HETA tiémporema umi oservíva Jehovápe ojapo sakrifísio chupe g̃uarã. Por ehémplo, umi israelita osakrifikámi vaʼekue animál oikuaveʼẽ hag̃ua Ñandejárape. Upéicha avei, umi kristiánope ojekuaa vaʼekue yma guivéma heta ojesakrifika haguére ombotuicha hag̃ua Jehovápe. Péro oĩ ótro típo de sakrifísio Ñandejára oguerohorýva avei (Heb. 13:15, 16). Koʼã sakrifísio rupive haʼe ñanevendesi ha upévare javyʼa. Jahechamína unos kuánto ehémplo ohechaukáva upéva.

Oĩ vaʼekue peteĩ israelita iñeʼẽrendúva Ñandejárape hérava Ana. Haʼe ningo imembyseterei vaʼekue, péro ndaikatúi. Upévare, peteĩ ñemboʼe rupive heʼi Jehovápe la hyeguasúramo ha imemby peteĩ mitãkuimbaʼe, omeʼẽtaha chupe. Ana opromete Ñandejárape: “Oservíta nde rógape oikove aja” (1 Sam. 1:10, 11, TNM). Kon el tiémpo, Ana hyeguasu ha imemby peteĩ mitãkuimbaʼe ombohérava Samuel. Ko mitã oiko vaʼekue isýndi opoʼo peve, péro upéi Ana okumpli ipromésa ha oraha imembýpe pe tavernákulope. Jehová ovendesi Ánape ojapo haguére ko sakrifísio. Upévare, Samuel onase rire haʼe orekove kuri 5 mitã, ha Samuélgui katu oiko proféta ha oskrivi vaʼekue avei la Biblia (1 Sam. 2:21).

Koʼág̃a avei entéro kristiáno oreko pe priviléhio oipurúvo hekove oservi hag̃ua ijapoharépe, ojapo haguéicha Ana ha Samuel. ¿Mbaʼéichapa ikatu jajapo upéva? Ñañemeʼẽmbaitévo Jehová servísiope. Jesús opromete vaʼekue oñemeʼẽtaha hetaiterei vendisión umi ojapóvape tahaʼe haʼéva sakrifísio Jehová rehehápe (Mar. 10:28-30).

Síglo primérope oĩ vaʼekue peteĩ kristiána hérava Dorcas. Haʼe ningo imbaʼeporãiterei vaʼekue ha “oipytyvõ umi oikotevẽvape”. Upévare entéronte oikuaáva chupe ombyasyeterei ou haguére “hasy ha omano”. Upérõ, umi kristiáno ohendu Pedro oĩ hague upérupi, ha ojerure asy chupe pyaʼe ou hag̃ua hendapekuéra. Ñapensamíntena mbaʼeichaitépa oiméne ovyʼa hikuái Pedro omoingove jeýrõ guare Dórcaspe. Péva haʼe vaʼekue pe primera rresurreksión la Biblia omombeʼúva ojapo hague peteĩ apóstol (Hech. 9:36-41). Ñandejára ndahesarái umi sakrifísio Dorcas ojapo vaʼekuégui (Heb. 6:10). Haʼe ningo peteĩ ehémplo neporãva ñandéve g̃uarã pórke imbaʼeporãiterei vaʼekue, ha ojeskrivi la Bíbliape jasegi hag̃ua iñehémplo.

Apóstol Pablo omoĩ avei ñandéve peteĩ ehémplo iporãitereíva. Haʼe ningo nahakateʼỹiete vaʼekue itiémpore oipytyvõ hag̃ua iñermanokuérape. Oskrivírõ guare umi ermáno oikóvape Coríntope, heʼi: “Che ningo vyʼápe agastapaitéta aguerekóva ha añemeʼẽmbaitéta penderehehápe” (2 Cor. 12:15). Pablo ohechakuaa umi mbaʼe ohasávare, pe sakrifísio jajapóva ótro rehehápe ñanembovyʼaitereiha. Péro la iporãvéva, Jehová voi ñandeguerohory ha ñanevendesi jajapóramo upéva (Hech. 20:24, 35).

Jahechaháicha, Jehová oguerohory jaipurúramo ñane tiémpo ha ñane mbaretekue Irréino rehehápe, ha avei ñaipytyvõ hag̃ua ermanokuérape. Péro, ¿oĩpa avei ótra kósa ikatúva jajapo? ¡Si oĩ! Oiméramo jepe ñaipytyvõma hína ikatumiháicha ñande rapichápe, ikatu avei ñamombaʼeguasu Ñandejárape ñameʼẽvo chupe ñane kontrivusión. Umi kontrivusión ojepuru ojepredika hag̃ua opárupi, ha avei oñepytyvõ hag̃ua umi misionéro ha entéro umi ótro siérvo espesiál de tiémpo komplétope. Péicha, haʼekuéra osegi ojapo pe tembiapo iñimportantetéva. Umi kontrivusión rupive ikatu avei ojeprepara ha ojetradusi puvlikasionkuéra ha vidéo, oñepytyvõ umi lugár oikohápe desástre naturál ha oñemopuʼã umi Salón del Reino. La Biblia oasegura ñandéve pe imbaʼeporãva orresivitaha heta vendisión. Péro la iporãveha, ñameʼẽvo Jehovápe “umi mbaʼe iporãvéva” ñamombaʼeguasu hína chupe (Prov. 3:9; 22:9, TNM)