TEMBIASAKUE
“Che ambaʼapose vaʼekue Jehovápe g̃uarã”
ROJEDESPEDI unas kuánta persóna rovisita vaʼekuégui ag̃ui pe aldéa de Granbórigui, oĩva pe kaʼaguyetépe Surinámpe. Roho peteĩ kanóape pe Rrío Tapanahoni rehe. Upe rire rohasávo pe korriénte hatãvehárupi, pe élise oguerekóva pe motór ombeti peteĩ itáre. Upepete la ore kanóa oñepyrũ oñapymi, ha roike pe ýpe. Upépe chekorasõ pererepaite. Aviaháramo jepe heta áñore umi kanóape kómo superintendénte de sirkuíto, che ndaytakuaái.
Amombeʼupa mboyve peẽme la oiko vaʼekue, amombeʼúta peẽme mbaʼéichapa añepyrũ vaʼekue aservi Jehovápe de tiémpo kompléto.
Anase vaʼekue áño 1942-pe peteĩ ísla iporãitereívape hérava Curazao. Che túa ningo onase vaʼekue Surinámpe, péro upéi ova ombaʼapo hag̃ua pe íslape. Unos kuánto áño che anase mboyve, che túa haʼe vaʼekue peteĩva umi primeroite ojevautisa vaʼekue Curazáope. a Haʼe ostudiámi vaʼekue orendive la Biblia káda semána, ijetuʼúramo jepe upéva orendive oremichĩmba rupi. Arekórõ guare 14 áño, ore família ova Surinámpe ikatu hag̃uáicha papa oñangareko isy ijedávare.
UMI CHE AMIGOKUÉRA HETA CHEPYTYVÕ
Surinámpe aguereko vaʼekue umi amígo kyreʼỹme oservíva Jehovápe. Haʼekuéra ijedamie vaʼekue chehegui ha oservi hikuái de prekursór rregulár. Haʼekuéra omombeʼu jave umi mbaʼe ohasa vaʼekue predikasiónpe, ahechakuaa hovarekuéra ovyʼaitereiha hikuái. Ha opa rire umi rreunión, che amigokuéra ha che roñemongetámi jepi umi téma bíblicore. Heta vése rojapo vaʼekue upéva roguapývo pe okápe ha romaña umi estrellakuérare. Koʼã che amigokuéra chepytyvõ aikuaa hag̃ua mbaʼépa che ahupytyse che rekovépe, che ambaʼapose vaʼekue Jehovápe g̃uarã. Upévare che ajevautisa arekórõ guare 16 áño, ha arekópe 18 áño añepyrũ aservi kómo prekursór rregulár.
AAPRENDE UMI MBAʼE IDEPROVECHOITEREÍVA
Aservírõ guare de prekursór Paramaríbope
Aservi aja de prekursór aaprende vaʼekue heta mbaʼe, ha koʼã mbaʼe chepytyvõ aservi aja entéro de tiémpo kompléto. Por ehémplo, pe primeroite aaprende vaʼekue haʼe iñimportanteha ambokatupyry ótrope. Añepyrũrõ guare aservi de prekursór, peteĩ misionéro hérava Willem van Seijl oñeinteresa vaʼekue cherehe. b Haʼe chemboʼe vaʼekue mbaʼéichapa ambaʼapo vaʼerã kongregasiónpe. Upe moméntope che napensái vaʼekue pe entrenamiénto arresivíva ideprovechoitereitaha chéve upéi. Péro pe ótro áño añenombra prekursór espesiál, ha upe guive añatende peteĩ grúpo aisládore oĩva pe kaʼaguýpe. ¡Upépe amombaʼeterei pe entrenamiénto omeʼẽ vaʼekue chéve umi ermanokuéra! Upe guive asegi iñehemplokuéra ha añepyrũ che avei ambokatupyry ótrope.
Pe segunda leksión aaprende vaʼekue haʼe aiko vaʼerãha sensillomínte ha añeorganisa porã. Oñepyrũre pe mes, che kompañéro de prekursorádo espesiál ha che rohechapaite umi mbaʼe ofaltátava oréve. Ha peteĩva oho pe kapitálpe ojogua hag̃ua umi mbaʼe roikotevẽtava. Ore tekotevẽ kuri roipuru porã pe pláta oñemeʼẽva oréve ha romorrendi vaʼerã avei umi provísta roguerekóva, ohupyty hag̃ua oréve pe mes kompletoite. Opa sapyʼárõ orehegui peteĩ mbaʼe pe kaʼaguýpe, ijetuʼuetereíta kuri orendive. Saʼi térã ndaiporimoʼãi peteĩ persóna ikatu vaʼerã orepytyvõ. Aaprende rupi chemitã guive aiko sensillomi ha añeorganisa porã, upéva chepytyvõ siémpre amotenonde hag̃ua Jehová servísio aikove aja entéro.
Pe tercer mbaʼe aaprende vaʼekue haʼe iñimportanteha oñemboʼe umi héntepe pe idióma haʼekuéra oñeʼẽvape. Chemitã guive che añeʼẽkuaa vaʼekue holandés, inglés, papiamento ha sranantongo (hérava avei sranan), pe idióma oñeñeʼẽvéva Surinámpe. Péro pe kaʼaguýpe ahechakuaa umi hénte ohenduseveha pe predikasión oñeñeʼẽramo chupekuéra pe idióma haʼekuéra oñeʼẽvape. Chéve g̃uarã ijetuʼueterei vaʼekue añeʼẽ umi idióma haʼekuéra oipurúva, por ehémplo umíva apytépe oĩ pe idióma saramacano. Péro ovale kuri la péna pe esfuérso ajapo vaʼekue. Upéicha rupi ikatu kuri amboʼe pe añetegua heta persónape, ikatu rupi añemongeta hendivekuéra iñeʼẽtépe.
Heta vése añemotĩ vaʼekue avei añeʼẽ jave upe idióma. Por ehémplo peteĩ vuéltape aporandu peteĩ estudiántepe mbaʼéichapa oñeñandu, pórke haʼe ipyʼa hasy hína kuri oikóvo. Péro avía sído aporandu chupe haʼépa hyeguasu hína, ha upéva ndahaʼéi vaʼekue la ojagarra porãitereíva chehegui. Jepe ajekivoka mimi ha añemotĩ añeʼẽ jave upe idióma, lomímonte añehaʼãmbaite ikatu hag̃uáicha apredika chupekuéra iñidiomaitépe.
AGUEREKO HETAVE RRESPONSAVILIDA
Áño 1970-pe añenombra vaʼekue superintendénte de sirkuíto. Upe áñope ahechauka pe vidéo hérava “Visitando la central mundial de los testigos de Jehová” umi grúpo aisládope oĩva pe kaʼaguýpe. Ikatu hag̃uáicha roho hendapekuéra, unos kuánto ermáno ha che tekotevẽta kuri roho pe rríorupi, ha upearã roipuru peteĩ kanóa de madéra ipoʼi pukúva. Pe ore kanóape rogueraha peteĩ heneradór, gasoíl, peteĩ lampĩu, ha umi ekípo ikatu hag̃uáicha roprojekta pe vidéo. Upéi rogueraha vaʼerã kuri umi mbaʼe pe kaʼaguýre rog̃uahẽ meve pe lugár rohechaukatahápe pe vidéo. La chemanduʼavéva koʼã viáhegui haʼe hína mbaʼeichaitépa umi héntepe ogusta vaʼekue umi vidéo. Avyʼaiterei ikatu haguére aipytyvõ koʼã héntepe oikuaave hag̃ua Jehovápe ha avei iñorganisasión oĩva ko yvy ape ári. Ha ikatu haʼe umi sakrifísio ajapo vaʼekue noñekomparaiha umi
vendisión porãite ahupyty vaʼekuére aservi rupi Jehovápe koʼã lugárpe.ATOPA PETEĨ CHE IRŨRÃMI
Ethel ha che romendárõ guare septiembre de 1971-pe
Ahechakuaáramo jepe chesoltéro rupi ikatuha ajapo porãve che servísio, ahechakuaa avei aikotevẽha peteĩ che irũrãmi oiko vaʼerã chendive tóda la vída. Upémarõ añemboʼe Jehovápe ikatu hag̃uáicha atopa che rembirekorã ikatu vaʼerãichagua vyʼápe oaguanta chendive pe servísio de tiémpo kompléto pe kaʼaguýpe. Mas o méno un áño upe rire roñepyrũ roñokonose Éthelndi, peteĩ prekursóra espesiál iguápa ha ikyreʼỹetereíva. Imitã guive, Éthelpe ogustaiterei vaʼekue apóstol Pablo ehémplo ha haʼe osegise vaʼekue upéva, oñemeʼẽmbaitese Jehová servísiope ojapo haguéicha apóstol Pablo. Upéi romenda septiembre de 1971-pe ha roñepyrũ roservi pe sirkuítope oñondive.
Ethel oiko vaʼekue peteĩ família imboriahúvape, upévare ndoguerekói vaʼekue heta mbaʼe. Upéicha rupi ojadapta porã pe servísio rojapóvare pe kaʼaguýpe. Por ehémplo rohóta jave rovisita umi kongregasión ndoroguerahái vaʼekue mbaʼeve guasu, ha rojaojohéi ha rojahu umi rríope. Avei rojepokuaámi roʼu umi mbaʼe oservíva oréve pe ogajára ropytahápe, por ehémplo teju, piráña térã oimeraẽ mbaʼe haʼekuéra omarikáva pe kaʼaguýre térã oguenohẽva pe rríogui. Ndaipóri jave pláto, roʼúmi vaʼekue umi pakova roguépe, ha ndaipóri jave tembiporu, ore rokaru ore pópente. Ethel ha che roñandu rojapo rupi koʼãichagua sakrifísio Jehovápe g̃uarã, haʼe tuichaiterei orepytyvõ hague ore matrimóniope (Ecl. 4:12). Koʼã experiénsia rohasa vaʼekue oñondive norokambiaichéne mbaʼevete asýre.
Rojukuévo rovisita rire umi ermáno oikóva pe kaʼaguýpe, oiko kuri orerehe umi mbaʼe amombeʼu vaʼekue ñepyrũrã. Pe ore kanóa oike rire pe korriénte imbaretehápe, oñapymi kuri orehegui péro upéi osẽ jey. Haʼetépe rogueraha umi chaléko salvavída ha ndoroʼái pe kanóagui, péro la ore kanóape oikepaite kuri la y. Upémarõ romombopa
umi tembiʼu roreko vaʼekue unos kuánto mbaʼyrúpe ha roipuru umíva ronohẽ hag̃ua pe y pe kanóagui.Romombopa rupi ore rembiʼu, ndororekovéima kuri mbaʼeve roʼu vaʼerã. Upémarõ roñepyrũ ropeska roho aja pe rríore, péro noroguenohẽi kuri mbaʼevete. Upévare roñemboʼe Jehovápe ikatu hag̃uáicha omeʼẽmi oréve ore rembiʼurã upe díape. Upe riremínte peteĩ ermáno opoi iliñáda pe rríope ha oguenohẽ peteĩ pira tuicha porãva. Upéicha lo 5 roiméva pe kanóape ikatu kuri rosena porã oreryg̃uatã meve upe pyhare.
MÉNA, TÚA HA SUPERINTENDÉNTE DE SIRKUÍTO
Cinco áño roime rire pe sirkuítope oñondive, Ethel ha che rohupyty peteĩ vendisión norohaʼarõietéva, Ethel opyta rupi hyeguasu. Avyʼaiterei aikuaárõ guare upe notísia, ndaikuaáiramo jepe mbaʼépa oikóta orehegui amo gotyove. Ethel ha che rosegise kuri pe servísio de tiémpo komplétope ikatúma guive. Áño 1976-pe onase pe primer ore família hérava Ethniël, ha 2 áño imédio upe rire onase pe segundo ore família hérava Giovanni.
1983-pe aasistírõ guare peteĩ vautísmope Rrío Tapanahónipe, opytáva ag̃ui Godo Hólogui, éste gotyo Surinámpe
Hetaiterei rupi la nesesida Surinámpe upérõ guare, pe sukursál heʼi chéve asegi hag̃ua aservi de superintendénte de sirkuíto amongakuaa aja che familiakuéra. Haʼekuéra imitã aja, cheasigna vaʼekue hikuái aservi hag̃ua umi sirkuíto saʼive kongregasión oguerekóvape. Upéicha rupi, upéva opermiti chéve aservi hag̃ua unas kuánta semána káda mes kómo superintendénte de sirkuíto. Ha umi ótra semána hembýva aservi kómo prekursór peteĩ kongregasión oreasignávape hikuái. Ethel ha umi mitã oho vaʼekue chendive avisita jave umi kongregasión oĩva ag̃ui ógagui. Péro aviaha vaʼekue cheaño avisitáta jave umi kongregasión oĩva pe kaʼaguýpe ha avei umi asamblearã.
Aservírõ guare de superintendénte de sirkuíto roviahámi umi kanóape rovisita hag̃ua umi kongregasión opytávape mombyry
Tekotevẽ kuri aorganisa porã umi mbaʼe ajapótava ikatu hag̃uáicha akumpli porã umi rresponsavilida aguerekóva. Ahecha ikatu hag̃uáicha roguereko káda semána la ore estúdio de família. Ha avisita jave umi kongregasión oĩva pe kaʼaguýpe, Ethel ojapo pe estúdio de família umi mitãndi. Upéicharõ jepe, Ethel ha che rojepokuaámi rokomparti ore famíliandi, por ehémplo rohuga hendivekuéra térã rosẽ rojepasea. Heta vése tárde peve pyhare apytámi vaʼerã aorganisa umi traváho oĩva kongregasiónpe, ha Ethel ohechauka haʼeha pe tembireko ikatupyrýva oñeñeʼẽva Proverbios 31:15-pe. Haʼe opuʼã koʼẽ mboyve oprepara pe desajúno ikatu hag̃uáicha rolee pe téxto diário ha rorambosa ore famíliandi oho mboyve hikuái eskuélape. Aagradeseterei ningo Jehovápe omeʼẽ haguére chéve che rembirekorã peteĩ ermána iguapaitereíva. Haʼe siémpre chepytyvõva ikatu hag̃uáicha akumpli porã umi rresponsavilida aguerekóva Jehová organisasiónpe.
Ore roñehaʼãmbaite vaʼekue ikatu hag̃uáicha ore familiakuéra ohayhu Jehovápe ha oservise chupe. Ore roipotaiterei kuri ore familiakuéra oguereko kómo méta pe servísio de tiémpo kompléto, péro ndahaʼéi ore roipota haguérente, síno ijeheguiete odesidi haguére hikuái. Ore siémpre roʼe chupekuéra javyʼaitereiha jaservíramo de tiémpo kompléto, ha romombeʼu avei chupekuéra avése ijetuʼuha, péro upéicharõ jepe Jehová oreajuda hague ha orevendesi hague kómo família. Avei roñehaʼãmbaite ore familiakuéra ojeheʼa hag̃ua umi ermáno ijerovia mbaretévare ha oñemeʼẽmbaitéva avei Jehová servísiope.
Jehová omeʼẽmbaite vaʼekue oréve umi mbaʼe roikotevẽva romongakuaa hag̃ua la ore família. Che añehaʼã avei ajapo opa ikatúva ikatu hag̃uáicha amantene la che família. Aservi rupi kómo prekursór espesiál pe kaʼaguýpe, tuicha chepytyvõ ikatu hag̃uáicha añeorganisa porã ha aipuru porã pe pláta aguerekóva rojogua hag̃ua umi mbaʼe roikotevẽva. Péro heta vése roñehaʼãmbaitéramo jepe, ndaikatúi rokuvripa umi nesesida roguerekóva. Péro umícha jave rohecha mbaʼéichapa Jehová orepytyvõ rohupyty hag̃ua umi mbaʼe roikotevẽmíva. Por ehémplo, áño 1986 guive 1992 peve oñepuʼã vaʼekue pe goviérnore Surinámpe, ha umíva umi áñope ijetuʼueterei vaʼekue oñekonsegi hag̃ua umi mbaʼe oñekotevẽva. Upéicharõ jepe, Jehová nombofaltái oréve mbaʼeve (Mat. 6:32).
APENSA UMI MBAʼE AHASA VAʼEKUÉRE
De iskiérda a derécha: Che ha che rembireko Ethel
Che raʼy majór Ethniël ha hembireko Natalie
Che raʼy Giovanni ha hembireko Christal
Apensávo umi mbaʼe rohasámava Jehová servísiope, ahechakuaa mbaʼéichapa Jehová ojepyʼapy orerehe ha orepytyvõ rovyʼa hag̃ua. Ore familiakuéra haʼe peteĩ vendisión iporãitereíva oréve g̃uarã, ha tuichaiterei priviléhio ningo roipytyvõ chupekuéra oservi hag̃ua Jehovápe. Ore ningo rovyʼaiterei haʼekuéra avei odesidi haguére oservitaha de tiémpo kompléto. Ethniël ha Giovanni ohómava avei umi eskuéla oguerekóvape ñane organisasión, ha koʼág̃a haʼekuéra oservi hína pe sukursál de Surinámpe hembirekokuéra ndive.
Ethel ha che ningo koʼág̃a oreedavéma, péro rosegi gueteri rombaʼapo Jehovápe g̃uarã kómo prekursór espesiál. Legálmente orerembiapoiterei rupi, koʼag̃aite peve naaprendéiti ayta hag̃ua. Péro nambyasýi upéva. Apensávo umi mbaʼe ahasa vaʼekuére, rreálmente ahechakuaa aelehi porãiterei hague adesidírõ guare aservi Jehovápe de tiémpo kompléto chemitã guive.
b Willem van Seijl rembiasakue, “La realidad ha superado mis expectativas”, osẽ vaʼekue ñande rrevísta ¡Despertad! 8 de octubre de 1999-pe.