1, 2. ¿Mbaʼéichapa ikatu jasegi pe konsého oĩva Proverbios 4:25-pe? Emoĩ peteĩ ehémplo.

ÑAPENSAMÍNA koʼã mbohapy ehémplore. Peteĩ ermána ijedáva imanduʼa umi mbaʼe porã ohasa vaʼekuére yma. Koʼág̃a ijetuʼuvéramo jepe hekove, haʼe osegi ojapo ikatúva guive (1 Cor. 15:58). Káda día haʼe oñeimahina oĩmaha pe paraísope ifamília ha iñamigokuérandi. Ótra ermána imanduʼa peteĩ ikongregasiongua ombopochy hague chupe, péro haʼe odesidi ndopytamoʼãiha ipyʼaro hese (Col. 3:13). Peteĩ ermáno katu imanduʼa umi mbaʼe vai ojapo vaʼekuére yma, péro odesidi oñehaʼãmbaitetaha osegi ifiél Jehovápe koʼág̃a guive (Sal. 51:10).

² ¿Mbaʼépepa ojojogua koʼã mbohapy ermáno? Enterove imanduʼa umi mbaʼe ohasa vaʼekuére yma, péro ndoikói opensaiterei umívare. Upéva rangue, haʼekuéra ‘omaña siémpre henonderãre’ (elee Proverbios 4:25).

3. ¿Mbaʼérepa ñamaña vaʼerã ñane renonderã gotyo?

³ ¿Mbaʼérepa iñimportánte ñamaña ñane renonderã gotyo? Peteĩ persóna oguatáva hína ohóvo ndaikatumoʼãi oho derechoite oikóramo omaña manterei hapykue gotyo. Péicha avei ñande ndaikatumoʼãi jaservi porã Jehovápe jaikóramo siémpre ñapensa umi mbaʼe oiko vaʼekuére yma (Luc. 9:62).

4. ¿Mbaʼépa jahecháta ko artíkulope?

⁴ Ko artíkulope ñañeʼẽta mbohapy ñuhãre ikatúva ñanemopensaiterei umi mbaʼe oiko vaʼekuére yma. Umíva hína: 1) Jahechagaʼu mbaʼéichapa jaiko vaʼekue yma, 2) ñandepyʼaro, ha 3) jasegi ñañeñandu vaieterei umi mbaʼe vai jajapo vaʼekuére. Káda kásope jahecháta mbaʼéichapa umi konsého oĩva la Bíbliape ikatu ñanepytyvõ ani hag̃ua ñapensaiterei umi mbaʼe opyta vaʼekuére ñande rapykuépe, síno ñañehaʼãmbaite hag̃ua jahupyty umi mbaʼe oĩva ñane renonderãme (Filip. 3:13).

5. ¿Mbaʼépa heʼi ñandéve Eclesiastés 7:10 ani hag̃ua jajapo?

⁵ (Elee Eclesiastés 7:10). Jahechakuaa ko versíkulo ndeʼiriha ivaiha jaʼe: “Yma ningo opa mbaʼe iporã vaʼekue”. Ñanemanduʼa umi mbaʼe porã jahasa vaʼekuére haʼe peteĩ rregálo oúva Ñandejáragui. Upéva rangue ko versíkulo heʼi: “Ani eiko ere: ‘Yma ningo opa mbaʼe iporãve vaʼekue’”. Upéva heʼise jaʼataha peteĩ ñuhãme ñakomparáramo ñane situasión yma guare koʼag̃aguáre, ha ñapensáramo entéro mbaʼe koʼág̃a ivaiveha. Ótra Biblia heʼi ko versíkulope: “Arakaʼeve ani reporandu: ‘¿Mbaʼéicha rupípa umi ára yma guare iporãve koʼag̃aguágui?’. Koʼãichagua porandu naheñói peteĩ iñarandúva pyʼapýgui”.

6. ¿Mbaʼérepa nañanearandumoʼãi jasegíramo ñapensa yma jaiko porãve hague? Emoĩ peteĩ ehémplo.

⁶ ¿Mbaʼérepa nañanearandumoʼãi jasegíramo ñapensa yma jaiko porãve hague? Jahechagaʼúramo umi mbaʼe yma guare, ñanemanduʼáta umi mbaʼe iporãvarente péro ñanderesaráita umi mbaʼe vai jahasa vaʼekuégui. Jahechami umi israelita yma guare ehémplo. Osẽ rire Egíptogui, pyaʼe voi hesarái hikuái mbaʼéichapa ohasa asy vaʼekue upépe. Upéva rangue haʼekuéra imanduʼa umi mbaʼe héva hoʼu vaʼekuérente. Haʼekuéra heʼi: “¡Rohechagaʼuete ningo umi pira gratiete roʼúmi vaʼekue Egíptope, avei umi pepíno, umi sandía, umi sevollíta de óha, umi sevói ha áho!” (Núm. 11:5). ¿Péro añete piko haʼekuéra hoʼu vaʼekue gratiete umi mbaʼe? No. Umi israelita ningo hepy opaga vaʼekue, pórke Egíptope ojetrata vai chupekuéra umi esklávoicha (Éx. 1:13, 14; 3:6-9). Upéicharõ jepe, upéi haʼekuéra hesaráima umi mbaʼe vai ohasa vaʼekuégui, ha ohechagaʼu umi mbaʼe yma guare. Haʼekuéra odesidi imanduʼataha umi mbaʼe porã ohasa vaʼekuérente, ojesareko rangue umi mbaʼe porãite Jehová ojapo ramoitévare hesehapekuéra. Ha upéva ndogustaiete vaʼekue Jehovápe (Núm. 11:10).

7. ¿Mbaʼépa oipytyvõ peteĩ ermánape ani hag̃ua ohechagaʼueterei umi mbaʼe yma guare?

⁷ ¿Mbaʼépa ikatu jajapo ani hag̃ua jahechagaʼueterei umi mbaʼe yma guare? Jahechami peteĩ ermána ehémplo oñepyrũ vaʼekue oservi  Betel de Bróoklynpe áño 1945-pe. Unos kuánto áño upe rire, haʼe omenda peteĩ betelítare, ha oservi hikuái upépe oñondive heta áñore. Péro áño 1976-pe iména ou hasyete. Haʼe heʼi iména ohechakuaárõ guare omano mbotaitemaha, omeʼẽ hague chupe unos kuánto konsého porã oipytyvõtava chupe opyta rire viúda. Pe iména heʼi vaʼekue chupe: “Ñande ningo jahasa heta mbaʼe porã ñane matrimóniope ha javyʼa. Heta hénte ni ndoikuaái mbaʼépa upéva”. Péro heʼi avei chupe: “Nde ningo nanderesaraimoʼãi umi mbaʼe porã jahasa vaʼekuégui oñondive. Péro ani reiko repensaiterei umi mbaʼére, ág̃a ohasávo pe tiémpo saʼivéma reñembyasýta. Aníkena reñedesanimaiterei ha reñamarga la oikóvare nderehe. Evyʼákena umi mbaʼe porã jahasa vaʼekuére oñondive jaservívo Jehovápe. [...] Ñanemanduʼa umi mbaʼe porã jahasa vaʼekuére haʼe hína peteĩ rregálo oúva Ñandejáragui”. ¡Ajépa iporãite ko konsého omeʼẽ vaʼekue chupe!

8. ¿Mbaʼéichapa oipytyvõ ñane ermánape pe konsého omeʼẽ vaʼekue chupe iména?

⁸ Ñane ermána osegi pe konsého omeʼẽ vaʼekue chupe iména. Haʼe oservi fiélmente Jehovápe omano meve, orekópe 92 áño. Unos kuánto áño omano mboyve, haʼe heʼi vaʼekue: “Chemanduʼávo aservi hague Jehovápe de tiémpo kompléto 63 áñore, ikatu haʼe añetehápe aiko hague vyʼápe”. ¿Mbaʼérepa? Haʼe heʼi: “Ñande ningo ikatu jaiko vyʼápe ñaimégui peteĩ família ijojahaʼỹvape. Koʼápe oĩ ñane ermáno ha ermanakuéra ha jareko la esperánsa jaikóvo peteĩ paraísope ko yvy ape ári, ha jaservi pára siémpre ñande Apoharépe, Ñandejára teete Jehovápe”. * ¡Ajépa iporãite ko ermána ehémplo, pórke ojesareko vaʼekue umi mbaʼe Jehová oprometévare amo gotyove g̃uarã!

9. Heʼiháicha Levítico 19:18, ¿mbaʼéicha javépa ikatu ijetuʼueterei ñandéve ñaperdona hag̃ua peteĩ ñanembopochy vaʼekuépe?

⁹ (Elee Levítico 19:18). Sapyʼánte ijetuʼu ñandéve ani hag̃ua japyta ñandepyʼaro pe ñanembopochýva haʼéramo peteĩ ermáno, peteĩ ñane  amigoite, térã peteĩ ñane pariénte. Por ehémplo, peteĩ ermána omboja reiete kuri ótra ermánare omonda hague chugui ipláta. Upéi pe ermána oporoakusa vaʼekue ojerure perdón pe ótra ermánape, péro haʼe ipochyeterei ha osegínte opensa upe oiko vaʼekuére. ¿Ndépa reñeñandúmava péicha? Ñande ndajahasáiramo jepe peichagua situasión, ikatu oime japytáma raʼe ñandepyʼaro ha ñapensa voi ndaikatumoʼãiha ñaperdona pe ñanembopochy vaʼekuépe.

10. ¿Mbaʼépa ñanepytyvõta japyta jave ñandepyʼaro?

¹⁰ ¿Mbaʼépa ñanepytyvõta japyta jave ñandepyʼaro? Ñanemanduʼa vaʼerã Jehová ohechaha opa mbaʼe. Haʼe oikuaa entéro mbaʼe jahasáva, por ehémplo oĩ jave ñandetrata vaíva (Heb. 4:13). Jehová ningo oñeñandu vai avei ñande jahasa asy jave (Is. 63:9). Ha haʼe opromete koʼẽrõite ndajasufrimoʼãveimaha umi inhustísia káusare (Apoc. 21:3, 4).

11. ¿Mbaʼéichapa ñande voi ñañevenefisiáta ndajapytáiramo ñandepyʼaro?

¹¹ Ñanemanduʼa vaʼerã avei ñaporoperdonáramo, ñande voi ñañevenefisiataha. Upéva ohechakuaa vaʼekue pe ermána oñemboja rei vaʼekue hese omonda hague. Tiémpo rire haʼe operdona pe ótra ermánape ha ndaipyʼarovéima. Haʼe ohechakuaa ñande ñaperdona jave ótrope, Jehová ñaneperdonaha avei (Mat. 6:14). Haʼe oikuaa pe ótra ermána ojapo vaʼekue hese oĩ vai hague, péro haʼe odesidi ndopytamoʼãiha ipyʼaro. Upéicha rupi ñane ermána ovyʼavéma, ha ikatúma ojesareko pe servísio omeʼẽvare Jehovápe.

12. ¿Mbaʼépa ñaaprende 1 Juan 3:19, 20-gui?

¹² (Elee 1 Juan 3:19, 20). Enterove ningo sapyʼánte ñañeñandu vaínte voi umi mbaʼe jajapo vaʼekuére. Por ehémplo, oĩ oñeñandu vaietereíva umi mbaʼe ojapo vaʼekuére oservi mboyve Jehovápe. Ótro katu oñeñandu vai umi mbaʼe ojapo vaʼekuére oiko riréma chugui Testígo. Upéva ningo normál (Rom. 3:23). Ñande jajapose pe oĩ porãva, péro “enterovéva ningo jajavy heta vése” (Sant. 3:2; Rom. 7:21-23). Ndaigústoiramo jepe ñañeñandu vai umi mbaʼe jajapo vaʼekuére, upéva ikatu ojapo porã hína ñanderehe. ¿Mbaʼérepa? Pórke upéva ñanepytyvõta ñakambia hag̃ua, ha jajedesidi hag̃ua ndajajapomoʼãveimaha umi mbaʼe vai jajapo vaʼekue (Heb. 12:12, 13).

13. ¿Mbaʼérepa ñañatende vaʼerã ani hag̃ua ñañeñandu vaieterei umi mbaʼe jajapo vaʼekuére yma?

¹³ Péro ikatu hína ñañeñandu vai rasáma umi mbaʼe vai jajapo vaʼekuére. Upéva heʼise jasegiha ñañeñandu vai ñañarrepenti riréma, ha Jehová ohechauka riréma ñandéve ñaneperdona hague. Peichagua sentimiénto ikatu hína ñandeperhudika (Sal. 31:10; 38:3, 4). ¿Mbaʼérepa? Jahechami peteĩ ermána ehémplo osegi vaʼekue oñeñandu vai umi mbaʼe ojapo vaʼekuére yma. Haʼe heʼi: “Che añandu vaʼekue añehaʼã reiha ambaʼapo jejopy Jehová servísiope, pórke oiméne che ndajesalvamoʼãi voínte”. Ikatu oĩ heta ñande apytépe oñeñandúva avei péicha. Upévare ñañatende porã vaʼerã ani hag̃ua jasegi ñañeñandu vaieterei umi mbaʼe jajapo vaʼekuére yma. ¿Mbaʼérepa? Pórke Satanás ovyʼaitereíta ñande ñañentregáramo ha ndajaservivéi Jehovápe, jepe Jehová nopensái ñanderehe nañanepohãveimaha (ekompara 2 Corintios 2:5-7, 11 heʼívare).

14. ¿Mbaʼéichapa ikatu jaikuaa Jehová nopensaiha ñanderehe nañanepohãveimaha?

¹⁴ Upéicharõ jepe, ikatu hína ñañeporandu: “¿Mbaʼéicha piko ikatu aikuaa Jehová nopensaiha cherehe nachepohãveimaha?”. Oiméramo ñañeporandu upéicha, upéva voi ohechauka Jehová ikatuha ñaneperdona. Ojapóma heta áño, pe rrevísta Ñemañaha heʼi hague: “Ikatu oime jajavy rakaʼe heta vése yma, ha ikatu voi koʼág̃a peve jasegi hína ñandepuʼakaʼỹre upe mbaʼe vai jajapo vaʼekuére ñañepyrũ mboyve  jaservi Ñandejárape. Péro aníkena japerde la esperánsa. Ani ñapensa jajapo hague peteĩ mbaʼe Jehová ndaikatumoʼãiva operdona. Upéva hína la oipotáva Satanás ñapensa. Ñande ñañembyasy ha ñañeñandu vaíramo peteĩ mbaʼe jajapo vaʼekuére, upéva ohechauka ñande nañaneñañaiha ha Jehová ikatuha ñaneperdona. Jasegíkena ñaneumílde ha jajerure asy Ñandejárape ñaneperdona hag̃ua, tañanepytyvõmi ñanekonsiénsia potĩ jey hag̃ua, ha ani jaʼa jey pe mbaʼe vai jajapo vaʼekuépe. Por ehémplo, peteĩ mitã orekóramo el mísmo provléma heta vése, haʼe siémpre ojerure itúape oipytyvõ hag̃ua chupe. Upéicha avei jasegi vaʼerã jajerure Jehovápe ñanepytyvõ hag̃ua, ha katuete ojapóta upéva, pórke haʼe imbaʼeporãiterei ñanendive”. *

15, 16. ¿Mbaʼéichapa oñeñandu vaʼekue umi ermáno ohechakuaárõ guare Jehová nopensaiha hesekuéra naipohãveimaha?

¹⁵ Heta ermánope okonsola ohechakuaárõ guare Jehová nopensaiha hesekuéra naipohãveimaha. Por ehémplo, ojapo unos kuánto áño peteĩ ermánope oipytyvõ hague peteĩ experiénsia osẽ vaʼekue umi artíkulo héravape “La Biblia okambia chupekuéra”. Upe artíkulope peteĩ ermána orrekonose ijetuʼuha chupe oguerovia hag̃ua Jehová ikatuha ohayhu chupe, ojapo haguére yma heta mbaʼe vai. Ha haʼe osegi vaʼekue oñeñandu upéicha heta áñore ojevautisa riréma jepe. Upéicharõ jepe, haʼe ojepyʼamongeta Jesús sakrifísiore, ha upéva oipytyvõ chupe oguerovia hag̃ua Jehová ohayhuha chupe. *

¹⁶ ¿Mbaʼéichapa pe ermána rembiasakue oipytyvõ raʼe pe ermánope? Haʼe omombeʼu: “Chemitãme ahecha meme vaʼekue pornografía, péro añehaʼã rupi ikatu vaʼekue aheja. Ambyasýramo jepe, ramoite añepyrũ jey ahecha. Upévare añemboja umi ansiáno rendápe chepytyvõ hag̃ua, ha ajapo tekotevẽva ambohovái hag̃ua upe provléma. Haʼekuéra heʼi chéve Jehová cherayhu ha ikatuha cheporiahuvereko. Upéicharõ jepe, sapyʼánte apensa ndavaleiha mbaʼeverã ha Ñandejára ndacherayhumoʼãiha voi. Péro [ko ermána] heʼi vaʼekue tuichaiterei chepytyvõ. Koʼág̃a ahechakuaa apensáramo Jehová arakaʼeve nacheperdonamoʼãiha, namombaʼeiha hína pe sakrifísio Jesús  ojapo vaʼekue oñeperdona hag̃ua che pekádo. Aikytĩ ko artíkulo ikatu hag̃uáicha alee ha ajepyʼamongeta hese añepyrũ jave apensa umi mbaʼe ikatúvare chemokangy”.

17. ¿Mbaʼépa Pablo ojapo vaʼekue ani hag̃ua oñeñandu vaieterei umi mbaʼe ojapo vaʼekuére?

¹⁷ Koʼãichagua experiénsia ningo ñanemomanduʼa apóstol Páblore. Oiko mboyve chugui kristiáno haʼe ojapo vaʼekue heta mbaʼe ivaietereíva. Pablo imanduʼa umi mbaʼe ojapo vaʼekuére, péro ndoikói opensa meme umívare (1 Tim. 1:12-15). Haʼe oguerovia vaʼekue ikatuha oñeperdona chupe Jesús sakrifísio rupive, chupe g̃uarã pe rreskáte haʼe vaʼekue peteĩ rregálo Jehová omeʼẽ vaʼekue chupe (Gál. 2:20). Pablo ndosegíri vaʼekue oñeñandu vaieterei umi mbaʼe ojapo vaʼekuére, síno oñehaʼãmbaite ojapo pe iporãvéva Jehovápe g̃uarã.

18. ¿Mbaʼépa ñaaprendéma ko artíkulope?

¹⁸ ¿Mbaʼe mbaʼépa ñaaprendéma ko artíkulo rupive? 1) Ñanemanduʼa umi mbaʼe porã jahasa vaʼekuére haʼe peteĩ rregálo oúva Jehovágui, péro iporãramo jepe umi mbaʼe jahasa vaʼekue, umi mbaʼe ñaneraʼarõva pe múndo pyahúpe iporãitevétantema hína. 2) Sapyʼánte ikatu oĩ ñanembopochýva, péro jadesidi jave ñaporoperdona, ikatútama jajesareko pe servísio ñameʼẽvare Jehovápe koʼág̃a. 3) Ñañeñandu vaietereíramo umi mbaʼe jajapo vaʼekuére yma ndajavyʼamoʼãi jaservívo Jehovápe. Upévare ojapo haguéicha apóstol Pablo, ñande jaguerovia vaʼerã Jehová ñaneperdonáma hague.

19. ¿Mbaʼérepa ikatu jaʼe ág̃a pe múndo pyahúpe nañañeñanduvaimoʼãiha umi mbaʼe yma guarére?

¹⁹ Ñande ningo jareko la esperánsa jaikóvo pára siémpre, ha jaiko vove Ñandejára múndo pyahúpe nañanemanduʼamoʼãvéima mbaʼevete ñanemoñeñandu vai vaʼekuére. Oñeʼẽvo upe tiémpore la Biblia heʼi: “Avave naimanduʼamoʼãi umi mbaʼe oiko vaʼekuére yma” (Is. 65:17). Ñapensamíntena: Jaservi aja Jehovápe, heta oĩ ñande apytépe ijedámava ohóvo, péro pe múndo pyahúpe enterovete ñanemitã jeýta (Job 33:25). Upévare jajedesidíkena ndajaikomoʼãiha ñapensa meme yma guarére. Upéva rangue jajesarekóta pe múndo pyahúre, ha koʼág̃a jajapóta ikatumíva entéro ñaime hag̃ua upépe.