1, 2. a) ¿Mbaʼépa ñanepytyvõ jasegi hag̃ua ñaaguanta oĩramo jepe umi provléma? Emyesakã. b) ¿Mbaʼépa jahecháta ko artíkulope?

“CHEMANDUʼA jave umi pruéva ahasa vaʼekuére, ahechakuaa chejehegui reínte ndaikatumoʼãi hague ambohovái umíva”. ¿Ndépa reñeñandúmava péicha? Heta oĩ ñande apytépe oñeñandúmava péicha. Ikatu oime peteĩ tiémpore jaju ñanderasyete raʼe térã omano ñandehegui peteĩ jahayhúva. Ñapensávo upe situasiónre, ñande jahechakuaa jagueropuʼaka hague umi mbaʼe, Jehová espíritu sánto omeʼẽ rupi ñandéve “pe podér umi ótra hénte ndorekóiva” (2 Cor. 4:7-9).

² Ñande ningo ñaikotevẽ avei espíritu sánto ñandepuʼaka hag̃ua ko múndo añáre (1 Juan 5:19). Ha ndahaʼéi upévante, síno ñañorairõ vaʼerã avei “umi demónio ehérsito yvagapeguándi” (Efes. 6:12). Koʼág̃a jahecháta mbaʼéichapa pe espíritu sánto ñanepytyvõ mokõi hendáicha ñambohovái hag̃ua entéro koʼã provléma. Upéi ñaanalisáta mbaʼépa ikatu jajapo ñañevenefisiapaite hag̃ua pe espíritu sántogui.

3. ¿Mbaʼéichapa Jehová ñanepytyvõ pe espíritu sánto rupive?

³ Pe espíritu sánto oúva Jehovágui ningo ñanepytyvõ omeʼẽvo ñandéve fuérsa, térã ñanemombarete ikatu hag̃uáicha ñakumpli umi rresponsavilida jarekóva, ñambohováiramo jepe umi provléma. Apóstol Pablo ohasa vaʼekue umi pruéva, péro haʼe oñandu ikatuha osegi oservi Jehovápe “Cristo podér” rupive añoite (2 Cor. 12:9). Ojapórõ guare pe isegúndo viáhe de predikasión, Pablo heta opredika vaʼekue, péro ndahaʼéi upévante, síno ombaʼapo jejopy avei okonsegi hag̃ua umi mbaʼe oikotevẽva. Coríntope haʼe opyta Áquila ha Priscila rógape, haʼekuéra ningo ojapo vaʼekue óga kárpa. Pablo oreko rupi el mísmo ofísio, káda semána  ombaʼapo hendivekuéra unos kuánto día (Hech. 18:1-4). Pe espíritu sánto omombarete Páblope ikatu hag̃uáicha opredika ha avei ombaʼapo okonsegi hag̃ua hemikotevẽ.

4. ¿Mbaʼe provlémapa ombohovái vaʼekue Pablo, heʼiháicha 2 Corintios 12:7b-9?

⁴ (Elee 2 Corintios 12:7b-9). ¿Mbaʼépa heʼise vaʼekue Pablo heʼírõ guare ogueropuʼaka hague ‘peteĩ ñuatĩ oikutúva chupe hetépe’? Katuete ningo hasyetereíta ñandéve oikéramo ñanderehe peteĩ ñuatĩ ha opytáramo upépe. Péicha Pablo ohechauka mbaʼeichaitépa ijetuʼu kuri chupe ombohovái hag̃ua peteĩ provléma orekóva. Haʼe ohenói upévape “peteĩ Satanás ánhel” ‘ohovapetéva’ chupe kontinuadoite. Ikatu oime ndahaʼéi raʼe Satanás ha idemoniokuéra umi ombohasa asýva chupe, ku oikuturamoguáicha hese upe ñuatĩ. Péro umi demónio ohechakuaárõ guare haʼe orekoha upe “ñuatĩ”, oiméne oñehaʼã raʼe omoingeve hese, ikatu hag̃uáicha ombohasa asyve chupe. ¿Mbaʼépa ojapo raʼe Pablo?

5. ¿Mbaʼéichapa Jehová okontesta vaʼekue Pablo ñemboʼe?

⁵ Ñepyrũrã Pablo oipota vaʼekue Jehová oipeʼa chugui upe “ñuatĩ”. Haʼe heʼi: “Upéicha rupi, 3 vése ajerure asy [Jehovápe] oipeʼami hag̃ua chehegui ko ñuatĩ”. Heta oñemboʼéramo jepe, upe ñuatĩ osegi upépe. ¿Heʼise piko upéva Jehová nohendúi hague Pablo ñemboʼe? ¡Ni mbaʼevéicharõ! Jehová ohendu ha okontesta kuri iñemboʼe. Añetehápe ningo Jehová ndoipeʼái Páblogui upe provléma, péro si omombarete chupe oaguanta hag̃ua upéva. Jehová heʼi: “Che podér ojekuaa porãve nde nekangy jave” (2 Cor. 12:8, 9). Ñandejára oipytyvõ rupi chupe, Pablo ikatu kuri ovyʼa ha oĩ trankílo (Filip. 4:4-7).

6. a) ¿Mbaʼéichapa ikatu hína Jehová okontesta ñane ñemboʼe? b) ¿Mbaʼéichapa nemombarete umi téxto bíblico oĩva ko párrafope?

⁶ ¿Ñañemboʼémapa algúna ves Pablo ojapo haguéicha ha jajerure asy Jehovápe oipeʼami hag̃ua ñandehegui peteĩ provléma? Ikatu oime heta vése ñañemboʼe raʼe ñande pyʼaite guive peteĩ provlémare, péro lomímonte okontinua, térã katu oempeorave. Umícha jave ikatu hína ñapensa Jehová nañandeguerohoryiha. Péro ñanemanduʼa vaʼerã Pablo ehémplore. Jehová okontesta kuri iñemboʼe, ha katuete okontestáta avei ñanembaʼéva. Ikatu hína Jehová ndoipeʼái ñandehegui upe provléma, péro ikatu ñanemombarete ijespíritu rupive ñaaguanta hag̃ua upe mbaʼe ijetuʼúva (Sal. 61:3, 4). Ikatu voi peteĩ situasión ‘ñandepete yvýre’, péro Jehová ni mbaʼevéicharõ nañanderejamoʼãi (2 Cor. 4:8, 9; Filip. 4:13).

7, 8. a) ¿Mbaʼérepa jaʼekuaa pe espíritu sánto ojoguaha pe yvytúpe? b) ¿Mbaʼépa heʼi Pedro omyesakã hag̃ua mbaʼéichapa ombaʼapo pe espíritu sánto?

⁷ ¿Mbaʼéichapa ñanepytyvõ avei pe espíritu sánto? Ikatu ñambojoja pe espíritu sánto peteĩ yvytu oipejúvare upe lugár ohoseha gotyo peteĩ várko. Oĩramo jepe torménta pe márpe, peteĩ várko ikatu ojevale pe yvytúre og̃uahẽ hag̃ua pe ohosehápe. Oĩramo jepe umi provléma, pe espíritu sánto ñanepytyvõ jasegi hag̃ua jaservi Jehovápe, ñag̃uahẽ meve Ñandejára múndo pyahúpe.

⁸ Apóstol Pedro ningo peskadór vaʼekue, upévare oikuaa heta mbaʼe pe mar ha umi várkogui. Ikatu oime upévare Pedro oipuru raʼe peteĩ palávra ohóva umi mbaʼére, omombeʼúrõ guare mbaʼéichapa ombaʼapo pe espíritu sánto. Haʼe oskrivi: “Umi profesía arakaʼeve noñemombeʼúi kuimbaʼekuéra oipotágui, síno pe espíritu sánto ogia umi kuimbaʼépe omombeʼu hag̃ua umi mbaʼe oúva Ñandejáragui”. Pe palávra griega ojetradusíva “ogia”, añetehápe heʼise “omomýi, ogueraha” (2 Ped. 1:21, nóta).

9. ¿Mbaʼépa ontendekase vaʼekue Pedro oipurúrõ guare pe palávra “ogueraha”?

⁹ ¿Mbaʼépa ontendekase vaʼekue Pedro oipurúrõ guare pe palávra “ogueraha”? Lucas oskrivírõ  guare pe lívro de Hechos oipuru avei peteĩ palávra ojoguáva chupe, heʼi hag̃ua peteĩ várko oñemeʼẽha pe yvytúpe ‘ogueraha hag̃uáicha’ chupe (Hech. 27:15). Peteĩ profesór ostudiáva umi palávra oĩva la Bíbliape heʼi Pedro oskrivírõ guare pe espíritu sánto “ogia” hague umi eskritór bíblicope, oipuru hague peteĩ palávra omopensátava umi héntepe pe mar ha umi várko rehe. Pedro añetehápe ontendeka hína kuri pe espíritu sánto odirihi hague umi eskritór bíblicope ojapo hag̃ua upe traváho, pe yvytu oguerahaháicha peteĩ várkope og̃uahẽ hag̃ua pe ohosehápe. Upe profesór heʼi avei umi oskrivíva la Biblia “ohupi hague umi ivéla”, * ojapoháicha umi várko. Haʼekuéra oĩ kuri preparádo ojapo hag̃ua pe traváho ojapokáva chupekuéra pe espíritu sánto. Jehová ojapo upe oñekotevẽva chugui: Haʼe omeʼẽ pe “yvytu”, térã espíritu sánto. Umi eskritór bíblico katu ojapo pe traváho oñemeʼẽva chupekuéra: Haʼekuéra osegi pe gía omeʼẽva chupekuéra upe espíritu.

10, 11. ¿Mbaʼe mbaʼépa jajapo vaʼerã ñandegia hag̃ua pe espíritu sánto? Emoĩ peteĩ ehémplo.

¹⁰ Jaikuaaháicha koʼág̃arupi Jehová ndoipuruvéi ijespíritu sánto ojeskrivi hag̃ua la Biblia. Upéicharõ jepe, Jehová osegi gueteri ojapo upe oñekotevẽva chugui: Oipuru ijespíritu sánto ogia hag̃ua isiervokuérape. Péro ñandegia hag̃ua upe espíritu, ñande jajapo vaʼerã avei ñande párte. ¿Mbaʼéichapa?

¹¹ Ñapensamína ko ehémplore. Peteĩ odirihíva peteĩ várko oaprovechaséramo pe yvytu ojapo vaʼerã mokõi mbaʼe: Primero, ogueraha vaʼerã ivárko pe yvytu oipejuha gotyo, pórke opytánteramo pe puértope, ndohomoʼãi moõve. Segundo, ohupi ha oipyso porã vaʼerã umi véla omeʼẽmíva entéro, upéicharõmante ojagarra porãta pe yvytu ha ogueraháta pe várko. Upéicha avei ñande ñaikotevẽ Jehová espíritu sánto jasegi hag̃ua jaservi chupe. Upearã jajapo vaʼerã mokõi mbaʼe: Primero, jaha vaʼerã  pe yvytu térã espíritu sánto “oipejuha gotyo”, upearã jajapo vaʼerã umi mbaʼe ñanepytyvõtava jarresivi hag̃ua pe gía omeʼẽva Ñandejára espíritu. Segundo, japartisipa vaʼerã koʼã aktividápe ñane situasión omeʼẽmíva entéro, péicha haʼete ku “jahupi ha jaipysóva umi ñande véla” omeʼẽmíva entéro (Sal. 119:32). Jajapóramo koʼã mbaʼe, pe espíritu sánto ñanepytyvõta jasegi hag̃ua jaservi Jehovápe fiélmente, oĩramo jepe umi pruéva térã oñemoĩva ñanderehe, ha ñag̃uahẽta pe múndo pyahúpe.

12. ¿Mbaʼépa jahecháta koʼág̃a?

¹² Koʼa peve jahecháma pe espíritu sánto ñanepytyvõha mokõi hendáicha: Primero, ñanemombarete ha ñanepytyvõ ñandefiél hag̃ua Jehovápe jahasa jave umi situasión ijetuʼúva. Segundo, ñandegia ha ñanepytyvõ jajapo hag̃ua umi mbaʼe Jehová ohaʼarõva ñandehegui ha péicha jahupyty hag̃ua pe vída etérna. Koʼág̃a jahecháta 4 kósa jajapo vaʼerã ñañevenefisiapaite hag̃ua pe espíritu sántogui.

13. a) Asegún 2 Timoteo 3:16, 17, ¿mbaʼéichapa ikatu ñanepytyvõ la Biblia? b) ¿Mbaʼépa ñande jajapo vaʼerã?

¹³ Primero, jastudia Ñandejára Ñeʼẽ (elee 2 Timoteo 3:16, 17). Ñande jaikuaa la Biblia ‘ouha Ñandejáragui’. Jehová ningo oipuru ijespíritu sánto odirihi hag̃ua umi eskritór bíblicope, ikatu hag̃uáicha oskrivi hikuái Ñandejára pensamientokuéra. Jalee jave la Biblia ha jajepyʼamongeta hese, umi konsého oúva Ñandejáragui oike ohóvo ñane akãme ha ñane korasõme. Umíva ñanepytyvõ jajapo hag̃ua kámbio ñande rekovépe, ha péicha jaiko Jehová oipotaháicha (Heb. 4:12). Péro ñañevenefisiapaite hag̃ua pe espíritu sántogui, ñañemotiémpo vaʼerã jastudia meme hag̃ua la Biblia, avei ñapensa ha jajepyʼamongeta hag̃ua trankílo porã pe jaleévare. Péicha Ñandejára Ñeʼẽ ñandegiáta opa mbaʼe jaʼe ha jajapóvape.

14. a) ¿Mbaʼérepa jaʼekuaa pe espíritu sánto oĩha umi rreuniónpe? b) ¿Mbaʼépa ikatu jajapo “jahupi ha jaipyso hag̃ua umi ñande véla” rreunión aja?

¹⁴ Segundo, jaadora Jehovápe oñondive (Sal. 22:22). Ikatu jaʼe umi rreunionhápe “oipejuha pe yvytu”, pórke Jehová espíritu oĩ umi rreuniónpe (Apoc. 2:29). ¿Mbaʼérepa? Pórke ñañembyaty jave ñane ermanokuérandi jaadora hag̃ua Jehovápe, ñañemboʼe jajerure hag̃ua espíritu sánto, japurahéi umi músika oñemopyendáva Ñandejára Ñeʼẽme, ha ñahendu umi instruksión oñeguenohẽva la Bíbliagui ha opresentáva umi ermáno oñenombra vaʼekue espíritu sánto rupive. Ha upe espíritu sánto oipytyvõ avei umi ermánape oprepara ha opresenta hag̃ua ipartekuéra. Péro jaaprovechapaite hag̃ua upe espíritu, ñande jajeprepara vaʼerã ikatu hag̃uáicha ñakomenta umi rreuniónpe. Péicha ñaiméta preparádo jarresivi hag̃ua espíritu sánto umi rreunión aja, ha haʼetéta ku “jahupi ha jaipysóva umi ñande véla”.

15. ¿Mbaʼéichapa pe espíritu sánto ñanepytyvõ predikasiónpe, ha mbaʼépa jajapo vaʼerã upearã?

¹⁵ Tercero, japredika. Jaipuru jave la Biblia japredika ha ñaporomboʼe jave, ñande jaheja hína pe espíritu sánto ñanepytyvõ ko tembiapópe (Rom. 15:18, 19). Péro ñañevenefisiapaite hag̃ua Ñandejára espíritugui, ñande pyʼỹinte japredika vaʼerã ha ñañehaʼã jaipuru meme la Biblia. Peteĩ mbaʼe ikatúva jajapo ikatu hag̃uáicha ñañemongeta porãve umi héntendi, haʼe hína jaipuru umi presentasión osẽva pe Prográma rreuniónpe g̃uarã Mbaʼéichapa Jaiko ha Japredika vaʼerã.

16. ¿Mbaʼéichapa ikatu jarresivi pyaʼeve ha direktoite pe espíritu sánto?

¹⁶ Cuarto, ñañemboʼe Jehovápe (Mat. 7:7-11; Luc. 11:13). Ikatu hag̃uáicha jarresivi pyaʼeve ha direktoite pe espíritu sánto, ñañemboʼe vaʼerã Jehovápe ha jajerure chupe. Mbaʼeve ndaikatumoʼãi ojoko umi orasión jajapóva ani hag̃ua og̃uahẽ Jehovápe. Ha mbaʼeve ndojokomoʼãi avei pe espíritu sánto pono og̃uahẽ ñandéve, ni pe kársel ni Satanás jepe (Sant. 1:17). ¿Mbaʼéichapa  ñañemboʼe vaʼerã jaaprovechapaite hag̃ua pe espíritu sánto? Ñambohovái hag̃ua upéva, jahechami peteĩ ehémplo oñeʼẽva pe ñemboʼére ha oĩva lívro de Lúcaspe añoite. *

17. ¿Mbaʼépa ñanemboʼe pe orasión rehe Jesús ehémplo jatopáva Lucas 11:5-9, 13-pe?

¹⁷ (Elee Lucas 11:5-9, 13). Jesús ehémplo ohechauka mbaʼéichapa jajerure vaʼerã espíritu sánto. Upe ehémplope pe kuimbaʼe okonsegi la oipotáva ‘oinsisti jey jey haguére’. Pyharepytéramo jepe, haʼe ndokyhyjéi ojerure hag̃ua iñamígope upe oikotevẽva (ehecha pe nóta de estúdio: “Tovaʼatãme”, Prográma rreuniónpe g̃uarã Mbaʼéichapa Jaiko ha Japredika vaʼerã, julio de 2018). ¿Mbaʼéichapa Jesús oipuru upe ehémplo oñeʼẽ hag̃ua pe orasión rehe? Haʼe heʼi: “Pesegi pejerure ha oñemeʼẽta peẽme, pesegi peheka ha petopáta, pesegi pembota pe okẽ ha ojeavríta peẽme”. ¿Mbaʼépa ñaaprende upéicharõ? Jaipotáramo pe espíritu sánto ñanepytyvõ, ñañemboʼe jey jey vaʼerã.

18. Asegún pe ehémplo Jesús omoĩ vaʼekue, ¿mbaʼérepa ikatu ñaime segúro Jehová omeʼẽtaha ñandéve ijespíritu sánto?

¹⁸ Jesús ehémplo ñanepytyvõ avei ñantende hag̃ua mbaʼérepa Jehová omeʼẽta ñandéve espíritu sánto. Pe kuimbaʼe oñeñeʼẽha pe ehémplope oñatende porãse iñinvitadokuéra oúvare pyharekue. Haʼe ningo omeʼẽse chupekuéra álgo hoʼu vaʼerã, péro ndorekói mbaʼeve oofrese hag̃ua. Jesús heʼi pe ivesíno omeʼẽ hague chupe pan oinsisti jey jey haguére chupe. ¿Mbaʼépa ñanemboʼese Jesús? Peteĩ kuimbaʼe imperfékto jepe oipytyvõramo ivesínope oinsisti jey jey haguére chupe, ¡koʼytevéntema ñande Ru ñanderayhuetéva omeʼẽta ijespíritu sánto umi ojerure jey jeývape chupe! Upévare, ikatu ñaime segúro ñañemboʼéramo Jehovápe ha jajerure chupe ijespíritu, haʼe katuete omeʼẽtaha ñandéve (Sal. 10:17; 66:19).

19. ¿Mbaʼérepa ñaimekuaa segúro ikatutaha ñaaguanta ha ñagana?

¹⁹ Satanás ningo kontinuadoite ñandeataka, upéicharõ jepe ikatu ñaime segúro ñande ikatutaha ñaaguanta ha ñagana. ¿Mbaʼérepa? Pórke pe espíritu sánto ñanepytyvõ mokõi hendáicha: Primero, ñanemombarete ñambohovái hag̃ua umi pruéva, ha segundo, haʼe hína pe fuérsa ñanepytyvõva jasegi hag̃ua jaservi Jehovápe fiélmente ñag̃uahẽ meve pe múndo pyahúpe. Upévare, ¡jajedesidíkena jaaprovechapaitetaha pe espíritu sánto!