1. ¿Mbaʼépa heʼi la Biblia pe mborayhúre?

 LA BIBLIA heʼi: “Pe mborayhu haʼete voi peteĩ tata núnka ndoguéiva, pe tata oúva Jehovágui. Umi oláda tuichavéva ndaikatumoʼãi ombogue pe mborayhu, ni umi rrío osyry hatãvéva ndaikatumoʼãi ipuʼaka hese” (Cant. de Cant. 8:6, 7). b ¡Iporãitépa ko téxto! Koʼápe ohechauka pe mborayhu oñandúva ojuehe umi omendáva ikatuha odura tóda la vída ha ogueropuʼaka entéro mbaʼe.

2. ¿Mbaʼépa ojapo vaʼerã umi omendáva osegi hag̃ua ojoayhu?

² Pe ména ha tembireko oñehaʼãmante vaʼerã osegi hag̃ua ojoayhu tóda la vída. Ñapensamíntena: Pe tata siémpre ikatu hendy péro upearã oĩmante vaʼerã ojatapýva ha omoĩvéva jepeʼa, osino pe tata oguéta. Péicha avei pe ména ha tembireko osegi hag̃ua ojoayhu ipyʼaite guive, ojapo vaʼerã káda uno ipárte. Péro sapyʼánte umi omendáva ou oreko provléma ekonómiko, hasykatu térã ijetuʼu chupekuéra omongakuaa umi mitãme. Upéicha rupi, kon el tiémpo ou oñandu hikuái ndojoayhuveimaha yma guaréicha. Oiméramo nde remendáva, ¿mbaʼépa ikatu rejapo ne matrimóniope ani hag̃ua ogue pe mborayhu oúva Jehovágui? Ko artíkulope jahecháta mbohapy mbaʼe penepytyvõtava pesegi hag̃ua pejoayhu ha pevyʼa pene matrimóniope. c

3. ¿Mbaʼérepa tekotevẽ pe ména ha tembireko oreko peteĩ amista imbaretéva Jehovándi? (Eclesiastés 4:12). (Ehecha pe taʼanga).

³ Ani hag̃ua opa pe mborayhu oúva Jehovágui, pe ména ha tembireko oñehaʼã vaʼerã oreko peteĩ amista imbaretéva Jehovándi. ¿Mbaʼérepa upéva iñimportánte? Pórke mokõivéva omombaʼéramo iñamista Jehovándi oñehaʼãta kyreʼỹme osegi ikonsého. Upéva oipytyvõta chupekuéra ani hag̃ua iprovléma ha oñepresentárõ katu osolusionakuaa hag̃ua hikuái (elee Eclesiastés 4:12). Avei umi Jehová amígo oñehaʼã ojogua chupe, por ehémplo iñamávle, ipasiénsia ha oporoperdonakuaa (Efes. 4:32–5:1). Peteĩ matrimónio oñehaʼãramo ohechauka koʼã kualida porã, ifasilvéta amás día ojoayhuve hag̃ua hikuái. Peteĩ ermána hérava Lena ojapóma mas de 25 áño omenda hague, ha haʼe heʼi voi: “Ifásil jahayhu ha jarrespeta peteĩ persóna ohayhúvape Jehovápe”.

4. ¿Mbaʼérepa Jehová oiporavo vaʼekue José ha Maríape omongakuaa hag̃ua pe Mesíaspe?

⁴ Jahechamína peteĩ ehémplo oĩva la Bíbliape. Entéro umi David familiare apytégui, Jehová oelehi vaʼekue José ha Maríape omongakuaa hag̃ua pe Mesíaspe. ¿Mbaʼérepa oelehi chupekuéra? Pórke mokõivéva Jehová amigoite vaʼekue, ha Jehová oikuaa porã haʼekuéra siémpre omotenondetaha chupe imatrimóniope. ¿Mbaʼépa ikatu oaprende José ha María ehémplogui umi omendáva?

5. ¿Mbaʼéichapa menakuéra ikatu osegi José ehémplo?

⁵ José ningo kyreʼỹme osegi vaʼekue Jehová gía, upéicha rupi omoakã porã vaʼekue hogapy. La Biblia omombeʼu 3 kásope Ñandejára heʼi hague Josépe la ojapo vaʼerã ifamília rehehápe. Ha José ensegída ojapo upéva, ndahaʼéiramo jepe la ifasilpáva chupe g̃uarã (Mat. 1:20, 24; 2:13-15, 19-21). José iñeʼẽrendu rupi Jehovápe oñangareko porã Maríare ha oprotehe chupe. Katuete ningo María ohechávo upéva, ohayhuve ha orrespetavéntema Josépe. ¿Mbaʼéichapa menakuéra ikatu pesegi José ehémplo? Upearã pesegi vaʼerã Jehová konsého oĩva la Bíbliape pekuida hag̃ua pene famíliare. d Sapyʼánte ikatu ijetuʼu pesegi hag̃ua umi konsého, péro pejapóramo pehechaukáta pehayhuha pene rembirekópe ha pene matrimónio imbaretevéta. Peteĩ ermána oikóva peteĩ país héravape Vanuatu ojapóma mas de 20 áño omenda hague, ha haʼe heʼi: “Ahechávo che ména ohekaha Jehová gía ha osegiha ikonsého, arrespetave chupe. Añeñandu voi segúra porã ha akonfiave umi mbaʼe odesidívare”.

6. ¿Mbaʼépa ikatu tembirekokuéra oaprende María ehémplogui?

⁶ María ningo Jehová amigaite vaʼekue avei, ha ijerovia nodependéi vaʼekue la José ojapóvare. Haʼe oikuaa porã vaʼekue Ñandejára  Ñeʼẽ heʼíva (Luc. 1:46). e Ha oñemotiémpo ojepyʼamongeta hag̃ua umi mbaʼe oaprendévare (Luc. 2:19, 51). María ohayhu vaʼekue ipyʼaite guive Jehovápe, upéicha rupi ikatu vaʼekue omoirũ porã iménape. Heta ermána koʼag̃agua oñehaʼã avei osegi María ehémplo. Jahechamína la heʼíva peteĩ ermána hérava Emiko, haʼe heʼi: “Chesoltéra tiémpope añehaʼã vaʼekue ajapo entéro mbaʼe tekotevẽva añemoag̃uive hag̃ua Jehováre. Péro amenda rire, che ména oñemboʼe mokõivéva rehehápe ha omoakã pe estúdio de família ha aju adependete hese ajapo hag̃ua koʼã mbaʼe. Upévare ahechakuaa ajapo vaʼerãha che párte asegi hag̃ua amombarete che amista Jehovándi. Koʼág̃a añemotiémpo ikatu hag̃uáicha añemboʼe cheañoháme, astudia Ñandejára Ñeʼẽ ha ajepyʼamongeta” (Gál. 6:5). Peẽ avei tembirekokuéra, pesegíramo pemombarete pene amista Jehovándi, pene ména pendeguerohory ha penderayhuvétantema (Prov. 31:30).

7. ¿Mbaʼépa ojapo vaʼekue José ha María oadora hag̃ua Jehovápe oñondive ha mbaʼépa ikatu oaprende umi omendáva?

⁷ José ha María oñehaʼãmbaite vaʼekue avei oñondive omombarete hag̃ua iñamista Jehovándi. Haʼekuéra oikuaa porã vaʼekue iñimportanteha jaadora Jehovápe en família (Luc. 2:22-24, 41; 4:16). Oiméne sapyʼánte ijetuʼu vaʼekue avei chupekuéra, ha koʼýte ifamília retavévo ohóvo, péro osẽ porã hikuái. Haʼekuéra oheja peteĩ ehémplo iporãitereíva umi omendávape g̃uarã. Oimérõ peẽ penefamília, ikatu sapyʼánte ijetuʼueterei peho hag̃ua rreunionhápe oñondivepa ha peñemotiémpo pejapo hag̃ua pende estúdio de família. Ha oiméne ijetuʼuvéntema peẽme peñemboʼe ha pestudia hag̃ua oñondive kómo matrimónio. Péro aníkena penderesarái peñehaʼãramo peadora Jehovápe oñondive, pemombaretevetaha pene amista hendive ha peñemoag̃uivetaha ojuehe. Upévare pemotenonde memékena Jehovápe pene matrimóniope.

8. ¿Mbaʼéichapa ikatu ojapo ijestúdio de família peteĩ matrimónio iprovlémava hína?

⁸ ¿Ha mbaʼépa ikatu pejapo oimérõ peneprovléma hína pene matrimóniope? Ikatu epensa haguérente pejapotaha pende estúdio de família oñondive, ja ndaigustovéima ndéve mbaʼeve. Oimérõ upéicha, primerorã ikatu pestudia mbykymínte peteĩ informasión mokõivévape pendegustáva. Upéva penepytyvõta pejoayhuve hag̃ua ha upéi igústotama peẽme peadora Jehovápe oñondive.

9. ¿Mbaʼérepa iñimportánte ohasa tiémpo oñondive pe ména ha tembireko?

⁹ Umi omendáva ikatu osegi ojoayhu ohasáramo tiémpo oñondive. Péicha oikuaáta mbaʼépa oñandu ha opensa pe ótro (Gén. 2:24). Jahechamína mbaʼépa ohechakuaa vaʼekue Lilia ha Ruslán omenda riremi ha upéva ojapóma hína mas de 15 áño. Pe ermána heʼi: “Ropilla ndaikatumoʼãiha rohasa tiémpo oñondive roimoʼã haguéicha, pórke roreko la ore traváho, umi tembiapo ogapypegua, ha upéi katu oúma la mitã. Upévare rohechakuaa roñemotiémpomante vaʼerãha ojupe g̃uarã, osino roñemomombyrýta ojuehegui”.

10. ¿Mbaʼéichapa umi omendáva ikatu osegi pe konsého oĩva Efesios 5:15, 16-pe?

¹⁰ ¿Mbaʼéichapa peteĩ matrimónio ikatu ojasegura ohasataha tiémpo oñondive? Sapyʼánte tekotevẽtamante oñeorganisa porã hikuái oñemotiémpo hag̃ua ojupe g̃uarã (elee Efesios 5:15, 16). Peteĩ ermáno Nigeriagua hérava Uzondu heʼi: “Aorganisa jave umi mbaʼe ajapótava aapartáma voi pe tiémpo ahasátava che rembirekóndi, upe tiémpo iñimportanteterei  chéve g̃uarã” (Filip. 1:10). Jahechamína avei mbaʼéichapa Anastasia oipuru porã itiémpo. Iména ningo peteĩ superintendénte de sirkuíto Moldaviapegua, ha Anastasia heʼi: “Che añehaʼãma ajapo la che kosakuéra che ména oñatende aja irresponsavilidakuéra. Péicha haʼe ou vove che chelívrema rohasa hag̃ua tiémpo oñondive”. ¿Péro mbaʼépa ikatu pejapo oiméramo ijetuʼueterei peẽme peñemotiémpo ojupe g̃uarã?

11. ¿Mbaʼépa ojapómi vaʼekue Áquila ha Priscila?

¹¹ Áquila ha Priscila ningo ehémplo porã umi omendávape g̃uarã. Haʼekuéra peteĩ matrimónio síglo primérope guare, ha umi ermáno upe tiempopegua oapresiaiterei vaʼekue chupekuéra (Rom. 16:3, 4). La Biblia ndeʼíriramo jepe heta mbaʼe imatrimóniore, si omombeʼu haʼekuéra ombaʼapo, opredika ha oipytyvõ hague ótrope oñondive (Hech. 18:2, 3, 24-26). La Biblia oñeʼẽ jave Áquila ha Priscílare, katuete omensiona chupekuéra oñondive.

12. ¿Mbaʼépa ikatu ojapo umi omendáva ohasave hag̃ua tiémpo oñondive? (Ehecha pe taʼanga).

¹² ¿Mbaʼéichapa umi omendáva ikatu osegi Áquila ha Priscila ehémplo? Ikatu pepensa umi mbaʼe pejapo vaʼerãre káda uno. ¿Ndaikatuichéne piko pejapo umi mbaʼe oñondive, pejapo rangue peneañónte? Por ehémplo Áquila ha Priscila opredika vaʼekue oñondive. Ha peẽ, ¿pejepokuaápa pepredika jepi oñondive? Áquila ha Priscila ombaʼapo vaʼekue avei oñondive. Siérto, ikatu káda uno pembaʼapo diferénte lugárpe péro oĩ avei umi tembiapo ogapypegua. ¿Ndaikatuichénepa umíva pejapo oñondive? (Ecl. 4:9). Peñopytyvõramo pehecháta igustoha pembaʼapo oñondive ha ikatúta peñemongeta porã. Por ehémplo Robert ha Linda ojapóma mas de 50 áño omenda hague. Robert heʼi: “Legálmente saʼi oretiémpo, péro chembovyʼaiterei rojapo jave álgo oñondive ogapýpe. Por ehémplo che ajohéi jave umi tembiporu che rembireko ou omokã, ha asẽ jave amopotĩ pe korapy haʼe avei chemoirũ. Koʼã mbaʼe rojapóva oñondive oreunive ha péicha rojoayhuve”.

13. ¿Mbaʼépa ojapo vaʼerã ména ha tembireko oñemoag̃uive hag̃ua ojuehe?

¹³ Péro pereko vaʼerã enkuénta peĩ haguérente oñondive ndeʼiseiha peñemoag̃uivetamaha ojuehe. Peteĩ tembireko Brasilpegua heʼi: “Koʼág̃arupi oĩ hetaiterei mbaʼe ejapo hag̃ua, upéicha rupi ikatu epensa rehasaha tiémpo ne ména térã ne rembirekóndi peiko haguérente el mísmo ógape. Upévare ahechakuaa ndahaʼeiha aĩnte vaʼerã che ména oĩháme, síno aaprovecha porã vaʼerãha pe tiémpo ahasáva hendive ha ani ajapo jey ótra kósa”. Por ehémplo Bruno ha hembireko Tays omombeʼu la ojapóva ohasa jave tiémpo oñondive. Bruno heʼi: “Roaprovecha porã hag̃ua pe tiémpo rohasáva oñondive, romboyke voi ore selulár”.

14. ¿Mbaʼépa ikatu pejapo oiméramo ndaigústoi peẽme pehasa tiémpo oñondive?

¹⁴ ¿Ha mbaʼépa oikóta oimérõ ndaigústoi  peẽme pehasa tiémpo oñondive? Ikatu oime napendegustái la mísma kósa, térã ensegída voi perrenegáma ojuehe. ¿Mbaʼépa ikatu pejapo oimérõ péicha la pende káso? Ñanemanduʼami jeýna pe tata ñañeʼẽ vaʼekuére. Oñepyrũrõ guare ojepota michĩmínte kuri hendy, péro amedída ke ñamoĩ la jepeʼa tuichavéma hendy. Péicha avei ñepyrũrã ikatu peñehaʼã pehasa tiémpo oñondive michĩ mimi jepe káda día. Upearã ikatu peheka pejapo álgo mokõivévape pendegustáva ha ndokreamoʼãiva provléma (Sant. 3:18). Peñepyrũ jeýrõ mbeguekatúpe ha michĩ mimi, kon el tiémpo pejoayhuve jeýta.

15. ¿Mbaʼérepa iñimportantete umi omendáva ojorrespeta?

¹⁵ Pe tata hendy hag̃ua ningo oikotevẽmante pe oxíhenore, péicha avei peteĩ matrimónio oho porã hag̃ua hese mokõivéva oñomombaʼe ha ojorrespeta vaʼerã. Pe tata ogueháicha oxihenoʼỹre, péicha avei umi omendáva ojotrata vaírõ mbeguekatúpe pe mborayhu opáta avei ohóvo. Péro osegíta ojoayhu pe ména ha tembireko ojorrespeta ha oñomombaʼéramo. Nemanduʼáke ndahaʼeiha ndénte la repensa vaʼerã rerrespetaha ne ména térã ne rembirekópe, síno la iñimportánteva hína haʼe oñandu ojerrespetaha chupe. Por ehémplo Penny ha Aret ojapóma mas de 25 áño omenda hague. Ha pe ermána heʼi: “Mokõivévante roñomombaʼe ha rojorrespeta rupi ifásil oréve rohechauka hag̃ua ore rogapýpe rojoayhuha. Trankiloiténte ikatu romombeʼu la roñandúva ha ropensáva, pórke roikuaa mokõivéva rojovaloraha”. ¿Mbaʼépa ikatu rejapo ne rembiayhu oñandu hag̃ua ojerrespetaha chupe? Jahechamína Abrahán ha Sara ehémplo.

16. ¿Mbaʼépa menakuéra ikatu oaprende Abrahán ehémplogui? (1 Pedro 3:7). (Ehecha pe taʼanga).

¹⁶ Abrahán ovaloraiterei vaʼekue Sárape. Haʼe oreko vaʼekue enkuénta la Sara opensáva ha oñandúva. Peteĩ vuélta Sara ohasa kuri peteĩ situasión ijetuʼúvare ha rreniegokuére okulpa voi Abrahánpe la oikóvare. Péro Abrahán ndaipochýiri hendive ni ndotratavaíri chupe. Abrahán oikuaa porã vaʼekue mbaʼeichaguápa hembireko, Sara siémpre orrespeta vaʼekue chupe ha oapoja la haʼe odesidíva. Upévare Abrahán ohendu chupe ha oñehaʼã osolusiona la provléma (Gén. 16:5, 6). ¿Mbaʼépa ikatu ñaaprende? Menakuéra, peẽ ningo pemoakã pende rogapy ha ikatu pedesidi la ojejapótava pene famíliape (1 Cor. 11:3). Péro pehayhu rupi pene rembirekópe, perekóta enkuénta la haʼe opensáva, koʼýte oafektátarõ chupe la ojedesidíva (1 Cor. 13:4, 5). Sapyʼánte pene rembireko ikatu oñekevrantaiterei avei algúna kósare ha upévare omombeʼuséta la oñandúva. ¿Mbaʼéichapa erreaksiona péicha jave? ¿Ehechaukápa emombaʼeha ne rembireko oñandúva ejapysaka  porãvo hese? (elee 1 Pedro 3:7). Angela ha Dimitri ojapóma haimete 30 áño omenda hague. Angela oñandu iména ovaloraha chupe ha heʼi: “Oimérõ oiko raʼe álgo chepyʼapýva térã añeʼẽsénterõ hína, Dimitri siémpre ojapysaka porã cherehe. Haʼe ipasiénsia cherehe arrenega jave jepe térã chepirepererĩ jave”.

17. ¿Mbaʼépa ikatu oaprende tembirekokuéra Sara ehémplogui? (1 Pedro 3:5, 6).

¹⁷ Sara ohechauka vaʼekue orrespetaha Abrahánpe oapojávo umi mbaʼe haʼe odesidíva (Gén. 12:5). Peteĩ vuéltape Abrahán odesidi orresivi hógape umi kuimbaʼe og̃uahẽvape oñehaʼarõʼỹre chupekuéra. Upérõ guare haʼe heʼi Sárape oheja hag̃ua la ojapóva oho hag̃ua oprepara heta pan (Gén. 18:6). Sara ensegída oapoja Abrahánpe ha ojapo la ojeruréva chupe. Tembirekokuéra, peẽ avei ikatu pesegi Sara ehémplo ha peapoja la odesidíva pene ména. Pejapóramo péicha katuete pene matrimónio imbaretevéta ohóvo (elee 1 Pedro 3:5, 6). Dimitri, pe ermáno ñañeʼẽma vaʼekuére, omombeʼu mbaʼépa ojapo hembireko ikatu hag̃uáicha haʼe oñandu orrespetaha chupe. Haʼe heʼi: “Che aikuaa adesidi jave álgo, che rembireko cheapojataha oiméramo jepe noroĩri de akuérdo. Ha sapyʼánte nosẽporãirõ jepe la adesidi vaʼekue, haʼe núnka ndohekýiri chéve. Avyʼaiterei la che rembireko péicha haguére”. Jahechakuaa upéicharõ ifasilha jahayhu peteĩ persóna ñanderrespetáva ha ñandevalorávape.

18. ¿Mbaʼépa pehupytýta peñehaʼãramo pesegi pejoayhu?

¹⁸ Koʼág̃arupi Satanás ombyaise umi matrimónio oservívape Jehovápe. Haʼe oikuaa umi omendáva oúramo ndojoayhuvéi, kon el tiémpo ikatu ou oñemomombyry Jehovágui. Péro ndaipóri mbaʼeve ikatúva ipuʼaka pe mborayhu teére. Upévare peñehaʼãkena pejoayhu heʼiháicha el Cantar de los Cantárespe. Pemotenonde meme Jehovápe pene matrimóniope, pehasa tiémpo oñondive, ha pehechauka pejorrespetaha perekóvo enkuénta la peñandúva ha peikotevẽva. Pejapóramo péicha, pene matrimónio omombaʼéta Jehovápe pórke chugui ou pe mborayhu tee. Pe mborayhu pehechaukáva ojuehe haʼetéta peteĩ tata núnka ndoguéiva ha pesegíta pejoayhu peikove aja pukukue.