1. ¿Mbaʼépa Jehová ñanemokyreʼỹ jajapo hag̃ua?

JEHOVÁPE g̃uarã ningo iñimportanteterei pe mborayhu ifiélva (Os. 6:6). Ha oipota voi isiervokuéra omombaʼe avei upéva. Proféta Miqueas rupive Jehová ñanemokyreʼỹ ‘jahayhu hag̃ua pe mborayhu ifiélva’ (Miq. 6:8, nóta). Péro primerorã tekotevẽta jaikuaa raẽ mbaʼépa heʼise mborayhu ifiélva.

2. ¿Mbaʼépa osignifika pe mborayhu ifiélva?

² ¿Mbaʼépa heʼise pe mborayhu ifiélva? Pe fráse “mborayhu ifiélva” jatopa mas de 180 vése Ñandejára Ñeʼẽ La Biblia Traducción del Nuevo Múndope. ¿Péro mbaʼépa osignifika hína upéva? Pe “Diksionário” oĩva ko Bíbliape heʼi mborayhu ifiélva ojepuru jepiha “oñeñeʼẽ jave pe mborayhu oñeñandúvare oĩ rupi kompromíso, ndojefallái rupi ótrondi, oĩ rupi lealta ha pe mborayhu osẽ rupi ñande pyʼaite guive. Ojepuru jepi ojeʼe hag̃ua Ñandejára ohayhuetereiha yvyporakuérape, ha avei pe mborayhu ohechaukávare yvyporakuéra ojupe”. Jehová omoĩ hína ñandéve pe ehémplo tuichavéva ojehechauka hag̃ua mborayhu ifiélva. Ko artíkulope jahecháta mbaʼéichapa Jehová ohechauka upéva isiervokuérape. Ha pe sigiénte artíkulope jahecháta mbaʼéichapa ikatu jasegi Jehová ehémplo ha jahechauka ojupe pe mborayhu ifiélva.

3. ¿Mbaʼépa Jehová oikuaauka Moiséspe?

³ Umi israelita osẽmírente Egíptogui, Jehová oikuaauka vaʼekue Moiséspe mbaʼéichapa haʼe héra ha umi kualida orekóva. Haʼe heʼi: “Jehová, Jehová, che hína peteĩ Dios oporoporiahuverekóva ha oporombyasýva, ndaipochyreíriva, oporohayhuetereíva  ha nopyrũiva iñeʼẽre, ohayhu añetéva hetaitereípe, operdonáva umi ojavývape, hembiapo vaíva ha opekávape” (Éx. 34:6, 7). Koʼã mbaʼe porãite heʼívare, Jehová oikuaauka Moiséspe mbaʼeichaite pevépa haʼe oporohayhu. ¿Mbaʼéichapa haʼe ojapo upéva?

4, 5. a) ¿Mbaʼépa Jehová heʼi ijehe? b) ¿Mbaʼe mbaʼépa ñambohováita koʼág̃a?

⁴ Jehová ndeʼíri ijehe oporohayhunteha, síno heʼi voi haʼe ‘oporohayhuetereiha’. Péicha ningo la Biblia heta vése heʼi Jehováre (Núm. 14:18; Neh. 9:17; Sal. 86:15; 103:8; Joel 2:13; Jon. 4:2). Koʼã kásope ojepuru ko palávra oñeñeʼẽ hag̃ua Jehováre añoite, ha núnka peteĩ persónare. ¡Ajépa jahecharamoite Jehová pyʼỹinte heʼi haguére péicha ijehe! Upéva ohechauka pe mborayhu ifiélva iñimportantetereiha chupe g̃uarã. Ndareíri ningo rréi David heʼi vaʼekue: “Jehová, ne mborayhu ifiélva ningo tuichaiterei, og̃uahẽ voi yvága peve. [...] Ñandejára, ¡tuichaite mbaʼe ningo ne mborayhu ifiélva! Umi hénte oho ojeprotehe hag̃ua nde pepo guýpe” (Sal. 36:5, 7, nóta). ¿Ñandépa ñamombaʼe avei Jehová mborayhu ifiélva David ojapo haguéicha?

⁵ Ñantende porãve hag̃ua mbaʼépa heʼise pe mborayhu ifiélva, ñakontestamíta mokõi porandu: ¿Mávapepa Jehová ohechauka mborayhu ifiélva? ¿Ha mbaʼéichapa ñanevenefisia Jehová mborayhu ifiélva?

6. ¿Mávapepa Jehová ohechauka mborayhu ifiélva?

⁶ ¿Mávapepa Jehová ohechauka mborayhu ifiélva? La Bíbliape heʼi ñande ikatuha jahayhu heta mbaʼe, por ehémplo “pe hustísia”, “umi konsého” ha pe “víno ha aséite” (Sal. 37:28; Prov. 12:1; 21:17). Péro pe mborayhu ifiélva núnka ndojehechaukái umi kosakuérape, síno siémpre peteĩ persónape. Upéicharõ jepe, Jehová ndohechaukái mborayhu ifiélva oimeraẽvape, síno espesiálmente umi orekóvape peteĩ amista hendive. Jehová ningo núnka ndofallamoʼãi iñamigokuérandi. Haʼe opromete voi chupekuéra hetaiterei mbaʼe porã, ha siémpre ohayhúta chupekuéra.

7. ¿Mbaʼéichapa Jehová ohechauka ohayhuha yvyporakuérape en henerál?

⁷ Jehová ningo ohechauka ohayhuha yvyporakuérape en henerál. Jesús heʼi vaʼekue peteĩ karai héravape Nicodemo: “Ñandejára ningo ohayhueterei umi héntepe, upévare ontrega Itaʼýra peteĩete orekóva, péicha entéro umi ohechaukáva ojeroviaha hese noñehundimoʼãi síno ikatúta oikove pára siémpre” (Juan 3:1, 16; Mat. 5:44, 45).

8, 9. a) ¿Mbaʼérepa Jehová ohechauka mborayhu ifiélva isiervokuérape? b) ¿Mbaʼépa ñaanalisáta koʼág̃a?

⁸ Ñaanalisáma haguéicha, Jehová ohechauka mborayhu ifiélva umi isiervokuérape añoite,  umi orekóvape hendive peteĩ amista imbaretéva. Upéva jahechakuaa umi mbaʼe heʼi vaʼekuére rréi David ha proféta Daniel. Por ehémplo, David heʼi vaʼekue: “Jehová, nde ningo siémpre reiporiahuvereko ha rehechauka mborayhu ifiélva nde siervokuérape”. “Jehová ohechaukáta mborayhu ifiélva umi orrespetávape chupe”. Ha Daniel heʼi vaʼekue: “Jehová, nde ningo pe Dios verdadéro [...], ha rehechauka mborayhu ifiélva umi nderayhúvape ha umi okumplívape ne mandamientokuéra” (Sal. 25:6, nóta; 103:17, nóta; Dan. 9:4, nóta). Heʼiháicha koʼã téxto, Jehová ohechauka mborayhu ifiélva isiervokuérape pórke haʼekuéra oikuaa chupe, orrespeta ha ohayhu chupe, ha avei okumpli hikuái imandamientokuéra. Jehová ohechauka mborayhu ifiélva ipuévlope añoite, umi oadorávape chupe haʼe oipotaháicha.

⁹ Ñande ñañepyrũ mboyve jaservi Jehovápe, haʼe ohechaukáma vaʼekue ñandéve pe mborayhu oñandúva yvyporakuérare en henerál (Sal. 104:14). Péro koʼág̃a ñande jaservíma rupi chupe, haʼe ohechauka avei ñandéve pe mborayhu ifiélva. Hiʼarive Jehová oasegura isiervokuérape: “Che ahechauka ndéve mborayhu ifiélva ha upéva núnka ndojeimoʼãi chehegui” (Is. 54:10, nóta). Ha oikóma haguéicha voi David rehe, “Jehová omombaʼe ha otrata porã umi iñeʼẽrendúvape chupe” (Sal. 4:3). ¿Mbaʼépa jajapo vaʼerã Jehová ñanderayhu haguére peichaite peve? Pe salmísta heʼi vaʼekue: “Pe iñarandúva oñatende porãta koʼã mbaʼére, haʼe ohechakuaáta Jehová ohechaukaha mborayhu ifiélva, ha ojepyʼamongetáta koʼã mbaʼére” (Sal. 107:43, nóta). Ko konsého ningo ou Jehovágui, ha upévare koʼág̃a ñaanalisamíta mbohapy venefísio jahupytýva Jehová ohechauka haguére ñandéve pe mborayhu ifiélva.

10. ¿Mbaʼéichapa ñanevenefisia jaikuaávo Jehová siémpre ohechaukaha mborayhu ifiélva? (Salmo 31:7).

¹⁰ Ñandejára siémpre ohechaukáta mborayhu ifiélva. Ko fráse ikatu jatopa 26 vése Salmo 136-pe. Pe primer versíkulo heʼi: “Peagradese Jehovápe pórke haʼe ivuenoiterei. Haʼe siémpre ohechaukáta mborayhu ifiélva” (Sal. 136:1, nóta). Káda versíkulope, versíkulo 2 guive 26 peve, jatopa heʼiha: “Haʼe siémpre ohechaukáta mborayhu ifiélva”. Amedída ke jalee ko salmo, jahecharamoiterei mbaʼéichapa heta hendáicha  Jehová siémpre ohechauka pe mborayhu ifiélva. Pe fráse “Haʼe siémpre ohechaukáta mborayhu ifiélva”, ohechauka ñandéve la Jehová oñandúva ñanderehe núnka nokambiamoʼãiha. ¡Ajépa ñamombaʼete Jehová osegíta haguére ñanderayhu toiko la oikóva! Haʼe ningo siémpre oĩta ñande ykére ñande jaservi rupi chupe, ha ni mbaʼevéicharõ nañanderejamoʼãi ñaneaño jahasa asy jave. ¿Mbaʼéicha ñanevenefisia upéva? Jaikuaa rupi Jehová siémpre oĩha ñande ykére, ñanembovyʼa ha ñanemombarete ikatu hag̃uáicha jagueropuʼaka umi mbaʼe vai jahasáva, ha jasegi hag̃ua jaservi chupe (elee Salmo 31:7).

11. Heʼiháicha Salmo 86:5, ¿mbaʼépa omomýi Jehovápe ñaneperdona hag̃ua?

¹¹ Pe mborayhu ifiélva omomýi Ñandejárape ñaneperdona hag̃ua. Peteĩ pekadór oñarrepenti jave ha okambia, pe mborayhu ifiélva omomýi Jehovápe operdona hag̃ua chupe. Pe salmísta David heʼi vaʼekue Jehováre péicha: “Ñande japeka ha ñamerese kuri Ñandejára ñandekastiga, péro haʼe ndojapói upéva. Ivai kuri upe jajapóva, péro haʼe nomeʼẽi ñandéve la ñamereséva” (Sal. 103:8-11). David ningo osufrieterei vaʼekue ikonsiénsia kyʼárõ guare Jehová renondépe. Péro haʼe oikuaa vaʼekue avei Jehová ‘oĩha operdona hag̃uáicha’. ¿Mbaʼépa omomýi Jehovápe ñaneperdona hag̃ua? La rrespuésta jatopa Salmo 86:5-pe (elee). David heʼi haguéicha oñemboʼérõ guare, Jehová oporoperdona ohechauka rupi mborayhu ifiélva enterove ojerurévape operdonami hag̃ua chupe.

12, 13. ¿Mbaʼépa ñanepytyvõta ñanemoñeñandu vai jave umi ñande pekádo yma guare?

¹² Japeka jave, oĩ porã hína la ñañeñandu vai, pórke upéva ñanemomýita ñakambia hag̃ua ha jajapo hag̃ua umi mbaʼe oĩ porãva. Péro oĩ umi Jehová siervokuéra osegíva oñeñandu vaieterei umi mbaʼe vai ojapo vaʼekuére yma. Haʼekuéra osegi opensa Jehová núnka noperdonamoʼãiha chupekuéra, oñarrepenti ha ndojapovéimaramo jepe umi mbaʼe vai ojapo vaʼekue yma. Oiméramo nde reñeñandu hína péicha, tuichaiterei nepytyvõta nemanduʼáramo Jehová ohechaukataha ndéve mborayhu ifiélva.

¹³ ¿Mbaʼéicha ñanevenefisia upéva? Ñaneimperféktoramo jepe, ñande ikatu jaservi vyʼápe Jehovápe ha konsiénsia potĩ reheve. Upéva ningo ikatu jajapo pórke “Itaʼýra Jesús ruguy  ñanemopotĩ opaichagua pekádogui” (1 Juan 1:7). Upévare ñañeñandu vai jave ñaneimperfékto rupi, ñanemanduʼákena Jehová oĩha ñaneperdona hag̃uáicha la ñañarrepentíma guive. Jahechamína mbaʼéichapa David oñeʼẽrõ guare pe mborayhu ifiélvare, oñeʼẽ hague avei pe perdón rehe. Haʼe heʼi vaʼekue: “Pe yvága mombyryeterei oĩ ko yvýgui, ndaikatúi ñamedi, péicha avei ndaikatúi ñamedi mbaʼeichaitépa haʼe ohechauka mborayhu ifiélva isiervokuéra iñeʼẽrendúvape. Pe kuarahyresẽ ningo mombyryeterei oĩ pe kuarahyreikégui, upéicha Ñandejára omomombyry ñandehegui umi ñane rembiapo vaikue” (Sal. 103:11, nóta, 12). Jehová ningo oĩ voi ‘operdonambaite hag̃uáicha ñane rembiapo vaikue’ (Is. 55:7).

14. ¿Mbaʼéichapa David heʼi Jehová ñandeproteheha?

¹⁴ Pe mborayhu ifiélva Jehová ohechaukáva oprotehe pe amista jarekóva hendive. David oñemboʼérõ guare Jehovápe heʼi vaʼekue: “Ñandejára, nde ningo peteĩ lugár ikatuhápe akañy che enemigokuéragui. Nde cheprotehéta umi provlémagui, ha ahahápente asapukáita vyʼágui nde chesalva haguére. [...] Umi ojeroviáva Jehováre ohecháta mbaʼeichaitépa haʼe oporohayhu ha ndofallái avavéndi” (Sal. 32:7, 10). Yma ningo umi murálla omongoráva umi siuda oprotehe vaʼekue umi héntepe iñenemigokuéragui. Ha pe mborayhu ifiélva Jehová ohechaukáva ojogua pe murállape pórke oprotehe pe amista jarekóva hendive, ani hag̃ua mbaʼevete asy ombyai ni omokangy ñandehegui. Ha ndahaʼéi upévante, pe mborayhu ifiélva Jehová ohechaukáva omomýi voi chupe ñanemoag̃ui hag̃ua ijehe (Jer. 31:3).

15. ¿Mbaʼérepa ikatu jaʼe Jehová mborayhu ojoguaha peteĩ lugár isegúro porãva ikatuhápe jajeprotehe?

¹⁵ David oipuru vaʼekue avei ótra komparasión ohechauka hag̃ua mbaʼéichapa Jehová mborayhu ifiélva ñandeprotehe. Haʼe heʼi vaʼekue: “Ñandejára, nde ningo peteĩ lugár isegúro porãva ikatuhápe ajeprotehe, nde rehechauka chéve cherayhuha ha núnka nderefallái chendive”. David heʼi vaʼekue avei Jehováre: “Ñandejára cherayhueterei ha ndofallái chendive. Haʼe peteĩ lugár isegúro porãva ha siémpre chesalva. Ñandejára chéve g̃uarã peteĩ lugár ikatuhápe ajeprotehe. Haʼe hína che eskúdo ha che añemoag̃ui hese oñangareko hag̃ua cherehe” (Sal. 59:17; 144:2). ¿Mbaʼérepa David okompara vaʼekue Jehová mborayhu peteĩ lugár isegúro porãvare ikatuhápe ojeprotehe? Pórke tahaʼe haʼéva pe lugár jaikoha, jaservíma guive Jehovápe haʼe siémpre omeʼẽta ñandéve entéro mbaʼe ñaikotevẽva japrotehe hag̃ua pe amista jarekóva hendive. Upe promésa ningo jatopa avei pe Salmo 91-pe. Upépe pe salmísta heʼi vaʼekue: “Che haʼéta Jehovápe: ‘Nde hína peteĩ lugár isegúro porãva, ne rendápe che aha ajeprotehe hag̃ua’” (Sal. 91:1-3, 9, 14). Moisés ningo oipuru vaʼekue avei peichagua komparasión oñeʼẽrõ guare Jehováre (Sal. 90:1). Péro ndahaʼéi upévante. Haʼe omano mboyvemi, omensiona vaʼekue avei ótro detálle iporãitereíva. Haʼe heʼi: “Ñandejára hína pe lugár oñekañyha ymaite guive, ijyva opa ára g̃uarãva ndejoko hína” (Deut. 33:27). ¿Mbaʼépa ñanemboʼe Jehovágui pe fráse “ijyva opa ára g̃uarãva ndejoko hína”?

16. ¿Mbaʼe mokõi vendisiónpa ñande jareko? (Salmo 136:23).

¹⁶ Ñande ñakonfiáramo Jehová ñandeprotehetaha, katuete ñañeñandúta segúro. Péro sapyʼánte ikatu hína ñañedesanima ha ñañandu nañameʼẽveimaha. ¿Mbaʼépa Jehová ojapóta ñanderehe upéicha jave? (Elee Salmo 136:23). Haʼe haʼete ñandejagarrátava ñanderupi ijyva ári ha nanepytyvõta ñañakãrapuʼã jey hag̃ua (Sal. 28:9; 94:18). ¿Mbaʼéicha ñanevenefisia upéva? Ñande jaikuaa Jehová siémpre oĩtaha ñande ykére ñanepytyvõ hag̃ua, ha upéva ñanemomanduʼa jarekoha mokõi vendisión iporãitereíva: Primero, Jehová ñandeprotehéta  tahaʼe haʼéva pe lugár jaikoha. Ha segundo, haʼe ñanderayhueterei ha ojepyʼapy ñanderehe.

17. ¿Mbaʼéguipa ikatu ñaĩ segúro? (Salmo 33:18-22).

¹⁷ Jahecháma haguéicha, jareko jave peteĩ provléma Jehová katuete ñanepytyvõta jasegi hag̃ua ñandefiél chupe (2 Cor. 4:7-9). Proféta Jeremías heʼi vaʼekue: “Jehová imbaʼeporãiterei rupi ore noroñehundipái, pórke pe poriahuvereko haʼe ohechaukáva núnka ndopái” (Lam. 3:22). Ñande ikatu ñaĩ segúro Jehová siémpre ñanderayhutaha, pórke la Biblia heʼi voi: “Jehová oporohayhu ha ndofallái avavéndi, upévare umi orrespetáva chupe ikatu ojerovia hese, haʼe siémpre omaña hesekuéra” (elee Salmo 33:18-22).

18, 19. a) ¿Mbaʼe rehepa siémpre ñanemanduʼa vaʼerã? b) ¿Mbaʼépa jahecháta pe sigiénte artíkulope?

¹⁸ Upéicharõ, ¿mbaʼe rehepa siémpre ñanemanduʼa vaʼerã? Jaservi mboyve Jehovápe, haʼe ohechaukáma vaʼekue ñandéve pe mborayhu oñandúva yvyporakuérare en henerál. Péro koʼág̃a ke jaservi chupe, haʼe ohechauka avei ñandéve pe mborayhu ifiélva. Upéva omomýi chupe ñanderupi hag̃ua ijyva ári ikatu hag̃uáicha oñangareko ñanderehe ha ñandeprotehe. Haʼe ningo siémpre oĩta ñande ykerete ha okumplíta enteroite mbaʼe opromete vaʼekue ñandéve. ¡Haʼe oipota voi osẽ porã ñandéve opa mbaʼe jajapóva! (Sal. 46:1, 2, 7). Upévare, tahaʼe haʼéva la jahasáva, Jehová siémpre ñanemombaretéta ikatu hag̃uáicha jasegi ñandefiél chupe.

¹⁹ Ko artíkulope jahecháma mbaʼéichapa Jehová ohechauka mborayhu ifiélva isiervokuérape. Péro haʼe oipota avei jahechauka ojupe pe mborayhu ifiélva. ¿Mbaʼéichapa ikatu jajapo upéva? Pe sigiénte artíkulope ñaanalisáta ko téma iñimportantetéva.