1. Heʼiháicha Mateo 7:13, 14, ¿mbaʼérepa ikatu jaʼe ñande ñaĩha peteĩ viáhepe?

ENTEROVE ñande ñaime hína peteĩ viáhepe. Ñande ñag̃uahẽse hína pe múndo pyahúpe, Jehová ñanegovernatahápe mborayhúpe. Káda día ningo ñande ñañehaʼã jasegi pe tape oguerahávare jeikovépe. Péro Jesús heʼi haguéicha, upe tape ipoʼi ha sapyʼánte ijetuʼu jasegi hag̃ua (elee Mateo 7:13, 14). Ha ñaneimperfékto rupi, ndahasyiete ñasẽ hag̃ua upe tapégui (Gál. 6:1).

2. ¿Mbaʼépa jahecháta ko artíkulope? (Ehecha avei pe rrekuádro “ Ñaneumílderamo jasegíta jaguata pe tape ipoʼívare”).

² Ñande jasegiséramo jaha pe tape ipoʼíva oporoguerahávare jeikovépe, kyreʼỹme ñakambia vaʼerã ñapensa lája, ñande aktitu ha umi mbaʼe jajapóva. Apóstol Pablo omokyreʼỹ vaʼekue umi kristiáno oikóvape Coríntope osegi hag̃ua ‘okambia tekotevẽhápe’ (2 Cor. 13:11). Upe konsého ñandéve g̃uarã avei. Ko artíkulope jahecháta mbaʼéichapa la Biblia ikatu ñanepytyvõ ñakambia hag̃ua, ha mbaʼéichapa umi ermáno ijerovia mbaretéva ñanepytyvõkuaa jasegi hag̃ua jaha pe tape ipoʼívare. Jahecháta avei mbaʼéicha javépa ikatu ijetuʼu ñandéve jasegi pe gía omeʼẽva Jehová organisasión. Ha ñaanalisáta mbaʼéichapa ñaneumílderamo ñakambiáta tekotevẽhápe ha jasegíta javyʼa jaservívo Jehovápe.

3. ¿Mbaʼéichapa ikatu ñanepytyvõ Ñandejára Ñeʼẽ?

³ Ijetuʼu ningo jaikuaa hag̃ua mbaʼépa ñapensa ha ñañandu. ¿Mbaʼérepa? Pórke ñane korasõ itraisionéro, upévare hasy jepi japilla hag̃ua mbaʼépa ojapokase hína ñandéve (Jer. 17:9). Ndahasyiete ningo ñanembotavy hag̃ua “umi japu la hénte opensáva” (Sant. 1:22). Upévare jaipuru vaʼerã Ñandejára Ñeʼẽ ikatu hag̃uáicha jajepyʼamongeta ha jahechakuaa “mbaʼépa ñapensa ha mbaʼépa jaipota ñane korasõme” (Heb. 4:12, 13). Ikatu jaʼe Ñandejára Ñeʼẽ ojoguaha peteĩ mákina ojapóvape rradiografía, pórke ñanepytyvõ jaikuaa hag̃ua umi mbaʼe ndajahecháiva ñande resaitérupi. Péro ñaneumílde vaʼerã ikatu hag̃uáicha ideprovécho  ñandéve umi konsého oĩva la Bíbliape, térã umi oúva Ñandejára rrepresentantekuéragui.

4. ¿Mbaʼérepa ikatu jaʼe rréi Saúl ou hague ijorgullóso?

⁴ Rréi Saúl ehémplo ohechauka mbaʼépa ikatu oiko ñanderehe nañaneumíldeiramo. Haʼe ou vaʼekue ijorgullóso, ha norrekonoséi tekotevẽha okambia umi mbaʼe opensáva ha ojapóva (Sal. 36:1, 2; Hab. 2:4). Por ehémplo, Jehová heʼírõ guare Saúlpe mbaʼe mbaʼépa ojapo vaʼerã ogana rire umi amalequítape, Saúl naiñeʼẽrendúi Jehovápe. Ha proféta Samuel heʼírõ guare chupe haʼe naiñeʼẽrenduiha, Saúl norrekonoséi ojavy hague. Upéva rangue omoĩ exkúsa ha heʼi ndahaʼeiha la ivaietereíva la oiko vaʼekue, ha omboja pe puévlore heʼívo haʼekuéra ojopy hague chupe ojapo hag̃ua upéicha (1 Sam. 15:13-24). Péro oiko mboyve upéva, haʼe ohechaukáma vaʼekue voi orekoha upe aktitu (1 Sam. 13:10-14). Ñambyasyete ningo haʼe opermiti haguére ikorasõ ijorgullóso. Haʼe nokambiái opensa lája, upévare Jehová okorrehi ha orrechasa chupe.

5. ¿Mbaʼépa ikatu ñaaprende Saúl ehémplogui?

⁵ Ñande ningo ndajasegiséi Saúl ehémplo ha ñandeorgullóso haʼéicha. Upévare iporãta ñañeporandu koʼã mbaʼe: “Alee jave peteĩ konsého Ñandejára Ñeʼẽme, ¿amoĩpa exkúsa ani hag̃ua ajapo upépe heʼíva? ¿Apensápa umi mbaʼe ajapóva ndahaʼeiha la ivaietereíva? ¿Ambojápa ótrore afalla jave?”. Ñambohováiramo “si” peteĩva koʼã pregúnta, ñakambia vaʼerã ñapensa lája. Pórke ndajajapóiramo upéva, ikatu hína ñane korasõ ou ijorgullóso ha Jehová ñanderrechasáta iñamígoramo (Sant. 4:6).

6. Emombeʼu mbaʼeichaitépa idiferénte vaʼekue rréi Saúl ha rréi David.

⁶ Jahechami mbaʼeichaitépa idiferénte vaʼekue rréi Saúl ha rréi David. David ohayhu vaʼekue “Jehová léi” (Sal. 1:1-3). Haʼe oikuaa vaʼekue Jehová oipytyvõha umi iñumíldevape, péro oñemoĩha umi oñemombaʼeguasúvare (2 Sam. 22:28). Upéicharõ, David oheja vaʼekue Ñandejára léi okambia chupe opensa lája. Haʼe oskrivi vaʼekue: “Jehová ningo omeʼẽ chéve heta konsého, ha amombaʼeguasúta chupe upévare. Pyharekue jepe apensa jave, ahechakuaa mbaʼépepa tekotevẽ amehora” (Sal. 16:7).

7. ¿Mbaʼépa jajapóta ñaneumílderamo?

⁷ Ñande ñaneumílderamo, jahejáta Ñandejára Ñeʼẽ okambia umi pensamiénto vai jarekóva, jajapo mboyve umi mbaʼe vai ñapensáva hína. Haʼetévaicha voi ñahendúva Ñandejára Ñeʼẽ heʼíva ñandéve: “Kóva hína pe tape iporãva, eho koʼárupi”. Ñandeavisáta ñasẽ sapyʼárõ pe tapégui ha jaha ñande derécha térã ñande iskiérda gotyo (Is. 30:21). Ñahendúramo Jehovápe, ideprovechoitereíta ñandéve heta mbaʼépe (Is. 48:17). Por ehémplo, nañañemotĩmoʼãi ótro ñandekorrehi haguére, ha ñañemoag̃uivéta Jehováre, pórke jahechakuaáta haʼe ñandetrataha mborayhúpe peteĩ itaʼýra térã itajýraicha (Heb. 12:7).

8. Heʼiháicha Santiago 1:22-25, ¿mbaʼéichapa ikatu jaipuru Ñandejára Ñeʼẽ peteĩ espéhoicha?

⁸ Ñande ikatu jaipuru Ñandejára Ñeʼẽ peteĩ espéhoicha (elee Santiago 1:22-25). Ñande ningo káda día ñamaña jepi espéhope ñandejehe ñasẽ mboyve ñande rógagui. Péicha ikatúta jahecha noiméipa tekotevẽ hína ñakambia peteĩ mbaʼe ótro ñanderecha mboyve. Upéicha avei, jaleéramo la Biblia káda día, jahechakuaáta ñandejehe mbaʼe mbaʼépepa tekotevẽ ñakambia, tahaʼe ñapensa lája térã ñande aktitu. Hetápe oipytyvõ oleéramo pyhareve pe téxto káda diagua osẽ mboyve hógagui. Oheja hikuái upe oleéva okambia chupekuéra opensa lája. Upéi, pe día pukukue, haʼekuéra ohecha mbaʼéichapa ikatu osegi pe konsého oĩva la Bíbliape. Avei jajepokuaa vaʼerã jastudia Ñandejára Ñeʼẽ. Upearã tekotevẽ káda día jalee ha jajepyʼamongeta la heʼívare. Ko mbaʼe haʼetévaicha isensilloitereíva jajapo hag̃ua. Péro upéva hína peteĩva umi mbaʼe iñimportantevéva ikatúva jajapo ha ñanepytyvõtava jasegi hag̃ua jaguata pe tape poʼi oporoguerahávare jeikovépe.

9. ¿Mbaʼéicha javépa peteĩ ñane amígo ikatu ñandekorrehi?

⁹ ¿Ñandépa algúna ves ñañepyrũmava jajei pe tape porãgui, ha ñañemomombyry jahávo Jehovágui? (Sal. 73:2, 3). Ha peteĩ ñane amígo ijerovia mbaretéva pyʼaguasúpe ñandekorrehíramo, ¿ñahendúpa raʼe chupe ha jasegi ikonsého? Oiméramo upéicha, jajapo porã kuri, ha jaagradeseterei voi chupe ñandeavisa haguére (Prov. 1:5).

10. ¿Mbaʼépa rejapóne peteĩ ne amígo ndekorrehíramo?

¹⁰ Ñandejára Ñeʼẽ ñanemomanduʼa: “Peteĩ amígo verdadéro ndekorrehíta oikuaáramo jepe ndaigustoiha upéva” (Prov. 27:6). ¿Mbaʼépa heʼise upéva? Ñamoĩmi peteĩ ehémplo. Ñamoĩ chupe nde rehaʼarõha hína rekrusa hag̃ua peteĩ rrúta hetahápe tráfiko, ha nde reñembelesa hína nde selulár rehe. Upéi reñepyrũma rekrusa pe rrúta remañaʼỹre la oúvare. Péro upe javete peteĩ ne amígo ndejagarra nde jyvágui ha ndeitira neguenohẽ jey hag̃ua pe rrútagui. Ha hatãiterei ndeitira rupi, opyta imoretón la nde jyva. Péro pyaʼe ojapo haguére upéva, ndesalva ani hag̃ua ndejapi peteĩ áuto. Upe moretón hasýramo jepe ndéve heta díare, ¿ndépa ndepochýta ne amígore ojapo haguére upéva? ¡Nahániri! Reagradeséta katu chupe nepytyvõ haguére. Upéicha avei, primerorã ikatu hasy ñandéve peteĩ ñane amígo ñandeavisáramo umi mbaʼe jaʼe térã jajapóva, noiporãiha Ñandejára Ñeʼẽ heʼívandi. Péro aníkena ñandepochy ni japyta ñandepyʼaro oñemoñeʼẽ haguére ñandéve. Ñañembotavyetereítama ningo jajapóramo upéicha (Ecl. 7:9). Upéva rangue, jaagradese vaʼerã ñane amígope ipyʼaguasu ha oñanima haguére oñemoñeʼẽ ñandéve.

11. ¿Mbaʼérepa peteĩ persóna ikatu hína orrechasa peteĩ konsého porã omeʼẽva chupe iñamígo?

¹¹ ¿Mbaʼérepa peteĩ persóna ikatu hína orrechasa peteĩ konsého porã omeʼẽva iñamígo ohayhúva chupe? Ijorgullóso rupi. Umi ijorgullósovape ogustaiterei voi oĩ jave “ombojuruheʼẽva chupekuéra”. “Haʼekuéra nohendumoʼãi pe añetegua” (2 Tim. 4:3, 4). Umi ijorgullósova oimoʼã noikotevẽiha mbaʼeveichagua konsého, pórke opensa haʼekuéra iñarandu ha iñimportanteveha umi ótrogui. Péro apóstol Pablo heʼi vaʼekue: “Oĩramo opensáva haʼe iñimportanteha, ha ndaupéichai, haʼe voi oñembotavy hína ijupe” (Gál. 6:3). Rréi Salomón oexplika porã vaʼekue upéva heʼírõ guare: “Peteĩ mitãkariaʼy imboriahu ha iñarandúva ovaleve peteĩ rréi ijedáva ha itavývagui ha nohendusevéimava umi konsého” (Ecl. 4:13).

12. ¿Mbaʼépa ñaaprende apóstol Pedro ehémplogui, oñemombeʼuháicha Gálatas 2:11-14-pe?

¹² Jahechamína pe ehémplo apóstol Pedro oheja vaʼekue, apóstol Pablo okorrehírõ guare chupe enterove rovake (elee Gálatas 2:11-14). Pedro ikatu kuri opyta ipyʼaro upe Pablo heʼi vaʼekuére chupe, oñemoĩtaramo opensa pe heʼi lájare chupe ha heʼi haguére upéva umi ótro rovake. Péro Pedro iñarandu. Haʼe oasepta pe konsého ha ndopytái ipyʼaro Páblore, ni ndosegíri opensa upe oiko vaʼekuére. Upéva rangue, tiémpo rire imanduʼávo hese heʼi: “Ñane ermáno Pablo jahayhuetéva” (2 Ped. 3:15).

13. ¿Mbaʼe mbaʼépa jareko vaʼerã enkuénta ñañemoñeʼẽ mboyve ótrope?

¹³ Repensáramo reakonseha vaʼerãha peteĩ ne amígope, ¿mbaʼe mbaʼépa ereko vaʼerã enkuénta? Eñeʼẽ mboyve hendive, eñeporandu vaʼerã: “¿Noiméi piko añembohustoitereíma hína ha ‘ahasa la rrája’?” (Ecl. 7:16). Peteĩ persóna oñembohustoitereíva ohusga hapichakuéra asegún la haʼe opensáva, orekoʼỹre enkuénta mbaʼépa Jehová opensa, ha ikatu voi hína ndoiporiahuverekói hapichápe. Rejepyʼamongeta rire, rehechakuaáramo tekotevẽha gueteri reñemoñeʼẽ ne amígope, emombeʼu porã vaʼerã chupe mbaʼépa la provléma. Avei ikatu eipuru umi porandu oipytyvõtava chupe ohechakuaa hag̃ua mbaʼépepa  ojavy raʼe. Aníkena nderesarái ndovaleiha ejerovia umi mbaʼe nde repensávare, síno rejerovia vaʼerã Ñandejára Ñeʼẽ heʼívare. Nemanduʼa vaʼerã avei ndahaʼeiha ne rresponsavilida ehusga ne amígope, síno reipytyvõ chupe ontende hag̃ua mbaʼéichapa Jehová oñeñandu upe haʼe ojapóvare (Rom. 14:10). Jaipurúkena Ñandejára Ñeʼẽ, ha ñameʼẽta jave peteĩ konsého jaiporiahuvereko ñande rapichápe Jesús ojapo haguéicha (Prov. 3:5; Mat. 12:20). ¿Mbaʼérepa jajapo vaʼerã upéva? Pórke Jehová ñandetratáta ñande jatrataháicha ñande rapichakuérape (Sant. 2:13).

14. ¿Mbaʼépa omeʼẽ ñandéve Ñandejára organisasión?

¹⁴ Jehová ñandegia hína pe tape oporoguerahávare jeikovépe. Upearã ojevale pe iñorganisasión orekóvare ko yvy ape ári, omeʼẽva ñandéve umi vidéo, puvlikasión ha rreunión ñanepytyvõva jasegi hag̃ua umi konsého oĩva Ñandejára Ñeʼẽme. Ñande ikatu jajerovia koʼã informasiónre oñeguenohẽ rupi la Bíbliagui. Umi ermáno oĩva pe Kuérpo Governántepe ojerovia pe espíritu sántore odesidíta jave mbaʼéichapa iporãvéta japredika. Upéicharõ jepe, haʼekuéra sapyʼánte oanalisa jey umi mbaʼe odesidi vaʼekue ohecha hag̃ua tekotevẽtapa ojejapo algún kámbio. ¿Mbaʼérepa ojapo hikuái upéva? Pórke “la oikóva ko múndope okambia hína”, ha Ñandejára organisasión ojadapta avei umi situasión pyahu oñepresentávare (1 Cor. 7:31, nóta).

15. ¿Mbaʼépa ombohovái vaʼerã heta ermanokuéra?

¹⁵ Ñandejára organisasión omyesakã porãve jave peteĩ enseñánsa bíblica, térã mbaʼéichapa jaiko vaʼerã ñanepotĩ hag̃ua Jehová renondépe, ñande pyaʼe porã voi jaasepta upéva. ¿Péro mbaʼépa jajapo Ñandejára organisasión okambia jave peteĩ mbaʼe, ha upéva ñandeafekta? Por ehémplo ramoiténte umi áño ohasa vaʼekuépe, ou hepyetereive oñemopuʼã ha oñemantene hag̃ua umi lugár jaipurúva jaadora hag̃ua Jehovápe. Upévare pe Kuérpo Governánte odesidi hetave kongregasión oipuru hag̃ua el mísmo Salón del Reino. Upéicha rupi ojejapo umi kámbio ha oĩ umi kongregasión oñeuníva ótro kongregasióndi, ha oĩ avei umi Salón oñevende vaʼekue. Pe pláta ojeaorráva ojepuru oñemopuʼã hag̃ua Salón umi lugár oñekotevẽvehápe. Oiméramo nde reiko peteĩ lugár oñevende haguépe umi Salón térã oñeuni haguépe umi kongregasión, oiméne ijetuʼu ndéve rejepokuaa hag̃ua pe situasión pyahúre. Oĩ umi ermáno oviaha vaʼerã mombyryve oho hag̃ua rreunionhápe. Ha oĩ umi ombaʼapo jejopy vaʼekue  oñemopuʼã térã oñemantene hag̃ua peteĩ Salón, ha oiméne oñeporandu hikuái mbaʼérepa koʼág̃a oñevende vaʼerã upe Salón. Ikatu opensa hikuái operde rei hague itiémpo ha oñehaʼã rei hague. Upéicharõ jepe, haʼekuéra oasepta ko kámbio ha iñeʼẽrendu, upévare jafelisita vaʼerã chupekuéra.

16. ¿Mbaʼéichapa ñanepytyvõta jasegi hag̃ua javyʼa pe konsého oĩva Colosenses 3:23, 24-pe?

¹⁶ Ñande jasegíta javyʼa ñanemanduʼáramo ñambaʼapoha hína Jehovápe g̃uarã, ha haʼe odirihiha hína iñorganisasión (elee Colosenses 3:23, 24). Rréi David oheja vaʼekue ñandéve peteĩ ehémplo porã omeʼẽrõ guare ikontrivusión oñemopuʼã hag̃ua pe témplo. Haʼe heʼi vaʼekue: “¿Máva piko che ha máva piko che puévlo rojapo hag̃ua ndéve ko ofrénda voluntária? Pórke ndehegui voíngo ou entéro mbaʼe, ha ore ningo romeʼẽ jeýnte ndéve umi mbaʼe osẽ vaʼekue nde pógui” (1 Crón. 29:14). Ñameʼẽ jave ñane kontrivusión, ñande avei ñameʼẽ jey hína Jehovápe umi mbaʼe osẽ vaʼekue ipógui. Péro Jehová ovyʼaiterei ñameʼẽ jave ñane tiémpo, ñane mbaretekue ha ñande pláta ojejapo hag̃ua pe traváho haʼe oipotáva (2 Cor. 9:7).

17. ¿Mbaʼérepa nañañedesanimái vaʼerã jahechakuaáramo tekotevẽha ñakambia peteĩ mbaʼépe?

¹⁷ Jasegi hag̃ua jaguata pe tape oporoguerahávare jeikovépe, enterove jasegi porã vaʼerã Jesús ehémplo (1 Ped. 2:21). Péro aníkena reñedesanima rehechakuaáramo tekotevẽha rekambia peteĩ mbaʼépe. Upéva oĩ porã, ohechaukágui nde resegiseha hína Jehová gía. Ani nderesarái Jehová oikuaaha ñande ñaneimperfektoha, upévare haʼe nohaʼarõi jajapo entéro mbaʼe Jesús ojapo hagueichaite voi.

18. ¿Mbaʼépa jajapo vaʼerã ñag̃uahẽ hag̃ua pe múndo pyahúpe?

¹⁸ Jasegíkena jajesareko umi mbaʼe ñaneraʼarõvare ñane renonderãme, ha kyreʼỹme ñakambia ñapensa lája, ñande aktitu ha umi mbaʼe jajapóva (Prov. 4:25; Luc. 9:62). Siémprekena ñaneumílde, ‘jasegi javyʼa, ha ñakambia tekotevẽhápe’ (2 Cor. 13:11). Jajapóramo upéicha, “Ñandejára oporohayhúva ha omeʼẽva pyʼaguapy” oĩta ñanendive. Haʼe ñanepytyvõta javyʼa hag̃ua koʼág̃ama voi, ha omeʼẽta ñandéve vída etérna pe múndo pyahúpe.