1, 2. a) ¿Mbaʼépa la ñamombaʼevéva ñande rekovépe? b) ¿Mbaʼe enseñánsa ñaaprendéva la Bíbliaguipa ñamombaʼeterei, ha mbaʼérepa? (Ehecha umi taʼanga oĩva iñepyrũme).

¿MBAʼÉPA la iñimportantevéva ñandéve g̃uarã? Entéro jaservíva Jehovápe ñamombaʼeve pe amista jarekóva hendive. Upéicha rupi ni mbaʼevéicharõ nañakambiamoʼãi upéva ótra kósare. Avei ñamombaʼeterei pe añetegua oĩva la Bíbliape, pórke umi mbaʼe ñaaprendéva ñanemoag̃ui Jehováre (Col. 1:9, 10).

² Jehová ningo ñane Mboʼehára Ijojahaʼỹva ñanemboʼéva heta mbaʼe iporãitereíva Iñeʼẽ rupive. Haʼe heʼi iñimportanteha jaikuaa héra ha omombeʼu ñandéve umi kualida porãite orekóva. Heʼi avei ñandéve ñanderayhuetereiha ha upévare oĩ hague dispuésto omeʼẽvo Itaʼýra ohayhuetéva rekove ñanderehehápe. Jehová oñeʼẽ avei ñandéve pe Rréino Mesiánikore, ha ohechauka mbaʼépa ikatu ñahaʼarõ amo gotyove. Por ehémplo, omombeʼu entéro kristiáno unhído orekoha esperánsa ohóvo yvágape, ha umi “ambue ovechakuéra” katu opytataha peteĩ paraísope ko yvy ape ári (Juan 10:16). Jehová ñanemboʼe mbaʼéichapa jaiko vaʼerã.  Ñamombaʼeterei la ñaaprendéva pórke ñanepytyvõ ñañemoag̃ui hag̃ua ñande Apohare rehe ha isentído hag̃ua ñande rekove.

3. ¿Ojerurépa pláta Jehová ikatu hag̃uáicha ñaaprende pe añetegua?

³ Jehová ningo ipojeraiterei, upéicha rupi omeʼẽ Itaʼýrape jepe omano hag̃ua ñanderehehápe. Avei, haʼe ohecha jave peteĩ persóna ohekaha pe añetegua, oipytyvõ chupe ojuhu hag̃ua. Péro arakaʼeve haʼe ndojeruréiva pláta ikatu hag̃uáicha ñaaprende pe añetegua. Peteĩ vuéltape, peteĩ karai hérava Simón oikuaveʼẽ pláta apóstol Pédrope pórke orekose avei pe autorida omeʼẽ hag̃ua espíritu sánto ótrope. Pedro katu oexplika chupe naiporãiha la ojapóva heʼívo: “Toñehundi nendive nde pláta, repensa rupi ikatuha rejogua pe rregálo oúva Ñandejáragui” (Hech. 8:18-20). Upéicharõ, ¿mbaʼépa heʼise ‘jajoguaha pe añetegua’?

4. ¿Mbaʼépa ñaaprendéta pe añeteguágui ko artíkulope?

⁴ (Elee Proverbios 23:23). Ñañehaʼã vaʼerã ñaaprende pe añetegua oĩva la Bíbliape. Tekotevẽ jajapo tahaʼe haʼéva sakrifísio pe añetegua rehehápe. Avei, ‘jajogua’ rire pe añetegua térã ñaaprende rire upéva, ñañatende vaʼerã ani arakaʼeve jaju ‘ñavende’ jey térã jaheja rei. Upéicharõ, ¿mbaʼéichapa jajogua pe añetegua oĩva la Bíbliape? ¿Mboýpa ovale umi mbaʼe jarresivíva? Ñambohováiramo koʼã porandu ñanepytyvõta ñamombaʼeve hag̃ua pe añetegua, ha ñaĩve hag̃ua desidído ndajahejamoʼãiha arakaʼeve. Péicha ñantendéta mbaʼérepa pe añetegua oúva Jehovágui ovaleve opa mbaʼe ikatúvagui japaga.

5, 6. a) ¿Mbaʼépa heʼise ‘jajoguaha pe añetegua’ gratiete? Emoĩ peteĩ ehémplo. b) ¿Mbaʼéichapa ñanepytyvõ pe añetegua?

⁵ Jaʼéramo peteĩ mbaʼe haʼeha grátis, ndeʼiséi ndajajapói vaʼerãha mbaʼeve ñakonsegi hag̃ua. Pe palávra hebrea oĩva Proverbios 23:23-pe ha ojetradusíva “ejogua”, heʼise avei “ñakonsegi”. Koʼã palávra ohechauka peteĩ persóna oñehaʼã vaʼerãha, térã tekotevẽha omboyke algúna kósa oreko hag̃ua peteĩ mbaʼe ovalevéva. Ñantende porã hag̃ua mbaʼéichapa ikatu jajogua pe añetegua, ñapensami peteĩ supermerkádo omeʼẽvare grátis pakova. ¿Mbaʼépa jajapo vaʼerã ikatu hag̃uáicha jareko umi pakova ñande rógape? Jaha vaʼerã pe supermerkádope jagueru hag̃ua upégui. Ndajapagamoʼãiramo jepe hese, jajapómante vaʼerã peteĩ sakrifisioʼimi jagueru hag̃ua. Upéicha avei, natekotevẽi japaga ñaaprende hag̃ua pe añetegua, péro ñañehaʼãmante vaʼerã jahupyty hag̃ua.

⁶ (Elee Isaías 55:1-3). Ko téxto rupive, Jehová ñanepytyvõ ñantende hag̃ua mbaʼépa heʼise “ejogua pe añetegua”. Koʼã versíkulope, Jehová ombojoja pe añetegua y, kamby ha vínore. Pe y roʼysã ombopiroʼyháicha peteĩ persóna ijuhéivape, pe añetegua ñanembopiroʼy avei. Pe kamby oipytyvõháicha peteĩ mitãme okakuaa ha imbarete hag̃ua, la Biblia heʼíva ñanepytyvõ ñamombarete hag̃ua ñane amista Jehovándi. Péro Jehová ombojoja avei Iñeʼẽ pe vínore. ¿Mbaʼérepa? La Biblia ningo heʼi pe víno ombovyʼaha umi héntepe (Sal. 104:15). Upévare, Jehová heʼi jave ‘jagueraha’ hag̃ua víno gratiete, ohechauka hína jasegíramo ikonsého javyʼataha (Sal. 19:8). Jehová oipuru koʼã ehémplo ñantende hag̃ua mbaʼeichaitépa ideprovécho ñandéve ñaaprende ha jajapo la Biblia heʼíva. Koʼág̃a jahechami 5 fórma ikatuháicha jajogua pe añetegua.

7, 8. a) ¿Mbaʼérepa tekotevẽ ñañemotiémpo jajogua hag̃ua pe añetegua? b) ¿Mbaʼe sakrifísiopa ojapo vaʼekue peteĩ kuñataĩ, ha mbaʼépa ohupyty upe haguére?

⁷ Tiémpo. Ñaikotevẽ tiémpo ikatu hag̃uáicha  ñahendu pe marandu porã, jalee la Biblia ha umi puvlikasión bíblica, jastudia peteĩ testígo de Jehovándi, jajapo hag̃ua ñande estúdio personál, ñaanalisa hag̃ua umi mbaʼe oñehesaʼỹijótava rreunionhápe ha ñaime hag̃ua upépe. Ikatu hag̃uáicha jajapo koʼã mbaʼe tekotevẽ ñanohẽ tiémpo umi mbaʼe menove iñimportántevagui (elee Efesios 5:15, 16 ha pe nóta). ¿Mboy tiémpopa ñaikotevẽ ñaaprende hag̃ua umi enseñánsa bíblica iñimportantetéva? Upéva odependéma káda persónare ha isituasiónre. Péro ndaikatúi voi jaikuaapa Jehová arandu, ikonsehokuéra ha entéro mbaʼe ojapóva (Rom. 11:33). Pe primera rrevísta Ñemañaha okompara vaʼekue pe añetegua “peteĩ yvotyʼi kaʼaguýre”, ha heʼi: “Nañañekontentái vaʼerã peteĩ yvotyʼírente, pórke ndahaʼéi peteĩnte la oĩva síno heta. Péicha avei nañañekontentái vaʼerã jaikuaa haguére peteĩ mbaʼénte, síno jasegi vaʼerã jaheka pe añetegua”. Upévare iporã ñañeporandu: “¿Mboy mbaʼémapa aaprende Jehovágui?”. Jaiko vove opa árare, siémpre oĩta hetave mbaʼe ikatútava ñaaprende chugui. Upéicharõ jepe, iñimportánte koʼág̃ama voi jaipuru pe tiémpo jarekóva ñaaprende hag̃ua ikatúva guive. Jahechamína mbaʼéichapa peteĩ ermána ojapo kuri upéva.

⁸ Mayumi * ningo peteĩ kuñataĩ Japongua ova vaʼekue Nueva Yórkpe ostudia hag̃ua peteĩ profesión. Peteĩ vuéltape peteĩ prekursóra opredika chupe hógape. Upérõ Mayumi orekóma vaʼekue voi irrelihión, péro lomímonte oñepyrũ ostudia la Biblia upe ermánandi. Haʼe omombaʼeterei la oaprendéva, upévare oporandu ndaikatuichénepa ostudia 2 vése por semána. Mayumi ningo naitiempoguasúi pórke ostudia ha ombaʼapo médio día, upéicharõ jepe pyaʼe voi oñepyrũ oho rreunionhápe. Avei, saʼive oipuru itiémpo ojerrekrea hag̃ua pórke oaprendeseve Jehovágui. Péro ojesakrifika rupi oñemoag̃uive ohóvo Jehováre, ha 1 áño mboyve ojevautisáma. Seis mése rire, áño 2006-pe, oñepyrũ oservi kómo prekursóra ha koʼag̃aite peve osegi gueteri ojapo upéva.

9, 10. a) ¿Mbaʼéichapa okambia la ñapensáva umi mbaʼerepýre jaikuaávo pe añetegua? b) ¿Mbaʼépa omboyke kuri peteĩ mitãkuña, ha mbaʼéichapa oñeñandu ojapo rire upéva?

⁹ Umi mbaʼerepy. Ñaaprende hag̃ua pe añetegua, ikatu oime ñamboyke vaʼerã peteĩ traváho térã peteĩ profesión ñagana porãhápe. Por ehémplo, Pedro ha Andrés haʼe vaʼekue peskadór, ha Jesús oinvitárõ guare chupekuéra omoirũ hag̃ua chupe “oheja hikuái irréd ha oho hendive” (Mat. 4:18-20). Péro upéva ndeʼiséi ñaaprendéramo pe añetegua tekotevẽtaha jaheja ñande traváho. Peteĩ persóna ningo ombaʼapo ha oñangareko vaʼerã ifamíliare (1 Tim. 5:8). Upéicharõ jepe, jaikuaávo pe añetegua ñakambiáma ñapensa lája umi mbaʼerepýre. Jahechakuaáma mbaʼépa añetehápe la iñimportánteva. Jesús heʼi vaʼekue: “Anive pembyaty mbaʼerepy ko yvy ape ári”. Upéva rangue, haʼe ñanemokyreʼỹ heʼívo: “Pembyaty mbaʼerepy yvágape” (Mat. 6:19, 20). Upéva ojapo kuri peteĩ mitãkuña hérava María.

¹⁰ María oñepyrũ vaʼekue opraktika golf imitãkuñaʼi guive. Oĩrõ guare koléhiope ja ivaléma voi upe depórtepe. Upévare oñemeʼẽ chupe peteĩ véka oho hag̃ua universidápe. Haʼe oipota vaʼekue oiko chugui peteĩ golfísta profesionál ogana hag̃ua heta pláta, upéva la iñimportantevéva kuri chupe g̃uarã. Upéi María oñepyrũ ostudia la Biblia, ha omombaʼeterei rupi la oaprendéva oñehaʼã osegi umi konsého. Haʼe heʼi: “Amáske la Biblia chepytyvõ akambia hag̃ua che kondúkta ha aiko lája, avyʼave ahávo”. María ohechakuaa ndaikatumoʼãiha omotenonde Jehovápe ha avei pe depórte opraktikáva (Mat. 6:24). Upémarõ odesidi  omboykénte umi mbaʼe ojapóva oiko hag̃ua chugui peteĩ golfísta profesionál, ha upéva rangue oñehaʼã ohupyty peteĩ mbaʼe iporãitevéva. Koʼág̃a María ojapo iprekursorádo ha heʼi: “¡Ndaipóri ótra kósa chembovyʼave vaʼerã!”.

11. ¿Mbaʼépa ikatu oiko ñaaprendévo pe añetegua?

¹¹ Ñane hénte ha ñane amigokuéra. Ñañepyrũ jave jajapo la Biblia heʼíva, ikatu jaju ndajajeheʼavéi yma guaréicha ñane amígo ha ñane hentekuérare. Jesús oñemboʼérõ guare idisipulokuérare ohechauka vaʼekue mbaʼéicha rupípa oiko upéva. Haʼe heʼi vaʼekue Jehovápe: “Emomarangatu chupekuéra pe añetegua rupive, ne ñeʼẽ hína pe añetegua” (Juan 17:17). Pe palávra “emomarangatu” heʼise ñamoĩha apárte peteĩ mbaʼe. Upéicha rupi, jajapo jave la Biblia heʼíva jajeaparta térã jajesepara ko múndogui pórke jajegia umi konséhore heta hénte ndoraháiva enkuénta. Ñañehaʼãramo jepe jajogueraha porã ñane amígo ha ñane hentekuérandi, ikatu haʼekuéra voi oñemomombyry ñandehegui térã oñemoĩ umi mbaʼe jagueroviávare. Péro koʼã mbaʼe ningo nañanesorprendéi. Jesús heʼi vaʼekue: “Añetehápe, pende rogaygua voi haʼéta pene enemígo” (Mat. 10:36). Upéicharõ jepe, Jesús opromete avei tahaʼe haʼéva umi mbaʼe jahejáva pe añetegua rehehápe, jarresivitaha hetaitereive mbaʼe umi jaheja vaʼekuégui (elee Marcos 10:28-30).

12. ¿Mbaʼépa oĩ vaʼekue dispuésto omboykévo peteĩ judío pe añetegua rehehápe?

¹² Imitã guive, peteĩ empresário judío hérava Aarón oguerovia vaʼekue oĩ vaiha ñapronunsia Ñandejára réra. Péro haʼe oikuaaseterei pe añetegua oúva Ñandejáragui. Peteĩ vuéltape, peteĩ testígo de Jehová ohechauka chupe oñemoĩramo unos kuánto vokál umi 4 konsonánte hebréondi orekóva Ñandejára réra, ikatuha oñepronunsia “Jehová”. Aarón ovyʼaiterei oikuaa rire upéva, ha oho pe sinagógape omombeʼu hag̃ua umi rravínope la oaprendéva. Haʼe opensa ovyʼataha hikuái oikuaávo koʼã mbaʼe Ñandejára réragui, péro ndoikói upéicha. Upéva rangue, haʼekuéra ondyvu hese ha omosẽ chupe. Ihentekuérape avei ndogustaiete la Aarón ojapóva. Péro haʼe ndohejái koʼã mbaʼe ojoko chupe, oñehaʼã guei oikuaave Jehovápe. Aarón ojevautisa ha oservi fiélmente Jehovápe hekove pukukue. Jahechaháicha, jaiko hag̃ua pe añetegua rapére, sapyʼánte okambia heta mbaʼe ñane hénte térã ñane amigokuérandi. Upévare Aarónre oiko haguéicha, ñaĩ vaʼerã dispuésto ñambohováivo umi kámbio ikatúva oñepresenta.

13, 14. ¿Mbaʼeichagua kámbiopa sapyʼánte jajapo vaʼerã ñapensa ha jaiko lájape jaikuaa rire pe añetegua? Emoĩ peteĩ ehémplo.

¹³ Umi mbaʼe vai ñapensáva ha jajapóva. Ñaaprendeséramo pe añetegua ha jaikosérõ la Biblia heʼiháicha, ñakambia vaʼerã ñapensa ha jaiko lája. Apóstol Pedro oskrivi vaʼekue: “Umi mitã iñeʼẽrendúvaicha, anive pejapo umi mbaʼe pejapose vaʼekue yma ndapeikuaáirõ guare Ñandejárape. Upéva rangue, penemarangatu vaʼerã opa mbaʼe pejapóvape” (1 Ped. 1:14, 15). Por ehémplo, Coríntope umi hénte hekovai vaʼekue. Upévare umi oaseptáva pe añetegua tekotevẽ kuri ojapo heta kámbio (1 Cor. 6:9-11). Koʼág̃a avei heta hénte ojapo umichagua kámbio oaprende rire pe añetegua. Pedro oñeʼẽ vaʼekue upévare heʼírõ guare: “Yma peẽ peipuru hetaiterei tiémpo pejapo hag̃ua umi hénte ko mundopegua rembipota. Upérõ penerembiapo vai petĩʼỹre, pejapose tarovaite ivaíva, pemokõrasa, pefarrea itarovávaicha, pejapo fiésta pekaʼu hag̃ua ha pejapo heta mbaʼe ivaietereíva pemombaʼeguasu hag̃ua taʼangakuéra” (1 Ped. 4:3).

 ¹⁴ Devynn ha Jasmine ningo ikaʼu vaʼekue heta tiémpore. Devynn haʼe vaʼekue peteĩ kontadór katupyry, péro ndahiʼaréi moõve itraváhope hoʼueterei rupi vevída. Jasmínepe katu entéronte oikuaa ijarhél ha iviolénta haguére. Peteĩ jey, haʼe okaʼu jeýma hína kuri, ha ojotopa kállepe peteĩ matrimóniondi oservíva kómo misionéro. Koʼã ermáno oñekuaveʼẽ oho hag̃ua hógape pe sigiénte semánape ostudia hag̃ua la Biblia hendive. Haʼekuéra okumpli la heʼi vaʼekue, péro oho otopa mokõivévape tuichaite kaʼúre. Jasmine ha Devynn ningo nohaʼarõiete kuri ou hikuái, pórke noimoʼãi oñeinteresataha hesekuéra. Ótro ovisita jeýpe chupekuéra katu okambiaitéma la situasión. Ko paréha ostudiasetereíma voi la Biblia ha pyaʼe osegi umi konsého bíblico. Upévare ndohasái ni 3 mése haʼekuéra ohejaitéma hag̃ua pe vevída, ha tiémpo riremi omenda avei hikuái. Umi hénte ohechakuaa mbaʼeichaitépa Jasmine ha Devynn okambia, ha upévare heta persóna oñepyrũ avei ostudia la Biblia.

15. ¿Mbaʼépa sapyʼánte ijetuʼueterei jepi jaheja hag̃ua pe añetegua rehehápe, ha mbaʼérepa?

¹⁵ Umi kostúmbre ha práktika ndogustáiva Ñandejárape. Oĩ umi oaprendéva pe añetegua ha ndaijetuʼúi chupekuéra oheja hag̃ua umi kostúmbre ha práktika ndogustáiva Ñandejárape. Péro ótrope katu ijetuʼueterei, jepe oikuaáma ohóvo pe añetegua. Péicha jave, koʼã persónape oipyʼapy mbaʼépa opensáta hogayguakuéra, ikompañéro de traváho ha iñamigokuéra. Ha oimérõ ihentekuéra ojepokuaa omombaʼe umi ipariénte omano vaʼekuépe katu, ijetuʼuvéntema la situasión (Deut. 14:1). ¿Mbaʼépa ñanepytyvõta ñamboyke hag̃ua umi mbaʼe ombojeguarúva Ñandejárape? Umi persóna ipyʼaguasúva ehémplo jatopáva la Bíbliape ikatu ñanepytyvõ ñakambia hag̃ua tekotevẽhápe. Jahechamína la ojapóva umi oiko vaʼekue Éfesope síglo primérope.

16. ¿Mbaʼe sakrifísiopa oĩ vaʼekue dispuésto ojapóvo heta persóna oikóva Éfesope?

¹⁶ Pe siuda yma guare héravape Éfeso heta hénte opraktika vaʼekue espiritísmo. Upéi oĩ oikuaáva pe añetegua. ¿Mbaʼépa ojapo hikuái oiko rire chuguikuéra kristiáno? La Biblia heʼi: “Heta umi ojapóva máhia ogueru ilivrokuéra, ombyaty ha ohapy opavave renondépe. Ha okalkulávo hikuái mboýpa ovale, otopa ohupytyha cincuenta mil monéda de pláta. Péicha Jehová Ñeʼẽ tuicha puʼaka reheve okakuaa ha imbareteve ohóvo” (Hech. 19:19, 20). Umi kristiáno ifiélva oĩ kuri dispuésto ohundívo umi lívro hepyetéva, péro Jehová tuicha ovendesi chupekuéra.

17. a) ¿Mbaʼe mbaʼépa tekotevẽ vaʼekue ñamboyke pe añetegua rehehápe? b) ¿Mbaʼépa jahecháta pe artíkulo oúvape?

¹⁷ ¿Mbaʼépa nde resakrifika pe añetegua rehehápe? Enterovéva jaipuru ñane tiémpo ñaaprende hag̃ua pe añetegua. Oĩ unos kuánto ñande apytépe omboyke vaʼekue umi oportunida oñepresentáva chupekuéra ipláta heta hag̃ua. Avei, oĩ umi ohecháva ndaikatuveimaha ojeheʼa ymave guaréicha ihénte térã iñamigokuérare. Heta ñande apytépe ñakambia vaʼerã kuri ñapensa ha jaiko lája. Tekotevẽ kuri avei ñamboyke heta kostúmbre ha práktika ombojeguarúva Jehovápe. Péro ñaime konvensído pe añetegua ñaaprendéva la Bíbliagui ovaleveha oimeraẽ mbaʼe tekotevẽvagui jaheja. Pe añetegua rupive jareko ñane amigoitéramo Jehovápe, ha upéva hína la iñimportantevéva ikatúva jahupyty. Ñapensa jave entéro umi vendisión jarresivívare, ndaikatúi ñantende mbaʼérepa oĩne persóna ‘ovendeséva’ pe añetegua. ¿Mbaʼéichapa ikatu oiko upéva? ¿Ha mbaʼépa ñanepytyvõta ani hag̃ua arakaʼeve jaju péicha jafalla vaiete? Koʼã porandu ñambohováita pe artíkulo oúvape.