1, 2. ¿Mbaʼéichapa umi konsého jatopáva la Bíbliape ikatu og̃uahẽve ñandéve okambia jave ñane situasión? Emyesakã.

 PETEĨ kasamientohápe ningo pe nóvio ha pe nóvia ojapysaka porã hína pe diskúrso ojejapóvare chupekuéra g̃uarã. Umi konsého haʼekuéra ohendúva hína pe diskúrsope ohendúmava voi, péro koʼág̃a og̃uahẽve chupekuéra. ¿Mbaʼérepa? Pórke koʼág̃a guive haʼekuéra haʼéma peteĩ matrimónio.

² Péicha oiko jepi avei umi matrimónio oguereko vove família. Oiméne avei heta vésema ohendu hikuái umi konsého heʼíva mbaʼéichapa oñemongakuaa vaʼerã umi mitãnguéra. Péro koʼág̃a og̃uahẽve avei chupekuéra oguerekómagui hikuái peteĩ mitã omongakuaa vaʼerã. ¡Péva ningo rreálmente haʼe peteĩ rresponsavilida tuicháva! Añetehápe ñande voi jahasárõ peteĩ situasiónre ñantende porãve jepi umi konsého oĩva la Bíbliape oñeʼẽva upe témare. Upévare voi entéro oservíva Jehovápe olee meme la Biblia, ha ojeʼe haguéicha umi rréi de Israélpe, ojepyʼamongeta vaʼerã hese oikove aja entéro (Deut. 17:19).

3. ¿Mbaʼépa jahecháta ko artíkulope?

³ Tuakuéra, peẽ ningo peguereko peteĩ priviléhio ndaijojaháiva: Pemboʼe pene famíliape Jehovágui. Péro ndahaʼéi upéva añónte pejaposéva, síno avei peipytyvõse pene famíliape ohayhu hag̃ua Jehovápe. ¿Mbaʼéichapa ikatu pejapo upéva? Ko artíkulope jahecháta 4 konsého jatopáva la Bíbliape ikatúva  penepytyvõ (2 Tim. 3:16). Avei jahecháta mbaʼéichapa umi konsého jatopáva la Bíbliape oipytyvõma heta tuakuérape.

4. ¿Mbaʼe konséhopa ikatu oipytyvõ umi tuakuérape ikatu hag̃uáicha ifamiliakuéra ohayhu Jehovápe? (Santiago 1:5).

⁴ Konsého 1: Eheka Jehová gía. Ejerure Jehovápe arandu reikotevẽva ikatu hag̃uáicha reipytyvõ ne famíliape ohayhu hag̃ua chupe (elee Santiago 1:5). Jehová ningo haʼe pe persóna ikatúva omeʼẽ ndéve umi konsého iporãvéva. ¿Mbaʼérepa ikatu jaʼe upéva? Primeroite voi pórke Jehová haʼe pe mehór Papa oexistíva (Sal. 36:9). Segundo katu, pórke umi konsého haʼe omeʼẽva ñandéve siémpre ideprovécho (Is. 48:17).

5. a) ¿Mbaʼépa ojapo Jehová organisasión ikatu hag̃uáicha oipytyvõ umi tuakuérape? b) Jahechaháicha pe vidéope, ¿mbaʼépa reaprende ermáno ha ermána Amorímgui omongakuaa lája ifamiliakuérape?

⁵ Jehová oipuru Iñeʼẽ la Biblia ha avei iñorganisasión ikatu hag̃uáicha penepytyvõ pemboʼe hag̃ua pene famíliape ohayhu hag̃ua chupe (Mat. 24:45). Por ehémplo, ikatu retopa umi konsého ideprovéchotava ndéve umi artíkulo osẽ vaʼekuépe ñande rrevísta ¡Pepaýke!-pe ideprovéchotava umi famíliape, koʼág̃a jatopáva avei ñande sítio de Internétpe. Ko sítiope avei ikatu retopa umi entrevísta ha avei hetave vidéo ikatúva oipytyvõ tuakuérape osegi hag̃ua umi konsého oúva Jehovágui ikatu hag̃uáicha oipytyvõ porã ifamíliape (Prov. 2:4-6). *

6. ¿Mbaʼéichapa oñeñandu peteĩ matrimónio pe ajúda Jehová omeʼẽvare chupekuéra iñorganisasión rupive?

⁶ Heta tuakuéra oagradeseterei umi mbaʼe Jehová omeʼẽva chupekuéra iñorganisasión rupive. Peteĩ túa hérava Joe heʼi: “Ñamongakuaa mbohapy mitãme ndahaʼéi hína la ifasilpáva. Che rembireko ha che siémpre roñemboʼe Jehovápe orepytyvõmi hag̃ua. Pyʼỹinte rohecha avei peteĩ artíkulo térã peteĩ vidéo osẽ vaʼekue hústo pe roikotevẽve jave. Roheka rupi Jehová gía tuichaiterei orepytyvõ romongakuaa porã hag̃ua ore familiakuérape”. Joe ha hembireko ohechakuaa umi ajúda omeʼẽva Jehová organisasión  oipytyvõitereiha ifamiliakuérape oñemoag̃ui hag̃ua Jehováre.

7. ¿Mbaʼérepa iñimportánte tuakuéra omoĩ ehémplo porã ifamíliape? (Romanos 2:21).

⁷ Konsého 2: Emboʼe chupekuéra ne ehémplo rupive. Ñane familiakuéra ningo ohechapaite umi mbaʼe ñande jajapóva, ha heta vése okopia voi umíva. Añetehápe ningo ndaipóri peteĩ túa perfékto (Rom. 3:23). Upéicharõ jepe, umi tuakuéra oñehaʼãmbaite omoĩ ehémplo porã ifamiliakuérape (elee Romanos 2:21). Peteĩ túa heʼi voi: “Umi mitã ningo ohechávante ojapo, okopiaite voi la ohecháva”. Upéi heʼive: “Haʼekuéra heʼíta voi ñandéve oiméramo ñane ehémplore ndojekuaái umi mbaʼe ñamboʼéva jepi chupekuéra”. Upéicharõ, ñande jaipotáramo ñane familiakuéra ohayhu Jehovápe, ñande raẽ voi jahechauka vaʼerã chupekuéra upéva.

8, 9. ¿Mbaʼépa reaprende umi mbaʼe heʼi vaʼekuégui Andrew ha Emma?

⁸ Oĩ heta mbaʼe tuakuéra ikatúva ojapo omboʼe hag̃ua ifamíliape ohayhu hag̃ua Jehovápe. Epensamína la heʼívare peteĩ ermáno oguerekóva 17 áño hérava Andrew: “Che tuakuéra siémpre chemboʼéva iñimportanteha añemboʼe. Che túa oñemboʼémi chendive káda pyhare, jepe che ajapopáma voi kuri la che orasión. Haʼe siémpre heʼi chéve: ‘Nde ikatu reñemboʼe Jehovápe oimeha óra’. Péicha chemboʼe rupi che tuakuéra, koʼág̃a ikatu añemboʼe che pyʼaite guive Jehovápe ha ahecha voi chupe peteĩ Túa imbaʼeporãvaicha”. Tuakuéra, penemanduʼákena peẽ voi pehayhúramo Jehovápe, tuicha ikatuha peipytyvõ pene famíliape.

⁹ Jahechamína Emma ehémplo. Chupekuéra ningo itúa oheja rei vaʼekue, ha oheja isýpe hetaiterei kuénta reheve. Emma heʼi voi: “Heta vése che sýpe ijetuʼueterei vaʼekue oremantene hag̃ua oreko rupi hetaiterei kuénta, péro haʼe siémpre heʼímiva oréve Jehová ojepyʼapyha isiervokuérare ha omeʼẽtaha oréve la roikotevẽmíva. Che sy ombohovái lája ko situasión, che ahecha porãiterei mbaʼeichaitépa haʼe ojerovia avei umi mbaʼe oremboʼévare”. ¿Mbaʼépa ikatu ñaaprende? Umi tuakuéra ikatuha omboʼe iñehémplo rupive ohasáramo jepe umi situasión ijetuʼúva (Gál. 6:9).

10. ¿Mbaʼe oportunidápa oguereko vaʼekue umi túa israelita oñemongeta hag̃ua ifamíliandi? (Deuteronomio 6:6, 7).

¹⁰ Konsého 3: Peñemongeta meme pene famíliandi. Jehová heʼi voi vaʼekue umi israelítape omboʼe meme vaʼerãha ifamiliakuérape oikuaa hag̃ua chupe (elee Deuteronomio 6:6, 7). Koʼã tuakuéra ningo oguereko vaʼekue heta oportunida ikatu hag̃uáicha oñemongeta ifamiliakuérandi, ha péicha omboʼe chupekuéra ohayhu hag̃ua Jehovápe. Por ehémplo, peteĩ mitãʼi israelita ikatu vaʼekue ohasa heta óra itúandi ombaʼapo aja kokuépe. Ha iñermaníta ikatu ohasa heta tiémpo isýndi ojapóvo umi tembiapo ogapypegua. Péicha umi tuakuéra ha umi mitãnguéra ombaʼapo rupi oñondive heta tiémpo, ikatu oñemongeta hikuái heta mbaʼe iñimportántevare. Por ehémplo, ikatu oñemongeta hikuái mbaʼeichaitépa Jehová imbaʼeporã ha okuida porã hesekuéra.

11. ¿Mbaʼe oportunidápa oguereko umi tuakuéra oñemongeta hag̃ua ifamiliakuérandi?

¹¹ Koʼág̃a ningo idiferenteve yma guarégui. Heta paíspe por ehémplo umi tuakuéra ndaikatúi ohasa heta tiémpo ifamíliandi, haʼekuéra oĩ rupi itravahohápe ha umi mitãnguéra katu oĩ eskuélape. Upévare tuakuéra tekotevẽ oheka peteĩ oportunida oñemongeta hag̃ua ifamíliandi (Efes. 5:15, 16; Filip. 1:10).  Pe adorasión en família haʼe peteĩ oportunida porã peñemongeta hag̃ua. Peteĩ ermáno imitãva hérava Alexander heʼi voi: “Che túa siémpre ojapo pe arréglo roguereko hag̃ua ore adorasión en família, ha ndohejái voi mbaʼeve orejoko rojapo hag̃ua upéva. Opa rire la ore estúdio, siémpre ropyta roñemongeta”.

12. ¿Mbaʼépa ogueraha vaʼerã enkuénta umi tuakuéra ojapóta jave pe adorasión en família?

¹² Nde oiméramo haʼe peteĩ túa, ¿mbaʼépa ikatu rejapo pene adorasión en família igustove hag̃ua? Mbaʼére ndapeprovái pestudia pe ñane puvlikasión pyahu ¡Jaikóta vyʼápe para siémpre! Péva haʼéta peteĩ oportunida peñemongeta porã hag̃ua pene famíliandi. Nde ningo oiméne reipota ne familiakuéra omombeʼu ndéve umi mbaʼe oñandúva ha opreokupáva chupekuéra. Upévare ani reipuru pe tiémpo peguerekóva pejapo hag̃ua pene adorasión en família reñemoñeʼẽ puku térã rejaʼo hag̃ua chupekuéra pe estúdio aja. Upéva rangue eñehaʼã entende chupekuéra, jepénte heta vése ikatu heʼi peẽme álgo noĩporãmbáiva. Péicha rejapóramo, ne familiakuéra ikatúta lívremente omombeʼu ndéve umi mbaʼe oñandúva, ha péicha nde ikatúta reipytyvõ porãve chupekuéra.

13. ¿Mbaʼéicha javépa avei tuakuéra ikatu oipytyvõ ifamíliape oñemoag̃ui hag̃ua Jehováre?

¹³ Tuakuéra pehekákena oportunida peipytyvõ hag̃ua pene famíliape oñemoag̃ui hag̃ua Jehováre. Ndahaʼéi pe estúdio ajánte ikatúva pejapo upéva. Jahechamína la heʼíva peteĩ sy hérava Lisa: “Ore roñehaʼã roipytyvõ ore famíliape ohecha hag̃ua mbaʼépa pe kreasión omboʼe chupekuéra Jehovágui. Por ehémplo, ore jaguaʼi ombopuka jave ore famíliape roipuru upéva romboʼe hag̃ua chupekuéra ñande Kreadór haʼeha peteĩ Dios ovyʼáva avei ñandéicha”.

14. ¿Mbaʼérepa iñimportánte tuakuéra oipytyvõ ifamíliape olehikuaa hag̃ua iñamigorã? (Proverbios 13:20).

¹⁴ Konsého 4: Eipytyvõ ne famíliape olehikuaa hag̃ua iñamigorã. La Biblia heʼi porã voi ñandéve ñane amigokuéra ikatuha ojapoka ñandéve iporãva térã ivaíva (elee Proverbios 13:20). Tuakuéra, ¿peikuaápa mávapa hína pene família amígo? ¿Peikuaa porãpa chupekuéra? ¿Pehasámavapa hendivekuéra tiémpo?  ¿Mbaʼépa pejapo peipytyvõ hag̃ua pene famíliape ikatu hag̃uáicha oguereko amígo ohayhúva Jehovápe? (1 Cor. 15:33). Ikatu pejapo upéva peinvitávo umi ermáno ijerovia mbaretévape ohasa hag̃ua tiémpo penendive (Sal. 119:63).

15. ¿Mbaʼépa ikatu ojapo umi tuakuéra oipytyvõ hag̃ua ifamíliape oelehikuaa hag̃ua iñamigorã?

¹⁵ Jahechamína koʼág̃a peteĩ túa hérava Tony experiénsia. Haʼe omombeʼu mbaʼépa ojapo hembirekóndi oipytyvõ hag̃ua ifamiliakuérape oguereko hag̃ua iñamigorã ohayhúva Jehovápe. Haʼe heʼi voi: “Che rembireko ha che heta tiémporema roinvita umi ermáno ha ermána de diferénte eda ha paisguápe okaru hag̃ua orendive térã oĩ hag̃ua orendive pe adorasión en famíliape. Péva haʼe peteĩ oportunida iporãitereíva ikatu hag̃uáicha roikuaa umi ermáno ohayhúva Jehovápe ha oservíva chupe vyʼápe. Roguerekóma voi la vendisión opytávo ógape umi superintendénte de sirkuíto, misionéro ha ótro ermáno. Koʼã ermáno ningo oreko heta experiénsia ohechaukáva mbaʼeichaitépa haʼekuéra ohayhu Jehovápe ha oñemeʼẽmbaite iservísiope. Upéva tuichaiterei oipytyvõ che familiakuérape ikatu hag̃uáicha haʼekuéra avei ohayhu Jehovápe”. Peẽ tuakuéra, peipytyvõkena pene famíliape olehikuaa hag̃ua iñamigorã.

16. ¿Mbaʼépa oikóta peteĩ ne família heʼíramo ndoserviseveimaha Jehovápe?

¹⁶ Ha oiméramo eñehaʼãmbaite hína ne familiakuéra oservi hag̃ua Jehovápe péro upéicharamo jepe peteĩva ijapyteguikuéra ndoservisevéi chupe, aníkena repensa rejapo vai hague nde traváho. Jehová ningo omeʼẽ enterovépe pe liverta jadesidi hag̃ua jaservítapa chupe térã nahániri. Oiméramo ne família odesidi ndoservimoʼãveimaha Jehovápe ani reperde la esperánsa, haʼe ikatu hína algún día oservi jey Jehovápe. Upéicha jave nemanduʼa vaʼerã pe ehémplo Jesús oipuru vaʼekue oñeʼẽrõ guare pe taʼýra ofalla vaʼekuére (Luc. 15:11-19, 22-24). Pe ehémplope upe mitãrusu osẽ kuri pe tape porãgui, péro upéi ou jey. Algúno ikatu heʼi: “Péva ningo peteĩ ehémplonte, ¿péro ikatu piko upéva oiko la vída rreálpe?”.  ¡Si ikatu! Elie experiénsia ohechauka porã upéva.

17. ¿Mbaʼéichapa nemokyreʼỹ Elie experiénsia?

¹⁷ Imanduʼávo ituakuérare, Elie heʼi: “Che tuakuéra ningo oñehaʼãmbaite vaʼekue ikatu hag̃uáicha che ahayhu Jehovápe ha Iñeʼẽ la Biblia. Upéicharamo jepe chemitãrusúpe aju cherrevélde”. Elie oñepyrũ ojapo heta mbaʼe ñemihápe, ha ituakuéra oñehaʼãramo jepe oipytyvõ chupe, haʼe nohendúi chupekuéra. Oho rire hógagui haʼe ojapo heta mbaʼe noĩporãiva. Upéicharõ jepe, upe tiémpope haʼe oñeʼẽ mimi jepi la Bíbliare iñamigokuérape. Elie omombeʼu voi: “Amáske añeʼẽ chupekuéra Jehovágui che avei apensave Jehováre. Ahechakuaa mbeguekatúpe pe semílla de la verda che tuakuéra oñotỹ vaʼekue che korasõme oñepyrũ jeyha okakuaa. Tiémpo rire Elie oservi jey Jehovápe. * ¡Eñeimahinamína mbaʼeichaitépa oiméne ovyʼa ituakuéra ohechávo Elie oservi jeyha Jehovápe, haʼekuéra oñehaʼãmbaite rupi omboʼe chupe imitãʼiete guive ohayhu hag̃ua Jehovápe! (2 Tim. 3:14, 15).

18. ¿Mbaʼéichapa nde reñeñandu rehechávo umi tuakuéra oñehaʼãmbaiteha ikatu hag̃uáicha ifamiliakuéra ohayhu Jehovápe?

¹⁸ Tuakuéra, peẽme ningo oñemeʼẽ peteĩ priviléhio iporãitereíva: Peipytyvõ pene famíliape oservi hag̃ua Jehovápe (Sal. 78:4-6). Upéva ningo ndahaʼéi hína la ifasilpáva, koʼýte koʼã tiémpope. ¡Upévare poguerohoryeterei peñehaʼãmbaite haguére peipytyvõ hag̃ua pene famíliape ohayhu hag̃ua Jehovápe! Peẽ peñehaʼãramo pejapo opa ikatúva peipytyvõ hag̃ua chupekuéra ohayhu hag̃ua Jehovápe, pemongakuaa, pekorrehi ha peñemoñeʼẽ chupekuéra, ikatu peime segúro ñande Túa Jehová ovyʼaitereiha pendereheve (Efes. 6:4).