1. ¿Mbaʼépa ijetuʼu jepi ñandéve?

 ¿NDÉPA remoĩmava peteĩ méta upéi ijetuʼúva ndéve rehupyty hag̃ua? b Oiméramo péicha, ndahaʼéi nderehénte la oikóva upéva. Por ehémplo Philip omehorase vaʼekue iñemboʼe ha pyʼỹive oñemboʼese, péro ijetuʼu kuri chupe oñemotiémpo hag̃ua upearã. Erika katu omoĩ la méta og̃uahẽ hag̃ua órape umi rreunión ojejapóvape oñesẽ hag̃ua predikasiónpe, upéicharõ jepe og̃uahẽ tárde haimete káda rreuniónpe. Ha Tomáš oñehaʼã vaʼekue heta vése olee hag̃ua la Biblia kompletoite. Haʼe heʼi: “Ndaigústoi vaʼekue chéve alee la Biblia, 3 vése añehaʼã alee hag̃ua, péro amo ipahápe Levítico pevénte ag̃uahẽ”.

2. ¿Mbaʼérepa nañañentregái vaʼerã oimérõ ndajahupytýi gueteri peteĩ méta?

² Oiméramo ereko peteĩ méta ha neʼĩra rehupyty, ani reñentrega. Umi méta isensíllova jepe oraha la itiémpo ha tekotevẽ ñañehaʼãmbaite jahupyty hag̃ua. Nde ningo rehupytyse gueteri ne méta, ha upéva ohechauka emombaʼeha ne amista Jehovándi ha emeʼẽseha chupe pe iporãvéva. Jehová ovalora la reñehaʼãva rejapo ha ndojeruremoʼãi ndehegui peteĩ mbaʼe imposívleva (Sal. 103:14; Miq. 6:8). Upévare emoĩ vaʼerã umi  méta ikatútava rehupyty ha oĩva nde posivilidápe. Emoĩ rire peteĩ méta, ¿mbaʼépa ikatu rejapo rehupyty hag̃ua upéva? Jahechamína unos kuánto konsého.

3. ¿Mbaʼérepa iñimportanteterei ñanekyreʼỹ?

³ Iñimportanteterei ñanekyreʼỹ jahupyty hag̃ua umi méta jarekóva. ¿Mbaʼérepa? Pórke jahupytyséramo ñande pyʼaite guive ñane méta, katuete ñañehaʼãmbaitéta. Ñanekyreʼỹramo jahupyty hag̃ua ñane méta ikatu ñakompara pe yvytu orahávare peteĩ varkoʼípe. Pe yvytu osegíramo oipeju, pe varkoʼi og̃uahẽta hína la ohohápe. Ha pe yvytu hatãve oipejúramo pe varkoʼi og̃uahẽ pyaʼevéta voi. Upéicha avei amáske ñanekyreʼỹ, jarekovéta avei la posivilida jahupytývo ñane méta. Peteĩ ermáno oikóva El Salvadórpe hérava David heʼi: “Nekyreʼỹramo, katuete reñehaʼãve. Rejapo voi opa ikatúva ani hag̃ua mbaʼeve ndejoko rehupyty hag̃ua umi méta erekóva”. Upéicharõ, ¿mbaʼépa ñanepytyvõta ñanekyreʼỹve hag̃ua?

4. ¿Mbaʼépa ikatu jajerure Jehovápe? (Filipenses 2:13). (Ehecha pe taʼanga).

⁴ Jajerure Jehovápe tañanepytyvõ ñanekyreʼỹve hag̃ua. Jehová ikatu ñanemokyreʼỹ ijespíritu sánto rupive jahupyty hag̃ua ñane méta (elee Filipenses 2:13). Sapyʼánte ñamoĩ umi méta jaikuaáguinte jajapo vaʼerãha upéva, péro añetehápe ndahaʼéi la jajaposepáva. Upéva oiko vaʼekue peteĩ ermána Ugandaguáre hérava Norina. Haʼe omoĩ vaʼekue la méta omoñepyrũvo peteĩ estúdio bíblico, péro ndahaʼéi vaʼekue la ikyreʼỹmbáva pórke opensa ndaivaleiha oporomboʼe hag̃ua. ¿Mbaʼépa oipytyvõ vaʼekue chupe? Haʼe omombeʼu: “Ajerure Jehovápe káda día tachepytyvõ ajapose hag̃ua peteĩ estúdio bíblico. Avei che ajapo la tekotevẽva aporomboʼekuaave hag̃ua. Ohasa rire unos kuánto mése ahechakuaa chekyreʼỹveha. Ha upe áñope voi amoñepyrũ mokõi estúdio bíblico”.

5. ¿Mbaʼérepa jajepyʼamongeta vaʼerã ikatu hag̃uáicha ñanekyreʼỹve?

⁵ Jajepyʼamongeta umi mbaʼe Jehová ojapo vaʼekuére ñanderehehápe (Sal. 143:5). Jehová imbaʼeporãiterei vaʼekue apóstol Pablo ndive ha haʼe ojepyʼamongeta vaʼekue upévare. Upéva omomýi chupe ombaʼapo jejopy hag̃ua Jehová servísiope (1 Cor. 15:9, 10; 1 Tim. 1:12-14). Ñande avei ñapensa meméramo umi mbaʼe Jehová ojapóvare ñanderehehápe, ñanekyreʼỹvéta jahupyty hag̃ua umi méta ñamoĩva (Sal. 116:12). Jahechamína la oipytyvõ vaʼekue peteĩ ermána oikóvape Hondúraspe ojapo hag̃ua iprekursorádo rregulár. Haʼe heʼi: “Añepyrũ apensa mbaʼeichaitépa Jehová cherayhu. Haʼe ningo chemoag̃ui vaʼekue iñorganisasiónre ha oñangareko cherehe. Ajepyʼamongetávo umívare ahayhuve Jehovápe ha chekyreʼỹve ajapo hag̃ua che prekursorádo”.

6. ¿Mbaʼépa ikatu ñanepytyvõ avei ñanekyreʼỹve hag̃ua?

⁶ Jajesareko umi vendisión jarresivítavare  jahupytývo ñane méta. Jahechami jeýna Erika ehémplo. ¿Mbaʼépa oipytyvõ kuri chupe og̃uahẽ hag̃ua órape? Haʼe heʼi: “Apilla tuicha aperdeha ag̃uahẽramo tárde predikasionrã. Péro ag̃uahẽrõ voive ikatu asaluda umi ermánope ha añeʼẽ hendivekuéra. Avei ahendu umi konsého chepytyvõtava apredika porãve ha avyʼave hag̃ua predikasiónpe”. Erika okumpli la iméta ojesareko rupi umi mbaʼe porã ohupytýtavare. ¿Ha nde mbaʼérepa ikatu ejesareko? Por ehémplo, oimérõ la ne méta hína ejapo porãve nde lektúra de la Biblia térã ne ñemboʼe, ikatu epensa mbaʼéichapa upéva omombaretevéta ne amista Jehovándi (Sal. 145:18, 19). Ha oiméramo erekose peteĩ kualida kristiána, ikatu epensa upéva nepytyvõtaha ejogueraha porãve hag̃ua nde rapichándi (Col. 3:14). ¿Mbaʼe ótra kósapa ikatu jajapo? Ikatu voi jaskrivi mbaʼérepa jahupytyse hína peteĩ méta ha pyʼỹinte ñamaña hese. Tomáš, pe ermáno ñamensiona vaʼekue iñepyrũme heʼi: “Chemanduʼa memévo mbaʼérepa ahupytyse peteĩ méta, menovéntema añentregase”.

7. ¿Mbaʼépa ojapo vaʼekue Julio ha hembireko ohupyty hag̃ua iméta?

⁷ Jajeheʼa umi persóna ñanemokyreʼỹtavare (Prov. 13:20). Julio ha hembireko ojaposeve kuri Jehová servísiope g̃uarã. Haʼe omombeʼu la oipytyvõ vaʼekue chupekuéra okumpli hag̃ua la iméta. Julio heʼi: “Roheka umi amígo oremokyreʼỹtava rohupyty hag̃ua ore méta ha roñeʼẽ hendivekuéra upévare. Heta oĩ ore amígo apytépe ohupytýma vaʼekue umichagua méta, upévare ikatu omeʼẽ oréve hikuái umi konsého ideprovéchova. Avei haʼekuéra oporandúmi vaʼerã oréve mbaʼéichapa roho hese ha oremokyreʼỹ roikotevẽ jave”.

8. ¿Mbaʼépa ikatu oiko ñanekyreʼỹ javénte ñañehaʼãramo ñakumpli ñane méta? (Ehecha pe taʼanga).

⁸ Jaʼe porãsérõ g̃uarã oĩ jepi voínte día ndahaʼeihápe la ñanekyreʼỹmbáva. ¿Heʼisépa upéva jahejánte vaʼerãha ñane méta? Nahániri. Jahechami jeýna pe yvytu ha pe varkoʼi ehémplo. Pe yvytu oipytyvõramo jepe pe varkoʼípe og̃uahẽ hag̃ua pe ohosehápe, legálmente sapyʼánte ndahaʼéi la oipeju hatãva ha oĩ día ndaiporietehápe voi yvytu. ¿Heʼisépa upéva pe varkoʼi ndaikatuveimaha oho moõve? Nahániri. Por ehémplo, oĩ umi varkoʼi orekóva motór térã rrémo, ha umi oĩva pe varkoʼípe ikatu oipuru koʼã mbaʼe osegi hag̃ua la iviáhe. Upéicha avei ñande kásope, oĩta día ñanekyreʼỹhápe ha ótro día katu nahániri. Upévare ñadependétarõ sólamente ñañeñandu lájare, nañakumplimoʼãi ñane méta. Péro, umi varkopegua otopaháicha mbaʼéichapa osegíta iviáhe ndaipóri jave yvytu, ñande avei ikatu jasegi ñañehaʼã ñakumpli hag̃ua ñane méta, nañanekyreʼỹiramo jepe. Siérto ningo, upéva ndahaʼemoʼãi la ifasilpáva péro javyʼaitereíta jahupytývo ñane méta. Jahecha mboyve mbaʼépa ikatu ñanepytyvõ  péicha jave, ñambohovaimína peteĩ pregúnta.

9. ¿Jasegi vaʼerã piko ñañehaʼã jahupyty ñane méta nañanekyreʼỹiramo jepe?

⁹ Jehová ningo oipota jaservi chupe vyʼápe ha ñande pyʼaite guive (Sal. 100:2; 2 Cor. 9:7). Upévare, oimérõ nañanekyreʼỹi hína, ¿mbaʼéreiko jasegi vaʼerã ñañehaʼã jahupyty hag̃ua ñane méta? Jahechamína Pablo ehémplo. Haʼe heʼi vaʼekue: “Che akorrehi mbarete che rete ha areko che esklávoramo” (1 Cor. 9:25-27, nóta). Avése Pablo ndahaʼéi vaʼekue la ikyreʼỹmbáva ojapo hag̃ua la Jehová oipotáva, péro lomímonte oñehaʼãmbaite vaʼekue ojapo. ¿Ovyʼápa rakaʼe Jehová Pablo servísio reheve? Si ovyʼa. Upévare Jehová ovendesi vaʼekue chupe oñehaʼãmbaite haguére (2 Tim. 4:7, 8).

10. ¿Mbaʼépa jahupytýta ñañehaʼãrõ ñakumpli ñane méta nañanekyreʼỹiramo jepe?

¹⁰ Jehová ovyʼa avei ñande ñañehaʼãmbaitéramo ñakumpli hag̃ua ñane méta, oiméramo jepe nañanekyreʼỹi hína. ¿Mbaʼérepa? Pórke ñande ñañehaʼãmbaite jajapo upéva jahayhúgui chupe, ndahaʼéiramo jepe la ñandegustáva upe jajapóva hína. Jehová ningo ovendesi vaʼekue Páblope ha ñandéve avei ñanevendesíta jasegírõ ñambaʼapo jejopy (Sal. 126:5). Ha jahechávo mbaʼéichapa Jehová ñanevendesi, upéva voi ñanemokyreʼỹ jeýta. Peteĩ ermána oikóva Polóniape hérava Lucyna heʼi: “Avése nasẽséi predikasiónpe, koʼýte chekaneʼõ jave. Péro aháramo, avyʼaiterei upe rire ha upéva ningo peteĩ rregálo tuichaitereíva”. Jahechamína koʼág̃a mbaʼépa ikatu jajapo nañanekyreʼỹi jave.

11. ¿Mbaʼépa ikatu jajapo jajejokokuaave hag̃ua?

¹¹ Jajerure Jehovápe jajejokokuaa hag̃ua. Ko kualida ndahaʼéi ñandejokóvante ani hag̃ua jajapo ivaíva, síno ñanepytyvõ avei jajapo hag̃ua umi mbaʼe porã, koʼýte ijetuʼu jave ñandéve térã nañanekyreʼỹi jave. Ñanemanduʼákena pe jejokokuaa haʼeha peteĩva umi mbaʼe porã oúva Jehová espíritugui. Upévare jajerurékena Jehovápe ijespíritu sánto ikatu hag̃uáicha jajejokokuaa (Luc. 11:13; Gál. 5:22, 23). David, pe ermáno ñamensiona vaʼekue párrafo 3-pe, omombeʼu mbaʼéichapa oipytyvõ kuri chupe pe ñemboʼe. Haʼe ojapose vaʼekue pyʼỹive ijestúdio personál. Ha heʼi: “Ajerure Jehovápe tachepytyvõ ajejokokuaa hag̃ua. Ha haʼe rupive amoñepyrũ peteĩ prográma de estúdio personál ha koʼag̃aite peve asegi upéva”.

12. ¿Mbaʼéichapa ñanepytyvõ Eclesiastés 11:4 ikatu hag̃uáicha jahupyty ñane méta?

¹² Ani ñahaʼarõ entéro mbaʼe oĩ porã. Ko múndope ningo siémpre oĩta álgo ijetuʼúva jahasáva. Upévare jaikóramo ñahaʼarõ iporãmbaite raẽ la situasión, núnka nañakumplimoʼãi ñane méta (elee Eclesiastés 11:4). Peteĩ ermáno hérava Dayniel heʼi: “Núnka naiporãmbamoʼãi voi la situasión, upévare rejapóntema vaʼerã álgo ekumpli hag̃ua ne méta”. Peteĩ ermáno hérava Paul oikóva Ugándape heʼi avei mbaʼérepa ndovaléi ñambotapykue ñane méta. Haʼe heʼi: “Ñañepyrũrõ ñakumpli ñane méta, ijetuʼúramo jepe, ñameʼẽ hína oportunida Jehovápe ñanevendesi hag̃ua” (Mal. 3:10).

13. ¿Mbaʼérepa okonveni ñakumpli michĩ mimi jahávo ñane méta?

¹³ Ñañepyrũ michĩ mimi. Avése ikatu nañanemokyreʼỹi jahechávo ijetuʼutaha jahupyty ñane méta. Oikóramo nderehe upéva, ¿mbaʼérepa nereñehaʼãi michĩ mimi rehupyty rehóvo ne méta? Por ehémplo oiméramo erekose peteĩ kualida pyahu, ¿mbaʼérepa nereñepyrũi rehechauka upe kualida umi mbaʼe michĩvape? Térã oimérõ releese kompletoite la Biblia, ¿mbaʼérepa nereñepyrũi elee mbyky mimi káda día? Tomáš, pe ermáno ñamensiona vaʼekue iñepyrũme, omoĩ kuri la méta oleepávo la Biblia un áñope, péro ijetuʼueterei vaʼekue chupe. Haʼe heʼi: “Añemeʼẽ enkuénta  ndaikatumoʼãiha akumpli che méta un áñope. Upévare adesidi añepyrũ jeytaha, péro ajapo upéva ikatumiháicha, alee unos kuánto párrafo káda día ha upéi ajepyʼamongeta hese. Péicha igustove chéve alee la Biblia”. Upéi Tomáš odisfrutavéma oleévo ibíblia, upévare olee pukuve ohóvo ha kon el tiémpo olee kompletoite la Biblia. c

14. ¿Mbaʼe ijetuʼúvapa ikatu oñepresenta ñandejokóva ñakumpli hag̃ua ñane méta?

¹⁴ Ñanekyreʼỹramo jepe ñakumpli hag̃ua ñane méta, ñarrekonose vaʼerã ikatuha oñepresenta álgo ñandejokóva. Por ehémplo ‘ñahaʼarõʼỹve jave’ ikatu oiko álgo oipeʼapáva ñandehegui ñane tiémpo ha ndaikatuvéima ñañehaʼã jahupyty ñane méta (Ecl. 9:11). Térã ikatu jaju ñaneprovléma ha upéva ñanemokangy ha ñanedesanima (Prov. 24:10). Avei ñaneimperfékto rupi ikatu jajavy ha upéva ñanemomombyry ñane métagui (Rom. 7:23). Térã jajúnte ñanekaneʼõ (Mat. 26:43). ¿Mbaʼépa ikatu ñanepytyvõ péicha jave?

15. ¿Mbaʼérepa nañañentregái vaʼerã oñepresentáramo álgo ikatúva ñandejoko ñakumpli hag̃ua ñane méta? (Salmo 145:14).

¹⁵ Ñanemanduʼáke oĩramo álgo ñandejokóva, upéva ndeʼiséi ñañentregáma vaʼerãha. La Biblia heʼi ikatuha heta ñaneprovléma. Péro avei heʼi Jehová ikatuha ñanepytyvõ jasegi hag̃ua tenonde gotyo ñakumpli hag̃ua ñane méta (elee Salmo 145:14). Philip, pe ermáno ñamensiona vaʼekue iñepyrũme heʼi: “Chéve g̃uarã la iñimportantevéva ndahaʼéi mboy vésepa haʼa, síno mboy vésepa apuʼã ha asegi jey”. Jahechami jeýna avei David ehémplo. Haʼe heʼi: “Oúramo ijetuʼu la situasión térã peteĩ día oikóramo álgo ikatúva chedesanima, che ni napensái upéva chejokotaha, síno chéve g̃uarã upéva haʼe hína peteĩ oportunida ahechauka hag̃ua Jehovápe ahayhuha  chupe”. Upeichaite hína, ndajahejáiramo umi provléma ñandejoko jahechauka Jehovápe jaipotaha ñandeguerohory. Eñeimahinamína mbaʼeichaitépa oiméne Jehová ovyʼa ohechávo ñañehaʼãmbaiteha ñakumpli ñane méta.

16. ¿Mbaʼépa ikatu ñaaprende umi situasión ijetuʼúvagui?

¹⁶ Ñaaprende umi situasión ijetuʼúvagui. Ikatu ñapensa pe situasión jahasávare ha ñañeporandu: “¿Mbaʼépa ikatu ajapo ani hag̃ua oĩ jey ótra kósa chejokóva?” (Prov. 27:12). Ha oiméramo ijetuʼueterei jahupyty ñane méta, ¿ndeʼiséipa upéva ñakambia vaʼerãha ñane méta? Oiméramo upéva ñande káso, iporãta ñapensáramo oĩpa añete ñande posivilidápe upe méta. d Jehová nopensamoʼãi jafalla hague oimérõ ñane situasión nopermitíri ñandéve ñakumpli ñane méta (2 Cor. 8:12).

17. ¿Mbaʼérepa ndovaléi ñanderesarái umi mbaʼe jahupytýmavagui Jehová servísiope?

¹⁷ Ñanemanduʼáke umi mbaʼe jahupytýmavare. La Biblia heʼi: “Ñandejára ningo ihústo hína ha ndahesaraimoʼãi umi mbaʼe pejapo vaʼekuégui” (Heb. 6:10). Upévare ndovaléi avei ñande ñanderesarái umi mbaʼe jajapóma vaʼekuégui Jehová servísiope. Ñanemanduʼa vaʼerã umi méta jahupytýmavare, por ehémplo oikóma ñandehegui Jehová amígo, japredikáma ha avei jajevautisáma. Umi mbaʼe jahupytýmava anteve, ohechauka ikatuha jasegi japrogresa ñakumpli peve pe méta jarekóva koʼág̃a (Filip. 3:16).

18. ¿Mbaʼépa jajapo vaʼerã ñañehaʼã aja ñakumpli ñane méta? (Ehecha pe taʼanga).

¹⁸ Pe oviaháva pe varkoʼípe ningo og̃uahẽ vyʼápe pe lugár ohosehápe, péicha avei ñande ikatu jahupyty ñane méta Jehová ñanepytyvõ rupi. Umi oviaháva pe varkoʼípe odisfruta avei la viáhe. Upévare, jadisfrutákena jahechávo mbaʼéichapa Jehová ñanepytyvõ ha ñanevendesi jajapo aja tekotevẽva guive jahupyty hag̃ua ñane méta (2 Cor. 4:7). Ha nañañentregáiramo katu jarresivíta hetave vendisión (Gál. 6:9).