1. ¿Mbaʼérepa enterovetéva ñaikotevẽ arandu oúva Jehovágui? (Proverbios 4:7).

 ¿NDÉPA redesidíma raʼe peteĩ mbaʼe iñimportantetereíva? Oiméramo upéicha katuete ejeruréne raʼe Jehovápe tanemoarandu edesidi porã hag̃ua (Sant. 1:5). Ha upéva iporãiterei, pórke Salomón heʼi vaʼekue voi: “Pe arandu ningo pe iñimportantevéva hína” (elee Proverbios 4:7). Jaikuaa ningo Salomón noñeʼẽi hague pe arandu kaʼatýre, síno oñeʼẽ vaʼekue pe arandu Jehová voi omeʼẽvare ñandéve (Prov. 2:6). ¿Péro ikatu piko upéva ñanepytyvõ koʼág̃arupi jadesidi porã hag̃ua heta mbaʼe? Si ikatu, ha hústamente upéva la ñaanalisátava ko artíkulope.

2. ¿Mbaʼépa ñanepytyvõta ñanearandu hag̃ua?

² ¿Mbaʼépa ikatu jajapo ñanearandu hag̃ua? Upearã por ehémplo ikatu ñaanalisa umi konsého omeʼẽ vaʼekue mokõi kuimbaʼe iñaranduetereíva. Peteĩva hína Salomón. La Biblia ningo heʼi hese Ñandejára omeʼẽ hague chupe “arandu ijojahaʼỹva” (1 Rey. 4:29). Ha segundo, jahecháta Jesús ehémplo, pórke ndaipóri vaʼekue voi ótro haʼéicha iñarandúva (Mat. 12:42). La Biblia heʼi voi Jehová espíritu oĩ hague hendive ha upévare ‘haʼe iñarandu ha iñentendído’ (Is. 11:2).

3. ¿Mbaʼépa jahecháta ko artíkulope?

³ Jehová omoarandu rupi Jesús ha Salomónpe, haʼekuéra ikatu vaʼekue omeʼẽ hetaiterei konsého ideprovechoitereítava ñandéve. Upévare ko artíkulope ñaanalisáta mbaʼéichapa umíva ikatúta ñanepytyvõ jahecha hag̃ua hendápe porã pe pláta, avei ñande traváho ha ñandejupe voi.

4. ¿Mbaʼépepa idiferénte vaʼekue Salomón ha Jesús?

⁴ Salomón ningo irrikoiterei vaʼekue. Haʼe oiko vaʼekue voi  lúho apytépe (1 Rey. 10:7, 14, 15). Péro Jesús katu imboriahu vaʼekue. Haʼe ndorekoguasúi vaʼekue heta mbaʼe ha ni ndahógai vaʼekue (Mat. 8:20). Péro la isituasionkuéra idiferénteramo jepe, haʼekuéra lomímonte nopensái vaʼekue pe pláta iñimportantetereiha, pórke Jehová voi la omoarandúva chupekuéra.

5. ¿Mbaʼépa opensa vaʼekue Salomón pe plátare?

⁵ Salomón ningo orrekonose vaʼekue pe pláta ñandeproteheha (Ecl. 7:12). Ha upéva siertoite, pórke pe pláta ñanepytyvõ jajogua hag̃ua umi kósa ñaikotevẽva ha sapyʼánte ikatu voi jajogua umi kósa ñandegustáva. Péro Salomón ohechakuaa vaʼekue avei oĩha heta mbaʼe iñimportantevéva pe plátagui. Por ehémplo, haʼe heʼi vaʼekue: “Ikuentave umi hénte imanduʼa porã nderehe, ndepláta heta rangue” (Prov. 22:1). Haʼe opilla vaʼekue avei umi hénte ipláta hetáva pyʼỹinte ndovyʼaiha (Ecl. 5:10, 12). Ha heʼi vaʼekue avei ani hag̃ua jajeroviaiterei pe plátare, pórke upéva ikatu peteĩ tesapirĩme opa ñandehegui (Prov. 23:4, 5).

6. ¿Mbaʼépa Jesús opensa vaʼekue pe plátare? (Mateo 6:31-33).

⁶ Jesús ohechakuaa vaʼekue avei pe pláta iñimportanteha, ha ndahaʼéi vaʼekue ku oiko asýva tódo el tiémpo (Luc. 19:2, 6, 7). Por ehémplo pe primer milágro haʼe ojapo vaʼekuépe okonverti vaʼekue y peteĩ víno iporãitereívape (Juan 2:10, 11). Ha avei haʼe omano mboyvemi oipuru vaʼekue peteĩ ao hepyetereíva (Juan 19:23, 24). Péro upéicharõ jepe, Jesúspe g̃uarã pe pláta ndahaʼéi vaʼekue pe iñimportantevéva. Haʼe heʼi vaʼekue voi idisipulokuérape: ‘Avave ndaikatúi oservi esklávoramo mokõi patrónpe. Ndaikatúi peservi Ñandejárape ha avei peiko pláta rapykuéri’ (Mat. 6:24). Jesús heʼi vaʼekue ñande ñamotenondéramo Ñandejára Rréino, Jehová katuete omeʼẽtaha ñandéve umi mbaʼe ñaikotevẽva (elee Mateo 6:31-33).

7. ¿Mbaʼépa opensa pe plátare peteĩ ermáno, ha mbaʼéichapa upéva oipytyvõ chupe?

⁷ La Bíbliape ningo jatopa heta konsého porã oñeʼẽva pe plátare, ha heta ermáno ha ermána oñevenefisiáma koʼã konséhogui. Por  ehémplo, jahechamína mbaʼépa omombeʼu ñandéve peteĩ ermáno hérava Daniel. Haʼe heʼi: “Chemitãme che adesidi vaʼekue amotenondetaha Jehová servísio”. Daniel oiko rupi sensillomínte orekóma la priviléhio opartisipávo hetaiterei projékto ojapóvape Jehová organisasión”. Haʼe heʼi: “Sinséramente núnka nambyasymoʼãi la adesidi vaʼekue. La adesidírire aikotaha pláta rapykuéri, ikatúta kuri añete agana heta la pláta. Péro upéva ndaikatumoʼãi kuri omeʼẽ chéve umi amígo koʼág̃a arekóva ha ni núnka nachembovyʼamoʼãi kuri avyʼaháicha koʼág̃a Jehová servísiope. Ndaipóri pláta ikatu vaʼerã omeʼẽ chéve umi mbaʼe porãita ahupytýva aservi rupi Jehovápe”. Ohechaukaháicha ko ermáno ehémplo, pe pláta núnka nañanembovyʼamoʼãi javyʼaháicha Jehová servísiope.

8. ¿Mbaʼépa opensa vaʼekue Salomón pe traváhore? (Eclesiastés 5:18, 19).

⁸ Ñambaʼapo pohýi jave ningo javyʼaiterei. Salomón heʼi vaʼekue péva haʼeha peteĩ rregálo Ñandejára omeʼẽva ñandéve (elee Eclesiastés 5:18, 19). Haʼe heʼi vaʼekue avei: “Pe persóna ombaʼapo jejopýva ohupytýta heta mbaʼe porã” (Prov. 14:23). Ha Salomón heʼi vaʼekue upéva por experiénsia, pórke haʼe itravahadór ha iguapoiterei vaʼekue. Por ehémplo, haʼe omopuʼã vaʼekue heta óga, oreko heta parralty, umi hardín neporãva, heta póso, ha omopuʼã vaʼekue avei heta siuda (1 Rey. 9:19; Ecl. 2:4-6). Salomón ojapo hag̃ua koʼã mbaʼe heta ombaʼapo vaʼerã kuri, ha upéva katuete ombovyʼáne raʼe chupe. Péro haʼe orrekonose oĩ hague ótra kósa ikatúva ombovyʼave chupe, upévare haʼe ombaʼapo vaʼekue Jehovápe g̃uarã. Por ehémplo, haʼe oñenkarga vaʼekue oñemopuʼã hag̃ua Jehová témplo, peteĩ projékto ipukúva 7 áño (1 Rey. 6:38; 9:1). Jahechaháicha, Salomón ningo ojapo vaʼekue opaichagua traváho, péro upéi haʼe orrekonose vaʼekue ñambaʼapóramo añoite Jehová servísiope javyʼataha. Upévare haʼe heʼi vaʼekue: “Jahecha rire entéro koʼã mbaʼe, peteĩ mbaʼénte la iñimportánteva: rerrespeta vaʼerã Ñandejárape ha ejapo imandamiénto heʼíva” (Ecl. 12:13).

9. ¿Mbaʼéichapa Jesús ojasegura vaʼekue ani hag̃ua pe itraváho hoʼupa chugui itiémpo?

⁹ Jesús itravahadór vaʼekue avei, haʼe imitãme ombaʼapo vaʼekue de karpintéro (Mar. 6:3). Ha katuete haʼe perfékto rupi itraváho porã vaʼekue, ha umi hénte oipota la itravahokue. Upévare tuichaiterei oiméne oipytyvõ raʼe ifamíliape oñemantene hag̃ua hikuái. Péro haʼe ombaʼapóramo jepe de karpintéro siémpre oaparta vaʼekue tiémpo Jehovápe g̃uarã (Juan 7:15). Ha tiémpo rire haʼe oñepyrũma voi opredika de tiémpo kompléto, ha upévare ikatu vaʼekue omeʼẽ ko konsého: “Ani pembaʼapo pe tembiʼu ikatúvare oñehundi, síno pembaʼapo vaʼerã pe tembiʼu núnka noñehundimoʼãivare, omeʼẽva jeikove opaveʼỹva” (Juan 6:27). Ha pe Sermón del Móntepe Jesús heʼi vaʼekue avei: “Pembyaty tesóro yvágape” (Mat. 6:20).

10. ¿Mbaʼépa ñañatende vaʼerã ani hag̃ua oiko ñanderehe ñande traváho káusare?

¹⁰ Umi konsého Jehová omeʼẽva ñandéve ningo ñanemoarandu ha ñanepytyvõ jahecha hag̃ua hendápe porã la ñande traváho. Por ehémplo, la Biblia heʼi ñandéve ‘ñambaʼapo pohýi vaʼerãha’ ha jajapo porã vaʼerãha la ñande traváho (Efes. 4:28). Upévare ñande héfe ikatu ohechakuaa hína ñaneonrradoha ha ñandeguapoitereiha, ha ikatu voi heʼi ñandéve omombaʼetereiha la ñande traváho. Péro ñañatende vaʼerã avei, pórke upéicha rupi ikatu hína ñañepyrũ jajapo óra éxtra jaipotágui la ñande héfe opensa porã Testigokuérare. Péro  jajapóramo upéva, ikatu hína upéi nañanetiempovéima jajapo hag̃ua ñande estúdio de família, jaha hag̃ua rreunionhápe térã predikasiónpe. Ha oiméramo upéva oiko hína ñanderehe, ñakambia vaʼerã ha ñañepyrũ ñamotenonde umi mbaʼe iñimportantevéva.

11. ¿Mbaʼépa oaprende vaʼekue peteĩ ermáno ohechávo peteĩ ansiáno ehémplo?

¹¹ Peteĩ ermáno imitãva hérava William oaprende vaʼekue ohecha hag̃ua hendápe porã pe traváho. Haʼe ningo la ipatrón haʼe vaʼekue peteĩ ansiáno de kongregasión ha oaprende vaʼekue heta mbaʼe iñehémplogui. William omombeʼu: “Ko ermáno ningo ehémplo porãiterei vaʼekue, pórke haʼe iguápo ha ombaʼapo porã. Ha umi klientekuérape siémpre ogusta la itravahokue, péro una ves ke opa la traváho haʼe omboykéma upéva ha odedikáma tiémpo ifamíliape ha oadora hag̃ua Jehovápe. Ha ikatu voi haʼe ndaiporiha ótra persóna ovyʼáva haʼéicha”. *

12. ¿Mbaʼérepa ikatu jaʼe Salomón iñepyrũrã iñumílde hague, ha mbaʼéicha rupípa ou vaʼekue operde upéva?

¹² Salomón oadorárõ guare Jehovápe haʼe iñumílde vaʼekue. Por ehémplo, imitãme haʼe orrekonose vaʼekue Jehová añoite ikatutaha ogia porã chupe (1 Rey. 3:7-9). Ha oñepyrũ ramóme ogoverna, Salomón orrekonose vaʼekue ipeligrosoitereiha ñandeorgullóso. Upévare oskrivi vaʼekue: “Pe oñemombaʼeguasúva, upe rire tuicha oñemotĩta, pe ijorgullósova katuete hoʼáta” (Prov. 16:18). Péro tiémpo rire, ni Salomón ndosegivéi ko konsého haʼe voi omeʼẽ vaʼekue. Upévare haʼe ou vaʼekue ijorgullóso ha ndosegivéi umi léi porãite Jehová oheja vaʼekue. Por ehémplo peteĩva umi léi heʼi vaʼekue: “Pe rréi nomendái vaʼerã heta kuñáre ani hag̃ua ikorasõ oñemomombyry Ñandejáragui” (Deut. 17:17). Péro Salomón nopenái vaʼekue ko léire, pórke haʼe oreko jepe vaʼekue 700 tembireko ha 300 konkuvína, ha la majoría  koʼãva ndoadorái vaʼekue Jehovápe (1 Rey. 11:1-3). Salomón oiméne opensa raʼe upéva ndoperhudikamoʼãiha chupe. Péro upéi ohechakuaa odesidi vaieterei hague, pórke oñemomombyry Jehovágui ha oike heta akãrasýpe (1 Rey. 11:9-13).

13. ¿Mbaʼépa ñanemboʼe Jesús ehémplo?

¹³ Jesús ningo siémpre iñumílde vaʼekue. Por ehémplo haʼe ou mboyve ko yvy ape ári ojapo vaʼekue hetaiterei mbaʼe Jehovápe g̃uarã ha rreálmente impresionánte entéro mbaʼe haʼe ojapo vaʼekue. La Biblia heʼi voi: “Ñandejára ojevale hese ojapo hag̃ua entéro mbaʼe oĩva yvágape ha yvy ape ári” (Col. 1:16). Ha Jesús ojevautisárõ guare, oiméne imanduʼáne raʼe entéro koʼã mbaʼe haʼe ojapo vaʼekuére (Mat. 3:16; Juan 17:5). Péro upe haguére haʼe ndahaʼéi oúva ojekree ni ijejapo, síno ke haʼe siémpre iñumílde vaʼekue. Upévare haʼe heʼi vaʼekue voi: “Che ndajúi ótro cheservi hag̃ua, síno aservi hag̃ua ótrope. Aju ameʼẽ hag̃ua che rekove, ha péicha apaga pe rreskáte aguenohẽ hag̃ua heta héntepe pekádo poguýgui” (Mat. 20:28). Haʼe orrekonose vaʼekue avei ndaikatuiha ojapo mbaʼevete asy ijehegui reínte (Juan 5:19). ¡Ajépa iñumildete vaʼekue Jesús! Ha upéicha rupi oheja ñandéve peteĩ ehémplo iporãitereíva.

14. ¿Mbaʼéichapa Jesús ñanepytyvõ vaʼekue jahechakuaa hag̃ua ñande ñandevaliosoitereiha Jehovápe g̃uarã?

¹⁴ Jesús oipytyvõ vaʼekue ijapostolkuérape ani hag̃ua ijorgullóso, péro oipytyvõ vaʼekue avei chupekuéra ohechakuaa hag̃ua haʼekuéra ivaliosoitereiha Jehovápe g̃uarã. Upévare peteĩ vuéltape heʼi vaʼekue chupekuéra: “Umi pene akãrangue jepe haʼe okontapa” (Mat. 10:30). Katuete ningo ko mbaʼe Jesús heʼi vaʼekue ñanekonsolaitereíta, oiméramo ijetuʼu jepi ñandéve jahechakuaa hag̃ua ñande ñandevaliosoha Jehovápe ha upévare ñapensa ndajavaleiha mbaʼeverã. Ñanemanduʼa vaʼerã ñande haʼeha Jehová resaʼỹi, haʼe ningo hakateʼỹ formál ñanderehe. Upévare ñande núnka nañapensaséi ñande nañamereseiha haʼe ñanderayhu ni nañamereseiha ñaime pe múndo pyahúpe.

15. a) ¿Mbaʼe konséhopa omeʼẽ vaʼekue ñandéve peteĩ rrevísta Ñemañaha? b) Ohechaukaháicha pe fóto oĩva páhina 24-pe, ¿mbaʼe vendisiónpa ikatu hína jajavy oimérõ ñandekreidoiterei?

 ¹⁵ Ojapo 15 áño peteĩ rrevísta Ñemañaha omeʼẽ hague ñandéve ko konsého: “Ñañatende vaʼerã ani hag̃ua jajekreeterei ni ñapensa ñaneimportantetereiha. Péro upéicha avei ñañatende vaʼerã ani hag̃ua ñapensa ñaneinutilha ha ndajavaleiha mbaʼeverã. Upéva rangue iporãvéta ñapensa porãnte ñandejehe. Jaikuaa ningo oĩha heta mbaʼe ndaikatúiva jajapo, péro si ñandevale avei heta mbaʼépe. Upévare ñañehaʼã vaʼerã ñandeekilivrádo. Peteĩ ermána heʼi vaʼekue: ‘Che ningo ndahaʼéi perfékta, péro ndahaʼéi avei la chedesastretereíva. Areko añete heta kualida porã, péro areko avei la che defékto orekoháicha entéro persóna’”. * Jahechakuaa upéicharõ iñimportantetereiha ñandeekilivrádo porã, ndovaléi jajekreeterei péro ndovaléi avei ñapensa ndajavaleiha mbaʼeverã.

16. ¿Mbaʼérepa Jehová oheja vaʼekue ñandéve heta konsého porã la Bíbliape?

¹⁶ La Bíbliape ningo Jehová oheja vaʼekue ñandéve heta konsého iporãitereíva. Ha ojapo vaʼekue upéva pórke ñanderayhu ha oipota javyʼa (Is. 48:17, 18). Upévare ñande jaipotárõ entéro mbaʼe osẽ porã ñandéve, siémpre ñaneñeʼẽrendu vaʼerã chupe ha ñamotenonde vaʼerã iservísio. Jajapóramo upéva jajehekýita heta akãrasýgui ha katuete ñasẽ porãta. Koʼág̃arupi ningo la hénte ndovyʼái ha oiko pláta rapykuéri ha ojeity traváhope, oĩ avei umi ijejapoitereíva, ha ótro katu opensa ndovaleiha mbaʼeverã, péro amo ipahápe haʼekuéra ndovyʼáinte avei. Péro ñande katuete jajehekýita koʼã mbaʼégui jasegíramo umi konsého Jehová omeʼẽ vaʼekue ñandéve. Upévare ñande ñaĩma desidído ñaneñeʼẽrendutaha Jehovápe ha ñambovyʼataha chupe (Prov. 23:15).