1. ¿Mbaʼe ehémplopa Jesús oheja vaʼekue isegidorkuérape, ha mbaʼépa ojapo hikuái? (Ehecha pe taʼanga oĩva ko rrevísta apére).

JESÚS oĩrõ guare ko yvy ape ári siémpre ipositívo ha ikyreʼỹ vaʼekue predikasiónpe, ha oipota vaʼekue avei isegidorkuéra ikyreʼỹ opredikávo (Juan 4:35, 36). Jesús oĩ aja idisipulokuérandi, haʼekuéra opredika vaʼekue kyreʼỹme (Luc. 10:1, 5-11, 17). Péro ojejagarra ha ojejuka rire Jesúspe, idisipulokuéra ou vaʼekue naikyreʼỹvéi opredika hag̃ua peteĩ tiémpore (Juan 16:32). Orresusita rire, Jesús omokyreʼỹ vaʼekue chupekuéra omotenonde hag̃ua pe predikasión. Upéicha rupi, Jesús oho rire yvágape haʼekuéra ikyreʼỹeterei opredikávo, ha iñenemigokuéra jepe ojeplagea vaʼekue heʼívo: “¡Pemañamína!, pemyenyhẽma Jerusalén koʼã mbaʼe pemboʼévagui” (Hech. 5:28).

2. ¿Mbaʼéichapa Jehová ovendesíma pe predikasión?

² Jesús ogia vaʼekue umi kristiáno ypykuépe opredika hag̃ua, ha Jehová ovendesi rupi chupekuéra heta hénte oasepta pe mensáhe. Por ehémplo, pe Pentekostés áño 33-pe, ojevautisa 3.000 persónarupi (Hech. 2:41). Ha upéi hetaitereivéntema ohóvo umi disípulo (Hech. 6:7). Péro Jesús oprofetisa vaʼekue hetaitereive persóna oaseptataha pe mensáhe umi ára pahápe (Juan 14:12; Hech. 1:8).

3, 4. a) ¿Mbaʼérepa heta lugárpe ijetuʼu ojepredika? b) ¿Mbaʼépa jahecháta ko artíkulope?

³ Enterove ningo ñañehaʼã ñandepositívo ha ñanekyreʼỹ predikasiónpe. Heta lugárpe ndahasyiete jajapo hag̃ua upéva. ¿Mbaʼérepa? Pórke hetaiterei hénte ostudiase la Biblia, ha sapyʼánte umi ermáno ndaipuʼakavéima oñatendepa hag̃ua umi héntere. Upévare oanotámante hikuái herakuéra oĩ peve peteĩ Testígo ikatúva ombostudia chupekuéra. Péro oĩ avei umi lugár ijetuʼuetereihápe umi ermánope opredika hag̃ua pórke heta  hénte noĩri hógape, ha umi oĩva katu noñeinteresaguasúi la Biblia heʼívare.

⁴ Oiméramo jaiko peteĩ lugár ijetuʼuhápe japredika, umi konsého oĩva ko artíkulope tuichaiterei ñanepytyvõta. Jahecháta por ehémplo mbaʼépa ojapo umi ermáno oñemongeta hag̃ua hetave héntendi predikasiónpe. Avei ñaanalisáta mbaʼérepa ikatu jasegi ñandepositívo ha ñanekyreʼỹ umi hénte ohendu, térã nohendúiramo jepe pe mensáhe jagueraháva.

5. ¿Mbaʼe ijetuʼúvapa ombohovái heta ermáno?

⁵ Heta Testígope amás día ijetuʼuve oñemongeta hag̃ua umi héntendi hógape. Oĩ ermáno oikóva umi lugár oĩháme heta várrio serrádo, térã umi edifísio de apartaménto ndoikeihápe oimeraẽvante. Koʼãichagua lugárpe ikatu oĩ umi guárdia nopermitíriva umi héntepe oike, umi oikóva upépe noinvitáiramo chupekuéra. Ótro lugárpe katu umi ermáno ikatu oho trankílamente opredika ogahárupi, péro saʼietereíre otopa jepi hógape. Oĩ avei umi ermáno opredikáva kampañaháre térã umi lugár mombyryhápe ndahetaihápe umi óga. Haʼekuéra mombyrymbyry oviaha vaʼerã og̃uahẽ hag̃ua peteĩ ógape, ha sapyʼánte ndotopái jey avavére. Oiméramo ñanderehe oiko koʼã mbaʼe, ¿mbaʼépa ikatu jajapo ani hag̃ua ñañentrega ha ñañemongeta hag̃ua hetave persónandi?

6. ¿Mbaʼépepa ojojogua umi peskadór ha umi opredikáva?

⁶ Jesús okompara vaʼekue pe predikasión pe peskádare (Mar. 1:17). Umi peskadór ningo ikatu ohasa heta día onohẽʼỹre ni peteĩ pira. Upéicharõ jepe haʼekuéra noñentregái, síno okambiánte opeska lája. Por ehémplo okambia mbaʼe órapa oho opeska, moõpa, ha mbaʼéichapa ojapo upéva. Ñande avei ikatu jasegi iñehemplokuéra japredika jave. Jahechamína unos kuánto konsého.

7. ¿Mbaʼépa ikatu oiko ñakambiáramo pe óra japredikaha jepi?

⁷ Ñatantea japredika ótro órape. Ñande ikatu ñañemongeta hetave persónandi, japredikáramo haʼekuéra oĩha órape hógape. Amo ipahápe enterovéva oúmante vaʼerã hógape en algún moménto. Heta ermáno opredika kaʼaru térã kaʼarupytũ, pórke otopa hikuái hetave héntere hógape. Avei koʼã órape umi hénte oĩ trankilove ha oñemongetaseve jepi. Ikatu avei jajapo peteĩ ansiáno hérava David ojapóva. Haʼe heʼi opredikapa rire peteĩ territóriope, oho jeyha iñirũndi umi óga avave noñatendéi haguépe hesekuéra. David omombeʼu: “Chesorprende mbaʼéichapa rotopa heta héntere roho jeývo hógape por segunda ves”. *

8. ¿Mbaʼéichapa ikatu ñamoĩ en práktika predikasiónpe Eclesiastés 11:6 heʼíva?

⁸ Nañañentregái vaʼerã, síno jasegi vaʼerã ñañehaʼã jatopa umi héntere hógape. Upéva hína la ñaaprendéva pe téxto omopyendávagui ko artíkulo (elee Eclesiastés 11:6). David, pe ermáno ajeʼi ñañeʼẽ hague noñentregái vaʼekue. Otantea rire heta vése, haʼe hasypeve otopa kuri peteĩ persónare hógape. Pe kuimbaʼe oñatendéva hese oñeʼẽse kuri la Bíbliare, ha heʼi voi chupe: “Ojapóma 8 áño aiko hague koʼápe, ha koʼág̃a primera ves añemongeta peteĩ testígo de Jehovándi che rógape”. David heʼi: “Che ahechakuaa jatopa jave umi héntere ñatantea rire heta vése, la majoría ohenduse jepi pe mensáhe jagueraháva”.

9. ¿Mbaʼépa ojapo umi ermáno opredika hag̃ua umi hénte ndaikatúivare otopa hógape?

⁹ Ñatantea japredika diferénte lugárpe. Oĩ ermáno otanteáva opredika diferénte lugárpe ikatu hag̃uáicha oñemongeta umi hénte  ndaikatúivare otopa hógape. Por ehémplo, haʼekuéra opredika kállere térã karríto reheve umi lugár oĩháme umi edifísio ndaikatuihápe ojeike ojepredika. Péicha umi ermáno ikatu oñemongeta umi persóna oikóvandi umi apartaméntope. Avei heta ermáno ohechakuaa umi hénte naiprovlemaiha oñemongeta hag̃ua ñanendive, térã ojagarra hag̃ua ñandehegui puvlikasión ojepredika jave chupekuéra umi plásape, merkádope ha umi negosioháre. Floiran, peteĩ superintendénte de sirkuíto oĩva Bolíviape heʼi: “Ore roho umi merkádo ha umi negosioháre asajekue, la una guive las tres peve, pórke koʼã órape haʼekuéra saʼive hembiapo. Péicha jave roñemongeta porã jepi umi héntendi ha romoñepyrũ voi estúdio bíblico”.

10. ¿Mbaʼe mbaʼépa avei ikatu jajapo ñañemongeta hag̃ua umi héntendi?

¹⁰ Ñatantea japredika diferénte hendáicha. Ñamoĩ chupe heta vésema ñañehaʼã hague ñañemongeta peteĩ persónandi. Jaháma hógape diferénte órape, péro lomímonte ndajatopái hese. ¿Oĩnepa álgo ikatúva jajapove ñañemongeta hag̃ua hendive? Peteĩ ermána hérava Katarína heʼi: “Oimérõ ndatopái peteĩ persónare hógape, che askrivi chupe peteĩ kárta, ha amoĩmbaite upépe umi mbaʼe haʼéta vaʼekue apredikárire chupe en persóna”. ¿Mbaʼépa ñaaprende ko ermána ehémplogui? Ñañehaʼã vaʼerãha japredika diferénte hendáicha ñañemongeta hag̃ua enterove persóna oĩvandi ñande territóriope.

11. ¿Mbaʼérepa oĩ umi hénte nohenduséiva pe mensáhe jagueraháva?

¹¹ Oĩ ningo umi hénte nohenduséiva pe mensáhe jagueraháva. Haʼekuéra opensa natekotevẽiha oikuaa Ñandejárape ni la Biblia heʼíva.  Ikatu hína ndojeroviái hikuái Ñandejárare ohecha rupi hetaiterei sufrimiénto ko múndope. Térã ikatu oime ndoikuaaséi mbaʼeve la Bíbliagui ohechávo mbaʼeichaitépa hovamokõi umi líder rrelihióso, heʼi guaʼúva okumpliha la Biblia heʼíva péro ojapóva heta mbaʼe vai. Ótro katu ojepyʼapyve itraváhore, ifamíliare térã umi iprovlemakuérare, ha ndohechakuaái mbaʼéichapa la Biblia ikatu oipytyvõ chupekuéra. ¿Mbaʼépa ikatu jajapo jasegi hag̃ua ñandepositívo ha javyʼa predikasiónpe oĩ jave umi nomombaʼéiva pe mensáhe jagueraháva?

12. ¿Mbaʼéichapa ikatu ñamoĩ en práktika predikasiónpe Filipenses 2:4 heʼíva?

¹² Jahechauka jajepyʼapyha umi héntere. Heta persóna ñepyrũrã nohenduséi vaʼekue pe mensáhe, upe rire oasepta ohechávo mbaʼéichapa ojepyʼapy hese pe ermáno opredika vaʼekue chupe (elee Filipenses 2:4). Por ehémplo David, pe ermáno ajeʼi ñañeʼẽ hague heʼi: “Peteĩ persóna heʼíramo oréve ndoikuaaseiha mbaʼeve la Bíbliagui, ore roñongatúnte la ore Biblia ha umi puvlikasionkuéra, ha roʼe chupe: ‘Aikuaasete ningo mbaʼérepa repensa upéicha’”. Umi hénte ningo ohechakuaa oĩ jave ojepyʼapýva hesekuéra. Ikatu hína hesarái hikuái pe jaʼévagui, péro katuete imanduʼáta mbaʼéichapa jatrata raʼe chupekuéra ha ñaneamávle hague. Ha umi hénte ndohejáiramo jepe japredika chupekuéra, ñande ikatu jahechauka jajepyʼapyha hesekuéra ñañekomporta lájare ha ñanderorývo chupekuéra.

13. ¿Mbaʼéichapa ikatu ñakambia umi mbaʼe jaʼétava ointeresave hag̃ua umi ogajárape pe mensáhe jagueraháva?

¹³ Ñande jahechauka avei jajepyʼapyha umi héntere ñakambia jave umi mbaʼe jaʼétava, ikatu hag̃uáicha ointeresave umi ogajárape pe mensáhe jagueraháva. Por ehémplo, ¿jahechápa algúna kósa ohechaukáva oĩha mitã upe ógape? Umi tuakuérape ikatu hína ointeresa umi konsého oĩva la Bíbliape ohechaukáva mbaʼéichapa ikatu omongakuaa porã ifamíliape, térã mbaʼéichapa ikatu ovyʼa hogapýpe. ¿Orekópa upe óga umi murálla ijyvatéva térã umi kámara de segurida? Upéicharõ ikatu ñañemongeta hendive mbaʼéichapa koʼág̃arupi la hénte okyhyjepa pe insegurida ha delinkuénsia káusare. Pe ogajára ningo katuete ovyʼáta ohendúvo koʼẽrõitéma opataha koʼã mbaʼe vai. Tahaʼe haʼéva pe téma ñañemongetaha, ñañehaʼãkena ñaipytyvõ upe persónape ohechakuaa hag̃ua mbaʼéichapa umi konsého oĩva la Bíbliape ikatu oipytyvõ chupe. Katarína, pe ermána ajeʼi ñañeʼẽ hague heʼi: “Siémpre añehaʼã chemanduʼa mbaʼéichapa la Biblia tuichaitereíma chepytyvõ aiko porãve hag̃ua”. Upéicha rupi Katarína opredika jave siémpre ohechauka oĩha segúra umi mbaʼe heʼívare, ha umi hénte ohendúva chupe katuete opilla upéva.

14. Heʼiháicha Proverbios 27:17, ¿mbaʼéichapa ñanepytyvõ japredikáramo ótro ermánondi?

 ¹⁴ Jaasepta ótro ñanepytyvõse jave. Yma síglo primérope Pablo omboʼe vaʼekue Timotéope mbaʼéichapa opredika ha oporomboʼe vaʼerã, ha omokyreʼỹ Timotéope oipytyvõ hag̃ua avei ótrope upéicha (1 Cor. 4:17). Oiko haguéicha Timotéore, ñandéve avei ikatu ñanepytyvõ umi ermáno ikatupyrýva ha iñexperiénsiava oĩva ñane kongregasiónpe (elee Proverbios 27:17). Jahechamína Shawn ehémplo. Haʼe ningo peteĩ tiémpore oĩ vaʼekue de prekursór kampañahápe, ha upépe la majoría umi hénte nokambiaséi vaʼekue irrelihión. ¿Mbaʼépa oipytyvõ chupe osegi hag̃ua ovyʼa? Haʼe heʼi: “Ijáma guive chéve, siémpre añehaʼã apredika ótro ermánondi, ha rosẽvo peteĩ ógagui roho hag̃ua ótrope, roaprovecha upe tiémpo rohecha hag̃ua mbaʼéichapa ikatu romboʼe porãve la héntepe. Por ehémplo, roñemongeta jepi pe ogajára heʼi vaʼekuére ha upe ore roʼe vaʼekuére chupe. Upéva orepytyvõ rohechakuaa hag̃ua mbaʼépa ikatu roʼe oñepresenta jeýramo oréve peichagua situasión”.

15. ¿Mbaʼérepa iñimportantete ñañemboʼe japredikáta jave?

¹⁵ Ñañemboʼe Jehovápe ha jajerure chupe tañanepytyvõ. Japredikáta jave jajerurékena Jehovápe tañandegia. Ijespíritu sánto ipoderosoitéva nañanepytyvõiramo ñande ndaikatumoʼãi jajapo mbaʼeve (Sal. 127:1; Luc. 11:13). Ñañemboʼe jave, ñamombeʼu porãkena Jehovápe mbaʼéichapa jaipota haʼe ñanepytyvõ. Por ehémplo, jajerure chupe tañanepytyvõ jatopa hag̃ua umi hénte ipyʼaporãva ha ohenduséva pe mensáhe. Upéi jajapo ñande párte ha ñañehaʼã japredika entéro jatopávape.

16. ¿Mbaʼérepa ikatu jaʼe ñande estúdio personál ñanepytyvõha predikasiónpe?

¹⁶ Ñañemotiémpo jajapo hag̃ua ñande estúdio personál. Ñandejára Ñeʼẽ heʼi: “Peikuaa porã Ñandejára volunta iporãva, haʼe oguerohorýva ha ndorekóiva defékto” (Rom. 12:2). Jajapo jave ñande estúdio personál jaikuaa porãve jahávo Jehovápe. Ha upéi ñañeʼẽ jave ótrondi Ñandejárare, upe persóna ohechakuaáta ñande añetehápe jagueroviaha umi mbaʼe jaʼéva. Katarína, pe ermána ajeʼi ñañeʼẽ hague, heʼi: “Ojapo un tiémpo ahechakuaa hague tekotevẽha ajeroviave umi enseñánsa iñimportantevéva oĩvare la Bíbliape. Upévare añemoĩ astudia porã umi pruéva ohechaukáva oĩha peteĩ Kreadór, la Biblia añetehápe haʼeha Ñandejára Ñeʼẽ, ha Ñandejára orekoha peteĩ organisasión orrepresentáva chupe koʼág̃arupi”. Katarína omombeʼu ijestúdio personál omombarete hague ijerovia ha oipytyvõ hague chupe ovyʼave hag̃ua predikasiónpe.

17. ¿Mbaʼérepa Jesús siémpre ipositívo ha ikyreʼỹ vaʼekue predikasiónpe?

¹⁷ Jesús siémpre ipositívo vaʼekue ha osegi opredika oĩramo jepe umi hénte nohenduséiva pe mensáhe ogueraháva. ¿Mbaʼérepa? Pórke haʼe oikuaa umi hénte tekotevẽha oaprende la verda, ha haʼe omeʼẽse vaʼekue pe oportunida ikatúvape entéro oasepta hag̃ua pe mensáhe oñeʼẽva Ñandejára Rréinore. Haʼe oikuaa avei umi hénte ñepyrũrã nohenduséi vaʼekue ikatuha okambia, ha amo gotyove ohendu porã. Ñapensamíntena mbaʼépa oiko vaʼekue Jesús famíliape voi. Haʼe opredika aja umi 3 áño imédio, ni peteĩva umi iñermanokuéragui ndoikói idisípulo (Juan 7:5). Péro Jesúspe oñemoingove jey rire, oiko chuguikuéra kristiáno (Hech. 1:14).

18. ¿Mbaʼérepa ñande jasegi japredika?

¹⁸ Ñande ningo ndajaikuaái mávaguipa ikatu oiko Jehová siérvo amo gotyove. Oĩ umi imbeguevéva oasepta hag̃ua pe mensáhe. Ha umi  koʼág̃a nañanerenduséiva jepe ikatu ohecha umi mbaʼe porã jajapóva, mbaʼéichapa ñanekyreʼỹ ha ñandepositívo, ha amo gotyove haʼekuerahaitéma avei oñepyrũ ‘ombotuicha Ñandejárape’ (1 Ped. 2:12).

19. ¿Mbaʼépa ñanemboʼe 1 Corintios 3:6, 7 ñane predikasiónre?

¹⁹ Ñande ningo ñañotỹ ha jarrega pe semílla, péro ñarrekonose vaʼerã Jehová haʼeha “upe omongakuaáva” (elee 1 Corintios 3:6, 7). Peteĩ ermáno hérava Getahun, oservíva Etiopíape, heʼi: “Mas de 20 áñore che añoite vaʼekue la Testígo peteĩ território ndojepredikaguasúivape. Péro koʼág̃a roĩma 14 puvlikadór. Umívagui 13 ojevautisáma, ijapytepekuéra che rembireko ha umi mbohapy che família. Ha umi rreunionhápe roĩ jepi 32 persónarupi”. Getahun ovyʼaiterei osegi haguére opredika, ha ipasiénsia haguére ohaʼarõvo Jehová oipytyvõ umi hénte ipyʼaporãvape oadora hag̃ua chupe (Juan 6:44).

20. ¿Mbaʼérepa ikatu ñambojoja ñane predikasión pe traváho ojapóvare umi vombéro?

²⁰ Jehová ningo omombaʼeterei káda persónape. Haʼe omeʼẽ ñandéve pe priviléhio ñambaʼapóvo Itaʼýrandi ñambyaty hag̃ua umi hénte opa tetãyguápe oñehundi mboyve ko múndo (Ageo 2:7). Ñane predikasión ningo ojogua pe traváho ojapóvape umi ohóva opororreskata oiko jave peteĩ inséndio. Ikatu oime unos kuánto vombéronte la oikéva onohẽ umi héntepe upe lugárgui. Péro pe traváho ojapóva enterove vombéro iñimportanteterei hína. Ha ñande upéicha avei jajapo predikasiónpe. Ndajaikuaái ningo mboy héntepa ojesalváta Satanás múndogui, péro Jehová ikatu ojevale oimeraẽ isiervokuérare oipytyvõ hag̃ua chupekuéra. Peteĩ ermáno hérava Andrés, oikóva Bolíviape heʼi: “Peteĩ persóna oikuaa jave la verda ha ojevautisa, che aikuaa upéva ojehupyty hague oñembaʼapo rupi oñondivepa”. Ñañehaʼãkena ñande avei péicha ñandepositívo ha ñanekyreʼỹ predikasiónpe. Péicha jajapóramo Jehová ñanevendesíta ha javyʼaitereíta predikasiónpe.