1. ¿Mbaʼépa heʼise la heʼíva 2 Timoteo 4:5?

 SAPYʼÁNTE ningo ikatu ijetuʼu ñandéve jasegi hag̃ua ñandefiél Jehovápe ha iñorganisasiónpe. ¿Péro mbaʼépa ikatu hína ñanepytyvõ upéicha jave? Upearã iñimportánte ñandepositívo ha jasegi jajerovia mbarete, heʼiháicha 2 Timoteo 4:5 (elee). ¿Péro mbaʼépa heʼise ko téxto? Heʼise jareko jave peteĩ provléma ñaime vaʼerãha trankílo, ha ñañehaʼã jahecha pe situasión Jehová ohechaháicha. Jajapóramo upéicha, ndajahejamoʼãi ñanedomina umi mbaʼe ñañandúva.

2. ¿Mbaʼépa jahecháta ko artíkulope?

² Pe ótro artíkulope jahecha kuri mbohapy situasión Satanás oipurúva ñanemokangy hag̃ua. Ha koʼág̃a ko artíkulope jahecháta mbohapy situasión ikatúva oñepresenta kongregasiónpe voi, ha ikatúva avei omoĩ a pruéva la ñande jerovia. Umíva hína 1) ñanemoñeñandu vai jave peteĩ ermáno, 2) oĩ jave ñandekorrehíva, ha 3) ijetuʼu jave ñandéve jaasepta umi kámbio oĩva Jehová organisasiónpe. ¿Mbaʼépa ikatu ñanepytyvõ jasegi hag̃ua ñandefiél Jehovápe ha iñorganisasiónpe jahasa jave koʼãichagua situasión?

3. ¿Mbaʼépa ikatu hína ñapensa oiméramo peteĩ ermáno térã ermána ñanemoñeñandu vai raʼe?

³ ¿Ojapómavapa raʼe peteĩ ermáno térã ermána algúna kósa nemoñeñandu vaíva, ikatu voi por ehémplo peteĩ ansiáno? Oiméramo oiko raʼe upéva nderehe, ikatu eime segúro pe ermáno ndojapói hague kuri upéva a propósito (Rom. 3:23; Sant. 3:2). Péro upéicharõ jepe, lomímonte hasy asy ndéve la haʼe ojapo vaʼekue. Ikatu oime inklusíve nderekevéi ha ikatu voi epensa: “La oiméramo péicha ojapo peteĩ ermáno ko kongregasiónpe,  ¿seráiko kóva hína rreálmente la Jehová organisasión?”. Péro ñañatende vaʼerã pórke en rrealida Satanás la oipotáva péicha ñapensa (2 Cor. 2:11). Koʼãichagua sentimiénto ningo ikatu hína ñanemomombyry Jehovágui ha iñorganisasióngui. ¿Péro mbaʼépa ikatu jajapo upéicha jave ani hag̃ua oiko ñanderehe upéva?

4. ¿Mbaʼépa oipytyvõ vaʼekue Josépe ani hag̃ua ipyʼaro iñermanokuérare, ha mbaʼépa ñanemboʼe iñehémplo? (Génesis 50:19-21).

⁴ Aníkena ñandepyʼaro. José imitãrõ guare, iñermanokuéra otrata vaieterei vaʼekue chupe, ndochaʼéi hese ha algúno ojukase voi chupe (Gén. 37:4, 18-22). Ha orekórõ guare hikuái la oportunida, ovende Josépe de esklávo. Upéicha rupi haʼe 13 áñore ohasa asyeterei vaʼekue. Upe tiémpope haʼe ikatu kuri opensa Jehová ndohayhuiha chupe ha oheja rei hague chupe. Péro haʼe ndojapói upéva. Jepe la isituasión ijetuʼueterei vaʼekue, haʼe lomímonte osegi trankílo ha oñehaʼã ohecha pe situasión Jehová ohechaháicha. Upévare orekórõ guare la oportunida oñevenga hag̃ua la iñermanokuérare, haʼe ndojapói upéva. Upéva rangue haʼe operdona chupekuéra ha ohechauka ohayhuha chupekuéra (Gén. 45:4, 5). ¿Mbaʼérepa José ojapo vaʼekue upéva? Pórke haʼe osegi kuri ipositívo. Oiko rangue oñekonsentraiterei iprovlemakuérare, haʼe oñehaʼã ohecha mbaʼérepa Jehová opermiti haʼe ohasa umichagua mbaʼe (elee Génesis 50:19-21). ¿Mbaʼépa ñanemboʼe iñehémplo? Oiméramo peteĩ ermáno ñanemoñeñandu vai raʼe, ani ñandepochy Jehovándi ni ñapensa haʼe ñandereja rei hague. Upéva rangue iporãvéta ñapensa mbaʼéichapa koʼág̃a haʼe ñanepytyvõ hína ñaaguanta hag̃ua upe situasión. Avei ñanemanduʼa vaʼerã jahayhu vaʼerãha ñane ermanokuérape, pórke upéicha ndajaikomoʼãi ñañekonsentraiterei la idefektokuérare (1 Ped. 4:8).

5. ¿Mbaʼépa oipytyvõ vaʼekue Miquéaspe haʼe oñandúrõ guare unos kuánto ermáno otrata vai hague chupe?

⁵ Jahechamína Miqueas ehémplo. b Haʼe ningo peteĩ ansiáno oikóva América del Súrpe, ha haʼe oñandu peteĩ vuéltape unos kuánto ansiáno otrata vai hague chupe. Haʼe heʼi: “Che ningo núnka nañeñanduvaíriva la peichaite peve. Ndaikatúi voi kuri ni ake pyharekue ha heta vése cherasẽ voi”. Upéicharõ jepe, Miqueas oñehaʼã oñetrankilisa ha ndohejái odomina chupe umi mbaʼe oñandúva. Haʼe pyʼỹinte oñemboʼe Jehovápe ha ojerure chupe ijespíritu sánto ikatu hag̃uáicha oaguanta upe situasión. Avei oñemoĩ oheka heta informasión ñane puvlikasionkuérape ikatúva oipytyvõ chupe upe situasiónpe. ¿Mbaʼépa ñanemboʼe iñehémplo? Oiméramo peteĩ ermáno térã ermána ñanemoñeñandu vai raʼe avei ñandéve, ñañehaʼã vaʼerã ñañetrankilisa ha ani jaheja ñanedomina umi mbaʼe ñañandúva. Ñandéicha avei ningo ñane ermanokuéra ohasa heta mbaʼe ijetuʼúva, upévare ndajaikuaái mbaʼérepa haʼekuéra heʼi térã ojapo raʼe algúna kósa. Upéicha jave ñañemboʼékena Jehovápe ha jajerure chupe tañanepytyvõ ñañemoĩ hag̃ua pe ermáno lugárpe. Upéva ñanepytyvõta ani hag̃ua ñapensa vai hese ha ñambohasa reínte hag̃ua la ojapo vaʼekue ñanderehe (Prov. 19:11). Ñanemanduʼákena Jehová ohechapaiteha hína umi mbaʼe jahasáva, ha katuete ñanemombaretéta ñaaguanta hag̃ua umi mbaʼe ijetuʼúva (2 Crón. 16:9; Ecl. 5:8).

6. ¿Mbaʼérepa iñimportánte jahechakuaa Jehová ñandekorrehiha ñanderayhu rupínte? (Hebreos 12:5, 6, 11).

⁶ Legálmenteko ndaigústoi oĩ jave ñandekorrehíva, ha sapyʼánte ñandejopi rasy voi upéva. Péro jaikóramo ñapensaiterei umi mbaʼe  ñañandúvarente, amo ipahápe nañapenamoʼãi la ojeʼévare ñandéve ha ñapensáta voi iñinhústo hague hikuái. Ha jajapóramo upéva, en rrealida nañapensái hína Jehová opensaháicha, pórke haʼe ningo ñandekorrehi ñanderayhu rupínte (elee Hebreos 12:5, 6, 11). Jaikóramo ñapensaiterei umi mbaʼe ñañandúvarente jajekorrehi haguére, en rrealida ñameʼẽ hína peteĩ oportunida Satanáspe ñandereity hag̃ua. Pórke haʼe la ndoipotáiva ñapena umi konsého oñemeʼẽvare ñandéve, ha oipota voi katu ñañemomombyry Jehovágui ha iñorganisasióngui. Upévare, ¿mbaʼépa ikatu jajapo oiméramo ñamboguapyeterei hína ñandejehe oĩ rupi ñandekorrehíva?

7. a) Ohechaukaháicha pe fótope, ¿mbaʼe asignasiónpa Jehová omeʼẽ vaʼekue Pédrope haʼe oasepta rire pe disiplína? b) ¿Mbaʼépa ñanemboʼe Pedro ehémplo?

⁷ Jaasepta oĩ jave ñandekorrehíva ha ñakambia tekotevẽhápe. Heta vése ningo Jesús okorrehi vaʼekue Pédrope umi ótro apóstol rovake (Mar. 8:33; Luc. 22:31-34). ¡Katuete ningo Pedro otĩne raʼe upe haguére! Péro haʼe lomímonte osegi vaʼekue ifiél Jesúspe. Haʼe oasepta ojavy hague ha okambia tekotevẽhápe. Upéicha rupi Jehová ovendesi vaʼekue chupe ha omeʼẽve chupe hetave rresponsavilida kongregasiónpe (Juan 21:15-17; Hech. 10:24-33; 1 Ped. 1:1). ¿Mbaʼépa ikatu ñaaprende Pedro ehémplogui? Ñande sapyʼánte ikatuha avei ñatĩ oĩ jave ñandekorrehíva. Péro ndovaléi ñañekonsentraiterei upévarente. Upéva rangue iporãvéta jaasepta la ojeʼéva ñandéve ha ñakambia tekotevẽhápe. Jajapóramo upéva, ñandedeprovechovéta ñane ermanokuérape ha Jehová ojevale porãvéta ñanderehe.

8, 9. ¿Mbaʼéichapa oñeñandu kuri Bernardo ojekorrehírõ guare chupe, péro mbaʼépa oipytyvõ chupe okambia hag̃ua opensa lája?

⁸ Jahechamína mbaʼépa oiko vaʼekue peteĩ ermáno héravare Bernardo. Haʼe ningo oiko Mozambíquepe ha oservi vaʼekue de ansiáno peteĩ kongregasiónpe, péro upéi ou operde upe priviléhio. Haʼe heʼi: “Ñepyrũrã ningo che añeñandu vaieterei kuri ha ndachegustái la ojejapo vaʼekue cherehe”. Bernárdope ningo okevrantaiterei vaʼekue la oñepensátava hese kongregasiónpe operde haguére la ipriviléhio. Upévare haʼe heʼi: “Heta mése haguépe raẽ ikatu kuri aasepta la disiplína, ha hasýpe ajerovia jey Jehováre ha iñorganisasiónre”. ¿Mbaʼépa oipytyvõ raʼe Bernárdope ojapo hag̃ua upéva?

⁹ Bernardo okambia kuri opensa lája. Haʼe heʼi: “Che aĩrõ guare de ansiáno, aipurúmi  vaʼekue Hebreos 12:7 amokyreʼỹ hag̃ua ermanokuérape oasepta hag̃ua oĩ jave okorrehíva chupekuéra. Péro upéi ahechakuaa chehaitéma tekotevẽha kuri asegi upe konsého”. Upévare Bernardo oñepyrũ ojapo heta mbaʼe ikatu hag̃uáicha ojerovia jey Jehováre ha iñorganisasiónre. Haʼe oñemoĩ vaʼekue oleeve la Biblia ha odedikave tiémpo ikatu hag̃uáicha ojepyʼamongeta hese. Chupe ningo okevrantáiti kuri mbaʼépa la ermanokuéra opensáta hese, péro haʼe lomímonte osẽ hendivekuéra predikasiónpe ha opartisipa umi rreunionkuérape. Ha kon el tiémpo oiko jey chugui ansiáno. ¿Mbaʼépa ñanemboʼe iñehémplo? Oiméramo nde ejekorrehi raʼe Bernárdoicha, katuete etĩta avei ñepyrũrã. Péro ani eñekonsentraiterei upévare. Upéva rangue easepta pe konsého ha ekambia tekotevẽhápe (Prov. 8:33; 22:4). c Ejapóramo upéicha, Jehová katuete nevendesíta esegi haguére ndefiél chupe ha iñorganisasiónpe.

10. ¿Mbaʼeichagua kámbiopa oime vaʼerã ijetuʼu raʼe umi israelítape?

¹⁰ Oĩ jave peteĩ kámbio Jehová organisasiónpe ikatu hína rreálmente ijetuʼu. Péro nañañatendéiramo, upéva ikatu voi hína ñanemomombyry Jehovágui. Por ehémplo, ñapensamíntena mbaʼépa oiko vaʼekue yma umi israelita tiémpope. Jehová omeʼẽ mboyve chupekuéra umi léi, umi kuimbaʼekuéra omoakãva ogapy ojapo vaʼekue umi traváho ojapóva peteĩ saserdóte. Por ehémplo, ojapo hikuái umi altár ha ohapy sakrifísio Jehovápe g̃uarã (Gén. 8:20, 21; 12:7; 26:25; 35:1, 6, 7; Job 1:5). Péro oñemeʼẽ rire chupekuéra pe léi, Jehová odesidíma umi Aarón familiare añoite haʼetaha saserdóte. Upévare upe guive peteĩ kuimbaʼe ndahaʼéiva Aarón familiare ojapóramo peteĩ traváho otokáva umi saserdótepe, omano vaʼerã kuri (Lev. 17:3-6, 8, 9). d Ikatu oime upévare raʼe la Coré, Datán ha Abiram ha umi ótro 250 kuimbaʼe opuʼã Moisés ha Aarón kóntrape (Núm. 16:1-3). Ndaikatúi ningo añete jaasegura upéva pórke la Biblia nomombeʼúi ñandéve. Péro tahaʼe haʼeháicha, koʼã kuimbaʼe ndosegíri vaʼekue ifiél Jehovápe. ¿Ha mbaʼépa ikatu jaʼe ñandejehe? ¿Mbaʼépa ikatu jajapo ñande oiméramo ijetuʼu ñandéve jaasepta umi kámbio?

11. ¿Mbaʼépa ñanemboʼe umi cohatita ehémplo?

¹¹ Jaapojákena ñande pyʼaite guive umi kámbio ojejapóva. Umi israelita oĩrõ guare pe desiértope, haʼekuéra orova ha orova vaʼekue la ikampaménto. Ha káda ke ojejapo upéva, umi cohatita oraha vaʼekue pe Árka del Pákto enterove umi israelita renondépe (Núm. 3:29, 31; 10:33; Jos. 3:2-4). ¡Ha upéva ningo tuichaiterei priviléhio vaʼekue chupekuéra g̃uarã! Péro umi israelita oike rire pe Tiérra Prometídape, upéva okambiaite. ¿Mbaʼérepa? Pórke upe moménto guive pe Árka ndojeguerovavéima. Upévare okambia avei umi cohatitakuéra asignasión. Por ehémplo, Salomón ogovernaha tiémpope oĩ vaʼekue umi opurahéiva, ha umi oñenkargáva okẽre ha umi depósitore (1 Crón. 6:31-33; 26:1, 24). Péro la Biblia ndeʼíri en ningún moménto umi cohatita ojeplagea hague okambia haguére la iñasignasión, ha ndeʼíri avei haʼekuéra ojerure hague peteĩ priviléhio iñimportantevéva. ¿Mbaʼépa ñanemboʼe la iñehemplokuéra? Ñande avei jaasepta vaʼerãha enteroite umi kámbio ojejapóva Jehová organisasiónpe, oiméramo jepe upéva oafekta peteĩ asignasión ñande jaguerekóva. Ñande  javyʼa vaʼerã tahaʼe haʼéva la jajapóva Jehová servísiope. Pórke en rrealida Jehovápe g̃uarã la iñimportantevéva, ndahaʼéi hína pe asignasión jaguerekóva, síno ñaneñeʼẽrendu chupe (1 Sam. 15:22).

12. ¿Mbaʼéichapa oñeñandu kuri Sara okambiárõ guare iñasignasión?

¹² Jahechamína ermána Sara experiénsia. Ko ermána ningo ombaʼapo jepe vaʼekue Betélpe 23 áñore, ha ohayhueterei voi upe priviléhio. Péro upéi ou oñekambia la iñasignasión ha opyta de prekursóra espesiál. Haʼe heʼi upe kámbio ojapo vaieterei hague hese ha oñandu voi ndovaleveimaha mbaʼeverã. Hiʼarive umi ermanokuéra ikongregasionpegua heʼi voi chupe: “Nde ejapo porãvérire la nde traváho, umi ermáno Betelpegua hakateʼỹta kuri nderehe”. Peteĩ tiémpore Sara oĩ vaieterei kuri ha omombeʼu voi káda pyhare oñemoĩ hague hasẽ. Péro haʼe heʼi: “Núnka ndadudái vaʼekue Jehová ha iñorganisasión cherayhuha”. ¿Mbaʼépa oipytyvõ vaʼekue Sárape oreko hag̃ua upe aktitu?

13. ¿Mbaʼépa oipytyvõ vaʼekue Sárape oñeñandu vaietérõ guare?

¹³ ¿Mbaʼépa oipytyvõ raʼe Sárape anivéma hag̃ua oñeñandu vaiete? Haʼe oñemoĩ kuri olee umi artíkulo oñeʼẽva isituasiónre. Haʼe omombeʼu prinsipálmente oipytyvõiterei hague chupe peteĩ artíkulo hérava “Usted puede afrontar el desánimo”, osẽ vaʼekue pe rrevísta La Atalaya 1 de febrero de 2001-pe. Upe artíkulope oñeñeʼẽ kuri Marcos ehémplore, haʼéva hína pe eskritór bíblico, ha omombeʼu posívlemente haʼe oñeñandúne hague avei Sáraicha oñekambia rupi chugui iñasignasión. Sara heʼi: “Marcos ehémplo ningo la hústamente aikotevẽ vaʼekue anivéma hag̃ua añeñandu vai”. Sara omombeʼu haʼe oñepyrũ hague avei ojeheʼave iñamigokuérare, osegi hague opredika ermanokuérandi ha ndoikovéima hague opensaiterei umi mbaʼe oñandúvarente. Haʼe ontende pe espíritu sánto haʼeha hína la ogiáva umi mbaʼe ojedesidíva Jehová organisasiónpe, ha umi ermáno rreálmente ojepyʼapyha hese. Ha ohechakuaa avei Jehová organisasión ojapoha hína la tekotevẽva guive, ikatu hag̃uáicha oñekumpli porã pe traváho Jehová onkarga vaʼekue ñandéve.

14. ¿Mbaʼe kámbiopa ijetuʼueterei vaʼekue ermáno Vládope, péro mbaʼépa oipytyvõ vaʼekue chupe?

¹⁴ Eslovéniape oĩ peteĩ ansiáno hérava Vlado ha orekóva 73 áño. Haʼe omombeʼu ijetuʼueterei hague chupe ikongregasión oñefusionárõ guare ótra kongregasión ndive, ha oñemboty  la isalonkuéra. Haʼe heʼi: “Nantendéi kuri mbaʼérepa oñemboty vaʼerã peteĩ Salón iporãitéva. Hiʼarive rombopyahupa ramoite kuri la ore Salón. Ha che haʼe rupi karpintéro, che voi ajapo vaʼekue heta umi muévle oĩva upépe. Ha ko kámbio koʼýte ijetuʼu kuri ore ijedávape g̃uarã”. ¿Péro mbaʼépa oipytyvõ raʼe Vládope oapoja hag̃ua ko kámbio? Haʼe heʼi: “Siémpre ningo ou porãta ñandéve ñaneñeʼẽrendu Jehovápe ha iñorganisasiónpe. Koʼãva ningo haʼe hína peteĩ entrenamiénto ñandéve g̃uarã, pórke amo gotyove koʼýte oĩta hetave kámbio”. ¿Ha mbaʼépa ikatu jaʼe ñandejehe? ¿Ñandévepa ijetuʼu avei jaasepta hag̃ua peteĩ kámbio oĩva Jehová organisasiónpe, térã peteĩ asignasión pyahu oñemeʼẽva ñandéve? Oiméramo upéicha, ikatu eime segúro Jehová ontende porãitereiha mbaʼéichapa eñeñandu, ha katuetei nevendesíta resegíramo ndefiél chupe ha iñorganisasiónpe (Sal. 18:25).

15. ¿Mbaʼépa jajapokuaa ikatu hag̃uáicha jasegi ñaneñeʼẽrendu Jehovápe?

¹⁵ Amáske hiʼag̃ui pe fin, ikatu jaʼe pe kongregasiónpe voi oĩtaha heta situasión ijetuʼutahápe ñandéve jasegi hag̃ua ñandefiél Jehovápe. Upévare tekotevẽtamante ñandepositívo ha ñañehaʼã jahecha pe situasión Jehová ohechaháicha. Por ehémplo, ñañandúramo peteĩ ermáno ñandetrata vai hague, ani japyta ñandepyʼaro. Oĩramo peteĩ ñandekorrehíva, ñatĩramo jepe ñañehaʼã jasegi upe konsého ha ñakambia tekotevẽhápe. Ha oĩramo peteĩ kámbio Jehová organisasiónpe ñandeafektáva ñandéve, lomímontekena ñañehaʼã jaasepta upéva ha ñaneñeʼẽrendu Jehovápe.

16. ¿Mbaʼépa nepytyvõta esegi hag̃ua ndefiél Jehovápe ha iñorganisasiónpe?

¹⁶ Nde ningo ikatu esegi ndefiél Jehovápe ha iñorganisasiónpe, ijetuʼúramo jepe sapyʼánte la situasión. Upearã tekotevẽ ndepositívo, esegi eime trankílo ha eñehaʼã ehecha pe situasión Jehová ohechaháicha. Tuichaiterei avei nepytyvõta restudiáramo umi Jehová siervokuéra yma guare ehémplo, pórke haʼekuéra sapyʼánte ohasa vaʼekue avei umi mbaʼe ñande jahasáva koʼág̃arupi. Ejerurekuaa avei ajúda Jehovápe ha ani eñemomombyry ermanokuéragui. Rejapóramo koʼã mbaʼe, tahaʼe haʼéva la Satanás ojapóva nemomombyry hag̃ua Jehovágui, haʼe núnka nokonsegimoʼãi upéva, ha nde esegíta ndefiél Jehovápe ha iñorganisasiónpe (Sant. 4:7).