1. ¿Mbaʼéichapa ñanepytyvõ Ñandejára Ñeʼẽ?

ÑANDE ikatu ñambohovái porã oimehaichagua situasión, Jehová haʼe rupi ñane “Mboʼehára Ijojahaʼỹva” (Is. 30:20, 21). La Bíbliape jatopa entéro mbaʼe ñaikotevẽva ikatu hag̃uáicha ‘ñandekatupyry opa mbaʼerã, ha jarekopaite hag̃ua ñaikotevẽva guive jajapo hag̃ua iporãva’ (2 Tim. 3:17). Jaikóramo Ñandejára Ñeʼẽme heʼiháicha katuete ñanearanduve umi odefendévagui “ko mundopegua arandu” (1 Cor. 3:19; Sal. 119:97-100).

2. ¿Mbaʼépa jahecháta ko artíkulope?

² Ko mundopegua arandu ningo ñanemomýi jareko hag̃ua umi pensamiénto ha deséo vai. Upévare sapyʼánte ikatu ijetuʼu ñandéve ñanediferénte hag̃ua umi hénte oikóvagui ko múndope. Ndareíri la Biblia heʼi ñandéve: “Peñatendéke ani avave oipuru yvypóra arandu, ni heʼi peẽme vyrorei penembotavy hag̃ua ha pendereity iñuhãme. Haʼekuéra ojevale umi kostúmbre kuimbaʼekuéra omboʼévare” (Col. 2:8). Ko artíkulope jahecháta mbaʼéichapa umi hénte oñepyrũ oguerovia mokõi japu Satanás omboʼéva. Ha ñaanalisávo umíva, jahecháta mbaʼérepa ko mundopegua arandu vyroreiete hína ñakomparáramo Ñandejára Ñeʼẽ heʼívare. Péicha jahechakuaáta Jehová arandu iporãiteveha oimeraẽ mbaʼe ko múndo oikuaveʼẽvagui.

3, 4. ¿Mbaʼe mbaʼépa oñepyrũ rakaʼe okambia éntre umi áño 1900 ha 1930?

³ Éntre umi áño 1900 ha 1930, oñepyrũ vaʼekue tuichaiterei okambia umi hénte ohecha lája umi rrelasión sexuál. Por ehémplo, anteve haʼekuéra opensa vaʼekue umi omendáva añoite ikatuha oreko rrelasión sexuál, ha noñeʼẽi vaʼerãha voi koʼã mbaʼe rehe en púvliko. Péro koʼã mbaʼe oñepyrũ okambia ha saʼi saʼípe  ndaivaivéima umi héntepe g̃uarã ojapo koʼã mbaʼe.

⁴ Éntre umi áño 1920 ha 1929, pe Primera Gérra Mundiál opa rire, umi hénte oiko lája ou okambiaite ha oñepyrũma ohecha hendapeʼỹ hikuái umi rrelasión sexuál. Peteĩ investigadóra heʼi: “Umi pelíkula, teátro, músika, lívro ha umi propagánda oñepyrũma itieʼỹ”. Umi áñope, umi hénte oñepyrũma avei ojeroky tieʼỹ ha oipuru umi ao mbykýva, hesakãva térã ojopyetereíva chupekuéra. La Biblia ningo heʼíma vaʼekue voi umi ára pahápe umi hénte ‘oikotaha vyʼarã rapykuérinte’ (2 Tim. 3:4).

5. ¿Mbaʼépa oñepyrũ oiko áño 1960 riremi?

⁵ Áño 1960 riremi, heta hetave hénte oñepyrũ oiko oñondive omendaʼỹre, oĩve avei umi divórsio ha umi kuimbaʼe oikóva hapicha kuimbaʼéndi ha kuña kuñándi. Umi pelíkula, teátro térã sínepe oñepyrũ ojehechaukave umi mbaʼe tieʼỹ. ¿Mbaʼépa oiko upe haguére? Peteĩ eskritóra heʼi oikoha hetaiterei mbaʼe vai ojehecha rupi hendapeʼỹ umi rrelasión sexuál. Por ehémplo, oĩ hetaiteve iprovlémava hogapýpe, oheja reíva ifamíliape ha upéicha rupi pe túa térã sy omongakuaa vaʼerã haʼeño ifamíliape, avei oĩ hetave oñedeprimíva ha oñenvisiáva pe pornografíare. Koʼág̃arupi avei oĩ hetaiterei mbaʼasy ojeguerováva umi rrelasión sexuál káusare, por ehémplo pe sída. Entéro koʼã mbaʼe ohechauka porã vyroreiha ko mundopegua arandu (2 Ped. 2:19).

6. ¿Mbaʼérepa ou porãiterei Satanáspe umi hénte ohecháramo hendapeʼỹ umi rrelasión sexuál?

⁶ Satanáspe ou porãiterei umi hénte ohecha rupi hendapeʼỹ umi rrelasión sexuál. Haʼe ovyʼaiterei ohecha jave umi hénte orekoha rrelasión sexuál hendapeʼỹ ha nomombaʼeiha pe matrimónio, ha péicha ndorrespetái koʼã rregálo Ñandejára omeʼẽ vaʼekue yvyporakuérape (Efes. 2:2). Ñande yvyporakuéra ningo ikatu ñanefamília, ha upéva haʼe avei peteĩ rregálo Jehová omeʼẽ vaʼekue ñandéve. Péro umi hénte hekovaíva ohechauka nomombaʼeiha ko rregálo, ha ivaiveha katu upéva káusare ndaikatumoʼãi oiko hikuái pára siémpre (1 Cor. 6:9, 10).

7, 8. ¿Mbaʼérepa la Biblia heʼíva umi rrelasión sexuál rehe iporãiteve ko mundopegua arandúgui?

⁷ Umi hénte osegíva ko mundopegua arandu oñembohory la Biblia heʼívare umi rrelasión sexuál rehe, ha heʼi voi naisentidoiha. Umichagua hénte ikatu oñeporandu: “¿Mbaʼére piko Ñandejára ñandeapo jarekose hag̃uáicha rrelasión sexuál, ha upéi heʼi jey ñandéve jajejoko hag̃ua?”. Haʼekuéra oñeporandu upéva pórke tuichaiterei ojekivoka oimoʼãvo ñande jajapo vaʼerãha  jajaposévante. Péro la Biblia ndeʼiriete upéva. Ñandejára Ñeʼẽ ohechauka Jehová omombaʼeha yvypórape omeʼẽvo ñandéve la kapasida ñamboyke hag̃ua umi deséo vai jarekóva (Col. 3:5). Hiʼarive Jehová orregala yvyporakuérape pe matrimónio ikatu hag̃uáicha pe ména ha tembireko oreko rrelasión sexuál hekópe porã ha hendaitépe (1 Cor. 7:8, 9). Upéicha rupi umi omendáva orekóramo rrelasión sexuál oñondivénte, haʼekuéra ndojepyʼapýi ni noñembyasýi ojapoháicha umi hekovaíva.

⁸ La Biblia ñanemboʼe jahecha hag̃ua hendápe porã umi rrelasión sexuál, ha upe heʼíva iporãiteve ko mundopegua arandúgui. Ñandejára Ñeʼẽ heʼi umi rrelasión sexuál ikatuha ñanembovyʼa (Prov. 5:18, 19). Péro heʼi avei: “Káda uno ojejokokuaa vaʼerã oiko hag̃ua tekopotĩme ha tekomarangatúpe. Ani peiko tarovaite penembaʼepota vai rapykuéri, ojapoháicha umi tetã ndoikuaáiva Ñandejárape” (1 Tes. 4:4, 5).

9. a) ¿Mbaʼe konséhopa omeʼẽ vaʼekue Ñemañaha 1926-pe guare ohechaukáva Ñandejára arandu iporãiteveha? b) ¿Mbaʼe konsého iporãvapa jatopa 1 Juan 2:15, 16-pe? c) Heʼiháicha Romanos 1:24-27, ¿mbaʼe mbaʼépa ñamboyke vaʼerã?

⁹ Éntre umi áño 1900 ha 1930, Jehová siervokuéra ndohejái vaʼekue ombotavy chupekuéra umi hénte ‘ndoikuaavéimava mbaʼépa iporã ha ivai’ (Efes. 4:19). Upéva rangue, haʼekuéra oñehaʼãmbaite osegi umi mbaʼe Jehová heʼíva. Rrevísta Ñemañaha 15 de mayo de 1926 osẽ vaʼekue ingléspe heʼi: “Peteĩ kuña ha peteĩ kuimbaʼe hekopotĩ vaʼerã, ndojapói ha nopensái vaʼerã mbaʼeve ikyʼávare, ha koʼýte oñatende vaʼerã mbaʼéichapa ojotrata peteĩ kuña ha peteĩ kuimbaʼe”. Umi hénte upe tiempopegua ohecháramo jepe hendapeʼỹ umi rrelasión sexuál, Jehová siervokuéra ohechakuaa Ñandejára Ñeʼẽ heʼíva iporãiteveha, ha okumpli hikuái umi mbaʼe heʼíva pype (elee 1 Juan 2:15, 16). ¡Ajépa ñamombaʼete jareko haguére la Biblia! Jaagradese avei Jehovápe omeʼẽ haguére ñandéve itiempoitépe umi informasión omombaretéva ñande jerovia, ha ñanepytyvõva ani hag̃ua jasegi ko mundopegua arandu heʼíva umi rrelasión sexuál rehe * (elee Romanos 1:24-27).

10, 11. ¿Mbaʼépa heʼi vaʼekue voi la Biblia oikotaha umi ára pahápe?

¹⁰ La Biblia heʼi vaʼekue voi umi ára pahápe ‘umi hénte ijehénte ojepyʼapytaha’ (2 Tim. 3:1, 2). Upévare ndajahecharamói ko múndope oñemokyreʼỹha umi héntepe opensa hag̃ua ijehéntema. Peteĩ ensiklopédia heʼi áño 1970 riremi “oñepyrũ hague osẽ heta hetave lívro heʼíva mbaʼépa jajapo vaʼerã jaiko hag̃ua vyʼápe”. Oĩ voi lívro heʼíva “peteĩ persóna nokambiái vaʼerãha ilája térã nopensái vaʼerãha oĩ vaiha la ojapóva”. Por ehémplo, peteĩva umi lívrope heʼi: “Nde rejehayhu vaʼerã, pórke nde hína pe persóna iporãvéva, ikalidavéva ha iñimportantevéva oĩva ko múndope”. Upe lívro heʼi avei “peteĩ persóna odesidi vaʼerãha mbaʼéichapa oñekomportáta, ha ojapo vaʼerãha oimeraẽ mbaʼe opensáva oĩ porãha térã okonvenivéva chupe”.

¹¹ ¿Mávarepa ñanemomanduʼa upe idéa? Satanás rehe. Haʼe omboliga vaʼekue Évape ojapo hag̃ua avei upéicha. Haʼe heʼi chupe ‘ojoguataha Ñandejárape ha oikuaataha mbaʼépa iporã ha mbaʼépa ivai’ (Gén. 3:5). Koʼág̃arupi hetaiterei persóna oñemombaʼeterei ijupe ha heʼi voi ni Ñandejára ni avavete asy ndaikatuiha heʼi chupekuéra mbaʼépa oĩ porã ha mbaʼépa oĩ vai. Por ehémplo, upéva koʼýte ojehechakuaa umi hénte opensávare pe matrimóniore.

12. ¿Mbaʼéichapa ojehecha ko múndope pe matrimónio?

¹² La Biblia heʼi umi omendáva ojorrespeta ha okumpli vaʼerãha umi promésa ojapo  vaʼekue ojupe omendárõ guare. Omokyreʼỹ avei chupekuéra ojedesidi hag̃ua osegitaha oñondive, heʼívo: “Pe kuimbaʼe ohejáta itúa ha isýpe, ha opytáta hembirekóndi, ha mokõivégui oikóta peteĩntema” (Gén. 2:24). Péro umi osegíva ko mundopegua arandu katu ótra kosaite omboʼe. Haʼekuéra heʼi pe ména ha pe tembireko opensa vaʼerãha ijehénte ha omotenonde vaʼerãha umi mbaʼe káda uno oikotevẽva ovyʼa hag̃ua. Peteĩ lívro oñeʼẽva pe divórsiore heʼi: “Heta paíspe, oiko jave peteĩ kasamiénto, umi omendáva opromete ojupe oĩtaha oñondive oikove aja entéro. Péro heta persóna okambia upe promésa ha heʼi oĩtaha oñondive ohayhu ajánte iména térã hembirekópe”. Umi hénte opensa pe matrimónio haʼeha sapyʼami g̃uarãnte, ha upéva káusare hetaiterei família isarambi ha osufri. Jahecha porãiterei upéicharõ vyroreiha ko múndo opensáva pe matrimóniore.

13. ¿Mbaʼérepa Jehová ndochaʼeiete umi oñembotuichávare?

¹³ La Biblia heʼi: “Jehovápe ombojeguaru umi hénte oikóva oñembotuicha” (Prov. 16:5). ¿Mbaʼérepa Jehová ndochaʼeiete umi oñembotuichávare? Pórke umichagua persóna ijejapo ha omokyreʼỹ ótrope oñemombaʼeguasu hag̃ua Satanás ojapo haguéicha. Por ehémplo, Jehová ojevale vaʼekue Jesús rehe ojapo hag̃ua entéro mbaʼe oexistíva, péro epensamína mbaʼeichaitépa Satanás oñembotuicha oñanimárõ guare ojerure Jesúspe voi oñesũ hag̃ua henondépe ha oadora chupe (Mat. 4:8, 9; Col. 1:15, 16). Umi oñemombaʼeguasúva oimoʼãramo jepe iñaranduha, añetehápe ivyroiterei hína hikuái Ñandejárape g̃uarã.

14. ¿Mbaʼéichapa Romanos 12:3 ñanepytyvõ ikatu hag̃uáicha ñapensa hekópe porãnte ñandejehe?

¹⁴ La Biblia ñanepytyvõ ikatu hag̃uáicha ñapensa hekópe porãnte ñandejehe. Ñandejára Ñeʼẽ heʼi iporãha jajehayhu ñandejupe. Por ehémplo, Jesús heʼi vaʼekue: “Rehayhu vaʼerã nde rapichápe nde rejehayhuháicha” (Mat. 19:19). Upéva ohechauka ndaivairiha jajehayhu ha ñañangareko ñandejehe jahasaʼỹre la rrája. Upéicharõ jepe, la Biblia ñanemboʼe ndovaleiha  ñapensa ñaneimportanteveha ótrogui. Upéva rangue heʼi: “Ani pejapo mbaʼeve peiko vaiségui ni peñembovaleségui, peñemomirĩ guei ha pepensa umi ótro tuichaveha pendehegui” (Filip. 2:3; elee Romanos 12:3).

15. ¿Mbaʼérepa nde ere la Biblia heʼíva iporãveha ko mundopegua arandúgui?

¹⁵ Koʼág̃arupi, umi persóna iñarandúva ko múndope g̃uarã opensa vyroreiha la Biblia heʼíva ko témare. Haʼekuéra heʼi ñapensáramo umi ótro iñimportanteveha ñandehegui, haʼekuéra ojaprovechataha ñanderehe. Péro epensamíntena mbaʼeichagua héntepa oĩ Satanás múndope. ¿Mbaʼépa jahechakuaa umi héntere? ¿Ikatúpa jaʼe ovyʼaha umi persóna opensáva ijehénte? ¿Oikópa hikuái vyʼápe ifamíliandi? ¿Ikatúpa jaʼe orekoha hikuái amígo teete? ¿Orekópa hikuái Ñandejárape iñamigoitéramo? Rejepyʼamongetávo koʼã mbaʼére, ¿ndépa ere iporãvetaha jasegíramo ko mundopegua arandu térãpa Ñandejára arandu?

16, 17. ¿Mbaʼérepa jaagradesete Jehovápe?

¹⁶ Oĩ umi persóna osegíva umi konsého omeʼẽva umi odefendéva ko mundopegua arandu, péro añetehápe umíva tuichaiterei ojavy. Haʼete voi peteĩ viahéro oñedesatináva ha oporandúva moõ gotyopa oho vaʼerã ótro viahéro oñedesatina vaʼekuépe avei. Jesús heʼi vaʼekue umi kuimbaʼe “iñarandúva” itiémpope guare rehe: “Haʼekuéra ndohechái mbaʼeve, ha upéicharamo jepe ohechauka haperã ótrope. Upévare, peteĩ siégo oisãmbyhýramo ótro siégope, mokõivéva hoʼáta peteĩ yvykuápe” (Mat. 15:14). Ojekuaa porãiterei ningo ko mundopegua arandu vyroreieteha Ñandejára renondépe.

¹⁷ Umi konsého porãite omeʼẽva la Biblia ymaite guive “ideprovécho ñaporomboʼe, ñañemoñeʼẽ, japorokorrehi, ha ñaporohekomboʼe hag̃ua hekoitépe” (2 Tim. 3:16). ¡Jaagradesete ningo Jehovápe iñorganisasión rupive ñandeprotehe haguére ko mundopegua arandúgui! (Efes. 4:14). Umi informasión omeʼẽva ñandéve ñanemombarete ñakumpli hag̃ua Ñandejára ojeruréva ñandehegui. ¡Ajépa tuichaite mbaʼe Jehová omeʼẽ haguére ñandéve pe gía isegurovéva oexistíva, upéva hína pe arandu omeʼẽva la Biblia!