1, 2. a) ¿Mbaʼe prémiopa oñemeʼẽta Jehová siervokuérape? b) ¿Mbaʼépa ñanepytyvõta ñapensa meme hag̃ua pe prémiore? (Ehecha pe taʼanga oĩva iñepyrũme).

UMI kristiáno unhído oreko peteĩ esperánsa iporãitereíva. Haʼekuéra ohaʼarõitereíma og̃uahẽ pe tiémpo oho hag̃ua oiko yvágape. Apóstol Pablo ohenói vaʼekue ko esperánsape “pe prémio Ñandejára omeʼẽva” (Filip. 3:14). Umi unhído ogovernáta yvágape Jesús ndive Irréinope, péicha oipytyvõta yvyporakuérape iperfékto hag̃ua (Apoc. 20:6). ¡Ajépa iporãite pe esperánsa orekóva umi unhído! Umi ambue ovechakuéra katu ohaʼarõitereíma peteĩ prémio idiferénteva. Haʼekuéra oikóta opa ára g̃uarã peteĩ paraísope ko yvy ape ári. Ko esperánsa ombovyʼaiterei chupekuéra (2 Ped. 3:13).

² Pablo oipytyvõse kuri umi kristiáno unhídope ikatu hag̃uáicha ifiél ha ohupyty pe prémio. Haʼe heʼi chupekuéra: “Pepensa memékena umi mbaʼe yvagapeguáre ha ani umi mbaʼe ko yvy arigua rehe” (Col. 3:2). Umi unhído tekotevẽ vaʼekue ojesareko meme pe esperánsa selestiál ijojahaʼỹvare (Col. 1:4, 5). Jajepyʼamongetáramo umi vendisión Jehová oprometévare, katuete ñapensa meméta pe  prémiore, jarekóramo jepe esperánsa jaha hag̃ua yvágape térã jaiko hag̃ua ko yvy ape ári (1 Cor. 9:24).

3. ¿Mbaʼérepa Pablo heʼi vaʼekue umi kristiánope oñatende vaʼerãha?

³ Pablo heʼi avei umi kristiánope oñatende vaʼerãha ani hag̃ua ojavy pe prémio. Por ehémplo, heʼi kuri umi Colosasguápe oĩha kristiáno guaʼu opyta porãséva Ñandejára renondépe osegívo pe Léi Mosáika, ojerovia rangue Crístore (Col. 2:16-18). Umi situasión Pablo omensionáva ningo oñepresenta avei ñane tiémpope, ha ikatu ñandegueraha vai ha japerde pe prémio. Haʼe heʼi mbaʼéichapa ikatu ñamboyke umi deséo vai, ha mbaʼépa jajapo vaʼerã ñane provléma jave ñane ermanokuérandi térã ñande rogapýpe. Upévare umi konsého omeʼẽ vaʼekue Pablo tuichaiterei ñanepytyvõkuaa koʼág̃a. Jahechamína unos kuánto konsého mborayhúpe omeʼẽ vaʼekue oskrivírõ guare umi Colosasguápe.

4. ¿Mbaʼérepa jaʼekuaa umi deséo vai káusare ikatuha jajavy pe prémio?

⁴ Pablo omomanduʼa rire umi ermánope pe esperánsa porãite orekóvare hikuái, heʼi: “Pejukáke pende rete rembipota vai, ani penderekovai, ani penderekokyʼa, ani penembaʼepota vai, ani pendetarovaite pejaposégui ivaíva, ha ani pendetaryrýi” (Col. 3:5). Umi deséo vai ningo imbareteterei, upévare ikatu hína ñanemomombyry Jehovágui ha japerde ñane esperánsa. Peteĩ ermáno ou kuri hekovai, ha upéi ovolve jey kongregasiónpe. Haʼe heʼi pe deséo vai imbareteterei hague, upévare oñemeʼẽrõ guare enkuénta la ojapóva oĩ vai hague, ja tardetereíma.

5. ¿Mbaʼéichapa ikatu jajekuida jajecháramo peteĩ situasión ipeligrósovape?

⁵ Ñande koʼýte tekotevẽ ñañatende porã jajecháramo peteĩ situasión ñandegueraha vaítavape. Por ehémplo, iporãta ningo peteĩ paréha de nóvio omoĩramo límite oñepyrũ guive la inoviásgo oikuaa hag̃ua mbaʼeichaite pevépa ohechaukáta ojupe ojoayhuha. Avei ojekuida vaʼerã hikuái pono oĩeterei haʼeño ha hoʼa mbaʼe tekokyʼápe (Prov. 22:3). Oĩ hetave situasión ipeligrósova ikatúva oñepresenta. Por ehémplo, oĩ jave kristiáno tekotevẽva oviaha mombyry itraváho rehehápe, térã peteĩ ermáno ombaʼapo jave peteĩ kuñándi, ỹrõ peteĩ ermána ombaʼapóramo peteĩ kuimbaʼéndi (Prov. 2:10-12, 16). Jajecháramo koʼãichagua situasiónpe, ¿mbaʼéichapa ikatu jajekuida? Jaikuaauka vaʼerã ñande haʼeha testígo de Jehová, ñañekomporta porã vaʼerã, ha ani ñanderesarái jaikóramo ñanovilleapa rei katuete japa vaitaha. Avei jajekuida vaʼerã oiméramo ndajavyʼái térã ñañeñandu ñaneaño. Sapyʼánte péicha jave jarekose ñande ykére peteĩ persóna ñanentendéva. Ikatu voi hína jajedesespera ha jaasepta oimeraẽ oikóvape ñande rapykuéri. Upéva ningo ipeligrosoiterei. Oiméramo algúna ves reñeñandu péicha, aníkena rejapo mbaʼeve ikatúva ndegueraha vai ha nderehupytýi pe prémio. Ejerurékena Jehovápe tanepytyvõ ha eñemboja avei umi ermáno ha ermanakuérare (elee Salmo 34:18 ha Proverbios 13:20).

6. ¿Mbaʼépa jaraha vaʼerã enkuénta jaiporavo jave umi vyʼarã?

⁶ Jajuka hag̃ua ñande rete rembipota vai, ñamboyke vaʼerã umi entretenimiénto naiporãiva. Koʼág̃arupi, heta vyʼarã oĩva ñanemomanduʼa mbaʼéichapa opensa vaʼekue umi hénte Sodoma ha Gomorragua (Jud. 7). Umi oprodusíva umi entretenimiénto oipota ñapensa pe tekovai haʼeha álgo normál ha nañandeperhudikamoʼãiha. Upévare, tekotevẽ siémpre ñañatende porã. Ndaikatúi ningo jaasepta oimehaichagua entretenimiénto oikuaveʼẽva ko múndo. Upéva rangue, jahecha porã vaʼerã mbaʼeichagua vyʼarãpa jaiporavóta. Umíva ningo ndoipeʼái vaʼerã ñandehegui pe prémio ñaneraʼarõva (Prov. 4:23).

7. ¿Mbaʼe provlémapa ikatu oiko kongregasiónpe?

⁷ Ñande ningo javyʼaiterei ñaime haguére kongregasiónpe. Ñaime jave rreunionhápe jastudia Ñandejára Ñeʼẽ ha ñañomokyreʼỹ ñane ermanokuérandi. Upéva ñanepytyvõ jajesareko hag̃ua pe prémiore. Péro sapyʼánte ikatu jajoavyʼimi ñane ermanokuérandi nañantendeporãi rupi peteĩ situasión. Nañasolusionáiramo upe provléma ikatu hína japyta ñandepyʼaro (elee 1 Pedro 3:8, 9).

8, 9. a) ¿Mbaʼépa ikatu ñanepytyvõ ñagana hag̃ua pe prémio? b) ¿Mbaʼépa ikatu jajapo peteĩ ermáno ñanemoñeñandu vaírõ?

⁸ Jasegíramo ñandepyʼaro ñane ermánondi, ndajahupytymoʼãi pe prémio. Pablo heʼi vaʼekue mbaʼépa ikatu ojapo umi kristiáno Colosasgua: “Peẽme ningo Ñandejára penderayhu, pendeporavo, ha penemomarangatu, upévare pehechaukákena peiporiahuverekoha pende rapichápe pende pyʼaite guive, penembaʼeporã, peñemomirĩ, ani pendepochy rei ha penepasiénsiakena. Pesegíkena peñoaguanta ha peñoperdona pende pyʼaite guive, pejapo upéva oĩramo jepe penembopochýva. Jehová peneperdona haguéicha ipyʼaite guive, upéicha avei peẽ pejapo vaʼerã. Péro pejapóramo jepe koʼã mbaʼe, pehechauka vaʼerã avei peporohayhuha; pe mborayhu ningo oipytyvõ enterovépe ojogueraha porã hag̃ua” (Col. 3:12-14).

⁹ Japorohayhu ha ñanembaʼeporãrõ ndahasymoʼãi ñaperdona hag̃ua ñande rapichápe. Sapyʼánte ningo ikatu oĩ heʼi térã ojapóva peteĩ mbaʼe ñanemoñeñandu vaíva. Péicha jave iporã ñapensa ñande avei jaʼe térã jajapo hague peteĩ mbaʼe omoñeñandu vaíva ñande rapichápe, ha haʼe ñaneperdona hague. Ajépa jaagradesete kuri ñanderayhu ha imbaʼeporã haguére ñanendive (elee Eclesiastés 7:21, 22). Javyʼaiterei ningo Jesús rupive ikatu haguére ñaimemba peteĩ ñeʼẽme (Col. 3:15). Enterovéva ñande ñamombaʼeguasu el mísmo Dióspe, japredika el mísmo mensáhe ha heta provléma jahasáva ohasa avei ñane ermanokuéra oparupigua. Japorohayhu, ñanembaʼeporã ha ñañoperdonáramo, pe kongregasión iñunidovéta ha enterovéva ñañehaʼãmbaitéta jahupyty pe prémio.

10, 11. a) ¿Mbaʼérepa ivai ñaenvidia ñane ermánope? b) ¿Mbaʼépa jajapo vaʼerã ani hag̃ua japerde pe prémio ñaenvidia rupi ótrope?

¹⁰ Ñaneenvidiósoramo ndajahupytymoʼãi pe prémio. La Bíbliape oñemombeʼu unos kuánto ehémplo ohechaukáva pe envídia ikatuha ñandegueraha vai. Por ehémplo, Caín iñenvidióso rupi ojuka vaʼekue Abélpe. Coré, Datán ha Abiram oenvidia vaʼekue Moiséspe ha opuʼã hese hikuái. Rréi Saúl katu oenvidia Davídpe ha ojukase chupe upe haguére. Ndareíri la Biblia heʼi: “Oĩháme envídia ha joavy, upépe oĩ avei sarambi ha opa mbaʼe vai” (Sant. 3:16).

¹¹ Ñañehaʼãmbaitéramo japorohayhu ha ñanembaʼeporã, nañaenvidiamoʼãi ñande rapichápe. Ñandejára Ñeʼẽ heʼi: “Pe mborayhu ipasiénsia ha imbaʼeporã, naiñenvidiósoi” (1 Cor. 13:4). Ani hag̃ua ñaneenvidióso, jahecha vaʼerã opa mbaʼe Jehová ohechaháicha. Upévare Iñeʼẽme oñekompara pe kongregasión peteĩ kuérpore, ha ñande jarekórõ enkuénta upéva, ñantende porãvéta ñane ermanokuérape. La Biblia heʼi: “Peteĩvape oñembotuicháramo, enterove umi ótro ovyʼapa hendive” (1 Cor. 12:16-18, 26). Oikóramo peteĩ mbaʼe porã ñane ermánore, javyʼa vaʼerã hendive, ndahaʼéi ñaenvidia vaʼerã chupe. Ñapensamína rréi Saúl raʼy ehémplore, hérava Jonatán. Davídpe ojeporavo vaʼekue oiko hag̃ua chugui rréi, péro Jonatán naiñenvidiósoi, jepe haʼe opyta vaʼerã kuri itúa rendaguépe. Upéva rangue Jonatán omokyreʼỹ Davídpe ha oapoja chupe (1 Sam. 23:16-18). ¿Ikatúpa ñande avei japorohayhu ha ñanembaʼeporã Jonatán ojapo haguéicha?

12. ¿Mbaʼe konsého bíblicopa ikatu oipytyvõ ñane famíliape ohupyty hag̃ua pe prémio?

¹² Káda uno ñande rogapýpe jasegíramo umi konsého oĩva la Bíbliape, jaikóta pyʼaguapýpe, javyʼáta ha jahupytýta pe prémio. Pablo omeʼẽ vaʼekue ko konsého neporãva familiakuérape g̃uarã: “Peẽ tembirekokuéra, peñemoĩkena pene ména poguýpe, upéva iporãgui ñande Ruvicha renondépe. Peẽ menakuéra, pesegíkena pehayhu pene rembirekópe ha ani pendepochy ha pesapukái vaipa chupekuéra. Peẽ taʼyrakuéra, akóinte peneñeʼẽrendu vaʼerã pende tuvakuérape, ñande Ruvicha oguerohoryeterei rupi upéva. Peẽ tuvakuéra, aníkena pejahéi pende raʼykuérare pembopochy hag̃uáicha chupekuéra, cháke ikatu oñeñandu vaieterei hikuái” (Col. 3:18-21). ¿Rehechakuaápa mbaʼéichapa ko konsého ikatu oipytyvõ ne famíliape?

13. ¿Mbaʼéichapa peteĩ ermána ikatu oipytyvõ iména ndahaʼéivape Testígo oservise hag̃ua Jehovápe?

¹³ Tembireko, oiméramo ereko ne ména ndahaʼéiva testígo, ¿mbaʼépa rejapóta haʼe nandetrataporãiramo? Ikatu ningo ndepochy ha peñemoĩ pejodiskuti. ¿Omehorátapa upéicha pene situasión? Amo ipahápe rekonsegíramo haʼe ojapo la reipotáva, ¿omokyreʼỹtapa chupe upéva oservi hag̃ua Jehovápe? Hasy nunga la oiko hag̃ua upéva. Péro erekóramo enkuénta haʼe omoakãha nde rogapy ha errespeta chupe, oĩta pyʼaguapy  nde rogapýpe ha remombaʼeguasúta Jehovápe. Ne ehémplo porã ikatu hína omomýi ne ménape oservi hag̃ua Jehovápe, ha péicha mokõivéva ikatúta pehupyty pe prémio (elee 1 Pedro 3:1, 2).

14. ¿Mbaʼépa peteĩ ména ojapo vaʼerã hembireko ndahaʼéiva Testígo ndorrespetáiramo chupe?

¹⁴ Ména, oiméramo ne rembireko ndoservíri Jehovápe, ¿mbaʼépa rejapóta haʼe nanderrespetáiramo? Reikóramo reguerosapukái chupe oikuaa hag̃ua mávapa la omandáva, ¿nderrespetavéta piko upe haguére? ¡Ni mbaʼevéicharõ! Ñandejára oipota rehayhu ne rembirekópe, ha péicha resegi Jesús ehémplo (Efes. 5:23). Jesús ningo pe omoakãva kongregasión, ha haʼe siémpre ipasiénsia ha oporohayhu (Luc. 9:46-48). Resegíramo Jesús ehémplo, ikatu avei ne rembireko oservi Jehovápe.

15. ¿Mbaʼéichapa peteĩ kristiáno ikatu ohechauka hembirekópe ohayhuha chupe?

¹⁵ Jehová omanda menakuérape: “Peẽ menakuéra, pesegíkena pehayhu pene rembirekópe ha ani pendepochy ha pesapukái vaipa chupekuéra” (Col. 3:19). Peteĩ ména ohayhúva hembirekópe ohechauka hína omombaʼeha chupe. ¿Mbaʼérepa jaʼe upeichaha? Pórke haʼe ohendu la hembireko opensáva ha oikuaauka chupe iñimportanteha la heʼíva (1 Ped. 3:7). Ndaikatúiramo jepe siémpre ojapo la haʼe ojeruréva, ohendúramo hembirekópe katuete odesidi porãvéta (Prov. 15:22). Pe ména ohayhúva hembirekópe ndoikói oexihi ojerrespeta hag̃ua chupe. Upéva rangue oñehaʼã ogana pe rrespéto. Pe ména ohayhúramo hembireko ha ifamiliakuérape, entéronte ovyʼáta oservívo Jehovápe ha ohupytýta hikuái pe prémio, térã pe jeikove opaveʼỹva.

16, 17. ¿Mbaʼépa ikatu rejapo nandegustáiramo la nde tuakuéra heʼíva ndéve?

¹⁶ Oiméramo nde peteĩ mitãrusu térã mitãkuña, ikatu epensa nde tuakuéra nanentendeiha térã ijestriktoitereiha nendive. Upévare ikatu ndekuerái ha epensáma voi oimépa reservise gueteri Jehovápe. Péro rehejáramo Ñandejárape, moõve nderetopamoʼãi ótro nderayhuvéva nde tuakuéragui, ni umi ne amígogui oĩva kongregasiónpe.

¹⁷ Epensamína, nde tuakuéra núnka nandekorrehírirõ, ¿mbaʼéichapa reikuaáta oñeinteresaha nderehe? (Heb. 12:8). Haʼekuéra ningo ndahaʼéi perfékto, upévare ikatu nembopochy la ndekorrehi lája. Péro ani ejesareko upévarente, eñehaʼã guei entende mbaʼérepa heʼi térã ojapo umi mbaʼe nandegustáiva. Eñetrankilisánte vaʼerã ha eñehaʼãmbaite ani erreaksiona vai. Ñandejára Ñeʼẽ heʼi: “Pe kuimbaʼe iñarandúva oñatende la heʼívare, ha pe iñentendídova núnka ndaipochyreíri” (Prov. 17:27, TNM). Ejapo ikatúva guive neakãguapy hag̃ua, ha easepta umi konsého oñemeʼẽva ndéve. Nandegustáiramo jepe mbaʼéichapa oñemeʼẽ kuri ndéve peteĩ konsého, eñehaʼã eaprende chugui (Prov. 1:8). Ani nderesarái nde tuakuéra ohayhúramo Jehovápe, upéva haʼeha peteĩ rregálo iporãitereíva. Haʼekuéra ningo nepytyvõse rehupyty hag̃ua pe jeikove opaveʼỹva.

18. ¿Mbaʼérepa nde reñehaʼãmbaitéta rehupyty hag̃ua pe prémio?

¹⁸ Jajesareko vaʼerã pe prémio ijojahaʼỹva ñaneraʼarõvare, jarekóramo jepe esperánsa jaikove hag̃ua yvágape térã ko yvy ape ári. Umi mbaʼe ñaneraʼarõva ningo katuete oñekumplíta, pórke ko univérso Apohare la oprometéva. Haʼe heʼi: “Ko yvy henyhẽta Jehová enseñánsagui, pe mar henyhẽháicha ýgui” (Is. 11:9, TNM). Koʼẽrõitéma, entéro oikóva ko yvy ape ári oaprendéta Ñandejáragui. ¡Ajépa iporãitéta upéva! Jaikuaaháicha, ñande nañañehaʼãreíri hína. Upévare, siémprekena ñanemanduʼa Jehová promésare ha ñañehaʼãmbaite jahupyty pe prémio.