1. ¿Mbaʼépa Jehová oheja ñandéve jajapo?

JEHOVÁ oheja ñandéve jadesidi mbaʼéichapa jaikóta. Haʼe ñanemboʼe mbaʼéichapa jadesidi vaʼerã, ha umi mbaʼe jadesidíva ombovyʼárõ chupe, haʼe ñanepytyvõ osẽ porã hag̃ua ñandéve umíva (Sal. 119:173). Upévare, amáske ñamoĩ en práktika umi konsého porãite oĩva la Bíbliape, koʼýte jadesidi porãve (Heb. 5:14).

2. ¿Mbaʼépa ikatu ijetuʼu ñandéve jadesidi rire peteĩ mbaʼe?

² Jadesidi porãramo jepe, ikatu oime ijetuʼu ñandéve ñakompleta hag̃ua pe jadesidi vaʼekue jajapo. Jahechamína unos kuánto ehémplo. Peteĩ mitãrusu odesidi oleetaha la Biblia kompletoite. Unas kuánta semána aja oho porãiterei hese, péro upéi ndoleevéi. Peteĩ ermána odesidi oñepyrũtaha iprekursorádo rregulár, péro ombohasa ha ombohasa pe fécha ha núnka noñepyrũi. Peteĩ kuérpo de ansiáno odesidíma ojapovetaha visíta de pastoréo umi ermanokuérape, péro ohasáma heta mése ha ndojevisitái gueteri avavetépe. Koʼã situasión ningo idiferénte péro ojojogua peteĩ mbaʼépe: Ojedesidi peteĩ mbaʼe, péro noñemohuʼãi. Umi kristiáno ypykue Coríntope guare oreko vaʼekue peichagua provléma. Jahechamína mbaʼépa ikatu ñaaprende chuguikuéra.

3. ¿Mbaʼépa odesidi ojapo umi Corintogua, péro mbaʼépa oiko?

³ Pe áño 55 rupi d. C., umi kristiáno Corintogua odesidi peteĩ mbaʼe iñimportantetereíva. Haʼekuéra oñentera iñermanokuéra Jerusalén ha Judeagua ohasaha heta nesesida, ha oĩha kongregasión ombyatýva pláta oipytyvõ hag̃ua chupekuéra. Imbaʼeporã ha ipojera rupi, umi Corintogua odesidi ombyatytaha avei pláta okontrivui hag̃ua, ha oporandu Páblope mbaʼéichapa ikatu ojapo.  Haʼe heʼi chupekuéra mbaʼéichapa ojapo vaʼerã, ha oiporavo Títope oipytyvõ hag̃ua chupekuéra ombyaty hag̃ua pe kontrivusión (1 Cor. 16:1; 2 Cor. 8:6). Upéicharõ jepe, unos kuánto mése rire Pablo oikuaa haʼekuéra nombyatýi hague gueteri mbaʼeve. Upéicha rupi, provávlemente haʼekuéra ndorekomoʼãi gueteri preparádo ikontrivusión ág̃a oñemondo vove Jerusalénpe pe pláta ombyaty vaʼekue umi ótra kongregasión (2 Cor. 9:4, 5).

4. Heʼiháicha 2 Corintios 8:7, 10, 11, ¿mbaʼépa heʼi Pablo umi Corintoguápe ojapo hag̃ua?

⁴ Umi Corintogua ningo odesidi kuri peteĩ mbaʼe iporãitereíva, ha Pablo oguerohory chupekuéra ijerovia mbarete ha ipojerase rupi hikuái. Péro heʼímante avei chupekuéra oñehaʼã hag̃ua otermina upe omoñepyrũ vaʼekue (elee 2 Corintios 8:7, 10, 11). Upe oiko vaʼekue hesekuéra ñanemboʼe umi kristiáno ifiélvape sapyʼánte ijetuʼuha avei okumpli upe odesidi vaʼekue.

5. ¿Mbaʼe pregúntapa ñambohováita?

⁵ Oiko haguéicha umi Corintoguáre, ikatu ijetuʼu hína ñandéve jajapo umi mbaʼe jadesidi vaʼekue. ¿Mbaʼérepa? Pórke ñaneimperfékto rupi ñambotapykue jepi umi mbaʼe. Avei sapyʼánte oiko umi mbaʼe ñahaʼarõʼỹva, ha upévare ndaikatúi jajapo umi mbaʼe jadesidi vaʼekue (Ecl. 9:11; Rom. 7:18). Ko artíkulope ñambohováita koʼã pregúnta: ¿Mbaʼéichapa ikatu jadesidi porã? ¿Mbaʼéichapa ikatu japilla tekotevẽpa ñakambia peteĩ mbaʼe jadesidíma vaʼekue? ¿Ha mbaʼépa ñanepytyvõta ñakompleta hag̃ua pe ñañepyrũma vaʼekue?

6. ¿Mbaʼéicha javépa tekotevẽta ñakambia pe jadesidi vaʼekue?

⁶ Oĩ umi mbaʼe iñimportantetereíva jadesidi vaʼekue nañakambiamoʼãiva núnka. Por ehémplo, ñande ndajahejaséi ñande servísio ñameʼẽva Jehovápe, ha avei ñaime desidído ñandefieltaha ñane ména térã ñane rembirekópe (Mat. 16:24; 19:6). Péro ikatu avei oĩ umi mbaʼe jadesidi vaʼekue tekotevẽva ñakambia. ¿Mbaʼérepa? Pórke pe situasión ikatu hína okambia. ¿Mbaʼépa ñanepytyvõta jadesidi porã hag̃ua?

7. ¿Mbaʼépa jajerure vaʼerã Jehovápe, ha mbaʼérepa?

⁷ Jajerure Jehovápe tañanemoarandu. Jehová ningo oskrivika Santiágope ko mbaʼe: “Oĩramo pende apytépe oikotevẽva arandu, ojerure meme vaʼerã [...]. Pórke Ñandejára ipojera omeʼẽ hag̃ua upéva enterovépe” (Sant. 1:5). Oĩ situasión enterovéva ‘ñaikotevẽhápe arandu’. Upévare, jajeroviákena Jehováre jadesidi jave peteĩ mbaʼe térã tekotevẽ jave ñakambia peteĩ mbaʼe jadesidíma vaʼekue. Ha péicha Jehová ñanepytyvõta jadesidi porã hag̃ua.

8. ¿Mbaʼéichapa ñainvestiga vaʼerã jadesidi mboyve peteĩ mbaʼe?

⁸ Ñainvestiga porã vaʼerã. Upearã jastudia vaʼerã Ñandejára Ñeʼẽ, jalee umi puvlikasión oúva Jehová organisasióngui ha ñañeʼẽ umi persóna ikatúvandi ñaneakonseha porã (Prov. 20:18). Iñimportánte jajapo koʼã mbaʼe jadesidi mboyve ñakambiátapa ñande traváho, javátapa ótro lugárpe, térã mbaʼépa jastudiáta ikatu hag̃uáicha ñañemantene ha jasegi jaservi Jehovápe.

9. ¿Mbaʼérepa ideprovécho ñanesinséro ñandejupe voi?

⁹ Ñapensa vaʼerã mbaʼérepa jadesidi peteĩ mbaʼe. Jehovápe g̃uarã ningo iñimportánte mbaʼérepa jadesidi jajapo peteĩ mbaʼe (Prov. 16:2). Haʼe oipota ñaneonrrádo opa mbaʼépe. Upévare jadesidi jave peteĩ mbaʼe ñanesinséro vaʼerã ótrondi ha ñandejupe voi. Oiméramo nañandesinseropái ijetuʼuvéta ñandéve jajapo hag̃ua umi mbaʼe jaʼe vaʼekue jajapotaha. Por ehémplo, ñamoĩ chupe peteĩ mitãrusu odesidi ojapotaha iprekursorádo rregulár, péro ohasa rire peteĩ tiémpo ijetuʼúma chupe okompleta hag̃ua hiʼóra ha ndovyʼavéima iservísiope. Ikatu oime opensa raʼe ojapoha iprekursorádo ombovyʼa hag̃ua Jehovápe. Péro, ¿noiméipa  añetehápe haʼe ojapo raʼe upéva ombovyʼa hag̃uánte ituakuérape térã ótra persónape?

10. ¿Mbaʼépa ñaikotevẽ ñakambia hag̃ua?

¹⁰ Jahechamína ótra situasión. Peteĩ persóna ostudiáva la Biblia odesidi ndopitamoʼãveimaha. Haʼe oñehaʼãmbaite ha 1 térã 2 semánare ndopitavéi, péro upéi opita jey. Upéicharõ jepe, haʼe osegi oñehaʼã ha amo ipahápe ndopitavéi. Haʼe ohayhu Jehovápe ha ombovyʼase chupe, ha upéva oipytyvõ chupe ipuʼaka hag̃ua ivísiore (Col. 1:10; 3:23).

11. ¿Mbaʼérepa jaikuaa porã vaʼerã mbaʼépa jahupytyse?

¹¹ Jaikuaa porã vaʼerã mbaʼépa jahupytyse. Upéva ñanepytyvõta ñakompleta hag̃ua pe ñañepyrũ vaʼekue. Por ehémplo, oiméramo jadesidi raʼe jaleetaha la Biblia káda día, péro ndajakalkulái mboýpa jaleéta, ikatu hína nosẽi ñandéve. * Ótro ehémplo: Umi ansiáno peteĩ kongregasionpegua odesidi ovisitataha ermanokuérape pyʼỹive, péro ohasa la tiémpo ha ndojapói hikuái upéva. Peteĩ mbaʼe oipytyvõtava chupekuéra hína oñeporandúramo koʼã mbaʼe: “¿Roanotámapa máva mávapa hína umi ermáno tekotevẽva rovisita? ¿Rohechámapa mbaʼe día ha mbaʼe oraitépa rovisitáta chupekuéra?”.

12. ¿Mbaʼépa sapyʼánte tekotevẽ jajapo, ha mbaʼérepa?

¹² Jahechakuaa vaʼerã mboýpa ikatu jajapo. Avave ningo ndorekói pe tiémpo, pláta ha fuérsa ojapo hag̃ua entéro mbaʼe ojaposéva. Upévare jahechakuaa vaʼerã mboýpa añetehápe ikatu jajapo ha ani ñañemohatã peteĩ idéape. Sapyʼánte tekotevẽta voi ñakambia peteĩ mbaʼe jadesidi vaʼekue jahechakuaágui ndaikatumoʼãiha ñakumpli (Ecl. 3:6). Péro ñamoĩ chupe jajepyʼamongeta hague pe jadesidi vaʼekuére, jajapo umi kámbio tekotevẽva ha jahechakuaa ikatutaha ñakumpli, ¿mbaʼépa ñanepytyvõta ñakompleta hag̃ua pe ñañepyrũ vaʼekue? Jahecháta 5 kósa ikatúva jajapo.

13. ¿Mbaʼépa ikatu ñanemombarete jajapo hag̃ua pe jadesidi vaʼekue?

¹³ Ñañemboʼe ha jajerure Ñandejárape tañanemombarete. Jehová ningo ikatu omeʼẽ ñandéve ‘pe podér jajapo hag̃ua’ upe jadesidi vaʼekue (Filip. 2:13). Upévare jajerure vaʼerã Jehovápe ijespíritu sánto ikatu hag̃uáicha jareko pe fuérsa ñaikotevẽva. Jasegi vaʼerã ñañemboʼe haʼetéramo jepe noñembohováiva ñandéve ensegída ñane ñemboʼe. Jesús heʼi vaʼekue voi: “Pesegi pejerure [espíritu sánto] ha oñemeʼẽta peẽme” (Luc. 11:9, 13).

14. ¿Mbaʼéichapa pe konsého oĩva Proverbios 21:5-pe ñanepytyvõ ñamohuʼã hag̃ua upe jajaposéva?

¹⁴ Ñaplanea porã vaʼerã mbaʼépa jajapóta (elee Proverbios 21:5). Ñamohuʼã hag̃ua peteĩ mbaʼe jajaposéva, ñaplaneámante vaʼerã mbaʼéichapa jajapóta ha jasegi upéva oĩhaichaite. Upéicha avei, jadesidi jave peteĩ mbaʼe, ñaanota vaʼerã uno a uno umi mbaʼe jajapótava ikatu hag̃uáicha ñamohuʼã upéva. Jadividíramo umi mbaʼe tuichavéva ikatu hína ifasilve ñandéve jahecha mboýmapa jajapo. Apóstol Pablo omokyreʼỹ vaʼekue umi Corintoguápe oaparta hag̃ua pe pláta omeʼẽséva kontrivusiónramo “káda semána pe primer díape”, ohaʼarõ rangue hikuái ombyaty hag̃ua ág̃a haʼe ou vove (1 Cor. 16:2). Jadividíramo umi mbaʼe tuicháva jajaposéva ñanepytyvõ avei pono jajepyʼapyeterei ha ñañandu ndaikatumoʼãiha ñakompleta.

15. ¿Mbaʼépa ikatu ñanepytyvõ ñakumpli hag̃ua upe jajaposéva?

¹⁵ Ñaanota vaʼerã mbaʼépa jajapose, pórke upéva ñanepytyvõ ñakumpli hag̃ua upe jajaposéva (1 Cor. 14:40). Por ehémplo, umi kuérpo de ansiánope ojeʼe oiporavo hag̃ua peteĩ ansiánope oanota hag̃ua umi mbaʼe odesidíva,  mávapa ojapóta ha arakaʼérupipa ojejapopa vaʼerã. Umi ansiáno osegívape koʼã instruksión ifasilve ojapo umi mbaʼe ojedesidi vaʼekue (1 Cor. 9:26). Ñande ikatu avei jajapo upéicha. Por ehémplo, ikatu jajapo peteĩ lísta ha ñamoĩ pype umi mbaʼe jajapo vaʼerã káda día, ha ñamohenda asegún umi mbaʼe primeroite jajapo vaʼerã. Péicha ifasilvéta ñandéve ñakompleta hag̃ua pe ñañepyrũ vaʼekue, ha sapyʼaitépe jajapovéta hetave mbaʼe.

16. Ohechaukaháicha Romanos 12:11, ¿mbaʼépa tekotevẽterei jajapo ñamohuʼã hag̃ua pe ñañepyrũ vaʼekue?

¹⁶ Ñañehaʼãmbaite vaʼerã. Jajaposéramo pe ñaplanea haguéicha ha ñamohuʼã pe ñañepyrũ vaʼekue ñañehaʼãmante vaʼerã (elee Romanos 12:11). Apóstol Pablo heʼi vaʼekue Timotéope ‘oñehaʼã meme’ hag̃ua oporomboʼe porãve, ha heʼi avei chupe ‘osegi hag̃ua ojapo’ upéva. Ko konsého ideprovécho entéro mbaʼe jahupytysévape g̃uarã (1 Tim. 4:13, 16).

17. ¿Mbaʼéichapa Efesios 5:15, 16 ñanepytyvõ ñakumpli hag̃ua upe jadesidi vaʼekue?

¹⁷ Jaipuru porã ñane tiémpo (elee Efesios 5:15, 16). Ñamoĩ vaʼerã peteĩ óra jajapo hag̃ua pe jadesidi vaʼekue ha ani ñakambia. Ani ñahaʼãrõ entéro mbaʼe oñemohendapa raẽ ñandéve, pórke provávlemente upéva arakaʼeve ndoikomoʼãi (Ecl. 11:4). Ani jaheja umi mbaʼe naiñimportanteguasúiva hoʼupa ñandehegui ñane tiémpo, ha upe rire nañanetiempovéima térã ñanekaneʼõma jajapo hag̃ua umi mbaʼe iñimportantevéva (Filip. 1:10). Ijáramo ñandéve ñamboyke vaʼerã peteĩ tiémpo avave nañanemolestamoʼãihápe. Jaavisa vaʼerã ótrope ñaikotevẽha upe moménto ñañekonsentra hag̃ua. Ikatu avei ñambogue ñande selulár ha upe rirénte jarrevisa ñande korréo ha umi rred sosiál jarekóva. *

18, 19. ¿Mbaʼépa ikatu ñanepytyvõ ani hag̃ua jaheja rei peteĩ mbaʼe jadesidi vaʼekue jajapo?

¹⁸ Ñañekonsentra vaʼerã umi mbaʼe porã jahupytýtavare. Ñamohuʼã jave upe jadesidi vaʼekue jajapo jahupyty heta mbaʼe porã, ha upéva haʼete ñag̃uahẽha peteĩ lugár jahasehápe. Añetehápe ñag̃uahẽséramo peteĩ lugárpe, ndajahejamoʼãi mbaʼeve ñandejoko, oñembotýramo jepe pe tape lomímonte jahekáta ótro tape ñag̃uahẽ hag̃ua. Upéicha avei, ñañekonsentráramo umi mbaʼe porã jahupytýtavare, nañañentregamoʼãi péicha péichante oĩramo jepe umi mbaʼe ikatúva ñandejoko térã tekotevẽramo jepe ñakambiaʼimi ñande rape (Gál. 6:9).

¹⁹ Ijetuʼu ningo jadesidi porã, ha upéichante avei jajapo hag̃ua umi mbaʼe jadesidíva. Péro Jehová ñanepytyvõta, haʼe ñanemoarandúta ha ñanemombaretéta ikatu hag̃uáicha ñakompleta umi mbaʼe ñamoñepyrũ vaʼekue.