1. ¿Mbaʼérepa hetaiterei ermánope ijetuʼu ostudia hag̃ua?

KOʼÁG̃ARUPI heta hénte ombaʼapo jejopy vaʼerã ohupyty hag̃ua umi mbaʼe oikotevẽva. Hetaiterei ñane ermanokuéra ombaʼapo vaʼerã koʼẽ guive pytũ meve omantene hag̃ua ifamíliape. Oĩ umi oipurúva heta óra oviaha hag̃ua itravahohápe ha upéi ou jey hag̃ua hógape. Avei oĩ heta ombaʼapo pohýi vaʼerã ogana hag̃ua pláta omeʼẽ hag̃ua ifamíliape oikotevẽva. Ha kaʼaruetévo koʼã ermáno heʼongue ijapérema og̃uahẽ hógape, ha ikaneʼõitereígui ni ndohasái iñakãrupikuéra ostudia.

2. ¿Mbaʼe órapa nde restudia jepi?

² Péro oĩ peteĩ mbaʼe katuete jajapómante vaʼerã: Ñañemotiémpo vaʼerã jastudia hag̃ua, jastudia ensério hag̃ua la Biblia ha ñane puvlikasionkuéra. Upéva katuete jajapo vaʼerã, pórke upévare odepende jasegi hag̃ua jaiko Jehová amígoramo ha jaiko hag̃ua pára siémpre (1 Tim. 4:15, 16). Oĩ ermáno opuʼãva voi porã káda día ha ostudia ndaiporiguasúi jave rruído hógape, ha ikatu jave opensa trankílo porã opytuʼupaite rire. Ótro katu omboyke itiémpo pyhare ndaiporiguasúi jave mbaʼeve omolesta vaʼerã chupe, ikatu hag̃uáicha sapyʼaite ostudia ha ojepyʼamongeta la Biblia ha ñane puvlikasionkuéra heʼívare.

3, 4. ¿Mbaʼe kámbiopa ojapo pe Kuérpo Governánte, ha mbaʼérepa?

³ Enterove ningo jahechakuaa iñimportantetereiha ñañemotiémpo jastudia hag̃ua. Péro, ¿mbaʼépa jastudia vaʼerã? Ikatu ñapensa jaguerekoha hetaiterei mbaʼe jalee vaʼerã ha ijetuʼuha jaleepa hag̃ua kompletoite. Oĩ umi ermáno ikatúva oleepa umi puvlikasionkuéra ha ohechapa umi vidéo oguenohẽva Jehová organisasión, péro hetápe ijetuʼu ojapo hag̃ua upéva. Pe Kuérpo Governánte ningo oikuaa ijetuʼuha jajapo hag̃ua upéva. Upéicha rupi ramoiténte odesidi saʼive informasión jarresivitaha tahaʼe impréso térã Internét rupive.

 ⁴ Por ehémplo, nañaguenohẽvéima pe Anuario de los testigos de Jehová, pórke ikatu jatopa hetaiterei experiénsia ñanemokyreʼỹva Internétpe oĩva pe sítio jw.org^® ha umi prográma osẽvape káda mes JW Broadcástingpe. Avei umi rrevísta ¡Despertad! ha Ñemañaha púvlika katu osẽ 3 vésentema káda áño. Koʼã kámbio ndojejapói jarekove hag̃ua tiémpo jajapo hag̃ua ótra kósa, síno ikatu hag̃uáicha ñanetiempove jajapo hag̃ua “umi mbaʼe iñimportantevéva” (Filip. 1:10). Jahechami koʼág̃a mbaʼéichapa ikatu jadesidi mbaʼépa ñamotenondéta jastudiáta jave, ha mbaʼéichapa ikatu ideprovechove ñandéve ñande estúdio personál.

5, 6. ¿Mbaʼe puvlikasiónpa jastudia porã vaʼerã?

⁵ ¿Mbaʼe mbaʼépa primeroite jastudia vaʼerã? Ñande ñañemotiémpo vaʼerã káda día jastudia hag̃ua la Biblia. Por ehémplo, koʼág̃a oñemombykyve pe lektúra káda semanagua ikatu hag̃uáicha jarekove tiémpo jajepyʼamongeta hag̃ua pe jaleévare, ha ñainvestiga porãve hag̃ua ñane puvlikasionkuérape. Ñande ningo ndahaʼéi ñakompletasénteva pe lektúra káda semanagua, síno jaipota pe mensáhe oĩva la Bíbliape og̃uahẽ ñane korasõme ha ñanemoag̃uive Jehováre (Sal. 19:14).

⁶ ¿Mbaʼépa jastudia porã vaʼerã avei? Tekotevẽ jastudia umi artíkulo oñehesaʼỹijótava oĩva rrevísta Ñemañaháme, pe puvlikasión jaipurúva pe párte héravape Ñaaprendeve Ñandejára Ñeʼẽgui, ha umi ótra informasión ojestudiátava pe rreunión éntre semanaguápe. Avei jalee vaʼerã entéro umi Ñemañaha ojestudiáva, púvlika ha ¡Despertad!

7. ¿Mbaʼérepa ndovaléi ñañedesanima ndaikatúiramo jaleepa umi artíkulo térã jahechapa umi vidéo oĩva Internétpe?

⁷ Upéicharõ jepe, ikatu oĩ heʼíva: “Péro oĩ gueteri hetaiterei artíkulo ha vidéo ñande sítio jw.org-pe ha avei pe sítio JW Broadcástingpe, ¿arakaʼe piko aleepa ha ahechapáta umíva?”. Ñapensamína ko ehémplore: Umi pátio de komídape ningo oĩ jepi hetaiterei kláse tembiʼu hetereíva. Péro nde ndaikatumoʼãi reʼu entéro mbaʼe oĩva upépe, upévare reiporavótante la reʼu vaʼerã. Upéicha avei ani reñedesanima ndaikatúiramo releepa entéro umi artíkulo térã rehechapa umi vidéo oĩva Internétpe. Reñehaʼãmbaite vaʼerã relee ha rehecha la ikatúva guive. Jahechami koʼág̃a mbaʼépa heʼise jastudia ha mbaʼépa jajapo vaʼerã ideprovechopaite hag̃ua ñandéve ñande estúdio.

8. a) ¿Mbaʼe mbaʼépa jajapo vaʼerã jastudia jave pe rrevísta Ñemañaha? b) ¿Mbaʼéichapa ñanepytyvõta jajapóramo upéicha?

⁸ Jastudia jave ñañekonsentra vaʼerã pe jaleévare ikatu hag̃uáicha ñaaprende álgo iñimportánteva. Ndeʼiséi jaleénte pyaʼe pyaʼe pe informasión ha jasuvraja umi rrespuésta. Por ehémplo, jastudia jave pe rrevísta Ñemañaha primeroite jalee vaʼerã pe párte hérava “Mbaʼe rehepa ñañeʼẽta”, oĩva oñepyrũvo pe artíkulo. Upéi jajepyʼamongeta pe títulore, umi subtítulo, ha umi pregúnta de rrepásore. Upe rire jalee vaʼerã pe artíkulo mbeguekatu porãnte ha ñañekonsentra hese. Ñañatende porã vaʼerã pe primera orasión oĩvare káda párrafope, pórke upéva omombeʼúta ñandéve mbaʼe rehepa oñeñeʼẽ hína upe párrafope. Jalee aja pe artíkulo, ñapensa vaʼerã mbaʼéichapa umi párrafo omyesakã ohóvo umi subtítulo ha pe téma prinsipál orekóva pe artíkulo. Ñaanota vaʼerã umi palávra ndajaikuaáiva ha umi mbaʼe pyahu ñaaprendéva ñainvestiga porãsevéva upe rire.

9. a) ¿Mbaʼérepa ñañatende porã vaʼerã umi téxto bíblicore jastudia jave pe rrevísta Ñemañaha, ha mbaʼéichapa ikatu jajapo upéva? b) Heʼiháicha Josué 1:8, ¿mbaʼépa jajapo vaʼerã avei jaleekuévo umi téxto?

⁹ Kongregasiónpe ningo jastudia pe rrevísta Ñemañaha ikatu hag̃uáicha ñantende la Biblia.  Upévare ñañatende porã vaʼerã umi téxto bíblicore, koʼýte umi oĩvare negrítape ha ojeleétava ojestudia vove pe rrevísta kongregasiónpe. Jahecha vaʼerã mbaʼéichapa umi palávra ha fráse oĩva umi versíkulope omyesakã pe idéa prinsipál orekóva pe párrafo. Ha jaleekuévo umi téxto ñañemotiémpo vaʼerã jajepyʼamongeta hag̃ua mbaʼéichapa umi mbaʼe heʼíva ikatu ñanepytyvõ ñande rekovépe (elee Josué 1:8).

10. Heʼiháicha Hebreos 5:14, ¿mbaʼérepa tuakuéra oipuru vaʼerã ijestúdio de família omboʼe hag̃ua ifamíliape ostudia ha oheka hag̃ua informasión?

¹⁰ Katuete ningo tuakuéra oipota ifamiliakuéra ovyʼa ojapo jave hikuái káda semána ijestúdio de família. Ha tekotevẽramo jepe tuakuéra okalkula mbaʼéichapa ojapóta ijestúdio de família, natekotevẽi oprepara katuete káda semanarã peteĩ mbaʼe espesiál ojapo vaʼerã. Ikatu añete ohecha hikuái pe broadcasting osẽva káda mes, térã oprepara jepi álgo espesiál, por ehémplo ojapo pe árka de Noé. Péro iñimportánte avei tuakuéra omboʼe ifamíliape mbaʼéichapa ostudia vaʼerã. Por ehémplo, haʼekuéra oaprende vaʼerã mbaʼéichapa ikatu ojeprepara umi rreunionrã, térã oheka hag̃ua informasión oñeʼẽva peteĩ provléma oñepresenta vaʼekuére eskuéla térã koléhiope (elee Hebreos 5:14). Haʼekuéra ojepokuaáramo hógapema voi ostudia peteĩ téma bíblico, ifasilvéta chupekuéra oñatende ha ontende hag̃ua umi mbaʼe oñemboʼéva rreunión ha asambleahápe, noñemoĩrihápe jepi katuete umi videokuéra. Péro jaikuaaháicha, pe tiémpo oipurútava tuakuéra ostudia hag̃ua ifamíliandi odependétama umi mitãnguéra edáre térã ilájare.

11. ¿Mbaʼérepa iñimportánte ñamboʼe ñane estudiantekuérape ostudiakuaa hag̃ua hikuái haʼeñoháme?

¹¹ Ñane estudiantekuéra oaprende vaʼerã avei mbaʼéichapa ostudia vaʼerã. Ñepyrũrã ningo ñande javyʼaiterei haʼekuéra omarka haguére umi rrespuésta pe puvlikasión jastudiávape hendivekuéra, térã umi jaipurúva rreunionrã. Péro tekotevẽ avei ñamboʼe chupekuéra mbaʼéichapa ikatu oheka informasión ñane puvlikasionkuérape, ha ostudia porã hag̃ua haʼeñoháme. Péicha ombohovái vove hikuái peteĩ provléma, oho rangue ensegída voi oporandu umi ermánope mbaʼépa ojapo vaʼerã, haʼekuéra ijeheguiete ohekakuaáta informasión ikatútava oipytyvõ chupekuéra.

12. ¿Mbaʼe mbaʼépa ikatu jahupyty ñande estúdio rupive?

¹² Oiméramo nandegustapaguasúi pe estúdio, oime vaʼerã repensa arakaʼeve voi nandegustamoʼãiha. Péro añetehápe ikatu hína. Ñañepyrũ hag̃ua ikatu jastudia mbyky mimínte, ha upéi mbeguekatúpe ñambopukuve jahávo  ñande estúdio. Repensa vaʼerã mbaʼépa rehupytyse nde estúdio rupive. Ñande ningo amás día ñañemoag̃uiseve Jehováre, ha upéva la iñimportantevéva ñandéve g̃uarã. ¿Péro mbaʼépa ikatu jahupyty ensegidaiténtema voi? Ikatu ñambohovái peteĩ mbaʼe oñeporandu vaʼekue ñandéve térã jaheka informasión ñanepytyvõtava ñambohovái hag̃ua peteĩ provléma jarekóva.

13. a) Emyesakã mbaʼe mbaʼépa ikatu ojapo peteĩ imitãva oĩva gueteri eskuéla térã koléhiope odefende hag̃ua la Biblia heʼíva. b) ¿Mbaʼéichapa ikatu rekumpli Colosenses 4:6 heʼíva?

¹³ Por ehémplo, oiméramo nde reho gueteri eskuéla térã koléhiope, ikatu oime oĩ ndejopýva repurahéi hag̃ua pe ímno nasionál térã refesteha hag̃ua kumpleáño. Oiméne nde redefendese la Biblia heʼíva koʼã mbaʼére, péro ikatu repensa nereimeiha preparádo rejapo hag̃ua upéva. Upéicharõ tekotevẽ restudia umi informasión oñeʼẽva koʼã mbaʼére. Restudia porãramo ikatúta rehupyty mokõi mbaʼe: 1) Reimevéta desidído ani hag̃ua rejeheʼa ko múndore, ha hesakã porãta ndéve mbaʼérepa Ñandejárape ndogustái ojefesteha umi kumpleáño, 2) reaprendéta mbaʼéichapa remyesakã porãvéta umi mbaʼe omboʼéva la Biblia (Juan 17:16; Mat. 14:6-11; 1 Ped. 3:15). Ñepyrũrã reñeporandu vaʼerã: “¿Mbaʼérepa che kompañerokuéra opurahéi pe ímno térã ofesteha kumpleáño?”, ha upéi katu einvestiga porã mbaʼépa heʼi ñane puvlikasionkuéra. Péicha ningo ifasilvéta ndéve redefende umi mbaʼe regueroviáva. Heta hénte ningo opensa opurahéi vaʼerãha pe ímno pórke peteĩ persóna haʼekuéra orrespetáva heʼi chupekuéra ojepurahéi vaʼerãha. Ha umi ofesteháva kumpleáño katu ojapo jepi upéva pórke ohecha enterovévante ofestehaha. Pe investigasión rejapóvape retopáramo peteĩ térã mokõi mbaʼe omyesakãva mbaʼérepa nde nderejapói umi mbaʼe, ikatúta hína reipytyvõ peteĩ añetehápe oikuaasévape mbaʼépa heʼi la Biblia (elee Colosenses 4:6).

14-16. a) ¿Mbaʼépa ikatu jajapo ñantende porãve hag̃ua peteĩ lívro de la Biblia ndajaikuaaguasúivagui? b) Emyesakã mbaʼéichapa umi téxto oĩva pe párrafope ñanepytyvõ ñantende porãve hag̃ua pe lívro de Amós. (Ehecha avei pe rrekuádro “ Ñañehaʼã ñañeimahina pe jaleéva”).

¹⁴ Ñamoĩ chupe peteĩ rreuniónpe jalee ha jastudiataha peteĩva umi lívro profétiko mbykyvéva oĩva la Bíbliape. Ikatu oime ñande ndajaikuaaguasúi heta mbaʼe upe lívrogui. Tenonderãite voi, ñañehaʼã vaʼerã ñaaprendeseve umi mbaʼe pe proféta oskrivi vaʼekuégui. ¿Mbaʼéichapa ikatu jajapo upéva?

¹⁵ Primeroite ñañeporandu vaʼerã: “¿Mbaʼe mbaʼépa aikuaa upe eskritórgui? ¿Mávapa haʼe, moõpa oiko vaʼekue, ha mbaʼépepa ombaʼapo rakaʼe?”. Jaikuaáramo koʼã mbaʼe ñanepytyvõta ñantende hag̃ua pe oñeʼẽ lája ha mbaʼéicha rupípa oipuru algún ehémplo. Jaleekuévo pe lívro, jaheka vaʼerã umi fráse ñanepytyvõtava jaikuaa hag̃ua mbaʼeichagua persónapa rakaʼe upe oskrivi vaʼekue pe lívro.

¹⁶ Upe rire, tuichaiterei ñanepytyvõta jahecháramo arakaʼépa ojeskrivi rakaʼe upe lívro. Jaikuaa hag̃ua upéva ikatu jarrevisa pe párte hérava “Tabla de los libros de la Biblia”, oĩva opakuévo pe Traducción del Nuevo Mundo de las Santas Escrituras. Avei ikatu jahecha pe folléto Restudia porãve hag̃ua la Biblia, páhina 14-17. Pe lívro ñande jastudiáva orekóramo profesía, ñañehaʼã vaʼerã jaikuaa mbaʼéichapa oiko vaʼekue umi hénte ojeskrivírõ guare pe lívro. Por ehémplo ikatu ñainvestiga: ¿Mbaʼépa opensa vaʼekue umi hénte, térã mbaʼe ivaívapa ojapo vaʼekue hikuái ha upévare oñemondo pe profétape oipytyvõ hag̃ua chupekuéra okambia hag̃ua? ¿Mávapa oiko vaʼekue avei pe proféta tiémpope? Reikuaa hag̃ua entéro koʼã mbaʼe iporã vaʼerã rehecha avei umi ótro  lívro de la Biblia. Por ehémplo, ñantende hag̃ua umi mbaʼe oikóva proféta Amós tiémpope, ikatu jalee mbykymi umi versíkulo oĩva 2 Reyes ha 2 Crónicaspe, umíva jatopa hína umi rreferénsia marhinálpe oĩva Amós 1:1-pe. Ikatu avei jahecha lívro de Oseas, pórke amalisia haʼe oiko vaʼekue avei Amós tiémpope. Entéro koʼã informasión ñanepytyvõta ñantende porãve hag̃ua mbaʼéichapa ojeiko vaʼekue Amós tiémpope (2 Rey. 14:25-28; 2 Crón. 26:1-15; Os. 1:1-11; Amós 1:1).

17, 18. Emyesakã mbaʼéichapa umi detálle ikatu ñanepytyvõ igustove hag̃ua ñandéve ñande estúdio. Eipuru umi ehémplo oĩva umi párrafope térã ótro ehémplo nde reikuaáva.

¹⁷ Ñandekuriósoramo ñanepytyvõta igustove hag̃ua ñandéve jalee la Biblia. Por ehémplo, ñamoĩ chupe jaleeha hína Zacarías kapítulo 12, oĩháme pe profesía heʼíva pe Mesías omanotaha (Zac. 12:10). Ñag̃uahẽvo pe versíkulo 12-pe jalee heʼiha “Natán rogaygua” ojaheʼotaha pe Mesías omano haguére. Ñambohasa rei rangue upe detálle, iporãta japytaʼimi ha ñañeporandu: “¿Mbaʼéicha rupi piko Natán rogaygua ojaheʼóta pe Mesíasre? ¿Moõpa ikatu atopave informasión?”. Jaikuaa hag̃ua upéva tekotevẽta ñainvestigamie. Pe rreferénsia marhinál ñandegueraha 2 Samuel 5:13, 14-pe, ha upépe jatopa heʼiha Natán haʼe hague rréi David raʼy. Ótra rreferénsia marhinál ñandegueraha Lucas 3:23, 31-pe, heʼihápe Jesús haʼeha Natán familiare, María rupive (ehecha Ñemañaha agosto de 2017, páh. 32, párr. 4). ¡Upépe katu ñandekuriosovéntema! Ñande jaikuaa kuri la Biblia heʼíma hague voi Jesús outaha David familiarégui (Mat. 22:42). Péro David ningo mas de 20 voi itaʼýra. ¡Ajépa jahecharamoite mbaʼéichapa kavalete Zacarías heʼíma vaʼekue voi Natán rogaygua ojaheʼotaha Jesús omano haguére!

 ¹⁸ Jahechamína ótro ehémplo. Lucas kapítulo 1-pe oñemombeʼu pe ánhel Gabriel oho hague María rendápe ha heʼiha chupe pe mitã orekótavare: “Ko mitãʼi tuicháta ha oñehenóita Ñandejára Ijojahaʼỹva Raʼy. Ha Jehová omoĩta chupe Rréiramo itúva David haʼe haguéicha avei. Haʼe ogovernáta Jacob rogayguáre opa ára g̃uarã” (Luc. 1:32, 33). Ikatu hína jajesarekove pe ánhel Gabriel heʼi hague tenonderã Jesús haʼetaha “Ñandejára Ijojahaʼỹva Raʼy”. Péro Gabriel heʼi avei kuri Jesúsgui oikotaha rréi ha ‘ogovernataha’. Upéicha rupi ñande ikatu ñañeporandu mbaʼépa oiméne María opensa rakaʼe Gabriel heʼi vaʼekuére chupe. ¿Heʼisépa raʼe pe ánhel Jesús ojupitaha rréiramo Israélpe Herodes rekovia, térã umi ótro governánte oútava upe rire rekovia? Jesúsgui oikóramo rréi, Maríagui oikóta kuri pe rréi sy, ha ifamília ikatúta kuri oiko peteĩ palásiope. Péro la Biblia ndeʼiriete María heʼi hague koʼã mbaʼe pe ánhel Gabriélpe, ni ndajatopamoʼãi voínte María ojerure hague oreko hag̃ua peteĩ puésto iñimportánteva pe Rréinope, ojapo haguéicha mokõi Jesús disípulo (Mat. 20:20-23). Ko detálle ohechauka porãvéntema ñandéve mbaʼeichaitépa María iñumílde vaʼekue.

19, 20. Heʼiháicha Santiago 1:22-25 ha 4:8-pe, ¿mbaʼe mbaʼépa jahupytyse jastudia jave?

¹⁹ Siémpre ñanemanduʼa vaʼerã jastudiaha Ñandejára Ñeʼẽ ha ñane puvlikasionkuéra ñañemoag̃uiseve rupi Jehováre, ha péva hína pe mbaʼe iñimportantevéva jahupytyséva. Jaikuaa porãse avei mbaʼeichagua persónapa ñande ha mbaʼépepa tekotevẽ ñakambia ikatu hag̃uáicha Ñandejára ñandeguerohory (elee Santiago 1:22-25; 4:8). Upévare, ñañepyrũta jave jastudia, katuete jajerure vaʼerã Jehovápe ijespíritu sánto. Avei jajerure asy vaʼerã chupe tañanepytyvõ jaaprovechapaite hag̃ua ñande estúdio, ha hesakã porã hag̃ua ñandéve mbaʼépepa tekotevẽ ñakambia.

²⁰ Ajépa hiʼãite ojeʼe ñanderehe pe ojeʼe vaʼekue Ñandejára siérvore: “Haʼe ohayhueterei voi Jehová léi, ára ha pyhare olee ha ojepyʼamongeta hese. [...] Ha opa mbaʼe ojapóva osẽ porã chupe” (Sal. 1:2, 3).