1. ¿Mbaʼépa Jehová oipota jajapo? (Ehecha pe taʼanga).

 ¿MÁVAPEPA ikatu jajerure ñanekonsola ha ñandegia hag̃ua? Ñande jaikuaa mávapepa: Ikatu ñañemboʼe Jehovápe ha jajerure chupe tañanepytyvõ. Jehová voi oipota jajapo upéva, haʼe ñanemokyreʼỹ ‘ñañemboʼe hag̃ua chupe kontinuadoite’ (1 Tes. 5:17). Kyhyjeʼỹme ikatu ñañemboʼe Ñandejárape haʼe ñandegia hag̃ua entéro mbaʼépe (Prov. 3:5, 6). Jaikuaa ningo Jehová ipojeraitereiha, upévare haʼe ndeʼíri mboy vése pevéntepa ikatu ñañemboʼe chupe.

2. ¿Mbaʼépa jahecháta ko artíkulope?

² Ñande ningo jaagradeseterei Jehovápe opermiti haguére ñandéve ñañemboʼe chupe. Upéicharõ jepe ñanerembiapo hetaiterei rupi ikatu nañanetiempovéima ñañemboʼe hag̃ua. Térã ikatu ñañandu tekotevẽha ñamehora ñañemboʼe lája. La Bíbliape jatopa umi téxto ñanemokyreʼỹva ha ñandegiátava jajapo hag̃ua upéva. Ko artíkulope jahecháta mbaʼéichapa ikatu jasegi Jesús ehémplo ha ñañemotiémpo ñañemboʼe hag̃ua. Ha avei jahecháta 5 mbaʼe ikatúva jaʼe ñañemboʼe jave ñamehora hag̃ua ñane orasión.

3. ¿Mbaʼépa ohechakuaa vaʼekue Jesús?

³ Jesús ohechakuaa vaʼekue Jehová omombaʼetereiha ñane  orasión. Ou mboyve ko yvy ape ári, hetaiterei tiémpo Jesús ohecha vaʼekue mbaʼéichapa Itúa okontesta umi kuimbaʼe ha kuña ijerovia mbaretéva ñemboʼe. Por ehémplo Jesús oĩ vaʼekue Itúa ykére haʼe okontestárõ guare Ana, David, Elíaspe ha hetaitereive ótro isiervokuéra ifiélvape (1 Sam. 1:10, 11, 20; 1 Rey. 19:4-6; Sal. 32:5). Upévare ndajahecharamói Jesús heʼi hague idisipulokuérape oñemboʼe vaʼerãha pyʼỹi ha kyhyjeʼỹme (Mat. 7:7-11).

4. ¿Mbaʼe mbaʼépa Jesús ojapo vaʼekue oñemboʼe hag̃ua ha mbaʼépa ñaaprende?

⁴ Umi iñemboʼe rupive Jesús oheja ñandéve ehémplo porã jasegi hag̃ua. Haʼe opredika aja pukukue ko yvy ape ári, pyʼỹi oñemboʼe vaʼekue. Péro ojapo hag̃ua upéva, haʼe oñemotiémpomante vaʼerã, pórke sapyʼánte hembiapoiterei térã oĩ vaʼekue heta héntendi (Mar. 6:31, 45, 46). Haʼe opuʼãmi voi porã oñemboʼe hag̃ua haʼeñoháme (Mar. 1:35). Una vuéltape oñemboʼe peteĩ pyhare pukukue odesidi mboyve álgo iñimportánteva (Luc. 6:12, 13). Ha pe pyhare omano mboyve, Jesús oñemboʼe vaʼekue heta vése ikatu hag̃uáicha okumplipa pe tembiapo ijetuʼuetéva oñemeʼẽ vaʼekue chupe (Mat. 26:39, 42, 44).

5. ¿Mbaʼéichapa ikatu jasegi Jesús ehémplo?

⁵ Jesús ehémplo ohechauka ñandéve ñanerembiapo hetaitereíramo jepe, tekotevẽha ñañemotiémpo ñañemboʼe hag̃ua. Jesús ojapo haguéicha ikatu ñañeorganisa porã ñañemboʼe hag̃ua, por ehémplo ikatu ñapuʼã voive pyhareve o jake tardemie. Jajapóramo péicha jahechaukáta jaagradeseha Jehovápe ko rregálo porãitére. Peteĩ ermána hérava Lynne imanduʼa mbaʼeichaitépa opoko vaʼekue hese oikuaávo la priviléhio jarekóva ñañemboʼe hag̃ua Jehovápe. Haʼe heʼi: “Aikuaárõ guare ikatuha añeʼẽ Jehovápe oimeha óra, añepyrũ ahecha chupe cheamigoitéramo ha amehorase añemboʼe lája”. Katuete ningo entéro ñañeñandu péicha. Jahechamína 5 mbaʼe iñimportánteva ikatúva jaʼe ñane ñemboʼépe.

6. Heʼiháicha Apocalipsis 4:10, 11, ¿mbaʼépa Jehová omerese ñameʼẽ chupe?

⁶ Ñamombaʼeguasu Jehovápe. Peteĩ visión rupive apóstol Juan ohecha vaʼekue 24  ansiáno oadoraha Jehovápe yvágape. Haʼekuéra omombaʼeguasu Jehovápe heʼívo haʼe omereseha ‘oñemombaʼe, oñembotuicha ha orresivi pe podér’ (elee Apocalipsis 4:10, 11). Umi anhelkuéra avei oreko hetaiterei rrasón omombaʼeguasu hag̃ua Jehovápe. Haʼekuéra oĩ ijykére yvágape ha oikuaa porãiterei chupe, ohecha hikuái umi kualida porãite Jehová orekóva umi mbaʼe ojapóva rupive. Ha upéva voi omomýi umi anhelkuérape omombaʼeguasu hag̃ua chupe (Job 38:4-7).

7. ¿Mbaʼe mbaʼe rehepa ikatu ñamombaʼeguasu Jehovápe?

⁷ Ñande avei ñamombaʼeguasuse Jehovápe ñañemboʼe jave. Upearã ikatu jaʼe Ñandejárape mbaʼérepa jahayhu ha jarrespeta chupe. Jalee ha jastudia jave la Biblia ñañehaʼã vaʼerã jahechakuaa umi kualida Jehová orekóva ñandegustaitéva (Job 37:23; Rom. 11:33). Upéi jaʼe chupe mbaʼéichapa ñañeñandu jaikuaávo haʼe orekoha umi kualida. Avei ikatu ñamombaʼeguasu Jehovápe ñanepytyvõ haguére ñandéve ha avei ñane ermanokuérape. Haʼe ningo siémpre ojesareko ñanderehe ha ñandeprotehe (1 Sam. 1:27; 2:1, 2).

8. ¿Mbaʼe rehepa ikatu jaagradese Jehovápe? (1 Tesalonicenses 5:18).

⁸ Jaagradese Jehovápe. Ñande ningo jareko hetaiterei mbaʼe jaagradese hag̃ua Jehovápe ñane ñemboʼépe (elee 1 Tesalonicenses 5:18). Ikatu jaagradese chupe entéro mbaʼe porã jaguerekóvare, pórke chuguínte voi ou hína opa mbaʼe iporãva (Sant. 1:17). Por ehémplo ikatu jaagradese chupe ko yvy porãitére, ikreasiónre, ñande rekovére, ñane famíliare, ñane amigokuérare ha ñane esperánsare. Jaagradesese avei chupe opermiti haguére ñandéve ñañemoag̃ui hese ha oiko ñandehegui iñamígo.

9. ¿Mbaʼérepa siémpre tekotevẽ ñañehaʼã ñandeagradesído?

⁹ Tekotevẽ káda uno ñañehaʼã ñapensa mbaʼérepa jaagradese vaʼerã Jehovápe. Ñande jaiko peteĩ múndo la hénte imalagradesidohápe. Haʼekuéra opensánte oikóvo la ikatúvare okonsegi oagradese rangue umi mbaʼe orekómavare voi. Ñañepyrũramo jajogua umi héntepe ikatu hína ñañemboʼe jave ñambohysýinte umi mbaʼe jaipotáva, jaagradese rangue Ñandejárape. Ani hag̃ua oiko kóva ñanderehe, tekotevẽ siémpre ñañehaʼã jaheka mbaʼérepa ikatu jaagradese Jehovápe ha jahechauka ñamombaʼeha opa mbaʼe haʼe omeʼẽ vaʼekue ñandéve (Luc. 6:45).

10. ¿Mbaʼéichapa oipytyvõ peteĩ ermánape ijagradesída haguére? (Ehecha pe taʼanga).

¹⁰ Ñandeagradesídoramo ikatúta ñaaguanta umi provlemakuéra. Jahechamína ermána Kyung-sook experiénsia, osẽ vaʼekue Ñemañaha 15 de enero de 2015-pe. Pe ermánare ojetopa orekoha kánser de pulmón ha ivai jepéma isituasión. Haʼe heʼi: “Apyta vaieterei aikuaa rire cherasyha. Haʼete voi chéve aime reimíntemava ha akyhyjeterei”. ¿Mbaʼépa oipytyvõ chupe iñaguánte hag̃ua? Haʼe heʼi  káda pyhare oñeno mboyve ojupiha pe terrásape oagradese hag̃ua Jehovápe 5 mbaʼe porã ohasa vaʼekuére upe díape, ha oñemboʼe voi chupe en vos álta. Upéva otrankilisa ha omomýi chupe ohechauka hag̃ua ohayhuha Jehovápe. Haʼe ohechakuaa mbaʼéichapa Jehová omombarete isiervokuéra ifiélvape ohasa jave umi provléma ijetuʼuetereíva. Avei oñemeʼẽ enkuénta hetaveha umi vendisión jarresivíva umi provléma jarekóvagui. Oiko haguéicha ermána Kyung-sook kásope, ñande avei jareko heta mbaʼe jaagradese hag̃ua Jehovápe jahasáramo jepe algúna pruévare. Jaagradeséramo Jehovápe umi mbaʼe ojapóvare ñanepytyvõta ñaneaguánte ha jasegi hag̃ua javyʼa.

11. ¿Mbaʼérepa Jesús disipulokuéra tekotevẽ vaʼekue ipyʼaguasu?

¹¹ Jajerure Jehovápe tañanembopyʼaguasu japredika hag̃ua. Oho mboyvemi yvágape, Jesús omomanduʼa vaʼekue idisipulokuérape opredika vaʼerãha “Jerusalénpe, oparupiete Judéape, Samáriape ha umi lugár mombyryvehápe jepe ko yvy ape ári” (Hech. 1:8; Luc. 24:46-48). Tiémpo riremínte, umi líder judío ogueraha apóstol Pedro ha Juánpe pe Sanedrín renondépe. Omanda koʼã apóstolpe anivéma hag̃ua opredika ha oamenasa voi chupekuéra (Hech. 4:18, 21). ¿Mbaʼépa ojapo upémarõ Pedro ha Juan?

12. Heʼiháicha Hechos 4:29, 31, ¿mbaʼépa ojapo raʼe umi disipulokuéra?

¹² Umi líder judío oamenasárõ guare Pedro ha Juánpe, haʼekuéra heʼi: “Oiméramo peẽ pepensa oĩ porãha Ñandejárape g̃uarã rojapo peẽ pejéva rojapo rangue Ñandejára heʼíva, upéva peẽma peikuaáta. Péro ore ndaikatúi roguerokirirĩ umi mbaʼe rohecha ha rohendu vaʼekue” (Hech. 4:19, 20). Ojepoi rire Pedro ha Juángui, haʼekuéra oho umi ótro disípulo rendápe. Oñondivepa oñemboʼe hikuái Jehovápe osegi hag̃ua ojapo ivolunta. Haʼekuéra heʼi: “Eipytyvõmína nde esklavokuérape osegi hag̃ua omombeʼu ne ñeʼẽ pyʼaguasúpe”. Haʼekuéra oñemboʼe ipyʼaite guive ha Jehová okontesta chupekuéra (elee Hechos 4:29, 31).

13. ¿Mbaʼépa ñaaprende Jin-hyuk ehémplogui?

¹³ Ñande ikatu jakopia umi disipulokuéra ehémplo jasegívo japredika umi autorida oproivíramo jepe ñandehegui. Jahechamína ermáno Jin-hyuk ehémplo. Chupe ningo oñemondo vaʼekue kárselpe ndojaposéi haguére servísio militár. Oĩrõ guare kárselpe, otoka chupe oñatende unos kuánto karselérore oñemoĩ vaʼekuépe haʼeño umi kalavósope. Ko ermánope oñepermiti oñeʼẽ umi karselérope la oikotevẽvarente, péro ojeproivi chugui oñeʼẽ hendivekuéra la Bíbliare. Upévare haʼe oñemboʼe Jehovápe ikatu hag̃uáicha omoarandu ha ombopyʼaguasu chupe opredika hag̃ua oreko jave la oportunida (Hech. 5:29). Ko ermáno heʼi: “Jehová okontesta che ñemboʼe, chembopyʼaguasu ha chemoarandu ikatu hag̃uáicha amoñepyrũ heta estúdio bíblico. Ajapo vaʼekue koʼã estúdio 5 minútopente umi kalavóso rokẽme. Upéi pyharekue askrivi umi kárta antrega hag̃ua umi karselérope al ótro día”. Ñande avei ikatu ñaĩ segúro Jehová ñanepytyvõtaha japredika hag̃ua. Ojapo haguéicha ko ermáno, ikatu jajerure Jehovápe ñanembopyʼaguasu ha ñanemoarandu hag̃ua.

14. ¿Mbaʼépa ñanepytyvõta ñaneprovléma jave? (Salmo 37:3, 5).

¹⁴ Jajerure Jehovápe ñanepytyvõ hag̃ua ñaneprovléma jave. Heta ñande apytépe ohasa asy hína. Ikatu hasy térã oreko peteĩ provléma emosionál. Oĩ ihénte manóva, iprovlémava hogapýpe, ojepersegíva ha umícha.  Ha koʼã situasión ijetuʼuvéntema oĩ rupi umi pandémia ha gérra. Upévare ñamombeʼúkena Jehovápe ñane korasõite guive mbaʼéichapa ñañeñandu. Jaʼe chupe umi mbaʼe jahasáva ñañeʼẽramoguáicha peteĩ ñane amigoitépe. Ha ani jaduda Jehová ‘katuete ñanepytyvõtaha’ (elee Salmo 37:3, 5).

15. ¿Mbaʼéichapa pe ñemboʼe ikatu ñanepytyvõ ‘ñaaguanta hag̃ua jahasa asy jave’? Emoĩ peteĩ ehémplo.

¹⁵ Ñañemboʼe meméramo ikatúta ‘ñaaguanta jahasa asy jave’ (Rom. 12:12). Jehová ningo oikuaa porãiterei mbaʼépa ohasa hína isiervokuéra, ha haʼe ohendu umi iñemboʼe “ojerure jave ajúda” (Sal. 145:18, 19). Peteĩ prekursóra orekóva 29 áño, hérava Kristie, oñemeʼẽ vaʼekue enkuénta siertoha upéva. Ohaʼarõʼỹve jave ou vaʼekue tuicha hasy. Ha upéva odeprimiete vaʼekue chupe. Upéi isýre ojepilla orekoha peteĩ mbaʼasy igravetereíva, ikatúva ojuka chupe. Kristie heʼi: “Che ningo che pyʼaite guive añemboʼe Jehovápe ikatu hag̃uáicha omeʼẽ chéve pe fuérsa aikotevẽva káda día. Avei añehaʼã vaʼekue ajapo meme umi mbaʼe omombaretétava che jerovia, por ehémplo aha meme rreunionhápe ha ajapo meme che estúdio personál”. Ha upéi heʼive: “Pe ñemboʼe chepytyvõ vaʼekue aaguanta hag̃ua umi situasión ijetuʼuvéva jepe. Che aime vaʼekue segúra Jehová siémpre oĩha che ykére ha upéva chepytyvõ añetrankilisa hag̃ua. Ndakueráiramo jepe upepete, Jehová si ombohovái che ñemboʼe chembopyʼaguapývo”. Aníkena núnka ñanderesarái ‘Jehová oikuaaha mbaʼéichapa osalváta jejopy vaígui umi hénte oadorávape chupe ipyʼaite guive’ (2 Ped. 2:9).

16. ¿Mbaʼérepa ñaikotevẽ Jehová ajúda ani hag̃ua ñandereity umi tentasión?

¹⁶ Jajerure Jehovápe tañanepytyvõ ani hag̃ua ñandereity umi tentasión. Ñaneimperfékto rupi ñandestira umi mbaʼe ivaíva, ha upévare kontinuadoite jagerrea vaʼerã. Upéva ári jey, Satanás ojapo ikatúva guive jajapo hag̃ua umi mbaʼe ñandestiráva. Por ehémplo, haʼe  oñehaʼã omongyʼa la ñapensáva umi diversión ikyʼáva rupive. Koʼã diversión omyenyhẽ ñane akã umi pensamiénto ikyʼávagui ikatúva ñandereja vai Jehová renondépe ha ojapoka ñandéve umi mbaʼe ivaietereíva (Mar. 7:21-23; Sant. 1:14, 15).

17. ¿Mbaʼépa jajapo vaʼerã jajerure rire Jehovápe ñanepytyvõ hag̃ua? (Ehecha pe taʼanga).

¹⁷ Ani hag̃ua jaʼa umi tentasiónpe, ñaikotevẽmante Jehová ñanepytyvõ. Jesús heʼi vaʼekue voi iñemboʼépe: “Ani reheja roʼa ñuhãme, síno oresalva Satanásgui” (Mat. 6:13). Jehová ningo ñanepytyvõse, péro upearã jajerure vaʼerã chupe ajúda. Avei ñamoĩ vaʼerã ñande párte ha ñañemboʼe rire jajapo ikatúva guive ñamboyke hag̃ua umi tentasión. Por ehémplo ñañehaʼãmbaite vaʼerã ani hag̃ua jalee ni ñahendu umi mbaʼe vai ojagarrapáva Satanás múndo (Sal. 97:10). Ñamyenyhẽ hag̃ua ñane akã umi pensamiénto iporãvagui jalee ha jastudia vaʼerã la Biblia, avei jaha vaʼerã rreunionhápe ha japredika meme. Ñanemanduʼáke Jehová oprometeha ndohejamoʼãiha jahasa mbaʼeve ndaikatumoʼãiva ñaaguanta (1 Cor. 10:12, 13).

18. ¿Mbaʼépa enterove jajapo vaʼerã?

¹⁸ Koʼã ára pahápe enterovéva tekotevẽ ñañemboʼe meme ikatu hag̃uáicha jasegi ñandefiél. Ñañemotiémpokena káda día ñañemboʼe hag̃ua ñande pyʼaite guive. Jehová oipota ‘ñamombeʼupaite chupe umi mbaʼe oĩva ñande pyʼapýpe’ (Sal. 62:8). Ñañemboʼe jave ñamombaʼeguasu ha jaagradese vaʼerã chupe opa mbaʼe ojapóvare. Jajerure chupe tañanembopyʼaguasu japredika hag̃ua. Avei tañanepytyvõ ñandepuʼaka hag̃ua kualkiér provlémare ha ani hag̃ua jaʼa umi tentasiónpe. Aníkena jaheja mbaʼeve ni avave ñandejoko ñañemboʼe hag̃ua Jehovápe. ¿Péro mbaʼéichapa Jehová ombohovái ñane ñemboʼe? Upéva jahecháta pe ótro artíkulope.