregálo ñanemombaretéva jasegi hag̃ua japredika ñamohuʼã meve pe tembiapo Ñandejára omanda vaʼekue. Umíva hína vyʼa, pyʼaguapy, pe amista jarekóva Jesús ndive, ha oñembohovái ñane ñemboʼe. Jehová ovyʼaiterei ohechávo ñambaʼapo jejopyha jasegi hag̃ua japrodusi iservísiope.