1. ¿Mbaʼéicha jaikuaa Jehová oipotaha ñande ñañemoag̃ui hese?

 JEHOVÁ ñaneinvita ñañemoag̃ui hag̃ua hese (Sant. 4:8). Haʼe oipota ñande jahecha chupe ñande Túa ha ñane Amígoicha. Haʼe ombohovái umi ñane ñemboʼe ha ñanepytyvõ umi situasión ijetuʼúvape. Avei haʼe ojevale iñorganisasiónre ñanemboʼe ha ñandeprotehe hag̃ua. ¿Péro mbaʼépa jajapo vaʼerã jasegi hag̃ua ñaime Jehová ykére?

2. ¿Mbaʼéichapa ikatu ñañemoag̃ui Jehováre?

² Ñande ikatu ñañemoag̃ui Jehováre ñañemboʼévo chupe, jaleévo Iñeʼẽ la Biblia ha jajepyʼamongetávo hese. Jajapóramo koʼã mbaʼe, jahayhuvéta Jehovápe ha jaapresiaitereíta chupe. Upéva ñanemomýita avei ñaneñeʼẽrendu hag̃ua ha ñamombaʼéta chupe haʼe omereseháicha (Apoc. 4:11). Amáske jaikuaa porãve Jehovápe, jajeroviavéta hese ha iñorganisasión haʼe omoĩvare okuida hag̃ua ñanderehe.

3. a) ¿Mbaʼépa ojapo Satanás ñanemomombyry hag̃ua Jehovágui? b) ¿Mbaʼépa ñanepytyvõta ani hag̃ua arakaʼeve jaheja Jehovápe ha iñorganisasiónpe? (Salmo 31:13, 14).

³ Satanás oñehaʼã ñanemomombyry Jehovágui, koʼýte ñambohovái jave umi situasión ijetuʼúva. ¿Mbaʼéichapa ojapo upéva? Haʼe oñehaʼã mbeguekatúpe omokangy ñane konfiánsa Jehováre ha iñorganisasiónre. Péro ñande ikatu ñañedefende umi ijatakekuéragui. Ñande jerovia imbaretéramo ha ñakonfiáramo Jehováre ñande pyʼaite guive, núnka ndajahejamoʼãi chupe ni iñorganisasiónpe (elee Salmo 31:13, 14).

4. ¿Mbaʼépa jahecháta ko artíkulope?

⁴ Ko artíkulope ñañeʼẽta mbohapy situasión ikatúvare hína omokangy pe konfiánsa jarekóva Jehováre ha iñorganisasiónre. ¿Mbaʼéichapa koʼã situasión ikatu ñanemomombyry Jehovágui?  ¿Ha mbaʼépa ikatu jajapo ani hag̃ua Satanás ipuʼaka ñanderehe?

5. ¿Mbaʼéichapa umi provléma ikatu ou omokangy ñane konfiánsa Jehováre ha iñorganisasiónre?

⁵ Sapyʼánte ikatu ñambohovái diferénte provléma, ikatu por ehémplo ñane hentekuéra oñemoĩ ñanderehe térã jaju japerde ñande traváho. ¿Mbaʼéichapa koʼãichagua provléma ikatu ñanemomombyry Jehovágui ha iñorganisasióngui? Ñaaguanta jave peteĩ provléma heta tiémporema, ikatu japerde la esperánsa ha ñañedesanima. Satanás oaprovecha koʼã situasión ha ojevale umívare ñapensa hag̃ua Jehová nañanderayhuiha. Haʼe oipota jaju jaduda ha ñapensa Jehová térã iñorganisasión kúlpare la jasufriha. Upéicha lénto oiko vaʼekue unos kuánto israelítare oiko vaʼekue Egíptope. Ñepyrũrã haʼekuéra oguerovia vaʼekue Jehová onombra hague Moisés ha Aarónpe oguenohẽ hag̃ua chupekuéra Egíptogui (Éx. 4:29-31). Péro upéi Faraón oúrõ guare ombohasa asyeterei chupekuéra, haʼekuéra oñepyrũ okulpa Moisés ha Aarónpe, ha heʼi mokõivévape: “Pende káusare faraón ha isiervokuéra ndaijaʼevéi orerehe, ha koʼág̃a haʼete voi pemoĩva ipopekuéra peteĩ espáda orejukapa hag̃ua” (Éx. 5:19-21). ¡Ajépa ñambyasyete haʼekuéra okulpa haguére koʼã Ñandejára siérvo ifieletévape! Oiméramo nde heta tiémporema reaguanta umi provléma, ¿mbaʼépa ikatu rejapo resegi hag̃ua rejerovia mbarete Jehováre ha iñorganisasiónre?

6. ¿Mbaʼépa ñaaprende proféta Habacuc ombohovái lájagui umi provléma? (Habacuc 3:17-19).

⁶ Emombeʼupaite Jehovápe umi mbaʼe reñandúva ha eheja haʼe tanepytyvõ. Proféta Habacuc ombohovái vaʼekue heta provléma. Peteĩ vuéltape haʼe amalisia ou vaʼekue oduda Jehová oñangarekoha hese. Upémarõ omombeʼupaite Jehovápe umi mbaʼe oñandúva. Haʼe heʼi: “Jehová, che ningo asapukái ha ajerure ndéve chepytyvõ hag̃ua, ¿arakaʼe peve piko asegi vaʼerã péicha nde cherendu hag̃ua? [...] ¿Mbaʼére piko reheja umi hénte ombosufri hapichápe?” (Hab. 1:2, 3). Jehová orresponde ko ñemboʼe ojapo vaʼekue chupe ipyʼaite guive ko isiérvo ifieletéva (Hab. 2:2, 3). Habacuc ojepyʼamongeta rire mbaʼéichapa Jehová osalva vaʼekue ipuévlope, ou vaʼekue ovyʼa jey. Haʼe oĩma segúro Jehová okuida ha oñeinteresaha hese, ha oipytyvõtaha chupe oaguanta hag̃ua oimeraẽ pruéva (elee Habacuc 3:17-19). ¿Mbaʼépa ikatu ñaaprende? Ñambohovái jave umi provléma, ñañemboʼe vaʼerã Jehovápe ha ñamombeʼupaite vaʼerã chupe mbaʼéichapa ñañeñandu. Upéi ñañehaʼã jahechakuaa mbaʼéichapa haʼe ñanepytyvõ. Jajapóramo koʼã mbaʼe ni michĩmi ndajadudamoʼãi Jehová omeʼẽtaha ñandéve pe fuérsa ñaikotevẽva ñaaguanta hag̃ua. Ha jahecha jave mbaʼéichapa haʼe ñanepytyvõ, ñande jerovia imbareteve.

7. ¿Mbaʼépa oiko vaʼekue Shirley rehe, ha mbaʼépa oipytyvõ chupe osegi hag̃ua ojerovia Jehováre?

⁷ Esegi ejapo umi mbaʼe nepytyvõtava reñemoag̃ui hag̃ua Jehováre. Upéva oipytyvõ vaʼekue peteĩ ermána héravape Shirley oikóva Papúa Nueva Guinéape. b Haʼe ningo ombohovái vaʼekue heta provléma. Haʼe ha ifamília ningo imboriahu ha heta vése ijetuʼu vaʼekue chupekuéra okonsegi hag̃ua hoʼumi vaʼerã. Peteĩ ihénte oñehaʼã omokangy pe konfiánsa haʼe orekóva Jehováre, heʼívo chupe: “Nde ningo ere Ñandejára espíritu nepytyvõha, péro ndojekuaaiete upéva. Peẽ ningo pesegi penemboriahu. Eperde rei ningo ne tiémpo esẽ jave epredika”. Shirley orrekonose oĩ hague moménto oñeporandúva añetehápepa Jehová okuida hína raʼe hese ha ifamíliare. Haʼe  heʼi: “Ensegidamínte añemboʼe Jehovápe, ha amombeʼupaite chupe mbaʼéichapa añeñandu. Asegi alee la Biblia ha umi ñane puvlikasionkuéra. Avei asegi apredika ha ndafaltái umi rreunionhápe”. Shirley pyaʼe voi oñemeʼẽ enkuénta Jehová añetehápe okuida hague hína hese ha ifamíliare, pórke ndofaltái vaʼekue chupekuéra la hoʼumi vaʼerã. Haʼe heʼive: “Ahechakuaa Jehová okontesta hague umi che ñemboʼe” (1 Tim. 6:6-8). Nde avei esegíramo ejapo umi mbaʼe nemoag̃uíva Jehováre, umi provléma ni umi dúda nanemomombyrymoʼãi Jehovágui.

8. ¿Mbaʼépa ikatu oiko umi ermanokuéra orekóvare rresponsavilida Jehová organisasiónpe?

⁸ Umi médio de komunikasión ha umi rred sosiál rupive, ñane enemigokuéra omosarambi japu ikatu hag̃uáicha oheja vai umi ermáno orekóvape rresponsavilida Jehová organisasiónpe (Sal. 31:13). Algúno ermánope ojegueraha kárselpe ha ojeʼe guaʼu hesekuéra haʼeha kriminál. Umi kristiáno síglo primérope guare ombohovái vaʼekue avei peichagua situasión. Upérõ apóstol Páblope ojeakusa rei ha ojegueraha chupe kárselpe inhústamente. ¿Mbaʼépa ojapo vaʼekue umi kristiáno upérõ guare?

9. ¿Mbaʼépa oiko vaʼekue ojeguerahárõ guare préso apóstol Páblope?

⁹ Apóstol Pablo oĩrõ guare préso Rómape oĩ vaʼekue unos kuánto kristiáno oheja reíva chupe (2 Tim. 1:8, 15). ¿Mbaʼérepa oiméne ojapo raʼe hikuái upéva? ¿Otĩnepa raʼe hikuái ojeʼe haguére Pablo haʼeha peteĩ delinkuénte? (2 Tim. 2:8, 9). ¿Térã okyhyje hikuái ojepersegírõ g̃uarã avei chupekuéra? Tahaʼe haʼeháicha, oime vaʼerã Pablo oñeñandu vaieterei kuri. Haʼe ningo oaguanta vaʼekue hetaiterei provléma ha oĩ voi kuri dispuésto omanóvo umi ermanokuéra rehehápe (Hech. 20:18-21; 2 Cor. 1:8). Ñande ningo núnka ndajajoguaséi umi oheja rei vaʼekue Páblope haʼe oikotevẽve jave. Upévare, ¿mbaʼe rehepa ñanemanduʼa vaʼerã ojepersegi jave umi ermáno orekóvape rresponsavilida Jehová organisasiónpe?

10. ¿Mbaʼe rehepa ñanemanduʼa vaʼerã ojepersegi jave umi ermáno orekóvape rresponsavilida, ha mbaʼérepa?

 ¹⁰ Nemanduʼákena mbaʼérepa jajepersegi ha mávapa añetehápe ojapo upéva. Segunda a Timoteo 3:12-pe heʼi: “Enterove oadoraséva Ñandejárape ipyʼaite guive Cristo Jesús disípuloramo, ojepersegíta avei”. Upéicharõ, nañanesorprendéi vaʼerã Satanás oatakaseha espesiálmente umi ermáno orekóvape rresponsavilida. Haʼe oipotaiterei koʼã ermáno ou oheja Jehovápe ha oipota ñande jaju jakyhyje (1 Ped. 5:8).

11. ¿Mbaʼépa ikatu ñaaprende Onesíforo ehémplogui? (2 Timoteo 1:16-18).

¹¹ Esegi eapoja umi ermanokuérape nde pyʼaite guive (elee 2 Timoteo 1:16-18). Síglo primérope, peteĩ kristiáno hérava Onesíforo ndohejareíri vaʼekue Páblope haʼe oĩrõ guare préso. Pablo heʼi vaʼekue hese: “Notĩri chereheve añeñapytĩ haguére kadénape”. Onesíforo ojapo opa ikatúva otopa hag̃ua Páblore, ha otopárõ guare hese oñehaʼã oipytyvõ chupe oikotevẽhápe. Ojapóvo upéva, Onesíforo oarriesga vaʼekue hekove Pablo rehehápe. ¿Mbaʼépa ñanemboʼe upéva? Ñañehaʼã vaʼerãha jaapoja umi ermáno oaguantávape hína pe persekusión. Jakyhyjéramo jepe umi héntegui, ndajahejái vaʼerã upéva ñandejoko. Jasegi vaʼerã ñaipytyvõ ñane ermanokuérape, ha jajapo opa ikatúva ñadefende hag̃ua chupekuéra (Prov. 17:17). Haʼekuéra oikotevẽterei ñande jasegi jahayhu ha jaapoja chupekuéra.

12. ¿Mbaʼépa ñanemboʼe umi ermáno ha ermána Rusiapegua ehémplo?

¹² Epensamíntena mbaʼépa ojapo ñane ermáno ha ermanakuéra Rusiapegua oñeenkarsela jave umi ermáno ohayhuetévape hikuái. Algúno ermánope ojegueraha jave trivunálpe, hetaiterei ermáno oho avei upépe oapoja hag̃ua chupekuéra. ¿Mbaʼépa ikatu ñaaprende iñehemplokuéragui? Oĩ jave otakýva, oarrestáva térã opersegíva umi ermáno orekóvape rresponsavilida, ani rekyhyje. Eñemboʼe hesekuéra, eñangareko umi ifamíliare ha eheka fórma eapoja hag̃ua chupekuéra (Hech. 12:5; 2 Cor. 1:10, 11).

13. ¿Mbaʼéichapa ikatu oafekta pe konfiánsa jarekóva Jehováre ha iñorganisasiónre oĩramo oñembohorýva ñanderehe?

¹³ Ikatu oime peteĩ ñane hénte ndoservíriva Jehovápe ha umi ñane kompañéro de traváho térã de eskuéla oñembohory ñanderehe japredika térã jaiko haguére Jehová léi heʼiháicha (1 Ped. 4:4). Ikatu haʼekuéra heʼi ñandéve: “Nde ningo ndekalidaiterei, péro la ne rrelihión ojopyetereíma penendive ha vyroreímante heʼi peẽme”. Ikatu oĩ algúno oñeʼẽ vaíva avei ñanderehe ohechávo mbaʼéichapa jatrata umi oñemosẽ vaʼekuépe kongregasióngui, ha heʼi: “Peẽ ningo peje jahayhu vaʼerãha umi héntepe, péro peẽ ndapehechaukaiete upéva”. Ñahendúvo koʼãichagua mbaʼe, ikatu jaju jaduda ha ñapensa umi Jehová léi iñinhustoha ha ñañeporandu: “¿Noiméi piko Jehová ojopyetereíma hína chendive? ¿Sera piko la iñorganisasión ijestriktoitereíma?”. Oiméramo nde embohovái hína peichagua situasión, ¿mbaʼépa ikatu rejapo ani hag̃ua eñemomombyry Jehovágui ha iñorganisasióngui?

14. ¿Mbaʼéichapa ñarreaksiona vaʼerã oĩramo oñembohorýva ñanderehe jaiko haguére Jehová léi heʼiháicha? (Salmo 119:50-52).

¹⁴ Eapoja umi mbaʼe Jehová heʼíva oĩ porãha. Job oapoja vaʼekue la Jehová heʼíva oĩramo jepe oñembohorýva hese. Peteĩ iñamígo guaʼu oñehaʼã vaʼekue okonvense chupe Ñandejárape nointeresaiha oimépa Job orrespeta chupe térã nahániri (Job 4:17, 18; 22:3). Péro Job ndogueroviái upéva. Haʼe oikuaa porã Jehová añoite ikatuha heʼi mbaʼépa oĩ porã ha mbaʼépa oĩ vai, ha oapoja umíva ipyʼaite guive. Haʼe  ndohejái vaʼekue umi ótro omokangy chupe, síno osegi iñeʼẽrendu Jehovápe (Job 27:5, 6). ¿Mbaʼépa ñanemboʼe upéva? Aníkena eheja umi oñembohorýva nderehe ou nemokangy ha péicha rupi nerekonfiavéi Jehováre. Epensamína umi mbaʼe porã rehupytýmavare rejapo rupi Jehová heʼíva. Provávlemente heta vésema ehechakuaa rehupytyha heta mbaʼe porã rejapo haguére upéva. Esegíkena eapoja pe organisasión odefendéva Jehová mandamientokuéra. Péicha rejapóramo siémpre resegíta reservi Jehovápe oĩramo jepe oñembohorýva nderehe (elee Salmo 119:50-52).

15. ¿Mbaʼérepa oĩ vaʼekue oñembohorýva Brizit rehe?

¹⁵ Jahechamína Brizit experiénsia, peteĩ ermána oikóva Índiape. Haʼe oaguanta vaʼerã kuri ihentekuéra oñembohorýva hese haʼe haguére testígo de Jehová. Brizit ojevautisa áño 1997-pe ha upe riremínte iména ndahaʼéiva Testígo ou vaʼekue operde itraváho. Upémarõ iména odesidi haʼe, Brizit ha itajyrakuéra ovataha isy ha itúa rógape, oikóva ótra siudápe. Péro Brizit provlemakuéra ndopái upépe. Iména osegi rupi travahoʼỹre, haʼe oñepyrũ ombaʼapo de tiémpo kompléto omantene hag̃ua ifamíliape, hiʼarive pe kongregasión hiʼag̃uivéva chugui opyta a 350 kilómetro. Ñambyasýramo jepe, iména hentekuéra oñemoĩ Brizit rehe haʼe haguére Testígo. Oñeopone mbareteterei rupi hese, Brizit ha ifamília ova jeýmante. Upéi derrepentete oumi omano la iména, ha tiémpo rire peteĩ imemby ou omano de kánser, orekórõ guare 12 áñonte. Ha la ivaiveha katu Brizit hentekuéra heʼi ikúlpare oiko hague entéro koʼã mbaʼe. Haʼekuéra oñembohory hese, ha heʼi chupe ndoikóirire chugui testígo de Jehová umi mbaʼe ndoikomoʼãiha kuri hese. Péro Brizit osegi ojerovia Jehováre ha noñemomombyrýi iñorganisasióngui.

16. ¿Mbaʼe vendisiónpa ohupyty Brizit osegi haguére Jehová ha iñorganisasión ykére?

¹⁶ Brizit oiko rupi mombyry pe kongregasióngui, peteĩ superintendénte de sirkuíto omokyreʼỹ chupe opredika hag̃ua haʼe oikohárupi ha ojapo hag̃ua hógape umi rreunión. Ñepyrũrã haʼe opensa ijetuʼuetereitaha chupe ojapo  hag̃ua umi mbaʼe, péro upéi ojapo la heʼi vaʼekue chupe pe superintendénte. Haʼe oñepyrũ opredika, ojapo umi rreunión hógape ha ojapo pe estúdio de família imembykuñanguérandi. ¿Mbaʼépa ohupyty Brizit ojapo haguére koʼã mbaʼe? Haʼe omoñepyrũ heta estúdio bíblico, ha umíva apytégui unos kuánto iñestudiánte ojevautisa. Áño 2005-pe, haʼe oñepyrũ oservi de prekursóra rregulár, ha orresivi hetaiterei vendisión ojerovia rupi Jehováre ha ndohejái rupi iñorganisasión. Umi imembykuña oservi fiélmente Jehovápe, ha koʼág̃a oĩma mokõi kongregasión pe lugár haʼe oikohápe. Brizit oĩ segúra Jehová omeʼẽ hague chupe pe fuérsa oikotevẽva ombohovái hag̃ua umi provléma, ha ani hag̃ua ikangy ihentekuéra oñembohorýrõ guare hese.

17. ¿Mbaʼépa jajedesidi vaʼerã jajapo?

¹⁷ Satanás oipota jaguerovia Jehová ñandereja reiha jareko jave provléma ha ijetuʼuvetaha ñandéve entéro mbaʼe jaapojáramo iñorganisasión. Haʼe oipota jakyhyje oñeñeʼẽ vai, ojepersegi térã oñemoinge jave kárselpe umi ermáno orekóvape rresponsavilida. Avei ojevale umi hénte oñembohorývare ñanderehe ñapensa hag̃ua ndovaleiha la péna ñakumpli Jehová leikuéra ha la iñorganisasión heʼíva. Péro ñande jaikuaa porãitereíma umi ñuhã Satanás oipurúva ha ndajahejamoʼãi umíva ñanembotavy (2 Cor. 2:11). Jajedesidíkena ñamboyketaha umi japu Satanás heʼíva ha jasegi ñandefiél Jehovápe ha iñorganisasiónpe. Ñanemanduʼákena Jehová núnka nañanderejareimoʼãiha (Sal. 28:7). Upéicharõ, aníkena jaheja mbaʼeve ñanemomombyry Jehovágui (Rom. 8:35-39).

18. ¿Mbaʼépa jahecháta pe sigiénte artíkulope?

¹⁸ Ko artíkulope ñañeʼẽ kuri mbohapy mbaʼe ikatúvare omokangy pe konfiánsa jarekóva Jehováre ha iñorganisasiónre. Péro kongregasiónpe voi ikatu hína oñepresenta umi situasión ijetuʼúva. ¿Mbaʼéichapa ikatu ñambohovái umíva? Upéva jahecháta pe sigiénte artíkulope.