1, 2. a) ¿Mbaʼéichapa opensa heta persóna? b) ¿Mbaʼépa jahecháta ko artíkulope?

HETA oĩ heʼíva: “Ñande ningo nañaikotevẽi peteĩ organisasión ñandedirihi hag̃ua, ñai porãnte vaʼerã Ñandejárandi”. Péro, ¿siértopa upéva?

² Ko artíkulope jahecháta Jehová siémpre ojapoha opa mbaʼe hendaitépe, ha oorganisa porãha ipuévlope. Avei jahecháta mbaʼépa tekotevẽ jajapo Jehová omeʼẽ jave instruksión iñorganisasión rupive (1 Cor. 14:33, 40). Síglo primérope umi kristiáno osegi Ñandejára Ñeʼẽ heʼíva, péicha rupi opredika umi marandu porã heta lugár rupi. Ñande avei jajapo la Biblia heʼíva, ha jasegi pe gía omeʼẽva Jehová organisasión. Upévare ñamog̃uahẽ umi marandu porã ko yvy tuichakuére. Avei, ñaipytyvõ ikatu hag̃uáicha pe kongregasión ipotĩ, oĩ peteĩ ñeʼẽme ha oiko pyʼaguapýpe.

3. ¿Mbaʼérepa nde reĩ segúro Jehová ojapoha opa mbaʼe hendaitépe?

³ Jahecha jave umi mbaʼe Ñandejára okrea vaʼekue, ñañemeʼẽ enkuénta haʼe ndojapoiha mbaʼeve sarambikuépe. “Jehová iñarandu ha ontende porã rupi opa mbaʼe omopyenda porã pe yvága  ha ko yvy” (Prov. 3:19, TNM). Ñande ningo ni ndajaikuaapái umi mbaʼe haʼe okrea vaʼekue. Añetehápe “ijorillamínte la jahecháva, michĩmínte jaikuaa ha ñahendu umi hembiapokuégui” (Job 26:14, TNM). Upéicharõ jepe jahechakuaa opa mbaʼe oĩva ko univérsope oñeorganisa porãha (Sal. 8:3, 4). Por ehémplo, umi estrélla okuʼe pe espásiore ha ndochokapái ojuehe. Avei umi planéta oĩva pe sistéma solárpe ojere pe kuarahýre de fórma ordenáda. ¿Mbaʼéicha rupípa oiko koʼã mbaʼe? Pórke Jehová omoĩ entéro mbaʼe hendaitépe. Haʼe “iñarandueterei rupi ojapo pe yvága porãite” ha ko yvy. Ñapensa jave koʼã mbaʼére, ñambotuicha, jaadora ha ñaneñeʼẽrenduse chupe (Sal. 136:1, 5-9).

4. ¿Mbaʼérepa umi sientífiko ndaikatúi orresponde umi porandu iñimportantetéva?

⁴ Umi sientífiko oaprende heta mbaʼe pe univérsogui ha ko yvýgui, ha oipuru umi mbaʼe oaprendéva ojapo hag̃ua heta mbaʼe ideprovéchova ñandéve. Péro haʼekuéra ndaikatúi orresponde umi porandu iñimportánteva oikuaaséva umi hénte. Por ehémplo, umi astrónomo ndaikatúi oexplika mbaʼéichapa oñepyrũ vaʼekue ko univérso, térã mbaʼérepa ko planétape oĩ yvypóra, animál ha plánta. La majoría umi persóna ndaikatúi oexplika mbaʼérepa jaikosete opa ára g̃uarã (Ecl. 3:11). Heta sientífiko ha ambue tapicha heʼi Ñandejára ndoexistiriha, ha omboʼe hikuái entéro mbaʼe oĩha pe evolusión rupive. Upéicha rupi heta hénte ndaikatúi ombohovái umi porandu iñimportantetéva. Péro Ñandejára orresponde koʼã mbaʼe la Biblia rupive.

5. ¿Mbaʼérepa jarrespeta vaʼerã umi léi odomináva pe kreasión?

⁵ Jehová omoĩ vaʼekue heta léi odomináva ikreasión. Koʼã léi ningo nokambiái arakaʼeve. Umi elektrisísta, ploméro, inheniéro, pilóto, siruháno ha ambue tapicha oreko enkuénta koʼã léi ombaʼapo hag̃ua. Por ehémplo, ñane korasõ siémpre oĩ pe mísmo lugárpe ñande retépe. Upévare umi siruháno ndoikói vaʼerã oheka moõitépa oĩ ipasiénte korasõ. Avei, entéro jaikuaa porã japóramo peteĩ lugár ijyvatehágui ikatuha ñamano. Ñande jarrespeta umi léi Jehová omoĩ vaʼekue, por ehémplo pe léi de la graveda, pórke péichamante ikatúta jasegi jaikove.

6. ¿Mbaʼérepa jaʼekuaa Jehová oipotaha ipuévlo oadora chupe de fórma organisáda?

⁶ Añetehápe ñanesorprende jahechávo mbaʼéichapa Jehová oorganisa ko univérso. Haʼe oipota avei ipuévlo oĩ organisádo omombaʼeguasu hag̃ua chupe. Jehová omeʼẽ ñandéve Iñeʼẽ jaikuaa hag̃ua mbaʼéichapa jaadora vaʼerã chupe. Jajapóramo la Biblia ha iñorganisasión heʼíva, javyʼáta ha oho porãta ñandéve.

7. ¿Mbaʼérepa jaʼekuaa la Biblia haʼeha peteĩ lívro oĩva vién organisádo?

⁷ La Biblia ningo haʼe peteĩ rregálo ijojahaʼỹva oúva Ñandejáragui. Péro oĩ heʼíva haʼenteha unos kuánto lívro judío ha kristiáno yvyporakuérante omoĩ vaʼekue oñondive. Péro ndahaʼeiete upéicha. Ñandejára odesidi mávapa oskrivíta umi lívro, arakaʼépa ha mbaʼépa oñemoĩta pype. Upéicha rupínte entéro umi lívro oĩva la Bíbliape ñanepytyvõ ñantende hag̃ua Ñandejára mensáhe. Génesis guive Apocalipsis peve, oñeʼẽ peteĩ “desendénsia” rehe ojapo jeýtava ko yvýgui peteĩ paraíso. Ñande jaikuaa porã ko desendénsia haʼeha Jesucristo, ha igoviérno ohechaukataha Jehová añoite orekoha derécho ogovernávo opavavépe (elee Génesis 3:15; Mateo 6:10 ha Apocalipsis 11:15).

8. ¿Mbaʼérepa ikatu jaʼe umi israelita oñeorganisa porã hague?

 ⁸ Umi israelita oñeorganisa porã vaʼekue pe Léi Mosáika rupive. Por ehémplo, umi “kuña ombaʼapo pe tavernákulo entrádape, káda uno asegún pe traváho oñemeʼẽ vaʼekue chupekuéra” (Éx. 38:8, TNM). Umi israelítape ojeʼe avei mbaʼe mbaʼépa ojapo vaʼerã ováta jave, ha mbaʼeichaitépa ombyaty ha oguerova vaʼerã pe tavernákulo. Tiémpo rire, rréi David oorganisa umi saserdóte ha levítape ombaʼapo hag̃ua pe témplope (1 Crón. 23:1-6; 24:1-3). Umi israelita iñeʼẽrendu jave Jehovápe, haʼe ovendesi chupekuéra. Péicha jave haʼekuéra oñeorganisa porã, oiko pyʼaguapýpe ha peteĩ ñeʼẽme (Deut. 11:26, 27; 28:1-14).

9. ¿Mbaʼéichapa oñeorganisa vaʼekue umi kongregasión síglo primérope?

⁹ Umi kongregasión síglo primeropegua oñeorganisa porã vaʼekue avei. Pe Kuérpo Governánte odirihi umi kongregasión. Ñepyrũrã ko grúpope oĩ kuri umi apóstol, péro upe rire omoirũ avei chupekuéra ambue ansianokuéra (Hech. 6:1-6; 15:6). Jehová ogia algúno oĩva pe Kuérpo Governántepe, ha avei unos kuánto ansiáno ombaʼapóvape hendivekuéra, oskrivi hag̃ua konsého ha instruksión umi kongregasiónpe (1 Tim. 3:1-13; Tito 1:5-9). ¿Mbaʼéichapa umi kongregasión oñevenefisia kuri osegi haguére umi instruksión omeʼẽva pe Kuérpo Governánte?

10. ¿Mbaʼépa ohupyty umi kongregasión síglo primeropegua osegi rupi umi instruksión? (Ehecha pe taʼanga oĩva iñepyrũme).

¹⁰ (Elee Hechos 16:4, 5). Síglo primérope oĩ vaʼekue ermáno ovisitáva umi kongregasión. Haʼekuéra “omombeʼu umi ermáno upepeguápe mbaʼépa odesidi raʼe umi apóstol ha ansiáno oĩva Jerusalénpe”, haʼéva hína pe Kuérpo Governánte. Umi kongregasión osegi umi instruksión, ha péicha rupi “ojerovia mbareteve ha oñemboheta hetave koʼẽ koʼẽre”. ¿Mbaʼépa ikatu oaprende chuguikuéra umi kongregasión koʼag̃agua?

11. ¿Mbaʼépa ojapo vaʼerã umi omoakãva kongregasión orresivi jave instruksión?

¹¹ Umi oĩva Komite de Sukursál térã Komite de Paíspe, superintendénte de sirkuíto ha ansianokuéra osegi vaʼerã umi instruksión omeʼẽva Jehová organisasión. La Biblia voi heʼi ñandéve ñaneñeʼẽrendu vaʼerãha umi ñanemoakãvape (Deut. 30:16; Heb. 13:7, 17). Umi ifiélva orrespeta Jehovápe ha ndojekehái orresivi jave peteĩ instruksión. Ñande ningo ndajajoguaséi Diótrefespe. Haʼe ndorrespetái vaʼekue umi omoakãvape kongregasión (elee 3 Juan 9, 10). Jasegi jave umi instruksión, ñaipytyvõ hína oĩ hag̃ua pyʼaguapy ha unida kongregasiónpe. Entéronte iporã ñañeporandu: “¿Amokyreʼỹpa che ermanokuérape iñeʼẽrendu hag̃ua Jehovápe? ¿Añehaʼãpa pyaʼe asegi umi instruksión arresivíva Ñandejára organisasióngui?”.

12. ¿Mbaʼéichapa oñenombra koʼág̃a umi ansiáno ha siérvo ministeriálpe?

¹² Ndaʼaréi pe Kuérpo Governánte odesidi hague oñekambia vaʼerãha oñenombra lája umi ansiáno ha siérvo ministeriál. Pe artíkulo hérava “Oñeporandúva jepi” osẽ vaʼekue Ñemañaha 15 de noviembre de 2014-pe, oexplika síglo primérope pe Kuérpo Governánte omeʼẽ hague autorida umi superintendénte viahántepe onombra hag̃ua ansiáno ha siérvo ministeriál. Upéicha rupi, septiembre de 2014 guive umi superintendénte de sirkuíto oñepyrũ ojapo umi nombramiénto. Umi ansiáno orrekomenda jave peteĩ ermánope oservi hag̃ua kómo ansiáno térã siérvo ministeriál, pe superintendénte de sirkuíto oñehaʼã oikuaave chupe ha ifamíliape. Por ehémplo, ikatu osẽ  opredika pe ermánondi (1 Tim. 3:4, 5). Upéi pe superintendénte ha umi ansiáno oñerreuni jey, ha ohesaʼỹijo porã umi téxto ohechaukáva mbaʼe rrekisítopa okumpli vaʼerã umi ansiáno ha siérvo ministeriál (1 Tim. 3:1-10, 12, 13; 1 Ped. 5:1-3).

13. ¿Mbaʼéichapa ikatu jahechauka jaapojaha umi ansiáno odesidíva?

¹³ Umi ansiáno oñangareko ñanderehe ha pe kongregasiónre, upévare oipuru la Biblia heʼi hag̃ua ñandéve mbaʼépa iporã jajapo. Tekotevẽ ñaneñeʼẽrendu pórke umi instruksión oñemeʼẽva ñane venefisiorãnte (1 Tim. 6:3). Síglo primérope, oĩ vaʼekue “oikóva hekopeʼỹ”. Umichagua tapicha hekorei ha oiko oñentremete ótro ojapóvare. Umi ansiáno oñehaʼã kuri oipytyvõ chupekuéra, péro nokambiaséi hikuái. Apóstol Pablo heʼi kuri pe kongregasiónpe mbaʼéichapa otrata vaʼerã koʼãichagua tapichápe. Haʼe heʼi: “Pemarka chupe ha anive pejeheʼa hese”. Haʼekuéra ndojeheʼavéi vaʼerã umichaguáre, péro péva ndeʼiséi otratatamaha chupekuéra iñenemígoramo (2 Tes. 3:11-15). Koʼág̃a avei, umi ansiáno oñehaʼã oipytyvõ umi ndojapóivape la Biblia heʼíva, por ehémplo oĩramo ojegustáva peteĩ ndahaʼéivare Testígo (1 Cor. 7:39). Pe persóna nokambiaséiramo, ansianokuéra ikatu odesidi ojapo peteĩ diskúrso de señalamiénto. Pe diskúrsope ojeexplika pe kristiáno komportamiénto ikatuha omongyʼa pe kongregasión. Ojejapóramo peichagua diskúrso ne kongregasiónpe, ¿mbaʼéichapa rejagarráta? Ha reikuaáramo mávarepa oñeñeʼẽ, ¿resegítapa rehasa tiémpo hendive? Rehendúramo pe adverténsia oñemeʼẽ vaʼekue, reipytyvõta pe ofallávape ohechakuaa hag̃ua umi mbaʼe ojapóva ikatuha operhudika chupe ha ombopochy Jehovápe. Avei péicha ikatu hína reipytyvõ pe persónape oheja hag̃ua hembiapo vai. ^[1]

14. ¿Mbaʼéichapa ikatu ñaipytyvõ pe kongregasión ipotĩ hag̃ua?

¹⁴ Ñandejára Ñeʼẽ heʼi enterovéva ikatuha ñamoĩ ñande párte pe kongregasión ipotĩ hag̃ua. Jahechamína mbaʼépa oiko vaʼekue kongregasión de Coríntope. Pablo ohayhu vaʼekue umi ermáno upepeguápe. Haʼe oipytyvõ hetápe oaprende hag̃ua pe añetegua (1 Cor. 1:1, 2). Ñañeimahinamína mbaʼéichapa oñeñandu oikuaárõ guare oĩha upépe hekovaíva, ha umi ermáno osegi ojeheʼa hese. Pablo heʼi umi ansiánope: “Pemeʼẽ vaʼerã pe kuimbaʼe Satanáspe”. Haʼekuéra omosẽ vaʼerã upe hembiapo vaívape kongregasióngui (1 Cor. 5:1, 5-7, 12). Koʼág̃a avei, umi ansiáno ikatu omosẽ kongregasióngui peteĩ ermánope noñarrepentíriramo. Oikóramo upéva, jatrata vaʼerã upe persónape la Biblia heʼiháicha. Péicha ñaipytyvõta pe kongregasión osegi hag̃ua ipotĩ. Avei ñaipytyvõta pe hembiapo vaívape ohechakuaa hag̃ua tekotevẽha oñarrepenti ha ojerure Jehovápe toperdonami chupe.

15. ¿Mbaʼéichapa ikatu ñaipytyvõ pe kongregasión oiko hag̃ua pyʼaguapýpe?

¹⁵ Coríntope oĩ vaʼekue avei ótro provléma. Algúno oraha iñermánope trivunálpe. Upévare Pablo ojerure chupekuéra: “¿Mbaʼére piko ndapehejáinte ojejapo penderehe ivaíva?” (1 Cor. 6:1-8). Koʼág̃a avei oĩ ermáno ojapóva negósio ótro kristiánondi, péro upéi ou operde pláta, térã oĩ oñepyrũva odeskonfia iñermánogui ha opensa oestafa hague chupe. Upéicha jave ojogueraha jepi hikuái trivunálpe. Oiko jave upéva umi hénte ikatu oñeʼẽ vai Jehováre ha isiervokuérare. Avei ko situasión ogueru provléma kongregasiónpe. La Biblia ñanemokyreʼỹ jaiko porã hag̃ua  ñane ermanokuérandi, sapyʼánte japerdétaramo jepe pláta. ^[2] Jesús ñanemboʼe vaʼekue mbaʼéichapa ñasolusiona vaʼerã koʼãichagua provléma (elee Mateo 5:23, 24; 18:15-17). Jasegíramo koʼã konsého, ñaipytyvõta ojeiko hag̃ua pyʼaguapýpe ha peteĩ ñeʼẽme kongregasiónpe.

16. ¿Mbaʼéicha rupípa Ñandejára puévlo oiko peteĩ ñeʼẽme?

¹⁶ Ñandejára Ñeʼẽ heʼi: “¡Emañamína! Ajépa iporã ha igustoite umi ermáno oiko porãrõ oñondivepa peteĩ famíliaicha” (Sal. 133:1, TNM). Umi israelita iñeʼẽrendu aja Jehovápe, oñeorganisa porã hikuái ha oiko peteĩ ñeʼẽme. Jehová heʼi kuri ipuévlore: “Ovecháicha ikorápe ambyatýta, ovecha atýicha ambyatýta ñúme” (Miq. 2:12). Jehová heʼi avei ótro proféta rupive: “Upérõ amboʼéta opa tetãme oñeʼẽ hag̃ua peteĩ ñeʼẽ ipotĩva, ikatu hag̃uáicha oñondivepa oipuru Jehová réra ha oservi chupe” (Sof. 3:9, TNM). ¡Ajépa jaagradesete Jehovápe ikatu haguére jaadora chupe oñondivepa!

17. ¿Mbaʼépa ojapo vaʼerã umi ansiáno oĩramo opeka vaíva?

¹⁷ Umi ansiáno oikuaa Jehová oipotaha oñeñangareko porã pe kongregasiónre, ikatu hag̃uáicha ipotĩ ha oiko peteĩ ñeʼẽme. Upévare peteĩ ermáno oúramo opeka vai, haʼekuéra pyaʼe porã mborayhúpe oipytyvõ chupe (Prov. 15:3). Pablo ohayhueterei vaʼekue umi ermáno Corintoguápe, upévare oñemoñeʼẽ chupekuéra oikotevẽ jave, ohechaukaháicha pe primera kárta ohai vaʼekue chupekuéra. Ikatu jaʼe umi ansiáno upepegua pyaʼe osegi hague Pablo konsého, pórke unos kuánto mése upe rire haʼe ofelisita chupekuéra ohechaukaháicha isegúnda kártape. Upévare, peteĩ ermáno “ohóramo tape vaíre, haʼe opilla mboyve jepe” umi ansiáno oñemoñeʼẽma vaʼerã chupe pyʼaguapýpe porãnte (Gál. 6:1).

18. a) ¿Mbaʼéichapa Ñandejára Ñeʼẽ oipytyvõ umi kongregasión síglo primeropeguápe? b) ¿Mbaʼépa jahecháta pe artíkulo oúvape?

¹⁸ Jahechaháicha, umi kristiáno síglo primeropegua osegi jave Ñandejára Ñeʼẽme heʼíva, umi kongregasión ipotĩ, oĩ peteĩ ñeʼẽme ha oiko pyʼaguapýpe (1 Cor. 1:10; Efes. 4:11-13; 1 Ped. 3:8). Upévare haʼekuéra opredika kuri “oparupiete ko múndope” (Col. 1:23). Ñane tiémpope avei, Jehová puévlo oñeorganisa porã, oiko peteĩ ñeʼẽme ha opredika pe marandu porã ko yvy tuichakuére. Pe artíkulo oúvape jasegíta jahecha mbaʼéichapa ñande kristianokuéra ñamombaʼe la Biblia, ha ñaĩ desidído ñambotuichávo Jehovápe, pe Governánte Ijojahaʼỹva (Sal. 71:15, 16).